श्रीबालाकवचम् ३
अस्य श्रीबालात्रिपुरसुन्दरीकवचस्तोत्रमहामन्त्रस्य दक्षिणामूर्तिः
ऋषिः । पङ्क्तिश्छन्दः । बालात्रिपुरसुन्दरी देवता । ऐं बीजम् ।
क्लीं शक्तिः सौः कीलकम् । जपे विनियोगः । मूलेन कराङ्ग न्यासौ ।
दिग्बन्धः ध्यानं - ऐङ्कारासन इत्यादि सञ्चारिणीम् ॥ लमित्यादि ।
मन्दिरे सुखमासीनं भैरवं चन्द्रशेखरम् ।
बद्धाञ्जलिर्नमस्कृत्य परिपप्रच्छ पार्वती ॥ १॥
यदि प्रसन्नो देवेश यदिवाऽनुग्रहो मयि ।
बालायाः कवचं ब्रूहि सदा कल्याणसौख्यदम् ॥ २॥
शिव उवाच -
साधु साधु महेशानि सम्यक्सम्यक्च पृच्छसि ।
यत्प्रसादान्महेशानि लसत्त्रैलोक्यमुत्तमम् ॥ ३॥
ततश्चराचरं विश्वं यतो ब्रह्मादयोऽमराः ।
यद्भ्रूविलासवत्प्रीत्या सिद्धयस्त्वणिमादयः ॥ ४॥
तद्बालापरमेश्वर्याः कवचं सर्वसिद्धिदम् ॥
कथयिष्ये शृणुष्व त्वं सर्वसौभाग्यकारकम् ॥ ५॥
शिरो रक्षतु मे बाला ललाटे पातु सुन्दरी ।
कर्णौ श्रीः सर्वदा पातु नेत्रे कमलवासिनी ॥ ६॥
ओष्ठमध्ये विशालाक्षी जिह्वां पातु सरस्वती ।
मुखं मनोरमा पातु चिबुकं मे त्वचञ्चला ॥ ७॥
कण्ठं श्रीकालिका पातु बाहू रक्षतु चण्डिका ।
करौ षडक्षरी पातु हृदयं हरिवल्लभा ॥ ८॥
मातङ्गी पातु मे मध्यं भवानी जठरं मम ।
नाभिं श्रीभैरवी पातु गुह्यं कामेश्वरी तथा ॥ ९॥
कटिं पायात्कामधात्री जानुनी जगदीश्वरी ।
जङ्घे मे त्वरिता पातु जङ्घपाश्वेऽश्ववाहिनी ॥ १०॥
पर्वतस्था पातु पादौ अङ्गुली भूमिवासिनी ।
अग्रतस्त्रिपुरा पातु पृष्ठतो मम भैरवी ॥ ११॥
दक्षिणे सुन्दरी पातु वामे मङ्गलदायिनी ।
ऊर्ध्वं ज्योतिष्मती शक्तिः अधोऽनन्तस्वरूपिणी ॥ १२॥
सर्वशत्रुहरा दुर्गा पातु मे विजया रणे ।
गृहं रक्षेद्भद्रकाली वाचं वाग्वादिनी मम ॥ १३॥
ओष्ठौ मे मातृकाः सर्वाः सर्वकार्येषु सर्वदा ।
इत्येतत्कवचं प्रोक्तं यः पठेत्सुसमाहितः ॥ १४॥
दिवा वा यदि वा रात्रौ त्रिसन्ध्यं भक्तिमान्नरः ।
ज्ञात्वैतत्कवचं पुण्यं सर्वान्कामानवाप्नुयात् ॥ १५॥
इति श्रीबालाकवचं (३) सम्पूर्णम् ।
Proofread by PSA Easwaran