गङ्गाष्टकम् १०
श्रीगणेशाय नमः ।
गिरिराजसुतां वितुलां विततां त्रिदशैर्महितां वियतः पतिताम् ।
कलुषै रहितां नरदेवहितां प्रणमामि सितां वहुसत्त्वयुताम् ॥ १॥
अतिपूतगतामृषिराजनतां भुवनप्रथितामभिजातचिताम् ।
मुनिमानिनुतां मनुजैरमितां प्रणमामि सितां मुनिवक्रमिताम् ॥ २॥
शिवशीर्षगतां कलनादयुतां भुजगेन नुतामजविष्णुहिताम् ।
अविगीतमतां कृतसिन्धुरतां प्रणमाम्यमृतां हरिपादमृताम् ॥ ३॥
जननीविनतां सुरहस्तिगतां दनुजैरजितां तपसा विजिताम् ।
जलदानरतां दयया विदितां प्रणमाम्यमृतां बहुभाग्ययुताम् ॥ ४॥
श्रुतिसारमितां स्मृतिषु प्रथितां कलिदोषकृतां शरणं प्रचिताम् ।
घृतदेवहुतां गुणिभिः प्रणतां प्रणमाम्यमृतां बहुभाग्ययुताम् ॥ ५॥
जनताकुलितां बहुधा ललितां कृतरम्यरुतां शमनादिनुताम् ।
नरलोकगतां परमार्थयुतां प्रणमाम्यमृतामपराधिहिताम् ॥ ६॥
बहुवेणियुतां जलजानहतां यतिभिर्मिलितामधिकाशि शिताम् ।
स्फटिकोपमितां स्तुतिगीतिमतां प्रणमाम्यजितामधिराजनताम् ॥ ७॥
सकलासुहितां सततावहितां कुणपैः पिहितां चिकुरावचिताम् ।
विहगध्वनितां विधिपात्रमतां प्रणमाम्यजितां श्रुतिसंप्रथिताम् ॥ ८॥
इति रवीन्द्रकुमार सिद्धान्तशास्त्रि कृतं गङ्गाष्टकं सम्पूर्णम् ।
Encoded and proofread by Anil Kumar Pandey anil.kumar17pandey at gmail.com