श्रीरामानुजसुप्रभातम्
श्रीवादिभीकरगुरुभिरनुगृहीतं
॥ श्रीः ॥
॥ श्रीमते रामानुजाय नमः ॥
॥ श्रीवादिभीकरगुरवे नमः ॥
जय जय यतिसार्वभौमामलस्वान्त ! तुभ्यं नमः
जय जय जनिसिन्धुमग्नात्मसन्तारकग्रामणीः ! ।
जय जय भजनीय ! कूरेशमुख्यैः प्रसीद प्रभो !
जय जय विदुषां निधे ! जागृहि श्रीनिधे ! जागृहि ॥ १॥
पूर्णार्यपूर्णकरुणापरिलब्धबोध !
वैराग्यभक्तिमुखदिव्यगुणामृताब्धे ! ।
श्रीयामुनार्यपदपङ्कजराजहंस !
रामानुजार्य ! भगवन् ! तव सुप्रभातम् ॥ २॥
आनेतुमद्य वरदस्य गजाद्रिभर्तुः
पानीयमच्छमतिशीतमगाधकूपात् ।
ध्वान्तं निरस्तमरुणस्य करैस्समन्तात्
रामानुजार्य ! भगवन् ! तव सुप्रभातम् ॥ ३॥
श्रीरङ्गराजपदपङ्कजयोरशेष-
कैङ्कर्यमाकलयितुं सकुतूहलस्त्वम् ।
उत्तिष्ठ नित्यकृतिमप्यखिलां च कर्तुं
रामानुजार्य ! भगवन् ! तव सुप्रभातम् ॥ ४॥
त्वां वीक्षितुं समुपयाति वृषाचलेन्द्रः
त्वत्सम्प्रक्लृप्तवरशङ्खरथाङ्गपाणिः ।
संयोजितामुरसि मां भवतैव बिभ्रत्
रामानुजार्य ! भगवन् ! तव सुप्रभातम् ॥ ५॥
श्रीमत्कुरङ्गपरिपूर्णविभुस्त्वदुक्तं
श्रीभाष्यशास्त्रममलं त्वयि भक्तियुक्तः ।
श्रोतुं समिच्छति यतीन्द्र ! सितोर्ध्वपुण्ड्रः
तं बोधयार्थमखिलं तव सुप्रभातम् ॥ ६॥
श्रीभाष्यमालिखितुमात्तविशाललेख्यः
श्रीवत्सचिह्नगुरुरानतदिव्यगात्रः ।
वेदान्तसूत्रमपि वक्तुममुष्य सर्वं
उत्तिष्ठ लक्ष्मणमुने ! तव सुप्रभातम् ॥ ७॥
श्रीमान् स पूर्णवटुरादरतः प्रगृह्य
श्रीपादुकां यतिपते ! पदयोः प्रयोक्तुम् ।
द्वारि स्थितिं वितनुते प्रणतार्तिहारिन् !
रामानुजार्य ! भगवन् ! तव सुप्रभातम् ॥ ८॥
काषायवस्त्रकटिसूत्रकमण्डलूंश्च
श्रीदन्तकाष्ठमपि देशिकसार्वभौमाः ।
पाणौ निधाय निवसन्ति विशुद्धगात्राः
रामानुजार्य ! भगवन् ! तव सुप्रभातम् ॥ ९॥
त्वां बोधयन्ति गुरवः प्रथिता महान्तः
श्रीवैष्णवाश्च यमिनस्तव पादभक्ताः ।
एकान्तिनश्च विमलास्त्वदनन्यभावाः
तान् पालयाद्य यतिशेखर ! सुप्रभातम् ॥ १०॥
ब्राह्मे प्रबुध्य विबुधाः स्वगुरून् प्रणम्य
रामानुजाय नम इत्यसकृत् ब्रुवाणाः ।
अष्टाक्षरं सचरमं द्वयमुच्चरन्ति
रामानुजार्य ! भगवन् ! तव सुप्रभातम् ॥ ११॥
प्रातः पठन्ति परमद्रविडप्रपन्न
गायत्रिमन्त्रशतमष्टशिरस्कमच्छम् ।
श्रीवैष्णवास्तव पदाब्जनिविष्टभावाः
रामानुजार्य ! भगवन् ! तव सुप्रभातम् ॥ १२॥
आराधनं रचयितुं कमलासखस्य
श्रीयादवाचलपतेः विविधोपचारैः ।
पातुं च दृष्टिकमलेन नतानशेषान्
रामानुजार्य ! भगवन् ! तव सुप्रभातम् ॥ १३॥
ससेव्य ! सप्तशतसंयमिसार्वभौमैः
सद्देशिकैः सकलशास्त्रविदां वरिष्ठैः ।
एकान्तिभिः परमभागवतैर्निषेव्य !
रामानुजार्य ! भगवन् ! तव सुप्रभातम् ॥ १४॥
गद्यत्रयं निगमशेखरदीपसारौ
वेदार्थसङ्ग्रहमपि प्रथितं च नित्यम् ।
गीतार्थभाष्यमपि देशिकपुङ्गवानां
दातुं प्रसीद यतिशेखर ! सुप्रभातम् ॥ १५॥
पादाम्बुजं यतिपते ! शरणं विहर्तुं
सङ्गत्य संसरणवारिविलङ्घनोत्काः ।
आयान्ति हस्तकमलाभिधृतोपचाराः
तान् पाहि करुणया तव सुप्रभातम् ॥ १६॥
स्नातुं कवेरतनयासलिलेषु शिष्यैः
आचार्यपूरुषवरैः यतिभिर्विशुद्धैः ।
श्रीवैष्णवैश्च सह सेव्य ! महानुभावैः
रामानुजार्य ! भगवन् ! तव सुप्रभातम् ॥ १७॥
रामानुजार्य ! रमणीयगुणाभिराम !
रागादिदूरगगुरो ! गुरुसार्वभौम ! ।
सत्त्वप्रधान ! शरणागतवत्सल !
त्वत्पादाब्जयोरिह परत्र च किङ्करः स्याम् ॥ १८॥
इति श्रीवादिभीकरगुरुभिरनुगृहीतं श्रीरामानुजसुप्रभातम् ।
॥ श्रीवादिभीकरगुरवे नमः ॥
Proofread by Aruna Narayanan