% Text title            : Sita Lahari
% File name             : sItAlaharI.itx
% Category              : devii, laharI
% Location              : doc\_devii
% Author                : Kavimani Subrahmanyashastri
% Proofread by          : Aruna Narayanan
% Description/comments  : Ramastutimanjari page 498
% Latest update         : June 3, 2023
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Sita Lahari ..}##
\itxtitle{.. sItAlaharI ..}##\endtitles ##
shriyaM labdhuM nityAM sakalabhuvaneshairapi nutAM
       shritAnAM saMsArAmbudhitaraNanautulyacharaNAm |
shriyaH patyuH kAntAM dasharathasutatvaM gatavataH
       shriyaM vande mandetaramahimamAnyAM janakajAm || 1||
varaM labdhvA.apyanyAdR^ishamahimavAggumbhanavidhau
       vidhervAlmIkishchApyapaTurabhavadyasya navane |
jaDAnAM mUrddhanyo janani tamimaM te guNagaNaM
       haThAttuShTUShe.ahaM laghu saphalayessAhasamidam || 2||
vinindantviShTA mAmalamupahasantu j~nanivahAH
       avaj~nAM vA kurvantvavanitanaye kAvyarasikAH |
stutau te no garvAdapi tu janisAphalyakR^itaye
       pravR^ittirjAteyaM mama durapanodyA kathamapi || 3||
na vidyAnaipuNyaM na cha kushalatA vA~Nmukhavidhau
       na vA shilpaj~nAnaM bhavati mama no yuktipaTutA |
kathaM vA rakSheyurjagati dhanino mAM guNadR^ishaH
       tvamevaikA jAgarShyagatikagatitvena janani || 4||
shapantaM ghnantaM vA tanayamakR^itaj~naM nikaTagaM
       na tachchitraM mAtA yadavati sadA vatsalatayA |
idaM chitraM manye paramavimukhaM mantubharitaM
       tvamAdhAvantI mAmanupadamavasyamba yadaho || 5||
manaH kAmakrodhAdyabhibhavamahAta~NkakaluShaM
       na te pAdAmbhojaM kShaNamapi niShevyaM kalayate |
sukhaM yogakShemaM vahasi khalu nityaM mama tathA\-
       .apyapUrvo.ayaM mArgo janani tava madrakShaNavidhau || 6||
tvadanye ye devA nijacharaNabhaktaikasadayAH
       api smartuM teShAM na sarati mano me kathamapi |
avAggamyAM hiMsAM tava kR^itavatI rAkShasavadhUH
       tvamekA me sevyA pavanatanayAdrakShitavatI || 7||
asAdhUnAM duHkhaM yadi nijakR^itaM bhu~njata iti
       pravAdo.ayaM, santaH kati kati na dR^iShTA bahushuchaH |
dayante sAdhUnAmapi tu kR^itino naivamasatAM
       nataM te pAdAbje tadiha kuru mAM satsu janani || 8||
niyantA lokAnAM nigamavachasAM tattvamapi saH
       tvayA yukto modaM bhavanavanayoste patiragAt |
viyogAtte kaShTaM samabhajata vAchAmaviShayaM
       mudaM sAnnid.hdhyaM te dishati tadabhAvashshuchamapi || 9||
amandairAnandairdhanavilasitaistundilahR^idAM
       samIpe dhanyAnAmanR^itaviShayairamba navanaiH |
kR^itaH kAlakShepastava padayugaM tUjjhitamabhUt
       kShamasvedAnIM tvaM hR^idupagamitA pAhi dayayA || 10||
durannairduShTA me dashamukharipupreyasi tanuH
       manaH kAmakrodhAdibhirapi hataM vAkcha nR^inavaiH |
phalaM tasmAnna syAttrividhakaraNairamba karaNaiH
       sukhaM prAptuM panthA mama tava vinA devi karuNAm || 11||
kR^itAgaskatvaM me bhavatu na cha kAkAdavaratA
       na rakShaHstrIbhyo vA janani mama duShTatvamadhikam |
kuto rakShAhetoshchiramadhikachintAM kalayase
       vare dInAnAM mayyapi kira kaTAkShaM sakaruNam || 12||
anAgaskaM prAptaM sharaNavadamekaM nishicharaM
       patiste mantrIndraiH kR^itavipulamantrashchiramapAt |
kR^itAgaskaM mR^ityoriva hanumato bhItibharitaM
       gaNaM rakShaHstrINAM dharaNitanaye tvaM svayamapAH || 13||
samaskArShItka~NkaM prabhurapi patiste tava kR^ite
       tatArAmbhorAshiM suhR^idamapi shAkhAmR^igamadhAt |
aho mAdR^ikShANAM paramasulabhA.asi shritavatAM
       shishUnAM saulabhyaM bhavati hi savitryA anupamam || 14||
dadhAnA sIte.abjaM karasarasije, kA~nchanamayaM
       vasAnA vAsastvaM varamaNivibhUShA~NkitatanuH |
dR^ishaM vinyasyantI mayi sakaruNAM sasmitamukhI
       priyotsa~NgAsInA nayanapathagA syA mama kadA || 15||
tarutvaM grAvatvaM mR^igapatagabhAvaM cha gamitaiH
       katha~nchijjIvaiste kuhachidupayogashcha bhavati |
naratvaM tatrApi dvijanarajanuShTvaM gatavatA
       vivekitvAbhAvAjjanani na mayA.artho.astyaNurapi || 16||
kR^itaM kAmAt krodhAddraviNalavalobhAchcha duritaM
       manaH kampaM dhatte narakagatimutprekShya niyatAm |
na me prAyashchittaM kathayitumalaM shAstranivahAH
       tavA~NghrI seve tajjanani munichittaikasadanau || 17||
janitvA bhUloke janani paribhoktuM svaduritaM
       viyogAdbandhUnAM viShasamanirarthabhramaNataH |
sadA dAridryeNApyanishamanutaptAMshcha manujAn
       apA~NgaishchetpashyeramR^itasahaje te kShayati kim || 18||
chiraM yuddhvA shrAnto.apyatha cha vinikR^ittachChadapado
       vaman vaktrAdraktaM jigamiShurapi pretapadavIm |
jaTAyurdaddhre.asUn raghutanayayAnAvadhi hi yat
       sa eSha pratyakSho janani tava saMsparshamahimA || 19||
chalachChampAtulyAM chapalanayanAM chArugamanAM
       dashAsyo dR^iShTvA tvAM damitabhuvano.api smaravashaH |
madAnmatvA bhogyAM vipadamatulAM mAtaragamat
       tadIyabhrAtA.agAt sukhamakhilamAteti kalayan || 20||
yadi draShTuM sAkShAjjanani bhavatIM susmitavatIM
       ahaM pratyUhI syAmanupamakR^ipe duShkR^itachayaiH |
api svapne dR^ishyA bhava makuTakeyUrasubhagA
       chirAdAshAmetAM chinuhi paripUrNAM kathamapi || 21||
mahAn mAno yo mAM namayati na kasyApi purato
       na taM nAdAntasthe shlathaya karavai te tu vinatIH |
dayAM yadyAdad.hdhyA itaramatha bud.hdhyA na kalayai
       vashasthe kShIrode janani gaNayedgopamiha kaH || 22||
chaturbhiH kiM vedairviditaparamArthairapi bhR^ishaM
       samastairvA shAstraissadasi paravA~NmudraNachaNaiH |
niSheve tvAM labdhuM satatamiha chAmutra cha sukhaM
       hanUmantaM dR^iShTvA mama matiriyaM mAtaruditA || 23||
sakR^innatvA martyo janani padapadmaM tava sukhI\-
       tyanukroshantyAryA viditanigamAntArthagatayaH |
namAmya~NghrI nityaM natabudhajane te yatamanAH
       na me shAntaM duHkhaM tadapi vada hetuM varaguNe || 24||
tava prArabdhaM tvaM hyanubhavasi tannAshanavidhau
       na shaktaH ko.apIti prativachanamambArpayasi chet |
bhavedvyarthA sevA tava charaNayorme kila tadA
       yato me pApAnAM na cha paramiyattA phalavatAm || 25||
vishuddhaM vij~nAnaM sahajamiha viprAnvayajuShAM
       raNotkarSho rakSho.antakagR^ihiNi rAj~nAM cha sahabhUH |
dvijassan lajje.ahaM bhuvi kathayituM mUDha iti mAM
       tamohantryA dR^iShTyA taraNikulabhUShe snapaya mAm || 26||
kaTAkShAste kAmAn dadati karuNApUrakalitAH
       ta ete labhyAssyussakR^idapi padoste praNamanAt |
upekShA chedatrApi cha na kimiva kuryAstvamanaghe
       phalaM rasyaM vR^ikShA api dadati pAdAshrayavate || 27||
munIn devAn prAj~nAnavasi yadi kastena garimA
       svayaM te samprAptAstvadavanadashAM svaiH prayatanaiH |
amUdR^ikShaM ka~nchidgativikalamaj~nAtasukR^itaM
       svayaM rakShitvA.amba prathaya karuNAM te tribhuvane || 28||
prachAro yAvAn me pratidhanikagehaM prakalitaH
       tadardhaM te divyAlayamanu samAdhAsyamiha chet |
prasannA tvaM mAtarniyatamabhaviShyo mama dR^iDhaM
       dashAmetAM nAvApsyamapi dayite dUShaNaripoH || 29||
khalAnAM dhuryAya svaradita virAdhAya bhavatI
       mahAmantuM kR^itvA maghavatanayaste sukhamagAt |
amUdR^ikShAM j~nAtvA janani karuNAM te nirupamAM
       mano me no sevAkaraNavidhaye.anyaM mR^igayate || 30||
na labhyo yogo me hyavijitamaruttvAdavanije
       na cha dravyAlAbhAjjanani tava pUjA.api sukarA |
bravImi tvannAmAnyavanitanaye rAmadayite
       jaganmAtardevItyava sukR^itato.asmAdapi cha mAm || 31||
jagajjanmasthemapraLayakaraNechChe janakaje
       jarAmR^ityuvyAdhipratibhayabhavAntA~Nghrinamane |
jayakhyAte dAnairjitasurataro ja~Ngamasudhe |
       jaDAnAmagryaM mAM jaya jaya nayantI nijapadam || 32||
manaste pAdAbje charatu mahanIye mama satAM
       charitraM vA~NnityaM paThatu tava rAmAyaNamapi |
karo me shIrShe te satatamapi puShpA~njalikiraH
       prasIdemaM dAtuM varamapi cha vAlmIkivinute || 33||
anantAn me mantUnakhilabhuvanesho raghupatiH
       kathaM vA kShAmyedityatishayitabhItistava padau |
shrito.asmi tvaM rakShiShyasi niyatamityeva dR^i.DhadhIH
       savitryA vAtsalyaM pituradhikamambAsti hi shishau || 34||
ashiShTaH pApAtmA na khalu dayanIyaH kathamapI\-
       tyamUM chet buddhiM tvaM madavanavidhau devi kuruShe |
aneke mAdR^ikShA api madavarAstvAmadhigatAH
       sukhaM samprAptA mAM paramiha tu mA mAtaratigAH || 35||
virAdhaH svaH prApadvihitaparamAgAH surapate\-
       stanUjo brahmAstrAdapi kila vibhormuktimagamat |
dashAsyo.apyukto.abhUt suta iva hitaM vatsalatayA
       tato nishchetavyA.asyamitakaruNetyeva janani || 36||
na vaikuNThaM yAche na cha vidhipadaM nApi cha divaM
       na vA bhUpatvAya spR^ihayati mano me kathamapi |
kaTAkShaM te mAtaH kalaya karuNArdraM mayi paraM
       vidhatse chopekShAmiha cha yadi kiM nAma karavai || 37||
pishAchyA tR^iShNAkhyAM samadhigatayA bhrAntamanasA
       niShevyAsevyAnapyahaha jananIM vismR^itavatA |
mayA ko vA dharmo bhavatu phaladAnAya rachito
       vinaShTe mUle kiM bhavati phalapuShpAdigarimA || 38||
ariM te hantuM tvAmapi samadhigantuM kR^itamatau
       vibhau sindhurnaisargikamapi chalatvaM samajahAt |
api grAvANaH svaM janani vijahurgauravaguNaM
       girAM pAre dUre jayati tava mAhAtmyagarimA || 39||
ashuddhaH shuddho vA jaTharaparipUrtiM virachayan
       ayAchyAn yAchitvA mama janani mAnaM cha gaLayan |
api svapne sattAM tava na kalayan santatamatan
       vinA te kAruNyaM sukhamiha paratrApi kimiyAm || 40||
taredambhorAshiM girimapi haredekakarato
       vrajeddUre vyomAdhvani cha labhatAM giryatithitAm |
bahUneko hanyAdamitabalayuktAnapi ripUn
       samasto.ayaM mAtastava charaNadAsyasya mahimA || 41||
mayi krIDAlole manukulashubhAdR^iShTasaraNe
       kR^itAntaM vismR^itya pracharati yathechChaM hatamatau |
vinA tvAM kShemaM me janani bhuvane chintayatu kaH
       shishUnmAtaivaikA supathi kurute khalvapathagAn || 42||
dayante na shrotuM kati, kati nishamyApyavachasaH
       tiraskurvantyeke mama hi vibhavo dainyavibhavam |
ato nirviNNo.ahaM janani tava pAdAntikamagAM
       svayaM j~nAtvA dainyaM laghu mama vidad.hdhyA yaduchitam || 43||
viditvA vAlmIkirvidhivinutapAde vachanato
       dayAM nissImAM te tvayi parigatenArthipadavIm |
mayA duHkhAmbhodhau mahitanubhave luThyata iti
       shrutaM yAvannAnyairavatu bhavatI tAvadiha mAm || 44||
prabud.hdhyetAtodyai ruchirataranAdaiH pratidinaM
       prajalpedbhR^ityAnAM dhuri cha giramAj~nApanamayIm |
rathairvA ghoTairvA gajaparibR^iDhairvA bahiriyAt
       ya AsItte dR^iShTerjanani sakR^idapyadhvani pumAn || 45||
daridro vA.a.aDhyo vA bhavatu bhavatApaprashamani
       tvadIyA~Nghrau namrastava charitapIyUShasuhitaH |
ya Aste tasyAmuM kuru sahacharaM jAnaki janaM
       dhanADhyaissaMvAsAtsuviditasukhaM nAstikavaraiH || 46||
kShaNAllokAn sarvAnaTitumatishaktaM pavanajaM
       nyadhAstvaM dAsyArthaM kShitipatisutA rAjamahiShI |
kapIndro rakShorADapi tava padAbjaikasharaNau
       jano.ayaM shushrUShAM tava janani kAM vA rachayatAm || 47||
padornatyA shrutyA tava cha charitasyAmR^itajito
       guNastutyA dainyaM gatavati dayAM naiva kuruShe |
hatA.asi tvAM khAdAmyalamiti gaditvA janani te
       vadhAyodyuktAnAM prathayasi kR^ipAM te nirupadhim || 48||
manoste mAnyA~Nghre tava janaka evaiSha janako
       babhUvarShirmaitrAvaruNirupadeShTA.asya munirAT |
sa putrImArAd.hdhyAM janani janakaste sma manute
       na jAne mAdR^ikShaistvayi kathamu bhAvyaM kathaya me || 49||
pravALAt puShpAdvA tava padayugaM komaLataraM
       nidhehItyAkhyAtuM mama manasi jihremi kaThine |
punashchintA.abhUnme girishadhanurAropaNapaNe
       na kiM bhrAntA.asi tvaM vana iti tato yAmi cha dhR^itim || 50||
manaH kampaM dhatte mahitamahiLAjanmasubhage
       kR^itaM pApaM smR^itvA kR^itaduritishikShastava patiH |
raho brUyA nAthaM janani mama muktiM prati vachaH
       sa nUnaM shraddhALustava vachasi mAyAmR^igavadhAt || 51||
na shabdAH puShTArthA vilasati na chAla~NkR^itigaNaH
       raso vA no kashchijjanani na chamatkAri cha vachaH |
tathA.api shrutvA matpralapitamidaM snihya paramaM
       hR^idabjaM mAtR^INAM vikasati shishUnAM hi vachanaiH || 52||

iti shrIvala~NgimAn grAmAbhijanena shAstraratnAkara shrIsvAmishAstriNAM
priyAntevAsinA \ldq{}kavimaNi, kavitallaja\rdq{} birudabhAjA
paNDita subrahmaNyashAstriNA praNItA sItAlaharI samAptA ||


##
Proofread by Aruna Narayanan


\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}