राघव ! पुनरवतारं धर हे !
क्ष्मामव, दुर्मद-राक्षस-मथितां
राघव ! पुनरवतारं धर हे !
-१-
जगती-सरयूर्जनताऽयोध्या
खिन्ना रक्षा काङ्क्षति;
ज्ञान-दशरथो मति-कौशल्या
त्वद्दर्शनमभिवाञ्छति;
असुरोपद्रव-विघ्न-घनं
मुनि-तपोवनं भुवि मलिनं
सुख-रविरस्तं गत-इतिहेतो-
निमीलितं हृन्नलिनं;
समायाहि परिपाहि पुनस्स्वां धरणीं
करुणाऽऽकर ! हे!
क्ष्मामव, दुर्मद-राक्षस-मथितां,
राघव ! पुनरवतारं धर हे !
-२-
विकटाऽऽटोप-पटीयस्यास्ते
कुमति-ताटका प्रोग्राः
पुण्यमाश्रमं कलुषित-सत्ता
मलिनीकर्तुं व्यग्रा,
खरदूषण-साहाय्यादत्या
चारं प्रसार्य परितः;
कपट-रूपिणी स्व-वरणहेतो
राष्ट्र-राघवेः पुरतः
स्थिताऽस्ति; भीषण-मन-
आचरणामेनां द्रुतमुद्धर हे !
क्ष्मामव, दुर्मद-राक्षस-मथितां
राघव ! पुनरवतारं धर हे !
-३-
विगत-विषादं पुन``र्निषादं''
विधेहि जीवन-धन्यं;
सुनियतिभाजन्नु ``भरद्वाज''
कुरु धर्मज्ञमनन्यं
``शबरी'' श्रेयस्करीं सुभक्तां
विमलां सपदि सनाथय;
पापवर्त्मगान् खलान् विनाशय
``लक्ष्मणरेखां'' स्थापय;
पुनर्दिव्यजीवन-मूल्यं
संस्थापय सुधर्म-पर हे !
क्ष्मामव, दुर्मद-राक्षस-मथितां
राघव! पुनरवतारं धर हे !
-४-
याम्य-दिशि प्रकटितप्रभावो
बिहितोत्पातस्सततं;
निरीह-मानव-निवहं व्यथयन
शूरम्मन्यो नियतं;
सन्मति-सीतामपजहार वै,
स्वार्थ-रावणो दुष्टः;
तमोगुणी, दुर्णय-निपुणोऽसौ
निर्घृणहृत् -परिपुष्टः;
क्रन्दति सुजनो नन्दति कुजनो
विभो ! विपदमपहर हे !
क्ष्मामव, दुर्मद-राक्षस-मथितां,
राघव ! पुनरवतारं धर हे !
-५-
भ्रष्टाचार-स्वार्थ-रूपिणं
द्रुतं रावणं मारय;
सन्मति-सत्कृतिरूपां सीतां
तद्व्यथितामुद्धारय;
स्वादर्श-प्राज्यं शुभराज्यं -
-``राम राज्य''-मुद्भाव;
धर्मनीतिसंस्कृति-त्रिवेणीं
भारतभुवि प्रवाहय;
स्नेह-समृद्धि-सौख्यमय-
जीवनमनघं पुनर्वितर हे !
क्ष्मामव, दुर्मद-राक्षस-मथितां,
राघव ! पुनरवतारं धर है;
(रचयिता-आचार्य श्रीमधुकरशास्त्री; साहित्य-मीमांसाचार्यः,
साहित्यरत्नाकरः, आशुकविः, कोटा)
Encoded and proofread by Rishbha Bhagi