sArasvatamantragarbhitaM shrIshAradAstavanam

 सारस्वतमन्त्रगर्भितं श्रीशारदास्तवनम् 

ॐ नमस्त्रिदशवन्दितक्रमे!  सर्वविद्वज्जनपद्मभृङ्गिके! ।
बुद्धिमान्द्यकदलीदलीक्रियाशस्त्रि!  तुभ्यमधिदेवते!  गिराम् ॥ १॥

कुर्वते नभसि शोणशोचिषो भारति!  क्रमनखांशवस्तव ।
नम्रनाकिमुकुटांशुमिश्रिता ऐन्द्रकार्मुकपरम्परामिव ॥ २॥

दन्तह्रीन्दुकमलश्रियो मुखं यैर्व्यलोकि तव देवि!  सादरम् ।
ते विविक्तकवितानिकेतनं के न भारति!  भवन्ति भूतले ? ॥ ३॥

श्रीन्द्रमुख्यविबुधार्चितक्रमां ये श्रयन्ति भवतीं तरीमिव ।
ते जगज्जननि!  जाड्यवारिधिं निस्तरन्ति तरसा रसास्पृशः ॥ ४॥

द्रव्यभावतिमिरापनोदिनीं तावकीनवदनेन्दुचन्द्रिकाम् ।
यस्य लोचनचकोरकद्वयी पीयते भुवि स एव पुण्यभाक् ॥ ५॥

विभ्रदङ्गकमिदं त्वदर्पितस्नेहमन्थरदृशा तरङ्गितम् ।
वर्णमात्रवदनाक्षमोऽप्यहं स्वं कृतार्थमवयामि निश्चितम् ॥ ६॥

मौक्तिकाक्षवलयाब्जकच्छपीपुस्तकाङ्कितकरोपशोभिते ।
पद्मवासिनि! हिमोज्ज्वलाङ्गि वाग्वादिनि!  प्रभव नो भवच्छिदे ॥ ७
विश्वविश्वभुवनैकदीपिके!  नेमुषां मुषितमोहविप्लवे ।
भक्तिनिर्भरकवीन्द्रनन्दिते तुभ्यमस्तु गिरिदेवते नमः ॥ ८॥

उदारसारस्वतमन्त्रगर्भितं
     जिनप्रभाचार्यकृतं पठन्ति ये ।
वाग्देवतायाः स्फुटमेतदष्टकं
     स्फुरन्ति तेषा मधुरोज्ज्वला गिरः ॥ ९॥

॥ इति श्रीजिनप्रभसूरिविरचितं सारस्वतमन्त्रगर्भितं
           श्रीशारदास्तवनं सम्पूर्णम् ॥


Encoded and proofread by DPD