Shri Vivekananda Stotram

 श्रीविवेकानन्दस्तोत्रम् 
स जयति जगति स्वामी वन्द्यो वीर विजेतृ-विवेकानन्दः ।
मानुषमोहविवर्जितहृदयो गुरुरिह पूर्णः सिद्धः सदयः ॥ १॥

भुवनेशी बहुसाधनसिद्धं वीरेश्वरसमुदितचिद्देहम् ।
ईशनिमन्त्रितं भूतलजातं वन्दे वीर विवेकानन्दम् ॥ २॥

भूतपति महादेवनिकायः व्यक्त श्रद्धाभक्ति प्रणयः ।
भारतदुर्गतिदर्शनशीर्णः पारावारोत्तार-विलग्नः ॥ ३॥

श्रीशिवसुन्दरदिव्यज्योतिर्गैरिकमण्डितचिद्घनमूर्तिः ।
धरणिनरगणसुमङ्गलकान्तिः स्वामिविवेकानन्दख्यातिः ॥ ४॥

यतिगणनन्दितभास्वरसूर्यं संयमभूषणविक्रमवीर्यम् ।
नवयुगनायकभारतभानुं वन्दे वीर विवेकानन्दम् ॥ ५॥

धिक्कृत धनिजन नश्वरभोगं प्रज्ञानिर्जितभवगतिरोगम् ।
शिवधीचेतनसेवावादं नमत स्वामिविवेकानन्दम् ॥ ६॥

लोकहितकरसुसाधितकृत्यं कामविवर्जितसञ्चितसत्यम् ।
दुःखनिसूदनविगतद्वन्द्वं वन्दे वीर विवेकानन्दम् ॥ ७॥

दीनजनगणक्लेशविनाशं पतितोत्तारणनीचसनाथम् ।
जीवनदायकतत्त्वालापं वन्दे वीर विवेकानन्दम् ॥ ८॥

      शिवमतिपूजा भूतगसेवा सन्ततभक्त्या मानवधर्मा ।

      इति नवभावं जगति लपन्तं वन्दे वीर विवेकानन्दम् ॥ ९॥

विवेकवैराग्योभयसाध्यं मायापाशच्छेदनकार्यम् ।
करतलगतसुलभं खलु तत्त्वं स्तौमि नु विवेकानन्द सिद्धम् ॥ १०॥

गुरुर्बोधिव्याप्तात्समुपगमनेनैव यमिनां
      वरेण्यः सम्प्राप्तः श्रुतिगतपदार्थं सुगहनम् ।
प्रसङ्ख्यानाध्यास प्रतिपदसकृत्तत्वविदसौ
      विवेकानन्दो नः शरणमिह भूयात्तनुभृताम् ॥ ११॥

इति ब्रह्मचारिमेधाचैतन्यविरचितं
           ``श्रीमत्स्वामिविवेकानन्दस्तोत्रम्'' सम्पूर्णम् ।

Proofread by Aruna Narayanan