Shri Jagadamba Stotram

 श्रीजगदम्बास्तोत्रम् 
वरदपुरनिवासिनीं निरवधिसुखरूपिणीम् ।
निगमवनविहारिणीं मुनिजनजननीं भजे ॥ १॥

      विमलहृदयगाहिनीं विमलमतिसुवासिनीम् ।
      सकलविभवधारिणीं मुनिजनजननीं भजे ॥ २॥

विमलभजनसेविनीं त्वमिति तदसि बोधिनीम् ।
भजकसुजनतोषिणीं मुनिजनजननीं भजे ॥ ३॥

      चिदमलतनुशोभिनीं सुकृतिकुसुममालिनीम् ।
      सकलसुगुणसुन्दरीं मुनिजनजननीं भजे ॥ ४॥

निजसुजनविभूषणीं विमलविरतिदायिनीम् ।
निरवधिसुखकारिणीं मुनिजनजननीं भजे ॥ ५॥

      भजकभवविनाशिनीं विषयं सुखनिवारिणीम् ।
      सकलभयविघातिनीं मुनिजनजननीं भजे ॥ ६॥

सुरनरपरिपालिनीममृतसुखसुवर्षिणीम् ।
कुजनकुमतिनाशिनीं मुनिजनजननीं भजे ॥ ७॥

      अशुभपदनिवारिणीमशुभगतिनिरोधिनीम् ।
      सकलशुभविवर्धिनीं मुनिजनजननीं भजे ॥ ८॥

निगमसुगमधर्मिणीं श्रुतिकृतिजनतारिणीम् ।
निगममतवितारिणीं मुनिजनजननीं भजे ॥ ९॥

      अचलपदविधायिनीमविचलसुखदर्शिनीम् ।
      सकलजनहितैषिणीं मुनिजनजननीं भजे ॥ १०॥

श्रीधरेण कृतं स्तोत्रं विजया दशमीदिने ।
ये पठन्ति मुदा भक्त्या ते नरा मोक्षभागिनः ॥ ११॥

इति श्रीमत् परमहंसपरिव्राजकाचार्य सद्गुरु भगवान्
श्रीधरस्वामीमहाराजविरचितं श्रीजगदम्बास्तोत्रं सम्पूर्णम् ।
रचनास्थानं - वरदपुर


Proofread by Manish Gavkar