% Text title            : bhUstutiH 1
% File name             : bhUstutiH.itx
% Category              : devii, otherforms, devI, vedAnta-deshika
% Location              : doc\_devii
% Author                : vedAntadeshika
% Proofread by          : PSA Easwaran, Nivedita R.
% Latest update         : October 16, 2022
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Bhustutih ..}##
\itxtitle{.. bhUstutiH ..}##\endtitles ##
vedAntadeshikakR^itA |
sa~NkalpakalpalatikAmavadhiM kShamAyAH
      svechChAvarAhamahiShIM sulabhAnukampAm |
vishvasya mAtaramaki~nchanakAmadhenuM
      vishvambharAmasharaNaH sharaNaM prapadye || 1||
tvAM vyAhR^itiH prathamataH praNavaH priyaM te
      saMvedayatyakhilamantragaNastameva |
itthaM pratItavibhavAmitareShvidAnIM
      stotuM yathAvadavane ka ivArhati tvAm || 2||
nityaM hitAhitaviparyayabaddhabhAve
      tvadvIkShaNaikavinivartyabahuvyapAye |
mugdhAkSharairakhiladhAriNi modamAnA
      mAtaH stanandhayadhiyaM mayi vartayethAH || 3||
sa~Nkalpaki~NkaracharAcharachakravAlaM
      sarvAtishAyinamanantashayasya puMsaH |
bhUmAnamAtmavibhavaiH punaruktayantI
      vAchAmabhUmirapi bhUmirasi tvamekA || 4||
vedhastR^iNAvadhi vihAraparichChadaM te
      vishvaM charAcharatayA vyatibhidyamAnam |
amba tvadAshritatayA paripoShayantI
      vishvambharasya dayitA.asi tadekanAmA || 5||
sarvaMsahetyavanirityachaleti mAtaH
      vishvambhareti vipuleti vasundhareti |
anyAni chAnyavimukhAnyabhidhAnavR^ittyA
      nAmAnyamUni kathayanti tavAnubhAvam || 6||
tApAn kShipan prasavitA sumanogaNAnAM
      prachChAyashItalatalaH pradishan phalAni |
tvatsa~NgamAdbhavati mAdhavi labdhapoShaH
      shAkhAshatairadhigato harichandano.asau || 7||
smereNa vardhitarasatya mukhendunA te
      niShpandatAM vijahato nijayA prakR^ityA |
vishrAntibhUmirasi tattvatara~Ngapa~NkteH
      veleva viShNujaladherapR^ithagbhavantI || 8||
svAbhAvike vasumati shrutibhirvibhAvye
      patyurmahimni bhavatIM pratipannavAsAm |
sha~Nke vimAnavahanapratimAsamAnAH
      stamberamaprabhR^itayo.api vahanti sattvAH || 9||
sambhAvayan madhuripuH praNayAnurodhAt
      vakShaHsthalena varuNAlayarAjakanyAm |
vishvambhare bahumukhapratipannabhogaH
      sheShAtmanA tu bhavatIM shirasA dadhAti || 10||
krIDAvarAhadayite kR^itinaH kShitIndrAH
      sa~Nkrandanastaditare.api dishAmadhIshAH |
Amodayanti bhuvanAnyalikAshritAnAM
      amba tvada~NghrirajasAM pariNAmabhedaiH || 11||
bhUteShu yattvadabhimAnavisheShapAtraM
      poShaM tadeva bhajatIti vibhAvayantaH |
bhUtaM prabhUtaguNapa~nchakamAdyametat
      prAyo nidarshanatayA pratipAdayanti || 12||
kAntastavaiSha karuNAjaladhiH prajAnAM
      Aj~nAtila~NghanavashAdupajAtaroShaH |
ahnAya vishvajanani kShamayA bhavatyA
      sarvAvagAhanasahAmupayAtyavasthAm || 13||
AshvAsanAya jagatAM puruShe parasmin
      ApannarakShaNadashAmabhinetukAme |
antarhitetaraguNAdabalAsvabhAvAt
      audanvate payasi majjanamabhyanaiShIH || 14||
pUrvaM varAhavapuShA puruShottamena
      prItena bhogisadane samudIkShitAyAH |
pAdAhatAH pralayavAridhayastavAsan
      udvAhama~NgalavidheruchitA mR^ida~NgAH || 15||
vyomAtila~Nghini vibhoH pralayAmburAshau
      veshantalesha iva mAtumashakyamUrteH |
sadyaH samudravasane sarasairakArShIH
      AnandasAgaramapAramapA~NgapAtaiH || 16||
daMShTrAvidAritamahAsurashoNitA~NkaiH
      a~NgaiH priyastava dadhe parirambhalIlAm |
sA te payodhijalakelisamutthitAyAH
      sairandhrikeva vidadhe navama~NgarAgam || 17||
anyonyasaMvalanajR^imbhitatUryaghoShaiH
      saMvartasindhusalilairvihitAbhiShekA |
ekAtapatrayasi vishvamidaM guNaiH svaiH
      adhyAsya bharturadhikonnatamaMsapITham || 18||
bhartustamAlaruchire bhujamadhyabhAge
      paryAyamauktikavatI pR^iShataiH payodheH |
tApAnubandhashamanI jagatAM trayANAM
      tArApathe sphurasi tArakitA nisheva || 19||
AsaktavAsavasharAsanapallavaistvAM
      saMvR^iddhaye shubhataTidguNajAlaramyaiH |
deveshadivyamahiShIM dhR^itasindhutoyaiH
      jImUtaratnakalashairabhiShi~nchati dyauH || 20||
AvirmadairamaradantibhiruhyamAnAM
      ratnAkareNa ruchirAM rashanAguNena |
mAtastrilokajananIM vanamAlinIM tvAM
      mAyAvarAhamahiShImavayanti santaH || 21||
niShkaNTakaprashamayoganiShevaNIyAM
      ChAyAvisheShaparibhUtasamastatApAm |
svargApavargasaraNiM bhavatImushanti
      svachChandasUkaravadhUmavadhUtapa~NkAm || 22||
gaNDojjvalAM gahanakuntaladarshanIyAM
      shailastanIM taralanirjharalambahArAm |
shyAmAM svatastriyugasUkaragehini tvaM
      vyaktiM samudravasanAmubhayIM bibharShi || 23||
niHsaMshayairnigamasImani viShNupatni
      prakhyApitaM bhR^igumukhairmunibhiH pratItaiH |
pashyantyananyaparadhIrasasaMstutena
      santaH samAdhinayanena tavAnubhAvam || 24||
sa~nchoditA karuNayA chaturaH pumarthAn
      vyAtanvatI vividhamantragaNopagItA |
sa~nchintyase vasumati sthirabhaktibandhaiH
      antarbahishcha bahudhA praNidhAnadakShaiH || 25||
krIDAgR^ihItakamalAdivisheShachihnAM
      vishrANitAbhayakarAM vasudhe sabhUtim |
daurgatyadurviShavinAshasudhAnadIM tvAM
      sa~nchintayan hi labhate dhanadAdhikAram || 26||
udvelakalmaShaparamparitAdamarShAt
      uttaMsitena harima~njalinA.apyadhR^iShyam |
Akasmiko.ayamadhigamyayati prajAnAM
      amba tvadIyakaruNApariNAma eva || 27||
pratyekamabdaniyutairapi durvyapohAt
      prApte vipAkasamaye janitAnutApAt |
nityAparAdhanivahAchchakitasya jantoH
      gantuM mukundacharaNau sharaNaM kShame tvam || 28||
trANAbhisandhi subhage.api sadA mukunde
      saMsAratantravahanena vilambamAne |
rakShAvidhau tanubhR^itAmanaghAnukampA
      mAtaH svayaM vitanuShe mahatImapekShAm || 29||
dharmadruhaM sakaladuShkR^itisArvabhaumaM
      AtmAnabhij~namanutApalavojjhitaM mAm |
vaitAnasUkarapateshcharaNAravinde
      sarvaMsahe nanu samarpayituM kShamA tvam || 30||
tApatrayIM niravadhiM bhavatIdayArdrAH
      saMsAragharmajanitAM sapadi kShipantaH |
mAtarbhajantu madhurAmR^itavarShamaitrIM
      mAyAvarAhadayite mayi te kaTAkShAH || 31||
patyurdakShiNapANipa~NkajapuTe vinyastapAdAmbujA
      vAmaM pannagasArvabhaumasadR^ishaM parya~NkayantI bhujam |
potrasparshalasatkapolaphalakA phullAravindekShaNA
      sA me puShyatu ma~NgalAnyanudinaM sarvANi sarvaMsahA || 32||
asyeshAnA jagata iti yA shrUyate viShNupatnI
      tasyAH stotraM virachitamidaM ve~NkaTeshena bhaktyA |
shraddhAbhaktiprachayaguruNA chetasA saMstuvAno
      yadyatkAmaH sapadi labhate tatra tatra pratiShThAm || 33||

iti vedAntadeshikakR^itA bhUstutiH samAptA |

##
Proofread by PSA Easwaran, Nivedita R

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}