Narasimha Rinamochana Stotram

नरसिंहऋणमोचनस्तोत्रम्

देवताकार्यसिद्धयर्थं सभास्तम्भसमुद्भवम् । श्रीनृसिंह महावीरं नमामि ऋणमुक्तये ॥ १॥ लक्ष्म्यालिङ्गितवामाङ्गं भक्तानां वरदायकम् । श्रीनृसिंह महावीरं नमामि ऋणमुक्तये ॥ २॥ आन्त्रमालाधरं शङ्खचक्राब्जायुधधारिणम् । श्रीनृसिंह महावीरं नमामि ऋणमुक्तये ॥ ३॥ स्मरणात्सर्वपापघ्नं कद्रूजविपनाशनम् । श्रीनृसिंह महावीरं नमामि ऋणमुक्तये ॥ ४॥ सिंहनादेन महता दिग्दन्तिभयनाशनम् । श्रीनृसिंह महावीरं नमामि ऋणमुक्तये ॥ ५॥ प्रह्लादवरदं श्रीशं दैत्येश्वरविदारणम् । श्रीनृसिंह महावीरं नमामि ऋणमुक्तये ॥ ६॥ क्रूरग्रहेः पीडितानां भक्तानामभयप्रदम् । श्रीनृसिंह महावीरं नमामि ऋणमुक्तये ॥ ७॥ वेदवेदान्तयज्ञेशं ब्रह्मरुद्रादिवन्दितम् । श्रीनृसिंह महावीरं नमामि ऋणमुक्तये ॥ ८॥ य इदं पठते नित्यमृणमोचनसंज्ञितम् । अनृणीं जायते सद्यो धनं शीघ्रमवाप्नुयात् ॥ ९॥ इति श्रीमद्वादिराजपूज्यचरणविरचितं ऋणमोचनस्तोत्रं सम्पूर्णम् । भारतीरमणमुख्यप्राणान्तर्गत श्रीकृष्णार्पणमस्तु । Proofread by Lata Murali, Revathy R.