Shri Ramakrishna Stutih

श्रीरामकृष्णस्तुतिः

नमः श्रीरामकृष्णाय रामकृष्ण-स्वरूपिणे । नरान् भवाम्बुधेः पारं नेतुं नौरिव यः स्थितः ॥ १॥ सर्वगः सर्वसाक्षी यः सर्वधर्ममयः प्रभुः । स्वभावतः कृपासिन्धुरिन्दुश्चिन्तानलोष्मणः ॥ २॥ ससन्तोषोऽकिञ्चनत्वे समहेमाश्ममृत्तिकः । मातुराराधनासक्तो विहितेश्वरदर्शनः ॥ ३॥ निष्कामलोकसत्कार्यपरः परमतत्त्ववित् । कृतकृत्यो नरेन्द्रोऽभूद्यस्य सङ्गतिमात्रतः ॥ ४॥ वितृष्णः संसृतौ रामकृष्णस्तु भगवान् स्वयम् । सर्वदेवमयः पूर्णः सर्वज्ञो विश्वपूजितः ॥ ५॥ मानवस्य स्वरूपं हि नित्यं शुद्धं तथामलम् । विश्वस्य शान्तये सर्वनरैकत्वमतोऽब्रवीत् ॥ ६॥ सद्वस्तुनः प्रकाशेन सर्वधर्मसमन्वयात् । यत्कीर्तिर्देशमर्यादामतिक्रम्याभितो ययौ ॥ ७॥ इति साहित्याचार्य श्रीभण्डारकरोपाह्वेन त्र्यम्बकशर्मणा विरचिता ``श्रीरामकृष्णस्तुतिः'' समाप्ता । Proofread by Aruna Narayanan