आत्मार्पणम्
अपार-कारुण्य-सुधा-समुद्र-रिङ्गत्तरङ्गावलि-लीनचेताः ।
वन्दारु-वृन्दाथित-कल्पवल्लि ! दुर्गा-प्रसादस्य गतिस्त्वमेका ॥ १॥
असीम-सारल्य-लता-प्रतान-विजृम्भणोद्यान-विशाल-सीमा ।
निःशेष-भक्तार्ति-विनाश-शीले ! दुर्गा-प्रसादस्य गतिस्त्वमेका ॥ २॥
उदार-चारित्र-विकाश-गन्ध-सञ्चारणाडम्बर-रोदसीका ।
हृद्यावदानोत्कर-भासमाने ! दुर्गा-प्रसादस्य गतिस्त्वमेका ॥ ३॥
संसार-दावानल-दीनभक्त-प्रसादनैकामृत-पूर-पूर्तिः ।
उपासक-प्रीणन-बद्धकक्षे ! दुर्गा-प्रसादस्य गतिस्त्वमेका ॥ ४॥
दौर्भाग्य-तूल-ज्वलनायमान-सहस्रनाम-श्रवणार्द्र-चित्ता ।
निसर्ग-सौभाग्य-विसर्ग-निष्ठे ! दुर्गा-प्रसादस्य गतिस्त्वमेका ॥ ५॥
क्लिश्यत्-कवित्व-व्रतती-वितान-प्रकाशनानभ्र-नभस्यवृष्टिः ।
समुच्छलद्-भक्ति-विशेष-तुष्टे ! दुर्गा-प्रसादस्य गतिस्त्वमेका ॥ ६॥
दृक्पात-मात्रार्पित-साध्यसिद्धि-निषेवणानन्दित-साधकेन्द्रा ।
वदान्य-सीमायित-चित्तवृत्ते ! दुर्गा-प्रसादस्य गतिस्त्वमेका ॥ ७॥
पद्मासनोपेन्द्र-महेन्द्र-मौलि-मन्दार-मालाङ्कित-पादपीठा ।
मातः ! शिशूक्ति-श्रवण-स्वभावे ! दुर्गा-प्रसादस्य गतिस्त्वमेका ॥ ८॥
सेवासक्त-सुरासुरावलि-शिरो-माल्यान्तराल-स्खल-
द्धूली-धूसर-पादपीठ-विलुठत्-सौभाग्य-सीमायिते ! ।
निर्व्याज-स्थिर-भक्तियोग-सुलभे ! मातस्तवाराधने
चेतो मेऽनिशमुद्गताधिक-रसं वैपुल्यमालम्बताम् ॥
इति श्रीदुर्गाप्रसादद्विवेदीविरचितं आत्मार्पणं सम्पूर्णम् ॥
Encoded and Proofread by Rajani Arjun Shankar