% Text title : Lakshmi Stava % File name : lakShmIstavaH.itx % Category : devii, lakShmI % Location : doc\_devii % Proofread by : Rajesh Thyagarajan % Description/comments : From Stotrasamuchchaya 2, Edited by Pandit K. Parameshwara Aithal % Latest update : May 10, 2023 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Lakshmi Stava ..}## \itxtitle{.. lakShmIstavaH ..}##\endtitles ## sudhAsArAsArAdapi bahulasArA kuvalayA\- valIdAmashyAmA shubhavibhavasAmastyajananI | mama shreyo bhUyo vitaratu sudhAsindhuduhituH kR^ipAtu~NgApA~NgollasadasamashR^i~NgAralaharI || 1|| jagatsraShTA sraShTA shrutibhiranavadyaprasR^itibhi\- chaturmukhyA mukhyAnapi guNalavAMste kavayitum | rame neShTAmIShTAM tava shishurayaM tvatkaruNayA grahItuM stambo.api prabhavati sitAM saikatayutAm || 2|| mahimnaH pAraM te druhiNapurajittAraka jitaH kShamante vAnante janani na chatuShpa~nchaShamukhAH | yadi tvanye manye jaladhipatikanye kavayituM yaterannIsherana mashakashishukAH sindhugilane || 3|| nR^ipAn nAvannAvaM bhavajaladhinAvaM tava kR^ipAM rame nIchAH kechijjahatu bhuvi nirviNNarasanAH | kimetairjAhnavyAstaTabhuvi khanadbhiH pravaNatA\- durApoda kUpaM tvayi kR^itabharo.ahaM tadadhunA || 4|| tava stotraM chitraM tribhuvana pavitraM jigadiShoH samantAjjR^imbhantAmamalavadane padmasadane | naTadbhAShAyoShAkarakamalabhUShAparikana\- nmaNIbhUShonmeShapratimagatayo me bhaNitayaH || 5|| shriyAmekaM mUlaM dviradagatinamraM trividhachi\- tkalApaM saMsevyaM savinati chatuShpa~nchaShamukhaiH | pradIpatsaptAshvaM prabhavatu sadAShTApadapadaM mahAlakShamyAshchitte mama navalasadyauvanadasham || 6|| sarasvatyA satyA valamathanasatyApyasulabhaM bhavaddAsyaM pashya~njigadiShati yaste tadupamAm | ayaM nimbaM bimbaM vivadiShati padme surataroH samaM loShTaM spaShTaM hi kalayiShate.aShTApadagireH || 7|| tvayA juShTastuShTaH kamapi khalu duShTaM balibhujaM samatrAsta trastaM paramapuruSho rukmiNamapi | tavAsAnnidhye.ahan dashavadanachaidyAdichapalA\- nitIdaM te lakShmi prathayati ghR^iNaikapravaNatAm || 8|| jagadrakShAshikShAprabhR^itimahimAnaM bhagavati tvadekAntaM prAhuH katichidapare tvatpatigatam | nayApetairetairalamakhilavedAntakalane pratImastanmishraM khalu shubhavatoramba bhavatoH || 9|| tavAnalpaM talpaM phaNikulapatistadgiripate\- ruroratnaM pratnaM tava bhajati bhadrAsanagatim | trayo vedAH saudhA janani kamalaM sadma vimalaM bhavadbhUmA bhUmAvahaha na padaM vA~NmanasayoH || 10|| mahAvR^itte yatte sakaruNakaTAkShaprasaraNAt padaM svaM svaM prAptA hariharaviri~nchiprabhR^itayaH | jagachchittAyattA jagadudayasattAvagatayo yatastat tvaM tattvaM paramiti rame nishchinumahe || 11|| navonmIlannIlotpaladalakulashyAmalatamaH kaTAkShaste haste kalayati naraM yaM bhagavati | ayaM ra~NgadbhR^i~NgotkaTakaraTigaNDasthalagala\- nmadasyande.alinde charati charitaM te.adbhutamidam || 12|| tava bhrAtA trAtA kuvalayagarimNastava pitA mahAsattvo dhatte bhuvi bhuvanasAmrAjyamakhilam | kShamaH sR^iShTau puShTau patirapi nighR^iShTau cha jagatAM rame sAmrAjyaM te ka iha vivarItuM prabhavati || 13|| raNe shaktiM yuktiM nayavidhiShu rakti guNagaNe gurau bhaktiM saktiM kR^itaphaNitivR^iktiM cha sadasi | vahanto.api kShmApA dadhati laghutAM tvadvimukhitA\- stvayA dR^iShTo duShTo.apyakhilaguNajuShTo.amba bhavati || 14|| kR^ipAvarShotkarShAdamarashikhiharShaM vidadhataM paravyomni sphItaM sakalaphaladaM kR^iShNajaladam | shritA vidyullekhA chalanarahitA nityamahitA ramA tR^iShNApUrtyai vasuvisaramAkalpayatu naH || 15|| pravAlashrIroShThe kachabhuvi ghanAlidyutiruro\- bhuvau kumbhAvabjaprathitakadanaM chApi vadanam | kaTI gotrAbhogAspadamahimahIbhR^ittaTavasa\- tyuraHsadme (padme) bhagavati tatastvaM jayamayI || 16|| mukhe chAndrIM shA~NkhIM galabhuvi cha mainIM nayanayo ruchiM saudhIM vAchi trivaliShu cha vaichIM prapadayoH | padoH kaurmIM pAdmIM nakhatatiShu mauktIM cha dadhatI vyanakShi shrI(rabdhe)rlayamanuvahanti striya iti || 17|| sumollAso hAso bhramaranikarAste.amba chikurA madhudroNI vANI bhagavati karau pallavavarau | bhujau shAkhAbhedau nakhamukhatatiH korakatati\- stato manye.amba tvAM manasi lalitAM kalpalatikAm || 18|| traM vaktraM vachanarachane mAdhavaruchiH kachaH kR^iShNashchakraprakR^itimapi romAlirayate | valagne saMlagnA harivihatirityamba satataM padaM dhattAM chittAmburuhi mama te viShNumayatA || 19|| sudhAMshuste vaktraM sumavilasitaM mandahasitaM sudhA vANI veNI surapatimaNIbha~NgasaraNiH | suShirnAbhirbAhU suratarulatAsundaratamau suvarNaprAgalbhyaM tava janani gAtreShu jayati || 20|| trivR^idbhAvaM pa~nchIbhavanamapi cha kvApi samaye yataH svairaM nArAyaNi tava barIbharti kabarI | tamo nAma shyAmaM triguNasamatAyAM yaduditaM jaganmAtastat te taditi hR^idi tAM nishchinumahe || 21|| sudhAsAndrashchandrastava sumukhatAM prApya natadR^ik chakorInArINAM mudamapi dhurINAM rachayati | iti shrutvA matvA svayamapi tadAshishrayiShayo\- ditAM shyAmAM shyAmAM tava kiraNayAmAmba kabarIm || 22|| kirITAdrernIlopalaphalakasopAnapaTalI shiraHpashchAchchakradyumaNitanusa~njAtayamunA | shriyaM dadyAdudyatsadanakamalAmodavashava\- rtyalishreNI veNI ratipatikR^ipANI janani te || 23|| maNIbhUShAveShAvaruNahariNA~Nkau nigalitau tamaHshreNI veNIghR^itamakR^ita sImantamabhitaH | jaganmAtaryattattimiranigalopA~Ngavalaya\- praNAlIvArAlI bhavadalakapAlI vijayate || 24|| garAdugre vyagre galati gatabhIH kanturudadhe\- rjanitrIbhiHstrIbhirjitavalabhidAptvendrajiditi | prathAM kR^iShNaM jiShNustava janani veNIkapaTato\- .asR^ijanmAyAmeghAvalimuditashailImukharuchim || 25|| sphurachchUDAratnadyumaNiyamunAyAH kachatate\- strikAkulyA shroNIgiriyugalagA te.amba jayatu | kalAM kAlonmIlatkanakakadalIkandaladalA\- ntarAlInAM lInAmiva pidadhatI yA vilasati || 26|| mahAnIlAvAle mR^igamadarajoleshakalite jalaM kAle kAle raviduhiturAlipya cha yadi | tamAlaM puShNIyuryadi cha paripuShyet sa kamale tadA tanma~njaryaH kathamapi dadhIran kacharuchim || 27|| aherjetA barhiHsthitibhR^idinajAtAnukR^itiru\- tpalAdeshaH pAshI marudadhipatiH shrIdavibhavaH | shivaH sraShTA kR^iShNastava kachabharo.aShTAvapi dishAM patIn mUrtIstisraH svayamanuvidhatte bhagavati || 28|| halAghAtAd bhItAM sharaNamupayAtAM vinihitAM tvayA pashchAdbhAge.avitumakaruNodyatkaruNayA | raveH kanyAM manyAmaha udadhije te.amba kabarIM bhayAt kR^iShNA veNItyanukalitanAmAntaradhR^itim || 29|| suvAsaghrIchIbhirvachanarachanAbhirnichulitaM lasadbhAsollAsachChavishamitanamrArtitimiram | shashA~NkaM sha~NkantAM katichana mukhaM te.ambujasakhaM na chaitat sammanye sa hi janani janmAdikuTilaH || 30|| jale sthitvA kR^itvA mukhamabhimukhaM chApi savitu\- rbhramadbhR^i~NgArAvachChalamanujapApyApa nalinI | na te vaktrachChAyAlavamapi nije smerajalaje vidhau vairaM svairaM vahati na tapo.apyamba bhavati || 31|| sadAdarshasphUrtiM dadhati vadane te.abjasadane kva chandrasyonmeShaH sama iti kathA tasya vitathA | jaganmAtastasmAt sa bahulakR^ishastAvakamukha\- shriyai dhatte taptaM bhavashirasi gIrvANashirasi || 32|| sadA nAsAmuktAbharaNamiSharohiNyupagataM patiM dR^iShTvA vakraM paruSharuShamekatra militAm | chahantIM tArAlImiva savusR^iNAM mauktikamayIM lalantIM shrIkAnte tava jayatu sImantasaraNiH || 33|| maNItATa~NkA~nchachChuraNakachanIlAvaraNasa\-\- dradashreNImuktAchChuraNasupathe manmatharathe | vachovij~neyAshche tava mukhamaye pArshvakalitaM kapoladvandvaM te mukurayugamambAmanumahe || 34|| jayan mUrtIstisrastisR^ibhiriShubhirmadhyaphalake likhan romAlIM te jayalipimudIrNatrivalikAm | smaraH shrAntyAnenAnanashashini dattau sakamalo\- tpalAropau ropau kimu janani dR^igbhrUyugamidam || 35|| mahAsaurabhyaM te mukhanalinamAsvAditumaNo\- raNIyastvAdAste kimu tilakarUpeNa sa hariH | bhavatphAle no chenniratishayasaurabhyabharite prakarShaH kastUryAH ka iva bhavitA lokajanani || 36|| bhavadvaktrachChAyAM kalayitumihAmbhojashashinau tapastaptvA rAtrindivamanukala puShkarataTe | gatAvarthAnarthau parimalakala~NkaprasaraNA\- dato hetoretau mama janani vairaM kalayataH || 37|| na saurabhyaM chandre na cha sarasije ramyamamR^itaM sadAdarshashchAmbhoruha vanavihAraikarasike | vidhatte kastUrItilakakalane sevakavidhiM tataste vaktrendorupamitipadaM vyomakamalam || 38|| vR^iShollAsAvAsaM tava vadanachandraM bhramarakai\- rvR^itaM sAmyaM prepsannalikulayutaH sannupagataH | tato rAkAchandro mama janani daivaj~navibudhai\- rihochcho.ayaM nIcho.ayamiti vivR^iNadbhiH parihR^itaH || 39|| harervakShobhAge kamaladalamAlyabhramabhR^itaH shrayaddAridryAdryuddalanashatakoTiprasR^itayaH | dadantAM kalyANaM mama jaladhikanye janani te kaTAkShAH kAlindIkuvalakulakUla~NkaSharuchaH || 40|| kura~Ngaste ra~Ngeshvari nayanashR^i~NgAravijito jahattandraM chandraM sharaNamagamat tvanmukharuchA | sa chApAsto hastArpitamakR^ita shambhormR^igamataH sphuratsvaishvaryeShvaShTasu charati bhikShAM pashupatiH || 41|| dR^ishoste sAmyepsarbhagavati chakoraiH saha mR^igo bhavadvaktrAmitraM hyakR^ita sharaNaM shItakiraNam | iti dveShAdAsye mR^igamadamadAstasya rudhiraM dhruvaM no chet kA syAdupakR^itirihAtyantasurabhau || 42|| shrutishreNIveNIkusumarasapA Ni~Ngaya(ma) pada\- pravAlashrIrnIlotpalavisadR^ishau tAvakadR^ishau | shishU kha~njanyA ityanumanumahe yatprasaraNA\- spade nR^ityantya(nye) sadavadhayaH siddhinidhayaH || 43|| purA pArAvAre sphuradamR^itasAre samuditaH sarojAnAM drogghA janani bhavatI chetyashR^iNavam | karoShi tvaM dR^iShTyA kalitadarahAsaprasarayA paraM sindhUnindUn bhagavati sudhaikAtmavapuShaH || 44|| dashAkR^ityA sattvaM nakharamiShato.alaktakamiShA\- dvajo raktaM vyaktaM bhagavati pado te.ashrayaditi | tamo.akShNorarkendvoH sharaNamagamat kajjalamayaM na chet tvaddR^iShTAnAM kathamiva tamo.amba prasarati || 45|| dhanurmInau bhrUdR^igyugamajaniShAtAM samakarau kuchau kumbhau shroNI kaTakamithunAbhAM kalayataH | kache.astyunmeSho.alishrita udadhikanye kR^itaShiya\- stadete sUkShmatvAjjanani na\-valagnaM vivR^iNute || 46|| svadR^ikshItAshItAMshchanukalananemasphuTamukho\- nmarandaste haste sitakamalakosho.atilalitaH | mahAlokAnIkAtmaka shishuparIpoShadhR^itasa\- tpayaHsha~NkhAsha~NkAM dadhadakhilapuShTiM dishatu naH || 47|| phaNAvatparya~NkapraNayini tavApA~NgatulanA\- guNAkA~NkShaM svendIvaramupanatArthaM kalayitum | svabimbAvAlAntarnyadhita suvayA puShTimayatA\- miti stokAlokAstadupagatima~NkaM vivR^iNate || 48|| trayo bhAgAH prAptA iti danusutAnAM diviShadAM sudhAyAM tatra dvAvasuraviShayAvantaradadhAt | dR^ishoste mohinyAkR^itirudadhikanye tava pati\- stavApA~NgAsa~NgAt tadiha jagadAnandamayate || 49|| jaguH pratnaM ratnaM katichidapare vidrumadalaM pare bimbaM nimbachChadanasadR^ishabhrUrbhugavati | tavoShThaM vaktrendoH savidhabhuvi bhaktyauShadhikulaiH parinyastaM manye lalitamupadApallavamiti || 50|| payaH pArAvAre phaNini shayitAyAH sadayitaM sudhAbhirgaNDUShAnuShasi rachayantyA ruchilavAH | tavoShThAdye mishrAH payasi ta ime shailakaShaNAd bahirvelaM nyastA janani dadhate vidrumapadam || 51|| purA pArAvAraM mathitavati varge diviShadAM vibhajyAdAnmodAdamitamamR^itaM yo bhagavati | jitAvidyAM vidyAmapi kalayatAM yo.amR^itamadA\- daho bimboShThAt te madhuramamR^itaM vaShTi sa hariH || 52|| sudhAM prepsannabdheH salilamupagR^ihyAmbudamayaiH karairmuktAsAro yadamR^itamupAdatta taraNiH | balAd darshe gR^ihNAtyudadhitanaye tatsuhR^idi te mukhe nyAsaM kartuM radanavasanAntastvadanujaH || 53|| hariH sAkShAllAkShAlasitamalikaM vIkShya bhavatIM bhavadroShonmeShAM yadaruNimalIlAmapadishan | prasannAM tvAM kR^itvA samaramata mAyI tvadadharaH same dadyAdadyAnupamavibhavAnamba jagatAm || 54|| iyaM sAkShAnmokShasrutiraruNabimbA tvadadharA\- duparyAsye chandre smitamahasi sA~Nke tilakataH | lalantI muktAlirjanani kanakAkalpataTitA shritaM veNI shreNIkR^itivaruNalokaM prasajati || 55|| svayaM sAragrAhI harirudadhisambandhanavidhA\- vadhAd rambhAdistrIH surapatigR^ihe tvAM tu jagR^ihe | vyabhA~NkShInniHsAraM tvamR^itamamarebhyastvadadhare suvAM rasyAM pAsya~njanani mama saubhAgyajanani || 56|| sarojAvAsinyA radanavasanasya pratimitau girAM bhAvaM tAvad viramayata shR^i~NgArakavayaH | sharachchandre yAvad dinadinamanuplutya sudhayA prarohan puNDrekShuH phalati phalamAruNyabharitam || 57|| mama shreyo bhUyo vitaratu sudhAsindhuduhitu\- rmahIyAn bimboShThaH praNamadabhayAlApamadhuraH | yamutprekShA~nchakre haririha radairmauktikavR^ite sudhApArAvAre smitavapuShi chintAmaNiriti || 58|| japATopAdAptaM (ttaM) bhavadadharabimbena madhuji\- tpadaM muktA jAtAstadanukalanAdeva cha radAH | adaH sA~Ngatyena smitamaviratollAsabharitaM na chitraM yanmAtarbhajati sumanaHsampadamiti || 59|| jaganmAnye manye janani jalajAtapraharaNo jagannetushchetomR^igamR^igayuretannipatitam | bhavannAbhImadhye nijahR^idi vidannAkShipadupa\- ryaho kuntaM romAvalighapuShamaindIvaramiti || 60|| ratiH kAmashchemAvasitatamaromAlishilayA mite madhyakShetre prathamarasasasyAnyatanutAm | yato vakSho.antastatkalitaphalarAshidvayamidaM jaganmAtaH sphItastanayugalarUpeNa lasati || 61|| phaNIshAnakShoNIdhararamaNamandAraviTapa\- dbhujAlambAmamba tribhuvanasamujjIvanalaptAm | tanUM vidmaH padme tava yaduditorojaphalayoH padaM romAlIdohadamR^iduladhUmAlirayate || 62|| grahotkarShAmarShAt tava nayanadAkShiNyavirahaM vidanninduH patnIH prapadanaparAste.amba padayoH | nakhAkR^ityA kR^itvA tava sumukhatAM prApaditi ta\- takala~NkaM romAlIM tvamasi kimu garbhIkR^itavatI || 63|| dvijAnAM rAjAyaM tava vadanatAmetya mahitAM vidhAya svaM bhAsvatkaragatamaridvandvamanisham | balAd gR^ihNan romAvalimayatamaH shR^i~NkhalikayA nyabadhnAdambAsyA valaya iva nAbhirvilasati || 64|| jayashrIromAlIM smaranR^ipakanatka~nchukapaTI\- kuTIbaddhAM rajjuM katichidasitAM te.abhidadhatAm | kuchau lIlAshailau pratirati ratIshopakalitAM kramonmUlaM nIlopalasaraNimenAM manumahe || 65|| prabhoH pa~nchAstrasya stanagirijuShaH ketanakR^ite dhruvaM nIto nAbhIsarasasarasaH ko.api makaraH | yada~NghryAgrAlagnA nayanasamayAkR^iShTavitatA latAshaivAlIva sphurati tava romAliranaghe || 66|| smaraH satyA ratyA saha kuchagiriprAntabhuvi te charan bandhaM ka~nchid viharati kimIpsurharajitam | sutaM yasmAdambApatati nibhR^itA bandharatatat\- pR^ithushroNIveNI sphurati tava romAvalimayI || 67|| jagadrakShAshikShAdyanuguNaguNAlAnagalitaM hareshchittaM mattadvipamurukuchAdryantaragatam | pathA netuM chetobhavabhR^itibhR^itA pANividhR^itA rame romAliste dhruvamajani nIlotpalasR^iNiH || 68|| rame neyaM nAbhiH smaravirachitAvAlavalayo na romAlI tasminnupajanitashR^i~NgAralatikA | stanau nemau tasyAM rathapada viha~NgadvayamidaM mukhendorAlokAnnibhR^itamiva bhItyA vilasati || 69|| asa~NkhyAkA lokAstava janani pAkA iti kR^ipA\- mapArAM bibhrANA samudamudayantI jalanidheH | sahAmUbhyAM chAbhyAmamR^itakalashAbhyAM pR^ithulasat\- kuchAbhyAmadhyaShThAH kimu vipulavakSho bhagavataH || 70|| hare rakShodakShotkarahR^idayavikShobhakarava\- sphuradvIro naivAnvabhavamiha shR^i~NgAramiti kim | tapastaptvA sha~Nkho janani galatAmetya kila te yayau shR^i~NgAritvaM muraharakarAshleShavashataH || 71|| tava sthAnaM padmaM tava cha tanayaH padmavasatiH kare dhatte chaitat tadidamiha karNAgranihitam | vitanyAt paishunyaM svaviShaya itIndurdvirudagAt samuktAtATa~NkAkR^itiravahitaste shravaNayoH || 72|| sudhAsadhrIchInaprachuravachanAlIvirachanA\- nadIpArAvArIbhavadadharabimbAntikabhuvoH | tara~NgagranyastA kramikanavamuktAvaliriva sphurantI lakShmi stAnmama shubhakarI dantasaraNiH || 73|| dhR^itonmeShastveSha prasabhamaruNo.amba tvadadharo vR^iShAtandrashchandro mukhamudadhikanye budhanute | jaganmAnyashroNIkaTakagurubhAvaH paramanu\- grahochchatvaM kaste janani vivarItuM prabhavati || 74|| tvayA padmaM sadmIkR^itamiti tadAshritya satataM mR^iNAlI tvadbAhudvayamR^idulatAM kAmamayatAm | na tat tasyAH shasyaM bhavati jaDasaMsaktavihR^ite\- riti j~nAtvA haMsAstava gatividastAM vilunate || 75|| jagatkartA bhartA tava tadakhilaM cha tvadudarA\- dudItaM tachchANu dhruvamiti vidan gautamamuniH | jaganmUlaM he shrIraNumamanutaitanna hi mR^iShA harishchApyasya strIM charaNaparamANorajanayat || 76|| gateyattaM chittaM praNatajanatAyA ghaTayituM bhavadrAgAbhogau bhagavati karau te manumahe | yayorekaikasminnapi vishadayantya~NgulilatA\- prapa~nchaH pa~nchAnAmiha suratarUNAM shrita iti || 77|| yadAlambA amba prachuravR^ijinAshchApi na puna\- rbhavAsa~NgaM sa~NgR^ihNata iti vadanti shrutigaNAH | prapannau tAvetau tava mR^idukarau santatapuna\- rbhavAsa~NgaM ra~NgakShitiramaNashR^i~NgAragR^ihiNi || 78|| bibhImaH pApebhyo na vayamavayantastava dayAM yataste hastAbje janani varavishrANanavidhau | samAhvAnaM kurvan khalakhalakhaletyevamabhayaM bhavatyA bhaktAnAM kathayati kanatka~NkaNagaNaH || 79|| manovAkcheShTAbhirmama janani sheShAchalapateH pratIpaM naivApaH kathamapi kadAchit kvachiditi | vrataM shrutyA satyApitamapi sa ma(ta)tyAja hi kuto yato muktAhAraM tvamupari kuche.ala~NkR^itavatI || 80|| smitakShIrAmbhodhiH samajani mukhendorvikasito\- tpalAbhyAM te dR^igbhyAmapi samuditApA~NgayamunA | stanAdrI prAsUta stabakava(da)sau romalatikA rame chitraM kAryAt karaNajanireShA vapuShi te || 81|| sasharvANI vANI maghavashukavANImukhanama\- tsurIveNIshreNIpaTunaTanamANikyakaTakam | manovR^ittyA dhR^ityA mama samanusR^ityApi tava pat\- sarojaM dadhre shrIH kimu kamalinIbhAvavibhavam || 82|| mahApadme padme satatakR^itasadme yadudite mukundaH sha~NkhenAbhyaShichadalinIloparakR^ite | prapadye pAdAbjaM makarakalitaM kachChapayutaM tadetad yatsa~NgAd bhavati navanikShepavibhavaH || 83|| prabhoH prAbhUnnAbhernabha iti babhAShe bhagavatI shrutiH sAbhUnmadhyAnnabhasa iti bAbhAti hR^idi naH | hR^idashchandraH sAndro.abhavaditi tayAbhANi kamale nakhAliste chandrAnniyutamayutaM chApi sR^ijati || 84|| kadAchitkailAse janani vicharantyAM tvayi pada\- shriyA shoNenAyaM rajatagirireSho.aruNa iti | bhramAdrudre.anyAdriM jigamiShati te mandahasitaM punA raupyaM kR^itvAruNaditi rame saMshR^iNumahe || 85|| mahIyasyAM yasyAM pR^ithagadhita gAnopaniShadA namaH sharve kharvetaravinayapUrvaM rachayati | rame chUDAchumbI shashadharashishuH sA cha taTinI nakhAnAM tAM kAntiM ka iva vivarItuM prabhavati || 86|| kalA kApi tvaM shrIH kisalayapadA kIrtimahitA kumAryabdheH kUrmaprapaddalasitA keshavayutA | tviShAM koTiH kaishikyasi sapadi te kautukamayaH kaTAkShaH kalyANIH karakanakadhArAH kiratu naH || 87|| dhruvaM dhAvandhAvaM dhR^itaparibhavaM samprati bhavaM navaM nAvannAvaM namadanubhavaM te.amba vibhavam | achaM jIva~njIvaM shashabhR^idupajIvantamiva mAM kaTAkShaH kalyANIH karakanakadhArAH kiratu naH || 88|| varaM vArandhAraM prapadanamaraM ra~njitavatAM dhuraM dhArandhAraM praghaNabhuvi raMraMsyasa iti | stute pAraM ra~Ngeshvari tava kaTAkSho.achiramasUn dviShAM Chindan bhindannapi bhasitasAtkR^itya ramatAm || 89|| svayaM dhyAyandhyAyaM suguNasamudAyaM rasamayaM vayaM pAyampAyaM sadamR^itamayaM shrIriti padam | prahR^iShyAmaH sAyantanavikachamallIrasamirut\- kabaryambAlamba sadhanamavilambaM vitara naH || 90|| namanmuktAkAraM mama hR^idayashuktau janani te sharIraM taM mantraM svayamapunaruktaM bahu japan | prapadye sadyastvAM turagarathahastyAdibahulAM tavApA~Ngastu~NgasthirakanakadhArAM dishatu naH || 91|| sudhAsindhau sandhau phaNipaphaNamANikyamahasAM parIrambhArambhAnubhavasubhagaM bhAvukahR^idA | lasadratyAH patyA shriya udayadAnandakalikaH kaTAkShaH kalyANIM kalayatu sa naH kA~nchanakhanim || 92|| jahanmUlyaM mAlyaM sakutukamalaulyaM vitaritu\- rhareryo.abhUdyo.abhAdapi chipiTamuShTiM vitarataH | yadAlambaH shambapraharaNavataH ko.api vibhavaH kaTAkSho.asau lakShmyAH pR^ithuladhanadhArA dishatu naH || 93|| shriyAM dAturjetuH shritasurataroraNNayaguroH svayaM jihvAsiMhAsanamadhigatA me bhagavatI | manomUrtiH shrIste manasi vilasantI vigalita\- prapannArtisphUrtirvasuvisarapUrtiM dishatu naH || 94|| shishoriShTAM cheShTAM jagati jananIvAlikalanAM latA padmasyeva tvasi mama kR^ipAvAridhimayI | vachaH pUjAvyAjAdrachitamapachAraM mama rame kShamitvA kalyANIM karakanakadhArAM vitara naH || 95|| atipratnai ratnai \.\.\.\.ratnaiH suruchiraiH kR^itonmeShA bhUShAH sutaTidavisheShA dhR^itavatI | sphurantI padmAntarmama kanakavarShANi kiratI ramethAstrAyethA haripuruShakAraikarasike || 96|| trayIsaudhe gAdhe shaThamathanagAtheShTasaraNau sthirashrImadrAmAnujamunivachaH puShpashayane | shayAnA tanvAnA bhagavata ihAnandamayatAM kaTAkShaivIkShethAH prapadanayutAM dAsajanatAm || 97|| kR^itAnandasyandaM kanakajaladhArAjalagharaM kaTAkShaM lakShmi tvaM kalaya mayi kAruNyavivashA | viShakto yasyAsau karituragaratnAlibharita\- strayANAM lokAnAM dishati varasAmrAjyavibhavam || 98|| iti shrIlakShmIstavaH samAptaH | stotrasamuchchayaH 2 (86) ## The Lakmlstava (86) in ninety-eight verses in the SikharinI metre is probably a work of Bukkapattanam Venkatacharya, the author of the other work in the codex. He mentions the name of Surapuram Annayacharya in this stotra (v. 94). Proofread by Rajesh Thyagarajan \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}