Shri Devi Mangala Ashtakam

श्रीदेवी मङ्गलाष्टकम्

कल्याणी कमनीयकान्तिरुचिरा कञ्जाक्षसंसेविता ब्रह्मेन्द्राद्यखिलामरार्चितपदा ब्राह्मी रमा सेविता । रत्नालङ्कृतसिंहपीठनिलया श्रीराजराजेश्वरी चिद्रूपि परदेवताभगवति कुर्यात्सदा मङ्गलम् ॥ १॥ श्रीविश्वेश्वरवामभागनिलया श्रीभारती सेविता विश्वस्तुत्यमहाप्रभावमहिता विष्ण्विन्द्रसम्पूजिता । विश्वसृष्टिविनाशपालनकरी विश्वान्नदानोद्यता श्रीकाशीनगराधिराजजननी कुर्यात्सदा मङ्गलम् ॥ २॥ श्रीदुग्दाम्बुधि वंशपावनकरी श्रीविष्णु सम्मोहिनि ब्रह्मेन्द्राद्यमरार्चिताङ्घ्रियुगला ब्रह्माण्डदीपाङ्कुरा । दासीभूतसमस्तदेववनिता दारिद्र्यविध्वंसिनि श्रीमाताजननीसमस्तजगतां कुर्यात्सदा मङ्गलम् ॥ ३॥ बालापालितभक्तकोटिरनघा फालाक्षसंसेविता ब्रह्मेन्द्रादि समस्तलोकजननी बालार्ककान्त्युज्वला । सम्फ्रल्लाब्जनिवासिनी शुभमयी ह्रीङ्कारतत्त्वात्मिका कल्याणीजगदीश्वरी भगवती कुर्यात्सदा मङ्गलम् ॥ ४॥ ईशानी भुवनेश्वरी च विमला ईशत्वसन्धायिनी गर्जन्माहिषचण्डमुण्डदमनी गम्भीरमुद्राञ्चिता । रुद्राणि रुधिरारुणोग्रवदना लोकैकरक्षाकरी श्रीदुर्गाशुभदामहार्तिदमनी कुर्यात्सदा मङ्गलम् ॥ ५॥ श्रीशैलभ्रमराम्बिका ष्रितजगत्सक्षोभविद्राविणी श्रीमल्लीश्वरकल्पवृक्षलतिका श्रेयोर्थचिन्तामणिः । दुर्गर्वरान्धमनोविमोहनकरी दुर्दैत्यसंहारिणी मोक्षद्वारकवाटिभेदनकरी कुर्यात्सदा मङ्गलम् ॥ ६॥ वाग्देवी चतुरास्य मन्दिरकृतावासमहादेवता दिव्यच्छारदचन्द्रिका समतनुर्धीजाड्यनिर्मूलिनी । अज्ञानान्धतमिस्रपाटनकरी विज्ञानसम्पत्करी ज्ञानब्रह्ममयी परात्परतरा कुर्यात्सदा मङ्गलम् ॥ ७॥ यासृष्टिं विदधाति पालयतिचाप्यन्तं विधत्तेस्सया याब्रह्मादि पिपीलिकान्तजननी सर्वेश्वरीयाद्वयम् । यालोकोऽस्ति चराचरेऽति गहना व्यक्तात्मनापि पृथक् साऽरूपा बहुनामरूपलसिता कुर्यात्सदा मङ्गलम् ॥ ८॥ इति श्रीएदेवी मङ्गलाष्टकं सम्पूर्णम् । Proofread by Vani V.