% Text title : Lingabhangamukti Shatakam % File name : lingabhangamuktishatakam.itx % Category : deities\_misc, gurudev, shataka % Location : doc\_deities\_misc % Author : Upanishadbrahmendra % Proofread by : Musiri Janakiraman % Description-comments : From stotrArNavaH 06-44 % Latest update : August 7, 2021 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shri Lingabhangamukti Shatakam ..}## \itxtitle{.. shrIli~Ngabha~Ngamuktishatakam ..}##\endtitles ## yaH pUjyaH sakalAmarairmunigaNA dhyAyanti yaM yena vai shreyomArganiyojitAH suyatayaH kurvanti yasmai namaH | yasmAt sarvamabhUt pramAtR^ipaTalaM yasyAMshakatraipade yasminnAshamupaiti mAyikapadaM taM rAmachandraM bhaje || 1|| shrImattraipadarAmachandraparamAnandAmbudhiM chidghanaM natvA shrIguruvAsudevayatirATpAdAmbuje chAsakR^it | machchittAsuvirUpanAshavibhavAM muktiM pravA~nChanhare\- stuShTyai li~Ngavibha~NgamuktishatakaM kurve hR^idi syAddhariH || 2|| satkarmANi vishuddhaye svamanasaH kR^itvAtha shuddhe.antare ChitvA karmajabandhanaM dR^iDhataraM vairAgyatIkShNAsinA | sannyasya shravaNAdinA svamanaso nAshAdyamApurhariM dadyAt kArakakarmabha~NgavibhavAM muktiM sa rAmo.adya me || 3|| vAkChotrAdidashendriyAsumanaso vAgAdirUpaM bhajaM\- stattadvyApR^itishaktatAM prajanayanniHsa~NgarUpeNa yaH | Aste.adyApi samastabhUtahR^idaye vedyAdavedyAt paro dadyAt sarvavibhAsakatvavibhavAM muktiM sa rAmo.adya me || 4|| deshAdbhUmirupaiti bhUmapadavIM bhUmerjalaM tajjalA\- dvahnirvahnitanoH sadAgatirasau tasmAdbR^ihadvyoma khAt | bIjaM bIjatanornira~NkushavibhurnirbIjabhUmaiva yo dadyAt kevalabhUmarUpavibhavAM muktiM sa rAmo.adya me || 5|| arthAdarthamupaiti sUkShmapadavImarthAtmano mAnasAt buddhirbuddhitanormahattata ihAvyaktaM tataH pUruShaH | sUkShmAt sUkShmataraH pumAnparamako yasmAnna sUkShmAntaraM dadyAt pUruShashiShTatattvavibhavAM muktiM sa rAmo.adya me || 6|| sUryo yatra ja bhAti shItakiraNo vahnirna bhAnAM gaNaH sattvAditriguNaM dashendriyamanaHprANAH surANAM gaNaH | yaM bhAntaM hyanubhAnti na svata ime sUryAgnichandrAdayo dadyAt sUryashashA~NkabhAsakapadAM muktiM sa rAmo.adya me || 7|| pUrannAdisamastakoshakalitAstyekAdashadvArapai\- rvAgAdyaishashcha surakShitAtibhayataH svasvAmibhAgechChayA | tatrAsa~NgatayA vasannanudinaM yaH pratyagAtmA bhave\- dadyAt kevalabodharUpavibhavAM muktiM sa rAmo.adya me || 8|| yajj~nAnakShuradhArayA hR^idayachidgranthirdR^iDhA bhidyate yatsAkShAtkaraNena saMshayagaNaH kutreti na j~nAyate | yajj~nAnAgniranantajanmaphaladaM karmendhanaM nirdahe dR^idyAt kartR^ichidaikyamohavikalAM muktiM sa rAmo.adya me || 9|| ekIkR^itya virATtanAviha punarvishvaM svasUtreNa taM sUtre svaptapatiM cha bIjatanunA prAj~naM punarbIjakam | nirbIjAtmatayA vichintya yatayo yaM turyarUpaM vidu\- rdadyAtturyashivAdvayAtmavibhavAM muktiM sa rAmo.adya me || 10|| annaM prANatayAvashiShya munayaH prANaM manomAtrato vij~nAnAtmatayAvashiShya cha mano j~nAnaM cha modAtmanA | taM chApyAtmatayAvashiShya sahasA yaM brahma puchChaM vidu\- rdadyAt koshavirUpanAshavibhavAM muktiM sa rAmo.adya me || 11|| satyaM vaikR^itishUnyamekamamalaM j~nAnaM jagadbhAsakaM kAlAkAshavideshato.apyativibhu brahma hyanantaM viduH | satyaM j~nAnamanantamasmyayamiti dhyAtvA yamIshaM viduH dadyAt satyasubodhasaukhyavibhavAM muktiM sa rAmo.adya me || 19|| sUryo bhAti sadAgatishcha pavate vahnirjvalatya~njasA mR^ityurvajradharo.api shItakiraNo rAj~no bhiyA bhR^ityavat | udyaddaNDadharasya yasya bhayataH sUryAdayo vepitA dadyAt sarvaniyAmakAdvayapadAM muktiM sa rAmo.adya me || 13|| niHsAmAnyavisheShabodhanayane svasminnakhaNDAdvaye duHsAmAnyavisheShadR^iShTiyugalaM durbuddhibhIkalpitam | pratyAkhyAya vimUDhakalpitadR^ishaM sannyAsino yaM vidu\- rdadyAdadvayadR^iShTisAdhyavibhavAM muktiM sa rAmo.adya me || 14|| rUpaM pashyati yena vakti vachanaM jighret sugandhAdikaM gR^ihNAtyAshu dadAti vastunichayaM jAnAtyasheShaM sadA | yaM praj~nAnamudAharanti munayo brahmAdikITAntagaM dadyAjj~nAnaghanasvarUpavibhavAM muktiM sa rAmo.adya me || 15|| vishvaM yena samutthitaM chirataraM yatsattayA bhAti sat samyagbodhadR^ishA vikAravilaye yanmAtrataH shiShyate | taramAdvastuvikArajAtamanaghA brahmeti jAnanti yaM dadyAt sarvavikArabha~NgavibhavAM muktiM sa rAmo.adya me || 16|| vishvaM brahmaNi jAtu janma na bhaje sambhUtyabhAvashrute\- rnotpAdasya vinAshanaM na ghaTate nAshaprahANashruteH | kAryAkAryajaniprahANarahitaM yaM nirvikAraM vidu\- rdadyAt kAraNakAryakartravikalAM muktiM sa rAmo.adya me || 17|| prAgAgneyavidikShu dikShu nikhilasyAntarbahiH sarvataH tiShThannUrva udeti naityudayatAM nAsta~NgataH kutrachit | yaH koTyarkasamUhabhAsakaruchishchitsUryarUpo hari\- rdadyAnnityachidarkarUpavibhavAM muktiM sa rAmo.adya me || 18|| sarvaj~nAdiguNAnvitaH parashivaH ki~nchijj~na evAparo j~nAj~natve pravihAya jIvaparayorlakShyaikatAM vedataH | j~nAtvA tattvamasIti yAti yatirAD\-brahmAhamasmIti yaM dadyAjjIvaparaikyasaukhyavibhavAM muktiM sa rAmo.adya me || 19|| nAnyat pashyati yatra jAtu yatirANNAnyachChR^iNotya~njasA no jAnAti visheShavastupaTalaM bhUmAdvayatvashruteH | j~nAtvA nAmahR^idAlayoparilasadbhUmAtmakaM yaM vidu\- rdadyAdbhUmaghanAdvitIyavibhavAM muktiM sa rAmo.adya me || 20|| dahre brahmapurAbhidhAnagagane labdhAsano lochanaM kANaM prApya cha hR^ichcha jIvakalanAM jAgranmukhAM bhAsayan | mUrdhAnaM pratipadya yo vijayate turyasvarUpo hari\- rdadyAtturyaparAtmasaukhyavibhavAM muktiM sa rAmo.adya me || 21|| pratyaktatvamahampadena gaditaM brahmeti shabdAt paraM bhedo mAyika eva jIvaparayormAyAmR^iShAtvashruteH | pratyagbrahma bhavAmyahaM parashivo.asmItIha yaM prApnuyu\- rdadyAt pratyagabhinnabhUrivibhavAM muktiM sa rAmo.adya me || 22|| mUrtAmUrtavibhAtadR^ishyapaTale mAyAmanaHkalpite netIti shrutiyuktitaH pravilayaM yAte.atha yaH shiShyate | mUrtAmUrtavibhAgamoharahitaH satyasya satyo.advayo dadyAnnirbhayasatyabodhavibhavAM muktiM sa rAmo.adya me || 23|| vairAgyAt pratipadya bAlapadavIM sarvatra niHsa~Ngato maunAmaunavivechanAhadhiShaNApANDityapAra~NgatAH | jIvanmuktimavApya tAM punaramI vismR^itya yaM prApnuyu\- rdadyAnmaunavimukta shuddhapadavIM muktiM sa rAmo.adya me || 25|| kShetrApatyakalatravittavibhavaM tyaktvA davIyo bhR^ishaM shrotavyAdiguNAnvito.ayamajaDAnandAvabodhAmbudhiH | dhyAtavyo.anishamapramAdadhiShaNairyo niShkalAtmA hari\- rdadyAnniShkalaviShNurUpavibhavAM muktiM sa rAmo.adya me || 25|| yasyAnandalavaikadeshavibhavA vyAviddhapApAlayAH niShkAmA~nchitabuddhayaH shrutishiro.abhij~nA mahAshrotriyAH | samrAjo yatayo bhavanti munayo brahmAdayo nandino dadyAdbhUrisukhasvarUpavibhavAM muktiM sa rAmo.adya me || 26|| otaprotatayA charasthirajagad\-vR^inde.anishaM vyApya tat sattAsUktisukhaikarUpatanutA mithyAbhidhAM vArayan | j~nAnAM brahmatayA vibhAti ya ihAj~nAnAM jagadbhAvato dadyAdvishvavimohabha~NgavibhavAM muktiM sa rAmo.adya me || 27|| yaH sAkShAdaparokShataH shrutigirovAkyArthasaMlagnadhI\- (shrutigishiro) rvidvadvR^indahR^idabjasundaragR^ihAla~NkAradIpAyate | yashchaityAligachittavR^ittitamaso madhyAhnasUryAyate dadyAt kevalabodhadIpavibhavAM muktiM sa rAmo.adya me || 28|| siddhAdhyAsanayu~NniruddhapavanAt prANadvayAgnyaikyata\- staptvA kuNDalinIM tayA vidhidhirAgranthitrayaM bhedayan | ShaTchakrANi cha chandrasUryamithunAdyaM brahmarandhre vishe\- ddadyAdyogajamukhyasiddhivibhavAM muktiM sa rAmo.adya me || 29|| bhrUmadhyAdiShu dR^iShTiyugmavilayAt prANAnile nishchale sa~NkalpAdyativR^ittijuShTamanasi stheyaM gate.asyAsataH | saMshAntAnilachittadR^iShTivibhavaM pashyanti yaM tArakA dadyAttArakapUrNasiddhivibhavAM muktiM sa rAmo.adya me || 30|| mervabhrAdivadaprakampyadhiShaNaH santADito durjanai\- strAsaM naiti namaskR^ito.api vibudhairharShaM parAlokanAt | yasmin bhUmni nirastamohapaTale vidvAn samApto bhave\- ddadyAdbrahmavimagnachittapadavIM muktiM sa rAmo.adya me || 31|| dehAdAvabhimAlatUlapaTale bodhAgnibhasmIkR^ite (mAnatulapaTale) chitte chaityagatiM vihAya chapalAM chittattvabhAvaM gate | vaktuM dhyAnamashakyaniShkalapadaM yaM yoginaH prApnuyu\- rdadyAdvaktumashakyasaukhyapadavIM muktiM sa rAmo.adya me || 32|| sa.nnyasya svaguruM praNamya vidhivattAraM mahAvAkyakaM labdhvA shAntimupetya dikShu sulabhAM bhikShAmaTanto.amalAH | antarbAhyavibhAgashUnyamatayaH sa.nnyAsino yaM vidu\- | rdadyAnmaskarivaryalabdhapadavIM muktiM sa rAmo.adya me || 33|| jAgratsvapnasuShuptibhedakalanAM tyaktvA budhaiH sevitAM tadbhAvAdi vibhAsayannanudinaM pratyaksvarUpeNa yaH | Aste tadgatadoShasa~Ngarahitasturyo.avikArAspado dadyAtturyamahAprakAshavibhavAM muktiM sa rAmo.adya me || 34|| shrutyAchAryakaTAkShataH svahR^idaye bodhaM tarAM prApite pratyagvastuni nishchite sphuTamahaM brahmAsmi sarvAtigam | brahmaivAhamiti sthirAnubhavato yadrUpatAM prApnuyu\- rdadyAchChuddhaparAnubhUtivibhavAM muktiM sa rAmo.adya me || 35|| nAnAvAsanayA jaDIkR^itamateH sattvena durvAsanAM dagdhvA sattvasuvAsanAmapi punarbrahmaprabodhAgninA | saMshAntAkhilavAsane svahR^idaye nirvAsanaM yaM vidu\- rdadyAdbodhamahAgnidIptivibhavAM muktiM sa rAmo.adya me || 36|| maunenaiva vijitya vAgbhavaripuM svalpAshanAt kAyajaM chittotthAmitavR^ittidurjayaripuM brahmAnusandhAnataH | vairAgyeNa vijitya bodhaduritaM bodhena yaM prApnuyu\- rdadyAddurjayabha~NgarUpavibhavAM muktiM sa rAmo.adya me || 37|| dehAdau dR^iDhabhAvanAmahamiti tyaktvA parAggAminIM pratyagbhAvanayA prashAntaduritabrahmAtmagAM bhAvanAm | AlambyAchalavIchisaukhyajaladhau yasminnimagnA budhA dadyAt saukhyapayodhimugdhavibhavAM muktiM sa rAmo.adya me || 38|| samyaktADitakAMsyanAdatulite tAre samuchchArite vINAveNumR^ida~NgamaddalamahAmerIdhvaniH shrUyate | tanmadhye praNavadhvanau svamanaso nAshAdyamIshaM vidu\- rdadyAnnAdamanovinAshavibhavAM muktiM sa rAmo.adya me || 39|| pUrvaM rUpamapAsya rUpamaparaM chitte gate svechChayA tadrapadvayamadhyame.asya manaso vR^itterabhAvAttadA | sUkShmAt sUkShmadhiyo viduryamajaDAnandaM na tanniShkalaM dadyAnmAnasavR^ittishUnyavibhavAM muktiM sa rAmo.adya me || 40|| rAgadveShajapApapuNyapaTale nirmUlabhAvaM gate svAj~nAne pralayaM gate dR^iDhatarabrahmAtmabodhAttarAm | satyaj~nAnasukhasvarUpavibhavo yaH shiShyate shrIhari\- rdadyAchChrIharibodhasaukhyavibhavAM muktiM sa rAmo.adya me || 41|| j~nAnaM prApya gurormukhAdanudinaM sa~NkalpamunmIlayan lAbhAlAbhaviShAdaharSharahitaprArabdhavegAttanuH | tiShThedgachChatu veti dikShu vicharan yasmin samAptau bhave\- ddadyAchChAshvatabodhalabdhavibhavAM muktiM sa rAmo.adya me || 42|| dhIsa~NkalpitavastvasanmatiyutairakShairgR^ihItaM tu sat sattvAsattvavibhedavedanadR^ishaM j~nAtvA bahishchAntare | tAM dR^iShTiM pravilApya bhUmni munayo yaM prApnuyuH saddhanaM dadyAt saddhanadR^iShTiyogavibhavAM muktiM sa rAmo.adya me || 43|| svAdyasvAdakamadhyadarshanavashAt svAdyAdibhAvAtigaM buddhvaiva svadanaM vikArarahitaM vAgbud.hdhyagamyaM shivam | svAdyasvAdakabhedadR^iShTivikalA yaM prApnuyushchidghanaM dadyAshchidghanashuddhasattvavibhavAM muktiM sa rAmo.adya me || 44|| tAlorUrdhvabile niveshya rasanAM dhIvAyunordhvaM nayan bhrUmadhye cha sahasrapatrakamale sUryendusaMyogataH | pItvaivAmR^itametya tR^iptimavashAdyasminnachitto bhave\- ddadyAllambikayAttabodhavibhavAM muktiM sa rAmo.adya me || 45|| vedAntashravaNAdipakvadhiShaNAH svAntarbahirbhAvanAM nishsheShaM pravihAya janmamR^itidAM nisnehadIpArchivat | chittArUpalayaM prapadya yatayo yasmin samAptiM gatA dadyAt kevalachittabha~NgavibhavAM muktiM sa rAmo.adya me || 46|| vij~nAnAtmatayA hR^idabjakuhare tiShThan sadA dehinAM bhUyastvannachayAdisatkaraNato duShkR^ityato nIchatAm | sarveshatvamavApya mAyikapade yo vartate.adyApyajo dadyAdIshvarasAmyabodhavibhavAM muktiM sa rAmo.adya me || 47|| sthUleshastamasAnvitaH pR^ithutanuH sUtre rajassaMyuto bIjeshastu vishuddhasattvaguNayuk sarvopasaMhArataH | pUrvoktatriguNAnvito.apyaripumAn yo nirguNaH syAddhari\- rdadyAnnirguNaturyaviShNuvibhavAM muktiM sa rAmo.adya me || 48|| nirmAyo.api vishuddhasAttvikatanuM svIkR^itya lIlAmayIM sachChiShyAn pratibodhayan shrutishirovij~nAnamavyAjataH | shrImaddeshikarUpametya vicharedyo niShkalAtmA hari\- rdadyAdeshikalabdhabodhavibhavAM muktiM sa rAmo.adya me || 49|| yadvadvyomaghaTAdivastupaTale tattatparichChedatAM prAptaM bhAtyavivekinAM sthirachare tadvat pumAnekalaH | jIvo.ayaM jagadIshvaro jagadidaM brahmeti yo j~nAninAM dadyAt sarvavikalpama~NgavibhavAM muktiM sa rAmo.adya me || 50|| sA~NgopA~NgatayA vibhAtanigamA nyAyAdishAstrANi ShaDh vedArthAnucharAH purANanichayA yenArthavanto.abhavan | te kiM brahma nidarshayeyuriti sadbodhAdyamIshaM vidu\- rdadyAdvAkyapadArthadUravibhavAM muktiM sa rAmo.adya me || 51|| jAyAsUnudhaneShaNAvirahitA vedAntapAra~NgatA svAntarbAhyajachittachaityakalanAshUnyA mahAshrotriyAH | yadviShNoH paramaM padaM pravitataM pashyantyamI sUrayo dadyAdviShNupadAbhidhAnavibhavAM muktiM sa rAmo.adya me || 52|| sarvaj~naM parameshvaraM praNavagaM pratyakparAtmAbhidhaM bhedAbhedavibhAgashUnyavibhavaM j~nAtvA gurorvedataH | bhedAbhedagatiM vihAya yatayo yaM prApnuyuH shrIhariM\- dadyAt sarvabhidAbhidAdirahitAM muktiM sa rAmo.adya me || 53|| AkAshAdikapa~nchabhUtakalanAsa~njAtanAnAvidhA\- nekapANihR^idabjamadhyavilasatsarvendriyoddIpakaH | chitsAmAnyakalevaro.akhilagururnArAyaNo yo bhave\- ddadyAt sarvahR^idabjasUryavibhavAM muktiM sa rAmo.adya me || 54|| chittAsvAdivirUpanAshasamaye samyakprabuddhAtmano deshe vyomni cha kAlakUTapaTale dagdhe prabodhAgninA | deshAbhrAdigamAnashUnyavibhavo yaH shiShyate shrIhari\- rdadyAt prANavirUpanAshavibhavAM muktiM sa rAmo.adya me || 55|| bIjaM brahmaNi kalpitaM bhujagavadrajau tadaj~nAnato bIjAdvishvamananyabodhata idaM vishvaM bhajedbIjatAm | bIjaM pratyagabhinnatAM yamamalaM nirbIjasaukhya vidu\- rdadyAdAvR^itibIjabharjanabhavAM muktiM sa rAmo.adya me || 56|| pUrNabrahmavikalpitatvanigamAnmAyApadasyAdhunA mithyAtvaM sphuTameva rajjuphaNivat satyaM tadAdhArakam | naShTe.abodhachaye prabodharaviNA yatpUrNatA shiShyate dadyAt pUrNachidamburAshivibhavAM muktiM sa rAmo.adya me || 57|| nAnArUpavisheShamoharahitaM nirmAyatattvaM tataM satyaM j~nAnamapArasaukhyavibhavaM saMshAntanAnAbhidham | brahmAsmIti yadAnubhUya samatAM yaM sAmyabhAvaM vidu\- rdadyAt sAmyasukhAnubhUtivibhavAM muktiM sa rAmo.adya me || 58|| saurAH shreShThamudAharanti taraNiM shAktA bhavAnIM bhR^ishaM viShNuM kechana vaiShNavA gaNapatiM shaivAH shivaM bhairavam | itthambhUtadhiyo yamadvayatanuM jAnanti naivaikadhA dadyAt sarvamadAndhakArataraNiM muktiM se rAmo.adya me || 59|| pANiM pANitalena pIDya tarasA dantaiH svadantAn ruShA chUrNIkR^itya nihatya mAnasaripuM bhrUmadhyalakShyAsinA | svArAjyaM pratipadya nirbhayatayA yadrUpamAtro bhave\- ddadyAttIvravirAgabodhavibhavAM muktiM sa rAmo.adya me || 60|| hR^inmadhye ravipatramasti kamalaM tanmadhyakhe.astyekalo dhUmajyotisamAnakAntikalitaH pUrjo bahishchAntarA | (pUrNo) chitte chaityatatau nira~njanatayA yo bhAsayan vartate dadyAdekalabhUrisaukhyavibhavAM muktiM sa rAmo.adya me || 61|| AdhAre.astyapunarbhavAbhidhasirA tasyA manodhAraNAt sA vaktraM vikasIkarotyatha sirAvaktrAntare mAnasam | dR^ikprANAgnibhiretya gachChati layaM yasmin harau yogino dadyAnmAnasadR^iShTichittalayajAM muktiM sa rAmo.adya me || 62|| bhittvA kalpasamAdhibhAk svamanasA bhUmiM jalaM chAnalaM vAyuM vyoma susUkShmabhUtapaTalaM cheto mahachchAkSharam | avyaktaM cha vibhidya mR^ityumadhunA yasmin samApto bhave\- ddadyAt sarvalayAmR^itAdvayapadAM muktiM sa rAmo.adya me || 63|| shrotrAdau pravilApya chaityapaTalaM shrotrAdi dikpUrvake digvAtAdi sirAsu tAshcha ta.n ? j~nAnamadhye cha tat ? | ##(unclear in the manuscript## mode taM cha turIyake tadamR^itaM nirbIjakaM yaM vidu\- rdadyAdakShavirUpanAshavibhavAM muktiM sa rAmo.adya me || 64|| brahmAdisthiraja~NgamAntakalanAtR^iShNAM manojR^imbhitAM AtmAnAtmavivekajAtasahajaj~nAnAgninA nirdahan | yasmin pratyagabhinnapUrvavibhave yogI bhajedekatAM dadyAjj~nAnakR^ishAnudagdhakalanAM muktiM sa rAmo.adya me || 65|| shabdAdau vilayaM gate dR^iDhataraj~nAnAdahorAtrayuk\- kAle kAlapadaM gate svamanasi dhyAnAt sthiratvaM gate | unmanyA vilasatparAvaraguruM nArAyaNaM yaM vidu\- rdadyAdunmanibhAtachidghanapadAM muktiM sa rAmo.adya me || 66|| dhyAnAditripuTiprahANata idaM nirvAtadIpArchivat saMshAntAkhilavIchivArdhijalavat sa~NkalpashUnyaM manaH | bhUyAttatra virAjate parashivAnandAtmako yo hari\- rdadyAchChaivaparAtmarUpavibhavAM muktiM sa rAmo.adya me || 67|| dR^igyugmAkhilachittavR^ityachalagA santR^iptiralpAshanaM dehasyAchalanaM parAnubhavato.avasthAtrayAtItatA | yasminnastamano muneranubhavastvevaM bhavet sarvadA dadyAt siddhivibhAtakIrtivibhavAM muktiM sa rAmo.adya me || 68|| vismR^ityAkhilabAhyamAntaramapi svodbhUtavij~nAnato brahmAbdhau jalabinduvat pravilayaM nItvA manovaibhavam | vedavyAsatanUdbhavaH shukamaniryasmin samApto bhave\- ddadyAchChIshukalabdhasaukhyavibhavAM muktiM sa rAmo.adya me || 69|| AtmAnAtmavivechane shrutigurorvAkyAtkR^ite sAdaraM satyaM brahAbhidA mR^iSheti vidite grAhyAdyabhAvAnmuneH | yasminnagraharUpabhUmnyavilayaM gatvA samAptaM mano dadyAdagrahabhUrilabdhavibhavAM muktiM sa rAmo.adya me || 70|| jAgratvapnasuShuptimohatamasi svAntaM munerlIyate turyAkalpasamAdhiniShThamanasaH sattvAllayaM naiti tat | turyotItapade virUpavilayAdyasmin samAptaM bhave\- ddadyAtturyavilakShaNAdvayapadAM muktiM sa rAmo.adya me || 71|| chetashchaityavikArapUgarahitA chidbrahmalInA yadA kishchinaityanubhUtisiddhavibhavo muktAvagamyastadA | sattAsAmyamupetya yo vijayate nArAyaNaH kevalo dadyAt kevalabhUmatattvavibhavAM muktiM sa rAmo.adya me || 72|| sa~NkalpAdivimuktayogimanasi prANAgnidR^ikchetasA magne.atyantamajAtigotrakalane sve dhAmni bodhArNave | satyAnandavishuddhabodhavibhavo yaH shiShyate shrIhari\- rdadyAjjAtikulAbhimAnavibhavAM muktiM sa rAmo.adya me || 73|| kartavyArthanibandhanaM svamanasaH karmAkhyayogAmR^ita\- shreyaHsAdhanasAdhyabandhanamiha j~nAnAkhyayogo varaH | saMshAntAkhilayogasAdhyavibhavaM yaM j~nAninaH prApnuyu\- rdadyAt sAdhanasAdhyabhAvarahitAM muktiM sa rAmo.adya me || 74|| dehAsvoH kShaNabha~NguratvanigamAddArAdibAhye.antare chitte chaityatatAvasa~NgamanasA santyajya durvAsanAm | brahmAsmIti suvAsanAparavasho yaM praiti nArAyaNaM dadyAdaikyasuvAsanAphalabhavAM muktiM sa rAmo.adya me || 75|| bhAvAbhAvagatiM vihAya sadasadbhAvaM cha dhIkalpitaM sarvAbhAsavivarjitaM sthiracharAdhAraM parastAddhi yaH | AlambyAchalanirvikalpamanasA yasmin samApto bhave\- ddadyAd buddhivikalpashUnyavibhavAM muktiM sa rAmo.adya me || 76|| saMshAntAkhilaheyarandhaviShayadhvAntaM sakR^idbhAnataH sa~NkalpojjhitachittabhAvitapadaM sUryAdisUryAtmakam | brahmAhaM prakR^iteH paro.ahamiti yaM svAtmAnamevaM vidu\- rdadyAt prAkR^itavaikR^itapralayajAM muktiM sa rAmo.adya me || 77|| karmaj~nAnadashendriyAlyaviditaH prANAdipa~nchAnila\- dhvAntasphArasahasrachaNDakiraNo.aha~NkArashatru~njayaH | nAnAvR^ittimanodhiyaH paratarAnandAtmako yo hari\- rdadyAli~NgasharIrabha~NgavibhavAM muktiM sa rAmo.adya me || 78|| sUkShmAt sUkShmataro.asmi yogividito jyAyAnahaM jyAyasAM saMshAntAkhilavedano.asmi jagataH sattAsvarUpo.asmyaham | evaM bhAvanayA prashAntaduritA yaM prApnuyuH shAshvataM dadyAchChAshvatasaukhyasiddhivibhavAM muktiM sa rAmo.adya me || 79|| matputro mama vittadArasuhR^ido matkShetramityAdikaM dvaitaM dehadashendriyAsudhiShaNAtAdAtmyamevAdvayama | dvaitAdvaitamanogateH pravilayAdyaH shiShyate nirbhayo dadyAnnirbhayanirvikArapadavIM muktiM sa rAmo.adya me || 80|| tyaktAha~NkR^itichittachaityakalanAsaMvitsvarUpo.asmyahaM jIveshAdibhidA vihInaparamAnandAvabodho.asmyaham | matto nAnyadihAsti ki~nchiditi yaM nArAyaNaM prApnuyu\- rdadyAdadvayabhAvanAttapadavIM muktiM sa rAmo.adya me || 81|| sarvAsarvamahAbhramapravilayAt sarvAdishUnyo.asmyahaM sAkShitvaM na hi me.asti sAkShyavilayAdadvaitabodho.asmyaham | svIye dhAmani saMsthito.ahamajaro.asmyevaM viduryaM hariM dadyAt sAkShyavirUpanAshavibhavAM muktiM sa rAmo.adya me || 82|| nAhaM dehamukhendriyAlayamano nAhaM vikalpAnvito nAhaM mAyikavishvabhedanichayo nAhaM tadAdhArakaH | brahmaivAhamitIha yaM munigaNA j~nAtvA chirAtprApnuyu\- rdadyAnmAyikabhAvanAlayabhavAM muktiM sa rAmo.adya me || 83|| dvaitAdvaitavibhAgabhedarahito vAgbud.hdhyagamyo.asmyahaM satyAsatyashubhAshubhAlirahitashchinmAtrarUpo.asmyaham | satyApArasukhAtmako.asmyahamiti prAptA yamIshaM hariM dadyAnmAnasavAgagamyapadavIM muktiM sa rAmo.adya me || 84|| mAyAkalpitabhautikAlihR^idayArUDhAmahambhAvanAM pUrNAha~NkR^itirekadA kabalayan sarveshvaraH sarvagaH | Aste tadgatabhedapUgarahito yo nityashuddho.advayo dadyAdIshvarapUrNabodhavibhavAM muktiM sa rAmo.adya me || 85|| antarbAhyaja chitrachaityakalanAsa~NgAnusandhAnato jIvanmuktimavApya vItakalanAnnaShTe.atha karmatraye | dehAkShAsuvirUpanAshavibhavo yaH shiShyate.asmadguru\- rdadyAt sthUlakalevarAdirahitAM muktiM sa rAmo.adya me || 86|| mAyAkalpitadeshakAlakalanAsa~njAtanAnAvidhA\- nekopAdhidR^iDhAnubhUtimamatAhantAtamobhAskaraH | yo niShkAmamunIndrahR^inmaNigR^ihAla~NkArapAdAmbujo dadyAt kAmagaNakShayAttavibhavAM muktiM sa rAmo.adya me || 87|| sarvopAdhivihInapuShkaratanuH saMshAntarUpAbhidho nAnAkAmanayA vimuktamunihR^itpadmAvalIShaTpadaH | yo vA~NmAnasavR^ittyagocharamahAnandAvabodhAmbudhi\- rdadyAta sarvahR^idabhrachinmaNibhavAM muktiM sa rAmo.adya me || 88|| dAso.ahaM tava mR^ityupAshakalitaM mAM rakSha bhaktArtihan evaM prArthya vishuddhimetya manaso.ahaM tvaM tvamevAsmyaham | bhedo nau na hi mAyiko.ayamiti yaM nArAyaNaM prApnuyu\- rdadyAdbhAgavatAligamyapadavIM muktiM sa rAmo.adya me || 89|| mAyAdhIbhavabhedakUlapaTale nirmAyabodhAgninA (bodhapaTale) dagdhe kAmamakAmakhaDgadalite kAme svabhR^ityaiH samam | saMshAntAkhilabhedakAmakalanaM ye svAtmarUpaM viduH dadyAt kAmabhidAvinAshavibhavAM muktiM sa rAmo.adya me || 90|| mAyApAdajapuShkarAdikamahAbhUtAliyogodbhavA\- nekabrahmakaTAhakoTipaTalaM traiguNyasa~NkalpitaH | nistraiguNyamahAtripAdavibhavo yaH kalpitaH kenachi\- ddadyAnmAyikapAdamohavikalAM muktiM sa rAmo.adya me || 91|| yAsyAmyadya videhamuktipadavIM mu~ncheha mAM chitta bho yadvA chidgagane virUpavilayaM gachCha tvadIyaiH samam | evaM chittashishuM prabodhya yatirADyasmin samApto bhave\- ddadyAt kevalavItachittapadavIM muktiM sa rAmo.adya me || 92|| rAga tvaM bhaja vItarAgapadavIM dveSha tvamadveShatAM bhIte tvaM bhaja nirbhayatvamadhunA dvaita tvamadvaitatAm | rAgAdiM viniyamya niShkalapade yasmin samApto bhave\- ddadyAnniShkalanirbhayAdvayapadAM muktiM sa rAmo.adya me || 93|| kAma tvaM bhaja vItakAmapadavIM tR^iShNe vitR^iShNAsukhaM bho bho mAnasa nirvikalpamadhunAha~NkArashAntiM tarAm | sAntvoktyaiva suhR^ijjanaM pariharan yasmin bhajantyekattAM dadyAtkAmamukhAribha~NgavibhavAM muktiM sa rAmo.adya me || 94|| vishvAkAramatiM vihAya sahajAnandAvabodhAM matiM svIkR^ityeva mahAnubhAvacharaNAH shrIvItahavyAdayaH | satyaj~nAnasukhArNave.ativipule yasmin bhajantyekadAM dadyAnmaunigaNAttasaukhyavibhavAM muktiM sa rAmo.adya me || 95|| brahmAsmItyanubhUtiyogadahane nirvR^ittitailaidhite hutvA mAyikachittachaityakalanAM homAnalotthAM satIm | muktyAkhyAM parirabhya maskarivaro yatsaukhyatalpaM gato dadyAddR^ishyavirUpanAshavibhavAM muktiM sa rAmo.adya me || 96|| saMshAntAkhilapa~nchabhUtakalanAsa~njAtanAnAjani\- shchAturvidhyanirodhashUnyavibhavo janmAdyabhAvashruteH | dIrghahrasvabR^ihatkR^ishAdirahito yaH sarvadA bhAsate dadyAjjanmanirodhashUnyavibhavAM muktiM sa rAmo.adya me || 97|| satyaj~nAnasukhAj~natAsamuditAsatyAdimAyAtraya\- pratyAkhyAnamahAvacho.arthavibhavaH prAptaH punaH prApyate | mukto muchyata eva netara iti j~nAnAdyadaikyaM vraje\- ddadyAjj~nAnasunishchitArthavibhavAM muktiM sa rAmo.adya me || 98|| svAj~nAne sakala~Nkachittavibhave svaj~nAnavaishvAnarA\- ddagdhe samyaganAvR^itaH parashivaH svArAjyasiMhAsane | eko yaH parishiShyate parapumAnnArAyaNo.ayaM svayaM dadyAddvaitavirUpanAshavibhavAM muktiM sa rAmo.adya me || 99|| bhUmabrahmaNi mUDhabud.hdhyanubhavArUDhaM samastaM jaga\- nnetIti shrutisiddhayuktipaTalairnAstIti nishchitya tat | tyaktvA vishvavinodanaM munigaNA yasmin samAptiM gatA dadyAdvishvavinodabha~NgavibhavAM muktiM sa rAmo.adya me || 100|| vyAviddhAkhilavAkyapAdavibhavo vAgbud.hdhyagamyo.advayo niHsAdhyo.ayamasAdhano na hi bhavo nAntaM gataH kutrachit | lakShyAlakShyavibhAgamoharahito yaH shiShyate shrIhari\- rdadyAllakShyavilakShaNAdvayapadAM muktiM sa rAmo.adya me || 101|| AvidyArthapade virUpavilayaM yAte svakAryaiH samaM saMshAntAkhilanAmarUpavibhavaH pratyakparAtmaikyakaH | chAturvidhyapadAbhidhAnarahito yastraipadaH shiShyate dadyAt pAdachatuShTyaikyavibhavAM muktiM sa rAmo.adya ne || 102|| shraddhAbhaktipuraHsaraM rahasi yo viShNvAlaye vA paThe\- nAnAli~Ngavibha~NgamuktishatakaM tAtparyataH sAdaram | tasya traipadarAmachandrataraNiH svAj~nAnamunmUlayan dAsyatyeva videhamuktipadavIM shiShTatripAdrUpiNIm || 103|| shrImatpAramahaMsyadharmaniratashrIvAsudevendrachi\- tpAdAmbhojanivAsiShaTpadanibhashrIrAmachandrendrataH | vaktuM dhyAtumashakyamAyikapadAla~NkArasa~NghAtato li~NgAkAravibha~NgamuktishatakaM j~nAtaM kaTAkShAddhareH || 104|| || iti shrIli~Ngabha~NgamuktishatakaM sampUrNam || upaniShadbrahmendra virachitaM ## Q) What is Viraja Snana and Linga Bhanga? A) Those who have completed their Sadhana, in order to lose their physical attributes, take bath in the Viraja river (made out of the sweat of Sri Hari and is pure energy. It is not made of water.) outside the 7 forts of Vaikunta. Then, they lose their Linga Deha or physical nature. Their ``true nature'' emerges and is called Linga Bhanga. (Reference anandatirtha.wordpress.com) Proofread by Musiri Janakiraman \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}