Shri Shachinandanavijayashtakam

 श्रीशचीनन्दनविजयाष्टकम् 
गदाधर यदा परः स किल कश्चनालोकितो
     मया श्रितगयाध्वना मधुरमूर्तिरेकस्तदा ।
नवाम्बुद इव ब्रुवन् धृतनवाम्बुदो नेत्रयो-
     र्लुठन् भुवि निरुद्धवाग्विजयते शचीनन्दनः ॥ १॥

अलक्षितचरीं हरीत्युदितमात्रतः किं दशां
     असावतिबुधाग्रणीरतुलकम्पसम्पादिकाम् ।
व्रजन्नहह मोदते न पुनरत्र शास्त्रेष्विति
     स्वशिष्यगणवेष्टितो विजयते शचीनन्दनः ॥ २॥

हा हा किमिदमुच्यते पठ पठात्र कृष्णं मुहु-
     र्विना तमिह साधुतां दधति किं बुधा धातवः ।
प्रसिद्ध इह वर्णसङ्घटितसम्यगाम्नायकः
     स्वनाम्नि यदिति ब्रुवन्विजयते शचीनन्दनः ॥ ३॥

नवाम्बुजदले यदीक्षणसवर्णतादीर्घते
     सदा स्वहृदि भाव्यतां सपदि साध्यतां तत्पदम् ।
स पाठयति विस्मितान् स्मितमुखः स्वशिष्यानिति
     प्रतिप्रकरणं प्रभुर्विजयते शचीनन्दनः ॥ ४॥

क्व यानि करवाणि किं क्व नु मया हरिर्लभ्यतां
     तमुद्दिशतु कः सखे कथय कः प्रपद्येत माम् ।
 इति द्रवति घूर्णते कलितभक्तकण्ठः शुचा
     स मूर्च्छयति मातरं विजयते शचीनन्दनः ॥ ५॥

स्मरार्बुददुरापया तनुरुचिच्छटाच्छायया
     तमः कलितमःकृतं निखिलमेव निर्मूलयन् ।
नृणां नयनसौभगं दिविषदां मुखैस्तारयन्
     लसन्नधिधरः प्रभुर्विजयते शचीनन्दनः ॥ ६॥

अयं कनकभूधरः प्रणयरत्नमुच्चैः किरन्
     कृपातुरतया व्रजन्नभवदत्र विश्वम्भरः ।
यदक्षि पथसञ्चरत्सुरधुनीप्रवाहैर्निजं
     परं च जगदार्द्रयन्विजयते शचीनन्दनः ॥ ७॥

गतोऽस्मि मधुरां मम प्रियतमा विशाखा सखी
     गता नु बत किं दशां वद कथं नु वेदानि ताम् ।
इतीव स निजेच्छया व्रजपतेः सुतः प्रापित-
     स्तदीयरसचर्वणां विजयते शचीनन्दनः ॥ ८॥

इदं पठति योऽष्टकं गुणनिधे शचीनन्दन
     प्रभो तव पदाम्बुजे स्फुरदमन्दविश्रम्भवान् ।
तमुज्ज्वलमतिं निजप्रणयरूपवर्गानुगं
     विधाय निजधामनि द्रुतमुरीकुरुष्व स्वयम् ॥ ९॥

इति श्रीविश्वनाथचक्रवर्तिठक्कुरविरचितस्तवामृतलहर्यां
           श्रीशचीनन्दनविजयाष्टकं सम्पूर्णम् ।