% Text title            : bhuvaneshvarIstotram 2 vedagarbhaM
% File name             : bhuvaneshvarIstotramvedagarbhaM.itx
% Category              : devii, dashamahAvidyA, devI
% Location              : doc\_devii
% Author                : shrIpRithvIdharAchArya
% Proofread by          : PSA Easwaran psaeaswaran at gmail.com
% Description-comments  : Brihatstotraratnakara 2, Narayana Ram Acharya, Nirnayasagar, stotrasankhyA 225-425, shrIbhuvaneshvarI varivasyA
% Latest update         : July 28, 2018
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Vedagarbham Shri Bhuvaneshvari Stotram or Shri Bhuvaneshvari MahastotraM ..}##
\itxtitle{.. vedagarbhaM shrIbhuvaneshvarIstotram athavA shrIbhuvaneshvarImahAstotram ..}##\endtitles ##

shrIgaNeshAya namaH ||
dhyAnam \-
OM cha~nchanmauktikahemamaNDanayutA mAtA.atiraktAmbarA
tanva~NgI nayanatrayAtiruchirA bAlArkavadbhAsurA |
yA divyA~NkushapAshabhUShitakarA devI sadA bhItihA
chittasthA bhuvaneshvarI bhavatu naH seyaM mudaH sarvadA ||
karNasvarNavilolakuDaladharAmApInavakShoruhAM
muktAhAravibhUShaNAM parilasaddhammillasanmallikAm |
lIlAlolitalochanAM shashimukhImAbaddhakA~nchIsrajaM
dIvyantIM bhuvaneshvarImanudinaM vandAmahe mAtaram ||

aindavyA kalayAvataMsitashirovistArinAdAtmakaM
tadrUpaM janani smarAmi paramaM sanmAtramekaM tava |
yatrodeti parAbhidhA bhagavatI bhAsAM hi tAsAM padaM
pashyantI tanumadhyamA viharati svairaM cha sA vaikharI || 1||
AdikShAntavilAsalAlasatayA tAsAM turIyA tu yA
kroDIkR^itya jagattrayaM vijayate vedAdividyAmayI |
tAM vAchaM mayi samprasAdaya sudhAkallolakolAhala\-
krIDAkarNanavarNanIyakavitAsAmrAjyasiddhipradAm || 2||
kalpAdau kamalAsano.api kalayA viddhaH kayAchitkila
tvAM dhyAtvA~NkurayA~nchakAra chaturo vedAMshcha vidyAshcha tAH |
tanmAtarlalite prasIda saralaM sArasvataM dehi me
yasyAmodamudIrayanti pulakairantargatA devatAH || 3||
mAtardehabhR^itAmaho dhR^itimayI nAdaikarekhAmayI
sA tvaM prANamayI hutAshanamayI bindupratiShThAmayI |
tena tvAM bhuvaneshvarIM vijayinIM dhyAyAmi jAyAM vibho\-
stvatkAruNyavikAshipuNyamatayaH khelantu me sUktayaH || 4||
tvAmashvatthadalAnukAramadhurAmAdhArabaddhodarAM
saMseve bhuvaneshvarImanudinaM vAgdevatAmeva tAm |
tanme shAradakaumudIparichayoda~nchatsudhAsAgara\-
svairojjAgaravIchivibhramajito dIvyantu divyA giraH || 5||
lekhaprastutavedyavastusurabhishrIpustakottaMsito
mAtaH svastikR^idastu me tava karo vAmo.abhirAmaH shriyA |
sadyo vidrumakandalIsaralatAsandohasAndrA~NgulirmudrAM
bodhamayIM dadhattadaparo.apyAstAmapAstabhramaH || 6||
mAtaH pAtakajAlamUladalanakrIDAkaThorA dR^ishaH
kAruNyAmR^itakomalAstava mayi sphUrjantu siddhyarjitAH |
AbhiH svAbhimataprabandhalaharIsAkUtakautUhalA.a\-
.achAntasvAntachaturmukhochitaguNodgArAM kariShye giram || 7||
tvAmAdhArachaturdalAmbujagatAM vAgbIjagarbhe yaje
pratyAvR^ittibhirAdibhiH kusumitAM mAyAlatAmunnatAm |
chUDAmUlapavitrapatrakamalapre~NkholakhelatyudhA\-
kallolAsu kuchakracha~NkramachamatkAraikalokottarAm || 8||
so.ahaM tvatkaruNAkaTAkShasharaNaH pa~nchAdhvasa~nchArataH
pratyAhR^itya mano vasAmi rasanAli~NgaM mamAli~Ngatu |
shrIsarvaj~navibhUShaNIkR^itakalAniHsyandramAnAmR^ita\-
svachChandasphaTikAdrisAndritapayaH shobhAvatI bhAratI || 9||
mAtarmAtR^ikayA vidarbhitamidaM garbhIkR^itAnAhata\-
svachChandradhvanipeyamadhvanirataM chandrArkanidrAgirau |
saMseve viparItarItirachanochchArAdakArAvadhi\-
svAdhInAmR^itasindhubandhuramaho mAyAmayaM te mahaH || 10||
tasmAnnandanachAruchandanataruchChAyAsu puppAsava\-
svairAsvAdanamodamAnamanasAmuddAmavAmabhruvAm |
vINAsa~Ngitara~NgitasvarachamatkAro.api sArojjhito
yena syAdiha dehi me tadabhitaH sa~nchAri sArasvatam || 11||
AdhAre hR^idaye shikhAparisare sandhAya medhAmayIM
tredhAbIjatanUmanUnakaruNApIyUShakallolinIm |
tvAM mAtarjapato nira~NkushanijAdvaitAmR^itAsvAdana\-
praj~nAmbhashchulukaiH sphurantu pulakaira~NgAni tu~NgAni me || 12||
vANIbIjamidaM japAmi paramaM tatkAmarAjAbhidhaM
mAtaH sAntaparaM visargasahitaukArottaraM tena me |
dIrghAndolitamaulikIlitamaNiprArabdhanIrAjanaidhIraiH
pItarasA nirantaramasau vAgjR^ibhatAmadbhutA || 13||
chUDAchandrakalAnirataragalatpIyUShabindushriyA
sandehochitamakShasUtravalayaM yA bibhratI nirbharam |
antarmantramayaM svameva japasi pratyakShavR^ittyakSharaM
sA tvaM dakShiNapANinAmba vitara shreyAMsi bhUyAMsi me || 14||
baddhvA svastikamAsanaM sitaruchichChedAvadAtachChavi\-
shreNishrIsubhagaM bhaviShNusatatavyAjR^imbhamANe.ambuje |
dIvyantImadhivAmajAnu ruchiranyastena hastena tAM
nityaM pustakadhAraNapraNayinIM seve girAmIshvarIm || 15||
tanme vishvapathInapInavilasanniHsImasArasvata\-
srotovIchivichitrabha~NgisubhagA vibhrAjatAM bhAratI |
yAmAkarNya vighUrNamAnamanasaH pre~NkholitaimIlibhi\-
rmIladbhirnayanA~nchalaiH sumanaso nindeyurindoH kalAm || 16||
Adau vAgbhavamindubindumadhuraM jhAnte cha kAmAtmakaM
yogAnte kaShayostR^itIyamiti te bIjatrayaM dhyAyatAm |
sArdhaM mAtR^ikayA vilomaviShamaM sandhAya bandhachChidA
vAchAntargatayA maheshvari mayA mAtrAshataM japyate || 17||
tatsArasvatasArvabhaumapadavI sadyo mama dyotatAM
yatrAj~nAvihitairmahAkavishataiH sphItAM giraM chumbatAm |
chaitronmIlitakelikokilakuhUkArAvatAra~nchita\-
shlAghAsa~nchitapa~nchamashrutisamAhAro.api bhAropamaH || 18||
vAgbIjaM bhuvaneshvarIM vada vadetyuchchArya vAgvAdini
svAhAvarNavishIrNapAtakabharAM dhyAyAmi nityAM giram |
vINApustakamakShasUtravalayaM vyAjR^imbhamambhoruhaM
bibhrANAmaruNAshubhiH karatalairAvirbhavadvibhramAm || 19||
taM mAtaH kR^ipayA tara~NgayatarAM vidyAdhipatyaM mayi
jyotsnAsaurabhachaurakIrtikavitAsevyaikasiMhAsanam |
kAlAj~nAdishivAvasAnabhavanaprAgbhArakukShimbhari
praj~nAmbhaHparipAkapIvaraparAnandapratiShThAspadam || 20||
lekhAbhistuhinadyuteriva kR^itaM vAgbIjamuchchaiH sphura\-
ttArAkArakarAlabindu parito mAyAtridhA.a.aveShTitam |
pUrNendorudare tadetadakhilaM pIyUShagaurAkSharaM
srotaHsambhramasambhR^itaM smarati yo jihvA~nchale nishchalaH || 21||
tasya tvatkaruNAkaTAkShakaNikAsa~NkrAntimAtrAdapi
svAnte shAntimupaiti dIrghajaDatA jAgradvikArAgraNIH |
tasmAdAshu jagattrayAdbhutarasAdvaitapratItipradaM
saurabhyaM paramabhyudeti va vanAmbhoje girAM vibhramaiH || 22||
Adyo maulirathAparo mukhamiI netre cha karNAvuU
nAsAvaMshapuTe R^iRRI tadanujau varNau kapoladvayam |
dantAshchordhvamadhastathoShThayugalaM sandhyakSharANi kramA\-
jjihvAmUlamudagrabindurapi cha grIvA visargI svaraH || 23||
kAdirdakShiNato bhujastadaparo vargashcha vAmo bhuja\-
ShThAdistAdiranukrameNa charaNau kukShidvayaM te paphau |
vaMshaH pR^iShThabhavo.atha nAbhihR^idaye bAditrayaM dhAtavo
yAdyAH sapta samIraNashcha saparaH kShaH krodha ityambike || 24||
evaM varNamayaM vapustava shive lokatrayavyApakaM
yo.ahambhAvanayA bhajatyavayave.apyAropitairakSharaiH |
mUrtIbhUya dinAvasAnakamalAkAraiH shiraHshAyibhistaM
vidyAH samupAsate karatalairdR^iShTiprasAdotsukAH || 25||
ye jAnanti yajanti santatamabhidhyAyanti gAyanti vA
teShAmAsyamupAsyate mR^idupadanyAsairvilAsairgirAm |
ki~ncha krIDati bhUrbhuvaHsvarabhitaH shrIchandanasyandinI
kIrtiH kArtikarAtrikairavasamA saubhAgyashobhAkarI || 26||
mAyAbIjavidarbhitaM punaridaM shrIkUrmachakroditaM
dIpAmnAyavido japanti khalu ye teShAM narendrAH sadA |
sevante charaNau kirITavalabhIvishrAntaratnA~Nkura\-
jyotsnAmeduramedinItalarajomishrA~NgarAgashriyaH || 27||
shrIbIjaM sakalAkSharAdiShu punaH krodhAkSharAnte bhavedevaM
yo bhajate.amba te tanumimAM tasyAgrato jAgratI |
lakShmIH sinduradAnagandhalaharIlolAndhapuShpandhaya\-
shreNIbandhurashR^i~NkhalAniyamitevApaiti naiva kvachit || 28||
yastvAM vidrumapallavadravamayIM lekhAmivAlohitA\-
mAtmAnaM paritaH sphurattrivalayAM mAyAmabhidhyAyati |
tasmai ninditavandanendukadalIkAntArahArasrajo
niHshvAsabhramabAShpadAhagahanA mUrChanti tAstAH striyaH || 29||
mAtaH shrIbhagamAlinItyabhidhayA divyAgamottaMsitAM
tvAmAnandamayImanusmarati yastaM nAma vAmabhruvaH |
bAhusvastikapIDitaiH stanataTairdainyA~nchitaishchATubhi\-
rnIrandhraiH pulakA~NkitairmukulitairdhyAyanti netrA~nchalaiH || 30||
yastvAM dhyAyati rAgasAgarataratsindUranaukAntara\-
svairojjAgarapadmarAganalinIpuShpAsanAdhyAsinIm |
bAlAdityasapatnaratnarachitapratya~NgabhUShAruchi\-
shreNIsammilitA~NgarAgavasanAstasya smarantya~NganAH || 31||
karpUraM kumudAkaraM kamalinIpatraM kalAkaushalaM
kUjatkokilakAminIkulakuhUkallolakolAhalam |
sha~Nkante pralayAnalaM smaramahApasmAravegAturAH
kampante nipatanti hanta na giraM mu~nchanti shochanti cha || 32||
shrImR^ityu~njayanAmadheyabhagavachchaitanyachandrAtmike
hrI~NkAri prathamAtamAMsi dalaya tvaM haMsasa~njIvini |
jIvaM prANavijR^imbhamANahR^idayagranthisthitaM me kuru
tvAM seve nijabodhalAbharabhasA svAhAbhujAmIshvarIm || 33||
evaM tvAmamR^iteshvarImanudinaM rAkAnishAkAmukasyAntaH
santatabhAsamAnavapuShaM sAkShAdyajante tu ye |
te mR^ityoH kavalIkR^itatribhuvanA bhogasya maulau padaM
datvA bhogamahodadhau niravadhi krIDanti taistaiH sukhaiH || 34||
jAgradvodhasudhAmayUkhanichayairAplAvya sarvA disho
yasyAH kApi kalA kala~NkarahitA ShaTchakramAkrAmati |
dainyadhvAntavidAraNaikachaturA vAchaM parAM tanvatI
sA nityA bhuvaneshvarI viharatAM haMsIva manmAnase || 35||
tvaM mAtApitarau tvameva suhR^idastva bhrAtarastvaM sakhA
tvaM vidyA tvamudArakIrticharitaM tvaM bhAgyamatyadbhutam |
kiM bhUyaH sakalaM tvamIhitamiti j~nAtvA kR^ipAkomale
shrIvishveshvari samprasIda sharaNaM mAtaH paraM nAsti me || 36||
shrIsiddhanAtha iti ko.api yuge chaturthe
prAdurbabhUva karuNAvaruNAlayo.asmin |
shrIshambhurityabhidhayA sa mayi prasannaM
chetashchakAra sakalAgamachakravartI || 37||
tasyAj~nayA pariNatAnvayasiddhvavidyA\-
bhedAspadaiH stutipadairvachasAM vilAsaiH |
tasmAdanena bhuvaneshvari vedagarbhaM
sadyaH prasIda vadane mama sannidhehi || 38||
yeShAM paraM na kuladaivatamambike tvaM
teShAM girA mama giro na bhavantu mishrAH |
taistu kShaNaM parichite viShaye.api vAso
mA bhUtkadAchiditi santatamarthaye tvAm || 39||
shrIshambhunAtha karuNAkara siddhanAtha
shrIsiddhanAtha karuNAkara shambhunAtha |
sarvAparAdhamaline.api mayi prasannaM
chetaH kuruShva sharaNaM mama nAnyadasti || 40||
itthaM pratikShaNamudashruvilochanasya
pR^ithvIdharasya purataH sphuTamAvirAsIt |
datvA varaM bhagavatI hR^idayaM praviShTA
shAstraiH svayaM navanavaishcha mukhe.avatIrNA || 41||
vAksiddhimevamatulAmavalokya nAthaH
shrIshambhurasya mahatImapi tAM pratiShThAm |
svasminpade tribhuvanAgamavandyavidyA\-
siMhAsanaikaruchire suchiraM chakAra || 42||
bhUmau shayyA vachasi niyamaH kAminIbhyo nivR^ittiH
prAtarjAtIviTapasamidhA dantajihvAvishuddhiH |
patrAvalyAM madhuramashanaM brahmavR^ikShasya puShpaiH
pUjAhomau kusumavasanAlepanAnyujjvalAni || 43||
itthaM mAsatrayamavikalaM yo vratasthaH prabhAte
madhyAhne vA.astamitasamaye kIrtayedekachittaH |
tasyollAsaiH sakalabhuvanAshcharyabhUtaiH prabhUtairvidyAH
sarvAH sapadi vadane shambhunAthaprasAdAt || 44||
vratena hIno.apyanavAptamantraH shraddhAvishuddho.anudinaM japedyaH |
tasyApi varShAdanavadyasadyaH kavitvahR^idyAH prabhavanti vidyAH || 45||
ko.apyachintyaprabhAvo.asya stotrasya pratyayAvahaH |
shrIshambhorAj~nayA sarvAH siddhayo.asminpratiShThitAH || 46||

iti shrI sakalAgamAchAryachakravartishrIpR^ithvIdharAchArya virachitaM
vedagarbhaM shrIbhuvaneshvarIstotraM athavA
shrIbhuvaneshvarImahAstotraM sampUrNam |

##
Proofread by PSA Easwaran psaeaswaran at gmail.com

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}