% Text title            : buddhacarita
% File name             : buddhacharita.itx
% Category              : deities\_misc
% Location              : doc\_deities\_misc
% Author                : Ashvaghosha
% Proofread by          : Anandajoti Bhikkhu (received from "Ryan Brizendine"  <brizendine at uchicago.edu>)    which are needed for devanaagarii output and formatting.
% Description-comments  : Available at http://www.ancient-buddhist-texts.net/Texts-and-Translations/Buddhacarita/index.htm
% Latest update         : February 2, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Buddha's Biography by Ashvaghosha - Buddhacharita ..}##
\itxtitle{.. buddhacharitam ..}##\endtitles ##

##Book I [##bhagavatprasUtiH##]##
shriyaM parArdhyAM vidadhadvidhAtR^ijit tamo nirasyannabhibhUtabhAnubhR^it |
nudannidAghaM jitachAruchandramAH sa vandyate.arhanniha yasya nopamA || 1.1##*##
AsIdvishAlonnatasAnulakShmyA payodapa~Nktyeva parItapArshvam |
udagradhiShNyaM gagaNe.avagADhaM puraM maharSheH kapilasya vastu || 1.2##*##
sitonnateneva nayena hR^itvA kailAsashailasya yadabhrashobhAm |
bhramAdupetAn vahadambuvAhAn saMbhAvanAM vA saphalIchakAra || 1.3##*##
ratnaprabhodbhAsini yatra lebhe tamo na dAridryamivAvakAsham |
parArdhyapauraiH sahavAsatoShAt kR^itasmitevAtirarAja lakShmIH || 1.4##*##
yadvedikAtoraNasiMhakarNairatnairdadhAnaM prativeshama shobhAm |
jagatyadR^iShTveva samAnamanyatspardhAM svagehairmitha eva chakre || 1.5##*##
rAmAmukhendUn paribhUtapadmAn yatrApayAto.apyavimanya bhAnuH |
santApayogAdiva vAri veShTuM pashchAtsamudrAbhimukhaH pratasthe || 1.6##*##
shakyArjitAnAM yashasAM janena dR^iShTvAntabhAvaM gamito.ayamindraH |
iti dhvajaishchAruchalatpatAkairyanmArShTumasyA~NkamivodayachChat || 1.7##*##
kR^itvApi rAtrau kumudaprahAsamindoH karairyadrajatAlayasthaiH |
sauvarNaharmyeShu gatArkapAdairdivA sarojadyutimAlalambe || 1.8##*##
mahIbR^itAM mUrdhni kR^itAbhiShekaH shuddhodano nAma nR^ipo.arkabandhuH |
adhyAshayo vA sphuTapudarIkaM purAdhirAjaM tadala~nchakAra || 1.9##*##
bhUbhR^itparArdhyo.api sapakSha eva pravR^ittadAno.api madAnupetaH |
Isho.api nityaM samaDR^iShTipAtaH saumyasvabhAvo.api pR^ithupratApaH || 1.10##*##
bhujena yasyAbhihatAH patanto dviShaddvipendrAH samarA~NgaNeShu |
udvAntamuktAprakaraiH shirobhirbhaktyeva puShpA~njalibhiH praNemuH || 1.11##*##
atipratApAdavadhUya shatrUnmahoparAgAniva tigmabhAnuH |
udyotayAmAsa janaM samantAtpradarshayannAshrayaNIyamArgAn || 1.12##*##
dharmArthakAmA viShayaM mitho.anyaM na veshamAchakramurasya nItyA |
vispardhamAnA iva tUgrasiddheH sugochare dIptatarA babhUvuH || 1.13##*##
udArasa~NkhyaiH sachivAirasa~NkhyaiH kR^itAgrabhAvaH sa udagrabhAvaH |
shashI yathA bhairakR^itAnyathAbhaiH shakyendrarAjaH sutarAM rarAja || 1.14##*##
tasyAtishobhAvisR^itAtishobhA raviprabhevAstatamaH prabhAvA |
samagradevInivahAgradevI babhUva mAyApagateva mAyA || 1.15##*##
prajAsu mAteva hitapravR^ittA gurau jane bhaktirivAnuvR^ittA |
lakShmIrivAdhIshakule kR^itAbhA jagatyabhUduttamadevatA yA || 1.16##*##
kAmaM sadA strIcharitaM tamisraM tathApi tAM prapya bhR^ishaM vireje |
na hIndulekhAmupagamya shubhAM naktaM tathA santamasatvameti || 1.17##*##
atIndriyenAtmani duShkuho.ayaM mayA jano yojayituM na shakyaH |
itIva sUkShmAM prakR^itiM vihAya dharmeNa sAkShAdvihitA svamUrtiH || 1.18##*##
chyuto.atha kAyAttuShitAt trilokImudyotayannuttamabodhisattvaH |
vivesha tasyAH smR^ita eva kukShau nandAguhAyAmiva nAgarAjaH || 1.19##*##
dhR^itvA himAdridhavalaM guru ShaDviShANAM
dAnAdhivAsitamukhaM dviradasya rUpam |
shuddhodanasya vasudhAdhipatermahiShyAH
kukShiM vivesha sa jagadvyasanakShayAya || 1.20##*##
rakShAvidhAnaM prati lokapAlA lokaikanAthasya divo.abhijagmuH |
sarvatra bhAnto.api hi chandrapAdA bhajanti kailAsagirau visheSham || 1.21##*##
mayApi taM kukShigataM dadhAnA vidyudvilAsaM jaladAvalIva |
dAnAbhivarShaiH parito janAnAM dAridryatApaM shamayA~nchakAra || 1.22##*##
sAtaH purajanA devI kadAchidatha lumbinIm |
jagAmAnumate rAj~naH sambhUtottamadohadA || 1.23##*##
shAkhAmAlambamAnAyAH puShpabhArAvalaMbinIm |
devyAH kukShiM vibhidyAshu bodhisattvo viniryayau || 1.24##*##
tataH prasannashcha babhUva puShyastasyAshcha devyA vratasaMskR^itAyAH |
pArshvAtsuto lokahitAya jaj~ne nirvedanaM chaiva nirAmayaM cha || 1.25 (1.9)
prAtaH payodAdiva tigmabhAnuH samudbhavanso.api cha mAtR^ikukSheH |
sphuranmayUkhairvihatAndhakAraishchakAra lokaM kanakAvadAtam || 1.26##*##
taM jAtamAtramatha kA~nchanayUpagauraM
prItaH sahasranayaNaH shanakairagR^ihNAt
mandArapuShpanikaraiH saha tasya mUrdhni
khAnnirmale cha vinipetaturambudhAre || 1.27##*##
surapradhAnaiH paridhAryamANo dehAMshujAlairanura~njayaMstAn |
sandhyAbhrajAloparisanniviShTaM navoDurAjaM vijigAya lakShmyA || 1.28##*##
Uroryathaurvasya pR^ithoshcha hastAnmAndhAturindrapratimasya mUrdhnaH |
kakShIvatashchaiva bhujAMsadeshAttathAvidhaM tasya babhUva janma || 1.29 (1.10)
krameNa garbhAdabhiniHsR^itaH san babhau gataH khAdiva yonyajAtaH |
kalpeShvanekeShviva bhAvitAtmA yaH samprajAnan suShuve na mUDhaH || 1.30 (1.11)
dIptyA cha dhairyeNa cha yo rarAja bAlo ravirbhUmimivAvatIrNaH |
tathAtidIpto.api nirIkShyamANo jahAra chakShUMShi yathA shashA~NkaH || 1.31 (1.12)
sa hi svagAtraprabhayojjvalantyA dIpaprabhAM bhAskaravanmumoSha |
mahArhajAmbUnadachAruvarNo vidyotayAmAsa dishashcha sarvAH || 1.32 (1.13)
anAkulAnyabjasamudgatAni niShpeShavantyAyatavikramANi |
tathaiva dhIrANi padAni sapta saptarShitArAsadR^isho jagAma || 1.33 (1.14)
bodhAya jAto.asmi jagaddhitArthamantyA tathotpattiriyaM mameti |
chaturdishaM siMhagatirvilokya vANIM cha bhavyArthakarImuvAcha || 1.34 (1.15)
khAtprasrute chandramarIchishubhre dve vAridhAre shishiroShNavIrye |
sharIrasaukhyArthamanuttarasya nipetaturmUrdhani tasya saumye || 1.35 (1.16)
shrImadvitAne kanakojjvalA~Nge vaiDUryapAde shayane shayAnam |
yadgauravAtkA~nchanapadmahastA yakShAdhipAH samparivArya tasthuH || 1.36 (1.17)
mAyAtanUjasya divaukasaH khe yasya prabhAvAtpraNataiH shirobhiH |
AdhArayan pANDaramAtapatraM bodhAya jepuH paramAshiShashcha || 1.37 (1.18)
mahoragA dharmavisheShatarShAdbuddheShvatIteShu kR^itAdhikArAH |
yamavyajan bhaktivishiShTanetrA mandArapuShpaiH samavAkiraMshcha || 1.38 (1.19)
tathAgatotpAdaguNena tuShTAH shuddhAdhivAsAshcha vishuddhasattvAH |
devA nanandurvigate.api rAge magnasya duHkhe jagato hitAya || 1.39 (1.20)
yasmin prasUte girirAjakIlA vAtAhatA nauriva bhUshchachAla |
sachandanA chotpalapadmagarbhA papAta vR^iShTirgagaNAdanabhrAt || 1.40 (1.21)
vAtA vavuH sparshasukhA manoj~nA divyAni vAsAMsyavapAtayantaH |
sUryaH sa evAbhyadhikaM chakAshe jajvAla saumyArchiranIrito.agniH || 1.41 (1.22)
prAguttare chAvasathapradeshe kUpaH svayaM prAdurabhUtsitAmbuH |
antaH purANyAgatavismayAni yasmin kriyAstIrtha iva prachakruH || 1.42 (1.23)
dharmArthibhirbhUtagaNaishcha divyaistaddarshanArthaM balamApa pUraH |
kautUhalenaiva cha pAdapaishcha prapUjayAmAsa sagandhapuShpaiH || 1.43 (1.24)
puShpadumAH svaM kusumaM pukulluH sasIraNodrAmitadiksugandhi |
susambhramadnR^igavadhUpagItaM bhuja~NgaMvR^idApihitAttavAtam || 1.44##*##
kvachit kvaNattUryamR^ida~NgagItairvINAmukundAmurajAdibhishcha |
svINAM chalatkuNDalabhUShitAnAM virAjitaM chobhayapArshchatastat || 1.45##*##
yadrAjashAstraM bhR^igura~NgirA vA na chakraturvaMshakarAvR^iShI tau |
tayoH sutau tau cha sasarjatustatkAlena shukrashcha bR^ihaspatishcha || 1.46 (1.41)
sArasvatashchApi jagAda naShTaM vedaM punaryaM dadR^ishurna pUrvam |
vyAsastathainaM bahudhA chakAra na yaM vashiShThaH kR^itavAnashaktiH || 1.47 (1.42)
vAlmIkinAdashcha sasarja padyaM jagrantha yanna cyavano mahArShiH |
chikitsitaM yachCha chakAra nAtriH pashchAttadAtreya R^iShirjagAda || 1.48 (1.43)
yachcha dvijatvaM kushiko na lebhe tadgAdhanaH sUnuravApa rAjan |
velAM samudre sagarashcha dadhre nekShvAkavo yAM prathamaM babandhuH || 1.49 (1.44)
AchAryakaM yogavidhau dvijAnAmaprAptamanyairjanako jagAma |
khyAtAni karmANi cha yAni shauraiH shUrAdayasteShvabalA babhUvuH || 1.50 (1.45)
tasmAtpramANaM na vayo na kAlaH kashchitkvachichChraiShThyamupaiti loke |
rAj~nAmR^iShINAM cha hitAni tAni kR^itAni putrairakR^itAni pUrvaiH || 1.51 (1.46)
evaM nR^ipaH pratyayitairdvijaistairAshvAsitashchApyabhinanditashcha |
sha~NkAmaniShTAM vijahau manastaH praharShamevAdhikamAruroha || 1.52 (1.47)
prItashcha tebhyo dvijasattamebhyaH satkArapUrvaM pradadau dhanAni |
bhUyAdayaM bhUmipatiryathokto yAyAjjarAmetya vanAni cheti || 1.53 (1.48)
athau nimittaishcha tapobalAchCha tajjanma janmAntakarasya buddhvA |
shAkyeshvarasyAlayamAjagAma saddharmatarShAdasito mahArShiH || 1.54 (1.49)
taM brahmavidbrahmavidAM jvalantaM brAhmyA shriyA chaiva tapaHshriyA cha |
rAj~no gururgauravasatkriyAbhyAM praveshayAmAsa narendrasadma || 1.55 (1.50)
sa pArthivAntaHpurasannikarShaM kumArajanmAgataharShavegam |
vivesha dhIro balasa~nj~nayaiva tapaHprakarShAchcha jarAshrayAchCha || 1.56 (1.51)
tato nR^ipastaM munimAsanasthaM pAdyArghyapUrvaM pratipUjya samyak |
nimantrayAmAsa yathopachAraM purA vasiShThaM sa ivAntidevaH || 1.57 (1.52)
dhanyo.asmyanugrAhyamidaM kulaM me yanmAM didR^ikShurbhagavAnupetaH |
Aj~nApyatAM kiM karavANi saumya shiShyo.asmi vishrambhitumarhasIti || 1.58 (1.53)
evaM nR^ipeNopanimantritaH sansarveNa bhAvena muniryathAvat |
savismayotphullavishAladR^iShTirgambhIradhIrANi vachAMsyuvAcha || 1.59 (1.54)
mahAtmani tvayyupapannametat priyAtithau tyAgini dharmakAme |
sattvAnvayaj~nAnavayo.anurUpA snigdhA yadevaM mayi te matiH syAt || 1.60 (1.55)
etachcha tadyena nR^iparShayaste dharmeNa sUkShmANi dhanAnyapAsya |
nityaM tyajanto vidhivadbabhUvustapobhirADhyA vibhavairdaridrAH || 1.61 (1.56)
prayojanaM yattu mamopayAne tanme shR^iNu prItimupehi cha tvam |
divyA mayA divyapathe shrutA vAgbodhAya jAtastanayastaveti || 1.62 (1.57)
shrutvA vachastachCha manashcha yuktvA j~nAtvA nimittaishcha tato.asmyupetaH |
didR^ikShayA shAkyakuladhvajasya shakradhvajasyeva samuchchritasya || 1.63 (1.58)
ityetadevaM vachanaM nishamya praharShasambhrAntagatirnarendraH |
AdAya dhAtrya~NkagataM kumAraM sandarshayAmAsa tapodhanAya || 1.64 (1.59)
chakrA~NkapAdaM sa tathA mahArShirjAlAvanaddhA~NgulipANipAdam |
sorNabhruvaM vAraNavastikoshaM savismayaM rAjasutaM dadarsha || 1.65 (1.60)
dhAtrya~NkasaMviShTamavekShya chainaM devya~NkasaMviShTamivAgnisUnum |
babhUva pakShmAntarivA~nchitAshrurnishvasya chaivaM tridivonmukho.abhUt || 1.66 (1.61)
dR^iShTvAsitaM tvashrupariplutAkShaM snehAttu putrasya nR^ipashchakampe |
sagadgadaM bAShpakaShAyakaNThaH paprachcha cha prA~njalirAnatA~NgaH || 1.67 (1.62)
svalpAntaraM yasya vapurmuneH syAdbahvadbhutaM yasya cha janma dIptam |
yasyottamaM bhAvinamAttha chArthaM taM prekShya kasmAttava dhIra vAShpaH || 1.68 (1.63)
api sthirAyurbhagavan kumAraH kachchinna shokAya mama prasUtaH |
labdhaH katha~nchit salilA~njalirme na khalvimaM pAtumupaiti kAlaH || 1.69 (1.64)
apyakShayaM me yashaso nidhAnaM kachchiddhruvo me kulahastasAraH |
api prayAsyAmi sukhaM paratra supte.api putre.animiShaikachakShuH || 1.70 (1.65)
kachchinna me jAtamaphullameva kulaprabAlaM parishoShabhAgi |
kShipraM vibho brUhi na me.asti shAntiH snehaM sute vetsi hi bAndhavAnAm || 1.71 (1.66)
ityAgatAvegamaniShTabuddhyA buddhvA narendraM sa* munirbabhAShe |
mA bhUnmatiste nR^ipa kAchidanyA niHsaMshayaM tadyadavochamasmi || 1.72 (1.67)
nAsyAnyathAtvaM prati vikriyA me svAM va~nchanAM tu prati viklavo.asmi |
kAlo hi me yAtumayaM cha jAto jAtikShayasyAsulabhasya boddhA || 1.73 (1.68)
vihAya rAjyaM viShayeShvanAsthastIvraiH prayatnairadhigamya tattvam |
jagatyayaM mohatamo nihantuM jvaliShyati j~nAnamayo hi sUryaH || 1.74 (1.69)
duHkhArNavAdvyAdhivikIrNaphenAjjarAtara~NgAnmaraNogravegAt |
uttArayiShyatyayamuhyamAnamArttaM jagajj~nAnamahAplavena || 1.75 (1.70)
praj~nAmbuvegAM sthirashIlavaprAM samAdhishItAM vratachakravAkAm |
asyottamAM dharmanadIM pravR^ittAM tR^iShNArditaH pAsyati jIvalokaH || 1.76 (1.71)
duHkhArditebhyo viShayAvR^itebhyaH saMsArakAntArapathasthitebhyaH |
AkhyAsyati hyeSha vimokShamArgaM mArgapranaShTebhya ivAdhvagebhyaH || 1.77 (1.72)
vidahyamAnAya janAya loke rAgAgninAyaM viShayendhanena |
prahlAdamAdhAsyati dharmavR^iShTyA vR^iShTyA mahAmegha ivAtapAnte || 1.78 (1.73)
tR^iShNArgalaM mohatamaHkapATaM dvAraM prajAnAmapayAnahetoH |
vipATayiShyatyayamuttamena saddharmatADena durAsadena || 1.79 (1.74)
svairmohapAshaiH pariveShTitasya duHkhAbhibhUtasya nirAshrayasya |
lokasya sambudhya cha dharmarAjaH kariShyate bandhanamokShameShaH || 1.80 (1.75)
tanmA kR^ithAH shokamimaM prati tvam tatsaumya shochye hi manuShyaloke |
mohena vA kAmasukhairmadAdvA yo naiShThikaM shroShyati nAsya dharmam || 1.81 (1.76)
bhraShTasya tasmAchcha guNAdato me dhyAnAni labdhvApyakR^itArthataiva |
dharmasya tasyAshravaNAdahaM hi manye vipattiM tridive.api vAsam || 1.82 (1.77)
iti shrutArthaH sasuhR^itsadArastyaktvA viShAdaM mumude narendraH |
evaMvidho.ayaM tanayo mameti mene sa hi svAmapi sAramattAm || 1.83 (1.78)
AryeNa mArgeNa tu yAsyatIti chintAvidheyaM hR^idayaM chakAra |
na khalvasau na priyadharmapakShaH santAnanAshAttu bhayaM dadarsha || 1.84 (1.79)
atha munirasito nivedya tattvaM sutaniyataM sutaviklavAya rAj~ne |
sabahumatamudIkShyamANarUpaH pavanapathena yathAgataM jagAma || 1.85 (1.80)
kR^itamatiranujAsutaM cha dR^iShTvA munivachanashravaNe pi tanmatau cha |
bahuvidhamanukampayA sa sAdhuH priyasutavadviniyojayA~nchakAra || 1.86 (1.81)
narapatirapi putrajanmatuShTo viShayamatAni vimuchya bandhanAni |
kulasadR^ishamachIkaradyathAvatpriyatanayaM tanayasya jAtakarma || 1.87 (1.82)
dashasu pariNateShvahaHsu chaivaM prayatamanAH parayA mudA parItaH |
akuruta japahomama~NgalAdyAH paramatamAH sa sutasya devatejyAH || 1.88 (1.83)
api cha shatasahasrapUrNasa~NkhyAH sthirabalavattanayAH sahemashR^i~NgIH |
anupagatajarAH payasvinIrgAH svayamadadAtsutavR^iddhaye dvijebhyaH || 1.89 (1.84)
bahuvidhaviShayAstato yatAtmA svahR^idayatoShakarIH kriyA vidhAya |
guNavati divase shive muhUrte matimakaronmuditaH purapraveshe || 1.90 (1.85)
dviradaradamayImatho mahArhAM sitasitapuShpabhR^itAM maNipradIpAm |
abhajata shivikAM shivAya devI tanayavatI praNipatya devatAbhyaH || 1.91 (1.86)
puramatha purataH praveshya patnIM sthavirajanAnugatAmapatyanAthAm |
nR^ipatirapi jagAma paurasa~NghairdivamamarairmaghavAnivArchyamAnaH || 1.92 (1.87)
bhavanamatha vigAhya shAkyarAjo bhava iva ShaNmukhajanmanA pratItaH |
idamidamiti harShapUrNavaktro bahuvidhapuShTiyashaskaraM vyadhatta || 1.93 (1.88)
iti narapatiputrajanmavR^iddhyA sajanapadaM kapilAhvayaM puraM tat |
dhanadapuramivApsaro.avakIrNaM muditamabhUnnalakUvaraprasUtau || 1.94 (1.89)
iti shrIbuddhacharite mahAkAvye bhagavatprasUtirnAma prathamaH sargaH || 1 ||
\medskip\hrule\medskip
##Book II [##AntaHpuravihAro##]##
A janmano janmajarAntakasya tasyAtmajasyAtmajitaH sa rAjA |
ahanyahanyarthagajAshvamitrairvR^iddhiM yayau sindharivAmbuvegaiH || 2.1
dhanasya ratnasya cha tasya tasya kR^itAkR^itasyaiva cha kA~nchanasya |
tadA hi naikAtmanidhInavApi manorathasyApyatibhArabhUtAn || 2.2
ye padmakalpairapi cha dvipendrairna maNDalaM shakyamihAbhinetum |
madotkaTA haimavatA gajAste vinApi yatnAdupatasthurenam || 2.3
nAnA~NkachihnairnavahemabhANDairabhUShitairlambasaTaistathAnyaiH |
sa~nchukShubhe chAsya puraM tura~Ngairbalena maitryA cha dhanena chAptaiH || 2.4
puShTAshcha tuShTAshcha tadAsya rAjye sAdhvyo.arajaskA guNavatpayaskAH |
udagravatsaiH sahitA babhUvurbahvyo bahukShIraduhashcha gAvaH || 2.5
madhyasthatAM tasya ripurjagAma madhyasvabhAvaH prayayau suhR^ittvam |
visheShato dArDhyamiyAya mitraM dvAvasya pakShAvaparastu nAsham || 2.6
tathAsya mandAnilameghashabdaH saudAminIkuNDalamaNDitA~NgaH |
vinAshmavarShAshanipAtadoShaiH kAle cha deshe pravavarSha devaH || 2.7
ruroha saMyak phalavadyathArtu tadAkR^itenApi kR^iShishrameNa |
tA eva chaivauShadhayo rasena sAreNa chaivAbhyadhikA babhUvuH || 2.8
sharIrasandehakare.api kAle sa~NgrAmasammarda iva pravR^itte |
svasthAH sukhaM chaiva nirAmayaM cha prajaj~nire garbhadharAshcha nAryaH || 2.9
yachcha pratibhvo vibhave.api shakye na prArthayanti sma narAH parebhyaH |
abhyarthitaH sUkShmadhano.api chAyaM tadA na kashchidvimukho babhUva || 2.10
nAshe vadho bandhuShu nApyadAtA naivAvrato nAnR^itiko na hiMsraH |
AsIttadA kashchana tasya rAjye rAj~no yayAteriva nAhuShasya || 2.11
udyAnadevAyatanAshramANAM kUpaprapApuShkariNIvanAnAm |
chakruH kriyAstatra cha dharmakAmAH pratyakShataH svargamivopalabhya || 2.12
muktashcha durbhikShabhayAmayebhyo hR^iShTo janaH svargamivAbhireme |
patnIM patirvA mahiShI patiM vA parasparaM na vyabhicheratushcha || 2.13
kashchitsiSheve rataye na kAmaM kAmArthamarthaM na jugopa kashchit |
kashchiddhanArthaM na chachAra dharmaM dharmAya kashchinna chakAra hiMsAm || 2.14
steyAdibhishchApyabhitashcha naShTaM svasthaM svachakraM parachakramuktam |
kShemaM subhikShaM cha babhUva tasya purANyaraNyAni yathaiva rAShTre || 2.15
tadA hi tajjanmani tasya rAj~no manorivAdityasutasya rAjye |
chachAra harShaH praNanAsha pApmA jajvAla dharmaH kaluShaH shashAma || 2.16
evaMvidhA rAjasutasya tasya sarvArthasiddhishcha yato babhUva |
tato nR^ipastasya sutasya nAma sarvArthasiddho.ayamiti prachakre || 2.17
devI tu mAyA vibudharShikalpaM dR^iShTvA vishAlaM tanayaprabhAvam |
jAtaM praharShaM na shashAka soDhuM tato.avinAshAya divaM jagAma || 2.18
tataH kumAraM suragarbhakalpaM snehena bhAvena cha nirvisheSham |
mAtR^iShvasA mAtR^isamaprabhAvA saMvardhayAmAtmajavadbabhUva || 2.19
tataH sa bAlArka ivodayasthaH samIrito vahnirivAnilena |
krameNa samyagvavR^idhe kumArastArAdhipaH pakSha ivAtamaske || 2.20
tato mahArhANi cha chandanAni ratnAvalIshchauShadhibhiH sagarbhAH |
mR^igaprayuktAnrathakAMshcha haimAnAchakrire.asmai suhR^idAlayebhyaH || 2.21
vayo.anurUpANi cha bhUShaNAni hiraNmayA hastimR^igAshvakAshcha |
rathAshcha gAvo vasanaprayuktA gantrIshcha chAmIkararUpyachitrAH || 2.22
evaM sa taistairviShayopachArairvayo.anurUpairupacharyamANaH |
bAlo.apyabAlapratimo babhUva dhR^ityA cha shauchena dhiyA shriyA cha || 2.23
vayashcha kaumAramatItya madhyaM samprApya bAlaH sa hi rAjasUnuH |
alpairahobhirbahuvarShagamyA jagrAha vidyAH svakulAnurUpAH || 2.24
naiHshreyasaM tasya tu bhavyamarthaM shrutvA purastAdasitAnmahArSheH |
kAmeShu sa~NgaM janayAmbabhUva vR^iddhirbhavachchAkyakulasya rAj~naH || 2.25
kulAttato.asmai sthirashIlayuktAtsAdhvIM vapurhrIvinayopapannAm |
yashodharAM nAma yashovishAlAM tulyAbhidhAnaM shriyamAjuhAva || 2.26
athAparaM bhUmipateH priyo.ayaM sanatkumArapratimaH kumAraH |
sArdhaM tayA shAkyanarendravadhvA shachyA sahasrAkSha ivAbhireme || 2.27
ki~nchinmanaHkShobhakaraM pratIpaM katha~ncha pashyediti so.anuchintya |
vAsaM nR^ipo hyAdishati sma tasmai harmyodareShveva na bhUprachAram || 2.28
tataH sharattoyadapANDareShu bhUmau vimAneShviva ra~njiteShu |
harmyeShu sarvartusukhAshrayeShu strINAmudArairvijahAra tUryaiH || 2.29
kalairhi chAmIkarabaddhakakShairnArIkarAgrAbhihatairmR^ida~NgaiH |
varApsaronR^ityasamaishcha nR^ityaiH kailAsavattadbhavanaM rarAja || 2.30
vAgbhiH kalAbhirlalitaishcha hArairmadaiH sakhelairmadhuraishcha hAsaiH |
taM tatra nAryo ramayAmbabhUvurbhrUva~nchitairardhanirIkShitaishcha || 2.31
tatashcha kAmAshrayapaNDitAbhiH strIbhirgR^ihIto ratikarkashAbhiH |
vimAnapR^iShThAnna mahIM jagAma vimAnapR^iShthAdiva puNyakarmA || 2.32
nR^ipastu tasyaiva vivR^iddhihetostadbhAvinArthena cha chodyamAnaH |
shame.abhireme virarAma pApAdbheje damaM saMvibabhAja sAdhUn || 2.33
nAdhIravat kAmasukhe sasa~nje na saMrara~nje viShamaM jananyAm |
dhR^ityendriyAshvAMshchapalAn vijigye bandhUMshcha paurAMshcha guNairjigAya || 2.34
nAdhyaiShTa duHkhAya parasya vidyAM j~nAnaM shivaM yattu tadadhyagIShTa |
svAbhyaH prajAbhyo hi yathA tathaiva sarvaprajAbhyaH shivamAshashaMse || 2.35
taM bhAsuraM chA~NgirasAdhidevaM yathAvadAnarcha tadAyuShe saH |
juhAva havyAnyakR^ishe kR^ishAnau dadau dvijebhyaH kR^ishanaM cha gAshcha || 2.36
sasnau sharIraM pavituM manashcha tIrthAmbubhishchaiva guNAMbubhishcha |
vedopadiShTaM samamAtmajaM cha somaM papau shAntisukhaM cha hArdam || 2.37
sAntvaM babhAShe na cha nArthavadyajjajalpa tattvaM na cha vipriyaM yat |
sAntvaM hyatatvaM paruShaM cha tattvaM hriyAshakannAtmana eva vaktum || 2.38
iShTeShvaniShTeShu cha kAryavatsu na rAgadoShAshrayatAM prapede |
shivaM siSheve.avyavahAralabdhaM yaj~naM hi mene na tathA yathAvat || 2.39
AshAvate chAbhigatAya sadyo deyAmbubhistarShamachechChidiShTa |
yuddhAdR^ite vR^ittaparashvadhena dvidarpamudvR^ittamabebhidiShTa || 2.40
ekaM vininye sa jugopa sapta saptaiva tatyAja rarakSha pa~ncha |
prApa trivargaM bubudhe trivargaM jaj~ne dvivargaM prajahau dvivargam || 2.41
kR^itAgaso.api pratipAdya vadhyAnnAjIghanannApi ruShA dadarsha |
babandha sAntvena phalena chaitAMstyAgo.api teShAM hyanapAyadR^iShTaH || 2.42
ArShANyachArItparamavratAni vairANyahAsIchChirasambhR^itAni |
yashAMsi chApadguNagandhavanti rajAMsyahAsInmalinIkarANi || 2.43
na chAjihIrShIdbalimapravR^ittaM na chAchikIrShItparavastvabhidhyAm |
na chAvivakShIddviShatAmadharmaM na chAdidhakShIddhR^idayena manyum || 2.44
tasmiMstathA bhUmipatau pravR^itte bhR^ityAshcha paurAshcha tathaiva cheruH |
shamAtmake chetasi viprasanne prayuktayogasya yathendriyANi || 2.45
kAle tatashchArupayodharAyAM yashodharAyAM suyashodharAyAm |
shauddhodanerAhusapatnavaktro jaj~ne suto rAhula eva nAmnA || 2.46
atheShTaputraH paramapratItaH kulasya vR^iddhiM prati bhUmipAlaH |
yathaiva putraprasave nananda tathaiva pautraprasave nananda || 2.47
pautrasya me putragato mamaiva snehaH kathaM syAditi jAtaharShaH |
kAle sa taM taM vidhimAlalambe putrapriyaH svargamivArurukShan || 2.48
sthitvA pathi prAthamakalpikAnAM rAjarShabhANAM yashasAnvitAnAm |
shuklAnyamuktvApi tapAMsyatapta yaj~ne cha hiMsArahitairayaShTa || 2.49
ajAjvaliShTAtha sa puNyakarmA nR^ipashriyA chaiva tapaHshriyA cha |
kulena vR^ittena dhiyA cha dIptastejaH sahasrAMshurivotsisR^ikShuH || 2.50
svAyambhuvaM chArchikamarchayitvA jajApa putrasthitaye sthitashrIH |
chakAra karmANi cha duShkarANi prajAH sisR^ikShuH ka ivAdikAle || 2.51
tatjyAja shastraM vimamarsha shAstraM shamaM siSheve niyamaM viShehe |
vashIva ka~nchidviShayaM na bheje piteva sarvAnviShayAn dadarsha || 2.52
babhAra rAjyaM sa hi putrahetoH putraM kulArthaM yashase kulaM tu |
svargAya shabdaM divamAtmahetordharmArthamAtmasthitimAchakA~NkSha || 2.53
evaM sa dharmaM vividhaM chakAra sadbhirnipAtaM shrutitashcha siddham |
dR^iShTvA kathaM putramukhaM suto me vanaM na yAyAditi nAthamAnaH || 2.54
rirakShiShantaH shriyamAtmasaMsthA rakShanti putrAn bhuvi bhUmipAlAH |
putraM narendraH sa tu dharmakAmo rarakSha dharmAdviShayeShvamu~nchat || 2.55
vanamanupamasattvA bodhisattvAstu sarve
viShayasukharasaj~nA jagmurutpannaputrAH |
ata upachitakarmA rUDhamUle.api hetau
sa ratimupasiSheve bodhimApannayAvat || 2.56
iti shrIbuddhacharite mahAkAvye.antaHpuravihAro nAma dvitIyaH sargaH || 2 ||
\medskip\hrule\medskip
##Book III [##saMvegotpattiH##]##
tataH kadAchinmR^idushAdvalAni puMskokilonnAditapAdapAni |
shushrAva padmAkaramaNDitAni shIte nibaddhAni sa kAnanAni || 3.1
shrutvA tataH strIjanavallabhAnAM manoj~nabhAvaM purakAnanAnAm |
bahiHprayANAya chakAra buddhimantargR^ihe nAga ivAvaruddhaH || 3.2
tato nR^ipastasya nishamya bhAvaM putrAbhidhAnasya manorathasya |
snehasya lakShmyA vayasashcha yogyAm-Aj~nApayAmAsa vihArayAtrAm || 3.3
nivartayAmAsa cha rAjamArge sampAtamArtasya pR^ithagjanasya |
mA bhUtkumAraH sukumArachittaH saMvignachetA iva manyamAnaH || 3.4
pratya~NgahInAn vikalendriyAMshcha jIrNAturAdIn kR^ipaNAMshcha bhikShUn |
tataH samutsArya pareNa sAmnA shobhAM parA rAjapathasya chakruH || 3.5
tataH kR^ite shrImati rAjamArge shrImAn vinItAnucharaH kumAraH |
prAsAdapR^iShThAdavatIrya kAle kR^itAbhyanuj~no nR^ipamabhyagachchat || 3.6
atho narendraH sutamAgatAshruH shirasyupAghrAya chiraM nirIkShya |
gachcheti chAj~nApayati sma vAchA snehAnna chainaM manasA mumocha || 3.7
tataH sa jAmbUnadabhANDabhR^idbhiryuktaM chaturbhirnibhR^itaistura~NgaiH |
aklIvavidhyuchchuchirashmidhArAM hiraNmayaM syandanamAruroha || 3.8
tataH prakIrNojjvalapuShpajAlaM viShaktamAlyaM prachalatpatAkam |
mArgaM prapede sadR^ishAnuyAtrashchandraH sanakShatra ivAntarIkSham || 3.9
kautUhalAtsphItataraishcha netrairnIlotpalAbhairiva kIryamANaH |
shanaiH shanai rAjapathaM jagAhe pauraiH samantAdabhivIkShyamANaH || 3.10
taM tuShTuvuH saumyaguNena kechidvavandire dIptatayA tathAnye |
saumukhyatastu shriyamasya kechidvaipulyamAshaMsiShurAyuShashcha || 3.11
niHsR^itya kubjAshcha mahAkulebhyo vyUhAshcha kairAtakavAmanAnAm |
nAryaH kR^ishebhyashcha niveshanebhyo devAnuyAnadhvajavat praNemuH || 3.12
tataH kumAraH khalu gachchatIti shrutvA striyaH preShyajanAtpravR^ittim |
didR^ikShayA harmyatalAni jagmurjanena mAnyena kR^itAbhyanuj~nAH || 3.13
tAH srastakA~nchIguNavighnitAshcha suptaprabuddhAkulalochanAshcha |
vR^ittAntavinyastavibhUShaNAshcha kautUhalenApi bhR^itAH parIyuH || 3.14
prAsAdasopAnatalapraNAdaiH kA~nchIravairnUpuranisvanaishcha |
vibhrAmayantyo gR^ihapakShisa~NghAnanyonyavegAMshcha samAkShipantyaH || 3.15
kAsA~nchidAsAM tu varA~NganAnAM jAtatvarANAmapi sotsukAnAm |
gatiM gurutvAjjagR^ihurvishAlAH shroNIrathAH pInapayodharAshcha || 3.16
shIghraM samarthApi tu gantumanyA gatiM nijagrAha yayau na tUrNam |
hriyA pragalbhAni nigUhamAnA rahaH prayuktAni vibhUShaNAni || 3.17
parasparotpIDanapiNDitAnAM sammardasaMshobhitakuNDalAnAm |
tAsAM tadA sasvanabhUShaNAnAM vAtAyaneShvaprashamo babhUva || 3.18
vAtAyanebhyastu viniHsR^itAni parasparopAsitakuNDalAni |
strINAM virejurmukhapa~NkajAni saktAni harmyeShviva pa~NkajAni || 3.19
tato vimAnairyuvatIkalApaiH kautUhalodghATitavAtayAnaiH |
shrImatsamantAnnagaraM babhAse viyadvimAnairiva sApsarobhiH || 3.20
vAtAyanAnAmavishAlabhAvAdanyonyagaNDArpitakuNDalAni |
mukhAni rejuH pramadottamAnAM baddhAH kalApa iva pa~NkajAnAm || 3.21
 tasmin kumAraM pathi vIkShamANAH striyo babhurgAmiva gantukAmAH |
UrdhvonmukhAshchainamudIkShamANA narA babhurdyAmiva gantukAmAH || 3.22
dR^iShTvA cha taM rAjasutaM striyastA jAjvalyamAnaM vapuShA shriyA cha |
dhanyAsya bhAryeti shanairavocha~nshuddhairmanobhiH khalu nAnyabhAvAt || 3.23
ayaM kila vyAyatapInabAhU rUpeNa sAkShAdiva puShpaketuH |
tyaktvA shriyaM dharmamupeShyatIti tasmin hitA gauravameva chakruH || 3.24
kIrNaM tathA rAjapathaM kumAraH paurairvinItaiH shuchidhIraveShaiH |
tatpUrvamAlokya jaharSha ki~nchinmene punarbhAvamivAtmanashcha || 3.25
puraM tu tatsvargamiva prahR^iShTaM shuddhAdhivAsAH samavekShya devAH |
jIrNaM naraM nirmamire prayAtuM sa~nchodanArthaM kShitipAtmajasya || 3.26
tataH kumAro jarayAbhibhUtaM dR^iShTvA narebhyaH pR^ithagAkR^itiM tam |
uvAcha sa~NgrAhakamAgatAsthastatraiva niShkampaniviShTadR^iShTiH || 3.27
ka eSha bhoH sUta naro.abhyupetaH keshaiH sitairyaShTiviShaktahastaH |
bhrUsaMvR^itAkShaH shithilAnatA~NgaH kiM vikriyaiShA prakR^itiryadR^ichchA || 3.28
ityevamuktaH sa rathapraNetA nivedayAmAsa nR^ipAtmajAya |
saMrakShyamapyarthamadoShadarshI taireva devaiH kR^itabuddhimohaH || 3.29
rUpasya hartrI vyasanaM balasya shokasya yonirnidhanaM ratInAm |
nAshaH smR^itInAM ripurindriyANAmeShA jarA nAma yayaiSha bhagnaH || 3.30
pItaM hyanenApi payaH shishutve kAlena bhUyaH parimR^iShTamurvyAm |
krameNa bhUtvA cha yuvA vapuShmAn krameNa tenaiva jarAmupetaH || 3.31
ityevamukte chalitaH sa ki~nchidrAjAtmajaH sUtamidaM babhAShe |
kimeSha doSho bhavitA mamApItyasmai tataH sArathirabhyuvAcha || 3.32
AyuShmato.apyeSha vayaHprakarShAnniHsaMshayaM kAlavashena bhAvI |
evaM jarAM rUpavinAshayitrIM jAnAti chaivechChati chaiSha lokaH || 3.33
tataH sa pUrvAshayashuddhabuddhirvistIrNakalpAchitapuNyakarmA |
shrutvA jarAM saMvivije mahAtmA mahAshanerghoShamivAntike gauH || 3.34
niHshvasya dIrghaM sa shiraH prakampya tasmiMshcha jIrNe viniveshya chakShuH |
tAM chaiva dR^iShTvA janatAM saharShAM vAkyaM sa saMvignamidaM jagAda || 3.35
evaM jarA hanti cha nirvisheShaM smR^itiM cha rUpaM cha parAkramaM cha |
na chaiva saMvegamupaiti lokaH pratyakShato.apIdR^ishamIkShamANaH || 3.36
evaM gate sUta nivartayAshvAn shIghraM gR^ihANyeva bhavAnprayAtu |
udyAnabhUmau hi kuto ratirme jarAbhave chetasi vartamAne || 3.37
athAj~nayA bhartR^isutasya tasya nivartayAmAsa rathaM niyantA |
tataH kumAro bhavanaM tadeva chintAvashaH shUnyamiva prapede || 3.38
yadA tu tatraiva na sharma lebhe jarA jareti praparIkShamANaH |
tato narendrAnumataH sa bhUyaH krameNa tenaiva bahirjagAma || 3.39
athAparaM vyAdhiparItadehaM ta eva devAH sasR^ijurmanuShyam |
dR^iShTvA cha taM sArathimAbabhAShe shauddhodanistadgatadR^iShTireva || 3.40
sthUlodaraH shvAsachalachCharIraH srastAMsabAhuH kR^ishapANDugAtraH |
ambeti vAchaM karuNaM bruvANaH paraM samAshliShya naraH ka eShaH || 3.41
tato.abravItsArathirasya saumya dhAtuprakopaprabhavaH pravR^iddhaH |
rogAbhidhAnaH sumahAnanarthaH shakro.api yenaiSha kR^ito.asvatantraH || 3.42
ityUchivAn rAjasutaH sa bhUyastaM sAnukampo naramIkShamANaH |
asyaiva jAtaH pR^ithageSha doShaH sAmAnyato rogabhayaM prajAnAm || 3.43
tato babhAShe sa rathapraNetA kumAra sAdhAraNa eSha doShaH |
evaM hi rogaiH paripIDyamAno rujAturo harShamupaiti lokaH || 3.44
iti shrutArthaH sa viShaNNachetAH prAvepatAmbUrmigataH shashIva |
idaM cha vAkyaM karuNAyamAnaH provAcha ki~nchinmR^idunA svareNa || 3.45
idaM cha rogavyasanaM prajAnAM pashyaMshcha vishrambhamupaiti lokaH |
vistIrNavij~nAnamaho narANAM hasanti ye rogabhayairamuktAH || 3.46
nivartyatAM sUta vahiHprayANAnnarendrasadmaiva rathaH prayAtu |
shrutvA cha me rogabhayaM ratibhyaH pratyAhataM sa~NkuchatIva chetaH || 3.47
tato nivR^ittaH sa nivR^ittaharShaH pradhyAnayuktaH pravivesha sadma |
taM dvistathA prekShya cha sannivR^ittaM puryAgamaM bhUmipatishchakAra || 3.48
shrutvA nimittaM tu nivartanasya santyaktamAtmAnamanena mene |
mArgasya shauchAdhikR^itAya chaiva chukrosha ruShTo.api cha nogradaNDaH || 3.49
bhUyashcha tasmai vidadhe sutAya visheShayuktaM viShayaprakAram |
chalendriyatvAdapi nApi shakto nAsmAnvijahyAditi nAthamAnaH || 3.50
yadA cha shabdAdibhirindriyArthairantaHpure naiva suto.asya reme |
tato vahirvyAdishati sma yAtrAM rasAntaraM syAditi manyamAnaH || 3.51
snehAchcha bhAvaM tanayasya buddhvA saMvegadoShAnavichintya kAMshchit |
yogyAH samAj~nApayati sma tatra kalAsvabhij~na iti vAramukhyAH || 3.52
tato visheSheNa narendramArge svala~NkR^ite chaiva parIkShite cha |
vyatyAsya sUtaM cha rathaM cha rAjA prasthApayAmAsa bahiH kumAram || 3.53
tatastathA gachchati rAjaputre taireva devairvihito gatAsuH |
taM chaiva mArge mR^itamuhyamAnaM sUtaH kumArashcha dadarsha nAnyaH || 3.54
athAbravIdrAjasutaH sa sUtaM naraishchaturbhirhriyate ka eShaH |
dInairmanuShyairanugamyamAno yo bhUShito.ashvAsyavarudyate cha || 3.55
tataH sa shuddhAtmabhireva devaiH shuddhAdhivAsairabhibhUtachetAH |
avAchyamapyarthamimaM niyantA pravyAjahArArthavidIshvarAya || 3.56
buddhIndriyaprANaguNairviyuktaH supto visa~nj~nastR^iNakAShThabhUtaH |
sambadhya saMrakShya cha yatnavadbhiH priyApriyaistyajyata eSha ko.api || 3.57
iti praNetuH sa nishamya vAkyaM sa~nchukShubhe ki~nchiduvAcha chainam |
kiM kevalasyaiva janasya dharmaH sarvaprajAnAmayamIdR^isho.antaH || 3.58
tataH praNetA vadati sma tasmai sarvaprajAnAmayamantakarmA |
hInasya madhyasya mahAtmano vA sarvasya loke niyato vinAshaH || 3.59
tataH sa dhIro.api narendrasUnuH shrutvaiva mR^ityuM viShasAda sadyaH |
aMsena saMshliShya cha kUbarAgraM provAcha nihrAdavatA svareNa || 3.60
iyaM cha niShThA niyataM prajAnAM pramAdyati tyaktabhayashcha lokaH |
manAMsi sha~Nke kaThinAni nR^iNAM svasthAstathA hyadhvani vartamAnAH || 3.61
tasmAdrathaM sUta nivartyatAM no vihArabhUmau na hi deshakAlaH |
jAnanvinAshaM kathamArttikAle sachetanaH syAdiha hi pramattaH || 3.62
iti bruvANe.api narAdhipAtmaje nivartayAmAsa sa naiva taM ratham |
visheShayuktaM tu narendrashAsanAtsa padmakhaNDaM vanameva niryayau || 3.63
tataH shivaM kusumitabAlapAdapaM paribhramatpramuditamattakokilam |
vipAnavatsakamalachArudIrghikaM dadarsha tadvanamiva nandanaM vanam || 3.64
varA~NganAgaNakalilaM nR^ipAtmajastato balAdvanamabhinIyate sma tat |
varApsarovR^itamalakAdhipAlayaM navavrato muniriva vighnakAtaraH || 3.65
iti shrIbuddhacharite mahAkAvye saMvegautpattirnAma tR^itIyaH sargaH || 3 ||
\medskip\hrule\medskip
##Book IV [##strIvighAtano##]##
tatastasmAt purodyAnAt kautUhalachalekShaNAH |
pratyujjagmurnR^ipasutaM prAptaM varamiva striyaH || 4.1
abhigamya cha tAstasmai vismayotphullalochanAH |
chakrire samudAchAraM padmakoshanibhaiH karaiH || 4.2
tasthushcha parivAryainaM manmathAkShiptachetasaH |
nishchalaiH prItivikachaiH pibantya iva lochanaiH || 4.3
taM hi tA menire nAryaH kAmo vigrahavAniti |
shobhitaM lakShaNairdIptaiH sahajairbhUShaNairiva || 4.4
saumyatvAchchaiva dhairyAchCha kAshchidenaM prajaj~nire |
avatIrNo mahIM sAkShAd sudhAMshushchandramA iva || 4.5
tasya tA vapuShAkShiptA nirgrahItuM jajR^imbhire |
anyonyaM dR^iShTibhirgatvA shanaishcha vinishashvasuH || 4.6
evaM tA dR^iShTimAtreNa nAryo dadR^ishureva tam |
na vyAjahrurna jahasuH prabhAveNAsya yantritAH || 4.7
tAstathA tu nirArambhA dR^iShTvA praNayaviklavAH |
purohitasuto dhImAnudAyI vAkyamabravIt || 4.8
sarvAH sarvakalAj~nAH stha bhAvagrahaNapaNDitAH |
rUpachAturyasampannAH svaguNairmukhyatAM gatAH || 4.9
shobhayeta guNairebhirapi tAnuttarAn kurUn |
kuverasyApi cha krIDaM prAgeva vasudhAmimAm || 4.10
shaktAshchAlayituM yUyaM vItarAgAnR^iShInapi |
apsarobhishcha kalitAn grahItuM vibudhAnapi || 4.11
bhAvaj~nAnena hAvena chAturyAdrUpasampadA |
strINAmeva cha shaktAH stha saMrAge kiM punarnR^iNAm || 4.12
tAsAmevaMvidhAnAM vo niyuktAnAM svagochare |
iyamevaMvidhA cheShTA na tuShTo.asmyArjavena vaH || 4.13
idaM navavadhUnAM vo hrIniku~nchitachakShuShAm |
sadR^ishaM cheShTitaM hi syAdapi vA gopayoShitAm || 4.14
yadyapi syAdayaM vIraH shrIprabhAvAnmahAniti |
strINAmapi mahatteja iti kAryo.atra nishchayaH || 4.15
purA hi kAshisundaryA veshavadhvA mahAnR^iShiH |
tADito.abhUt padanyAsAddurdharSho daivatairapi || 4.16
manthAlagautamo bhikShurja~NghayA bAlamukhyayA |
piprIShushcha tadarthArthaM vyasUn niraharat purA || 4.17
gautamaM dIrghatapasaM mahArShiM dIrghajIvinam |
yoShit santoShayAmAsa varNasthAnAvarA satI || 4.18
R^iShyashR^i~NgaM munisutaM tathaiva strIShvapaNDitam |
upAyairvividhaiH shAntA jagrAha cha jahAra cha || 4.19
vishvAmitro maharShishcha vigADho.api mahattapAH |
dashavarShANyaraNyastho ghR^itAchyApsarasA hR^itaH || 4.20
evamAdInR^iShIMstAMstAnanayan vikriyAM striyaH |
lalitaM pUrvavayasaM kiM punarnR^ipateH sutam || 4.21
tadevaM sati vishrabdhaM prayatadhvaM tathA yathA |
iyaM nR^ipasya vaMshashrIrito na syAtparA~NmukhI || 4.22
yA hi kAshchidyuvatayo haranti sadR^ishaM janam |
nikR^iShTotkR^iShTayorbhAvaM yA gR^ihNanti tu tAH striyaH || 4.23
ityudAyivachaH shrutvA tA viddhA iva yoShitaH |
samAruruhurAtmAnaM kumAragrahaNaM prati || 4.24
tA bhrUbhiH prekShitairbhAvairhasitairlalitairgataiH |
chakrurAkShepikAshcheShTA bhItabhItA ivA~NganAH || 4.25
rAj~nastu viniyogena kumArasya cha mArdavAt |
jahruH kShipramavishrambhaM madena madanena cha || 4.26
atha nArIjanavR^itaH kumAro vyacharadvanam |
vAsitAyUthasahitaH karIva himavadvanam || 4.27
sa tasmin kAnane ramye jajvAla strIpuraHsaraH |
AkrIDa iva babhrAje vivasvAnapsarovR^itaH || 4.28
madenAvarjitA nAma taM kAshchittatra yoShitaH |
kaThinaiH paspR^ishuH pInaiH sa~NghaTTairvalgubhiH stanaiH || 4.29
srastAMsakomalAlambamR^idubAhulatAbalA |
anR^itaM skhalitaM kAchitkR^itvainaM sasvaje balAt || 4.30
kAchit tAmrAdharoShThena mukhenAsavagandhinA |
vinishashvAsa karNe.asya rahasyaM shrUyatAmiti || 4.31
kAchidAj~nApayantIva provAchArdrAnulepanA |
iha bhaktiM kuruShveti hastaM saMshliShya lipsayA || 4.32
muhurmuhurmadavyAjasrastanIlAMshukAparA |
AlakShyarasanA reje sphuradvidyudiva kShapA || 4.33
kAshchitkanakakA~nchIbhirmukharAbhiritastataH |
babhramurdarshayantyo.asya shroNIstanvaMshukAvR^itAH || 4.34
chUtashAkhAM kusumitAM pragR^ihyAnyA lalambire |
suvarNakalashaprakhyAn darshayantyaH payodharAn || 4.35
kAchitpadmavanAdetya sapadmA padmalochanA |
padmavaktrasya pArshve.asya padmashrIriva tasthuShI || 4.36
madhuraM gItamanvarthaM kAchitsAbhinayaM jagau |
taM svasthaM chodayantIva va~nchito.asItyavekShitaiH || 4.37
shubhena vadanenAnyA bhrUkArmukavikarShiNA |
prAvR^ityAnuchakArAsya cheShTitaM vIralIlayA || 4.38
pInavalgustanI kAchidvAtAghUrNitakuNDalA |
uchchairavajahAsainaM samApnotu bhavAniti || 4.39
apayAntaM tathaivAnyA babandhurmAlyadAmabhiH |
kAshchitsAkShepamadhurairjagR^ihurvachanA~NkushaiH || 4.40
pratiyogArthinI kAchidgR^ihItvA chUtavallarIm |
idaM puShpaM tu kasyeti paprachcha madaviklavA || 4.41
kAchitpuruShavatkR^itvA gatiM saMsthAnameva cha |
uvAchainaM jitaH strIbhirjaya bhoH pR^ithivImimAm || 4.42
atha loleksaNA kAchijjighrantI nIlamutpalam |
ki~nchinmadakalairvAkyairnR^ipAtmajamabhAShata || 4.43
pashya bhartashchitaM chUtaM kusumairmadhugandhibhiH |
hemapa~njararuddho vA kokilo yatra kUjati || 4.44
ashoko dR^ishyatAmeSha kAmishokavivardhanaH |
ruvanti bhramarA yatra dahyamAnA ivAgninA || 4.45
chUtayaShTyA samAshliShTo dR^ishyatAM tilakadrumaH |
shuklavAsA iva naraH striyA pItA~NgarAgayA || 4.46
phullaM kuruvakaM pashya nirmuktAlaktakaprabham |
yo nakhaprabhayA strINAM nirbhartsita ivAnataH || 4.47
bAlAshokashcha nichito dR^ishyatAmeSha pallavaiH |
yo.asmAkaM hastashobhAbhirlajjamAna iva sthitaH || 4.48
dIrghikAM prAvR^itAM pashya tIrajaiH sinduvArakaiH |
pANDurAMshukasaMvItAM shayAnAM pramadAmiva || 4.49
dR^ishyatAM strIShu mAhAtmyaM chakravAko hyasau jale |
pR^iShThataH preShyavadbhAryAmanuvR^ityAnugachchati || 4.50
mattasya parapuShTasya ruvataH shrUyatAM dhvaniH |
aparaH kokilo.anutkaH pratishrutyeva kUjati || 4.51
api nAma viha~NgAnAM vasantenAhito madaH |
na tu chintayatashchittaM janasya prAj~namAninaH || 4.52
ityevaM tA yuvatayo manmathoddAmachetasaH |
kumAraM vividhaistaistairupachakramire nayaiH || 4.53
evamAkShipyamANo.api sa tu dhairyAvR^itendriyaH |
martavyamiti sodvego na jaharSha na sismiye || 4.54
tAsAM tattvena vasthAnaM dR^iShTvA sa puruShottamaH |
sasaMvignena dhIreNa chintayAmAsa chetasA || 4.55
kiM vinA nAvagachchanti chapalaM yauvanaM striyaH |
yato rUpeNa sampannaM jareyaM nAshayiShyati || 4.56
nUnametA na pashyanti kasyachid rogasamplavam |
tathA hR^iShTA bhayaM tyaktvA jagati vyAdhidharmiNi || 4.57
anabhij~nAshcha suvyaktaM mR^ityoH sarvApahAriNaH |
tathA svasthA nirudvegAH krIDanti cha hasanti cha || 4.58
jarAM vyAdhiM cha mR^ityuM cha ko hi jAnan sachetanaH |
svasthastiShThan niShIdedvA supedvA kiM punarhaset || 4.59
yastu dR^iShTvA paraM jIrNaM vyAdhitaM mR^itameva cha |
svastho bhavati nodvigno yathAchetAstathaiva saH || 4.60
viyujyamAne.api tarau puShpairapi phalairapi |
patati chchidyamAne vA taruranyo na shochate || 4.61
iti dhyAnaparaM dR^iShTvA viShayebhyo gataspR^iham |
udAyI nItishAstraj~nastamuvAcha suhR^ittayA || 4.62
ahaM nR^ipatinA dattaH sakhA tubhyaM kShamaH kila |
yasmAttvayi vivakShA me tayA praNayavattayA || 4.63
ahitAt pratiShedhashcha hite chAnupravartanam |
vyasane chAparityAgastrividhaM mitralakShaNam || 4.64
so.ahaM maitrIM pratij~nAya puruShArthAtparA~Nmukham |
yadi tvAM samupekSheyaM na bhavenmitratA mayi || 4.65
tadbravImi suhR^idbhUtvA taruNasya vapuShmataH |
idaM na pratirUpaM te strIShvadAkShiNyamIdR^isham || 4.66
anR^itenApi nArINAM yuktaM samanuvartanam |
tadvrIDAparihArArthamAtmaratyarthameva cha || 4.67
sannatischAnuvR^ittishcha strINAM hR^idayabandhanam |
snehasya hi guNA yonirmAnakAmAshcha yoShitaH || 4.68
tadarhasi vishAlAkSha hR^idaye.api parA~Nmukhe |
rUpasyAsyAnurUpeNa dAkShiNyenAnuvartitum || 4.69
dAkShiNyamauShadhaM strINAM dAkShiNyaM bhUShaNaM param |
dAkShiNyarahitaM rUpaM niShpuShpamiva kAnanam || 4.70
kiM vA dAkShiNyamAtreNa bhAvenAstu parigrahaH |
viShayAn durlabhAMllabdhvA na hyavaj~nAtumarhasi || 4.71
kAmaM paramiti j~nAtvA devo.api hi purandaraH |
gautamasya muneH patnImahalyAM chakame purA || 4.72
agastyaH prArthayAmAsa somabhAryAM cha rohiNIm |
tasmAt tatsadR^ishaM lebhe lopAmudrAmiti shrutiH || 4.73
autathyasya cha bhAryAyAM mamatAyAM mahAtapAH |
mArutyAM janayAmAsa bharadvAjaM bR^ihaspatiH || 4.74
bR^ihaspatermahiShyAM cha juhvatyAM juhvatAM varaH |
budhaM vibudhadharmANaM janayAmAsa chandramAH || 4.75
kAlIm chaiva purA kanyAM jalaprabhavasambhavAm |
jagAma yamunAtIre jAtarAgaH parAsharaH || 4.76
mAta~NgyAmakShamAlAyAM garhitAyAM riraMsayA |
kapi~njalAdaM tanayaM vasiShTho.ajanayanmuniH || 4.77
yayAtishchaiva rAjarShirvayasyapi vinirgate |
vishvAchyApsarasA sArdhaM reme chaitrarathe vane || 4.78
strIsaMsargaM vinAshAntaM pANDurj~nAtvApi kauravaH |
mAdrIrUpaguNAkShiptaH siSheve kAmajaM sukham || 4.79
karAlajanakashchaiva hR^itvA brAhmaNakanyakAm |
avApa bhraMsham apyeva na tu tyajechcha manmatham || 4.80
evamAdyA mahAtmAno viShayAn garhitAnapi |
ratihetorbubhujire prAgeva guNasaMhitAn || 4.81
tvaM punarnyAyataH prAptAn balavAn rUpavAn yuvA |
viShayAnavajAnAsi yatra saktamidaM jagat || 4.82
iti shrutvA vachastasya shlakShNamAgamasaMhitam |
meghastanitanirghoShaH kumAraH pratyabhAShata || 4.83
upapannamidaM vAkyaM sauhArdavya~njakaM tvayi |
atra cha tvAnuneShyAmi yatra mA duShThu manyase || 4.84
nAvajAnAmi viShayA~njAne lokaM tadAtmakam |
anityaM tu jaganmatvA nAtra me ramate manaH || 4.85
jarA vyAdhishcha mR^ityushcha yadi na syAdidaM trayam |
mamApi hi manoj~neShu viShayeShu ratirbhavet || 4.86
nityaM yadyapi hi strINAmetadeva vapurbhavet |
sasaMvitkasya kAmeShu tathApi na ratiH kShamA || 4.87
yadA tu jarayA pItaM rUpamAsAM bhaviShyati |
Atmano.apyanabhipretaM mohAttatra ratirbhavet || 4.88
mR^ityuvyAdhijarAdharmo mR^ityuvyAdhijarAtmabhiH |
ramamANo.apyasaMvignaH samAno mR^igapakShibhiH || 4.89
yadapyAttha mahAtmAnaste.api kAmAtmakA iti |
saMvego.atra na kartavyo yadA teShAmapi kShayaH || 4.90
mAhAtmyaM na cha tanmanye yatra sAmAnyataH kShayaH |
viShayeShu prasaktirvA yuktirvA nAtmavattayA || 4.91
yadapyAtthAnR^itenApi strIjane vartyatAmiti |
anR^itaM nAvagachchAmi dAkShiNyenApi ki~nchana || 4.92
na chAnuvartanaM tanme ruchitaM yatra nArjavam |
sarvabhAvena samparko yadi nAsti dhigastu tat || 4.93
anR^ite shraddadhAnasya saktasyAdoShadarshinaH |
kiM hi va~nchayitavyaM syAjjAtarAgasya chetasaH || 4.94
va~nchayanti cha yadyeva jAtarAgAH parasparam |
nanu naiva kShamaM draShTuM narAH strINAM nR^iNAm striyaH || 4.95
tadevaM sati duHkhArttaM jarAmaraNabhoginam |
na mAM kAmeShvanAryeShu pratArayitumarhasi || 4.96
aho.atidhIraM balavachcha te manashchaleShu kAmeShu cha sAradarshinaH |
bhaye.api tIvre viShayeShu sajjase nirIkShamANo maraNAdhvani prajAH || 4.97
ahaM punarbhIruratIvaviklavo jarAvipadvyAdhibhayaM vichintayan |
labhe na shAntiM na dhR^itiM kuto ratiM nishAmayan dIptamivAgninA jagat || 4.98
asaMshayaM mR^ityuriti prajAnato narasya rAgo hR^idi yasya jAyate |
ayomayIM tasya paraimi chetanAM mahAbhaye rakShati yo na roditi || 4.99
athau kumArashcha vinishchayAtmikAM chakAra kAmAshrayaghAtinIM kathAm |
janasya chakShurgamanIyamaNDalo mahIdharaM chAstamiyAya bhAskaraH || 4.100
tato vR^ithAdhAritabhUShaNasrajaH kalAguNaishcha praNayaishcha niShphalaiH |
sva eva bhAve vinigR^ihya manmathaM puraM yayurbhagnamanorathAH striyaH || 4.101
tataH purodyAnagatAM janashriyaM nirIkShya sAyaM pratisaMhR^itAM punaH |
anityatAM sarvagatAM vichintayan vivesha dhiShNyaM kShitipAlakAtmajaH || 4.102
tataH shrutvA rAjA viShayavimukhaM tasya tu mano
na shishye tAM rAtriM hR^idayagatashalyo gaja iva |
atha shrAnto mantre bahuvividhamArge sasachivo
na so.anyatkAmebhyo niyamanamapashyatsutamateH || 4.103
iti shrIbuddhacharite mahAkAvye strIvighAtano nAma chaturthaH sargaH || 4 ||
\medskip\hrule\medskip
##Book V [##abhiniShkramaNo##]##
sa tathA viShayairvilobhyamAnaH paramohairapi shAkyarAjasUnuH |
na jagAma ratiM na sharma lebhe hR^idaye siMha ivAtidigdhaviddhaH || 5.1
atha mantrisutaiH kShamaiH kadAchitsakhibhishchitrakathaiH kR^itAnuyAtraH |
vanabhUmididR^ikShayA shamepsurnaradevAnumato vahiH pratasthe || 5.2
navarukmakhalInaki~NkiNIkaM prachalachChAmarachAruhemabhANDam |
abhiruhya sa kaNThakaM sadashvaM prayayau ketumiva drumAbjaketuH || 5.3
sa nikR^iShTatarAM vanAntabhUmiM vanalobhAchcha yayau mahIguNechChuH |
salilormivikArasIramArgAM vasudhAM chaiva dadarsha kR^iShyamANAm || 5.4
halabhinnavikIrNashaShpadarbhAM hatasUkShmakrimikANDajantukIrNAm |
samavekShya rasAM tathAvidhAM tAM svajanasyeva badhe bhR^ishaM shushocha || 5.5
kR^iShataH puruShAMshcha vIkShamANaH pavanArkAMshurajovibhinnavarNAn |
vahanaklamaviklavAMshcha dhuryAn paramAryaH paramAM kR^ipAM chakAra || 5.6
avatIrya tatastura~NgapR^iShThAchchanakairgAM vyacharat shuchA parItaH |
jagato jananavyayaM vichinvan kR^ipaNaM khalvidamityuvAcha chArttaH || 5.7
manasA cha viviktatAmabhIpsuH suhR^idastAnanuyAyino nivArya |
abhitAralachAruparNavatyA vijane mUlamupeyivAn sa jambvAH || 5.8
niShasAda cha patrakhoravatyAM bhuvi vaidUryanikAshashAdvalAyAm |
jagataH prabhavavyayau vichintya manasashcha sthitimArgamAlalambe || 5.9
samavAptamanaH sthitishcha sadyo viShayechChAdibhirAdhibhishcha muktaH |
savitarkavichAramApa shAntaM prathamaM dhyAnamanAshravaprakAram || 5.10
adhigamya tato vivekajaM tu paramaprItisukhaM [manaH] samAdhim |
idameva tataH paraM pradadhyau manasA lokagatiM nishamya samyak || 5.11
kR^ipaNaM vata yajjanaH svayaM sannaraso vyAdhijarAvinAshadharmaH |
jarayArditamAturaM mR^itaM vA paramaj~no vijugupsate madAndhaH || 5.12
iha chedahamIdR^ishaH svayaM san vijugupseya paraM tathAsvabhAvam |
na bhavetsadR^ishaM hi tatkShamaM vA paramaM dharmamimaM vijAnato me || 5.13
iti tasya vipashyato yathAvajjagato vyAdhijarAvipattidoShAn |
balayauvanajIvitapravR^ittau vijagAmAtmagato madaH kShaNena || 5.14
na jaharSha na chApi chAnutepe vichikitsAM na yayau na tandrinidre |
na cha kAmaguNeShu saMrara~nje na cha didveSha paraM na chAvamene || 5.15
iti buddhiriyaM cha nIrajaskA vavR^idhe tasya mahAtmano vishuddhA |
puruShairaparairadR^ishyamAnaH puruShashchopasasarpa bhikShuveshaH || 5.16
naradevasutastamabhyapR^ichchadvada ko.asIti shashaMsa so.atha tasmai |
sa cha pu~Ngava janmamR^ityubhItaH shramaNaH pravrajito.asmi mokShahetoH || 5.17
jagati kShayadharmake mumukShurmR^igaye.ahaM shivamakShayaM padaM tat |
ajano.anyajanairatulyabuddhirviShayebhyo vinivR^ittarAgadoShaH || 5.18
nivasan kvachideva vR^ikShamUle vijane vAyatane girau vane vA |
vicharAmyaparigraho nirAshaH paramArthAya yathopapannabhikShuH || 5.19
iti pashyata eva rAjasUnoridamuktvA sa nabhaH samutpapAta |
sa hi tadvapuranyabuddhidarshI smR^itaye tasya sameyivAn divaukAH || 5.20
gaganaM khagavadgate cha tasmin nR^ivaraH sa~njahR^iShe visismiye cha |
upalabhya tatashcha dharmasa~nj~nAmabhiniryANavidhau matiM chakAra || 5.21
tata indrasamo jitendriyashcha pravivikShuH paramAshvamAruroha |
parivartya janaM tvavekShamANastata evAbhimataM vanaM na bheje || 5.22
sa jarAmaraNakShayaM chikIrShurvanavAsAya matiM smR^itau nidhAya |
pravivesha punaH puraM na kAmAdvanabhUmeriva maNDalaM dvipendraH || 5.23
sukhitA vata nirvR^itA cha sA strI patirIdR^iktvamivAyatAkSha yasyAH |
iti taM samudIkShya rAjakanyA pravishantaM pathi sA~njalirjagAda || 5.24
atha ghoShamimaM mahAbhraghoShaH parishushrAva shamaM paraM cha lebhe |
shrutavAMshcha hi nirvR^iteti shabdaM parinirvANavidhau matiM chakAra || 5.25
atha kA~nchanashailashR^i~NgavarShmA gajamegharShabhabAhunisvanAkShaH |
kShayamakShayadharmajAtarAgaH shashisiMhAnanavikramaH prapede || 5.26
mR^igarAjagatistato.abhyagachchannR^ipatiM mantrigaNairupAsyamAnam |
samitau marutAmiva jvalantaM maghavantaM tridive sanatkumAraH || 5.27
praNipatya cha sA~njalirbabhAShe disha mahyaM naradeva sAdhvanuj~nAm |
parivivrajiShAmi mokShahetorniyato hyasya janasya viprayogaH || 5.28
iti tasya vacho nishamya rAjA kariNevAbhihato drumashchachAla |
kamalapratime.a~njalau gR^ihItvA vachanaM chedamuvAcha vAShpakaNThaH || 5.29
pratisaMhara tAta buddhimetAM na hi kAlastava dharmasaMshrayasya |
vayasi prathame matau chalAyAM bahudoShAM hi vadanti dharmacharyAm || 5.30
viShayeShu kutUhalendriyasya vratakhedeShvasamarthanishchayasya |
taruNasya manashchalatyaraNyAdanabhij~nasya visheShato.avivekam || 5.31
mama tu priyadharma dharmakAlastvayi lakShmImavasR^ijya lakShyabhUte |
sthiravikrama vikrameNa dharmastava hitvA tu guruM bhavedadharmaH || 5.32
tadimaM vyavasAyamutsR^ija tvaM bhava tAvannirato gR^ihasthadharme |
puruShasya vayaHsukhAni bhuktvA ramaNIyo hi tapovanapraveshaH || 5.33
iti vAkyamidaM nishamya rAj~naH kalavi~Nkasvara uttaraM babhAShe |
yadi me pratibhUshchaturShu rAjan bhavasi tvaM na tapovanaM shrayiShye || 5.34
na bhavenmaraNAya jIvitaM me viharetsvAsthyamidaM cha me na rogaH |
na cha yauvanamAkShipejjarA me na cha sampattimapAharedvipattiH || 5.35
iti durlabhamarthamUchivAMsaM tanayaM vAkyamuvAcha shAkyarAjaH |
tyaja buddhimatimAM gatipravR^ittAmavahAsyo.atimanorathakramashcha || 5.36
atha merugururguruM babhAShe yadi nAsti krama eSha nAsti vAryaH |
sharaNAjjvalanena dahyamAnAnna hi nishchikramiShuM kShamaM grahItum || 5.37
jagatashcha yathA dhruvo viyogo na tu dharmAya varaM tvayaM viyogaH |
avashaM nanu viprayojayenmAmakR^itasvArthamatR^iptameva mR^ityuH || 5.38
iti bhUmipatirnishamya tasya vyavasAyaM tanayasya nirmumukShoH |
abhidhAya na yAsyatIti bhUyo vidadhe rakShaNamuttamAMshcha kAmAn || 5.39
sachivaistu nidarshito yathAvadbahumAnAt praNayAchcha shAstrapUrvam |
guruNA cha nivArito.ashrupAtaiH praviveshAvasathaM tataH sa shochan || 5.40
chalakuNDalachumbitAnanAbhirghananishvAsavikampitastanIbhiH |
vanitAbhiradhIralochanAbhirmR^igashAvAbhirivAbhyudIkShyamANaH || 5.41
sa hi kA~nchanaparvatAvadAto hR^idayonmAdakaro varA~NganAnAm |
shravanA~NgavilochanAtmabhAvAn vachanasparshavapurguNairjahAra || 5.42
vigate divase tato vimAnaM vapuShA sUrya iva pradIpyamAnaH |
timiraM vijighAMsurAtmabhAsA ravirudyanniva merumAruroha || 5.43
kanakojjvaladIptadIpavR^ikShaM varakAlAgurudhUpapUrNagarbham |
adhiruhya sa vajrabhaktichitraM pravaraM kA~nchanamAsanaM siSheve || 5.44
tata uttamamuttamAshcha nAryo nishi tUryairupatasthurindrakalpam |
himavachchirasIva chandragaure draviNendrAtmajamapsarogaNaughAH || 5.45
paramairapi divyatUryakalpaiH sa tu tairnaiva ratiM yayau na harSham |
paramArthasukhAya tasya sAdhorabhinishchikramiShA yato na reme || 5.46
atha tatra suraistapovariShThairakaniShThairvyavasAyamasya buddhvA |
yugapatpramadAjanasya nidrA vihitAsIdvikR^itAshcha gAtracheShTAH || 5.47
abhavachchayitA hi tatra kAchidviniveshya prachale kare kapolam |
dayitAmapi rukmapattrachitrAM kupitevA~NkagatAM vihAya vINAm || 5.48
vibabhau karalagnaveNuranyA stanavisrastasitAMshukA shayAnA |
R^ijuShaTpadapa~NktijuShTapadmA jalaphenaprahasattaTA nadIva || 5.49
navapuShkaragarbhakomalAbhyAM tapanIyojjvalasa~NgatA~NgadAbhyAm |
svapiti sma tathA purA bhujAbhyAM parirabhya priyavanmR^ida~Ngameva || 5.50
navahATakabhUShaNAstathAnyA vasanaM pItamanuttamaM vasAnAH |
avashA vata nidrayA nipeturgajabhagnA iva karNikArashAkhAH || 5.51
avalambya gavAkShapArshvamanyA shayitA chApavibhugnagAtrayaShTiH |
virarAja vilambichAruhArA rachitA toraNashAlabha~njikeva || 5.52
maNikuNDaladaShTapatralekhaM mukhapadmaM vinataM tathAparasyAH |
shatapatramivArdhachakranADaM sthitakAraNDavaghaTTitaM chakAshe || 5.53
aparAH shayitA yathopaviShTAH stanabhArairavamanyamAnagAtrAH |
upaguhya parasparaM virejurbhujapAshaistapanIyapArihAryaiH || 5.54
mahatIM parivAdinIM cha kAchidvanitAli~Ngya sakhImiva prasuptA |
vijughUrNa chalatsuvarNasUtrAM vadanenAkulakarNikojjvalena || 5.55
paNavaM yuvatirbhujAMsadeshAdavavisraMsitachArupAshamanyA |
savilAsaratAntatAntamUrvorvivare kAntamivAbhinIya shishye || 5.56
aparA na babhurnimIlitAkShyo vipulAkShyo.api shubhabhruvo.api satyaH |
pratisa~NkuchitAravindakoshAH savitaryastamite yathA nalinyaH || 5.57
shithilAkulamUrdhajA tathAnyA jaghanasrastavibhUShaNAMshukAntA |
ashayiShTa vikIrNakaNThasUtrA gajabhagnA pratipAtitA~Nganeva || 5.58
aparAstvavashA hriyA viyuktA dhR^itimatyo.api vapurguNairupetAH |
vinishashvasurulvaNaM shayAnA vikR^itAkShiptabhujA jajR^imbhire cha || 5.59
vyapaviddhavibhUShaNasrajo.anyA visR^itAgranthanavAsaso visa~nj~nAH |
animIlitashuklanishchalAkShyo na virejuH shayitA gatAsukalpAH || 5.60
vivR^itAsyapuTA vivR^iddhagAtrA prapatadvaktrajalA prakAshaguhyA |
aparA madaghUrNiteva shishye na babhAShe vikR^itaM vapuH pupoSha || 5.61
iti sattvakulAnurUparUpaM vividhaM sa pramadAjanaH shayAnaH |
sarasaH sadR^ishaM babhAra rUpaM pavanAvarjitarugNapuShkarasya || 5.62
samavekShya tatashcha tAH shayAnA vikR^itAstA yuvatIradhIracheShTAH |
guNavadvapuSho.api valgubhAso nR^ipasUnuH sa vigarhayAM babhUva || 5.63
ashuchirvikR^itashcha jIvaloke vanitAnAmayamIdR^ishaH svabhAvaH |
vasanAbharaNaistu va~nchyamAnaH puruShaH strIviShayeShu rAgameti || 5.64
vimR^ishedyadi yoShitAM manuShyaH prakR^itiM svapnavikAramIdR^ishaM cha |
dhruvamatra na vardhayetpramAdaM guNasa~Nkalpahatastu rAgameti || 5.65
iti tasya tadantaraM viditvA nishi nishchikramiShA samudbabhUva |
avagamya manastato.asya devairbhavanadvAramapAvR^itaM babhUva || 5.66
atha so.avatatAra harmyapR^iShThAdyuvatIstAH shayitA vigarhamANaH |
avatIrya tatashcha nirvisha~Nko gR^ihakakShyAM prathamaM vinirjagAma || 5.67
turagAvacharaM sa bodhayitvA javinaM chandakamitthamityuvAcha |
hayamAnaya kanthakaM tvarAvAn amR^itaM prAptumito.adya me yiyAsA || 5.68
hR^idi yA mama tuShTiradya jAtA vyavasAyashcha yathA dhR^itau niviShTaH |
vijane.api cha nAthavAnivAsmi dhruvamartho.abhimukhaH sa me ya iShTaH || 5.69
hriyameva cha sannatiM cha hitvA shayitA matpramukhe yathA yuvatyaH |
vivR^ite cha yathA svayaM kapATe niyataM yAtumanAmayAya kAlaH || 5.70
pratigR^ihya tataH sa bharturAj~nAM viditArtho.api narendrashAsanasya |
manasIva pareNa chodyamAnasturagasyAnayane matiM chakAra || 5.71
atha hemakhalInapUrNavaktraM laghushayyAstaraNopagUDhapR^iShTham |
balasattvajavatvaropapannaM sa varAshvaM tamupAninAya bhartre || 5.72
pratatatrikapuchchamUlapArShNiM nibhR^itaM hrasvatanUjapR^iShThakarNam |
vinatonnatapR^iShThakukShipArshvaM vipulaprothalalATakaThyuraskam || 5.73
upaguhya sa taM vishAlavakShAH kamalAbhena cha sAntvayan kareNa |
madhurAkSharayA girA shashAsa dhvajinImadhyamiva praveShTukAmaH || 5.74
bahushaH kalishatravo nirastAH samare tvAmadhiruhya pArthivena |
ahamapyamR^itaM paraM yathAvatturagashreShTha labheya tatkuruShva || 5.75
sulabhAH khalu saMyuge sahAyA viShayAvAptasukhe dhanArjane vA |
puruShasya tu durlabhAH sahAyAH patitasyApadi dharmasaMshraye vA || 5.76
iha chaiva bhavanti ye sahAyAH kaluShe dharmaNi dharmasaMshraye vA |
avagachchati me yathAntarAtmA niyataM te.api janAstadaMshabhAjaH || 5.77
tadidaM parigamya dharmayuktaM mama niryANamato jagaddhitAya |
turagottama vegavikramAbhyAM prayatasvAtmahite jagaddhite cha || 5.78
iti suhR^idamivAnushiShya kR^itye turagavaraM nR^ivaro vanaM yiyAsuH |
sitamasitagatidyutirvapuShmAn raviriva shAradamabhramAruroha || 5.79
atha sa pariharannishIthachaNDaM parijanabodhakaraM dhvaniM sadashvaH |
vigatahanuravaH prashAntaheShashchakitavimuktapadakramA jagAma || 5.80
kanakavalayabhUShitaprakoShThaiH kamalanibhaiH kamalAni cha pravidhya |
avanatatanavastato.asya yakShAshchakitagaterdadhire khurAn karAgraiH || 5.81
guruparighakapATasaMvR^itA yA na sukhamapi dviradairapAvriyante |
vrajati nR^ipasute gatasvanAstAH svayamabhavan vivR^itAH puraH pratolyaH || 5.82
pitaramabhimukhaM sutaM cha bAlaM janamanuraktamanuttamAM cha lakShmIm |
kR^itamatirapahAya nirvyapekShaH pitR^inagarAt sa tato vinirjagAma || 5.83
atha sa vikachapa~NkajAyatAkShaH puramavalokya nanAda siMhanAdam |
jananamaraNayoradR^iShTapAro na punarahaM kapilAhvayaM praviShTA || 5.84
iti vachanamidaM nishamya tasya draviNapateH pariShadgaNA nananduH || 5.85
pramuditamanasashcha devasa~NghA vyavasitapAraNamAshashaMsire.asmai ||
hutavahavapuSho divaukaso.anye vyavasitamasya duShkaraM viditvA |
akuruta tuhine pathi prakAshaM ghanavivarapraShR^itA ivendupAdAH || 5.86
harituragatura~Ngavattura~NgaH sa tu vicharan manasIva chodyamAnaH |
aruNaparuShabhAramantarIkShaM sarasabahUni jagAma yojanAni || 5.87
iti shrIbuddhacharite mahAkAvye.abhiniShkramaNo nAma pa~nchamaH sargaH || 5 ||
\medskip\hrule\medskip
##Book VI [##chandakanivartanaM##]##
tato muhUrte.abhyudite jagachchakShuShi bhAskare |
bhArgavasyAshramapadaM sa dadarsha nR^iNAM varaH || 6.1
suptavishvastahariNaM svasthasthitaviha~Ngamam |
vishrAnta iva yaddR^iShTA kR^itArtha iva chAbhavat || 6.2
sa vismayanivR^ittyarthaM tapaHpUjArthameva cha |
svAM chAnuvartitAM rakShannashvapR^iShThAdavAtarat || 6.3
avatIrya cha pasparsha nistIrNamiti vAjinam |
ChandakaM chAbravIt prItaH snApayanniva chakShuShA || 6.4
imaM tArkShyopamajavaM tura~NgamanugachchatA |
darshitA saumya madbhaktirvikramashchAyamAtmanaH || 6.5
sarvathAsmyanyakAryo.api gR^ihIto bhavatA hR^idi |
bhartR^isnehashcha yasyAyamIdR^ishaH shakta eva cha || 6.6
asnigdho.api samartho.asti niHsAmarthyo.api bhaktimAn |
bhaktimAMschaiva shaktashcha durlabhastvadvidho bhuvi || 6.7
tatprIto.asmi tavAnena mahAbhAgena karmaNA |
dR^ishyate mayi bhAvo.ayaM phalebhyo.api parA~Nmukhe || 6.8
ko janasya phalasthasya na syAdabhimukho janaH |
janIbhavati bhUyiShThaM svajano.api viparyaye || 6.9
kulArthaM dhAryate putraH poShArthaM sevyate pitA |
AshayAshliShyati jagannAsti niShkAraNAsvatA || 6.10
kimuktvA bahu sa~NkShepAtkR^itaM me sumahatpriyam |
nivartasvAshvamAdAya samprApto.asmIpsitaM vanam || 6.11
ityuktvA sa mahAbAhuranushaMsachikIrShayA |
bhUShaNAnyavamuchyAsmai santaptamanase dadau || 6.12
mukuToddIptakarmANaM maNimAdAya bhAsvaram |
bruvan vAkyamidaM tasthau sAditya iva mandaraH || 6.13
anena maNinA Chanda praNamya bahusho nR^ipaH |
vij~nApyo.amuktavishrambhaM santApavinivR^ittaye || 6.14
jarAmaraNanAshArthaM praviShTo.asmi tapovanam |
na khalu svargatarSheNa nAsnehena na manyunA || 6.15
tadevamabhiniShkrAntaM na mAM shochitumarhasi |
bhUtvApi hi chiraM shleShaH kAlena na bhaviShyati || 6.16
dhruvo yasmAchcha vishleShastasmAnmokShAya me matiH |
viprayogaH kathaM na syAdbhUyo.api svajanAdibhiH || 6.17
shokatyAgAya niShkrAntaM na mAM shochitumarhasi |
shokahetuShu kAmeShu saktAH shochyAstu rAgiNaH || 6.18
ayaM cha kila pUrveShAmasmAkaM nishchayaH sthiraH |
iti dAyAdabhUtena na shochyo.asmi pathA vrajan || 6.19
bhavanti hyarthadAyAdAH puruShasya viparyaye |
pR^ithivyAM dharmadAyAdA durlabhAstu na santi vA || 6.20
yadapi syAdasamaye yAto vanamasAviti |
akAlo nAsti dharmasya jIvite cha~nchale sati || 6.21
tasmAdadyaiva me shreyashchetavyamiti nishchayaH |
jIvite ko hi vishrambho mR^ityau pratyarthini sthite || 6.22
evamAdi tvayA saumya vij~nApyo vasudhAdhipaH |
prayatethAstathA chaiva yathA mAM na smaredapi || 6.23
api nairguNyamasmAkaM vAchyaM narapatau tvayA |
nairguNyAttyajyate snehaH snehatyAgAnna shochyate || 6.24
iti vAkyamidaM shrutvA ChandaH santApaviklavaH |
vAShpagrathitayA vAchA pratyuvAcha kR^itA~njaliH || 6.25
anena tava bhAvena bAndhavAyAsadAyinA |
bhartaH sIdati me cheto nadIpa~Nka iva dvipaH || 6.26
kasya notpAdayedvAShpaM nishchayaste.ayamIdR^ishaH |
ayomaye.api hR^idaye kiM punaH snehaviklave || 6.27
vimAnashayanArhaM hi saukumAryamidaM kva cha |
kharadarbhA~NkuravatI tapovanamahI kva cha || 6.28
shrutvA tu vyavasAyaM te yadashvo.ayaM mayA hR^itaH |
balAtkAreNa tannAtha daivenaivAsmi kAritaH || 6.29
kathaM hyAtmavasho jAnan vyavasAyamimaM tava |
upAnayeyaM turagaM shokaM kapilavastunaH || 6.30
tannArhasi mahAbAho vihAtuM putralAlasam |
snigdhaM vR^iddhaM cha rAjAnaM saddharmamiva nAstikaH || 6.31
saMvardhanaparishrAntAM dvitIyAM tAM cha mAtaram |
deva nArhasi vismartuM kR^itaghna iva satkriyAm || 6.32
bAlaputrAM guNavatIM kulashlAghyAM pativratAm |
devImarhasi na tyaktuM klIvaH prAptAmiva shriyam || 6.33
putraM yAshodharaM shlAghyaM yashodharmabhR^itAM varaH |
bAlamarhasi na tyaktuM vyasanIvottamaM yashaH || 6.34
atha bandhuM cha rAjyaM cha tyaktumeva kR^itA matiH |
mAM nArhasi vibho tyaktuM tvatpAdau hi gatirmama || 6.35
nAsmi yAtuM puraM shakto dahyamAnena chetasA |
tvAmaraNye parityajya sumitra iva rAghavam || 6.36
kiM hi vakShyati rAjA mAM tvadR^ite nagaraM gatam |
vakShyAmyuchitadarshitvAtkiM tavAntaHpurANi vA || 6.37
yadapyAtthApi nairguNyaM vAchyaM narapatAviti |
kiM tadvakShyAmyabhUtaM te nirdoShasya muneriva || 6.38
hR^idayena salajjena jihvayA sajjamAnayA |
ahaM yadyapi vA brUyAM kastachchraddhAtumarhati || 6.39
yo hi chandramasastaikShNya kathayechChraddadhIta vA |
sa doShAMstava doShaj~na kathayechchraddadhIta vA || 6.40
sAnukroshasya satataM nityaM karuNavedinaH |
snigdhatyAgo na sadR^isho nivartasva prasIda me || 6.41
iti shokAbhibhUtasya shrutvA Chandasya bhAShitam |
svasthaH paramayA dhR^ityA jagAda vadatAM varaH || 6.42
madviyogaM prati chchanda santApastyajyatAmayam |
nAnAbhAvo hi niyataM pR^ithagjAtiShu dehiShu || 6.43
svajanaM yadyapi snehAnna tyajeyaM mumukShayA |
mR^ityuranyonyamavashAnasmAn santyAjayiShyati || 6.44
mahatyA tR^iShNayA duHkhairgarbheNAsmi yayA dhR^itaH |
tasyA niShphalayatnAyAH kvAhaM mAtuH kva sA mama || 6.45
vAsavR^ikShe samAgamya vigachchanti yathANDajAH |
niyataM viprayogAntastathA bhUtasamAgamaH || 6.46
sametya cha yathA bhUyo vyapayAnti valAhakAH |
saMyogo viprayogashcha tathA me prANinAM mataH || 6.47
yasmAdyAti cha loko.ayaM vipralabhya parasparam |
mamatvaM na kShamaM tasmAtsvapnabhUte samAgame || 6.48
sahajena viyujyante parNarAgeNa pAdapAH |
anyenAnyasya vishleShaH kiM punarna bhaviShyati || 6.49
tadevaM sati santApaM mA kArShIH saumya gamyatAm |
lambate yadi tu sneho gatvApi punarAvraja || 6.50
brUyAshchAsmAsvanAkShepaM janaM kapilavastuni |
tyajyatAM tadgataH snehaH shrUyatAM chAsya nishchayaH || 6.51
kShiprameShyati vA kR^itvA jarAmR^ityukShayaM kila |
akR^itArtho nirAlambo nidhanaM yAsyatIti vA || 6.52
iti tasya vachaH shrutvA kanthakasturagottamaH |
jihvayA lilihe pAdau vAShpamuShNaM mumocha cha || 6.53
jAlinA svastikA~Nkena vakramadhyena pANinA |
Amamarsha kumArastaM babhAShe cha vayasyavat || 6.54
mu~ncha kanthaka mA vAShpaM darshiteyaM sadashvatA |
mR^iShyatAM saphalaH shIghraM shramaste.ayaM bhaviShyati || 6.55
maNitsaruM ChandakahastasaMsthaM tataH sa dhIro nishitaM gR^ihItvA |
koshAdasiM kA~nchanabhaktichitraM vilAdivAshIviShamudbabarha || 6.56
niShkAsya taM chotpalapattranIlaM chichCheda chitraM mukuTaM sakesham |
vikIryamANAMshukamantarIkShe chikShepa chainaM sarasIva haMsam || 6.57
pUjAbhilASheNa cha bAhumAnyAddivaukasastaM jagR^ihuH praviddham |
yathAvadenaM divi devasa~NghA divyairvisheShairmahayAM cha chakruH || 6.58
muktvA tvala~NkArakalatravattAM shrIvipravAsaM shirasashcha kR^itvA |
dR^iShTvAMshukaM kA~nchanahaMsachitram vanyaM sa dhIro.abhichakA~NkSha vAsaH || 6.59
tato mR^igavyAdhavapurdivaukA bhAvaM viditvAsya vishuddhabhAvaH |
kAShAyavastro.abhiyayau samIpaM taM shAkyarAjaprabhavo.abhyuvAcha || 6.60
shivaM cha kAShAyamR^iShidhvajaste na yujyate hiMsramidaM dhanushcha |
tatsaumya yadyasti na saktiratra mahyaM prayachchedamidaM gR^ihANa || 6.61
vyAdho.abravItkAmada kAmamArAdanena vishvAsya mR^igAn nihatya |
arthastu shakropama yadyanena hanta pratIchchAnaya shuklametat || 6.62
pareNa harSheNa tataH sa vanyaM jagrAha vAso.aMshukamutsasarja |
vyAdhastu divyaM vapureva bibhrat tachchuklamAdAya divaM jagAma || 6.63
tataH kumArashcha sa chAshvagopastasmiMstathA yAti visismiyAte |
AraNyake vAsasi chaiva bhUyastasminnakArShTAM bahumAnamAshu || 6.64
ChandaM tataH sAshrumukhaM visR^ijya kAShAyasaMvidvR^itakIrtibhR^itsaH |
yenAshramastena yayau mahAtmA sandhyAbhrasaMvIta ivAdrirAjaH || 6.65
tatastathA bhartari rAjyaniHspR^ihe tapovanaM yAti vivarNavAsasi |
bhujau samutkShipya tataH sa vAjibhR^idbhR^ishaM vichukrosha papAta cha kShitau || 6.66
vilokya bhUyashcha ruroda sasvaraM hayaM bhujAbhyAmupaguhya kanthakam |
tato nirAsho vilapanmuhurmuhuryayau sharIreNa puraM na chetasA || 6.67
kvachitpradadhyau vilalApa cha kvachit kvachitprachaskhAla papAta cha kvachit |
ato vrajan bhaktivashena duHkhitashchachAra bahvIravashaH pathi kriyAH || 6.68
iti shrIbuddhacharite mahAkAvye chandakanivartanaM nAma ShaShThaH sargaH || 6 ||
\medskip\hrule\medskip
##Book VII [##tapovanapravesho##]##
tato visR^ijyAshrumukhaM rudantaM ChandaM vanachChandatayA nirAsthaH |
sarvArthasiddho vapuShAbhibhUya tamAshramaM siddhamiva prapede || 7.1
sa rAjasUnurmR^igarAjagAmI mR^igAjiraM tanmR^igavat praviShTaH |
lakShmIviyukto.api sharIralakShmyA chakShUMShi sarvAshramiNAM jahAra || 7.2
sthitA hi hastasthayugAstathaiva kautUhalAchchakradharAH sadArAH |
tamindrakalpaM dadR^ishurna jagmurdhuryA ivArdhAvanataiH shirobhiH || 7.3
viprAshcha gatvA bahiridhmahetoH prAptAH samitpuShpapavitrahastAH |
tapaHpradhAnAH kR^itabuddhayo.api taM draShTumIyurna maThAnabhIyuH || 7.4
hR^iShTAshcha kekA mumuchurmayUrA dR^iShTvAmbudaM nIlamivonnamantam |
shaShpANi hitvAbhimukhAshcha tasthurmR^igAshchalAkShA mR^igachAriNashcha || 7.5
dR^iShTvA tamikShvAkukulapradIpaM jvalantamudyantamivAMshumantam |
kR^ite.api dohe janitapramodAH prasusruvurhomaduhashcha gAvaH || 7.6
kashchidvasUnAmayamaShTamaH syAtsyAdashvinoranyatarashcyuto.atra |
uchCheruruchChairiti tatra vAchastaddarshanAdvismayajA munInAm || 7.7
lekharShabhasyeva vapurdvitIyaM dhAmeva lokasya charAcharasya |
sa dyotayAmAsa vanaM hi kR^itsnaM yadR^ichchayA sUrya ivAvatIrNaH || 7.8
tataH sa tairAshramibhiryathAvadabhyarchitashchopanimantritashcha |
pratyarchayAM dharmabhR^ito babhUva svareNa bhAdrAmbudharopamena || 7.9
kIrNaM tataH puNyakR^itA janena svargAbhikAmena vimokShakAmaH |
tamAshramaM so.anuchachAra dhIrastapAMsi chitrANi nirIkShamANaH || 7.10
tapovikArAMshcha nirIkShya saumyastapovane tatra tapodhanAnAm |
tapasvinaM ka~nchidanuvrajantaM tattvaM vijij~nAsuridaM babhAShe || 7.11
tatpUrvamadyAshramadarshanaM me yasmAdimaM dharmavidhiM na jAne |
tasmAdbhavAnarhati bhAShituM me yo nishchayo yaM prati vaH pravR^ittaH || 7.12
tato dvijAtiH sa tapovihAraH shAkyarShabhAyarShabhavikramAya |
kramena tasmai kathayA~nchakAra tapovisheShaM tapasaH phalaM cha || 7.13
agrAmyamannaM salilaprarUDhaM parNAni toyaM phalamUlameva |
yathAgamaM vR^ittiriyaM munInAM bhinnAstu te te tapasAM vikalpAH || 7.14
u~nChena jIvanti khagA ivAnye tR^iNAni kechinmR^igavachCharanti |
kechidbhuja~NgaiH saha vartayanti valmIkabhUtA iva mArutena || 7.15
ashmaprayatnArjitavR^ittayo.anye kechitsvadantApahatAnnabhakShAH |
kR^itvA parArthaM shrapaNaM tathAnye kurvanti kAryaM yadi sheShamasti || 7.16
kechijjalaklinnajaTAkalApA dviH pAvakaM juhvati mantrapUrvam |
mInaiH samaM kechidapo vigAhya vasanti kUrmollikhitaiH sharIraiH || 7.17
evaMvidhaiH kAlachitaistapobhiH parairdivaM yAntyaparairnR^ilokam |
duHkhena mArgeNa sukhaM kShiyanti duHkhaM hi dharmasya vadanti mUlam || 7.18
ityevamAdi dvipadendravatsaH shrutvA vachastasya tapodhanasya |
adR^iShTatattvo.api na santutoSha shanairidaM chAtmagataM jagAda || 7.19
duHkhAtmakaM naikavidhaM tapashcha svargapradhAnaM tapasaH phalaM cha |
lokAshcha sarve pariNAmavantaH svalpe shramaH khalvayamAshramANAm || 7.20
shriyaM cha bandhUn viShayAMshcha hitvA ye svargahetau niyamaM charanti |
te viprayuktAH khalu gantukAmA mahattaraM svaM vanameva bhUyaH || 7.21
kAyaklamairyashcha tapo.abhidhAnaiH pravR^ittimAkA~NkShati kAmahetoH |
saMsAradoShAnaparIkShamANo duHkhena so.anvichchati duHkhameva || 7.22
trAsashcha nityaM maraNAtprajAnAM yatnena chechChanti punaH prasUtim |
satyAM pravR^ittau niyatashcha mR^ityustatraiva magno yata eva bhItaH || 7.23
ihArthameke pravishanti khedaM svargArthamanye shramamApnuvanti |
sukhArthamAshAkR^ipaNo.akR^itArthaH patatyanarthe khalu jIvalokaH || 7.24
na khalvayaM garhita eva yatno yo hInamutsR^ijya visheShagAmI |
prAj~naiH samAnena parishrameNa kAryaM tu tadyatra punarna kAryam || 7.25
sharIrapIDA tu yadIha dharmaH sukhaM sharIrasya bhavatyadharmaH |
dharmeNa chApnoti sukhaM paratra tasmAdadharmaM phalatIha dharmaH || 7.26
yataH sharIraM manaso vashena pravartate vApi nivartate vA |
yukto damashchetasa eva tasmAchChittAdR^ite kAShThasamaM sharIram || 7.27
AhArashuddhyA yadi puNyamiShTaM tasmAnmR^igANAmapi puNyamasti |
ye chApi bAhyAH puruShAH phalebhyo bhAgyAparAdhena parA~NmukhatvAt || 7.28
duHkhe.abhisandhistvatha puNyahetuH sukhe.api kAryo nanu so.abhisandhiH |
atha pramANaM na sukhe.abhisandhirduHkhe pramANaM nanu nAbhisandhiH || 7.29
tathaiva ye karmavishuddhihetoH spR^ishantyapastIrthamiti pravR^ittAH |
tatrApi toSho hR^idi kevalo.ayaM na pAvayiShyanti hi pApamApaH || 7.30
spR^iShTaM hi yadyadguNavadbhirambhastattatpR^ithivyAM yadi tIrthamiShTam |
tasmAdguNAneva paraimi tIrthamApastu niHsaMshayamApa eva || 7.31
iti sma tattadbahuyuktiyuktaM jagAda chAstaM cha yayau vivasvAn |
tato havirdhUmavivarNavR^ikShaM tapaHprashAntaM sa vanaM vivesha || 7.32
abhyuddhR^itaprajvalitAgnihotraM kR^itAbhiShekarShijanAvakIrNam |
jApyasvanAkUjitadevakoShThaM dharmasya karmAntamiva pravR^ittam || 7.33
kAshchinnishAstatra nishAkarAbhaH parIkShamANashcha tapAMsyuvAsa |
sarvaM parikShepya tapashcha matvA tasmAttapaHkShetratalAjjagAma || 7.34
anvavrajannAshramiNastatastaM tadrUpamAhAtmyagatairmanobhiH |
deshAdanAryairabhibhUyamAnAnmahArShayo dharmamivApayAntam || 7.35
tato jaTAvalkalachIrakhelAMstapodhanAMshchaiva sa tAndadarsha |
tapAMsi chaiShAmanubudhyamAnastasthau shive shrImati mArgavR^ikShe || 7.36
athopasR^ityAshramavAsinastaM manuShyavaryaM parivArya tasthuH |
vR^iddhashcha teShAM bahumAnapUrvaM kalena sAmnA giramityuvAcha || 7.37
tvayyAgate pUrNa ivAshramo.abhUtsampadyate shUnya iva prayAte |
tasmAdimaM nArhasi tAta hAtuM jijIviShordehamiveShTamAyuH || 7.38
brahmarShirAjarShisurarShijuShTaH puNyaH samIpe himavAn hi shailaH |
tapAMsi tAnyeva tapodhanAnAM yatsannikarShAdbahulIbhavanti || 7.39
tIrthAni puNyAnyabhitastathaiva sopAnabhUtAni nabhastalasya |
juShTAni dharmAtmabhirAtmavadbhirdevarShibhishchaiva mahArShibhishcha || 7.40
itashcha bhUyaH kShamamuttaraiva diksevituM dharmavisheShahetoH |
na hi kShamaM dakShiNato budhena padaM bhavedekamapi prayAtum || 7.41
tapovane.asminnatha niShkriyo vA sa~NkIrNadharmA patito.ashuchirvA |
dR^iShTastvayA yena na te vivatsA tadbrUhi yAvadruchito.astu vAsaH || 7.42
ime hi vAMChanti tapaHsahAyaM taponidhAnapratimaM bhavantam |
vAsastvayA hIndrasamena sArdhaM bR^ihaspaterabhyudayAvahaH syAt || 7.43
ityevamukte sa tapasvimadhye tapasvimukhyena manIShimukhyaH |
bhavapraNAshAya kR^itapratij~naH svaM bhAvamantargatamAchachakShe || 7.44
R^ijvAtmanAM dharmabhR^itAM munInAmiShTAtithitvAtsvajanopamAnam |
evaMvidhairmAM prati bhAvajAtaiH prItiH parAtmA janitashcha mArgaH || 7.45
snigdhAbhirAbhirhR^idaya~NgamAbhiH samAsataH snAta ivAsmi vAgbhiH |
ratishcha me dharmanavagrahasya vispanditA samprati bhUya eva || 7.46
evaM pravR^ittAn bhavataH sharaNyAnatIva sandarshitapakShapAtAn |
yAsyAmi hitveti mamApi duHkhaM yathaiva bandhUMstyajatastathaiva || 7.47
svargAya yuShmAkamayaM tu dharmo mamAbhilAShastvapunarbhavAya |
asmin vane yena na me vivatsA bhinnaH pravR^ittyA hi nivR^ittidharmaH || 7.48
tannAratirme na parApachAro vanAdito yena parivrajAmi |
dharme sthitAH pUrvayugAnurUpe sarve bhavanto hi mahArShikalpAH || 7.49
tato vachaH sUnR^itamarthavachCha sushlakShNamojasvi cha garvitaM cha |
shrutvA kumArasya tapasvinaste visheShayuktaM bahumAnamIyuH || 7.50
kashchiddvijastatra tu bhasmashAyI prAMshuH shikhI dAravachIravAsAH |
Api~NgalAkShastanudIrghaghoNaH kuNDodahasto giramityuvAcha || 7.51
dhImannudAraH khalu nishchayaste yastvaM yuvA janmani dR^iShTadoShaH |
svargApavargau hi vichArya samyagyasyApavarge matirasti so.asti || 7.52
yaj~naistapobhirniyamaishcha taistaiH svargaM yiyAsanti hi rAgavantaH |
rAgeNa sArdhaM ripuNeva yuddhvA mokShaM parIpsanti tu sattvavantaH || 7.53
tadbuddhireShA yadi nishchitA te tUrNaM bhavAn gachChatu vindhyakoShTham |
asau munistatra vasatyarADo yo naiShThike shreyasi labdhachakShuH || 7.54
tasmAdbhavA~nChroShyati tattvamArgaM satyAM ruchau sampratipatsyate cha |
yathA tu pashyAmi matistavaiShA tasyApi yAsyatyavadhUya buddhim || 7.55
puShTAshvaghoNaM vipulAyatAkShaM tAmrAdharoShThaM sitatIkShNadaMShTram |
idaM hi vaktraM tanuraktajihvaM j~neyArNavaM pAsyati kR^itsnameva || 7.56
gambhIratA yA bhavatastvagAdhA yA dIptatA yAni cha lakShaNAni |
AchAryakaM prApsyasi tatpR^ithivyAM yannarShibhiH pUrvayuge.apyavAptam || 7.57
paramamiti tato nR^ipAtmajastamR^iShijanaM pratinandya niryayau |
vidhivadanuvidhAya te.api taM pravivishurAshramiNastapovanam || 7.58
iti shrIbuddhacharite mahAkAvye tapovanapravesho nAma saptamaH sargaH || 7 ||
\medskip\hrule\medskip
##Book VIII [##antaHpuravilApo##]##
tatastura~NgAvacharaH sa durmanAstathA vanaM bhartari nirmame gate |
chakAra yatnaM pathi shokavigrahe tathApi chaivAshru na tasya chikShipe || 8.1
yamekarAtreNa tu bharturAj~nayA jagAma mArgaM saha tena vAjinA |
iyAya bharturvirahaM vichintayaMstameva panthAnamahobhiraShTabhiH || 8.2
hayashcha saujasvi chachAra kanthakastatAma bhAvena babhUva nirmadaH |
ala~NkR^itashchApi tathaiva bhUShaNairabhUdgatashrIriva tena varjitaH || 8.3
nivR^itya chaivAbhimukhastapovanaM bhR^ishaM jiheShe karuNaM muhurmuhuH |
kShudhAnvito.apyadhvani shaShpamambu vA yathA purA nAbhinananda nAdade || 8.4
tato vihInaM kapilAhvayaM puraM mahAtmanA tena jagaddhitAtmanA |
krameNa tau shUnyamivopajagmaturdivAkareNeva vinAkR^itaM nabhaH || 8.5
sapuNDarIkairapi shobhitaM jalairala~NkR^itaM puShpadharairnagairapi |
tadeva tasyopavanaM vanopamaM gatapraharShairna rarAja nAgaraiH || 8.6
tato bhramadbhirdishi dInamAnasairanujjvalairvAShpahatekShaNairnaraiH |
nivAryamANAviva tAvubhau puraM shanairajaHsnAtamivAbhijagmatuH || 8.7
nishamya cha srastasharIragAminau vinAgatau shAkyakularShabheNa tau |
mumocha vAShpaM pathi nAgaro janaH purA rathe dAsharatherivAgate || 8.8
atha bruvantaH samupetamanyavo janAH pathi chchandakamAgatAshravaH |
kva rAjaputraH kularAShTravardhano hR^itastvayAsAviti pR^iShThato.anvayuH || 8.9
tataH sa tAn bhaktimato.abravIjjanAnnarendraputraM na parityajAmyaham |
rudannahaM tena tu nirjane vane gR^ihasthaveshashcha visarjitAviti || 8.10
idaM vachastasya nishamya te janAH suduShkaraM khalviti nishchayaM yayuH |
patadvijahruH salilaM na netrajaM mano ninindushcha phalArthamAtmanaH || 8.11
athochuradyaiva vishAma tadvanaM gataH sa yatra dviparAjavikramaH |
jijIviShA nAsti hi tena no vinA yathendriyANAM vigame sharIriNAm || 8.12
idaM puraM tena vivarjitaM vanaM vanaM cha tattena samanvitaM puram |
na shobhate tena hi no vinA puraM marutvatA vR^itravadhe yathA divam || 8.13
punaH kumAro vinivR^itta ityathau gavAkShamAlAH pratipedire.a~NganAH |
viviktapR^iShThaM cha nishamya vAjinaM punargavAkShANi pidhAya chukrushuH || 8.14
praviShTadIkShastu sutopalabdhaye vratena shokena cha khinnamAnasaH |
jajApa devAyatane narAdhipashchakAra tAstAshcha yathAshrayAH kriyAH || 8.15
tataH sa vAShpapratipUrNalochanastura~NgamAdAya tura~NgamAnasaH || 8.16
vivesha shokAbhihato nR^ipAlayaM kShayaM vinIte ripuNeva bhartari ||
vigAhamAnashcha narendramandiraM vilokayannashruvahena chakShuShA |
svareNa puShTena rurAva kanthako janAya duHkhaM prativedayanniva || 8.17
tataH khagAshcha kShayamadhyagocharAH samIpabaddhAsturagAshcha satkR^itAH |
hayasya tasya pratisasvanuH svanaM narendrasUnorupayAnasha~NkitAH || 8.18
janAshcha harShAtishayena va~nchitA janAdhipAntaHpurasannikarShagAH |
yathA hayaH kanthaka eSha heShate dhruvaM kumAro vishatIti menire || 8.19
atipraharShAdatha shokamUrChitAH kumArasandarshanalolalochanAH |
gR^ihAdvinishchakramurAshayA striyaH sharatpayodAdiva vidyutashchalAH || 8.20
vilambaveshyo malinAMshukAMbarA nira~njanairvAShpahatekShaNairmukhaiH |
striyo na rejurmR^ijayA vinAkR^itA divIva tArA rajanIkShayAruNAH || 8.21
araktatAmraishcharaNairanUpurairakuNDalairArjavakarNikairmukhaiH |
svabhAvapInairjaghanairamekhalairahArayoktrairmuShitairiva stanaiH || 8.22
nirIkShitA vAShpaparItalochanaM nirAshrayaM chandakamashvameva cha |
vivarNavaktrA rurudurvarA~NganA vanAntare gAva ivarShabhojjhitAH || 8.23
tataH savAShpA mahiShI mahIpateH pranaShTavatsA mahiShIva vatsalA |
pragR^ihya bAhU nipapAta gautamI vilolaparNA kadalIva kA~nchanI || 8.24
hatatviSho.anyAH shithilAtmabAhavaH striyo viShAdena vichetanA iva |
na chukrushurnAshru jahurna shashvasurna chetanA ullikhitA iva sthitAH || 8.25
adhIramanyAH patishokamUrChitA vilochanaprasravaNairmukhaiH striyaH |
siShi~nchire proShitachandanAn stanAn dharAdharaH prasravaNairivopalAn || 8.26
mukhaishcha tAsAM nayanAmbutADitaiH rarAja tadrAjaniveshanaM tadA |
navAmbukAle.aMbudavR^iShTitADitaiH sravajjalaistAmarasairyathA saraH || 8.27
suvR^ittapInA~NgulibhirnirantarairabhUShaNairgUDhashirairvarA~NganAH |
urAMsi jaghnuH kamalopamaiH karaiH svapallavairvAtachalA latA iva || 8.28
karaprahAraprachalaishcha tA babhuryathApi nAryaH sahitonnataiH stanaiH |
vanAnilAghUrNitapadmakampitaiH rathA~NganAmnAM mithunairivApagAH || 8.29
yathA cha vakShAMsi karairapIDayaMstathaiva vakShobhirapIDayan karAn |
akArayaMstatra parasparaM vyathAH karAgravakShAMsyabalA dayAlasAH || 8.30
tatastu roShapraviraktalochanA viShAdasambandhakaShAyagadgadam |
uvAcha niHshvAsachalatpayodharA vigAdhashokAshrudharA yashodharA || 8.31
nishi prasuptAmavashAM vihAya mAM gataH kva sa chchandaka manmanorathaH |
upAgate cha tvayi kanthake cha me samaM gateShu triShu kampate manaH || 8.32
anAryamasnidghamamitrakarma me nR^ishaMsa kR^itvA kimihAdya rodiShi |
niyachcha vAShpaM bhava tuShTamAnaso na saMvadatyashru cha tachCha karma te || 8.33
priyeNa vashyena hitena sAdhunA tvayA sahAyena yathArthakAriNA |
gato.aryaputro hyapunarnivR^ittaye ramasva diShTyA saphalaH shramastava || 8.34
varaM manuShyasya vichakShaNo ripurna mitramaprAj~namayogapeshalam |
suhR^idbruveNa hyavipashchitA tvayA kR^itaH kulasyAsya mahAnupaplavaH || 8.35
imA hi shochyA vyavamuktabhUShaNAH prasaktavAShpAvilaraktalochanAH |
sthite.api patyau himavanmahIsame pranaShTashobhA vidhavA iva striyaH || 8.36
imAshcha vikShiptaviTa~NkabAhavaH prasaktapArAvatadIrghanisvanAH |
vinAkR^itAstena sahaiva rodhanairbhR^ishaM rudantIva vimAnapa~NktayaH || 8.37
anarthakAmo.asya janasya sarvathA tura~Ngamo.api dhruvameSha kanthakaH |
jahAra sarvasvamitastathA hi me jane prasupte nishi ratnachauravat || 8.38
yadA samarthaH khalu soDhumAgatAniShuprahArAnapi kiM punaH kashAH |
gataH kashApAtabhayAt kathaM tvayaM shriyaM gR^ihItvA hR^idayaM cha me samam || 8.39
anAryakarmA bhR^ishamadya heShate narendradhiShNyaM pratipUrayanniva |
yadA tu nirvAhayati sma me priyaM tadA hi mUkasturagAdhamo.abhavat || 8.40
yadi hyaheShiShyata bodhaya~njanaM khuraiH kShitau vApyakariShyata dhvanim |
hanusvanaM vAjanayiShyaduttamaM na chAbhaviShyanmama duHkhamIdR^isham || 8.41
itIha devyAH paridevitAshrayaM nishamya vAShpagrathitAkSharaM vachaH |
adhomukhaH sAshrukalaH kR^itA~njaliH shanairidaM Chandaka uttaraM jagau || 8.42
vigarhituM nArhasi devi kanthakaM na chApi roShaM mayi kartumarhasi |
anAgasau svaH samavehi sarvasho gato nR^idevaH sa hi devi devavat || 8.43
ahaM hi jAnannapi rAjashAsanaM balAtkR^itaH kairapi daivatairiva |
upAnayaM tUrNamimaM tura~NgamaM tathAnvagachchaM vigatashramo.adhvani || 8.44
vrajannayaM vAjivaro.api nAspR^ishanmahIM khurAgrairvidhR^itairivAntarA |
tathaiva daivAdiva saMyatAnano hanusvanaM nAkR^ita nApyaheShata || 8.45
yadA vahirgachchati pArthivAtmajastadAbhavaddvAramapAvR^itaM svayam |
tamashcha naishaM raviNeva pATitaM tato.api daivo vidhireSha gR^ihyatAm || 8.46
yadApramatto.api narendrashAsanAdgR^ihe pure chaiva sahasrasho janaH |
tadA sa nAbudhyata nidrayA hR^itastato.api daivo vidhireSha gR^ihyatAm || 8.47
yatashcha vAso vanavAsasammataM visR^iShTamasmai samaye divaukasA |
divi praviddhaM mukuTaM cha taddhR^itaM tato.api daivo vidhireSha gR^ihyatAm || 8.48
tadevamAvAM naradevi doShato na tatprayAtaM pratigantumarhasi |
na kAmakAro mama nAsya vAjinaH kR^itAnuyAtraH sa hi daivatairgataH || 8.49
iti prayANaM bahudhaivamadbhutaM nishamya tAstasya mahAtmanaH striyaH |
pranaShTashokA iva vismayaM yayurmanojvaraM pravrajanAttu lebhire || 8.50
viShAdapAriplavalochanA tataH pranaShTapotA kurarIva duHkhitA |
vihAya dhairyaM virurAva gautamI tatAma chaivAshrumukhI jagAda cha || 8.51
mahormimanto mR^idavo.asitAH shubhAH pR^ithakpR^ithagmUlaruhAH samudgatAH |
pracheritAste bhuvi tasya mUrdhajA narendramaulIpariveShTanakShamAH || 8.52
pralambabAhurmR^igarAjavikramo mahArShabhAkShaH kanakojjvaladyutiH |
vishAlavakShA ghanadundubhisvanastathAvidho.apyAshramavAsamarhati || 8.53
abhAginI nUnamiyaM vasundharA tamAryakarmANamanuttamaM prati |
gatastato.asau guNavAn hi tAdR^isho nR^ipaH prajAbhAgyaguNaiH prasUyate || 8.54
sujAtajAlAvatatA~NgulI mR^idU nigUDhagulphau viShapuShpakomalau |
vanAntabhUmiM kaThinAM kathaM nu tau sachakramadhyau charaNau gamiShyataH || 8.55
vimAnapR^iShThe shayanAsanochitaM mahArhavastrAguruchandanArchitam |
kathaM nu shItoShNajalAgameShu tachcharIramojasvi vane bhaviShyati || 8.56
kulena sattvena balena varchasA shrutena lakShmyA vayasA cha garvitaH |
pradAtumevAbhyudito na yAchituM kathaM sa bhikShAM paratashchariShyati || 8.57
shuchau shayitvA shayane hiraNmaye prabodhyamAno nishi tUryanisvanaiH |
kathaM vata svapsyati so.adya me vratI paTaukadeshAntarite mahItale || 8.58
imaM vilApaM karuNaM nishamya tA bhujaiH pariShvajya parasparaM striyaH |
vilochanebhyaH salilAni tatyajurmadhUni puShpebhya iveritA latAH || 8.59
tato dharAyAmapatadyashodharA vichakravAkeva rathA~NgasAhvayA |
shanaishcha tattadvilalApa viklavA muhurmuhurgadgadaruddhayA girA || 8.60
sa mAmanAthAM sahadharmachAriNImapAsya dharmaM yadi kartumichChati |
kuto.asya dharmaH sahadharmachAriNIM vinA tapo yaH paribhoktumichChati || 8.61
shR^iNoti nUnaM sa na pUrvapArthivAn mahAsudarshaprabhR^itIn pitAmahAn |
vanAni patnIsahitAnupeyuShastathA sa dharmaM madR^ite chikIrShati || 8.62
makheShu vA vedavidhAnasaMskR^itau na dampatI pashyati dIkShitAvubhau |
samaM bubhukShU parato.api tatphalaM tato.asya jAto mayi dharmamatsaraH || 8.63
dhruvaM sa jAnan mama dharmavallabho manaH priye.apyAkalahaM muhurmithaH |
sukhaM vibhIrmAmapahAya rosaNAM mahendraloke.apsaraso jighR^ikShati || 8.64
iyaM tu chintA mama kIdR^ishaM nu tA vapurguNaM bibhrati tatra yoShitaH |
vane yadarthaM sa tapAMsi tapyate shriyaM cha hitvA mama bhaktimeva cha || 8.65
na khalviyaM svargasukhAya me spR^ihA na tajjanasyAtmavato.api durlabham |
sa tu priyo mAmiha vA paratra vA kathaM na jahyAditi me manorathaH || 8.66
abhAginI yadyahamAyatekShaNaM shuchismitaM bharturudIkShituM mukham |
na mandabhAgyo.arhati rAhulo.apyayaM kadAchida~Nke parivartituM pituH || 8.67
aho nR^ishaMsaM sukumAravarchasaH sudAruNaM tasya manasvino manaH |
kalapralApaM dviShato.api harShaNaM shishuM sutaM yastyajatIdR^ishaM svataH || 8.68
mamApi kAmaM hR^idayaM sudAruNaM shilAmayaM vApyayasApi vA kR^itam |
anAthavachchrIrahite sukhochite vanaM gate bhartari yanna dIryate || 8.69
itIha devI patishokamUrChitA ruroda dadhyau vilalApa chAsakR^it |
svabhAvadhIrApi hi sA satI shuchA dhR^itiM na sasmAra chakAra no hriyam || 8.70
tatastathA shokavilApaviklavAM yashodharAM prekShya vasundharAgatAm |
mahAravindairiva vR^iShTitADitairmukhaiH savAShpairvanitA vichukrushuH || 8.71
samAptajApyaH kR^itahomama~Ngalo nR^ipastu devAyatanAdviniryayau |
janasya tenArttaraveNa chAhatashchachAla vajradhvanineva vAraNaH || 8.72
nishAmya cha chChandakakanthakAvubhau sutasya saMshrutya cha nishchayaM sthiram |
papAta shokAbhihato mahIpatiH shachIpatervR^itta ivotsave dhvajaH || 8.73
tato muhUrtaM sutashokamohito janena tulyAbhijanena dhAritaH |
nirIkShya dR^iShTyA jalapUrNayA hayaM mahItalastho vilalApa pArthivaH || 8.74
bahUni kR^itvA samare priyANi me mahattvayA kanthaka vipriyaM kR^itam |
guNapriyo yena vane sa me priyaH priyo.api sannapriyavat pracheritaH || 8.75
tadadya mAM vA naya tatra yatra sa vraja drutaM vA punarenamAnaya |
R^ite hi tasmAnmama nAsti jIvitaM vigADharogasya sadauShadhAdiva || 8.76
suvarNaniShThIvini mR^ityunA hR^ite suduShkaraM yanna mamAra sR^i~njayaH |
ahaM punardharmaratau sute gate.amumukShurAtmAnamanAtmavAniva || 8.77
vibhordashakShatrakR^itaH prajApateH parAparaj~nasya vivasvadAtmanaH |
priyeNa putreNa satA vinAkR^itaM kathaM na muhyeddhi mano manorapi || 8.78
ajasya rAj~nastanayAya dhImate narAdhipAyendrasakhAya me spR^ihA |
gate vanaM yastanaye divaM gato na moghavAShpaH kR^ipaNaM jijIva ha || 8.79
prachakShva me bhadra tadAshramAjiraM hR^itastvayA yatra sa me jalA~njaliH |
ime parIpsanti hi te pipAsavo mamAsavaH pretagatiM yiyAsavaH || 8.80
iti tanayaviyogajAtaduHkhaM kShitisadR^ishaM sahajaM vihAya dhairyam |
dasharatha iva rAmashokavashyo bahu vilalApa nR^ipo visa~nj~nakalpaH || 8.81
shrutavinayaguNAnvitastatastaM matisachivaH pravayAH purohitashcha |
avadhR^itamidamUchaturyathAvanna cha paritaptamukhau na chApyashokau || 8.82
tyaja naravara shokamehi dhairyaM kudhR^itirivArhasi dhIra nAshru moktum |
srajamiva mR^iditAmapAsya lakShmIM bhuvi bahavo hi nR^ipA vanAnyatIyuH || 8.83
api cha niyata eSha tasya bhAvaH smara vachanaM tadR^iSheH purAsitasya |
na hi sa divi na chakravartirAjye kShaNamapi vAsayituM sukhena shakyaH || 8.84
yadi tu nR^ivara kArya eva yatnastvaritamudAhara yAvadatra yAvaH |
bahuvidhamiha yuddhamastu tAvattava tanayasya vidheshcha tasya tasya || 8.85
narapatiratha tau shashAsa tasmAddrutamita eva yuvAmabhiprayAtam |
na hi mama hR^idayaM prayAti shAntiM vanashakuneriva putralAlasasya || 8.86
paramamiti narendrashAsanAttau yayaturamAtyapurohitau vanaM tat |
kR^itamiti savadhUjanaH sadAro nR^ipatirapi prachakAra sheShakAryam || 8.87
iti shrIbuddhacharite mahAkAvye.antaHpuravilApo nAmAShTamaH sargaH || 8 ||
\medskip\hrule\medskip
##Book IX [##kumArAnveShaNo##]##
tatastadA mantripurohitau tau vAShpapratodAbhihatau nR^ipeNa |
viddhau sadashvAviva sarvayatnAtsauhArdashIghraM yayaturvanaM tat || 9.1
tamAshramam jAtaparishramau tAvupetya kAle sadR^ishAnuyAtrau |
rAjarddhimutsR^ijya vinItacheShTAvupeyaturbhArgavadhiShNyameva || 9.2
tau nyAyatastaM pratipUjya vipraM tenArchitau tAvapi chAnurUpam |
kR^itAsanau bhArgavamAsanasthaM ChittvA kathAmUchaturAtmakR^ityam || 9.3
shuddhaujasaH shuddhavishAlakIrterikShvAkuvaMshaprabhavasya rAj~naH |
imaM janaM vettu bhavAnadhIraM shrutagrahe mantraparigrahe cha || 9.4
tasyendrakalpasya jayantakalpaH putro jarAmR^ityubhayaM titIrShuH |
ihAbhyupetaH kila tasya hetorAvAmupetau bhagavAnavaitu || 9.5
tau so.abravIdasti sa dIrghabAhuH prAptaH kumAro na tu nAvabuddhaH |
dharmo.ayamAvartaka ityavetya yAtastvarADAbhimukho mumukShuH || 9.6
tasmAttatastAvupalabhya tattvaM taM vipramAmanttya tadaiva sadyaH |
khinnAvakhinnAviva rAjaputraH prasasratustena yataH sa yAtaH || 9.7
yAntau tatastau sR^ijayA vihInamapashyatAM taM vapuShA jvalantam |
nR^ipopaviShTaM pathi vR^ikShamUle sUryaM ghanAbhogamiva praviShTam || 9.8
yAnaM vihAyopayayau tatastaM purohito mantradhareNa sArdham |
yathA vanasthaM sahavAmadevo rAmaM didR^ikShurmuniraurvasheyaH || 9.9
tAvarchayAmAsaturarhatastaM divIva shukrA~Ngirasau mahendram |
pratyarchayAmAsa sa chArhatastau divIva shukrA~Ngirasau mahendraH || 9.10
kR^itAbhyanuj~nAvabhitastatastau niShIdatuH shAkyakuladhvajasya |
virejatustasya cha sannikarShe punarvasU yogagatAvivendoH || 9.11
taM vR^ikShamUlasthamabhijvalantaM purohito rAjasutaM babhAShe |
yathopaviShTaM divi pArijAte bR^ihaspatiH shakrasutaM jayantam || 9.12
tvachchokashalye hR^idayAvagADhe mohaM gato bhUmitale muhUrtam |
kumAra rAjA nayanAmbuvarSho yattvAmavochattadidaM nibodha || 9.13
jAnAmi dharmaM prati nishchayaM te paraimi te.acyAvinametamartham |
ahaM tvakAle vanasaMshrayAtte shokAgninAgnipratimena dahye || 9.14
tadehi dharmapriya matpriyArthaM dharmArthameva tyaja buddhimetAm |
ayaM hi mA shokarayaH pravR^iddho nadIrayaH kUlamivAbhihanti || 9.15
meghAmbukakShAdriShu yA hi vR^ittiH samIraNArkAgnimahAshanInAm |
tAM vR^ittimasmAsu karoti shoko vikarShaNochchoShaNadAhabhedaiH || 9.16
tadbhu~NkShva tAvadvasudhAdhipatyaM kAle vanaM yAsyasi shAstradR^iShTe |
aniShTabandhau kuru mApyupekShAM sarveShu bhUteShu dayA hi dharmaH || 9.17
na chaiSha dharmo vana eva siddhaH pure.api siddhirniyatA yatInAm |
buddhishcha yatnashcha nimittamatra vanaM cha li~NgaM cha hi bhIruchihnam || 9.18
maulIdharairaMsaviShaktahAraiH keyUraviShTabdhabhujairnarendraiH |
lakShmya~Nkamadhye parivartamAnaiH prApto gR^ihasthairapi mokShadharmaH || 9.19
dhruvAnujau yau balivajrabAhU vaibhrAjamAShADhamathAntidevam |
videharAjaM janakaM tathaiva pAkadrumaM senajitashcha rAj~naH || 9.20
etAn gR^ihasthAn nR^ipatInavehi naiHshreyase dharmavidhau vinItAn |
ubhe.api tasmAdyugapadbhajasva chittAdhipatyaM cha nR^ipashriyaM cha || 9.21
ichchAmi hi tvAmupaguhya gADhaM kR^itAbhiShekaM salilArdrameva |
dhR^itAtapatraM samudIkShamANastenaiva harSheNa vanaM praveShTum || 9.22
ityabravIdbhUmipatirbhavantaM vAkyena vAShpagrathitAkShareNa |
shrutvA bhavAnarhati tatpriyArthaM snehena tatsnehamanuprayAtum || 9.23
shokAmbhasi tvatprabhave hyagAdhe duHkhArNave majjati shAkyarAjaH |
tasmAttamuttAraya nAthahInaM nirAshrayaM magnamivArNave gAm || 9.24
bhIShmeNa ga~Ngodarasambhavena rAmeNa rAmeNa cha bhArgaveNa |
shrutvA kR^itaM karma pituH priyArthaM pitustvamapyarhasi kartumiShTam || 9.25
saMvardhayitrIM cha samehi devImagastyajuShTAM dishamaprayAtAm |
pranaShTavatsAmiva vatsalAM gAmajasramArttAM karuNaM rudantIM  || 9.26
haMsena haMsImiva viprayuktAM tyaktAM gajeneva vane kareNum |
ArttAM sanAthAmapi nAthahInAM trAtuM vadhUmarhasi darshanena || 9.27
ekaM sutaM bAlamanarhaduHkhaM santApamantargatamudvahantam  |
taM rAhulaM mokShaya bandhushokAd rAhUpasargAdiva pUrNachandram || 9.28
shokAgninA tvadvirahendhanena niHshvAsadhUmena tamaHshikhena |
tvaddarshanAyarChati dahyamAnaH so.antaHpuraM chaiva puraM cha kR^itsnam || 9.29
sa bodhisattvaH paripUrNasattvaH shrutvA vachastasya purohitasya |
dhyAtvA muhUrtaM guNavadguNaj~naH pratyuttaraM prashritamityuvAcha || 9.30
avaimi bhAvaM tanayaprasaktaM visheShato yo mayi bhUmipasya |
jAnannapi vyAdhijarAvipadbhyo bhItastvagatyA svajanaM tyajAmi || 9.31
draShTuM priyaM kaH svajanaM hi nechchennAsau yadi syAtpriyaviprayogaH |
yadA tu bhUtvApi bhavedviyogastato guruM snigdhamapi tyajAmi || 9.32
maddhetukaM yattu narAdhipasya shokaM bhavAnarhati na priyaM me |
yatsvapnabhUteShu samAgameShu santapyate bhAvini viprayogaiH || 9.33
evaM cha te nishchayametu buddhirdR^iShTvA vichitraM vividhaprachAram |
santApaheturna suto na bandhuraj~nAnanaimittika eSha tApaH || 9.34
yadAdhvagAnAmiva sa~NgatAnAM kAle viyogo niyataH prajAnAm |
prAj~no janaH ko nu bhajeta shokaM bandhupriyaH sannapi  bandhuhInaH || 9.35
ihaiti hitvA svajanaM paratra pralabhya chehApi punaH prayAti |
gatvApi tatrApyaparatra gachchetyevaM jano yogini ko.anurodhaH || 9.36
yadA cha garbhAtprabhR^iti pravR^ittaH sarvAsv avasthAsu vadhAya mR^ityuH  |
kasmAdakAle vanasaMshrayaM me putrapriyastatra bhavAn avochat || 9.37
bhavatyakAlo viShayAbhipattau kAlastathaivAbhividhau pradiShTaH || 9.38
kAlo jagatkarShati sarvakAlAnarchArhake shreyasi sarvakAlaH ||
rAjyaM mumukShurmayi yachcha rAjA tadapyudAraM sadR^ishaM pitushcha |
pratigrahItuM mama na kShamaM tu lobhAdapathyAnnamivAturasya || 9.39
kathaM nu mohAyatanaM nR^ipatvaM kShamaM prapattuM viduShA nareNa |
sodvegatA yatra madaH shramashcha paropachAreNa cha dharmapIDA || 9.40
jAmbUnadaM harmyamiva pradIptaM viSheNa saMyuktamivottamAnnam |
grAhAkulaM chAmbviva sAravindaM rAjyaM hi ramyaM vyasanAshrayaM cha  || 9.41
itthaM cha rAjyaM na sukhaM na dharmaH pUrve yathA jAtaghR^iNA narendrAH |
vayaHprakarShe.aparihAryaduHkhe rAjyAni muktvA vanameva jagmuH || 9.42
varaM hi bhuktAni tR^iNAnyaraNye toShaM paraM ratnamivopaguhya |
sahoShitaM shrIsulabhairna chaiva doShairadR^ishyairiva kR^iShNasarpaiH || 9.43
shlAghyaM hi rAjyAni vihAya rAj~nAM dharmAbhilASheNa vanaM praveShTum |
bhagnapratij~nasya na tUpapannaM vanaM parityajya gR^ihaM praveShTum || 9.44
jAtaH kule ko hi naraH sasattvo dharmAbhilASheNa vanaM praviShTaH |
kAShAyamutsR^ijya vimuktalajjaH purandarasyApi puraM shrayeta || 9.45
lobhAddhi mohAdathavA bhayena yo vAntamannaM punarAdadIta |
lobhAtsa mohAdathavA bhayena santyajya kAmAn punarAdadIta || 9.46
yashcha pradIptAchCharaNAtkatha~nchinniShkramya bhUyaH pravishettadeva |
gArhasthyamutsR^ijya sa dR^iShTadoSho mohena bhUyo.abhilaShedgrahItum || 9.47
yA cha shrutirmokShamavAptavanto nR^ipA gR^ihasthA iti naitadasti |
shamapradhAnaH kva cha mokShadharmo daNDapradhAnaH kva cha rAjadharmaH || 9.48
shame ratishchechChithilaM cha rAjyaM rAjye matishchechChamaviplavashcha |
shamashcha taikShNyaM cha hi nopapannaM shItoShNayoraikyamivodakAgnyoH || 9.49
tannishchayAdvA vasudhAdhipAste rAjyAni muktvA shamamAptavantaH |
rAjyA~NgitA vA nibhR^itendriyatvAdanaiShThike mokShakR^itAbhimAnAH || 9.50
teShAM cha rAjye.astu shamo yathAvatprApto vanaM nAhamanishchayena |
ChittvA hi pAshaM gR^ihabandhusa~nj~naM muktaH punarna pravivikShurasmi || 9.51
ityAtmavij~nAnaguNAnurUpaM muktaspR^ihaM hetumadUrjitaM cha |
shrutvA narendrAtmajamuktavantaM pratyuttaraM mantradharo.apyuvAcha || 9.42 (9.52)
yo nishchayo mantravarastavAyaM nAyaM na yukto na tu kAlayuktaH |
shokAya hitvA pitaraM vayaHsthaM syAddharmakAmasya hi te na dharmaH || 9.43 (9.53)
nUnaM cha buddhistava nAtisUkShmA dharmArthakAmeShvavichakShaNA vA |
hetoradR^iShTasya phalasya yastvaM pratyakShamarthaM paribhUya yAsi || 9. 44 (9.54)
punarbhavo.astIti cha kechidAhurnAstIti kechinniyatapratij~nAH |
evaM yadA saMshayito.ayamarthastasmAt kShamaM bhoktumupasthitA shrIH || 9.45 (9.55)
bhUyaH pravR^ittiryadi kAchidasti raMsyAmahe tatra yathopapattau |
atha pravR^ittiH parato na kAchitsiddho.aprayatnAjjagato.asya mokShaH || 9.46 (9.56)
astIti kechitparalokamAhurmokShasya yogaM na tu varNayanti |
agneryathA hyuShNamapAM dravatvaM tadvatpravR^ittau prakR^itiM vadanti || 9.47 (9.57)
kechitsvabhAvAditi varNayanti shubhAshubhaM chaiva bhavAbhavau cha |
svAbhAvikaM sarvamidaM cha yasmAdato.api mogho bhavati prayatnaH || 9.48 (9.58)
yadindriyANAM niyataH prachAraH priyApriyatvaM viShayeShu chaiva |
saMyujyate yajjarayArttibhishcha kastatra yatno nanu sa svabhAvaH || 9.49 (9.59)
adbhirhutAshaH shamamabhyupaiti tejAMsi chApo gamayanti shoSham |
bhinnAni bhUtAni sharIrasaMsthAnyaikyaM cha dattvA jagadudvahanti || 9.50 (9.60)
yatpANipAdodarapR^iShThamUrdhnA nirvartate garbhagatasya bhAvaH |
yadAtmanastasya cha tena yogaH svAbhAvikaM tatkathayanti tajj~nAH || 9.51 (9.61)
kaH kaNTakasya prakaroti taikShNyaM vichitrabhAvaM mR^igapakShiNAM vA |
svabhAvataH sarvamidaM pravR^ittaM na kAmakAro.asti kutaH prayatnaH || 9.52 (9.62)
sargaM vadantIshvaratastathAnye tatra prayatne puruShaShya ko.arthaH |
ya eva heturjagataH pravR^ittau heturnivR^ittau niyataH sa eva || 9.53 (9.63)
kechidvadantyAtmanimittameva prAdurbhavaM chaiva bhavakShayaM cha |
prAdurbhavaM tu pravadantyayatnAdyatnena mokShAdhigamaM bruvanti || 9.54 (9.64)
naraH pitR^INAmanR^iNaH prajAbhirvedairR^iShINAM kratubhiH surANAm |
utpadyate sArdhamR^iNaistribhistairyasyAsti mokShaH kila tasya mokShaH || 9.55 (9.65)
ityevametena vidhikrameNa mokShaM sayatnasya vadanti tajj~nAH |
prayatnavanto.api hi vikrameNa mumukShavaH khedamavApnuvanti || 9.56 (9.66)
tatsaumya mokShe yadi bhaktirasti nyAyena sevasva vidhiM yathoktam |
evaM bhaviShyatyupapattirasya santApanAshashcha narAdhipasya || 9.57 (9.67)
yA cha pravR^ittA bhavadoShabuddhistapovanebhyo bhavanaM praveShTum |
tatrApi chintA tava tAta mA bhUt pUrve.api jagmuH svagR^ihaM vanebhyaH || 9.58 (9.68)
tapovanastho.api vR^itaH prajAbhirjagAma rAjA puramambarIShaH |
tathA mahIM viprakR^itAmanAryaistapovanAdetya rarakSha rAmaH || 9.59 (9.69)
tathaiva shAlvAdhipatirdrumAkSho vanAtsasUnuH svapuraM pravishya |
brahmarShibhUtashcha munervashiShThAddadhre shriyaM sA~NkR^itirantidevaH || 9.60 (9.70)
evaMvidhA dharmayashaHpradIptA vanAni hitvA bhavanAnyabhIyuH |
tasmAnna doSho.asti gR^ihaM praveShTuM tapovanAddharmanimittameva || 9.61 (9.71)
tato vachastasya nishamya mantriNaH priyaM hitaM chaiva nR^ipasya chakShuShaH |
anUnamavyastamasaktamadrutaM dhR^itau sthito rAjasuto.abravIdvachaH || 9.62 (9.72)
ihAsti nAstIti ya eSha saMshayaH parasya vAkyairna mamAtra nishchayaH |
avetya tattvaM tapasA shamena vA svayaM grahIShyAmi yadatra nishchitam || 9.63 (9.73)
na me kShamaM sa~NgashataM hi darshanaM grahItumavyaktaparaM parAhatam |
buddhaH parapratyayato hi ko vrajejjano.andhakAre.andha ivAndhadeshitaH || 9.64 (9.74)
adR^iShTatattvasya sato.api kiM tu me shubhAshubhe saMshayite shubhe matiH |
vR^ithApi khedo.api varaM shubhAtmanaH sukhaM na tattve.api vigarhitAtmanaH || 9.65 (9.75)
imaM tu dR^iShTvAgamamavyavasthitaM yaduktamAptaistadavehi sAdhviti |
prahINadoShatvamavehi chAptatAM prahINadoSho hyanR^itaM na vakShyati || 9.66 (9.76)
gR^ihapraveshaM prati yachcha me bhavAnuvAcha rAmaprabhR^itIn nidarshanam |
na te pramANaM na hi dharmanishchayeShvalaM pramANAya parikShatavratAH || 9.67 (9.77)
tadevamapyeva ravirmahIM patedapi sthiratvaM himavAn giristyajet |
adR^iShTatattvo viShayonmukhendriyaH shrayeya na tveva gR^ihAn pR^ithagjanaH || 9.68 (9.78)
ahaM visheyaM jvalitaM hutAshanaM na chAkR^itArthaH pravisheyamAlayam |
iti pratij~nAM sa chakAra garvito yatheShTamutthAya cha nirmamo yayau || 9.69 (9.79)
tataH savAShpau sachivadvijAvubhau nishamya tasya sthirameva nishchayam |
viShaNNavaktrAvanugamya duHkhitau shanairagatyA purameva jagmatuH || 9.70 (9.80)
tatsnehAdatha nR^ipateshcha bhaktitastau sApekShaM pratiyayatushcha tasthatushcha |
durdharShaM ravimiva dIptamAtmabhAsA taM draShTuM na hi pathi shekaturna  moktum || 9.71 (9.81)
tau j~nAtuM paramagatergatiM tu tasya prachchannAMshcharapuruShA~nchuchIn vidhAya |
rAjAnaM priyasutalAlasaM nu gatvA drakShyAvaH kathamiti jagmatuH katha~nchit || 9.72 (9.82)
iti shrIbuddhacharite mahAkAvye kumArAnveShaNo nAma navamaH sargaH || 9 ||
\medskip\hrule\medskip
##Book X [##shreNyAbhigamano##]##
sa rAjavatsaH pR^ithupInavakShAstau havyamantrAdhikR^itau vihAya |
uttIrya ga~NgAM prachalattara~NgAM shrImadgR^ihaM rAjagR^ihaM jagAma || 10.1
shailaiH suguptaM cha vibhUShitaM cha dhR^itaM cha pUtaM cha shivaistapodaiH |
pa~nchAchalA~NkaM nagaraM prapede shAntaH svayambhUriva nAkapR^iShTham || 10.2
gAmbhIryamojashcha nishAmya tasya vapushcha dIptaM puruShAnatItya |
visismiye tatra janastadAnIM sthANuvratasyeva vR^iShadhvajasya || 10.3
taM prekShya yo.anyena yayau sa tasthau yashchAtra tasthau pathi so.anvagachChat |
drutaM yayau yaM sadayaM sadhIraM yaH kashchidAste sma sa chotpapAta || 10.4
kashchittamAnarcha janaH karAbhyAM satkR^itya kashchichChirasA vavande |
snigdhena kashchidvachasAbhyanandannaivaM jagAmApratipUjya kashchit || 10.5
taM jihriyuH prekShya vichitraveShAH prakIrNavAchaH pathi maunamIyuH |
dharmasya sAkShAdiva sannikarShAnna kashchidanyAyamatirbabhUva || 10.6
anyakriyANAmapi rAjamArge strINAM nR^iNAM vA bahumAnapUrvam |
tadeva kalpaM naradevasUtraM nirIkShamANA na tu tasya dR^iShTiH || 10.7
bhruvau lalATaM mukhamIkShaNaM vA vapuH karau vA charaNau gatiM vA |
yadeva yastasya dadarsha tatra tadeva tasyAnubabandha chakShuH || 10.8
dR^iShTvA shubhorNabhruvamAyatAkShaM jvalachcharIraM shubhajAlahastam |
taM bhikShuveshaM kShitipAlanArhaM sa~nchukShubhe rAjagR^ihasya lakShmIH || 10.9
shreNyo.atha bhartA magadhAjirasya vAhyAdvimAnAdvipulaM janaugham |
dadarsha paprachcha cha tasya hetuM tatastamasmai puruShaH shashaMsa || 10.10
j~nAnaM paraM vA pR^ithivIshriyaM vA viprairya ukto.adhigamiShyatIti |
sa eva shAkyAdhipatestanUjo nirIkShyate pravrajito janena || 10.11
tataH shrutArtho manasA gatArtho rAjA babhAShe puruShaM tameva |
vij~nAyatAM kva pratigachchatIti tathetyathainaM puruSho.anvagachChat || 10.12
alolachakShuryugamAtradarshI nivR^ittavAgyantritamandagAmI |
chachAra bhikShAM sa tu bhikShuvaryo nidhAya gAtrANi chalaM cha chetaH || 10.13
AdAya bhaikShaM cha yathopapannaM yayau gireH prasravaNaM viviktam |
nyAyena tatrAbhyavahR^itya chainanmahIdharaM pANDavamAruroha || 10.14
tasminvane lodhravanopagUDhe mayUranAdapratipUrNaku~nje |
kAShAyavAsAH sa babhau nR^isUryo yathodayasyopari bAlasUryaH || 10.15
tatraivamAlokya sa rAjabhR^ityaH shreNyAya rAj~ne kathayAM chakAra |
saMshrutya rAjA sa cha bAhumAnyAttatra pratasthe nibhR^itAnuyAtraH || 10.16
sa pANDavaM pANDavatulyavIryaH shailottamaM shailasamAnavarShmA |
maulIdharaH siMhagatirnR^isiMhashchalatsaTaH siMha ivAruroha || 10.17
chalasya tasyopari shR^i~NgabhUtaM shAntendriyaM pashyati bodhisattvam |
parya~NkamAsthAya virochamAnaM shashA~NkamudyantamivAbhrakUTAt || 10.18
taM rUpalakShmyA cha shamena chaiva dharmasya nirmANamivopadiShTam |
savismayaH prashrayavAn narendraH svayambhuvaM shakra ivopatasthe || 10.19
taM nyAyato nyAyavatAM variShThaH sametya paprachcha cha dhAtusAmyam |
sa chApyavochatsadR^ishena sAmnA nR^ipaM manaHsvAsthyamanAmayaM cha || 10.20
tataH shuchau vAraNakarNanIle shilAtale.asau niShasAda rAjA |
nR^ipopavishyAnumatashcha tasya bhAvaM vijij~nAsuridaM babhAShe || 10.21
prItiH parA me bhavataH kulena kramAgatA chaiva parIkShitA cha |
jAtA vivakShA suta yA yato me tasmAdidaM snehavacho nibodha || 10.22
AdityapUrvaM vipulaM kulaM te navaM vayo dIptamidaM vapushcha |
kasmAdiyaM te matirakrameNa bhaikShAka evAbhiratA na rAjye || 10.23
gAtraM hi te lohitachandanArhaM kAShAyasaMshleShamanarhametat |
hastaH prajApAlanayogya eSha bhoktuM na chArhaH paradattamannam || 10.24
tatsaumya rAjyaM yadi paitR^ikaM tvaM snehAtpiturnechchasi vikrameNa |
na cha kShamaM marShayituM matiste bhuktvArdhamasmadviShayasya shIghram || 10.25
evaM hi na syAtsvajanAvamardaH kAlakrameNApi shamashrayA shrIH |
tasmAtkuruShva praNayaM mayi tvaM sadbhiH sahIyA hi satAM samR^iddhiH || 10.26
atha tvidAnIM kulagarvitatvAdasmAsu vishrambhaguNo na te.asti |
vyUhAnyanekAni vigAhya vANairmayA sahAyena parA~njigISha || 10.27
tadbuddhimatrAnyatarAM vR^iNIShva dharmArthakAmAn vidhivadbhajasva |
vyatyasya rAgAdi ha hi trivargaM pretyeha vibhraMshamavApnuvanti || 10.28
yo hyarthadharmau paripIDya kAmaH syAddharmakAmye paribhUya chArthaH |
kAmArthayoshchoparameNa dharmastyAjyaH sa kR^itsno yadi kA~NkShitArthaH || 10.29
tasmAttrivargasya niShevaNena tvaM rUpametatsaphalaM kuruShva |
dharmArthakAmAdhigamaM hyanUnaM nR^iNAmanUnaM puruShArthamAhuH || 10.30
tanniShphalau nArhasi kartumetau pInau bhujau chApavikarShaNArhau |
mAndhAtR^ivajjetumimau hi yogyau lokAni hi trINi hi kiM punargAm || 10.31
snehena khalvetadahaM bravImi naishvaryarAgeNa na vismayena |
imaM hi dR^iShTvA tava bhikShuveshaM jAtAnukampo.asmyapi chAgatAshruH || 10.32
tadbhu~NkShva bhikShAshramakAma kAmA~NkAle.asi kartA priyadharma dharmam |
yAvatsvavaMshapratirUparUpaM na te jarAbhyetyabhibhUya bhUyaH || 10.33
shaknoti jIrNaH khalu dharmamAptuM kAmopabhogeShvagatirjarAyAH |
atashcha yUnaH kathayanti kAmAnmadhyasya vittaM sthavirasya dharmam || 10.34
dharmasya chArthasya cha jIvaloke pratyarthibhUtAni hi yauvanAni |
saMrakShyamANAnyapi durgrahANi kAmA yatastena yathA haranti || 10.35
vayAMsi jIrNAni vimarshayanti dhIrANyavasthAnaparAyaNAni |
alpena yatnena shamAtmakAni bhavantyagatyeva cha lajjayA cha || 10.36
atashcha lolaM viShayapradhAnaM pramattamakShAntamadIrghadarshi |
bahuchchalaM yauvanamabhyatItya nistIrya kAntAramivAshvasanti || 10.37
tasmAdadhIraM chapalapramAdi navaM vayastAvadidaM vyapaitu |
kAmasya pUrvaM hi vayaH sharavyaM na shakyate rakShitumindriyebhyaH || 10.38
athau chikIrShA tava dharma eva yajasva yaj~naM kuladharma eShaH |
yaj~nairadhiShThAya hi nAkapR^iShThaM yayau marutvAnapi nAkapR^iShTham || 10.39
suvarNakeyUravidaShTabAhavo maNipradIpojjvalachitramaulayaH |
nR^iparShayastAM hi gatiM gatA makhaiH shrameNa yAmeva mahArShayo yayuH || 10.40
ityevaM magadhapatir[vacho] babhAShe yaH samyagvalabhidiva dhruvaM babhAShe |
tachchrutvA na sa vichachAra rAjasUnuH kailAso giririva naikachitrasAnuH || 10.41
iti shrIbuddhacharite mahAkAvye.ashvaghoShakR^ite shreNyAbhigamano nAma dashamaH sargaH || 10 ||
\medskip\hrule\medskip
##Book XI [##kAmavigarhaNo##]##
athaivamukto magadhAdhipena suhR^inmukhena pratikUlamartham |
svastho.avikAraH kulashauchashuddhaH shauddhodanirvAkyamidaM jagAda || 11.1
nAshcharyametadbhavato.abhidhAtuM jAtasya harya~Nkakule vishAle |
yanmitrapakShe tava mitrakAma syAdvR^ittireShA parishuddhavR^itteH || 11.2
asatsu maitrI svakulAnurUpA na tiShThati shrIriva viklaveShu |
pUrvaiH kR^itAM prItiparamparAbhistAmeva santastu vivardhayanti || 11.3
ye chArthakR^ichChreShu bhavanti loke samAnakAryAH suhR^idAM manuShyAH |
mitrANi tAnIti paraimi buddhyA svasthasya vR^iddhiShviha ko hi na syAt || 11.4
evaM cha ye dravyamavApya loke mitreShu dharme cha niyojayanti |
avAptasArANi dhanAni teShAM bhraShTAni nAnte janayanti tApam || 11.5
suhR^ittayA chAryatayA cha rAjan vibhAvya mAmeva vinishchayaste |
atrAnuneShyAmi suhR^ittayaiva brUyAmahaM nottaramanyadatra || 11.6
ahaM jarAmR^ityubhayaM viditvA mumukShayA dharmamimaM prapannaH |
bandhUnpriyAnashrumukhAn vihAya prAgeva kAmAnashubhasya hetUn || 11.7
nAshIviShebhyo.api tathA bibhemi naivAshanibhyo gaganAchcyutebhyaH |
na pAvakebhyo.anilasaMhitebhyo yathA bhayaM me viShayebhya ebhyaH || 11.8
kAmA hyanityAH kushalArthachaurA riktAshcha mAyAsadR^ishAshcha loke |
AshAsyamAnA api mohayanti chittaM nR^iNAM kiM punarAtmasaMsthAH || 11.9
kAmAbhibhUtA hi na yAnti sharma tripiShTape kiM vata martyaloke |
kAmaiH satR^iShNasya hi nAsti tR^iptiryathendhanairvAtasakhasya vahneH || 11.10
jagatyanartho na samo.asti kAmairmohAchcha teShveva janaH prasaktaH |
tattvaM viditvaivamanarthabhIruH prAj~naH svayaM ko.abhilaShedanartham || 11.11
samudravastrAmapi gAmavApya pAraM jigIShanti mahArNavasya |
lokasya kAmairna vitR^iptirasti patadbhirambhobhirivArNavasya || 11.12
devena vR^iShTe.api hiraNyavarShe dvIpAnsamudrAMshchaturo.api jitvA |
shakrasya chArdhAsanamapyavApya mAndhAturAsIdviShayeShvatR^iptiH || 11.13
bhuktvApi rAjyaM divi devatAnAM shatakratau vR^itrabhayAtpranaShTe |
darpAnmahArShInapi vAhayitvA kAmeShvatR^ipto nahuShaH papAta || 11.14
aiDashcha rAjA tridivaM vigAhya nItvApi devIM vashamurvashIM tAm |
lobhAdR^iShibhyaH kanakaM jihIrShurjagAma nAshaM viShayeShvatR^iptaH || 11.15
balermahendraM nahuShaM mahendrAdindraM punarye nahuShAdupeyuH |
svarge kShitau vA viShayeShu teShu ko vishvasedbhAgyakulAkuleShu || 11.16
chIrAmbarA mUlaphalAMbubhakShA jaTA vahanto.api bhuja~NgadIrghAH |
yairanyakAryA munayo.api bhagnAH kaH kAmasa~nj~nAn mR^igayeta shatrUn || 11.17
ugrAyudhashchaugradhR^itAyudho.api yeShAM kR^ite mR^ityumavApa bhIShmAt |
chintApi teShAmashivA vadhAya tadvR^ittinAM kiM punaravratAnAm || 11.18
AsvAdamalpaM viShayeShu matvA saMyojanotkarShamatR^iptimeva |
sadbhyashcha garhAM niyataM cha pApaM kaH kAmasa~nj~naM viShamAsasAda || 11.19
kR^iShyAdibhirdharmabhiranvitAnAM kAmAtmakAnAM cha nishamya duHkham |
svAsthyaM cha kAmeShvakutUhalAnAM kAmAn vihAtuM kShamamAtmavadbhiH || 11.20
j~neyA vipatkAmini kAmasampatsiddheShu kAmeShu madaM hyupaiti |
madAdakAryaM kurute na kAryaM yena kShato durgatimabhyupaiti || 11.21
yatnena labdhAH parirakShitAshcha ye vipralabhya pratiyAnti bhUyaH |
teShvAtmavAn yAchitakopameShu kAmeShu vidvAniha ko rameta || 11.22
anviShya chAdAya cha jAtatarShA yAnatyajantaH pariyAnti duHkham |
loke tR^iNolkAsadR^isheShu teShu kAmeShu kasyAtmavato ratiH syAt || 11.23
anAtmavanto hR^idi yairvidaShTA vinAshamarChanti na yAnti sharma |
kruddhaugrasarpapratimeShu teShu kAmeShu kasyAtmavato ratiH syAt || 11.24
asthi kShudhArttA iva sArameyA bhuktvApi yAnnaiva bhavanti tR^iptAH |
jIrNAsthika~NkAlasameShu teShu kAmeShu kasyAtmavato ratiH syAt || 11.25
ye rAjachaurodakapAvakebhyaH sAdhAraNatvAjjanayanti duHkham |
teShu praviddhAmiShasannibheShu kAmeShu kasyAtmavato ratiH syAt || 11.26
yatra sthitAnAmabhito vipattiH shatroH sakAshAdapi bAndhavebhyaH |
hiMsreShu teShvAyatanopameShu kAmeShu kasyAtmavato ratiH syAt || 11.27
girau vane chApsu cha sAgare cha yadbhraMshamarchantyabhila~NghamAnAH |
teShu drumaprAgraphalopameShu kAmeShu kasyAtmavato ratiH syAt || 11.28
tIrthaiH prayatnairvividhairavAptAH kShaNena ye nAshamiha prayAnti || 11.29
svapnopabhogapratimeShu teShu kAmeShu kasyAtmavato ratiH syAt |
yAnarchayitvApi na yAnti sharma vivardhayitvA paripAlayitvA |
a~NgArakarShapratimeShu teShu kAmeShu kasyAtmavato ratiH syAt || 11.30
vinAshamIyuH kuravo yadarthaM vR^iShNyandhakA maithiladaNDakAshcha |
shUlAsikAShThapratimeShu teShu kAmeShu kasyAtmavato ratiH syAt || 11.31
sundopasundAvasurau yadarthamanyonyavairaprasR^itau vinaShTau |
sauhArdavishleShakareShu teShu kAmeShu kasyAtmavato ratiH syAt || 11.32
kAmAndhasa~nj~nAH kR^ipayA va ke cha kravyAtsu nAtmAnamihotsR^ijanti |
sapatnabhUteShvashiveShu teShu kAmeShu kasyAtmavato ratiH syAt || 11.33
kAmAndhasa~nj~naH kR^ipaNaM karoti prApnoti duHkhaM vadhabandhanAdi |
kAmArthamAshAkR^ipaNastapasvI mR^ityushramaM chArhati jIvaloke || 11.34
gItairhriyante hi mR^igA vadhAya rUpArthamagnau shalabhAH patanti |
matsyo giratyAyasamAmiShArthI tasmAdanarthaM viShayAH phalanti || 11.35
kAmAstu bhogA iti yanmataM syAdbhogyA na kechitparigaNyamAnAH |
vastrAdayo dravyaguNA hi loke duHkhapratIkAra iti pradhAryAH || 11.36
iShTaM hi tarShaprashamAya toyaM kShunnAshahetorashanaM tathaiva |
vAtAtapAmbvAvaraNAya veshma kaupInashItAvaraNAya vAsaH || 11.37
nidrAvighAtAya tathaiva shayyA yAnaM tathAdhvashramanAshanAya |
tathAsanaM sthAnavinodanAya snAnaM mR^ijArogyabalAshrayAya || 11.38
duHkhapratIkAranimittabhUtAstasmAtprajAnAM viShayA na bhogyAH |
ashnAmi bhogAniti ko.abhyupeyAtprAj~naH pratIkAravidhau pravR^ittAn || 11.39
yaH pittadAhena vidahyamAnaH shItakriyAM bhoga iti vyavasyet |
duHkhapratIkAravidhau pravR^ittaH kAmeShu kuryAtsa hi bhogasa~nj~nAm || 11.40
kAmeShvanaikAntikatA cha yasmAdato.api me teShu na bhogasa~nj~nA |
ya eva bhAvA hi sukhaM dishanti ta eva duHkhaM punarAvahanti || 11.41
gurUNi vAsAMsyagurUNi chaiva sukhAya shIte hyasukhAya gharme |
chandrAMshavashchandanameva choShNe sukhAya duHkhAya bhavanti shIte || 11.42
dvandvAni sarvasya yataH prasaktAnyalAbhalAbhaprabhR^itIni loke |
ato.api naikAntasukho.asti kashchinnaikAntaduHkhaH puruShaH prThivyAm || 11.43
dR^iShTvA cha mishrAM sukhaduHkatAM me rAjyaM cha dAsyaM cha mataM samAnam |
nityaM hasatyeva hi naiva rAjA na chApi santapyata eva dAsaH || 11.44
Aj~nA nR^ipatve.abhyadhiketi yasmAtmahAnti duHkhAnyata eva rAj~naH |
Asa~NgakAShThapratimo hi rAjA lokasya hetoH parikhedameti || 11.45
rAjye nR^ipastyAgini va~Nkamitre vishvAsamAgachchati chedvipannaH |
athApi vishrambhamupaiti neha kiM nAma saukhyaM chakitasya rAj~naH || 11.46
yadA cha jitvApi mahIM samagrAM vAsAya dR^iShTaM puramekameva |
tatrApi chaikaM bhavanaM niShevyaM shramaH parArthe nanu rAjabhAvaH || 11.47
rAjyo.api vAse yugamekameva kShutsannirodhAya tathAnnamAtrA |
shayyA tathaikAsanamekameva sheShA visheShA nR^ipatermadAya || 11.48
tuShTyarthametachcha phalaM yadIShTamR^ite.api rAjyAnmama tuShTirasti |
tuShTau cha satyAM puruShasya loke sarve visheShA nanu nirvisheShAH || 11.49
tannAsti kAmAn prati sampratAryaH kSheme shivaM mArgamanuprapannaH |
smR^itvA suhR^ittvaM tu punaH punarmAM brUhi pratij~nAM khalu pAlayanti || 11.50
na hyasmyamarSheNa vanapraviShTo na shatrubANairavadhUtamauliH |
kR^itaspR^iho nApi phalAdhikebhyo gR^ihNAmi naitadvachanaM yataste || 11.51
yo dandashUkaM kupitaM bhuja~NgaM muktvA vyavasyeddhi punargrahItum |
dAhAtmikAM vA jvalitAM tR^iNaulkAM santyajya kAmAnsa punarbhajeta || 11.52
andhAya yashcha spR^ihayedanandho baddhAya mukto vidhanAya vADhyaH |
unmattachittAya cha kalyachittaH spR^ihAM sa kuryAdviShayAtmakAya || 11.53
bhikShopabhogI vara nAnukampyaH kR^itI jarAmR^ityubhayaM titIrShuH |
ihottamaM shAntisukhaM cha yasya paratra duHkhAni cha saMvR^itAni || 11.54
lakShmyAM mahatyAmapi vartamAnastR^iShNAbhibhUtastvanukampitavyaH |
prApnoti yaH shAntisukhaM na cheha paratra duHkhaM pratigR^ihyate cha || 11.55
evaM tu vaktuM bhavato.anurUpaM sattvasya vR^ittasya kulasya chaiva |
mamApi voDhuM sadR^ishaM pratij~nAM sattvasya vR^ittasya kulasya chaiva || 11.56
ahaM hi saMsArarasena viddho viniHsR^itaH shAntamavAptukAmaH |
nechcheyamAptuM tridive.api rAjyaM nirAmayaM kiM vata mAnuSheShu || 11.57
trivargasevAM nR^ipa yattu kR^itsnataH paro manuShyArtha iti tvamAttha mAm |
anartha ityAttha mamArthadarshanaM kShayI trivargo hi na chApi tarpakaH || 11.58
pade tu yasminna jarA na bhIrutA na janma naivoparamo na vAdhayaH |
tameva manye puruShArthamuttamaM na vidyate yatra punaH punaH kriyA || 11.59
yadapyavochaH paripAlyatAM jarA navaM vayo gachChati vikriyAmiti |
anishchayo.ayaM chapalaM hi dR^ishyate jarApyadhIrA dhR^itimachCha yauvanam || 11.60
svakarmadakShashcha yadA tu ko jagadvayaHsu sarveShu cha saMvikarShati |
vinAshakAle kathamavyavasthite jarA pratIkShyA viduShA shamepsunA || 11.61
jarAyudho vyAdhivikIrNasAyako yadAntako vyAdha ivAshritaH sthitaH |
prajAmR^igAn bhAgyavanAshritAMstudan vayaHprakarShaM prati ko manorathaH || 11.62
suto yuvA vA sthaviro.athavA shishustathA tvarAvAniha kartumarhati |
yathA bhaveddharmavataH kR^ipAtmanaH pravR^ittiriShTA vinivR^ittireva vA || 11.63
yadAttha vA dIptaphalAM kulochitAM kuruShva dharmAya makhakriyAmiti |
namo makhebhyo na hi kAmaye sukhaM parasya duHkhakriyayApadishyate || 11.64
paraM hi hantuM vivashaM phalepsayA na yuktarUpaM karuNAtmanaH sataH |
kratoH phalaM yadyapi shAshvataM bhavet tathApi kR^itvA kimupakShayAtmakam || 11.65
bhavechcha dharmo yadi nAparo vidhirvratena shIlena manaHshamena vA |
tathApi naivArhati sevituM kratuM vishasya yasmin paramuchyate phalam || 11.66
ihApi tAvatpuruShasya tiShThataH pravartate yatparahiMsayA sukham |
tadapyaniShTaM saghR^iNasya dhImato bhavAntare kiM vata yanna dR^ishyate || 11.67
na cha pratAryo.asmi phalapravR^ittaye bhaveShu rAjan ramate na me manaH |
latA ivAmbhodharavR^iShTitADitAH pravR^ittayaH sarvagatA hi cha~nchalA || 11.68
ihAgatashchAhamito didR^ikShayA munerarADasya vimokShavAdinaH |
prayAmi chAdyaiva nR^ipAstu te shivaM vachaH kShamethAH shamatattvaniShThuram || 11.69
athendravaddivyava shashvadarkavadguNairava shreya ihAva gAmava |
avAyurAryairava satsutAn ava shriyashcha rAjannava dharmamAtmanaH || 11.70
himAriketUdbhavasamplavAntare yathA dvijo yAti vimokShayaMstanum |
himArishatruM kShayashatrughAtinastathAntare yAhi vimochayanmanaH || 11.71
nR^ipo.abravItsA~njalirAgataspR^iho yatheShTamApnoti bhavAnavighnataH |
avApya kAle kR^itakR^ityatAmimAM mamApi kAryo bhavatA tvanugrahaH || 11.72
sthiraM pratij~nAya tatheti pArthive tataH sa vaishvantaramAshramaM yayau |
parivrajantaM samudIkShya vismito nR^ipo.api cha prApurimaM giriM vrajan || 11.73
iti shrIbuddhacharite mahAkAvye.ashvaghoShakR^ite kAmavigarhaNo nAmaikAdashaH sargaH || 11 ||
\medskip\hrule\medskip
##Book XII [##arADadarshano##]##
tataH shamavihArasya munerikShvAkuchandramAH |
arADasyAshramaM bheje vapuShA pUrayanniva || 12.1
sa kAlAmasagotreNa tenAlokyaiva dUrataH |
uchchaiH svAgatamityuktaH samIpamupajagmivAn || 12.2
tAvubhau nyAyataH pR^iShTvA dhAtusAmyaM parasparam |
dAravyormedhyayorvR^iShyoH shuchau deshe niShIdatuH || 12.3
tamAsInaM nR^ipasutaM so.abravInmunisattamaH |
bahumAnavishAlAbhyAM darshanAbhyAM pibanniva || 12.4
viditaM me yathA saumya niShkrAnto bhavanAdasi |
ChittvA snehamayaM pAshaM pAshaM dR^ipta iva dvipaH || 12.5
sarvathA dhR^itimachchaiva prAj~naM chaiva manastava |
yastvaM prAptaH shriyaM tyaktvA latAM viShaphalAmiva || 12.6
nAshcharyaM jIrNavayaso yajjagmuH pArthivA vanam |
apatyebhyaH shriyaM dattvA bhuktochchiShTAmiva srajam || 12.7
idaM me matamAshcharyaM nave vayasi yadbhavAn |
abhuktveva shriyaM prAptaH sthito viShayagochare || 12.8
tadvij~nAtumimaM dharmaM paramaM bhAjanaM bhavAn |
j~nAnapUrvamadhiShThAya shIghraM duHkhArNavaM tara || 12.9
shiShye yadyapi vij~nAte shAstraM kAlena vartate |
gAmbhIryAdvyavasAyAchcha suparIkShyo bhavAn mama || 12.10
iti vAkyamarADasya vij~nAya sa narAdhipaH |
babhUva paramaprItaH provAchottarameva cha || 12.11
viraktasyApi yadidaM saumukhyaM bhavataH param |
akR^itArtho.apyanenAsmi kR^itArtha iva samprati || 12.12
didR^ikShuriva hi jyotiryiyAsuriva daishikam |
tvaddarshanAdahaM manye titIrShuriva cha plavam || 12.13
tasmAdarhasi tadvaktuM vaktavyaM yadi manyase |
jarAmaraNarogebhyo yathAyaM parimuchyate || 12.14
ityarADaH kumArasya mAhAtmyAdeva choditaH |
sa~NkShiptaM kathayAM chakre svasya shAstrasya nishchayam || 12.15
shrUyatAmayamasmAkaM siddhAntaH shR^iNvatAM vara |
yathA bhavati saMsAro yathA vai parivartate || 12.16
prakR^itishcha vikArashcha janma mR^ityurjaraiva cha |
tattAvatsattvamityuktaM sthirasattva parehi naH || 12.17
tatra tu prakR^itirnAma viddhi prakR^itikovida |
pa~ncha bhUtAnyaha~NkAraM buddhimavyaktameva cha || 12.18
vikAra iti buddhiM tu viShayAnindriyANi cha |
pANipAdaM cha vAdaM cha pAyUpasthaM tathA manaH || 12.19
asya kShetrasya vij~nAnAt kShetraj~na iti sa~nj~ni cha |
kShetraj~na iti chAtmAnaM kathayantyAtmachintakAH || 12.20
sashiShyaH kapilashcheha pratibuddha iti smR^itiH |
saputraH pratibuddhashcha prajApatirihocyate || 12.21
jAyate jIryate chaiva budhyate mriyate cha yat |
tadvyaktamiti vij~neyamavyaktaM tu viparyayAt || 12.22
aj~nAnaM karma tR^iShNA cha j~neyAH saMsArahetavaH |
sthito.asmiMstritaye yastu tatsattvaM nAbhivartate || 12.23
vipratyayAdaha~NkArAtsandehAdabhisamplavAt |
avisheShAnupAyAbhyAM sa~NgAdabhyavapAtataH || 12.24
tatra vipratyayo nAma viparItaM pravartate |
anyathA kurute kAryaM mantavyaM manyate.anyathA || 12.25
bravImyahamahaM vedmi gachchAmyahamahaM sthitaH |
itIhaivamaha~NkArastvanaha~NkAra vartate || 12.26
yastu bhAvena sandigdhAnekIbhAvena pashyati |
mR^itpiNDavadasandeha sandehaH sa ihochyate || 12.27
ya evAhaM sa evedaM mano buddhishcha karma cha |
yashchaivaM sa gaNaH so.ahamiti yaH so.abhisamplavaH || 12.28
avisheShaM visheShaj~na pratibuddhAprabuddhayoH |
prakR^itInAM cha yo veda so.avisheSha iti smR^itaH || 12.29
namaskAravaShaTkArau prokShaNAbhyukShaNAdayaH |
anupAya iti prAj~nairupAyaj~na praveditaH || 12.30
sajjate yena durmedhA manovAkkarmabuddhibhiH |
viShayeShvanabhiShva~Nga so.abhiShva~Nga iti smR^itaH || 12.31
mamedamahamasyeti yadduHkhamabhimanyate |
vij~neyo.abhyavapAtaH sa saMsAre yena pAtyate || 12.32
ityavidyA hi vidvAMsaH pa~nchaparvA samIhate |
tamo mohaM mahAmohaM tAmisradvayameva cha || 12.33
tatrAlasyaM tamo viddhi mohaM mR^ityuM cha janma cha |
mahAmohastvasammoha kAma ityavagamyatAm || 12.34
yasmAdatra cha bhUtAni pramuhyanti mahAntyapi |
tasmAdeSha mahAbAho mahAmoha iti smR^itaH || 12.35
tAmisramiti chAkrodha krodhamevAdhikurvate |
viShAdaM chAndhatAmisramaviShAda prachakShate || 12.36
anayAvidyayA bAlaH saMyuktaH pa~nchaparvayA |
saMsAre duHkhabhUyiShThe janmasvabhiniShichyate || 12.37
draShTA shrotA cha mantA cha kAryaM karaNameva cha |
ahamityevamAgamya saMsAre parivartate || 12.38
ityebhirhetubhirdhIman tamaHsrotaH pravartate |
hetvabhAve phalAbhAva iti vij~nAtumarhasi || 12.39
tatra samyagmatirvidyAnmokShakAma chatuShTayam |
pratibuddhAprabuddhau cha vyaktamavyaktameva cha || 12.40
yathAvadetadvij~nAya kShetraj~no hi chatuShTayam |
ArjavaM javatAM hitvA prApnoti padamakSharam || 12.41
ityarthaM brAhmaNA loke paramabrahmavAdinaH |
brahmacharyaM charantIha brAhmaNAn vAsayanti cha || 12.42
iti vAkyamidaM shrutvA munestasya nR^ipAtmajaH |
abhyupAyaM cha paprachCha padameva cha naiShThikam || 12.43
brahmacharyamidaM charyaM yathA yAvachCha yatra cha |
dharmasyAsya cha paryantaM bhavAn vyAkhyAtumarhati || 12.44
ityarADo yathAshAstraM vispaShTArthaM samAsataH |
tamevAnyena kalpena dharmamasmai vyabhAShata || 12.45
ayamAdau gR^ihAnmuktvA bhaikShAkaM li~NgamAshritaH |
samudAchAravistIrNaM shIlamAdAya vartate || 12.46
santoShaM paramAsthAya yena tena yatastataH |
viviktaM sevate vAsaM nirdvandvaH shAstravitkR^itI || 12.47
tato rAgAdbhayaM dR^iShTvA vairAgyAchcha paraM shivam |
nigR^ihNannindriyagrAmaM yatate manasaH shrame || 12.48
atho viviktaM kAmebhyo vyApAdAdibhya eva cha |
vivekajamavApnoti pUrvadhyAnaM vitarkavat || 12.49
tachcha dhyAnaM sukhaM prApya tattadeva vitarkayan |
apUrvasukhalAbhena hriyate bAlisho janaH || 12.50
shamenaivaMvidhenAyaM kAmadveShavigarhiNA |
brahmalokamavApnoti paritoSheNa va~nchitaH || 12.51
j~nAtvA vidvAn vitarkAMstu manaHsa~NkShobhakArakAn |
tadviyuktamavApnoti dhyAnaM prItisukhAnvitam || 12.52
hriyamANastayA prItyA yo visheShaM na pashyati |
sthAnaM bhAsvaramApnoti deveShvAbhAsureShvapi || 12.53
yastu prItisukhAttasmAdvivechayati mAnasam |
tR^itIyaM labhate dhyAnaM sukhaM prItivivarjitam || 12.54
tatra kechidvyavasyanti mokSha ityapi mAninaH |
sukhaduHkhaparityAgAdavyApArAchcha chetasaH || 12.55 (57)
yastu tasminsukhe magno na visheShAya yatnavAn |
shubhakR^itsnaiH sa sAmAnyaM sukhaM prApnoti daivataiH || 12.56 (55)
tAdR^ishaM sukhamAsAdya yo na rajyannupekShate |
chaturthaM dhyAnamApnoti sukhaduHkhavivarjitam || 12.57 (56)
asya dhyAnasya tu phalaM samaM devairvR^ihatphalaiH |
kathayanti bR^ihatkAlaM vR^ihatpraj~nAparIkShakAH || 12.58
samAdhervyutthitastasmAddR^iShTvA doShAMshCharIriNAm |
j~nAnamArohati prAj~naH sharIravinivR^ittaye || 12.59
tatastaddhyAnamutsR^ijya visheShe kR^itanishchayaH |
kAmebhya iva satprAj~no rUpAdapi virajyate || 12.60
sharIre khAni yAnyasya tAnyAdau parikalpayan |
ghaneShvapi tato dravyeShvAkAshamadhimuchyate || 12.61
AkAshasamamAtmAnaM sa~NkShipya tvaparo budhaH |
tadaivAnantataH pashyan visheShamadhigachchati || 12.62
adhyAtmakushaleShvanyo nivartyAtmAnamAtmanA |
ki~nchinnAstIti sampashyannAki~nchanya iti smR^itaH || 12.63
tato mu~njAdiShIkeva shakuniH pa~njarAdiva |
kShetraj~no niHsR^ito dehAnmukta ityabhidhIyate || 12.64
etattatparamaM brahma nirli~NgaM dhruvamakSharam |
yanmokSha iti tattvaj~nAH kathayanti manIShiNaH || 12.65
ityupAyashcha mokShashcha mayA sandarshitastava |
yadi j~nAtaM yadi ruchir yathAvatpratipadyatAm || 12.66
jaigIShavyo.atha janako vR^iddhashchaiva parAsharaH |
imaM panthAnamAsAdya muktA hyanye cha mokShiNaH || 12.67
iti tasya sa tadvAkyaM gR^ihItvA na vichArya cha |
pUrvahetubalaprAptaH pratyuttaramuvAcha saH || 12.68
shrutaM j~nAnamidaM sUkShmaM parataH parataH shivam |
kShetreShvasyAparityAgAdavaimyetadanaiShThikam || 12.69
vikAraprakR^itibhyo hi kShetraj~naM muktamapyaham |
manye prasavadharmANaM vIjadharmANameva cha || 12.70
vishuddho yadyapi hyAtmA nirmukta iti kalpyate | (ab = 12.71ab)
bhUyaH pratyayasadbhAvAdamuktaH sa bhaviShyati || 12.71
R^itubhUmyambuvirahAdyathA bIjaM na rohati |
rohati pratyayaistaistaistadvatso.api mato mama || 12.72
yatkarmAj~nAnatR^iShNAnAM tyAgAnmokShashcha kalpyate |
atyantastatparityAgaH satyAtmani na vidyate || 12.71 (chd = 12.73cd)
hitvA hitvA trayamidaM visheShastUpalabhyate |
Atmanastu sthitiryatra tatra sUkShmamidaM trayam || 12. 72 (12.74)
sUkShmatvAchchaiva doShANAmavyApArAchCha chetasaH |
dIrghatvAdAyuShashchaiva mokShastu parikalpyate || 12.73 (12.75)
aha~NkAraparityAgo yashchaiSha parikalpyate |
satyAtmani parityAgo nAha~NkArasya vidyate || 12.74 (12.76)
sa~NkhyAdibhiramuktashcha nirguNo na bhavatyayam |
tasmAdasati nairguNye nAsya mokSho.abhidhIyate || 12.75 (12.77)
guNino hi guNAnAM cha vyatireko na vidyate |
rUpoShNAbhyAM virahito na hyagnirupalabhyate || 12.76 (12.78)
prAgdehAnna bhaveddehI prAgguNebhyastathA guNI |
kasmAdAdau vimuktaH sa~nsharIrI badhyate punaH || 12.77 (12.79)
kShetraj~no visharIrashcha j~no vA syAdaj~na eva vA |
yadi j~no j~neyamasyAsti j~neye sati na muchyate || 12.78 (12.80)
athAj~na iti siddho vaH kalpitena kimAtmanA |
vinApi hyAtmanAj~nAnaM prasiddhaM kAShThakuDyavat || 12.79 (12.81)
parataH paratastyAgo yasmAttu guNavAn smR^itaH |
tasmAtsarvaparityAgAnmanye kR^itsnAM kR^itArthatAm || 12.80 (12.82)
iti dharmamarADasya viditvA na tutoSha saH |
akR^itsnamiti vij~nAya tataH pratijagAma ha || 12.81 (12.83)
visheShamatha shushrUShurudrakasyAshramaM yayau |
AtmagrAhAchcha tasyApi jagR^ihe na sa darshanam || 12.82 (12.84)
sa~nj~nAsa~nj~nitvayordoShaM j~nAtvA hi munirudrakaH |
Aki~nchinyAtparaM lebhe sa~nj~nAsa~nj~nAtmikAM gatim || 12.83 (12.85)
yasmAchchAlambane sUkShme sa~nj~nAsa~nj~ne tataH param |
nAsa~nj~nI naiva sa~nj~nIti tasmAttatra gataspR^ihaH || 12.84 (12.86)
yatashcha buddhistatraiva sthitAnyatrAprachAriNI |
sUkShmApAdi tatastatra nAsa~nj~nitvaM na sa~nj~nitA || 12.85 (12.87)
yasmAchcha tamapi prApya punarAvartate jagat |
bodhisattvaH paraM prepsustasmAdudrakamatyajat || 12.86 (12.88)
tato hitvAshramaM tasya shreyo.arthI kR^itanishchayaH |
bheje gayasya rAjarShernagarIsa~nj~namAshramam || 12.87 (12.89)
atha naira~njanAtIre shuchau shuchiparAkramaH |
chakAra vAsamekAntavihArAbhivratI muniH || 12.88 (12. 90)
<xxx> tatpUrvaM pa~nchendriyavashoddhatAn |
tapaH <xx> vratino bhikShUn pa~ncha niraikShata || (12.91)
pa~nchopatasthurdR^iShTvAtra bhikShavastaM mumukShavaH |
puNyArjitadhanArogyamindriyArthA iveshvaram || 12.89 (12.92)
sampUjyamAnastaiH prahvairvinayAnatamUrtibhiH |
tadvaMshasthAyibhiH shiShyairlolairmana ivendriyaiH || 12.90 (12.93)
mR^ityujanmAntakaraNe syAdupAyo.ayamityatha |
duShkarANi samArebhe tapAMsyanashanena saH || 12.91 (12.94)
upavAsavidhIn nekAn kurvan naradurAcharAn |
varShANi ShaTkarmaprepsurakarotkArshyamAtmanaH || 12.92 (12.95)
annakAleShu chaikaikaiH sakolatilataNDulaiH |
apArapArasaMsArapAraM prepsurapArayat || 12.93 (12.96)
dehAdapachayastena tapasA tasya yaH kR^itaH |
sa evopachayo bhUyastejasAsya kR^ito.abhavat || 12.94 (12.97)
kR^isho.apyakR^ishakIrtishrIrhlAdaM chakre.anyachakShuSham |
kumudAnAmiva sharachchuklapakShAdichandramAH || 12.95 (12.98)
tvagasthisheSho niHsheShairmedaHpishitashoNitaiH |
kShINo.apyakShINagAmbhIryaH samudra iva sa vyabhAt || 12.96 (12.99)
atha kaShTatapaHspaShTavyarthakliShTatanurmuniH |
bhavabhIrurimAM chakre buddhiM buddhatvakA~NkShayA || 12.97 (12.100)
nAyaM dharmo virAgAya na bodhAya na muktaye |
jambumUle mayA prApto yastadA sa vidhirdhruvaH || 12.98 (12.101)
na chAsau durbalenAptuM shakyamityAgatAdaraH |
sharIrabalavR^iddhyarthamidaM bhUyo.anvachintayat || 12.99 (12.102)
kShutpipAsAshramaklAntaH shramAdasvasthamAnasaH |
prApnuyAnmanasAvApyaM phalaM kathamanirvR^itaH || 12.100 (12.103)
nirvR^itiH prApyate samyaksatatendriyatarpaNAt |
santarpitendriyatayA manaHsvAsthyamavApyate || 12.101 (12.104)
svasthaprasannamanasaH samAdhirupapadyate |
samAdhiyuktachittasya dhyAnayogaH pravartate || 12.102 (12.105)
dhyAnapravartanAddharmAH prApyante yairavApyate |
durlabhaM shAntamajaraM paraM tadamR^itaM padam || 12.103 (12.106)
tasmAdAhAramUlo.ayamupAya itinishchayaH |
asUrikaraNe dhIraH kR^itvAmitamatirmatim || 12.104 (12.107)
snAto naira~njanAtIrAduttatAra shanaiH kR^ishaH |
bhaktyAvanatashAkhAgrairdattahastastaTadrumaiH || 12.105 (12.108)
atha gopAdhipasutA daivatairabhichoditA |
udbhUtahR^idayAnandA tatra nandabalAgamat || 12.106 (12.109)
sitasha~NkhojjvalabhujA nIlakambalavAsinI |
sapheNamAlAnIlAmburyamuneva saridvarA || 12.107 (12.110)
sA shraddhAvardhitaprItirvikasallochanotpalA |
shirasA praNipatyainaM grAhayAmAsa pAyasam || 12.108 (12.111)
kR^itvA tadupabhogena prAptajanmaphalAM sa tAm |
bodhiprAptau samartho.abhUtsantarpitaShaDindriyaH || 12.109 (12.112)
paryAptApyAnamUrtashcha sArdhaM suyashasA muniH |
kAntidhairyaikabhAraikaH shashA~NkArNavavalbabhau || 12.110 (12.113)
AvR^itta iti vij~nAya taM jahuH pa~nchabhikShavaH |
manIShiNamivAtmAnaM nirmuktaM pa~nchadhAtavaH || 12.111 (12.114)
vyavasAyadvitIyo.atha shAdvalAstIrNabhUtalam |
so.ashvatthamUlaM prayayau bodhAya kR^itanishchayaH || 12.112 (12.115)
tatastadAnIM gajarAjavikramaH padasvanenAnupamena bodhitaH |
mahAmunerAgatabodhinishchayo jagAda kAlo bhujagottamaH stutim || 12.113 (12.116)
yathA mune tvachcharaNAvapIDitA muhurmuhurniShTanatIva medinI |
yathA cha te rAjati sUryavatprabhA dhruvaM tvamiShTaM phalamadya bhokShyase || 12.114 (12.117)
yathA bhramantyo divi vAyapa~NktayaH pradakShiNaM tvAM kamalAkSha kurvate |
yathA cha saumyA divi vAnti vAyavastvamadya buddho niyataM bhaviShyasi || 12.115 (12.118)
tato bhuja~NgapravareNa saMstutastR^iNAnyupAdAya shuchIni lAvakAt |
kR^itapratij~no niShasAda bodhaye mahAtarormUlamupAshritaH shucheH || 12.116 (12.119)
tataH sa parya~NkamakampyamuttamaM babandha suptoragabhogapiNDitam |
bhinadmi tAvadbhuvi naitadAsanaM na yAmi tAvatkR^itakR^ityatAmiti || 12.117 (12.120)
tato yayurmudamatulAM divaukaso vavAsire na mR^igaganA na pakShiNaH |
na sasvanurvanataravo.anilAhatAH kR^itAsane bhagavati nishchalAtmani || 12.118 (12.121)
iti shrIbuddhacharite mahAkAvye.ashvaghoShakR^ite.arADadarshano nAma dvAdashaH sargaH || 12 ||
\medskip\hrule\medskip
##Book XIII [##mAravijayo##]##
tasminshcha bodhAya kR^itapratij~ne rAjarShivaMshaprabhave mahArShau |
tatropaviShTe prajaharSha lokastatrAsa saddharmaripustu mAraH || 13.1
yaM kAmadevaM pravadanti loke chitrAyudhaM puShpasharaM tathaiva |
kAmaprachArAdhipatiM tameva mokShadviShaM mAramudAharanti || 13.2
tasyAtmajA vibhramaharShadarpAstisro ratiprItitR^iShashcha kanyAH |
paprachchurenaM manaso vikAraM sa tAMshcha tAshchaiva vacho babhAShe || 13.3
asau munirnishchayavarma bibhrat sattvAyudhaM buddhisharaM vikR^iShya |
jigIShurAste viShayAnmadIyAn tasmAdayaM me manaso viShAdaH || 13.4
yadi hyasau mAmabhibhUya yAti lokAya chAkhyAtyapavargamArgam |
shUnyastato.ayaM viShayo mamAdya vR^ittAchcyutasyeva videhabhartuH || 13.5
tadyAvadevaiSha na labdhachakShurmadgochare tiShThati yAvadeva |
yAsyAmi tAvadvratamasya bhettuM setuM nadIvega ivAbhivR^iddhaH || 13.6
tato dhanuH puShpamayaM gR^ihItvA sharAMstathA mohakarAMshcha pa~ncha |
so.ashvatthamUlaM sasuto.abhyagachchadasvAsthyakArI manasaH prajAnAm || 13.7
atha prashAntaM munimAsanasthaM pAraM titIrShuM bhavasAgarasya |
viShajya savyaM karamAyudhAgre krIDa~nshareNedamuvAcha mAraH || 13.8
uttiShTha bhoH kShatriya mR^ityubhIta varasva dharmaM tyaja mokShadharmam |
vANaishcha [yaj~naishcha] vinIya lokAn lokAn parAn prApnuhi vAsavasya || 13.9
panthA hi niryAtumayaM yashasyo yo vAhitaH pUrvatamairnarendraiH |
jAtasya rAjarShikule vishAle bhaikShAkamashlAghyamidaM prapattum || 13.10
athAdya nottiShThasi nishchitAtmA bhava sthiro mA vimuchaH pratij~nAm |
mayodyato hyeSha sharaH sa eva yaH sUryake mInaripau vimuktaH || 13.11
pR^iShTaH sa chAnena katha~nchidaiDaH somasya naptApyabhavadvichittaH |
sa chAbhavachChAntanurasvatantraH kShINe yuge kiM vata durbalo.anyaH || 13.12
tatkShipramuttiShTha labhasva sa~nj~nAM vANo hyayaM tiShThati lelihAnaH |
priyAbhidheyeShu ratipriyeShu yaM chakravAkeShvapi notsR^ijAmi || 13.13
ityevamukto.api yadA nirAstho naivAsanaM shAkyamunirbibheda |
sharaM tato.asmai visasarja mAraH kanyAshcha kR^itvA purataH sutAMshcha || 13.14
tasmiMstu vANe.api sa vipramukte chakAra nAsthAM na dhR^iteshchachAla |
dR^iShTvA tathainaM viShasAda mArashchintAparItashcha shanairjagAda || 13.15
shailendraputrIM prati yena viddho devo.api shambhushchalito babhUva |
na chintayatyeSha tameva vANaM kiM syAdachitto na sharaH sa eShaH || 13.16
tasmAdayaM nArhati puShpavANaM na harShaNaM nApi raterniyogam |
arhatyayaM bhUtagaNairasheShaiH santrAsanAtarjanatADanAni || 13.17
sasmAra mArashcha tataH svasainyaM vidhvaMsanaM shAkyamuneshchikIrShan |
nAnAshrayAshchAnucharAH parIyuH sharadrumaprAsagadAsihastAH || 13.18
varAhamInAshvakharoShTravaktrA vyAghrarkShasiMhadviradAnanAshcha |
ekekShaNA naikamukhAstrishIrShA lambodarAshchaiva pR^iShodarAshcha || 13.19
ajAsu saktA ghaTajAnavashcha daMShTrAyudhAshchaiva nakhAyudhAshcha |
kabandhahastA bahumUrtayashcha bhagnArdhavaktrAshcha mahAmukhAshcha || 13.20
tAmrAruNA lohitavinduchitrAH khaTvA~NgahastA haridhUmrakeshAH |
lambasrajo vAraNalaMbakarNAshcharmAMbarAshchaiva niraMbarAshcha || 13.21
shvetArdhavaktrA haritArdhakAyAstAmrAshcha dhUmrA harayo.asitAshcha |
vyADottarAsa~NgabhujAstathaiva praghuShTaghaNTAkulamekhalAshcha || 13.22
tAlapramANAshcha gR^ihItashUlA daMShTrAkarAlAshcha shishupramANAH |
urabhravaktrAshcha viha~NgamAshcha mArjAravaktrAshcha manuShyakAyAH || 13.23
prakIrNakeshAH shikhino.ardhamuNDA rajjvambarA vyAkulaveShTanAshcha |
prahR^iShTavaktrA bhR^ikuTImukhAshcha tejoharAshchaiva manoharAshcha || 13.24
kechidvrajanto bhR^ishamAvavalguranyo.anyamApupluvire tathAnye |
chikrIDurAkAshagatAshcha kechitkechichCha cherustarumastakeShu || 13.25
nanarta kashchidbhramayaMstrishUlaM kashchiddha pusphUrja gadAM vikarShan |
harSheNa kashchidvR^iShavannanarta kashchitprajajvAla tanUruhebhyaH || 13.26
evaMvidhA bhUtagaNAH samantAttadbodhimUlaM parivArya tasthuH |
jighR^ikShavashchaiva jighAMsavashcha bharturniyogaM paripAlayantaH || 13.27
taM prekShya mArasya cha pUrvarAtre shAkyarShabhasyaiva cha yuddhakAlam |
na dyaushchakAshe pR^ithivI chakampe prajajvalushchaiva dishaH sashabdAH || 13.28
viShvagvavau vAyurudIrNavegastArA na rejurna babhau shashA~NkaH |
tamashcha bhUyo vitatAra rAtreH sarve cha sa~nchukShubhire samudrAH || 13.29
mahIbhR^ito dharmaparAshcha nAgA mahAmunervighnamamR^iShyamANAH |
mAraM prati krodhavivR^ittanetrA niHshashvasushchaiva jajR^imbhire cha || 13.30
shuddhAdhivAsA vibudharShayastu saddharmasiddhyarthamiva pravR^ittAH |
mAre.anukampAM manasA prachakrurvirAgabhAvAttu na roShamIyuH || 13.31
tadbodhimUlaM samavekShya kIrNaM hiMsAtmanA mArabalena tena |
dharmAtmabhirlokavimokShakAmairbabhUva hAhAkR^itamantarIkSham || 13.32
upaplutaM dharmavidastu tasya dR^iShTvA sthitaM mArabalaM mahArShiH |
na chukShubhe nApi yayau vikAraM madhye gavAM siMha ivopaviShTaH || 13.33
mArastato bhUtachamUmudIrNAmAj~nApayAmAsa bhayAya tasya |
svaiH svaiH prabhAvairatha sAsya senA taddhairyabhedAya matiM chakAra || 13.34
kechichChalannaikavilambijihvAstIkShNogradaMShTrA harimaNDalAkShAH |
vidAritAsyAH sthirasha~NkukarNAH santrAsayantaH kila nAma tasthuH || 13.35
tebhyaH sthitebhyaH sa tathAvidhebhyaH rUpeNa bhAvena cha dAruNebhyaH |
na vivyathe nodvivije mahArShiH krIDan subAlebhya ivoddhatebhyaH || 13.36
kashchittato raudravivR^ittadR^iShTistasmai gadAmudyamayA~nchakAra |
tastambha bAhuH sagadastato.asya purandarasyeva purA savajraH || 13.37
kechitsamudyamya shilAstarUMshcha viShehire naiva munau vimoktum |
petuH savR^ikShAH sashilAstathaiva vajrAvabhagnA iva vindhyapAdAH || 13.38
kaishchitsamutpatya nabho vimuktAH shilAshcha vR^ikShAshcha parashvadhAshcha |
tasthurnabhasyeva na chAvapetuH sandhyAbhrapAdA iva naikavarNAH || 13.39
chikShepa tasyopari dIptamanyaH kaDa~NgaraM parvatashR^i~NgamAtram |
yanmuktamAtraM gaganasthameva tasyAnubhAvAchchatadhA babhUva || 13.40
kashchijjvalannarka ivoditaH khAda~NgAravarShaM mahadutsasarja |
chUrnAni chAmIkarakandarANAM kalpAtyaye meruriva pradIptaH || 13.41
tadbodhimUle pravikIryamANama~NgAravarShaM tu savisphuli~Ngam |
maitrIvihArAdR^iShisattamasya babhUva raktotpalapatravarShaH || 13.42
sharIrachittavyasanAtapaistairevaMvidhaistaishcha nipAtyamAnaiH |
naivAsanAchchAkyamunishchachAla svaM nishchayaM bandhumivopaguhya || 13.43
athApare nirjagalurmukhebhyaH sarpAnvijIrNebhya iva drumebhyaH |
te mantrabaddhA iva tatsamIpe na shashvasurnotsasR^ijurna cheluH || 13.44
bhUtvApare vAridharA vR^ihantaH savidyutaH sAshanichaNDaghoShAH |
tasmin drume tatyajurashmavarShaM tatpuShpavarShaM ruchiraM babhUva || 13.45
chApe.atha vANo nihito.apareNa jajvAla tatraiva na niShpapAta |
anIshvarasyAtmani dhUryamANo durmarShaNasyeva narasya manyuH || 13.46
pa~ncheShavo.anyena tu vipramuktAstasthurnayatyeva munau na petuH |
saMsArabhIrorviShayapravR^ittau pa~nchendriyANIva parIkShakasya || 13.47
jighAMsayAnyaH prasasAra ruShTo gadAM gR^ihItvAbhimukho mahArSheH |
so.aprAptakAlo vivashaH papAta doSheShvivAnarthakareShu lokaH || 13.48
strI meghakAlI tu kapAlahastA kartuM mahArSheH kila mohachittam |
babhrAma tatrAniyataM na tasthau chalAtmano buddhirivAgameShu || 13.49
kashchitpradIptaM praNidhAya chakShurnetrAgninAshIviShavaddidhakShuH |
tatraiva nAsIttamR^iShiM dadarsha kAmAtmakaH shreya ivopadiShTam || 13.50
gurvIM shilAmudyamayaMstathAnyaH shashrAma moghaM vihataprayatnaH |
niHshreyasaM j~nAnasamAdhigamyaM kAyaklamairdharmamivAptukAmaH || 13.51
tarakShusiMhAkR^itayastathAnye praNeduruchchairmahataH praNAdAn |
sattvAni yaiH sa~nchukuchuH samantAdvajrAhatA dyauH phalatIti matvA || 13.52
mR^igA gajAshchArttaravAn sR^ijanto vidudruvushchaiva nililyire cha |
rAtrau cha tasyAmahanIva digbhyaH khagA ruvantaH paripeturArttAH || 13.53
teShAM praNAdaistu tathAvidhaistaiH sarveShu bhUteShvapi kampiteShu |
munirna tatrAsa na sa~nchukocha ravairgarutmAniva vAyasAnAm || 13.54
bhayAvahebhyaH pariShadgaNebhyo yathA yathA naiva munirbibhAya |
tathA tathA dharmabhR^itAM sapatnaH shokAchcha roShAchCha sasAra mAraH || 13.55
bhUtaM tataH ki~nchidadR^ishyarUpaM vishiShTarUpaM gaganasthameva |
dR^iShTvArShaye drugdhamavairaruShTaM mAraM babhAShe mahatA svareNa || 13.56
moghaM shramaM nArhasi mAra kartuM hiMsrAtmatAmutsR^ija gachcha sharma |
naiSha tvayA kampayituM hi shakyo mahAgirirmerurivAnilena || 13.57
apyuShNabhAvaM jvalanaH prajahyAdApo dravatvaM pR^ithivI sthiratvam |
anekakalpAchitapuNyakarmA na tveva jahyAdvyavasAyameShaH || 13.58
yo nishchayo hyasya parAkramashcha tejashcha yadyA cha dayA prajAsu |
aprApya notthAsyati tattvameSha tamAMsyahatveva sahasrarashmiH || 13.59
kAShThaM hi mathnan labhate hutAshaM bhUmiM khanan vindati chApi toyam |
nirbandhinaH ki~ncha na nAsya sAdhyaM nyAyena yuktaM cha kR^itaM cha sarvam || 13.60
tallokamArttaM karuNAyamAno rogeShu rAgAdiShu vartamAnam |
mahAbhiShagnArhati vighnameSha j~nAnauShadhArthaM parikhidyamAnaH || 13.61
hR^ite cha loke bahubhiH kumArgaiH sanmArgamanvichChati yaH shrameNa |
sa daishikaH kShobhayituM na yuktaM sudeshikaH sArtha iva pranaShTe || 13.62
sattveShu naShTeShu mahAndhakArairj~nAnapradIpaH kriyamANa eShaH |
Aryasya nirvApayituM na sAdhu prajvAlyamAnastamasIva dIpaH || 13.63
dR^iShTvA cha saMsAramaye mahaughe magnaM jagatpAramavindamAnam |
yashchedamuttArayituM pravR^ittaH kashchinnayettasya tu pApamAryaH || 13.64
kShamAshipho dhairyavigADhamUlashchAritrapuShpaH smR^itibuddhishAkhaH |
j~nAnadrumo dharmaphalapradAtA notpATanaM hyarhati vardhamAnaH || 13.65
baddhAM dR^iDhaishchetasi mohapAshairyasya prajAM mokShayituM manIShA |
tasmin jighAMsA tava nopapannA shrAnte jagadbandhanamokShahetoH || 13.66
bodhAya karmANi hi yAnyanena kR^itAni teShAM niyato.adya kAlaH |
sthAne tathAsminnupaviShTa eSha yathaiva pUrve munayastathaiva || 13.67
eShA hi nAbhirvasudhAtalasya kR^itsnena yuktA parameNa dhAmnA |
bhUmerato.anyo.asti hi na pradesho veshaM samAdherviShayo hitasya || 13.68
tanmA kR^ithAH shokamupehi shAntiM mA bhUnmahimnA tava mAra mAnaH |
vishrambhituM na kShamamadhruvA shrIshchale pade kiM padamabhyupaiShi || 13.69
tataH sa saMshrutya cha tasya tadvacho mahAmuneH prekShya cha niShprakampatAm |
jagAma mAro vimanA hatodyamaH sharairjagachchetasi yairvihanyase || 13.70
gatapraharShA viphalIkR^itashramA praviddhapAShANakaDa~NgaradrumA |
dishaH pradudrAva tato.asya sA chamUrhatAshrayeva dviShatA dviShachChamUH || 13.71
dravati saparapakShe nirjite puShpaketau
jayati jitatamaske nIrajaske mahArShau |
yuvatiriva sahAsA dyaushchakAshe sachandrA
surabhi cha jalagarbhaM puShpavarShaM  papAta || 13.72
tathApi pApIyasi nirjite gate dishaH praseduH prababhau nishAkaraH |
divo nipeturbhuvi puShpavR^iShTayo rarAja yoSheva vikalmaShA nishA || 13.73##*##
iti shrIbuddhacharite mahAkAvye.ashvaghoShakR^ite mAravijayo nAma trayodashaH sargaH || 13 ||
##Book XIV##
tato mArabalaM jitvA dhairyeNa cha shamena cha |
paramArthaM vijij~nAsuH sa dadhyau dhyAnakovidaH || 14.1
sarveShu dhyAnavidhiShu prApya chaishvaryamuttamam |
sasmAra prathame yAme pUrvajanmaparamparAm || 14.2
amutrAhamayaM nAma chyutastasmAdihAgataH |
iti janmasahasrANi sasmArAnubhavanniva || 14.3
smR^itvA janma cha mR^ityuM cha tAsu tAsUpapattiShu |
tataH sattveShu kAruNyaM chakAra karuNAtmakaH || 14.4
kR^itveha svajanotsargaM punaranyatra cha kriyAH |
atrANaH khalu loko.ayaM paribhramati chakravat || 14.5
ityevaM smaratastasya babhUva niyatAtmanaH |
kadalIgarbhaniHsAraH saMsAra iti nishchayaH || 14.6
dvitIye tvAgate yAme so.advitIyaparAkramaH |
divyaM chakShuH paraM lebhe sarvachakShuShmatAM varaH || 14.7
tatastena sa divyena parishuddhena chakShuShA |
dadarsha nikhilaM lokamAdarsha iva nirmale || 14.8
sattvAnAM pashyatastasya nikR^iShTotkR^iShTakarmaNAm |
prachyutiM chopapattiM cha vavR^idhe karuNAtmatA || 14.9
ime duShkR^itakarmANaH prANino yAnti durgatim |
ime.anye shubhakarmANaH pratiShThante tripiShTape || 14.10
upapannAH pratibhaye narake bhR^ishadAruNe |
amI duHkhairbahuvidhaiH pIDyante kR^ipaNaM vata || 14.11
pAyyante kvathitaM kechidagnivarNamayorasam |
Aropyante ruvanto.anye niShTaptastambhamAyasam || 14.12
pachyante piShTavatkechidayaskumbhIShvavA~NmukhAH |
dahyante karuNaM kechiddIpteShva~NgArarAshiShu || 14.13
kechittIkShNairayodaMShTrairbhakShyante dAruNaiH shvabhiH |
kechiddhR^iShTairayastuNDairvAyasairAyasairiva || 14.14
kechiddAhaparishrAntAH shItachChAyAbhikA~NkShiNaH |
asipatraM vanaM nIlaM baddhA iva vishantyamI || 14.15
pATyante dAruvat kechitkuThArairbahubAhavaH |
duHkhe.api na vipadyante karmabhirdhAritAsavaH || 14.16
sukhaM syAditi yatkarma kR^itaM duHkhanivR^ittaye |
phalaM tasyedamavashairduHkhamevopabhujyate || 14.17
sukhArthamashubhaM kR^itvA ya ete bhR^ishaduHkhitAH |
AsvAdaH sa kimeteShAM karoti sukhamaNvapi || 14.18
hasadbhiryatkR^itaM karma kaluShaM kaluShAtmabhiH |
etatpariNate kAle kroshadbhiranubhUyate || 14.19
yadyeva pApakarmANaH pashyeyuH karmaNAM phalam |
vameyuruShNarudhiraM marmasvabhihatA iva || 14.20
shArIrebhyo.api duHkhebhyo nArakebhyo manasvinaH |
anAryaiH saha saMvAso mama kR^ichchratamo mataH || 14.21##*##
ime.anye karmabhishchitraishchittavispandasambhavaiH |
tiryagyonau vichitrAyAmupapannAstapasvinaH || 14.22 (14.21)
mAMsatvagbAladantArthaM vairAdapi madAdapi |
hanyante kR^ipaNA yatra bandhUnAM pashyatAmapi || 14.23 (14.22)
ashaknuvanto.apyavashAH kShuttarShashramapIDitAH |
go.ashvabhUtAshcha vAhyante pratodakShatamUrtayaH || 14.24 (14.23)
vAhyante gajabhUtAshcha balIyAMso.api durbalaiH |
a~NkushakliShTamUrdhAnastADitAH pAdapArShNibhiH || 14.25 (14.24)
satsvapyanyeShu duHkheShu duHkhaM yatra visheShataH |
parasparavirodhAchcha parAdhInatayaiva cha || 14.26 (14.25)
khasthAH khasthairhi bAdhyante jalasthA jalachAribhiH |
sthalasthAH sthalasaMsthaistu prApyante chetaretaraiH || 14.27 (14.26)
upapannAstathA cheme mAtsaryAkrAntachetasaH |
pitR^iloke nirAloke kR^ipaNaM bhu~njate phalam || 14.28 (14.27)
sUchIchidropamamukhAH parvatopamakukShayaH |
kShuttarShajanitairduHkhaiH pIDyante duHkhabhAginaH || 14.29 (14.28)
puruSho yadi jAnIta mAtsaryasyedR^ishaM phalam |
sarvathA shivivaddadyAchcharIrAvayavAnapi || 14.30 (14.30)
AshayA samabhikrAntA ghAryamANAH svakarmabhiH |
labhante na hyamI bhoktuM pravR^iddhAnyashuchInyapi || 14.31 (14.29)
ime.anye narakaM prApya garbhasa~nj~ne.ashuchihrade |
upapannA manuShyeShu duHkhamarChanti jantavaH || 14.32 (14.31)
##
Anandajoti Bhikkhu
http://www.ancient-buddhist-texts.net/Texts-and-Translations/Buddhacarita/index.htm

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}