Shri Ramakrishna prapattih

श्रीरामकृष्णप्रपत्तिः

आकारशून्यं त्रिगुणैर्विहीनं ओङ्कारवेद्यं परमं पवित्रम् । प्रपञ्चकारं परिपूर्णरूपं श्री रामकृष्णं शरणं प्रपद्ये ॥ १॥ तिलेषु तैलं दधनीव सर्पि- र्व्याप्तं च विश्वे परमं निधानम् । सर्वस्य संस्थं हृदयप्रदेशे श्रीरामकृष्णं शरणं प्रपद्ये ॥ २॥ धर्मस्य वृद्ध्यै सृजनस्य मुक्त्यै- र्दुष्टप्रजायाः परिवर्तनाय । विश्वेऽवतीर्णं समतीतमायं श्रीरामकृष्णं शरणं प्रपद्ये ॥ ३॥ दीप्ताननं तं परिपूर्णबोधं सदा समाधौ परिमग्नचित्तम् । कृपाभिपूर्णं प्रति तप्तलोकं श्रीरामकृष्णं शरणं प्रपद्ये ॥ ४॥ मृदं सुवर्णं प्रतिपद्य तुल्यं नारीषु मातुस्समवाप्य भावम् । तद्बोधयन्तं च हिताय नृणां श्रीरामकृष्णं शरणं प्रपद्ये ॥ ५॥ गङ्गासु सिक्तं मलिनाम्बु शुद्धं रसेन्द्रसक्तेरय एव रुक्मम् । पापिष्ठमेवं विपुनाति यस्तं श्रीरामकृष्णं शरणं प्रपद्ये ॥ ६॥ पाण्डित्यपूर्णाः कठिनैर्वचोभि- र्यद्बोधयन्ते श्रुतिसारभूतम् । येनैव तत्त्वं सुगमायितं तं श्रीरामकृष्णं शरणं प्रपद्ये ॥ ७॥ दुर्ज्ञेयरूपः शिशुवद्विभाति सर्वज्ञमूर्तिस्त्वनधीत शास्त्रः । देवाधिदेवोऽपि नरत्वमाप्तं तं रामकृष्णं शरणं प्रपद्ये ॥ ८॥ इति स्वामिहर्षानन्दविरचिता ``श्रीरामकृष्णप्रपत्तिः'' समाप्ता । Proofread by Aruna Narayanan