श्रीनवदुर्गा स्तवः
कार्येण याऽनेकविधां श्रयन्ती, निवारयन्ती स्मरतां विपत्तीः ।
अपूर्वकारुण्य रसार्द्र चित्ता, सा शैलपुत्री भवतु प्रसन्ना ॥ १॥
स्वर्गोऽपवर्गो नरकोऽपि यत्र, विभाव्यते दृक्कलया विविक्तम् ।
या चाऽद्वितीयाऽपि शिवद्वितीया, सा ब्रह्मचारिण्यवताद् भवेभ्यः ॥ २॥
पादौ धरित्री कटिरन्तरिक्षं, यस्याः शिरो द्यौरुदिताऽऽगमेषु ।
अन्यद्यथा योगमयोग दूरा, सा चन्द्रघण्टा घटयत्वभीष्टम् ॥ ३॥
स्वराड् विराड् संसृतिराड् अखण्डब्रह्माण्डभाण्डाकलनैकवीरा ।
सा पापविध्वंसनसद्म कूष्माण्डाऽव्याद् अपायादयदानशौण्डा ॥ ४॥
द्वैमातुरत्वे द्विरदाननस्य, षाण्मातुरत्वे च कुमारकस्य ।
एकैव माता परमा मता या, सा स्कन्दमाता मुदमादधातु ॥ ५॥
कतस्य गोत्रादथवाऽपरस्मात्, किं वेतरस्मात् कथमेकिकैव ।
जातेति माताह्वयतां इता या, कात्यायनी सा ममतां हिनस्तु ॥ ६॥
कालोऽपि विश्रान्तिमुपैति यस्यां, काऽन्या कथा भौतिकविग्रहाणाम् ।
प्रपञ्च पञ्चीकरणैकधात्री, सा कालरात्री निहताद् भयानि ॥ ७॥
कालीकुलं श्रीकुलमप्यपारं, कृष्णाद्युपासा प्रवणं यतश्च ।
साऽनन्तविद्या विततावदाना, गौरी विदध्यादखिलान् पुमर्थान् ॥ ८॥
गृणन्ति यां वेदपुराणसाङ्ख्य, योगागमादेव महर्षयश्च ।
पुत्रान् प्रपौत्रान् सुधियः श्रियश्च, सा सिद्धिदा सिद्धिकरी ददातु ॥ ९॥
या चण्डी मधुकैटभप्रमथिनी या माहिषोन्मूलिनी,
या धूम्रेक्षेणचण्डमुण्ड दलिनी या रक्तबीजाशिनी ।
शक्तिः शुम्भनिशुम्भदैत्यदलिनी या सिद्धि लक्ष्मीः परा
सा दुर्गा नवकोटि मूर्तिसहिताऽस्मान् पातु सर्वेश्वरी ॥ १०॥
इति श्रीनवदुर्गास्तवः सम्पूर्णः ।