गङ्गाकवचम्
विप्र उवाच-
कवचं ते प्रवक्ष्यामः पार्वत्यै यच्छिवोऽब्रवीत ।
यस्य सन्धारणान्मर्त्यः साक्षाद्वैश्रवणो भवेत् ॥ १॥
तद्यथा-
ॐ कैलासशिखरे रम्ये सुखासीनं सुरार्चितम् ।
गिरिशं गिरिजा नत्वा स्तोत्रैर्वेदार्थगर्भितैः ॥ २॥
प्रणम्य परया भक्त्या ततोऽपृच्छत् कृताञ्जलिः ।
श्रीमहादेव्युवाच-
महादेव सुराध्यक्ष करुणासागर प्रभो ॥
भवद्भिः शतसाहस्रकोटिवारं निवारिता ।
मह्यं किं किं न दत्तं ते तदिदानीं वदाम्यहम् ॥ ३॥
गाणपं शाक्तसूरं च शैवं वैष्णवमुत्तमम् ।
मन्त्रयन्त्रादिजालं हि मह्यं सामान्यतस्त्वया ॥ ४॥
दत्तं विशेषतो यद्यत्तत्सर्वं कथयामि ते ।
श्रीरामतारको मन्त्रः कोदण्डस्यापि मे प्रियः ॥ ५॥
नृहरेः श्यामराजो हि कालिकाद्याः प्रियंवद ।
दशविद्या विशेषेण षोडशी मन्त्रनायिका ॥ ६॥
दक्षिणामूर्तिसंज्ञोऽन्यो मन्त्रराजो धनाधिपः ।
सहस्रार्जुनकस्यापि मन्त्रा येऽन्ये हनूमतः ॥ ७॥
किं बहूक्तेन गिरिश प्रेमयन्त्रितचेतसा ।
अर्धाङ्गमिति मह्यन्ते दत्तं किं ते वदाम्यहम् ॥ ८॥
अपि पृच्छामि कवचं श्रीगङ्गाया अनुत्तमम् ।
मे मनस्तद्विना श्रीमन् न तुष्यति ततो वद ॥ ९॥
रहस्यं रक्षणकरं सर्वसम्पत्करं परम् ।
श्रीपरमशिव उवाच-
सत्यं सत्यं वरारोहे सर्वं दत्तं मया तव ॥ १०॥
परन्तु गिरिजे तुभ्यं कथ्यते शृणु साम्प्रतम् ।
कलौ पाखण्डबहुला नानावेशधरा नराः ॥ ११॥
ज्ञानलब्धा हीनकामा वर्णाश्रमबहिष्कृताः ।
वैष्णवत्वेन विख्याताः शैवत्वेन वरानने ॥ १२॥
शाक्तत्वेन च देवेशि सौरत्वेनेतरे जनाः ।
गाणपत्येन गिरिजे शास्त्रज्ञानविवर्जिताः ॥ १३॥
गुरुत्वेन समाख्याता विचरिष्यन्ति भूतले ।
ते शिष्यसङ्ग्रहं कर्तुमुधुक्ता यत्र कुत्रचित् ॥ १४॥
मन्त्राधुच्चारणे तेषां नास्ति सामर्थ्यमम्बिके ।
तच्छिष्याणां च गिरिजे तथापि जगतीतले ॥ १५॥
पठन्ति पाठयिष्यन्ति विप्रद्वेषपराः सदा ।
विप्रद्वेषरतानां हि नरके पतनं ध्रुवम् ॥ १६॥
शृणु देवि प्रवक्ष्यामि रहस्यातिरहस्यकम् ।
गङ्गायाः कवचं दिव्यं गोपनीयं त्वया सदा ॥ १७॥
न कस्यापि प्रवक्तव्यं वक्तव्यं स्वात्मिकाय तत् ।
प्रदर्शयति सर्वाङ्ग भर्तुर्वै स्त्रीजनो यथा ॥ १८॥
तस्मात्त्वया न वक्तव्यं कवचं लोकसुन्दरि ।
गङ्गायाः कवचस्यास्य वेदव्यासो ऋषिः स्मृतः ॥ १९॥
छन्दोऽतिजगती प्रोक्तं देवता तु सरित्स्मृता ।
धर्मार्थकाममोक्षेषु विनियोगः प्रकीर्तितः ॥ २०॥
प्रणवो मे शिरः पातु नमः पातु ललाटके ।
भगवति मे दृशौ पाहि कर्णी ह्यम्बे ततोम्बिके ॥ २१॥
अम्बालिके महामालिनि पाहि नासापुटद्वये ।
कपोलौ मे सदा पाह्येओहि भगवत्यथ ॥ २२॥
मुखं में सततं रक्षेत् द्रवरूपा शुचिप्रभा ।
अशेषतीर्थालवाले हनुमेव सदाऽवतु ॥ २३॥
जिह्वामूले च जिह्वाग्रे ह्रौं श्री बीजौ सदाऽवताम् ।
शिवजटाधिरूढ़ए च गङ्गे चोष्ठद्वयेऽवतु ॥ २४॥
दन्तपत्रौ च कण्ठे च पातु गङ्गाम्बिके द्विठः ।
स्कन्धौ मे ॐ नमः पातु शिवायै करयोर्मम ॥ २५॥
नारायण्यै च पार्श्वौ मे पायात्पापहरा सदा ।
स्वान्ते दशहरायै मे गङ्गायै चोदरेऽवतु ॥ २६॥
स्तनौ स्वाहा सदा पातु देवीर्भिहावतोषिता ॥
ॐ नमो भगवति पाहि कुक्षिं मे सर्वदा सुखम् ॥ २७॥
ऐं बीजं मध्यदेशे च बीजविद्या सदाऽवतु ।
हिलिः पृष्ठं सदा पातु पातु नाभिं हिलिर्मम ॥ २८॥
मिलिमिलीति पदद्वन्द्वं कटिं सडिक्थनीद्वयम् ।
गङ्गे मां पावयेदव्याद्गुह्ये जानुद्वये मम ॥ २९॥
जङ्घे स्वाहा सदा पातु गिरिनेत्राक्षरी सदा ।
सप्तार्णसहिता विद्या पादौ पातु नखाक्षरी ॥ ३०॥
ॐ हिलि-हिलि-मिलि-मिलि गङ्गे देविनमोभृशम् ।
मूर्धादिपादपर्यन्तं पातु पञ्चदशाक्षरी ॥ ३१॥
तारा माया रमा हार्दै प्राच्यां रक्षतु मे सदा ॥
आग्नेयां मां भगवती पातु मे चक्रसंस्थिता ॥ ३२॥
दक्षिणे गाङ्गदयिते नैरृत्यां वर्मपूर्ववत् ।
प्रतीच्यामस्त्रतो रक्षेद्रिपुभारनिकृन्तनी ॥ ३३॥
वाग्भवं पातु वायव्यां माया रक्षतु चोत्तरे ।
ईशान्यां कमला रक्षेत् कामबीजं नभोऽवतु ॥ ३४॥
अधस्तात्पवनो रक्षेत्सर्वत्र सर्वमन्त्रराट् ।
मणिकर्णिभगी ब्रह्मा हृदयं ध्रुवसंयुता ॥ ३५॥
विषमिन्दुधुकः पूर्वं मन्त्रश्रीमणिकर्णिका ।
सर्वत्र मे सदा पातु बाह्याभ्यन्तरभेदतः ॥ ३६॥
इति ते कथितं देवि सारात् सारतरं परम् ।
सर्वार्थसाधनं नाम कवचं परमाद्भुतम् ॥ ३६॥
अस्यापि पठनात्सद्यः कुबेरोऽपि धनेश्वरः ।
इन्द्राद्याःसकला देवा धारणात्पठनाद्यतः ॥ ३७॥
सर्वसिद्धीश्वराः सन्तः सर्वैश्वर्यमवाप्नुयुः ।
पुष्पाञ्जल्यष्टकं दत्वा मूलेनैव पठेत्सकृत् ॥ ३८॥
संवत्सरकृतायास्तु पूजायाः फलमाप्नयात ।
प्रीतिमन्योन्यतः कृत्वा कमला निश्चला गृहे ॥ ३९॥
वाणीयं निवसेद्वक्रे सत्यं सत्यं न संशयः ।
यो धारयति पुण्यात्मा सर्वार्थसाधनाभिधम् ॥ ४०॥
कवचं परमं पुण्यं सोऽपि पुण्यवतां वरः ।
सर्वैश्वर्ययुतो भूत्वा त्रैलोक्यविजयी भवेत् ॥ ४१॥
पुरुषो दक्षिणे बाहौ नारी वामभुजे तथा ॥
बहुपुत्रयुतो भूयाद्वन्ध्यापि लभते सुतम् ॥ ४२॥
ब्रह्मास्त्रादीनि शस्त्राणि नैव कृन्तन्ति नाशनम् ।
गोपनीयं गोपनीयं गोपनीयं प्रयत्नतः ॥ ४३॥
इति श्रीरुद्रयामले पार्वतीश्वरसम्बादे सर्वार्थसाधनाभिधं
श्रीगङ्गाकवचवं सम्पूर्णम् ।
Encoded and proofread by Anil Kumar Pandey anil.kumar17pandey at gmail.com