शारदाष्टकम्
शैलसुता भव भाग्यविधात्री
शारदचन्द्रकलावरदात्री ।
सुन्दरपार्वणपालनकर्त्री
दुर्गतिनाशिनि देव-सुनेत्री ॥ १॥
कुङ्कुमचन्दनशीतलदेहा
संस्कृतगन्धविलोलितगेहा ।
दानवतारणमारणमाया
हे परमेश्वरि शङ्करजाया ॥ २॥
नीलवलाहकशाङ्करदृष्टि-
र्भास्करभासुरमोहनसृष्टिः ।
पार्थिवभोगविशारदधारा
मोक्षमहामुकुटोज्ज्वलहारा ॥ ३॥
मृण्मयमोहिनि सुन्दरि नारी
हे भवखण्डिनि जीवनधारी ।
हैमधराधरराजसुपुत्री
गौरवसौरभवैभवदात्री ॥ ४॥
मोहनसुन्दरधी-वरमूर्त्तिः
तारणमारणकारणगोप्त्री ।
विश्वविनोदननन्दितगौरी
हे महिषासुरनाशनसौरी ॥ ५॥
सारदशारदरूपसुकान्तिः
शान्तिसुखामृतमानसमुक्तिः ।
पार्वणमण्डिनि दुःखविसर्गा
हे शिवभामिनि तारिणि दुर्गा ॥ ६॥
श्रीनवरात्रविधानविधात्री
यौगिकसिद्धिविधारणगोत्री ।
दीनदयासितशीतलछत्रा
सिंहमहाबलधारितपत्रा ॥ ७॥
रामदयामयविश्वविहारी-
भक्तिरसामृतसेवनपौरी ।
शुम्भनिशुम्भमहामहिषारिः
सिद्धसुरासुरदैविकनारी ॥ ८॥
इति प्रदीप्तनन्दशर्मविरचितं शारदाष्टकं सम्पूर्णम् ।
Composed, encoded, and proofread by
Dr. Pradipta Kumar Nanda, Kendrapara, Orisa pknanda65 at gmail.com