रसकुल्यादशकम्
उत्कलजननि पदवन्दनं
करोमि भारति रक्ष नन्दनं
मसृणघुसृणतिलकच्छटा
कुसुमनिकरखचितशटा हे
गरीयसी वरीयसी हे
वर्णमालाधरि शारदे वरदे सत्त्वरूपा पौर्णमासी हे ॥ १॥
भगवती देवी मङ्गला काली
तारिणी चण्डिका नृमुण्डमाली
जागुलायी माल-पथरक्षणी
अनन्तकुमारी देवी-गोसाणि हे
पद्मावति महायानी हे
प्रकृतिपरमानादविन्दुमयि सत्यसनातनी मौनी हे ॥ २॥
विषयवासनामत्तबालिशः
रौमि मूढमतिक्षतकुलिशः
विपदि सम्पदि मधुरनाम
भजामि गच्छामि तव श्रीधाम हे
अज्ञाननाशिनि तारे हे
तृषातुरजनमानससुखदशीतलसलिलधारे हे ॥ ३॥
शरदि शारदि सिंहवाहिनी
महिषासुरमारणकारिणी
दशभुजागौरी दुर्गा माधवी
नन्दगोपगृहजाता यादवी हे
वसन्ते वासन्तीलोभे हे
सुरथसमाधिभक्तिविलासिनी विश्वशान्तिमयि शोभे हे ॥ ४॥
ऐङ्कारी ह्रीङ्कारी क्लीङ्कारी बीजा
नवार्णललिता प्रकृतिरजा
पूर्णोपमामयी चन्द्रचन्द्रिका
परमेश्वरीति परिपालिका सा
रसकुल्यामन्दाकिनि हे
समयानुकूला भावप्रकाशिका अन्तरङ्गसौदामिनि हे ॥ ५॥
दुर्गतिनाशिनी दुर्गाभवानी
सन्तोषी वायाणी विरजाजानी
दशमहाविद्या नामविख्याता
दुरितदलिनी सुखचर्चिता सा
महामाया महेश्वरि हे
कुलदेवी तारा महासरस्वति सकलनिगमशूरी हे ॥ ६॥
श्रीकनकपुर सुरसुन्दरी
कोटिचन्द्रभासविबुधनारी
सप्तस्वरवीणानादमहिमा
श्वेतहंसयानगतिसुषमा या
कविभावविशारदे हे
सारला सरला विरले योगिनी कवयन्ति पदे पदे हे ॥ ७॥
कविकालिदासभाषामाधुरी
सारलादासश्रीमुखवैखरी
रसगङ्गाधरी विपुलच्छन्दा
झङ्कडवासिनी परमानन्दा सा
अविस्मरणीया देवि हे
मूर्खोऽपि पण्डितः करुणाकिङ्करो भवति स महाकविः हे ॥ ८॥
चित्तचिन्तामणिमानसशान्तिः
गुणिगणभावविनोदकान्तिः
नवरसमयी कवितावल्ली
स्वादिष्टपायसपूरितस्थाली हे
अहो शब्दमयि गीते हे
सर्वविभूषणभूषितशारदी सुकोमलमयी सिते हे ॥ ९॥
प्रणवमयूखमणिब्रह्माणी
विश्वपरिव्याप्तनिगमवाणी
करुणानिर्झरचारुकौमुदी
शाब्दिकरञ्जिनी गीतिकौशिकी त्वं
चतुष्पदीमन्दाकिनि हे
चतुर्वर्गकलावैभवशेखरी काव्यसुखप्रसारिणी हे ॥ १०॥
इति नन्दप्रदीप्तकुमारविरचितं रसकुल्यादशकं सम्पूर्णम् ।
- अध्यापको नन्दप्रदीप्तकुमारः केन्द्रापडा, ओडिशा
Encoded, proofread, and composed by Pradipta Kumara Nanda