महोदरस्तुतिः तुरेण प्रोक्ता
श्रीगणेशाय नमः ॥
(समागत्य स दैत्येन्द्रो ननाम स महोदरम् ।
भक्तिभावसमायुक्तः पूजयामास यत्नतः ॥ २२॥
पूजयित्वा यथान्यायं पुनस्तं प्रणनाम सः ।
कृत्वा करपुटं मोहस्तुष्टाव च महोदरम् ॥ २३॥)
मोहासुर उवाच -
नमस्ते ब्रह्मरूपाय महोदर! सुरूपिणे ।
सर्वेषां भोगभोक्त्रे वै देहदेहिमयाय च ॥ २४॥
मूषकारूढदेवाय त्रिनेत्राय नमो नमः ।
चतुर्भुजाय देवानां पतये ते नमो नमः ॥ २५॥
अनादये च सर्वेषामादिरूपाय ते नमः ।
विनायकाय हेरम्ब! दीनपालाय वै नमः ॥ २६॥
गणेशाय निजानन्दपतये ब्रह्मनायक! ।
सिद्धिबुद्धिप्रदात्रे वै ब्रह्मभूताय वै नमः ॥ २७॥
ब्रह्मभ्यो ब्रह्मदात्रे वै योगशान्तिमयाय च ।
योगिनां पतये तुभ्यं योगिभ्यो योगदायक ! ॥ २८॥
सिद्धिबुद्धिपते! नाथ! एकदन्ताय ते नमः ।
शूर्पकर्णाय शूराय वीराय च नमो नमः ॥ २९॥
सर्वेषां मोहकर्त्रे वै भक्तेभ्यः सुखदायिने ।
अभक्तानां विशेषेण विघ्नकर्त्रे नमो नमः ॥ ३०॥
मायाविने च मायाया आधाराय नमो नमः ।
मायिभ्यो मायया चैव भ्रान्तिदाय नमो नमः ॥ ३१॥
किं स्तौमि त्वां गणाध्यक्ष! यत्र वेदाः सहाङ्गकाः ।
शान्तिं प्राप्तास्तथाऽपि त्वं संस्तुतोऽसि दयापरः ॥ ३२॥
धन्यौ मे पितरौ ज्ञानं तपः स्वाध्याय एव च ।
धन्यं वपुश्च देवेश! येन दृष्टं पदाम्बुजम् ॥ ३३॥
महोदर उवाच ।
(मोहासुर वृणुष्व त्वं वरं यं मनसीप्सितम् ।
दास्यामि भक्तिमोहेन मोहितोऽहं त्वयाऽधुना ॥ ३५॥
त्वां हन्तुं क्रोधसंयुक्त आगतोऽहं न संशयः ।
शरणागतमेवं त्वां हन्मि नो भक्तिसंयुतम् ॥ ३६॥)
मदीयं सोत्रमेतद्वै सर्वदं यत्त्वया कृतम् ।
भविष्यति जनायैव पठते शृण्वतेऽसुर! ॥ ३७॥
मोहनाशकरं चैव भुक्तिमुक्तिप्रदं भवेत् ।
धनधान्यादिदं सर्वं पुत्रपौत्रसुखप्रदम् ॥ ३८॥
इति तुरेण प्रोक्ता महोदरस्तुतिः समाप्ता । ३.१०
- ॥ मुद्गलपुराणं तृतीयः खण्डः । अध्यायः १० । ३.१०। २४-३८॥
- .. mudgalapurANaM tR^itIyaH khaNDaH . adhyAyaH 10 . 3.10. 24-38..
Encoded by Ajit Krishnan
Proofread by Ajit Krishnan, PSA Easwaran