% Text title : shrIpadmAvatIpariNayatArAvalI % File name : padmAvatIpariNayatArAvalI.itx % Category : devii, stotra, devI % Location : doc\_devii % Proofread by : Malleswara Rao Yellapragada malleswararaoy at yahoo.com % Source : Venkatesha KavyakalApa % Latest update : June 10, 2016 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. shrIpadmAvatIpariNayatArAvaliH ..}## \itxtitle{.. shrIpadmAvatIpariNayatArAvaliH ..}##\endtitles ## % 15 shrImAnambhodhikanyAviharaNabhavanIbhUtavakShaHpradesho bhAsvadbhogIndrabhUmIdharavarashikharaprAntakelIrasaj~naH | shashvadbrahmendravahnipramukhasuravarArAdhyamAnA~NghripadmaH pAyAnnaH shrInivAsaH praNatajanamanaHkAmanAkalpashAkhI || 1|| shrImachchandrAnvavAye trijagati mahite bhUpatiH kashchanAsIt AkAshAkhyaH svatejaHprashamitasakalArAtigarvAndhakAraH | prAgAdyAshAvadhUTIkuchakalashataTIkShaumitAtmIyakIrtiH nirvelaudAryashAlI haririva dharaNIM hlAdayannAdareNa || 2|| putrAbhAvAtkadAchinnR^ipakulatilakaH putrakAmeShTihetoH kShoNIM sIreNa karShan sphuradamaladalaM haimamambhojamasyAm | dR^iShTvA tasmiMshcha kanYAM sarasijanayanAM putrikeyam | tvadIye\- tyAkarNyAkAshavANImanavadhikutukasmeravaktro.agrahIttAm || 3|| tasmin yaj~naM nR^ipendre kR^itavati mahiShI bhUrivAntarnidhAnaM divyaM tejo vahantI sphuTatamavibhavA labdhasaMskArasampata | arthaM shaktitrayIvAkShayamabhisuShuve shakrasAdhvIsadR^ikShA prApte kAle muhUrte lasitashubhaguNA mitratulyaM suputram || 4|| dhAtrI proktaH sa nighno guruShu vidhivadAkalpya tajjAtakarma svArasyantmIyaM chApyapatyaM vasudamavanijAM padmataulyena padmAm | chakre bAlashcha so.ayaM vidhuriva vavR^idhe vAsaraishshuklapakShe pitrAderbrahmacharyavratamatha vidhinA prApa chAstrANi vedAn || 5|| bAlA rAjanyamauleranudinamatulAM vR^iddhimAsAdyamAnA seyaM labdhodayA shrIhimakarakalikevAvalehyA~NgashobhA | karNAntashrAntApa~NkeruhadalanayanA mandahAsojjvalAsyA subhrUssaundaryalakShmIriva sakalajanAhlAdabhUtyai babhUva || 6|| tataH kadAchit\-\- tAM padmAM svAlivR^indaissaha kusumavane pArijAtaprasUnA\- nyAdAyAdAya ramye kvachidanulavalImaNTape nikShipantIm | dR^iShTvA ko.apyuttamastvAM vivahati puruShashshrIsamR^iddho.achireNe\- tyuktA dattvA shubhAshIvachanamatha yayau nAradaH pAradashrIH || 7|| pashchAdAkheTalobhAdadhi gahanatalaM dhAvayantaM karIndra dR^iShTvA tu~Nge tura~Nge kamapi cha puruShaM padmapatrAyatAkSham | ko.ayaM shrImAn vanAnte vicharati sakhi kiM dR^iShTapUvastvayA.ayaM no chet pR^iShTvA svarUpaM smararuchiratanoshchittamAshvAsayAmi || 8|| iti sakhImuktavA taM prati\-\- kastvaM bhoHshrInivAso.asmyahamakhilajagannAyakaH kA.asi bAle shrImAnAkAshanAmA nR^ipakulatilakastasya padmA.asmi putrI | kasmAdatrAgatastvaM taruNi manasijaM pR^iCha jAne na chAhaM vAmo vAmoru yo mAmanayadayi tava shrIpadAmbhojamUlam || 9|| iti tena pratyuktA\- seyaM shyAmA latA~NgI sarasijanayanasyAntara~NgaM viditvA rere mA mAniShAda shR^iNu mama vachanaM yAhi shIghraM pitA me | AgantA kiM vivikte vasasi chiramiti shliShTamuchchArya pArshve j~nAtvA gUDhAM sakhInAM sthitimatha niragAllajjitA tAH prapede || 10|| yAte rAjIvanetre svayamatha sakalAssvAssakhIstA vihAya svIyaM prApyAvarodhaM hR^idi tamanupadaM chintayantyekarUpam | dInA kandarpatIvrapraharaNavikalasvAntara~NgA kR^ishA~NgI no naktaM no divA vA svapiti viharati snAti bhu~Nkte sma padmA || 11|| chetastasyA viditvA sa cha hayamadhiruhyAshu gehaM prapannaH kR^ichChreNAtItya kakShyAH kathamapi shayanAgAramabhyetya talpe | tAmevAntardadhAno dishidishi purataH pArshvatashchApi padmAM padmAkShImIkShamANaH pratikalamamuha chchintayaMstadguNaughAn || 12|| ehyehyuttiShTha sheShe kimidamupanataM nAsti te kiM bubhukShA bhu~NkShva prAtashcha samya~Nna hi bata bhavatA bhuktamityAmanantI | AsInA.a.arAchcha kiM te hR^idayagatamaho kiM nu vA sundarIM te dR^iShTvA mugdhaM manaste kuta iti vakulA me.abhidhatsvetyapR^ichChat || 13|| mAtaH kAntAradeshe dviradamanusarannekato daivayogAt AtmIyAbhissakhIbhissaha kusumavane pArijAtApachAyam | kurvantIM vyomanAmno nR^ipakulatilakasyAtmajAmambujAkShIm adrAkShaM tatkaTAkShairapahR^itamabhavanmanmanashchetyavAdIt || 14|| tataH netuM sambhojya taM drAgatha kR^itashapathA prasthitA tannagaryAH madhyemArgaM maheshaM kalashajamuninA pUjitaM sampraNamya | prApyAnuj~nAM maharShermahitaguNanidhervyAsasUnoshshukasyA\- tItyAraNyAni padmAlibhiratha vakulA sa~NgatA.a.asIt krameNa || 15|| dR^iShTvA pR^iShTvA cha bAlAH kimiha vasatha kA yUyamityAdaroktyA mAtaH padmAvayasyA vayamiti cha tadIyottaraM sA nishamya | paunaHpuNyena madhye pathi nR^ipatanayAshIlamAkarNayantI prAyAttUrNaM pramodAdviyadadhipapurIM prAMshuharmyAgrabhAgAm || 16|| tadaiva AyAntIM vIthikAyAmatha shatasuShireNAMshukenA~nchitA~NgIM gu~njAsha~NkhAdibhUShAmadhihR^idayatalaM svAtmajaM dhArayantIm | bhUtaM bhavyaM bhavadvaH phalamapi kathayAmIti tAraM bhaNantIm AnAyyoche bhaviShyadvada phalamiti tAM rAjapatnI pulindAm || 17|| saivaM pashchAtpulindA.apyayi tava tanayodyAnadeshe yuvAnaM dR^iShTvA kandarpatulyaM sitanalinadR^ishaM taM vR^iShasyantyabhIkShNam | viddhA kandarpabANairabhilaShitamasAvApnuyAdeva bAle\- tyuktvA rAj~nImayAsItpathipathi cha punarvyAharantI yathoktam || 18|| tataH putrImAsAdya rAj~nI tava kimabhimataM brUhi me naivagopyaM kiM vA kAryaM kariShye tadapi cha tanaye tanmamAchakShva sadyaH | evaM sAntvaM jananyA kathitamanugatA mliShTamAha sma padmA mAtaH shrIshAvalokAdahamabhajamimAM tadviyogajvarArtim || 19|| rAj~nI putryA rahasyaM kathamapi kathitaM satrapaM sAnutApaM shrutvA vai(pha)lyabhItasphuTitanijamanAH kR^ichChrataH sthAsnudhairyA | vAsu tvaM no vibhIyAstava hR^idayagataM naiva duHsAdhametat sAdhnomi tvAM cha sAdhu priyatamahR^idayAM modayAmItyavAdIt || 20|| dR^iShTvA padmAsakhIbhiH samamatha vakulA.a.akAshabhUmIshapatnIM devi prakhyAtakIrtirvR^iShagirinilayaH shrInivAsastavaiva | kanyAM sapremamaichChatkalayatu bhavatI padminIdAnapUrvaM tatkalyANaM sukhenetyavadadatha nR^ipashchAbhyanandattatheti || 21|| shrImAnAkAritastaM suragururachirAdetya chAkAsharAjaM shrImanvaishAkhamAse sitadalanavamIsaMyute shukravAre | asti hyadvAhalagnaM pratihatakaluShaM nishchitaM suprashastaM tasmin padmAvivAho bhavatu nR^ipavaretyevamArAdavochat || 22|| so.ayaM rAjendramaulistadanu sa vakulAM preShayan vyAsasUnuM dUtairAnAyya tasmai vidhivadatithisatkAramAdhAya dhImAn | padminyA tvAM vidhitsurgR^ihiNamadhipa ityuchyatAM bhavyavArte\- tyAkhyAyArAchChukarShiM phaNigirinilayasyAntikaM prAhiNottam || 23|| sadyastvaShTA tadAtve viyadadhipavibhorAj~nayA rAjadhAnIM navyaprAsAdaharmyapramukhanirupamaprAbhavADhyAmakArShIt | ranbhAstambhaiH praphullaprasavaphalayutai ramyachUtapravAlaiH chitraissaMsthAnabhedaistadanu purajano.abhUShayadra~NgavallyA || 24|| shrIrapyAtmapriyaM taM maNigaNanichite viShTare sanniveshyA\- bhyajya shrIgandhatailairgaganacharadhunIvAribhissnApayitvA | kShaumaM sandhArya nUtnaM mR^igamadatilakaM bhAlabhAge vidhAyA\- tAnIdgandhAnulepAdyakhilavidhapariShkAramAmodabhUmnA || 25|| pashchAdbrahmendravaivasvatavaruNakuberAdibhirdevavR^indaiH taistairbrahmarShivaryaiH prathitanijatapassampadunmeShavadbhiH | vANIndrANIbhavAnImukhavibudhavadhUsa~nchayaira~nchito.asau yukto mA~NgalyavAdyairviyadadhipapurIM prAvishachChrInivAsaH || 26|| padmAshrIshau tadAnIM karipatagapatiskandhadeshe niShaNNau AdAyAkAsharAjo nijakulagurubhiH pauravR^iddhairamAtyaiH | sAdhvIlokairmR^ida~NgAdyakhilashubhamahAtUryaghoShaishcha sArdhaM tIrNagrAmotsavau tAvanupamakutukAdAninAya svageham || 27|| shrIpadmAshrInivAsau nijagaLalasitAM shrImatIM puShpamAlAm anyonyaM mandahAsasphuTaruchiramukhAmbhoruho lIlayaiva | harShotkarShaM tadAnIM purajanahR^idayeShvAvahantau trivAraM vR^iddhAchArAnurodhAdvinimayamavanIshA~NgaNe tAvakArShTAm || 28|| sa shrImAn shrInivAso viyadadhipasutApANimAlambya pANau nirdiShTaM tena rAj~nA vividhamaNimayastambhadivyAntarAle | shrImatkalyANagehe maNigaNavilasanmaNTape vedimadhye bhAsvadbhAsvatprakAshaM maNimayamavishat prAMshu kalyANapITham || 29|| pAdau nirNijya tIrthairatha manujapatishshrIshamArAdhya samyak dattvA.analpaM kirITapramukhamaNimayAsheShabhUShAvisheShAn | putrIM padmAM sahemAkShatakusumashubhadravyapUrNAmbudhArA\- pUrvaM prAdAt pramodAtkarakamalatale so.api jagrAha padmAm || 30|| sraShTA shrIshena padmAgalabhuvi vidhivanmantrapUtaM prashaste lagne mA~NgalyasUtraM saha shubhaninadairdhArayitvA vidhij~naH | padmAhastAbjadattairhutabhujamapi tairhAvayitvA.atha lAjaiH etau jAyApatI shrIdvijavaravachasA.atoShayatsampraNamrau || 31|| shrImAnbrahmeshasa~NkrandanavaruNakuberAdimAn devasa~NghAn devo.anuj~nApya sarvAn shvashuramapi mudA.a.anamya pAdAravinde | sheShAdrau shR^i~NgabhAge ruchiramaNimahAsaudhasa~Nghe nitAntaM lakShmIpadmAvatIbhyAmaramata muditaH premasampUrNachetAH || 32|| shrImAn shrIvatsA~NkitavakShA vakShodhivAsilakShmIkaH | shrIve~NkaTeshadevassatataM shreyAMsi dishatu bhUyAMsi || 33|| shrIsheShasharmAbhinavopaklR^iptaH priyeNa bhaktyA cha samarpito.ayam | padmAvibhorma~NgalakaNThadeshe virAjatAM shrInavakaNThatAraH || 34|| || iti shrIpadmAvatIpariNayatArAvaliH samAptA || ## From venkaTeshakAvyakalApaH Proofread by Malleswara Rao Yellapragada malleswararaoy at yahoo.com \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}