% Text title            : Yatipati Shannavatih
% File name             : yatipatiShaNNavatiH.itx
% Category              : deities\_misc, stotra, gurudev, shataka
% Location              : doc\_deities\_misc
% Proofread by          : Aruna Narayanan
% Description/comments  : Ramanujastotraratnavali, Ramanuja Sampradaya. (Prayer to Shri Ramanujacharya)
% Latest update         : December 25, 2022
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Yatipati Shannavatih ..}##
\itxtitle{.. yatipatiShaNNavatiH ..}##\endtitles ##
            || shrIH ||
     || shrInidhaye namaH ||
 || shrImate rAmAnujAya namaH ||
atha (1)yatipatiShaNNavatiH ||
kavitAjitakallolikanyakAkAntavakShase |
karuNAdiguNADhyAya kamalAnidhaye namaH ||
(1\. anuShTubh)
vande (2)nalAgrajasharachchApajaM chApapattane |
kurvan (3)nalAnujasharanmadhujAtayatistutim || 1||

evaM shubhasandeshAvaharAmAnujapatrikAyai svakR^itaj~natAM darshayantaH
90\-\-tame shloke shleSheNa shrIrAmAnujasAmyaM tasyA upapAdayanti
kavIshvarAH ||
pi~Ngalavatsare bhagavato rAmAnujasya avatAraH | sa cha bhagavataH
AdisheShasya avatAravisheShaH | ChandashshAstrakR^it pi~Ngalamunishcha tathA
AdisheShasya avatAravisheShaH | ataH nAnAvidha (54) vR^ittairabhipUrNeyaM
ShaNNavatiH kalpitA kavisArvabhaumaiH ||
 (2\. pa~NktivisheShaH\- yatinutiH(4))
pi~NgalanAmakavatsarajaM ma~NgaladaM yativR^indapatim |
pi~NgaladarshitavR^ittakulaiH a~NgalasachChubhapuNDramaye || 2||
(3\. viyoginI)
abhivandya yatIndrasaMshrayAn
      anaghAnAshritapApanAshakAn |
ahamadya karomi sanmuneH
      atihR^idyAmalavR^ittamAlikAm || 3||
(4\. mAlabhAriNI)
bhagavannudito(5) bhavasya tAre
      matamaMho ! sa bhavasya tallunAsi |
madhumAsabhavastathA kathaM vA
      madhuvidveShiNi saktamAnaso.abhUH || 4||
bhagavannudito bhavasya tAre
      bhavatArAya natasya cheShTase tvam |
madhumAsabhavastathaiva saMyak
      madhumadbhAShyayugaM praNItavAn tvam || 5||
(5\. shrIH)
shrIste | sA stAt || 6||
(6\. strI)
shrIman ! yogin ! | vidyAM dadyAH || 7||

(7\. mR^igI)
dIvyatAnmAnase | me bhavAn santatam || 8||
(8\. kanyA)
yoginnasmatsvAmin ! jIyAH | jIyA yoginnasmatsvAmin ! || 9||
(9\. pa~NktiH)
shrIyatinetuH dhyAnavidhAtA | pashyati tattvaM vedashirastham || 10||
(10\. priyA)
yatirATpade niratassadA |
yamabhIkaro bhavitA pumAn || 11||
(11\. tanumadhyA)
mUrtiryatinetuH shoNAyitavastrA |
vaMshaM kalayantI pAyAdagharAsheH || 12||
(12\. narapriyA(6))
bhavati bhAShyakR^it bhagavataH priyaH |
bhavabhayApaho bhaja tamunnatam || 13||
(13\. somarAjI)
yadA lakShmaNAryaM mudA pUjayennA |
tadA vedashIrShNAM vidA shaMsitassyAt || 14||
(14\. madalekhA)
rAjAyaM yatipa~NkteH rAjA san dvijapa~NkteH |
aj~nAnaM bhavarAtreH nudyAnnastama etat || 15||
        rAmAyAmayi rAgaM mA yAyA mama chitta ! |
godAyAssahaje.asmin mAyAyA hR^iti yAyAH || 16||
(anuShTubh)
shrImadrAmAnujau vande gItAtadbhAShyadAyinau |
vaMshAla~NkR^itahastAbjau godAnAthasahodarau || 17||
advaitaM shravasAM netreH dvaitaM cha rasanAsu yaH |
dhatte sa eva yogI san vishiShTAdvaitamabravIt || 18||
(15\. pramANikA)
shrutismR^itipramANikA yatiprakANDabhAratI |
sudhAnimagnavigrahaM karoti paNDitaM janam || 19||
(16\. gajagatiH)
budhagaNairabhinuto munimaNiH shritahariH |
shrutishiraHkR^itamatiH shubhatatiM vitanutAm || 20||
(17\. bR^ihatIvisheShaH yAdavI(7))
yAdavava~nchitachetA yaH yAdavapUjitapAdo yaH |
yAdavaparvatavAsI yaH yAdavavaMshajachetA yaH || 21||
(18\. bR^ihatyupajAtiH)
brAhmaNarAkShasapIDAyAH bhUpatiputrIM pAlayatA |
khyApitarAmAnujanAmnA saMyamirAjA tena vayam || 22||
(19\. champakamAlA)
hanta sanAthA tena na chintA
      saMsR^itirakShobhUtapishAchAt |
lakShmaNayogIDshrIpadasaktAn
      lakShmaNapUrvaH pAtumihAsti || 23||
mattamayUro bANaraNe.abhUt
      khaNDitavIryo yena ShaDAsyaH |
taM hi bhuja~NgaM ka~nchana chitte
      hanta vidhatte shrIyatirAjaH || 24||
(20\. mattA)
mA mA cheto dhanamadamattAn
      yAyA martyAn shR^iNu tava pathyam |
yogIndo he yatishatamanyo !
      nAthetyevaM vada sukhabhAk syAH || 25||
(21\. pa~NktivisheShaH yatimahitA(8))
ayi bhaja mAnasa ! yatirAjaM
      shritahitadAyakapadareNum |
yadi bhavabhIkulamapanetuM
      matirapi te mudamatha bhoktum || 26||
(22\. tvaritagatiH)
matamakhilaM shrutirahitaM
      yatipatinA parimathitam |
shrutimadhuraM paramarataM
      jagati tataM jayatitarAm || 27||
(23\. svAgatA)
dhanvinavyapurajAtarasAyAH
      iShTapUrakasahodara ! dhIra ! |
saMyamIndra ! karuNArasalIlA\-
      saudhamAnasa ! sadA vasa chitte || 28||
shemuShIti bhavatA kila padye
      samprayuktamayi ! sheSha ! yatIndra ! |
yo.amumIrayati shabdamabhij~naH
      tasya bhAti hR^idaye sa hi sheShI || 29||
saMyamIndrapadapadmabhavAn ye
      saMvahanti shirasA shubhareNUn |
sannamanti sahasA suralokAH
      sa~Nghasho.ativinayena yutAstAn || 30||
(24\. indravajrA)
shrIvArijAtoditaklR^iptatAdR^ik\-
      shrIvAjimedhoditavigrahAya |
shrIvAraNAdrIshvarabhUShaNAya
      shrIvArido bhAti yatIshvaro naH || 31||
(25\. upajAtiH)
sarasvatIyaM sarasA bhavantaM
      sannyAsinaM nAma sadA.a.ashrayantI |
sannyAsinI sAdhu babhUva tasmAt
      santaM na yogaM sahate svabhartuH || 32||
shrIlakShmaNAchAryapadAvalambI
      kadA.api kR^ichChraM na sameti dhanyaH |
shrIlakShmaNe tatpadasaMshraye cha
      shrIrAmabhadrassumanAssa tAdR^ik || 33||
(26\. anukulA)
saMyaminetushcharaNasarojaM
      santatamantarvilasatu mAnyam |
sa~NkaTasa~NghaH pratichakito yat
      samprati bhItaH parigalito.asmat || 34||
(27\. dodhakam)
saMyaminAyakapAdabhavAnAM
      sAtvikasantatimaulidhR^itAnAm |
saMsR^itisambhavatApaharANAM
      santu kaNA mayi reNugaNAnAm || 35||
(28\. vaMshasstham)
sa nAma loke manujo mahIyate
      sa nAma dUrIkurute.aghavibhramam |
sa nAma sarvAniha vindate shubhAn
      sadA mudA yo yatirAjasevakaH || 36||
(29\. bhuja~NgaprayAtam)
aho yAdavAdyairvanAntarvisR^iShTaH
      kirAtena kenA.api jAyAyutena |
nimeSheNa nIto.asi kA~nchIsamIpaM
      rasaM pAtukAmena nityaM dharaNyAm || 37||
suchitrAvatAraM bhavantaM sudhIndrAH
      vadantyeva yuktaM tatassaMyamIndra ! |
suchitrAvatAro bhavAn satyametat
      kimatrAsti chitraM parAmarshabhAjAm || 38||
(30\. sragviNI)
lakShmaNaM sanmuniM bhAvaye santataM
      bhaktimattallajaM shrIpateH pAdayoH |
ambaraM shoNitaM daNDakaM puNDrakaM
      bibhrataM vigrahe mAnase saddayAm || 39||
(31\. drutavilambitam)
yatipate ! kapilAdimatAni te
      bhaNitibhiH paramunnatayuktibhiH |
parihR^itAni vichintya vidaH shruteH
      paramanandathupUritamAnasAH || 40||
bhavabhajaM bhaja he bhavabha~njakaM
      bhavapituH piturAntarara~njakam |
bhavatatirbhavatIha paratra sA
      bhava mano ! mama tena nirAkulam || 41||
(32\. kusumavichitrA)
yatipativANI saralagabhIrA
      shrutishatanandyA muraripubhogyA |
manasi madIye vilasatu nityaM
      paramatajAtairapi bahumAnyA || 42||
(33\. maNimAlA)
nityaM kuru kaNThe yogIshvaranAmnAM
      varNAvalirUpAM kA~nchinmaNimAlAm |
bhItirna bhavAkhyAt bhImAdahirAjAt
      chitte tava kuryAt nR^ittaM mamamitra ! || 43||
(34\. lalitA)
shrIlakShmaNAryamuninAthakIrtanAt
      shrIlakShitAtmapR^ithuvakShaso hareH |
shrIpUritAni lalitAni te puraH
      shrIman ! bhavanti mama mitra ! nishchitam || 44||
(35\. ma~njubhAShiNI)
pramadAnusAraniratena chetasA
      madanAnukUlalalitena mohite |
bhavabhItidAyigahane kR^itabhrame
      mayi lakShmaNArya ! kuru vIkShaNaM manAk || 45||
pramitAkSharA.api sakalArthashevadhiH
      yatirAjasUktiranaghA virAjate |
 iti nAma hanta vibudhA mudA yutAH
      satataM tvadIyapadasevane ratAH || 46||
yadi nAma bhItimupayAsi saMsR^iteH
      yamayAtanAdibahughorabhAjanAt |
yaduvaMshanAthalalitaikamagnahR^it\-
      yativR^indanAthapadapa~NkajaM bhaja || 47||
vanitAvilAsaramaNIyavakShasA
      vasudhAtale.atra bahudhA vihAriNA |
vasudevadevavaradevakIbhuvA
      vadatIha yo.ati yatirAT tamAshraye || 48||
madanena pApasadanena kevalaM
      madhuvairipAdabhajanaikavairiNA |
mama mAnasaM hi parimohitaM hitaM
      mahitaM hitAya yatirAjamAshraye || 49||
kalikAlajAtakaluShAbhibhUtadhIH
      kamalAdhinAthahR^idayA priyo.anisham |
(9) kamalAsakukShikaruNAjuShA.amunA
      kalayAmi nAma kamalApatiM kare || 50||
yatinAyake tritanudaNDamaNDite
      guNavAridhau nikhilapuruShArthade |
ratamAnasAya nativR^indadAyinI
      janatA shubhaM nikhilamatra vindate || 51||
dadhidugdhakundasharadindupANDaraiH
      dasha chaikamekamiti puNDrajAlakaiH |
parimaNDitaM bhajata haMsamadbhutaM
      ramaNIyapi~NgashubharekhikAyutaiH || 52||
(36\. praharShiNI)
udvigno bhavavipinAdanekaduHkhAt
      udgantuM yadi kuruShe.atha mitrarAjam |
unnAmno ravivasateH guNAn vivektuH
      udyogaM kuru suhR^idasya kIrtane tvam || 53||
(37\. mattamayUram)
kA~nchIpUrNAt prApya giraH ShaT karishaila\-
      shrInAthaproktAH shubhadAH shrIyatirAjaH |
AshrityAsau taM cha mahApUrNagurUddhaM
      hR^iShTastasthau yastamudAraM kalayAmi || 54||
(38\. vasantatilakaM)
shailo hi tasya vapureva hareH kathaM vA
      padbhyAM chareyAmati ku~nchitajAnubhAgaH |
ArohaNaM kalayati sma girermahAn yaH
      tasyA~NghripadmayugalaM sharaNaM prapadye || 55||
manmaulimaNDanamaho mahitA mahIyaM
      asyAshcha maNDanamidaM tava pAdapadmam |
tannyastumatra mayi kiM chakito yatIndra !
      svAmin ! itIva vadati sma girishcha sheShaH || 56||
etat dvayaM samavalokya sapadyanantaH
      tatraiva ve~NkaTapatiH svayamAvirAsIt |
yadvandanoditavilochanamodavAri\-
      samplAvitassa bhagavAnapi shailarAjaH || 57||
shrIra~NgarAjadayitAsahasambhavAya
      shrIdevarAjahR^idaya~NgamanIradAya |
shrIshrInivAsadharaNIdharavigrahAya
      sampatkumArajanakAya namo namaste || 58||
puNDratridaNDaparimaNDitagAtramenaM
      puNDrekShudaNDaparimaNDitagAtramekam |
puMso.api hanta parame puruShe.anuraktAn
      puNyAnatIva kalayantamavaimi kAmam || 59||
(39\. aparAjitA)
yatipatimatakAH parairaparAjitAH
      api yamapR^itanAM nijArthamupAgatAm |
tanugatatulasIsragAdiparAjitAM
      vidadhati mayi santu te prasannAH || 60||
(40\. praharaNakalitA)
yatipatipadayoH natimiha vahataH
      matiratisubhagA gatiratiparamA |
bhagavati mahatI ratirapi bhavitA
      bhavati cha bhavato na hi bhayakaNikA || 61||
(41\. mAlinI)
saralamatigabhIraM pAvanaM dhanyalabhyaM
      madhuratamamudAraM ma~NgalaM mAnanIyam |
viratavitatitathyaM bhAShitaM yasya sarvaM
      sa jayati yatirAjaH sArvabhaumo gurUNAm || 62||
anupamamatihR^idyaM pAvanaM dhanyalabhyaM
      kalibalamalalopaM kalpakaM kA~NkShitAnAm |
kamalanayanabhogyaM yadvacho bhAti sarvaM
      sa jayati yatirAjaH sArvabhaumo gurUNAm || 63||
kamalamiva manoj~naM (1)ShaDpadAnandyabhAvaM
(ShaDpada \- bhR^i~NgaH | dvayAkhyamantrashcha ||)
vimalamiva nabho yat (2)satkulAlokapAtraM
(satkulaM \- nakShatrANAM kulam | satAM kulaM cha |)
amalamiva munInAM mAnasaM sarvatattvaM
prathayati vachanaM te lakShmaNAchAryavarya ! || 64||
(42\. chAmaram)
shoNavastraveShTitaM vibhAti yattridaNDavat
      puNDrajAlamaNDitaM cha dArupAdukAyutam |
viShNuchittabAlikAsyajAtasUktichintakaM
      lakShmaNAryanAmakaM tadastu bhUtaye mama || 65||
saMyamIndrapAdapadmasa~Ngatena chetasA
      mAnavo.atra netaratra sa~Ngameti yassa me |
bandhuratnamantara~NgamitraratnamiShyate
      deshiko.api so.ayameva tat paraM cha daivatam || 66||
(43\. pa~nchachAmaram)
yatIndravaktranirgataishshubhAkSharaiH prapUritaM
      shrutismR^itItihAsataH samuddhR^itaistathA rasaiH |
parAsharAtmajAtajAtasUtramArgasa~NgataM
      parAvaraj~nabhAvitaM vibhAti bhAShyamadbhutam || 67||
nidhAya vetrama~njasA svamauliveShTanAntarA
      prabodhamudrikAM vahan pramodapUritAntaraH |
stotrasUtrasatkaraH paro jagAda yatpurA
      yatIndrabhAShyamaNDitaM tadatra bhAti shobhanam || 68||
sunavyakAvyasevanAt sushAstrayuktisevanAt
      shrutismR^itItihAsataH sadAgamAntasevanAt |
yadatra vindate paraM jano manovinodanaM
      tato.api gadyasevanAt yatIshvarasya vindati || 69||
kR^itAgamArthasa~NgrahaH kR^itAntabhUtabhAShitaH
      kR^itAntabhItidAyakaH kR^itAnanAbhinanditaH |
kR^itAyitasvakAlakaH kR^itAkR^itAghasatkriyaM
      kR^itAnukampa eSha mAM kR^itI yatIshvaro.avatu || 70||
yatIshvaraH kR^ipAmayaH paraM paro virAjate
      ya eSha nityanAmakaM bhR^ishaM dR^ishAlpakAkR^itim |
guruM punaH prabhAvataH prabandhamadbhutaM paraM
      vidhAya pAti mAnavAn purANapUruShapriyam || 71||
(44\. shikhariNI)
mahAnAmodo.ayaM mama manasi lIlAM vitanute
      yatIndorAsyendoH amR^itamiva bhUyo vigalitam |
pibAmyevaM nityaM vachanamatiramyaM bhagavataH
      manaHkAntaM mAnyaM madhuramadhuraM sAmyavidhuram || 72||
yatIndorAsyendoramR^itamiva pItvA vigalitaM
      vachastAdR^ik shrImAn svayamupagato harShavivashaH |
priyAM tyaktvA DilyAM yadushikharishIrShe vijayate
      tatastAmAyAtAmapi sa ramaNImAha tadidam || 73||
(45\. pR^ithvI)
praNamya yatimaNDalapravarapAdapa~NkoditaM
      praveshamanavInavAkshirasi yo vidhatte pumAn |
pramodamatulaM varaM sa kila satyamatrAshnute
      pramodabharapUrito nayati kAlamasmin kAlau || 74||
kaliH prathayatu svayaM kamapi vibhramaM sambhramAt
      kaThoramakapUritaM kaluShajAlakandAyitam |
tathA.api sukhamedhate yativarasya sUktau rataH
      chirantanasarasvatIrasabhareNa yA pUritA || 75||
yatIshvarasarasvatImanubhavanti ye kovidAH
      yatIshvarasarasvatImatha paThanti ye sAdaram |
yatIshvarasarasvatImatha vahanti ye pustake
      yatIshvaradhiyaiva tAn iha namAmi sarvAnapi || 76||
(46\. mandAkrAntA)
AsUryAkhye mahati madhure mAnyavaMshe.avatIrNaH
      divyakShetre sakalamahite pAvane darshanIye |
nAmnA yattat suranarabhuvA bhAShayA mishritena
      proktaM jAtaM jagati viditaM shrIparumbhUdhurIti || 77||
shrIryA shlAghyA bhavati hi satAM tAmimAM saMvahantI
      dhUryA tAM bhUrvahati yadiyaM shrIparumbhUdhurIti |
tAdR^ik nAmnA bhavati jagati prAptakIrtiH purIyaM
      nAmanyuktAnyaha ! vimR^ishatAM bhAti varNAni tattvam || 78||
(47\. hariNI)
kuvalayadalashyAme rAme ratassatataM muniH
      yatipatirasAvIhAmukto hitaikarato nate |
madhuramadhurA bhAShAveShAH kiran nijasaMvidaH
      kalayatu sadA nR^ittaM chittaM madIyamupAshritaH || 79||
(48\. narkuTakam)
karadhR^itadaNDamastu mama mAnasavAchChitadaM
      kaTitaTaraktavastrakamanIyavapuHpravaram |
shubhamayashubhrapuNDrasubhagAkR^iti ma~NgaladaM
      yatipatinAmakaM kimapi daivatamapratimam || 80||
yatipatima~njuvaktragalitAkSharapa~NktidharaM
      matimatiharShajAlaparivarShaNakarmakR^iti (tam |) |
sati pathi nIyamAnanigamArthamahAvibhavaM
      ratimiha me dadAtu parapuMsi subhAShyamidam || 81||
(49\. kusumitalatAvellitA)
svAmI kAShAyaM vapuShi kalayan hastapadme tridaNDaM
      shrImachChrIchUrNaM parigatatanuM shvetapuNDraissuramyam |
maulau sandR^ishyAM kachachayakR^itAM sachChikhAM bhavyamUrtiM
      shrImAnantarme vilasatu sadA saMyamIndro mahAtmA || 82||
(50\. vibudhapriyA)
vAraNAdrishiraHsthitaM varadaM suparvamahIruhaM
      vardhayan svakarAmbunA paramunnataM sakaleDitam |
sarvadA.atulasaddayaM chaturAnanAdhvarasambhavaM
      saMyamipravaro guruH guNavAn sadA sa virAjate || 83||
(51\. shArdUlavikrIDitam)
vande lakShmaNayogipAdayugalaM shoNAbjatulyaprabhaM
      vIthIdhUlisamUhaklR^iptakavachaM bhikShATanaprasthitam |
yadvinyAsapavitritaM kShitirajashchakrA~NkarekhojjvalaM
      svA~NgulyagrasamAdR^itaM shubhakaraM maulau vidhatte janaH || 84||
shrImadyAmunatIrthasaktahR^idayau pANyAptavaMshottamau
      vikhyAtau bhuvi yAdavAshritapadau rAmAnujau yau tayoH |
ekaH shrIvibudhendrajAtamahitaM mUlaM kilAdau jagau
      anyastasya tatashcha bhAShyamanayoH pAdAmbujAnyAshraye || 85|| 
(shrIkR^iShNayatipatyoH shleShaH)

shrImallakShmaNayogirAjavachasAM mAhAtmyamatyadbhutaM
      ko.ahaM vaktumidaM vadanti sudhiyaH shrIvatsagurvAdayaH |
kANAdapramukheShu mAstu dhiShaNA shAstreShu kAvyeShu vA
      sarvatrA.api jayaM yatIshvaragirAM sevA pradadyAditi || 86||
shayyA padmavilochanasya mahataH puMso bhuja~NgAdhipaH
      sa~njAto dharaNau kilAyamabhavat pUrvaM mahAbhAShyakR^it |
sa~njAto.atha cha pi~NgalAhvayamuniH ChandashchayaM nirmame
      sa~njAto.atha cha lakShmaNAryamunirAT shrIbhAShyakAro.abhavat || 87||
jAto bhAShyakR^ideSha bhAShyakR^idabhUt shrIpi~NgalaH pi~Ngale
      varShe.abhUt madhurodito.atha cha madhau mAse bhavAttArakaH |
sa~njAto bhavatArake sakalamapyetat paraM sAmprataM
      tasmAt sAmpratamenamasmi sharaNaM yAto yatInAM patim || 88||
shAstre shabdamaye tatAna vihR^itiM janmanyasAvAdime
      madhyasthe.atha cha janmanIha vihR^itiM ChandaHkule.athodite |
janmanyatra vidhAya bhAShyamubhayaM gadyatrayaM sAravat
      vedArthasya cha sa~NgrahaM yatipatiH nityaM sthito dIpavat || 89||
sa~nchAreNa pavitritakShititalaM sadbhissadA sevitaM
      kA~nchIpUrNakR^itIndravAgvilasitaiH vidyotamAnAntaram |
vedArthaughasamR^iddhashobhananavagranthodayaikasthalaM
      shrIrAmAnujamagryavarNamadhuraM sevasva he chitta ! me || 90|| 
(shrIrAmanujashrIrAmanujapatrikayoH shleShaH)
(52\. sragdharA)
nAmAbhUtte trivarNaM trijagadabhihitaM lakShmaNa ! shrIyatIndo !
      sautraM bhAShyaM tridhedaM trividhamapi kR^itaM gadyamatra tvayedam |
vANI seyaM tridhAmnaH vivR^itatanurabhUt yA triShaTkAbhirAmA
      tritrigranthapraNetaH ! trimunivara namaste gR^ihItatridaNDa ! || 91||
\ldq{}gAthAtAthAgatAnAM\rdq{} iti nigamashirodeshikaH prAha yaM te
      stotre shlokaM mahAntaM tamiha vayamaho kIrtayanto mahAntam |
vindemAnandamantarvidhutasamashucho vistR^itApArthasArthAn
      nAnyAn svapne.api yAmo vimatasR^itimato jIvasa~njIvakAmAH || 92||
(53\. pAdAkulakam)
mA mAM rAmAM cheto yAyAH
      shrImadrAmAvarajaM yAyAH |
rAmAssarvA anujA etAH
      kAmAnnemA vAmAH kuryAH || 93||
(54\. gItiH)
yatipatipAdapayoje
      yadi matirIShanniveshitA bhavati |
yama iti tasya va pUriti
      yavalavamAtraM na vidyate chintA || 94||
pi~NgalavatsarajAtaH
      pi~Ngalamunireva lakShmaNAryo.ayam |
ma~NgalasantatidAyaka
      tu~NgaguNAshliShTavR^ittakulabhUmiH || 95||
lakShmaNa ! yativara ! sa bhavAn
      atimahito nassubandhurata eva |
vAsavabhavAya dattA
      vivR^itA bhavatAtra hR^idyagadyakR^itA || 96||
(upajAtiH)
shrIbhAShyasiMhAsanamAtmanInaM
      asmatkulashrItilakAya datvA |
svabhAgineyAya tutoSha bhUyaH
      yastaM prapadye sharaNaM yatIndram || 97||
(gItiH)
yatipatiShaNNavatiriyaM
      dvijapatisuskandhalAlanIyA~NgA |
hrasvA cha vardhamAnA
      sevyA parameva devatA jayati || 98||
yatipatiShaNNavatiriyaM
      suguNA shuddhA suvR^ittajAtayutA |
brAhmIM shriyaM vahantI
      kaNThAbharaNaM satAM sadA bhavatu || 99||
(tvaritagatiH)
yatipatiShaNNavatiriyaM
      kavimaNimAnidhirachitA |
nijapaThane ratadhiShaNaM
      samakushalaM virachayati || 100||
yatipatiShaNNavatiH ||

iti shrImadAshukavisArvabhaumasya shrInidheH kR^itiShu
       yatipatiShaNNavatiM sampUrNam |

## Footnotes ## TippaNI
(1) AgAmini pi~Ngale vatsare bhagavataH shrIrAmAnujasya ShoDashI
ShaShTipUrtiH (960 saMvatsarANAM pUrtiH) bhavitA | sA cha utsavaiH
pUrNA kartavyA | tada~NgatayA shrIrAmAnujaviShayakAH prabandhAH
upanyAsAshcha vidvadbhiH kartavyAH | iti prArthaye |\rdq{} \-\-
 iti shrIkA~nchI vidvadvareNya padmabhUShaNa mahAmahimopAdhyAya, prativAdi\-
bhaya~NkaramaNNa~NgarAchArya svAminaH svakIya \ldq{}rAmAnujan\rdq{} nAma
dramiDapatrikAyAM sandeshamadishan | shrIkavIshvarAH tena sandeshena
prachoditAH 960 saMvatsarapUrtijanmarkShotsavatvAt asya, 96 shlokaiH
pUrNAM imAM yatipatiShaNNavatiM arachayan ||
(2) nalAgrajasharashchApajaH \- rAkShasavatsare dhanurmAse jAtaH ityarthaH |
chApapattane\-dhanuShpure | shrIkavisArvabhaumAnAM guravaH shrIvAtsyave~NkaTa\-
sheShAryamahAdeshikAH rAkShasavarShe chApamAsi avatAraM kR^itavantaH | tata
evaM varNanA ||
(3) nalAnujasharat\-pi~NgalavatsaraH | madhujAtaH\-chaitramAse kR^itAvatAraH
\ldq{}madhushcha mAdhavashcha vAsantikAvR^it\rdq{} iti bhagavatI shrutiH ||
(4) navamidaM vR^ittam | yatinutiriti nAmadheyamasya asmAbhiH dattam ||
(5) bhavasya tAreH \- ArdrAnakShatre\-
       \ldq{}ArdrA nakShatraM rudro devatA\rdq{} iti shrutiH ||
(6) narapriyA \-\- navamidaM vR^ittaM kaviprayuktam |
       idasmAbhiH dattaM nAmadheyamasya ||
(7) yAdavI \- navamidaM vR^ittam | etadasmAbhiH dattaM nAmadheyam ||
(8) yatimahitA \- navamidaM vR^ittam | etadasmAbhiH dattaM nAmadheyam ||
(9) kamalA nAma yatipateH bhaginI | yasyAH vaMshe jAtA ete kavIshvarAH ||

kavitAjitakallolikanyakAkAntavakShase |
karuNAdiguNADhyAya kamalAnidhaye namaH ||
 || shrInidhaye namaH ||
##

The footnotes are given as number enclosed in parenthesis.

Proofread by Aruna Narayanan

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}