दुर्गादेवी-दशकम्
जय महेश्वरी विश्व-तारिणी
त्वमसि दुर्गते-र्ध्वंसकारिणी ।
कलुष-हारिणी दैत्यदारिणी
जय पराम्बिके ! धर्मधारिणी ॥ १॥
त्वमसि भारती भक्तवत्सला
जयसि पार्वती सर्व-पुष्कला ।
त्वमसि वैष्णवी जिष्णु-वन्दिता
वितर सन्मतिं त्वं महोर्जिता ॥ २॥
भगवती शिवा त्वं त्रिशूलिनी
महिषमर्दिनी सिंह-वाहिनी ।
जयसि भैरवी भूरि-विक्रमा
सुकरुणामयी त्वं मनोरमा ॥ ३॥
वृजिन-भञ्जिनी मञ्जुलानना
सुजन-रञ्जिनी कञ्ज-लोचना ।
जगति पूजिता गर्व-गञ्जिनी
भवतु ते कृपा शान्ति-शिञ्जिनी ॥ ४॥
जयसि पालिका पुण्य-सत्कृताम्,
त्वमसि कालिका घोर-दुष्कृताम् ।
जयसि चण्डिका चण्ड-मुण्डहा
त्वमिह शाम्भवी दम्भ-दर्पहा ॥ ५॥
धरणि-शोधने त्वं धुरन्धरा
तव शुभागमे शोभिता धरा ।
अघ-विघातिनी राघवार्चिता
भुवि विभासि वै दिव्यभूषिता ॥ ६॥
अहमिकाङ्किते मामकान्तरे
दुरित-शङ्किते पङ्किलोदरे ।
भवतु ते दया-वारि-सेचनम्,
जननि ! मार्जनं भक्ति-सर्जनम् ॥ ७॥
हर हरप्रिये ! दुःखमापदम्,
वितर सौभगं नौमि ते पदम् ।
अभयदायकं नाम ते वरम्,
दशभुजे ! भजे देवि ! सादरम् ॥ ८॥
त्वमसि पावनी पर्व तावकम्,
दशहरास्ति वै स्वस्ति-भावकम् ।
गिरिश-सङ्गिनी गौरि ! मङ्गला
कुरु पदार्पणं दीप्तमुज्ज्वला ॥ ९॥
शरणवत्सले ! शारदोत्सवे
स्मरणमेव ते तापहं भवे ।
तव शुभास्पदे भास्वरे पदे
प्रणतिरस्तु मे देवि ! शं-प्रदे ॥ १०॥
(इति श्रीहरेकृष्णमेहेर-प्रणीतं दुर्गादेवी-दशकं सम्पूर्णम् ।)
(छन्दोमञ्जरी-वर्णिता इन्दिरा इति छन्दसा विरचितम् ।
भागवत-``गोपीगीतम्'' अनेन छन्दसा प्रणीतमस्ति ।)
-- रचयिता : डाॅ हरेकृष्ण-मेहेरः
Copyright Dr.Harekrishna Meher