श्रीधरसुप्रभातम्
श्रीधराय नमः ।
प्राचीदिशी प्रगटता शुभरम्यशोभा
भृङ्गःसरागविहगाः विहरन्त्यरण्ये ।
प्रतिष्ठ भो ! गुरुवरं त्वरितं प्रसीद
हे श्रीधर श्रुतिशिरस्तव सुप्रभातम् ॥ १॥
वेधः पुरारिहरयः सकला दिवौकाः
ध्यायन्ति शान्तमुनयस्तु प्रणम्य तुभ्यम् ।
गन्धर्वकिन्नरगणा मुदिता वदन्ति
हे श्रीधर श्रुतिशिरस्तव सुप्रभातम् ॥ २॥
वीणासु वेणुकलनादितमाश्रयोऽयं
गायन्ति भक्तिरसतः सुजनाः सुतन्त्र्या ।
अर्घ्याणि ब्राह्मणजनाः किल चार्पयन्ति
हे श्रीधर श्रुतिशिरस्तव सुप्रभातम् ॥ ३॥
गोष्ठेषु किङ्किणिरवेषु गवाः सवत्साः
दुग्धं श्रवन्ति मृदुकोमलभावयुक्ताः ।
गायन्ति सान्द्रमधुरं शुककोकिलार्वै
हे श्रीधर श्रुतिशिरस्तव सुप्रभातम् ॥ ४॥
श्रौतः स्वनाः हवनमण्डपनादितास्ते
आल्हादयन्ति सुजनान् गुरुपादनिष्ठान् ।
सौरभ्यपूर्णपवनाः विचरन्ति भूमौ
हे श्रीधर श्रुतिशिरस्तव सुप्रभातम् ॥ ५॥
गङ्गाजलत्रिदलचन्दनचन्द्रगन्धा
पुन्नागचम्पकशमीतुलसीप्रवालाः ।
भक्ताहितास्तव पुरः सुभगोपचाराः
हे श्रीधर श्रुतिशिरस्तव सुप्रभातम् ॥ ६॥
श्रीपादरेणुशुभकुङ्कुमरागयुक्तान्
एलानुशीरमृगनाभिमदाक्त चूर्णान् ।
श्रीयक्षकर्दमयुतान्तु गृहाण गन्धान्
हे श्रीधर श्रुतिशिरस्तव सुप्रभातम् ॥ ७॥
गुञ्जासुकञ्जबकुलादि सुवर्णमालान्
गुञ्जारवप्रसवपुष्पयुतां च रम्यान् ।
कुन्दारविन्दमकरन्दमिलिन्दयुक्तान्
हे श्रीधर श्रुतिशिरस्तव सुप्रभातम् ॥ ८॥
नीहारबिन्दुयुतमौक्तिककान्तिभासान्
सेवन्तिकाकनकचम्पकजातियुक्तान् ।
भो स्वीकुरु प्रणवतः श्रवणप्रवीर
हे श्रीधर श्रुतिशिरस्तव सुप्रभातम् ॥ ९॥
कृष्णागुरुप्रचुरगुग्गुलधूपधूमान्
कर्पूरचन्दनसुगन्धितधूम्रवीचिन् ।
दीपांश्च पश्य विविधान्मणिहैमपीठान्
हे श्रीधर श्रुतिशिरस्तव सुप्रभातम् ॥ १०॥
भक्त्या समर्पितमहो नवनीतमग्र्यं
क्षीरं तथा च ससित धृतकन्दयुक्तम् ।
नानाफलानि रुचिराणि च ह्यर्पितानि
हे श्रीधर श्रुतिशिरस्तव सुप्रभातम् ॥ ११॥
रम्भाफलानि शुचिगन्धसमन्वितानि
आरक्तसान्ध्यमधुवर्णरसान्वितानि ।
आम्रादि खर्जुरयुतान्यमृतप्रदानि
हे श्रीधर श्रुतिशिरस्तव सुप्रभातम् ॥ १२॥
वाताम्बुहेमकदलीबदरीफलानि
सीताफलानि रघुनाथफलान्वितानि ।
औदुम्बरादि मधुदाडिमबिल्वकानि
हे श्रीधर श्रुतिशिरस्तव सुप्रभातम् ॥ १३॥
जाम्बीरजम्बुपनसादि महाफलानि
द्राक्षायुतानि मधुखाण्डवप्रेयकानि ।
श्रीनारिकेलफलवारि च सेव्यतां वै
हे श्रीधर श्रुतिशिरस्तव सुप्रभातम् ॥ १४॥
मुक्ताः सरोजसदनाद् भ्रमराः प्रभाते
चित्तं तु बद्धमभवध्यपि चेत्सुतृप्तम् ।
त्वत्पादपद्ममधुभुग् मम मानसोऽयं
हे श्रीधर श्रुतिशिरस्तव सुप्रभातम् ॥ १५॥
निद्रां निहाय शुचिमङ्गलदर्शनं ते
दत्त्वा च स्वीकुरु गुरो कृपया हि सेवाम् ।
भक्ताः नमन्ति ललितस्मितरागयुक्ताः
हे श्रीधर श्रुतिशिरस्तव सुप्रभातम् ॥ १६॥
इति श्री पृथ्वीराज भालेरावः अथवा सुव्रतविरचितं
श्रीधरसुप्रभातं सम्पूर्णम् ।
Proofread by Paresh Panditrao