श्रीसङ्कटारात्रिकालीनस्तुतिः
दुर्गे स्मृता हरसि भीतिमशेषजन्तोः
स्वस्थैः स्मृता मतिमतीव शुभां ददासि ।
दारिद्र्य-दुःख-भय-हारिणि का त्वदन्या
सर्वोपकार-करणाय सदाऽऽर्द्रचित्ता ॥ १॥
या श्रीः स्वयं सुकृतिनां भवनेष्वलक्ष्मीः
पापात्मनां कृतधियां हृदयेषु बुद्धिः ।
श्रद्धा सतां कुलजनप्रभवस्य लज्जा
तां त्वां नताः स्म परिपालय देविविश्वम् ॥ २॥
रोगानशेषानपहंसि तुष्टा
रुष्टा तु कामान् सकलानभीष्टान् ।
त्वामाश्रितानां न विपन्नराणां
त्वामाश्रिता ह्याश्रयतां प्रयान्ति ॥ ३॥
या कुन्देन्दु-तुषार-हार-धवला या शुभ्रवस्त्रावृता
या वीणा-वरदण्ड-मण्डितकरा या श्वेतपद्मासना ।
या ब्रह्माऽच्युत-शङ्कर-प्रभृतिभिर्देवैः सदा वन्दिता
सा मां पातु सरस्वती भगवती निश्शेषजाड्यापहा ॥ ४॥
या माया मधुकैटभ-प्रमथिनी या माहिषोन्मूलनी
या, धूम्रेक्षण-चण्ड-मुण्डमथिनी या रक्तबीजासिनी ।
शक्तिः शुम्भ-निशुम्भ-दैत्यदलिनी या सिद्धिलक्ष्मीः परा
सा दुर्गा नवकोटिशक्तिसहिता मां पातु विश्वेश्वरी ॥ ५॥
मध्ये दुग्धपयोनिधौ त्रिघटिका हेमस्तनी नन्दनं
तन्मध्ये मणिमण्डपं तदुपरि श्रीचक्रराजान्वितम् ।
तस्मिन् पाश-धनुःशराङ्कुशधरां माणिक्यभूषालसां
मुक्ताहार-पयोधरां त्रिनयनां वन्दे परां सुन्दरीम् ॥ ६॥
सुधासिन्धोर्मध्ये सुर-विटप-वाटी-परिवृते
मणिद्वीपे नीपोपवनवति चिन्तामणिगृहे ।
शिवाकारे मञ्चे परमशिव-पर्यङ्कनिलयां
भजन्ति त्वां धन्याः कतिचन चिदानन्दलहरीम् ॥ ७॥
शुक्लां ब्रह्मविचारसारपरमामाद्यां जगद्व्यापिनीं
वीणा-पुस्तक-धारिणीमभयदां जाड्यान्धकारापहाम् ।
हस्ते स्फाटिकमालिकां विदधतीं पद्मासने संस्थितां
वन्दे त्वां परमेश्वरीं भगवतीं बुद्धिप्रदां शारदाम् ॥ ८॥
चतुर्भुजे चन्द्रकलावत्तंसे कुचोन्नते कुङ्कुमरागशोणे ।
कोदण्ड-पाशाङ्कुश-पुष्पबाण-हस्ते नमस्ते जगदेकमातः ॥ ९॥
अरुणां करुणात्तरङ्गिताक्षीं धृत-पाशाङ्कुश-पुष्प-बाण-चापम् ।
अणिमादिभिरावृतां मयूखै-रहमित्येव विभावये भवानीम् ॥ १०॥
ॐ यज्ञेन यज्ञमयजन्त देवास्तानि धर्माणि प्रथमान्यासन् ।
ते ह नाकं महिमानः सचन्त यत्र पूर्वे साध्याः सन्ति देवाः ॥ ११॥
ॐ श्रीश्चतेलक्ष्मीश्चपत्न्यावहोरात्रे पार्श्वेनक्षत्राणिरूपमश्विनौ व्यात्तम् ।
इष्णन्निषाणामुं म इषाण सर्वलोकं म इषाण ॥ १२॥
विश्वतश्चक्षुरुत विश्वतोमुखो विश्वतो बाहुरुत विश्वतस्पात् ।
सम्बाहुभ्यां धमति सम्पतत्रैर्द्यावा-भूमिं जनयन्देव एकः ॥ १३॥
इति सङ्कटा-रात्रिकालीन स्तुतिः समाप्ता ।
Proofread by Rajesh Thyagarajan