वन्दे भारतम्
हिमगिरि - कटितटपट - परिधानम्,
ललित - हरित - कबुरित-वितानम्,
जलनिधि - जल - सुक्षालित - चरणम्, भारतम्,
वन्दे भारतम् ।
कुसुमावलि - पुलकायित - वेशं
मणिमण्डित - नीलाम्बर - केशं
गङ्गा - तुङ्ग - तरङ्ग - निवेशम्, भारतम्,
वन्दे भारतम् ।
कालिदास - कलकण्ठ - निनादं
बाण - कणाद - सुपूजित - पादं
मम्मट - कैयट - कोटि - सनादम्, भारतम्,
वन्दे भारतम् ।
आध्यात्मिक - गुरुता-शुचि- शीलं
सत्य - सनातन-सम्भृत - लीलं
गीता - गुम्फित - तत्त्व - सनाथम्, भारतम्,
वन्दे भारतम् ।
विष्णु गुप्त - तिलकायित - भालं
परशुराम - चापायित - मालं
दुर्जन - दमन - कठोर - करालम्, भारतम्,
वन्दे भारतम् ।
-आयुर्वेदाचार्य श्री कृपाशङ्कर अवस्थी महोदयानाम,
``देववाणी''
Proofread by Mandar Mali