महाविद्याकवचम् २
सदाशिव ऋषिर्देवि उष्णिक्छन्दः उदीरितम् ।
विनियोगश्च देवेशि सततं मन्त्रसिद्धये ॥ १॥
मस्तकं पार्वतीपातु पातु पञ्चाननप्रिया ।
केशं मुखं पातु चण्डी भारती रुधिरप्रिया ॥ २॥
कण्ठं पातु स्तनं पातु कपालं पातु चैव हि ।
काली करालवदना विचित्राचित्रघण्टिनी ॥ ३॥
वक्षःस्थलं नाभिमूलं दुर्गा त्रिपुरसुन्दरी ।
दक्षहस्तं पातु तारा सर्वाङ्गी सव्यमेव च ॥ ४॥
विश्वेश्वरी पृष्ठदेशं नेत्रं पातु महेश्वरी ।
हृत्पद्मं कालिका पातु कण्ठं पातु नभोगतम् ॥ ५॥ var उग्रतारा नभोगतम्
नारायणी गुह्यदेशं मेढ्रं मेढ्रेश्वरी तथा ।
पादयुग्मं जया पातु सुन्दरी चाङ्गुलीषु च ॥ ६॥
षट्पद्मवासिनी पातु सर्वपद्मं निरन्तरम् ।
इडा च प्ङ्गला पातु सुषुम्ना पातु सर्वदा ॥ ७॥
धनं धनेश्वरी पातु अन्नपूर्णा सदावतु ।
राज्यं राज्येश्वरी पातु नित्यं मां चण्डिकाऽवतु ॥ ८॥
जीवं मां पार्वती सम्पातु मातङ्गी पातु सर्वदा ।
छिन्ना धूमा च भीमा च भये पातु जले वने ॥ ९॥
कौमारी चैव वाराही नारसिंही यशो मम ।
पातु नित्यं भद्रकाली श्मशानालयवासिनी ॥ १०॥
उदरे सर्वदा पातु सर्वाणी सर्वमङ्गला ।
जगन्माता जयं पातु नित्यं कैलासवासिनी ॥ ११॥
शिवप्रिया सुतं पातु सुतां पर्वतनन्दिनी ।
त्रैलोक्यं पातु बगला भुवनं भुवनेश्वरी ॥ १२॥
सर्वाङ्गं पातु विजया पातु नित्यञ्च पार्वती । var सर्वाङ्गं सर्व निलया
चामुण्डा पातु मे रोमकूपं सर्वार्थसाधिनी ॥ १३॥
ब्रह्माण्डं मे महाविद्या पातु नित्यं मनोहरा ।
लिङ्गं लिङ्गेश्वरी पातु महापीठे महेश्वरी ॥ १४॥
सदाशिवप्रिया पातु नित्यं पातु सुरेश्वरी ।
गौरी मे सन्धिदेशञ्च पातु वै त्रिपुरेश्वरी ॥ १५॥
सुरेश्वरी सदा पातु श्मशाने च शवेऽवतु ।
कुम्भके रेचके चैव पूरके काममन्दिरे ॥ १६॥
कामाख्या कामनिलयं पातु दुर्गा महेश्वरी ।
डाकिनी काकिनी पातु नित्यं च शाकिनी तथा ॥ १७॥
हाकिनी लाकिनी पातु राकिनी पातु सर्वदा ।
ज्वालामुखी सदा पातु मुख्यमध्ये शिवाऽवतु ॥ १८॥
तारिणी विभवे पातु भवानी च भवेऽवतु ।
त्रैलोक्यमोहिनी पातु सर्वाङ्गं विजयाऽवतु ॥ १९॥
राजकुले महाद्युते सङ्ग्रामे शत्रुसङ्कटे ।
प्रचण्डा साधकं माञ्च पातु भैरवमोहिनी ॥ २०॥
श्रीराजमोहिनी पातु राजद्वारे विपत्तिषु ।
सम्पद्प्रदा भैरवी च पातु बाल बलं मम ॥ २१॥
नित्यं मां शम्भुवनिता पातु मां त्रिपुरान्तका ।
इत्येवं कथितं रहस्यं सर्वकालिकम् ॥ २२॥
भक्तिदं मुक्तिदं सौख्यं सर्व सम्पत्प्रदायकम् ।
यः पठेत् प्रातरुत्थाय साधकेन्द्रो भवेद्भुवि ॥ २३॥
कुजवारे चतुर्दश्याममायां मन्दवासरे ।
यः पठेत् मानवो भक्त्या स याति शिव मन्दिरम् ॥ २४॥
गुरौ गुरुं समभ्यर्च्य यः पठेत्साधकोत्तमः ।
स याति भवनं देव्याः सत्यं सत्यं न संशयः ॥ २५॥
एवं यदि वरारोहे पठेद्भक्ति परायणः ।
मन्त्रसिद्धिर्भवेत्तस्य चाचिरान्नात्र संशयः ॥ २६॥
सत्यं लक्षपुरश्चर्याफलं प्राप्य शिवां यजेत् ।
राजमार्गं शिवमार्गं प्राप्य जीवः शिवो भवेत् ॥ २७॥
पठित्वा कवचं स्तोत्रं मुक्तिमाप्नोति निश्चितम् ।
पठित्वा कवचं स्तोत्रं दशविद्यां यजेद्यदि ।
विद्यासिद्धिर्मन्त्रसिद्धिर्भवत्येव न संशयः ॥ २८॥
तदैव ताम्बुलैः सिद्धिर्जायते नात्र संशयः ।
अशवसिद्धिश्चितासिद्धिर्दुर्लभा धरणीतले ॥ २९॥
अयत्नसुभगा सिद्धिस्ताम्बूलान्नात्र संशयः ।
निशामुखे निशायाञ्च महाकाले निशान्तके ।
पठेद्भक्त्या महेशानि गाणपत्यं लभेत् सः ॥ ३०॥
इति श्रीमुण्डमालातन्त्रे दशमपटले पार्वतीश्वरसंवादे मन्त्रसिद्धिस्तोत्रं कवचं अथवा महाविद्याकवचं सम्पूर्णम् ॥
मुण्डमालातन्त्रे दशमः पटलः श्लोकाः ५७-८६
Proofread by Aruna Narayanan narayanan.aruna at gmail.com, NA