% Text title : Anandasagarastava % File name : anandasagarastava.itx % Category : devii, otherforms, stotra, devI, nIlakaNThadIkShita % Location : doc\_devii % Author : Nilakantha Dikshitar % Transliterated by : Sunder Hattangadi % Proofread by : Sunder Hattangadi, Rajani Arjun Shankar % Description-comments : Hymn to Devi Minakshi % Latest update : Dec. 18, 2009, February 17, 2023 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Anandasagarastava ..}## \itxtitle{.. AnandasAgarastavaH ..}##\endtitles ## vij~nApanArha\-viralAvasarAnavAptyA mandodyame mayi davIyasi vishvamAtuH | avyAjabhUta\-karuNA\-pavanApaviddhA\- nyantaH smarAmyahamapA~Nga\-tara~NgitAni || 1|| AvedyatAmaviditaM kimathApyanuktaM vaktavyamAntara\-rujopashamAya nAlam | ityarthyase kimapi tachChravaNe nidhAtuM mAtaH prasIda malayadhvaja\-pANDyakanye || 2|| AkranditaM ruditamAhatamAnane vA kasyArdramastu hR^idayaM kimataH phalaM vA | yasyA mano dravati yA jagatAM svatantrA tasyAstavAmba purataH kathayAmi khedam || 3|| paryAkule manasi vAchi pariskhalantyA\- mAvartagarta iva chakShuShi ghUrNamAne | kaste.abhidhAsyati shive mama tAmavasthAM kAle dayasva kathayAmi tavAdhunaiva || 4|| bhaktiM karotu nitarAM surajAtimAtre grAmINajanturiva paurajaneShu lokaH | anyatra devi bhavadIya\-padAravindA\- dAkR^iShyamANamapi me hR^idayaM na yAti || 5|| a~NgIkuru tvamavadhIraya vA vayaM tu dAsAstaveti vachasaiva jayema lokAn | etAvataiva sukaro nanu vishvamAta\- ruddaNDadaNDadhara\-ki~Nkaramaulibha~NgaH || 6|| vedAntavAkya\-janitaM vimalaM vichArai\- rAsAdya bodhamanuchintanato.aparokSham | muktiM vrajanti manujA iti sUktimAdyA\- mAlambya kastaritumarhati shailakanye || 7|| ekaika\-vedaviShayAH kati nAmashAkhA\- stAsAM shirAMsi kati nAma pR^ithagvidhAni | arthAvabodha\-vidhuro.akSharalAbha eva keShAM nR^iNAM katibhirastu sharIrabandhaiH || 8|| nyAyAH paraspara\-vibhinnadishaH sahasra\- muchchAvachAni cha bhavantyupabR^iMhaNAni | evaM sthite girisute nigamopalAnAM tAtparya\-sAramavadhArayituM kShamaH kaH || 9|| astvakSharagraha\-vidhirjanuShAM sahasrai\- rApAtato bhavatu nAma tato.arthabodhaH | durvAdikalpita\-vikalpa\-tara~NgasAndrAn duShpUrvapakSha\-jaladhIn kathamuttareyuH || 10|| brahmeti shaktiriti bandhavimochanIti mAyAmayIti madanAntaka\-vallabheti | saptAShTashabda\-parivartanamAtra eva sAmarthyamAvahati shAstraparishramo.ayam || 11|| tasmai prasIdasi girIndrasute ya itthaM sampAdayeta shanakairaparokShabodham | yasmai prasIdasi sa cha kShamate.avaboddhu\- mitthaM paraspara\-samAshrayametadAste || 12|| AkarNaya tvamimamabhyupagamya vAdaM jAnAtu ko.api yadi vA hR^idayaM shrutInAm | tasyApyasa~Nkhya\-bhavabandhashatArjito.ayaM dvaitabhramo galatu janmashataiH kiyadbhiH || 13|| kAle mahatyanavadhAvapatankadApi kvApyantime januShi ko.api gatiM labheta | itthaM samarthanavidhiH paramAgamAnAM paryAyasUktividhayA nayanaM na~narthe || 14|| ekApavargasamaye jagato.apavargaH sarvApavargasamaye punarastasha~NkaH | IdR^igvidhaM kamapi pakShamihAvalambya sthAtuM sukhaM kShamamanena pathA pravR^ittaiH || 15|| abhyasya vedamavadhArya cha pUrvatantra\- mAlakShya shiShTacharitAni pR^ithagvidhAni | adhyApanAdibhiravApya dhanaM cha bhUri karmANi mAtaralasAH kathamAchareyuH || 16|| Ayasya tAvadapi karma karotu kashchi\- ttenApi mAtaradhikaM kimivAnubhAvyam | Aste sukhaM ya iha bhAratavarShasIma\- nyAste sa ki~nchidita uttarato.apasR^itya || 17|| karma tyajema yadi nUnamadhaH patema yadyAcharema na kadApi bhavaM tarema | karma tyajediti charediti cha pravR^ittAH bhAvena kena nigamA iti na pratImaH || 18|| karmaNyakarma\-vidhireSha yadAcharanti karmANi tattadanubandha\-jihAsayeti | satyaM tathApyabhinavo bhavitA na bandhaH prAchInabandhaharaNe ka ivAbhyupAyaH || 19|| prArabdhakarma kiyadArabhate kiyadvA prArapsyate kiyadidaM ka ivAvadhattAm | kAlaH kiyAniva mayA pratipAlanIyo yasya kShaNArdhamapi kalpashatatvameti || 20|| puMsaH kShaNArdhamapi saMsaraNAkShamasya sA~NkhyAdayaH saraNayo na vishanti karNam | sa~NkhyAya gA~NgasikatAH sakalAshcha sUkShmA bhu~NkShveti vAgiva mahAkShudhayArditasya || 21|| bhaktistu kA yadi bhavedratibhAvabheda\- statkevalAnvayitayA viphalaiva bhaktiH | prItistvayi trijagadAtmani kasya nAsti svAtmadruho na khalu santi janAstrilokyAm || 22|| AtmA samastajagatAM bhavatIti samya\- gvij~nAya yadvitanute tvayi bhAvabandham | sA bhaktirityabhimataM yadi siddhamiShTaM vyarthaM visheShyamalamastu visheShaNaM naH || 23|| svAtmetaratvamavadhArya paratvabud.hdhyA yatprIyate gurujaneShviva saiva bhaktiH | syAdetadevamiyameva tu me jihAsyA dvaitabhramAtkimadhikaM bhavabandhamUlam || 24|| sevaiva bhaktiriti karmapathapraveshaH sevyaprasAdaphalakA kila karmasevA | dhyAnapravAha iti chechChravaNAt tR^itIyaH prAgeva mAtarayamAkalito.abhyupAyaH || 25|| atraiva dAsyasi vimuktimathApi yAche mAtaH sharIrapatanaM maNikarNikAyAm | astu svakR^ityamanukampanamIshvarANAM dAsasya karmakarataiva tathA svakR^ityam || 26|| sadyo bhavetsukR^itinAmupadeshalAbhaH pApAtmanAM bahutithe samaye vyatIte | ityAdibhiH kila purANavachobhiramba vArANasImapi na yAchitumutsuko.asmi || 27|| AkrAntamantararibhiH madamatsarAdyaiH gAtraM valIpalita\-rogashatAnuviddham | dAraiH sutaishcha gR^ihamAvR^itamuttamarNaiH mAtaH kathaM bhavatu me manasaH prasAdaH || 28|| dhanyAH kati tribhuvane paramopabhAgyaM saMsArameva parameshvari bhAvayantaH | AbhAsarUpamavabodhamimaM sametya klishye kiyatkiyadahaM tvamunA bhavena || 29|| kA saMskR^itiH kimapachAra\-nibandhaneyaM kIdR^igvidhasya tava kiM kShatametayeti | prashne tu nAsmi kushalaH prativaktumeva khedastu me janani ko.apyayamevamAste || 30|| evaM gatasya mama sAmpratametadarha\- matredamaupayikamitthamidaM cha sAdhyam | asminpramANamidamityapi boddhumamba shaktirna me bhuvanasAkShiNi kiM karomi || 31|| na j~nAyate mama hitaM nitarAmupAyo dIno.asmi devi samayAcharaNAkShamo.asmi | tattvAmananyasharaNaH sharaNaM prapadye mInAkShi vishvajananIM jananIM mamaiva || 32|| ki~nchinmayA shrutiShu ki~nchidivAgameShu shAstreShu ki~nchidupadeshapatheShu ki~nchit | AghrAtamasti yadato bhavatIM varItuM goptrIti kAchidudapadyata buddhireShA || 33|| brahmaivamevamahameSha tadAptyupAya ityAgamArtha\-vidhurAH prathame dayArhAH | tvadrakShakatva\-guNamAtravido dvitIyA ityarthaye sadadhikAra\-nirUpaNAya || 34|| mAtaH karoShi mamatAM mayi yAvadISha\- ttAvadyate mama tataH kimivAsti sAdhyam | mAmitthamitthamupayu~NkShva na vismareti kiM svAminaM tvarayate kvachana svabhR^ityaH || 35|| tyAjyaM tyajAni vihitaM cha samAcharANi nityeShu shaktimanurudhya hu vartitavyam | tadbuddhishaktimanurudhya na kAryashakti\- mityetadeva tu shive vinivedayAmi || 36|| Atmaiva bhAra iti taM tvayi yo nidhatte so.a~NgAni kAni kalayatvalasaH prapatteH | vishvasya sAkShiNi vilakShaNalakShaNA yA visrambhasampadiyameva samastama~Ngam || 37|| tvatpreraNena miShataH shvasato.api mAtaH prAmAdike.api sati karmaNi me na doShaH | mAtraiva dattamashanaM grasataH sutasya ko nAma vakShyati shishoratibhuktidoSham || 38|| muktiM siShAdhayiShatAM nijayaiva bud.hdhyA prArabdhakarma bhavatu pratibandhahetuH | tvAmeva sAdhanatayApi samAshritAnAM tulyaM tadamba yadi kastava vIravAdaH || 39|| prArabdhakarma girije bhavadAshritAnA\- manyatra sa~Nkramaya nAshaya vA samUlam | martyAshcha khalvapi viShaM vapuShi prasaktaM sa~NkrAmayanti parato.api cha nAshayanti || 40|| tvaddarshanashravaNa\-vandanachintanAdi\- ShvakShANi devi viniyujya yathAdhikAram | rakShetyasa~Nkhya\-bhavasambhR^itayaiva maitryA rundhyAM yadi sthiramamUnyadhunaiva na syuH || 41|| trAtavya eSha iti chetkaruNA mayi syA\- ttrAyasva kiM sukR^itaduShkR^itachintayA me | kartuM jagattirayituM cha vishR^i~NkhalAyAH karmAnurodha iti kaM prati va~nchaneyam || 42|| tvayyarpitaM prathamamappaya\-yajvanaiva svAtmArpaNaM vidadhatA svakulaM samastam | kA tvaM maheshi kuladAsamupekShituM mAM ko vAnupAsitumahaM kuladevatAM tvAm || 43|| mauDhyAdahaM sharaNayAmi surAntaraM che\- tkiM tAvatA svamapi tasya bhavAmi mAtaH | aj~nAnataH paragR^ihaM pravishanparasya svatvaM prayAsyati pashuH kimu rAjakIyaH || 44|| AdhAya mUrdhani vR^ithaiva bharaM mahAntaM mUrkhA nimajjatha kathaM bhavasAgare.asmin | vinyasya bhAramakhilaM padayorjananyA visrabdhamuttarata palvalatulyamenam || 45|| kvedaM patiShyati vapuH kva tato nu gamyaM ko daNDayiShyati kiyantamanehasaM vA | kiM tasya santaraNa\-sAdhanamityanantA chintA sthitA tvayi shanairavatAritA sA || 46|| j~nAnaM disheyamuta tena vinoddhareyaM prArabdhamapyapalapeyamutAnurundhyAm | itthaM sakR^itprapadanaika\-vashaMvadAyA mAturmayi pravavR^ite mahatIha chintA || 47|| etajjaDAjaDa\-vivechanametadeva kShityAditatva\-parishodhanakaushalaM cha | j~nAnaM cha shaivamidamAgama\-koTilabhyaM mAturyada~Nghriyugale nihito mayAtmA || 48|| ShaTtriMshadAvaraNa\-madhyajuShi tvada~Nghrau hAlAsyanAthadayite nihito mayAtmA | bhUbhUtalatridivavartiShu kaH kShameta tachchakShuShApi nibhR^itena nirIkShituM mAm || 49|| bandhaM hariShyasi sukhaM vitariShyasIti nishchaprachaM nikhilamamba tadAsta eva | sampratyahaM tvayi nidhAya bharaM samastaM yannirvR^iNomi kimito.api mamApavarge || 50|| kAshyAM nipAtaya vapuH shvapachAlaye vA svargaM naya tvamapavargamadhogatiM vA | adyaiva vA kuru dayAM punarAyatau vA kaH sambhramo mama dhane dhaninaH pramANam || 51|| nAhaM sahe tava kathAshravaNAntarAyaM nAhaM sahe tava padArchanavichyutiM vA | mokShaM dishaitadaviruddhamidaM na chetsyA \- nnaivAstu mAtarapavargamahopasargaH || 52|| AchUDamAcharaNamamba tavAnuvAra\- mantaHsmaranbhuvanama~Ngalama~Ngama~Ngam | AnandasAgara\-tara~NgaparamparAbhi\- rAndolito na gaNayAmi gatAnyahAni || 53|| pAShANato.api kaThine shirasi shrutInAM prAyaH parikramavashAdiva pATalAbham | amba smareyamamR^itArNava\-mAthalabdha\- haiya~NgavIna\-sukumAramidaM padaM te || 54|| ye nAma santi katichidguravastrilokyAM teShAmapi svayamupetavatA gurutvam | pAdena mUrdhni vidhR^itena vayaM tavAmba saMsArasAgaramimaM sukhamuttarAmaH || 55| sAdhAraNe smarajaye niTilAkShisAdhye bhAgI shivo bhajatu nAma yashaH samagram | vAmA~Nghri\-mAtrakalite janani tvadIye kA vA prasaktirapi kAlajaye purAreH || 56|| syAtkomalaM yadi mano mama vishvamAta\- statpAdayormR^idulayostava pAdukA.astu | syAtkarkashaM yadi karagrahaNe purAre\- rashmAdhirohaNavidhau bhavatUpayogaH || 57|| prasnigdhamugdha\-ruchipAdatale bhavatyA lagnaM dR^iDhaM yadiha me hR^idayAravindam | eShaiva sAgrabhuvana\-dvishatIpatitva\- sAmrAjya\-sUchanakarI tava padmarekhA || 58|| aprAkR^itIM mR^idulatAmavichintya ki~nchi\- dAlambitAsi padayoH sudR^iDhaM mayA yat | tanme bhavArNava\-nimajjana\-kAtarasya mAtaH kShamasva madhureshvari bAlakR^ityam || 59|| yatrAnamanpashupatiH praNayAparAdhe mandaM kila spR^ishati chandrakalA~nchalena | puShpArchane.api mR^iditaM padayoryugaM ta\- nmAtastudanti na kathaM paruShA giro me || 60|| avyAja\-sundaramanuttaramaprameya\- maprAkR^itaM paramama~Ngalama~Nghripadmam | sandarshayedapi sakR^idbhavatI dayArdrA draShTAsmi kena tadahaM tu vilochanena || 61|| divyA dR^isho.api diviShadgrahaNochitAni vastUni kAmamavadhArayituM kShamante | tvanmAtravedyavibhave tava rUpadheye tvadbhAva eva sharaNaM parisheShito naH || 62|| asminmahatyanavadhau kila kAlachakre dhanyAstu ye katipaye shukayogimukhyAH | lInAstvada~Nghriyugale parishuddhasatvA\- stAnAtmanastava nakhAnavadhArayAmaH || 63|| A shaishavAnmamatayA kalitastvayAsA\- vAnR^iNyamamba tava labdhumanA mR^igA~NkaH | svAtmAnameva niyataM bahudhA vibhajya tvatpAdayorvinidadhe nakharApadeshAt || 64|| nAntaH praveshamayate kimapi shrutaM me nAstikyavAda\-shilayA pratirudhyamAnam | tatpAtayAmyahamimAM mahatImadhastA\- tpAdodakena kiyatA paradevatAyAH || 65|| sannAhibhiH yamabhaTaiH parivAryamANe mayyarbhake karuNayA svayamApatantyAH | AkarNayeyamapi nAma virAmakAle mAtastavA~Nghri\-maNinUpurashi~njitAni || 66|| brahmeshakeshava\-mukhairbahubhiH kumAraiH paryAyataH parigR^ihIta\-vimuktadesham | utsa~Ngamamba tava dAsyasi me kadA tvaM mAtR^ipriyaM kila jaDaM sutamAmananti || 67|| Urau shirastava niveshya dayAvitIrNa\- saMvyAnapallava\-samIravinItakhedam | atraiva janmani vibhoH paramopadesha\- mAkarNayeyamapi kiM maNikarNikAyAm || 68|| kA~nchIguNagrathita\-kA~nchanacheladR^ishya\- chaNDAtakAMshuka\-vibhAparabhAgashobhi | parya~NkamaNDala\-pariShkaraNaM purAre\- rdhyAyAmi te vipulamamba nitambabimbam || 69|| garbhe niveshya bhuvanAni chaturdashApi saMrakShituM kalitanishchitayA bhavatyA | prAkArameva rachitaM parito.api nUna\- mUhe suvarNamaya\-medurapaTTabandham || 70|| muktAshcha khalvapi yadi tripure bhavatyAH stanyAshayA stanataTaM na parityajanti | asmAkamudbhaTa\-bhavajvaratApitAnA\- mArdrIbhavan tu vadanAni kuto na hetoH || 71|| naShTopalabdhamadhigatya shishuM chirAnmAM vAtsalyavidrutahR^idaH paradevatAyAH | klidyatpayodhara\-viniHsR^itadugdhabindu\- niShyandapa~Nktiriva dIvyati hArayaShTiH || 72|| yattaddhanurjana\-manomayamaikShavaM te tasyAstu devi hR^idayaM mama mUladeshaH | chApAdhiropaNavidhau charaNA~nchalena sambhAvyate kila samAkramaNaM kadAchit || 73|| AsthAya dAruNataraM kamapi svabhAva\- matyantaduShkR^ita\-kR^itAmapi shikShaNAya | gR^ihNAsi sAyakapade kusumAnyamUni mAtaH suteShu mahatI kila rUkShateyam || 74|| pAshaM sR^iNiM cha karayostava bhAvayantaH saMstambhayanti vashayanti cha sarvalokAn | chApaM sharaM cha sakR^idamba tava smaranto bhUpAlatAM dadhati bhogapathAvatIrNAH || 75|| pAshA~Nkushau tava kare parichintya rAga\- dveShau jayanti paramArthavidastu dhanyAH | ekatra chApamitaratra sharaM cha matvA vyAvartayanti hR^idayaM viShayAndhakUpAt || 76|| utkrAntamAntaramidaM karaNaM janAnA\- mapyeti chandramiti hi shrutayo vadanti | AstAmidaM mama tu devi mano.adhunaiva lInaM dR^iDhaM vadanachandramasi tvadIye || 77|| vidyAtmano janani tAvakadantapa~Nkte\- rvaimalyamIdR^igiti varNayituM kShamaH kaH | tatsambhavA yadamalA vachasAM savitrI tanmUlakaM kaviyasho.api tatastarAM yat || 78|| svachChApi te vahati yatkila dantapa~NktiH svachChanda\-nirdalita\-dADima\-bIjashobhAm | tanme rajovyatikarAdhika\-pATalimni chitte paraM parichayAditi chintayAmi || 79|| ardhaM jitatripuramamba tava smitaM che\- dardhAntareNa cha tathA bhavitavyameva | tachchintaye janani kAraNasUkShmarUpa\- sthUlAtmaka\-tripurashAntikR^ite smitaM te || 80|| matkleshadarshana\-paridravadantara~Nga\- haiya~NgavIna\-parivAhanibhaM jananyAH | antastamopahamanusmaratAM janAnAM mandasmitaM bhuvanama~Ngalamastu bhUtyai || 81|| sAMsiddhikAnana\-saroruhadivyagandha\- sAndrIkR^itendu\-shakalAkalitAdhivAsam | tAmbUlasAramakhilAgama\-bodhasAraM mAtarvidhehi mama vaktra\-kalAchikAyAm || 82|| nAsAmaNistava shive chirasaMstavena pratyAhR^ite manasi bhAti tapodhanAnAm | aj~nAnasantati\-nishAtyayasUchanArthaM Avirbhavantyasura\-deshikatArakeva || 83|| tAmbUlagarbha\-pariphullakapolalakShya\- tATa~Nkamauktika\-maNipratibimbadambhAt | astadvaya\-vyatikarAmala\-satvamAdyaM varNaM bibharti jaThare tava vaktrabimbam || 84|| datte shriyaM bahuvidhAM kushalAni datte datte padaM surapaterapi lIlayaiva | IdR^igvidhAmba tava dR^iShTirito.adhikA vA nAdyApi karNamativartitumIshvarIyam || 85|| pAShANakUTakaThine janadurvigAhe vyarthaM mahatyupaniShadvipine pravR^ittA | sevyeta kena tava lochanachandrikeya\- menAM nipAtaya sakR^inmayi tapyamAne || 86|| kAmaM shivena shamitaM punarujjagAra dR^iShTistaveti kimiyaM janani stutiste | lIlAprasUta\-puruShArtha\-chatuShTayAyA\- stasyAH paraM tu sa bhavatyavayutyavAdaH || 87|| somo jagajjanayiteti yadAha vedo nedaM latAparamiti bhramitavyamAryaiH | yaH shaivavAmatanuvarti\-bhavaddR^igAtmA chandro jagatsR^ijati tatpara eSha vAdaH || 88|| sUchyagravadvasumatImaNuvachcha meruM dR^iShTiryadamba tava pashyati dAnashauNDA | dR^iShTAstvayA vayamapIha tataH smarAmo veshantameva bhavasAgaramuttara~Ngam || 89|| vANIniketanatayA ghanasAragaurAH kalhArakesararuchaH kamalAnuSha~NgAt | mAtarjayanti sharaNAgatalokacheto\- mAlinyamArjana\-vashAdasitAH kaTAkShAH || 90|| AkarNamullasati mAtarapA~Ngadeshe kAlA~njanena ghaTitA tava bhAti rekhA | shaivAla\-pa~Nktiriva santatanirjihAna\- kAruNyapUra\-padavIkalitAnubandhA || 91|| vishvaM sR^ijatyavati hanti cha yaH kaTAkSho vishvasyatAM kathamasau chapalasvabhAvaH | eSho.api yAmanusara.Nllabhate yashAMsi tAmeva vishvasimi devi tavAnukampAm || 92|| ardhaM kala~NkarahitA karuNaiva shambho\- rardhaM guNAstaditare sakalAH sametAH | ityamba samprati kila sphuritaM rahasyaM sampashyato mama bhavanmayamaishamardham || 93|| amba bhruvostava vicheShTitamapramattaM sampashyatAM nijanijArtha\-nideshahetoH | tanmUladeshanihitA nibhR^itA surANAM dR^iShTiH prayAti mR^iganAbhi\-visheShakatvam || 94|| sAraM kaNaM kaNamagharmaruchAM sahasrA\- tsa~NgR^ihya nirmitamidaM tava vaktrabimbam | tAvatsudhAkara\-kala~NkakulAni pashchA\- dekatra devi nihitAni kachApadeshAt || 95|| (pashchAdanyatra) vinyastamindramaNi\-kandalasundareShu kesheShu te sphaTikanirmalamindukhaNDam | AdhArasa~Ngati\-vashAdasitAyamAna\- mindIvarachChada\-vataMsadashAM bibharti || 96|| chintAmaNistribhuvaneshvari kaustubhashcha khyAtau maNI tava gR^ihA~NgaNakuTTimasthau | kiM ratnamanyadupalabhya kirITakoTiM vAchaspati\-prabhR^itayastava varNayantu || 97|| prAdurbhavattaraNi\-bimbashatAruNAni paryApta\-shItakiraNAyuta\-shItalAni | shR^i~NgArasAra\-parivAhamayAni mAta\- ra~NgAni ke.api charame januShi smaranti || 98|| pratyagraku~Nkuma\-rasAkalitA~NgarAgaM pratya~NgadattamaNi\-bhUShaNajAlaramyam | tAmbUlapUritamukhaM taruNenduchUDaM sarvAruNaM kimapi vastu mamAvirastu || 99|| ardhaM striyastribhuvane sacharAchare.asmi\- nnardhaM pumAMsa iti darshayituM bhavatyA | strIpuMsalakShaNamidaM vapurAdR^itaM ya\- ttenAsi devi viditA trijagachCharIrA || 100|| nirmAsi saMharasi nirvahasi trilokIM vR^ittAntametamapi vetti na vA maheshaH | tasyeshvarasya girije tava sAhacharyA\- jjAtaH shrutiShvapi jagajjanakatvavAdaH || 101|| sattAsyakhaNDasukha\-saMvidasi trilokI\- sargasthiti\-pratihatiShvapi nirvyapekShA | tvAmantareNa shiva ityavashiShyate ki\- mardhaM shivasya bhavatItyanabhij~navAdaH || 102|| nAsmin\-ravistapati nAtra vivAti vAto nAsya pravR^ittimapi veda jagatsamastam | antaHpuraM tadidamIdR^ishamantakAre\- rasmAdR^ishAstu sukhamatra charanti bAlAH || 103|| tvatsannidhAnarahito mama mAstu desha\- stvattattvabodharahitA mama mAstu vidyA | tvatpAdabhaktirahito mama mAstu vaMsha\- stvachchintayA virahitaM mama mAstu chAyuH || 104|| tvaM devi yAdR^igasi tAdR^igasi tvamIdR^i\- geveti vaktumapi boddhumapi kShamaH kaH | mAmeva tAvadavidannatipAmaro.ahaM mAtaH stutiM tvayi samarpayituM vilajje || 105|| kAchitkR^itA kR^itiriti tvayi sA.arpiteti kApi pramodakaNikA na mamAntara~Nge | mauDhyaM madIyamiha yadviditaM mamaiva kiM tvamba vishvasimi dInasharaNyatAM te || 106|| kAlAnapAsya viShuvAyana\-sa~NkramAdI\- nasta~Ngate himakare cha divAkare cha | amba smareyamapi te charaNAravinda\- mAnanda\-lakShaNamapAsta\-samastabhedam || 107|| chaturadhyAyIrUpaM kalahaMsa\-vya~njanaM jaganmAtuH | aparabrahmamayaM vapurantaH shashikhaNDa\-maNDanamupAse || 108|| || iti shrI nIlakaNThadIkShitavirachitaH shrIAnandasAgarastavaH sampUrNaH || ## Encoded by Sunder Hattangadi Proofread by Sunder Hattangadi and Rajani Arjun Shankar \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}