Shri Sharada Devi Shatkam

श्रीशारदादेवीषट्कम्

धवलवसन वेशा मूर्तकारुण्यदेहा सुरनरमुनिवन्द्या रामकृष्णार्चिताद्या । सकलगुणयुता नो वेष्टिताङ्गा सलज्जा जननमरणभङ्गा शारदा पातु दिव्या ॥ १॥ विमलगगनशुद्धा सर्वलोकार्थचिन्ता विगत विषम दृष्टिश्चिन्मयी शान्तिदात्री । त्रिभुवनजनधात्री मङ्गला मर्त्यभूमौ अवतरति परेशे स्वेच्छयाविर्भवन्ती ॥ २॥ त्रिपुरदहनकान्ता रामचन्द्रस्य कन्या निखिलभुवन कर्त्री मार्जनीहस्तमुष्टिः । भवनिगड़विमुक्तिर्याद्यमाया-विमुग्धा नरपतिगण शास्त्री दैन्य दुःखे धरित्री ॥ ३॥ प्रलयसमय घोरा रोषसन्धातदेहा स्तनितभयविधात्री कालिका-विश्वहर्त्री । अमरनिकरवन्द्या देवदेवारुवासा नटनहसनलास्या शारदा भिन्नरूपा ॥ ४॥ दशभुजदशशस्त्रा दिव्यमोदा सुहास्या गुहगणपतिभाता, दक्षकन्या शरण्या । विनतभयविहन्त्री राज्यलक्ष्मी- र्विधिहरिभव पात्रं शारदा भूतधात्री ॥ ५॥ जपनभजनहीना किं नु पुत्राः कुपुत्रा व्यसनगण नियुक्ताः किं नु हेया जनन्या । इति गुणततिशून्यान् शारदे त्रायतां नो विदित सकल दोषा नैव माता जहाति ॥ ६॥ सर्वदेवात्मिकां वन्दे सर्वदेवमयीं भजे । शारदां प्रार्थये भक्ति तत्पादाम्बुरुहद्वये ॥ ७॥ इति ब्रह्मचारिमेधाचैतन्येनविरचितं ``श्रीश्रीशारदाषट्कं'' सम्पूर्णम् । Proofread by Aruna Narayanan