देवी कन्याकुमारि वर्णाद्याक्षर गीताञ्जलिः
१. ``अ''कार गीतम् ।
अखंड ब्रह्मांड नगरेश्वरीम् ।
अनुदिनं स्मर कन्याकुमारीम् ॥ पल्लवि॥
प्रसन्नवदनां कुंदरदनां
मुक्तिनिकेतनां कारुण्यनयनाम् ।
स्मर नित्यं स्मर विनीतावनां
दुष्टगुण परिवर्तन लीनाम् ॥ १॥
शृतिस्मृतिसूक्ति संहर्षिणीं
आगमशास्त्र धर्मबोधिनीम् ।
ज्ञानसंजीविनीं गीतसुधावनीं
योगीश समदर्शि संपोषिणीम् ॥ २॥
२. ``आ''कार गीतम् ।
आश्रयामि श्री कन्याकुमारीम् ।
आराधयामि देवीं मोदकरीम् ॥ पल्लवि॥
भूषिराधीश्वरीं विश्वसुंदरीं
कारुण्यसागरीं गीतसुधाधरीम् ।
राजीव नयनां राजीववदनां
राजीवचरणां ध्यायामि अनुक्षणम् ॥ १॥
मधुर सद्भक्तिलास्य रंजनीं
योगीश समदर्शि संपोषिणीम् ।
सुप्त प्रतिभाशुजागरिणीं
गुप्तगामिनीं कुंडलिनीम् ॥ २॥
३. ``इ''कार गीतम् ।
इंदुशेखर परमप्रिय सखी ।
कन्याकुमारि स्वांतःसुखी ॥ पल्लवि॥
उपासित ब्रह्मदेवदत्तवरः
तपोनिष्ठ मदोन्मत्त बाणासुरः ।
अनिमिष ऋषिसाधुसंत हिंसकः
तस्य वधार्थमवतारिणि ॥ १॥
भूषिरमंदिर लोकैकसुंदरि
शिरीषसुमोपम शरीरधरि ।
पराविद्या पयोनिधीश्वरि
भ्रांतिमोहहरि गीतसुधाधरि ॥ २॥
४. ``ई''कार गीतम् ।
ईप्सितप्रपूरिणि परांबिके ।
हे कन्याकुमारि भवतारके ॥ पल्लवि॥
सुधावल्लि उपनिषद्गोचरे
असदृश दीप्तियुते साकारे ।
योगसेवासंप्रीते रुचिरे
त्यागयोगोपासिते मधुरे ॥ १॥
वरदमुद्रायुते हरभामिनि
षण्मुखगजमुख माते रंजनि ।
रसिकसुजन मानसाह्लादिनि
धारणाबलं यच्छ गीतसुधावनि ॥ २॥
५. ``उ''कार गीतम् ।
उपनिषत्सागरे मम नाविका भव ।
कन्याकुमारि ज्ञानप्रदा भव ॥ पल्लवि॥
चंद्रशेखरे ललिते कल्पवल्लि
चंद्रशेखरसखि अमृतवल्लि ।
जमदग्निनंदन प्रतिष्ठिते
जीवसंस्करण कार्यनिरते ॥ १॥
चिद्पावकसंभूते सुचरिते
भ्रामरीगुह निवासिते गानरते ।
मुक्तिदाते देवकार्यसदारते
हिमाद्रिसंजाते गीतसुधाश्रिते ॥ २॥
६. ``ऊ''कार गीतम् ।
ऊर्ध्वगतिप्रियं मां पालय ।
सन्मतिं दत्वा मां परिपालय ॥ पल्लवि॥
सत्यासत्यभेद ज्ञानं यच्छ
सुखदुःखदर्शने समतां प्रयच्छ ।
ऋतशक्ति जयमेकमात्मदर्शनं
इति मां बोधय कन्याकुमारि ॥ १॥
चिदाकाशांतरे साक्षिणि पोषय
मूर्खदास गुरुहृदये मां स्थापय ।
अविद्या बाणासुरसूदनी भव
श्रितरक्षिणि गीतसुधावनी भव ॥ २॥
७. ``ऋ''कार गीतम् ।
ऋग्वेदादि चतूर्वेदार्थ दिपिके ।
कन्याकुमारि सुज्ञानचंद्रिके ॥ पल्लवि॥
अपौरुषेय वेदवाङ्मयसारे
शृतिस्मृति संपूजिते रुचिरे ।
आगम षड्दर्शन गीतासद्दर्शिते
पुराणोपपुराण सुवर्णिते ॥ १॥
विश्वव्यापक भाषांतर्यामिनि
विस्मयरीत्या भावांतर्गामिनि ।
विचार विश्लेषण विधिनिरूपिणि
कन्याकुमारि गीतसुधावनि ॥ २॥
८. ``ऋ''कार गीतम् ।
ऋ इत्यष्टमाक्षर विराजिते ।
ऋषिसंप्रदाय रक्षण निरते ॥ पल्लवि॥
मननमंथन चिंतनकारिणि
स्फुरणसृजन कल्पनोद्दीपिनि ।
कन्याकुमारि पंचकोशव्यापिनि
भूषिरजननि गीतसुधावनि ॥ १॥
सम्यग्दर्शिकृत ग्रंथसारे
सम्यग्ज्ज्ञानप्रदे साकारे ।
निराकारे निर्विकारे
निर्ममस्य हृद्गुह गोचरे ॥ २॥
९. ``ए''कार गीतम् ।
एकैक परतत्त्वरूपिणि ।
अद्वितीय प्रकृतिरूपिणि ॥ पल्लवि॥
सर्वयंत्ररूपिणि सर्वमंत्रजननि
सर्वतंत्रकारिणि सर्वशक्तिदायिनि ।
जननमरण चक्रसंचालिनि
देशकाल दिक्कारणि ॥ १॥
अप्रमेये सदये सरसवति
अनिर्वचनीये अमेये भगवति ।
नित्यशुद्ध बुद्धमुक्तरूपिणि रागिणि
सच्चिदानंद रूपिणि सरोजिनि ॥ २॥
१०. ``ऐ''का गीतम् ।
ऐहिक मोदाकर्षण वशोऽ हम् ।
मोघाशोऽहं सत्यविमुखोऽहम् ॥ पल्लवि॥
वह मम योगक्षेमं भवानि
देवि कन्याकुमारि श्रितपावनि ।
बालदिनकरकोटि प्रभासंयुते
बाणासुरासुहरण रंजिते विजिते ॥ १॥
पंचशरहर शिवार्धांगिनि
पंचभूतात्मक जगद्रक्षिणि ।
पंचक्लेश हारिणि प्रमोदिनि
पंचकोशव्यापिनि गीतसुधावनि ॥ २॥
११. ``ओ''कार गीतम् ।
ओजस्विनि चंद्रभानुनयने ।
कन्याकुमारि भूषिरसदने ॥ पल्लवि ॥
सुरवंशारिकुल विध्वंसिनि
मुनियतिगुरुबुध ध्येयपालिनि ।
जीवकोटि प्राणपोषिणि कन्ये
पूर्णसुधांशुमुखि आराध्ये ॥ १॥
पालय मां सदा परमज्ञेये
परिवर्तय मां परमध्येये ।
छिन्नसंशय मोदप्रदायिनि
षड्वैरि दूरिणि गीतसुधावनि ॥ २॥
१२. ``औ''कार गीतम् ।
औन्नत्य वित्तार्जन विधानम् ।
बोधयांबिके मे अनुदिनम् ॥ पल्लवि॥
ज्ञानभिक्षां देहि भवति
कन्याकुमारि हे अंबे भगवति ।
त्वमेव माते भवतारिणि
त्वमेव त्राते भीतिनाशिनि ॥ १॥
षट्चक्रोद्दीपिन दीप्तिमणि
गीतसुधावनि श्रितचिंतामणि ।
साधनरत साफल्यदायिनि
प्रसन्नमनस्क प्रमोदिनि ॥ २॥
१३. ``अं''कार गीतम् ।
अंबुधित्रय संगमतटालये ।
अंबुजपदद्वये यशोदये ॥ पल्लवि॥
ऋषिमुनि दिविजेंद्र प्रार्थित जननि
कन्याकुमारि रूपावतारिणि ।
दैत्यराज बाणासुरसूदनि
शुभसंदायिनि गीतसुधावनि ॥ १॥
कांतिपूर्ण नासाभरणधरि
कारूण्यपूर्णे गोविंदसोदरि ।
आपादमस्तक नयनप्रिये
आजीवपर्यंत जीवाश्रये॥ २॥
१४. ``अः''कार गीतम् ।
आह्लाददायिनि परांबिके ।
धर्मार्थ कामप्रदायिके ॥ पल्लवि॥
नवरसलास्य निरते श्रीललीते
नवकांति लावण्य सौंदर्ययुते ।
परमाद्भुतं तव लोकरक्षणं
कल्पनातीतं तव जीवलक्षणम् ॥ १॥
परम वात्सल्ययि सृष्टिसंचालिनि
चिदानंदमयि सच्चित्स्वरूपिणि ।
अंबोनिधित्रय संगमेश्वरि
ब्रह्मचारिणि गीतसुधेश्वरि ॥ २॥
१५. ``क''कार गीतम् ।
कन्याकुमारि योगविद्या-
पीठाधीश्वरि मामुद्धर ॥ पल्लवि॥
अस्माकं गुरुकुलं चिरकालं
ज्ञानविज्ञानप्रद धाममस्तु ।
शमदमसंपन्न साधकवृंदा-
श्रितमस्तु योगनंदनमस्तु ॥ १। ।
ओंकार नादानुसंदाने मम
चित्तमस्तु तल्लीनमस्तु ।
ज्ञानदीपांकुरि कुपासागरि
नित्यशुभंकरि गीतसुधाकरि ॥ २॥
१६. ``ख''कार गीतम् ।
खगराजवाहन प्रियसोदरि ।
वरदमुद्राधरि कन्याकुमारि ॥ पल्लवि॥
कांचन कंकण नूपुरभूषिते
नवरत्न किरीट हारविराजिते ।
त्रितापत्रस्त भक्तसंरक्षिणि
त्रिलोकपालिनि मूर्खदास जननि ॥ १॥
जपमालाधरि भूषिरेश्वरि
शिष्टशुभंकरि दुष्टभयंकरि ।
कायवाझ्मनोबलं प्रसादय
गीतसुधावनि योगपथं गमय ॥ २॥
१७. ``ग''कार गीतम् ।
गुरुहृदयांतर् दीप्ति प्रसारिणि
परमगुरुरूपिणि त्रिलोचनि ॥ पल्लवि॥
जीवनशास्त्रज्ञान प्रबोधीनि
जीवरहस्य विज्ञान प्रकाशिनि ।
धारणध्यानरत मार्गदर्शिनि
समाधिलीन ज्ञेयाकारिणि ॥ १॥
काम्यकर्मरहितो निजगुरुरूपः
देहभाववर्जितो सद्गुरुरूपः ।
दक्षिणामूर्तिगुरु प्रियरमणि
गुरुस्कंदजननि गीतसुधावनि ॥ २॥
१८. ``घ''कार गीतम् ।
घनहिमशैलेंद्र सुकुमारि
निचोलांचलधरि कन्याकुमारि ॥ पल्लवि॥
भक्तकोटिपूजिते अपराजिते
कृतकृत्ययोगि पराभक्तिजिते ।
धर्मनारीपीठ चक्रवर्तिनि
मतवर्ण जातिकुल मैत्रिमोदिनि ॥ १॥
संस्कृतिरक्षण तत्पररक्षिणि
प्रकृतिविकोप परिणामसाक्षिणि ।
विकृतभाववश दुष्टध्वंसिनि
गीतसुधावनि शिष्टपालिनि ॥ २॥
१९. वा``ङ''कार गीतम् ।
वाङ्मय साम्राज्य चक्रवर्तिनि ।
साहित्य संगीतामृत वाहिनि ॥ पल्लवि॥
अक्षरमालाधारिणि शांभवि
सप्तस्वर वज्रहारधरि देवि ।
अनिमिषवैरिसमूह सूदनि
कन्याकुमारि त्रिशरधि तटवासिनि ॥ १॥
अणुरेणुतृणकाष्ठ व्यापिनि
जीवकोटिस्पंदन शक्तिसंचालिनि ।
समस्त ब्रह्मंड भांडोदरि
ज्योतिर्गमय गीतसुधाधरि। ॥ २॥
२०. ``च''कार गीतम् ।
चंद्रमुखी श्री कन्याकुमारी ।
चंद्रशेखरसखी अवतु माम् ॥ पल्लवि॥
रम्य निचोलांचल धारिणी
नव्य ललाटिका कंकणभूषिणी ।
असमाद्भुत दिव्यकांतामणी
अनुपम सुचरिता अवतु माम् ॥ १॥
रत्नताटंकयुगल शोभिनी
स्वर्णनूपुरधरी गीतसुधावनी ।
ओष्टरागरहितापि अरुणाधरा
चंदनरहितापि सुगंधप्रसारा। ॥ २॥
२१. ``छ''कार गीतम् ।
छायावत्मम चित्तमस्तु विधेयम् ।
मायावश मम जीवमस्तु निरामयंम् ॥ पल्लवि॥
कालचक्रे मम कायमस्ति विकारमयं
कर्मचक्रे मम चित्तमस्ति संस्कारमयम् ।
कथमस्ति मम चित्तवृत्तिनिरोधः
कदास्ति मयि योगानुशासनम् ॥ १॥
सहस्र सहस्र शास्त्रप्रमाण
ग्रहण गमनविधानं न जानामि ।
अंतर्गुरुमाते कन्याकुमारि
गीतसुधावनि नित्यशुभंकरि ॥ २॥
२२. ``ज''कार गीतम् ।
जीवजगत्पावनि सिद्धिप्रदे
जितमानसवरप्रदे सुप्रदे ॥ पल्लवि॥
कन्याकुमारियोगिदर्शिते
कन्याकुमारि भूषिरमाते ।
अंबुराशि तरंग नाट्यनिरते
अंबोनिधिघोष मंत्रप्रीते ॥ १॥
लोकसंग्रहकर्मे नित्याश्रिते
लोकत्रयत्राते मंदस्मिते ।
ब्रह्मचारिणि गीतसुधावनि
सुचींद्रनाथ शिवार्धांगिनि ॥ २॥
२३. ``झ''कार गीतम् ।
झंकारिणिधर परमाप्तभामिनि ।
ह्रींबीजाक्षर शक्तिस्वरूपिणि ॥ पल्लवि॥
भुवनसम्मोहिनि अब्धिनंदनमुखि
हरशिरशोभिनि गंगा नित्यसखि ।
सौगंधिका चंपका मल्लिका
रजनीगंध मालती रसिका ॥ १॥
पनस नारिकेल दाडिम जंबू
आम्रकदली द्राक्षानि खादय ।
भक्ष्य भोज्य लेह्यचोष्यानि
स्वीकुरु शंकुरु भुवनैकगुरुजननि ॥ २॥
तव दृष्टिमात्रेण कन्याकुमारि
सर्वं पावनमस्ति गंगामैत्रिधरि ।
तव स्पर्शमात्रेण हे माहेश्वरि
सर्वममृतमस्ति गीतसुधाकरि ॥ ३॥
२४. ज``ञ'' ज्ञकार गीतम् ।
ज्ञानजलधि स्नाने खेल मानस ।
कन्याकुमारि ध्याने रमय ॥ पल्लवि॥
आकाश वायु वह्नि जल धरा-
मय प्रपंचे देवीं भावय ।
सत्वरजस्तमो गुणत्रय
कर्मक्षेत्रे गीतसुधामास्वादय ॥ १॥
तत्त्व नवरत्नानि अन्वेषय
आत्मपरमात्म संगमे मोदय ।
ध्यातृ ध्यान ध्येय भेदमस्तु लीनं
ज्ञातृ ज्ञान ज्ञेयभेदमस्तु विलीनम् ॥ २॥
२५. ``ट''कार गीतम् ।
टीकाकार वर्णित सर्वशक्तिधरि ।
सर्वरूपधरि कन्याकुमारि ॥ पल्लवि॥
कल्पतरुसदृश चरणसरोजिनि
कल्पनातीत लीलाविलासिनि ।
योगमार्गगामी संचालिनि
भक्तहृदयालये विराजिनि ॥ १॥
चिच्छक्तिरूपिणि चिदानंददायिनि
भ्रामरी गुहांतर्निवासिनि ।
सुगंधिनि सुकेशिनि सुवासिनि
श्रीकांतभगिनि गीतसुधावनि ॥ २॥
२६. पा``ठ''कार गीतम् ।
पाठप्रवचने मां चतुरं कुरु ।
पतितपावनि मां स्थिरचित्तं कुरु ॥ पल्लवि॥
क्षमाकवचदे सुगुणप्रदे
परिपालय मां आशुवरप्रदे ।
भूषिरालयस्थिते कन्याकुमारि
साधकविनुते भुवनेश्वरि ॥ १॥
कौमारि सद्भावसंजीविनि
माहेश्वरि शशिशेखर रमणि ।
सुरवैरिदमनि दुरितविदूरिणि
चिदानंदरूपिणि गीतसुधावनि ॥ २॥
२७. ``ड''कार गीतम् ।
डमरुपाणिसति कन्याकुमारि ।
डमरुनिनादप्रिये भुवनेश्वरि ॥ पल्लवि॥
निरालंब प्रमोदप्रदे
निरतिशय दिव्यज्ञानप्रदे ।
देहकरणकृत कर्मसुफलदे
मनोमतिचित्ताराधन बलदे। ॥ १॥
त्रिपुरसुंदरि देवि त्र्यक्षरि
त्रिगुणलास्यकरि पंचदशाक्षरि ।
त्रिदेविशक्तिधरि गीतसुधाधरि
तप्तहृदय सुखकरि निर्भयकरि ॥ २॥
२८. ``ढ''कार गीतम् ।
ढक्कावादन विशारदराणि ।
दिव्यज्ञानदायिनि लोकजननि ॥ पल्लवि॥
त्रिपुरवासिनि षड्वैरिदमनि
त्रिगुणनियंत्रिणि गीतसुधावनि ।
चपलचित्त दोषापहारिणि
छिन्नसंशय मोदप्रदायिनि। ॥ १॥
भक्तिमाधुर्यरते श्री ललिते
दासोऽहंभाव संप्रीते ।
सोऽहमनुभाव स्थितिदाते
कन्याकुमारि चिदग्निभूते ॥ २॥
२९. अ``ण''कार गीतम् ।
अणुकोटि सहस्रचलनकरि ।
अष्टसिद्धीश्वरि कन्याकुमारि ॥ पल्लवि॥
अविद्यांधकार वारिणि
अस्मिता मेघावरण दूरिणि ।
रागद्वेषमय बंधमोचनि
अभिनिवेश क्लेशाशुरागिणि ॥ १॥
भक्तिसुखास्वादने कंपनं
नामस्मरणह्लादे रोमांचनम् ।
भक्तिपारवश्ये गद्गदकंठं
देहि मे अश्रु स्वेदं गीतसुधावनि ॥ २॥
तव ध्यान तन्मयता यच्छतु वैवर्ण्यं
तव ज्ञानलीनता करोतु मां स्तब्धम् ।
तव साक्षात्कारे अस्तु मम प्रलयं
गीतसुधावनि वह मम योगक्षेमम् ॥ ३॥
३०. ``त''कार गीतम् ।
तपोव्रते वरदमुद्रायुते
कन्याकुमारि जपमाला सहिते ॥ पल्लवि॥
सर्व यंत्रात्मिके सर्वतंत्रात्मिके
सर्व मंत्रात्मिके सर्वानुशासके ।
स्थावरजंगम भेदरहिते
प्राणशक्तिसंचालिनि जीवहिते ॥ १॥
दृश्य विश्वांतरे पंचभूतरूपिणि
अदृश्यावस्थे पंचतन्मात्राजननि ।
युगयुगांतर्स्थिते। भूषिरेश्वरि
पंचबाणारिप्रिये गीतसुधेश्वरि ॥ २॥
३१. र``थ''कार गीतम् ।
रथोपम कायस्य सारथि त्वम् ।
ज्ञेये हि त्वं ध्येयेऽपि त्वम् ॥ पल्लवि॥
मनोप्रग्रह नियंत्रकः नाहं
वशहीनकरणहयादासोऽहम् ।
मनस्साक्षि घंटानादतन्मयी
शमदमबलं प्रद मे चिन्मयी ॥ १॥
बाले विमले ज्ञानदीप स्थापिनि
आश्रितवत्सले निष्ठोद्दीपिनि ।
कन्याकुमारि अब्दिनंदनमुखि
त्रिभुवनसुंदरि। नित्यगंगासखि ॥ २॥
३२. ``द''कार गीतम् ।
दिव्यज्ञानदाते भजनसुधाप्रीते ।
देहकरण वाङ्मनोबल प्रदाते। ॥ पल्लवि॥
कन्याकुमारि सहस्रजिह्वस्तुतिप्रीते
भूषिरेश्वरि सहस्रनयनार्चिते ।
बाणासुरवधार्थं संजाते
कुशलं कुरु मे यज्ञोदिते ॥ १॥
षट्चक्रोपरिशोभिनि योगिनि
नवभाव तरंगिणि गीतसुधावनि ।
ओंकार बीजाक्षरि पाहि मां
ह्रींकारबीजाक्षरि त्राहि माम् ॥ २॥
३३. ``ध''कार गीतम् ।
धर्मपीठाध्यक्षणि त्रिभुवन जननि ।
दृश्यादृश्य पदार्थ संपोषिणि ॥ पल्लवि॥
तत्त्वमसि बोधने गोचरि
स्वात्मसुखप्रदे गीतसुधाकरि ।
अवाझ्मानसगम्ये सुगुणसुधाधरि
आनंदमयकोश धामेश्वरि ॥ १॥
महाविषादभीरु संश्रिते
महाप्रमोद वरदाननिरते ।
द्वंद्वतरंगमय सागरतारिणि
द्वंद्वातीते कन्याकुमारि हरिणि ॥ २॥
३४. ``न''कार गीतम् ।
नवतारुण्ययुते असमलावण्ययुते ।
शृणु मम भावान् ऋषिगणविनुते ॥ पल्लवि॥
उक्त्वा तव तत्त्वविशेष पदान्
बध्वा मानसं हृष्यामि अंबिके ।
पृष्ट्वा परिप्रश्नानि गुरून्
ज्ञात्वा सत्यतत्वं राजहंसिके ॥ १॥
शृत्वा तव महिमा विशेषान्
स्तुतिरत्न भूषणान् दत्वा धन्योऽस्मि ।
नवरसानुभव रसतरंगिणि
कन्याकुमारि गीतसुधास्वादिनि ॥ २॥
३५. ``प''कार गीतम् ।
प्रसीद प्रसीद कन्याकुमारि ।
पालय मां नित्यानंदकरि ॥ पल्लवि॥
पयोनिधिशयन सुप्रियभगिनि
भालनयनार्धांगिनि चिद्रूपिणि ।
बाणासुरसूदनि बालामणि
शरणागतभक्त चिंतामणि ॥ १॥
विद्युल्लतासदृशगात्रि
दयापूर्ण चारुनेत्रि ।
मौक्तिकहारालंकृत कंधरे
गीतसुधाधारे मंदस्मेरे। ॥ २॥
३६. ``फ''कार गीतम् ।
फलनिरीक्षणं मम दूरी कुरु ।
जलरुहनयने अर्पणं स्वीकुरु। ॥ पल्लवि॥
जीवभाव बद्धोऽहं कर्मचक्रलीनः
द्वंद्वभाव सहितोऽहं मोदहीनः ।
भावशुद्धिं कृत्वा मनःप्रसादं दत्वा
परामोदं प्रद स्तोत्रं शृत्वा ॥ १॥
मोहक स्वर्णाभरणभूषिणि
कांतियुत नासाभरण राजिनि ।
विषकंधरप्रिये विनायकजननि
श्रीकांतसोदरि गीतसुधावनि ॥ २॥
३७. ``ब''कार गीतम् ।
ब्रह्मतत्वरूपिणि हे भवानि ।
स्वर्गावनिपाताल स्वामिनि ॥ पल्लवि॥
संवित्सागरि बुधचित्तापहरि
साधकाभयकरि बहुरूपधरि ।
धर्माधर्मातीते शुभचरिते
सागरलहरि सुघोषसंस्तुते। ॥ १॥
त्रिगुणातिते त्रिदेहसेविते
त्रिभुवनाराधिते उपासकदर्शिते ।
क्षमाकरि कृपाकरि कौमारि
गीतसुधाकरि कन्याकुमारि। ॥ २॥
३८. ``भ''कार गीतम् ।
भूषिरमंदिर निकेतने ।
भवबंधमोचनि मोदसदने। ॥ पल्लवि॥
त्रितापहारिणि मंदस्मिते
त्रिनेत्ररमणि गुहगणप माते ।
त्रिकालाबाधिते जपमालाधारिणि
त्रिलोकपालिनि त्रिलोचनि ॥ १॥
प्रपत्तिपूर्ण कृपावर्षिणि
विक्षिप्तचित्त दुरितापहारिणि ।
हृल्लेखारूपिणि साधकपावनि
मम हृत्खेलिनि गीतसुधावनि ॥ २॥
३९. ``म''कार गीतम् ।
महादेवार्धांगिनि पाहि मां
कन्याकुमारि गौरि त्राहि माम् ॥ पल्लवि॥
समुद्रे तु तरंगमस्ति
तरंगे नास्ति पयोनिधिः ।
तवोदरे अहमस्मि भगवति
सर्वदा त्वमसि मयि शिवसति ॥ १॥
समष्टि तत्त्वजनितः व्यष्टिः
व्यष्टिः कदापि नास्ति समष्टिः ।
अणुमहद्व्यापिनि गीतसुधावनि
अंडपिंडजननि ब्रह्मांडरूपिणि ॥ २॥
४०. ``य''कार गीतम् ।
योगमाये विष्णुसहोदरि ।
मम दुरितानि हर कन्याकुमारि ॥ पल्लवि॥
शब्द स्पर्श रूप रस गंध-
तन्मात्रा जननि सृष्टिसंपोषिणि ।
कैलासाधिप मनोल्लासिनि
मातंगवदनस्तुत गिरिनंदिनि ॥ १॥
प्रपन्नसाधक तेजोवर्धिनि
प्रोल्लासिनि सृजनक्रीडारंजनि ।
अब्धिघोषश्रवणे प्रणवदर्शिनि
अक्षयशक्तिवाहिनि गीतसुधावनि ॥ २॥
४१. ``र''कार गीतम् ।
रुंडमालाधरि। ईश्वरि गौरि
सुरेश्वरि परमेश्वरि कन्याकुमारि ॥ पल्लवि॥
भुवनैकसुंदरि भूषिरेश्वरि
स्वर्णकंकणधरि जपमालाधरि ।
रमणीयधामे प्रतिष्ठिते
श्रीमाते रक्ष मां गीतसुधानुते ॥ १॥
भक्त ज्ञानि बुध प्राज्ञ शक्तिस्रोते
काव्य साहित्य रत स्नेहप्रमोदिते ।
रजोगुण तमोगुण मग्नोद्धारिणि
भवरमणि भवहारिणि सुनयनि ॥ २॥
४२. ``ल''कार गीतम् ।
लीलानाटक रंगमंटपे
नटीनटपात्रधरी त्वमेव ॥ पल्लवि॥
ह्रींकार बीजाक्षरी त्वमेव
ओंकारबीजाक्षरी मामव ।
सहस्रारकमले शोभिनि योगिनि
नवरस रागालापिनि विरागिणि ॥ १॥
त्रिदेहप्रतिष्ठिते देहातीते
कुशलं कुरु मे भव यज्ञोदिते ।
जिज्ञासुवेष्टिते नित्योपासिते
गीतसुधाश्रिते शैलेंद्रसुकुमारि ॥ २॥
४३. ``व''कार गीतम् ।
विज्ञानदीपाश्रय दायिनि ।
विनीतमनस्क मुददायिनि ॥ पल्लवि॥
पंचविषयवासना वारिणि
तार्किक विचार तुलनबोधिनि ।
आशापाशाबंधित विमोचनि
भूषिरजननि गीतसुधावनि ॥ १॥
जीवनसमरांगण साक्षिणि
जीवापजयविजय स्वामिनि ।
ज्ञानविवर्धिनि दर्शय शोधय
धर्मस्थापिनि प्रसीद पालय ॥ २॥
४४. ``श''कार गीतम् ।
शतशतापराधाणि मया कृतानि ।
जीवोद्धारिणि क्षमस्व पावनि। ॥ पल्लवि॥
दिव्यजन्मधारिणि श्रीपद्मचरणे
देदीप्यमान नासाभरणे ।
अनिमिषगण समाराधिते
महर्षिवृंदोपासिते गीतसुधास्तुते ॥ १॥
त्वमेव गतिर्मम कन्याकुमारि
श्री कन्यका परमेश्वरि गौरि ।
त्वया विना हे राजराजेश्वरि
नाहमस्मि देवी सुधीश्वरि ॥ २॥
४५. ``ष''कार गीतम् ।
षट्चक्रमार्ग गामिनि अंबिके
कन्याकुमारि योगिहृच्चंद्रिके ॥ पल्लवि॥
निरवधिप्रमोद प्रदायिनि
निरुपमलीलाकरि सुहासिनि ।
वेदोपनिषद्वाणि कल्याणि
नीरधित्रयमंदिर विहारिणि ॥ १॥
अक्षररूपिणि ज्योतिर्मयि
अक्षयमोददे हिरण्मयि ।
धर्मपालक भक्तोद्धारिणि
गंगाधरभामिनि गीतसुधाजननि ॥ २॥
४६. ``स''कार गीतम् ।
सर्वबीजाक्षर शक्तिजननि ।
सर्वसाधना प्रक्रिया कारिणि ॥ पल्लवि॥
सुचींद्र शशिशेखरभामिनि
बाणासुरमर्दन तोषिणि ।
शैलेश सुकुमारि दैवगुणवर्धिनि
कन्याकुमारि कृष्णकपर्दिनि। ॥ १॥
महिषमर्दिनि धर्मसंरक्षिणि
चंडमुंडासुर शिरच्छेदिनि ।
मानवकुलकंटक प्राणिसूदनि
मृदु हृदयवासिनि। गीतसुधावनि ॥ २॥
४७. ``ह''कार गीतम् ।
हंसतूलिकासने हंसिनी ।
हृदयगह्वरधामे कन्याकुमारि ॥ पल्लवि॥
तव दर्शनार्थं तव सम्मुखेऽहं
तिष्ठामि भावयामि दासोऽहम् ।
तव कृपया परया धन्योऽस्मि
नतोऽस्मि श्रितोऽस्मि शरणागतोऽस्मि ॥ १॥
अपराजिते लावण्यपूरिते
उदयरविकोटि दिप्तिसहिते ।
विषकंधरहर चित्तापहारिणि
गीतसुधाकरि सदानंद भक्तसौधामिनि ॥ २॥
४८. ``क्ष''कार गीतम् ।
क्षमाप्रेमसंजीविनि पावनि
आशुशुभकारिणि निरंजनि ॥ पल्लवि॥
सदाशिव मानसोल्लासिनि
साधकोत्साह धृति श्रद्धावर्धिनि ।
बाणासुरमर्दिनि सुलोचनि
चिदानंदरूपिणि गीतसुधावनि। ॥ १॥
पूर्णेंदु वदने कौमारि
शशिशेखरे श्रीकन्याकुमारि ।
सुविचारामृतवाहिनि श्रीकरि
आसुरीगुणदमनि दयाकरि ॥ २॥
४९. ``त्र''कार गीतम् ।
त्रयंबक नाट्ये सहनर्तकि ।
कन्याकुमारि लास्यप्रदर्शकि ॥ पल्लवि॥
सृष्टि स्थिति लय चक्रमोदिनि
व्यष्टि समष्टिविभाग रंजनि ।
विज्ञानदुरंधर तत्त्वबोधिनि
वासनात्रय क्षयकारिणि ॥ १॥
भोगापवर्गार्थमिदं दृश्यं
रक्षय मां सदा हृत्कंजभासिनि ।
घंठानाद तरंग तन्मयि
परानादमयि गीतसुधापयि ॥ २॥
५०. ``ज्ञ''कार गीतम् ।
ज्ञानयोगं प्रद कन्याकुमारि ।
विज्ञानमुदं प्रद ध्यानगोचरि ॥ पल्लवि॥
पंचविषय याने चंचलोऽहं
भोगयोग मध्ये चपलोऽहम् ।
अंतर्मुखाराधन भाग्यं प्रयच्छ
बहिर्मुख धर्मार्थं स्वास्थ्यं प्रयच्छ ॥ १॥
अध्ययन चिंतन सृजनशीलोऽस्मि
मनन मंथनकर्मरतोऽस्मि ।
गीतसुधापाने सदा रसिकोऽस्मि
निधिध्यासनरतं मां कुरु भक्तोऽस्मि ॥ २॥
एकत्व भाव नंदने संचारिणि
अनेकत्वदर्शने त्रिलोक सम्मोहिनि ।
त्रिपुटिरहित मुक्तिसदने एकाकिनि
मम मृण्मय देहं चिन्मयं कुरु जननि ॥ ३॥
इति देवी कन्याकुमारि वर्णाद्याक्षर गीताञ्जलिः समाप्ता ।
Gitam for letters ङ ञ ठ ण etc. are modified.
Composed, encoded, and proofread by
Smt. Rajeshwari Govindaraj