श्रीत्यागराजस्तवः
नीलकन्धर भाललोचन बालचन्द्रशिरोमणे
कालकाल कपालमाल हिमालयाचलजापते ।
शूलहस्त नमूल शङ्कर मूलयोगिवरस्तुत
त्यागराज दयानिधे कमलापुरीश्वर पाहि माम् ॥ १॥
हारकुण्डलमौलिकङ्कणकिङ्किणीकृतपन्नग
भूतिगात्र कुबेरमित्र कलत्रपुत्रसमावृत ।
नारदादिमुनीन्द्रसन्नुत नागचर्मकृताम्बर
त्यागराज दयानिधे कमलापुरीश्वर पाहि माम् ॥ २॥
भूतनाथ परान्तकातुलभुक्तिमुक्तिसुखप्रद
शीतलामलमन्दमारुतसेव्यदिव्यकलेवर ।
लोकनायक पाकशासनशोकवारणकारण
त्यागराज दयानिधे कमलापुरीश्वर पाहि माम् ॥ ३॥
शुद्धमञ्जु लतालकाहलशङ्खदिव्यवरप्रिय
नृत्तगीतरसज्ञ नित्यसुगन्धिगौरशरीर भो ।
चारुहास सुरादिपूजित पूजनीयपदाम्बुज
त्यागराज दयानिधे कमलापुरीश्वर पाहि माम् ॥ ४॥
सर्पराजविभूषणाव्यय चित्सभेश सदाशिव
नन्दिभृङ्गिगणेशवन्दितसुन्दराङ्घ्रिसरोरुह ।
वेदशेखर सर्वसुग्रहनामरूप दयाकर
त्यागराज दयानिधे कमलापुरीश्वर पाहि माम् ॥ ५॥
सारमोहमहान्धकारदिवाकराखिलभुक्तिद
चैकनायक पादपङ्कजसङ्गिचित्तजनामृत ।
पापतूलहुताशनाखिलकोपवन्मुनिपूजित
त्यागराज दयानिधे कमलापुरीश्वर पाहि माम् ॥ ६॥
पङ्कजासनसूत वेदतुरङ्ग मेरुशरासन
भानुचन्द्ररथाङ्ग भूरथ शेषशायिशिलीमुख ।
मन्दहासशिलीमुख त्रिपुराम्बुधेर्बडबानल
त्यागराज दयानिधे कमलापुरीश्वर पाहि माम् ॥ ७॥
दिव्यरत्नमयासनस्थितमेरुतुल्यमहारथ
छत्रचामर बर्हिबर्हसमूह दिव्यशिखामणे ।
नित्य शुद्ध महावृषध्वज निर्विकल्प निरञ्जन
त्यागराज दयानिधे कमलापुरीश्वर पाहि माम् ॥ ८॥
सर्वलोकविमोहनास्पद तत्पदार्थ वियत्पते
शक्तिविग्रह युक्त्यदीन सुवर्णवर्ण विभूतिमन् ।
पापकेतुदिवाकराक्ष परात्परामितकीर्तिमन्
त्यागराज दयानिधे कमलापुरीश्वर पाहि माम् ॥ ९॥
तात मत्कृतपापवारण दक्षयज्ञभयङ्कर
दारुकावनतापसाधिपसुन्दरीजनमोहक ।
व्याघ्रपादपतञ्जलिस्तुतिसान्द्रसादृशशैलज
त्यागराज दयानिधे कमलापुरीश्वर पाहि माम् ॥ १०॥
॥ इति श्रीत्यागराजस्तवः सम्पूर्णः ॥
Proofread by Gopalakrishnan