गङ्गास्तोत्रम् ३
श्रीगणेशाय नमः ।
अथानन्तरतो देवि समयास्तोत्रमुत्तमम् ।
येन स्तुता सिद्धमूली भक्षिता फलदा भवेत् ॥ १॥
संविदे ब्रह्मसम्भूते ब्रह्मपुत्रि सदानघे ।
भैरवानन्ददीप्त्यर्थं पवित्रा भव सर्वदा ॥ २॥
नमामि यामिनीनाथलेखालङ्कृतमस्तकाम् ।
भवानी भवसन्तापनिर्वापण-सुधानिधिम् ॥ ३॥
सिद्धिमूलीं श्रये देवी हीनबोधप्रबोधिनीम् ।
राजप्रजावशकरी कालकण्ठे त्रिशूलिनि ॥ ४॥
अज्ञानेन्धनदीप्ताग्रे ज्ञानविज्ञानरूपिणि ।
आनन्दाद्याहुतिप्रीते सम्यग्ज्ञानं प्रयच्छ मे ॥ ५॥
दण्डाधिरूढपरिपूरितभोगमोक्षां
मुण्डाक्रमेण मदनां जनकामिनीनाम् ।
आराधयामि बहुशत्रुपराजयन्ती
विश्वेश्वरी त्रिभुवनां विजयेति देवीम् ॥ ६॥
आनन्दनन्दिनीनन्दे सदावन्द्यपदद्वये ।
उल्लासकदलीकन्दे स्वच्छन्दे बोधरूपिणि ॥ ७॥
कवयः कवितालहरी कुरुते तत्त्वार्थदर्शनं पुंसाम् ।
अपहरति दुरितनिलयं किं किं न करोति संविदुल्लासः ॥ ८॥
संविदासवयोर्मध्ये संविदेव गरीयसी ।
संविदाश्रयणादेव तदात्मा पुरुषः स्मृतः ॥ ९॥
श्यामैव रामा कविरेव विद्वान् विद्यैव बन्धुर्धनुरेव शस्त्रम् ।
गङ्गैव तीर्थ स्मर एव धन्वी मार्गेषु माहेश्वर एव मार्गः ॥ १०॥
कथञ्चिदेषा करुणाकटाक्षैर्निरीक्षते मां परदेवता चेत् ।
वृथा कथाकल्पमहीरुहाणामलं च चिन्तामणिचिन्तनेन ॥ ११॥
अलिपिशितपुरन्ध्रीभोगपुञ्जारतोऽहं
बहुविधकुलमार्गारम्भसम्भावितोऽहम् ।
पशुजनविमुखोऽहं भैरवीं संश्रितोऽहं
गुरुचरणरतोऽहं भैरवोऽहं शिवोऽहम् ॥ १२॥
वामोरुस्ते रमणकुशला दक्षिणे चालिपात्रं
तप्ता मुद्राश्चणकवटकाः सौकरं सुष्ठु मांसम् ।
तन्त्री वीणा सरसकवयः सत्कथा सद्गुरूणां
कौलो धर्मः परमगहनो योगिनामप्यगम्यः ॥ १३॥
कौलरहस्ये गलार्णवे । श्रीरस्तु ।
इति समयाचारतन्त्रे गङ्गास्तोत्रं सम्पूर्णम् ।
Encoded and proofread by Anil Kumar Pandey anil.kumar17pandey at gmail.com