Shridhara Ashtakam

 श्रीधराष्टकम् 
ब्रह्मज्योतिर्विलसितमतिं सच्चिदानन्दमूर्तिं
      शान्तं दान्तं विगलितमलं केवलं स्वस्वरूपम् ।
स्वान्तर्संज्ञाविकसिततपःस्थं स्वयंशक्तिसिद्धं
      वन्दे वन्दे विहसितमुखं सद्गुरुं श्रीधरं तम् ॥ १॥

स्वात्मतृप्तं सहजसुखदं ज्ञानविज्ञान विज्ञं
      श्रद्धालभ्यं परमपददं स्वस्तिदं सौख्यसिन्धुम् ।
ज्ञानाकारं सुलभसरलं शुद्धतेजः स्वरूपं
      वन्दे वन्दे विहसितमुखं सद्गुरुं श्रीधरं तम् ॥ २॥

शिष्यानां यो हरति ह्यखिलं संसृतिं स्वस्य शक्त्या
      भक्ताधारं परहितकरं शान्तिदं सर्वदाद्रम् ।
लीलावेषं मधुरङ्गदितं सत्त्वरूपं विशोकं
      वन्दे वन्दे विहसितमुखं सद्गुरुं श्रीधरं तम् ॥ ३॥

मोक्षश्रीदं ह्यभयवरदं योगयुक्तं विरक्तं
      शुद्धानन्दं मुदितवदनं भक्तचित्तप्रमोदम् ।
शुभ्रज्योत्स्नाशुभकरनिभं यस्य स्वानन्दध्यानं
      वन्दे वन्दे विहासितमुखं सद्गुरुं श्रीधरं तम् ॥ ४॥

विश्वात्मानो विनतशुभदः धर्ममार्गावगम्यः
      नित्यक्लिन्नो निखिलकृपया ह्यार्तदासानुकम्पी ।
एकान्ते यो निजपदगतो यस्य मौने प्रतिष्ठा
      वन्दे वन्दे विहसितमुखं सद्गुरुं श्रीधरं तम् ॥ ५॥

मेधावी यो निरवधिसुखो निष्कलोङ्कारलक्ष्यः
      संविद्युक्तो विगतविषयः सत्त्वपन्थानुगामी ।
साक्षात्कारी मृदुलवचनो वेदवेदान्तवेधः
      वन्दे वन्दे विहसितमुखं सद्गुरुं श्रीधरं तम् ॥ ६॥

भिक्षाभाग्यः प्रणतशरणो विश्वकल्याणकारी
      रक्षाकृत्यो हितकरवचः सर्वबाधापहारी ।
शिक्षादायी प्रणवविभवः तत्त्वचिन्तानुवादी
      वन्दे वन्दे विहसितमुखं सद्गुरुं श्रीधरं तम् ॥ ७॥

विद्यायुक्तः सरसिजमुखो नित्यशोऽध्यात्मवादी
      आत्मदृग्यः सुनलनयनः सत्यसिद्धान्तदर्शी ।
विक्रान्तो यः कमलचरणः शिष्यचित्तानुचारी
      वन्दे वन्दे विहसितमुखं सद्गुरु श्रीधरं तम् ॥ ८॥

श्रीधराष्टकं भक्त्या यः पठेच्छृणुयादपि ।
श्रीगुरुः स्वयं तस्य मोक्षकारी भवेद्धृवम् ॥ ९॥

(श्रीधरसन्देशः मे १९६४)

इति श्री पृथ्वीराज भालेरावः अथवा सुव्रत
      विरचितं श्रीधराष्टकं सम्पूर्णम् ।


Proofread by Paresh Panditrao