श्रीमेनकानन्दिनीस्तोत्रम्
गीर्वाणाखिलसम्पदम्बुजवनप्रोन्मूलनाकौतुकि-
प्रौढोन्मत्तकरीन्द्रसैरिभवधक्रीडाप्रसन्नानना ।
देवैराप्तमनोरथैरतिगतक्लेशैर्मुहुर्वन्दिता
विश्वत्राणपरायणा विजयते श्रीमेनकानन्दिनी ॥ १॥
निःशेषामरवाहिनीकरिघटाशार्दूलविक्रीडित-
प्रौढाहङ्कृतिचण्डमुण्डहननेनाह्लादयन्ती सुरान् ।
भक्ताभीष्टविधानकल्पलतिका कारुण्यवारान्निधिः
श्रीश्रीकण्ठगृहप्रभा विजयते श्रीमेनकानन्दिनी ॥ २॥
लीलोन्मूलितदानवारिनिकराखण्डप्रतापोन्मदो-
द्गर्जच्छुम्भनिशुम्भदैत्यमृगयाहर्षस्मितास्याम्बुजा ।
इन्द्रोपेन्द्रसमर्चिताङ्घ्रिकमला वन्दारुचिन्तामणिः
श्रीमच्छम्भुकुटुम्बिनी विजयते श्रीमेनकानन्दिनी ॥ ३॥
या शक्तिर्मधुकैटभादिहनने विष्णुं चकारास्पदं
गीर्वाणाधिपतिं निलिम्पबलभिद्वृत्रादिकोन्मूलने ।
देवद्रावणविश्रुतासुरवधे दैत्यारिसेनापतिं
सा बाधौघविनाशिनी विजयते श्रीमेनकानन्दिनी ॥ ४॥
श्रद्धा तर्कवतां क्षमा बलवतां सम्पद्वतां नम्रता
शान्तिः सन्त्यजतां धृतिः प्रयततां भक्तिर्भवे जानताम् ।
याऽऽपन्नार्तिहरा हराभिलषिता तापत्रयोन्मूलिनी
सा सौभाग्यविधायिनी विजयते श्रीमेनकानन्दिनी ॥ ५॥
यामाहुर्निगमाः सदादिवचनैः सृष्टेः पुरा केवलां
या चेतोतिगतप्रपञ्चरचनामन्यानपेक्षा व्यधात् ।
अन्ते स्वात्मनि सन्निवेश्य निखिलं तिष्ठत्यखिन्नप्रभा
सा प्रत्यक्चितिरच्युता विजयते श्रीमेनकानन्दिनी ॥ ६॥
शैलेन्द्रजास्तवमिमं व्यदधात्प्रबोधा-
नन्दो गिरीन्द्रतनयाकरुणैकपात्रः ।
आनन्दसन्ततिमयं तनुतान्नराणां
गौरीपदाम्बुजमधुव्रतमानसानाम् ॥ ७॥
इति श्रीमत्परमहंसपरिव्राजकाचार्यस्वामिप्रकाशानन्दपुरीविरचितं
श्रीमेनकानन्दिनीस्तोत्रं समाप्तम् ॥
Proofread by Madhura Bal madhurabal11 gmail.com