% Text title : shAradAstotram % File name : shAradAstotram.itx % Category : devii, sachchidAnanda-shivAbhinava-nRisiMhabhAratI, devI, sarasvatI % Location : doc\_devii % Author : Sachchidananda Shivabhinava Nrisimha Bharati Swamigal % Proofread by : PSA Easwaran psawaswaran at gmail.com % Latest update : November 9, 2018 % Send corrections to : Sanskrit@cheerful.com % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shri Sharada Stotram ..}## \itxtitle{.. shrIshAradAstotram ..}##\endtitles ## (shrIshR^i~NgAdrau shrIshAradAnavarAtrotsavasamaye) ratnAvalInirmitashailashR^i~NgavibhrAjadApUrNasudhAkarAbham | AkaNTharaktAmbarasaMvR^itA~NgyA mukhAmbujaM bhAti jagajjananyAH || 1|| AkaNThamAnamrajanAnurAgo mameti lokasya vibodhanAya | AkaNTharaktAmbarasaMvR^itA~NgI padmotthajAyA pravibhAti nUnam || 2|| evaM sarvajagantyapyutsa~Nge sannidhAya rakShAmi | iti bodhanAya jagatAma~Nke bAlaM dadhAsi mAtastvam || 3|| shishumiva padanatalokaM parirakShAmIti bodhanAyaiva | a~Nke nidhAya bAlaM bhAtIyaM pa~NkajAtabhavadayitA || 4|| sthAlIpulAkAkhyanayena mAtarjaganti sarvANyapi pAlayAmi | ityetadarthasya vibodhanAya bAlaM nijA~Nke vidadhAsi kiM tvam || 5|| ekamevAmbaraM vANi virUpaM cha vadanti hi | navAmbarANi dhatse tvaM surUpANi kathaM vada || 6|| AkAshavatsarvagatashcha nitya ityAdi vede.amba kilAmbarasya | pratnatvamekatvamapi prasiddhaM kathaM navatvaM samabhUdamuShmin || 7|| purANavastrANi na dhArayAmi navAmbarANyeva tu dhArayAmi | iti prabodhAya janasya nUnaM navAmbarANyeva dadhAti vANI || 8|| bhavantu vijarAmarAH padasarojanamrA iti prakR^iShTadayayA vidheH sakhi sarojatulyAnane | karasthakalashAmR^itaM natajanAya dAtuM svayaM mahArhamaNinirmitaM chaShakamamba dhatse kimu || 9|| tyakShyAmi naiva rAgaM kAlatritaye.api namravargeShu | iti bodhanAya vANI raktasumAnAM trayaM dhatte || 10|| haMsaireva paraiH sevyA nAhamanyairjanairiti | prabodhanakR^ite mAtarhaMsaM vAhaM karoShi kim || 11|| haMse hi shabde kimu mukhyavR^ittyA sthitAhameveti vibodhanAya | vibhAsi haMse jagadambike tvamityasmadIye hR^idaye vibhAti || 12|| haMso.apyahaMsa iti bodhamavApya muktiM prAptaH parastava padAmbujasaMshrayAdyat | tasmAttavAmba padayugmamayaM mumukShu\- rhaMsaH samAshrayati vAhanatAmavApya || 13|| viri~nchihR^idayAmbujapramadadAnasUryaprabhe vichitragatichAturIprathitapAdapa~Nkeruhe | karoti kimayaM sadA gamanachAturIprAptaye marAlakulanAyakastava padAbjasevAM mudA || 14|| haMso bAhyAndhakArapradalanachaturo hyahni modapradAyI padmAnAmeSha me.antaHsthitatimiratatervArayitryAshcha rAtrau | apyAmodapradAtryA natahR^idayasarojAtapa~NkteradhastAt bhUto hItyeva bodhaM rachayitumiva kiM haMsamArohasIshe || 15|| kartumAtmani sArthA kiM vR^iShendraH pura etu naH | ityAdikAM shrutiM vANi purastAtkuruShe vR^iSham || 16|| vR^iShabho vR^iShabho no chetkathaM tava padAmbujam | vANi sevitumarhaH syAttasmAdvR^iShabha eva hi || 17|| vR^iShaM purastAtkuruShe kimadya vR^iShapradAnAya namajjanebhyaH | drutaM payojanmabhavapramodapayodhirAkAshashibimbapa~Nke || 18|| pashupaH shivo.ayamiti taM vihAya kiM vAktatipradAmAshu | pashutAnivR^ittaye.ayaM vR^iShabhastvAM sevate mAtaH || 19|| shArdUlacharma parivIkShya bhavA~NgasaMsthaM bhItaH palAyya tava sannidhimAgataH kim | ukShAdhipaH sarasijAsanadharmapatni brUhyadya saMshayanimagnamatermamAshu || 20|| punarupanayanaM puMso vR^iShAdhirohe na kAminyAH | darshayati tatstriyo.api hi vR^iShabhArUDhA trinetreyam || 21|| nIlakaNThasya sArvaj~nyamUlaM tvatpAdasevanam | iti sambodhayannIlakaNThastvAM sevate kimu || 22|| shikhI muNDI jaTItyAdyAH sarve tvatsevakA iti | dyotanAya shikhI kiM vA mAtastvAmeva sevate || 23|| nishamya sampreShitavAnmayUramuddharSha ityeva pitR^iShvasuH kim | ShaDAnano brUhi girAM savitri namrasya sandehayujo mamAshu || 24|| kiM varNayAmi tava sundaratAM manuShyo yatsundaratvamabhivIkShya mayUrapakShI | hitvA virUpa iti ShaNmukhamAshu mAtaH vAsaM karoti tava pAdasarojamUle || 25|| dR^iShTvA tvadIyakachasantatinIlameghaM sarvartuShUdayanametya mayUra eSha | nityapraharShadatayA virahAsahiShNuH nUnaM tvada~NghrinikaTe sthitimAtanoti || 26|| kekA na pUjayeyustvAM bhuvane.asminmahotsave vANi | iti nAmnaiva hi vaktuM bhAti tvatsannidhau kekI || 27|| shikhisUryachandramukhyAnahamevAsthAya pAlayAmIdam | jagaditi nibodhanArthaM vAgIshvari bhAsi shikhinamAsthAya || 28|| shambhau santi shashA~NkasUryashikhino netrApadeshAtsadA sAgarbhyaM ta ime nirIkShya girijAnAthasya mAtastvayi | vaktrAraktapaTIsuvAhamiShataH sevAM sadA kurvate modAdeva hi te na chAtra vishayaH kashchidgirAM devate || 29|| kekAto.api manohareNa vachasA tvannirjitaH kekyayaM pAdAmbhojayugaM prapanna iti machchitte vibhAtyambike | jetuH pAdayugaprapattirathavA deshAntarAvasthitiH yuktaM chAnyatarajjitasya vibudhAH prAhuryato bhArati || 30|| shikhivachChuddha eveti nAmnaivAha yataH shikhI | tasmAttvadvAhatA chAsya yuktaiva vidhivallabhe || 31|| muktAhAramimaM jagajjanani te shubhrAhibud.h{}dhyA kimu grIvAsthaM hyayamagrahIdbhujagabhugbhoktuM tato labdhadhIH | nAyaM sarpa iti svamohamadhunApahnotumevAtyaja\- nnaivAla~NkR^itilakShyataH paramaho dhatte budhaH pUrvavat || 32|| AdyA matsamayI tanurmadhuripoH kaurmaM dvitIyaM vapu\- stadyugmaM tvamihAmba netrapadayorvyAjena dhatse yataH | tasmAchchakrayugaM tavorasi kuchavyAjena bhAtyambike tasmAdeva khageshvarashcha satataM tvAM sevate modataH || 33|| viShNau vIkShya jaDAdhivAsamatha cha svAmitrashAyitvama\- pyaNDodbhUtapatirvihAya tamimaM vij~nAnarUShAmayam | tvAmevAdya niShevate khalu mudA vAgdevi yuktaM cha ta\- tko vA shatrusahAsikAM hi sahate lokeShu vidvajjanaH || 34|| bhUtAkAshachareT tvameva bhuvane siddhaM hi kA tena me vR^iddhishchAbhavadityavetya khagarANNUnaM girAM devate | hArdAkAshacharAdhipatyamapi me bhUyAditIchChAbashAt tatprAptyai tava pAdapa~NkajayugIsevAM karotyAdarAt || 35|| vinatAtanUdbhavatvaM prakaTaM prabhavedvinatyaiva | iti bud.h{}dhyA khagarAT kiM vinatastvatpAdapadmayorvANI || 36|| mAnasaviharaNashIlAM devIM tyaktvAnyadevatAsevA | naivochiteti khagarADvahati tvAM tAdR^ishI nUnam || 37|| suvarNanIkAsha bhavatpratIkakAnteH pariShva~Ngata eva sArthA | muparNatetyAtmana Akalayya khageT karotyamba tavA~NghrisevAm || 38|| Agatya kAlAhidhiyA hi veNI gihItukAmaH khagarANNirIkShya | nihnotumichChatyayamamba naijAM bhrAntiM tvada~NghreH parisevanAtkim || 39|| loke hyekaH pakShaH shuklashchAnyashcha kR^iShNa eveha | dvAvapi shuklau pakShau dhatte garuDaH kimamba tava vAhaH || 40|| hastAntarasthaparashuM shambhorbhUShArthamAgatAnnAgAn | dR^iShTvA bhIto hariNashcharaNaM sharaNaM jagAma tava vANi || 41|| dhatte kura~NgaM vidhureSha pUrNo madAsyachandrastamadhaH karoti | ityetayorbhedavibodhanAya kura~Ngamamba tvamadhaH karoShi || 42|| samAshrayeyaM yadi puShkarastha\- mabjaM tadA syAtpatanaM hi darshe | mameti matvA mR^igashAbako.ayaM padAbjamevAshrayate tavAmba || 43|| shuklAdau shashinaM svakIyasharaNaM pUrNa vichinvanmR^igo vANyAsyaM tava vIkShya hR^iShTahR^idayaH pUrNo mayA chandramAH | prAptashcheti tavA~NghrisannidhimasAvAgatya vegAttato nAsminnAsti mamAvakAsha iti kiM tiShThatyayaM bhArati || 44|| purA tava padAmbujaM hariNa eSha sampUjya yo jagatprabhushiraHsthite shashini saMsthitaM prAptavAn | kimadya hR^idi saMsmaraMstava padAbjasevAphalaM mahotsavadidR^ikShayA charaNasannidhiM prAptavAn || 45|| pibeyurapi mAM surA yadi vasAmi chandre tade\- tyapAyarahitaM padaM jigamiShushchiraM sa~ncharan | apAyavachanojjhitaM tava padAbjayorantaraM vilokya mR^igashAbako vasati tatra vAgdevi kim || 46|| bhaktAj~nAnamahebhA madvAhanasannirIkShaNAdeva | niryAntviti sahasA kiM siMhaM vAhaM karoShi mAtastvam || 47|| lAlayati vANi kiM tvAM pa~nchAsyaH skandhamAropya | yuktamidaM bhrAtR^iNAM sodaryAlAlanaM loke || 48|| viShNvardhatvAtpAlakatvaM mamAste saMhartR^itvaM naijamevAsti kiM tu | sraShTurbhAvo vANi nAstIti matvA tatprAptyai tvAM sevate pa~nchavaktraH || 49|| tavAmbarAbhAvashashIyashR^i~Nga\- nIkAshamadhyatvamayaM nishamya | valagnakArshyAdhyayanAya kiM vA padAbjasevAM vidadhAti siMhaH || 50|| natAya pAdAmbujayorjanAya rAjAdhirAjatvavidhitsayA kim | siMhAsanaM tvaM vada dAtumamba sihaM sadA sannidhigaM karoShi || 51|| vane jAtaH siMhaH punarapi darIvAsanirataH svasAmyaM yatra syAtsatatavasatiM tatparisare | chikIrShanbhrAntyA kiM tava padavaneje natamano guhAvAse dR^iShTvA vasatimakarottatparisare || 52|| nAthasyApi mamAnivedya hariNaH sevAM kathaM prAtano\- dvAgdevyAshcharaNAbjayoriti ruShA sAra~NgabAlaM bhR^isham | kR^itvA shIghrapalAyanotsavaparaM sevAM karotyAdarAd\- dR^ishyeshaH svayamityavaimi karuNAvArAnnidhe shArade || 53|| kura~Ngavegastava dR^iShTapUrvastura~NgavegaM paripashya vANi | itIva garvAdadhigamya mAtastura~NgamastvAM parisevate kim || 54|| tura~Ngavachcha~nchalamamba chittaM bad.h{}dhvA dR^iDhaM bhaktiguNena shIghram | sthiraM karomIti guNaisturagaM niyamya kiM bodhayase janAMstvam || 55|| tvamashvapUrvAM shriyamAnatAya dadAmi tUrNaM tviti bodhanAya | tura~Ngamagre vidadhAsi mAtaritIva manye vada kiM tathaiva || 56|| unnamya pAdadvitayaM tura~Ngo vadannitIvAsti girAM savitri | vila~NghyatAM kiM saridIshvaro.ayamutplutya gachCheyamathAmbaraM vA || 57|| pade pade dAnavashyatA me bhavechChachInAthasamIpavAse | uchchaiHshravA ityadhigamya mAtastavA~NghrisevAM prakaroti kiM vA || 58|| ashvo vAhanatAM na yAti diviShadvR^indayasya vedA iti prAhustaM cha nishamya roShasahitastvatsannidhiM prApya kim | mithyA kartumaho tadIyavachanaM devyAstavAmbAnishaM vAhatvaM kutukI jagAma turagAdhIsho girAM devate || 59|| viha~NgaM kura~NgaM tura~NgaM cha vAhaM vidhAyAshugaM bhrAntimAsAdya ki tvam | gajaM mandagaM vAhamadyAtanoShi praNamrasya me brUhi vAchAmadhIshe || 60|| nateShTadAnAya sadA jalArdrakarAmbujA tvaM yata eva vANi | tasmAdibho.apyeSha tavA~Nghrisa~NgAddAnAmbusaMsiktakaro vibhAti || 61|| kechitprAhuranaipuNAstu kuchayoH sAmyaM hi kumbhasthale shuNDAyAmathavorutaulyamibharADichChastavAgAditi | naitatsambhavitA tanau kaThinatA yasmAttataH shArade manye hyutsavasevanAya hariNA sampreShitaH syAditi || 62|| mama kaushikavAhanatA bhaveddharyashvasya sevane kimiti | shuklebhastava vAhaH samabhUnmAtarna sandehaH || 63|| jambhArau kaushikatvaM hyatha cha tadanuje vIkShya samyaggharitvaM tyaktvA hrIsAdhvasAbhyAmayamibhakularATTau sharachchandrashubhraH | indropendrAdisevyAmapi sakalasurArAdhyapAdAravindAM tvAmevAtipramodAtkamalajadayite sevate nUnametat || 64|| matpAdAbjapraNamraM naramatitarasA sevate chebhamukhyA lakShmIrhastAgrarAjadvarakanakamayasragdharetyeva bodham | kartuM hastAgrarAjadvarakanakasaraM nAgarAjaM pradhatse vANi prabrUhi kiM tvaM kamalajahR^idayAmbhojasUryaprabhe me || 65|| ekaH shukaH prasiddho.asti pArAsharyasutaH kila | shuko.aparastu ko brUhi shArade praNatAya me || 66|| ekaM sharIraM parigR^ihya pUrvabhave shuko.ayaM kR^itavAnvichAram | mokShAya nAlaM sa itIha dehadvayaM gR^ihItvA kimu sevate tvAm || 67|| danteShu kiM dADimabIjabud.h{}dhyA tavAdhare bimbadhiyAthavAyam | shukaH kutastvannikaTe chakAsti sandehayuktAya vadAshu mAtaH || 68|| shrutvA tavAmba ninadaM kila kIraDimbhaH kaNThe tavAsti shuka ityayamAkalayya | ichChanvinirgamanamasya bahistavAdya hastAmbuje sthiratayA vasatIti manye || 69|| kShudhA.a.aturaH kashchana kIraDimbha\- stR^iShArdito.anyashcha tayorhi mAtaH | ekastu karNotpalamattumichCha\- tyanyaH karasthAmR^itapAnakAmaH || 70|| pAdanamrapuruShAnkiM bodhayituM lajjayA girAM devi | apidhAya naijarUpaM dhatse puruShAkR^itiM brUhi || 71|| prasavitryAM hi sutAnAM naiva bhavetsAdhvasaM kadAchidapi | matveti bodhanakR^ite guruvararUpaM dadhAsi kiM mAtaH || 72|| sarvAtmakatvamathavA bodhayituM svastha sarvalokAnAm | svIkuruShe kiM pauruShamambujasa~njAtamAnini brUhi || 73|| jhaShau svajAtidoShaM kimabalasvakulAshanam | mAtarnivedanAyAkShivyAjAtkarNasamIpagau || 74|| ashaknuvanstotumahIshvarastvanmukhasya saundaryamayaM jagAma | rasAtalaM vaktrasahasratAM cha nininda ka~njAtabhavasya jAye || 75|| ashaknuvantastava sundaratvaM stotuM maheshAgnibhabAbjajAtAH | ninindurAsyeShu hi pa~nchakatvaM ShaTTvaM chatuShTvaM cha girAM savitri || 76|| nIlopyalotthaH khalu nIlamegho namrAsyamadhyAtkavitApravAham | pravartayatyAshu vadanti chainaM mAtastavAkShiprabhavaM kaTAkSham || 77|| nIlotpale tvannayane hi mAta\- stadutthameghaH karuNAkaTAkShaH | sa namravaktrAtkavitApravAhaM pravartayatyAshu na saMshayo.atra || 78|| mAlA vibhAtyamba tavAdya kaNThe kvachichcha raktA kachidachChavarNA | bimbAdharasya prabhayA hi nAsA\- maNeshcha kantyeti vitarkayAmi || 79|| akShINo natachittasaMsthitatamonirvApaNe.api kShama\- shchA~NkenApyayutastavAsyarajanInAtho girAM devate | kShINenA~NkayujA bahiHsthitatamomAtrApanodakShame\- NAbjenAyamaho kathaM sa labhatAM sAmyaM jaganmAtR^ike || 80|| debAnAmanimeShatAdya saphalA jAtA tavAmbAnishaM vaktrAbjasya nirIkShaNAtsurapatestadvatsahasrAkShatA | gaurIshasya dashAkShatA kamalajasyAShTAkShatA bhArati krau~nchArerdviShaDakShatApi phalayugjAteti jAnImahe || 81|| asyAbjasya samAshraye maM bhavenmodo rajanyAM paraM naivAhnItyata eva champakasumenAlochya nIlotpale | sevete tava vaktrapadmamanishaM netrApadeshAnmudA rAtrau vAsaramadhyame.api sukhadaM vAgdevi na dvAparaH || 82|| chandraH sauhArdamichChaMstava mukhashashinA prApya vR^iddhiM valakShe pakShe prApyeShadamba prahR^iShitahR^idayashchAbhavatpUrNimAyAm | dR^iShTvAtha tvanmukhenduM mR^igashishurahitaM svaM cha chihnena yuktaM lajjAyuktastato.ayaM pratidivasamaho kShINatAM yAti kR^iShNe || 83|| dR^iShTaM vAgdevatAyA vadanasarasijaM yena bhUmau kadAchi\- chChR^i~NgAdrau tasya vaktrAtsarasapadayutA vAktatirniHsareddhi | nIhArAdrerguhAtaH suravarataTinI yadvadAshvaprayatnA\- nnirgachChatyeva tadvanna hi khalu vishayo.asmAkamatrAsti kashchit || 84|| ekApi nAnAvidharUpadhartrI\- tyetAdR^ishArthasya vibodhanAya | veNyAM bhuja~NgI nayane kura~NgI madhye cha siMhI pratibhAsi kiM tvam || 85|| kambau padmaM bhAti bimbaM hi tasmin mallIpa~NktishchApi nIlotpale dve | sarvaM hyetadbhAti haimyAM latAyAM shaile chAsminpashyataitadvichitram || 86|| virAjate kashchana vArirAshi\- rmInena yukto na hi kambavo.atra | kambUparisthastvayameva mAtaH sanetramAsyaM tava chainamAhuH || 87|| akala~NkaH kimu chandraH kiM vA sadyaH praphullamambubhavam | saundayaryutavapuShmadvaktraM kiM vA tavAmba na hi jAne || 88|| bhujagI vA tava veNI kiM vA karapadmapuShparasalobhAt | AgatamadhuliTpaTalI jAnImo naiva vidhikAnte || 89|| nAgendrakumbhAvuta hemakumbhau kimamba kokau tava kiM kuchau vA | vivektumatrAsti na no.adya shakti\- stvameva mAtarvada dhAtR^ijAye || 90|| payojau kUrmau vA suravarashirobhUShaNamaNI tarU vA kalpAdyau natajanachayAbhIShTavaradau | pade vA mAtaste na taditi vivektuM hi vibhavo vayaM tasmAchChIghraM vada kamalajAtapriyatame || 91|| nirgatya shailamadhyAtkuharaM kAchidgatA bhujagI | tAM shaMsanti hi sudhiyo mAtastava nAbhiromAlim || 92|| sarasyA jAteyaM na hi khalu kalindAkhyagiritaH samudraM no yAtA hyapi tu varashailadvayagatA | vibhAtItthaM kAchittvayi khalu girA devi yamunA vadantyenAM nAbhiprasR^itatanujAliM kavivarAH || 93|| kiM tatpayojayugmaM rambhAstambhau tato vyoma | tatra saraH samR^iNAlaM tadupari shailau tataH payojAtam || 94|| dR^iShTaM vAgdevate te sarasijayugalaM pAdayugmaM hi rambhA\- stambhAvUrudvayaM tattadupari gaganaM madhyabhAgo hi nUnaM manye nAbhiH saraH syAttadupari kalaye romapa~NktiM mR^iNAlaM shailadvandvaM kuchau syAttadupari kamalaM tvAsyameveti manye || 95|| mAM draShTumAkAshagataM hi martyA vaktronnateH kleshayutA bhaveyuH | itIva matvA dharaNIM gato.ayamambAsyalakShyAttava pUrNachandraH || 96|| tavAsyalakShyAddharaNIM gatasya sudhAMshubimbasya niShevaNAya | muktAsarANAM miShataH samAgAttArAtatirvAgjananIti manye || 97|| shArade tava padaM prasamIkShya prAptumasya sadR^ishatvamaho kim | kaNThadaghnasalile pratighasraM pa~NkajAnyurutapaH pracharanti || 98|| shArade tava padAmbujayugmaM ye smaranti manujA bhuviloke | shrImatAM cha viduShAM dhuri gaNyAste bhavanti na hi tatra vichAraH || 99|| vAtAhatAbdhilaharItatitaulyabhAjo vAchaH prayatnamanapekShya mukhAravindAt | vAdeShu yatkaruNayA pragalanti puMsAM vAgdevatA bhavatu vA~nChitasiddhaye sA || 100|| yastvAmindunibaddhadivyamakuTAM shuklAmbarAla~NkR^itAM mudrApustakamAlikAmR^itaghaTAnsambibhratIM dhyAyati | tasyAsyAtsarasA suvarNaghaTitA sAla~NkR^itA vAktati\- stUrNaM niHsarati prayatnarahitA niHsaMshayaM bhArati || 101|| anAyAsAdAsyAdamarataTinIpUrasadR^ishI tatirvAchAmAshu prasarati shishorapyanudinam | kR^ipAlambApA~Nge kR^ishataravalagne.akR^ishakuche na sandehyatrAhaM sarasijabhavaprANadayite || 102|| kadAchidapi yo narastava padAmbujaM bhaktito vibhAvayati shArade hR^idayapa~Nkaje tasya hi | vrajeyurapi dAsatAM nR^ipavarAstathA vAktatiH sudhAshitaTinIsakhI vadanapadmato niHsaret || 103|| jaDo.api jagadambike tava kR^ipAyutaM vIkShaNaM prapadya suranAyakaM jayati satvaraM sampadA | mukhAmbujanirargalapravigaladvachovaikharI\- vinirjitasurApagAsmayabharashcha sa~njAyate || 104|| shive tvada~Nghripa~NkajapraNamravAgjharIjitA tuShArashailagahvaraM jagAma jahnukanyakA | tatastato.api tAvakapraNamrakIrtitarjitA shivasya shailakanyakA jaTAkhyadurgamAvishat || 105|| ke vA na kuryurbhuvi kAvyamamba shabdArthavij~nAnayujashchirAya | chitraM tvada~NghriM parisevate yo jayetsa vAchaspatimAshu vAgbhiH || 106|| pa~nchAsyaShaNmukhachaturmukhanAgarAjAH stotuM na te.amba charitaM prabhavanti ki~nchit | ekAnanaH kathamahaM tava shaknuyAM tat stotuM tathApi chapalaM prasahasva sUnoH || 107|| yAvadvAchAM savitri praNatajanavachodAnabaddhAdare te pAdAmbhojaM praNantuM kalayati dhiShaNAM janmamUko.api lokaH | tAvaddevendradattapravaramaNigaNAbaddhapIThasya madhyA\- dutthAyAshu pradhAvatyamaragururaho mAmayaM jeShyatIti || 108|| muktAhAramiShAjjagajjanani te sevAM karotyAdarAt devAnAM saridityaho makararADAlochya sevAM svayam | kartuM hAramiSheNa kambusadR^ishe kaNThe vibhAtIti ma\- chchite bhAti punarvadantu chaturAH kiM taM na jAnAmyaham || 109|| pApIyAniti sa~njahAsi karuNAvArAnnidhe shArade sarvAghaughapayodhibADavashikhe tvaM mAmanAthaM yadi | tarhyetAdR^ishapApakoTisahitaM sarvaishcha dUrIkR^itaM ko vA mAM paripAlayetkamalajaprANapriye brUhi me || 110|| bhaktihIna iti mAM jahAsi kiM mAtaradya jalajAsanapriye | santyajantu bhuvi tarhi mAtarastadvadeva nijakukShijAnsutAn || 111|| viri~nchiharisha~NkaraprabhR^itinirjarAgryArchite praNamrajaDatAtamastativibhedasUryaprabhe | namatsurasatIkachapravilasatprasUnasrava\- nmarandataTinIplavatpadasaroruhe pAhi mAm || 112|| jvarAdinikhilAmayAnkaruNayA girAmambike nivAraya vibhAvarIpatisamAnavaktrAmbuje | svarAdibhuvanAdhipapraNatapAdapAthoruhe karAdR^itasudhe.anishaM disha sukhaM janAnAM mudA || 113|| padmAsanasthe sarasIruhotthajAye vasa tvaM hR^idaye sadA me | tenAhamAshAH sakalA jayeyaM na tatra sandehalavo.asti me.amba || 114|| yaM devavaryAH samupAsate hi taM dehinAmiShTadamAshu mAtaH mandetarApyaM sujaDaH kathaM vA vindeyama~NghriM tava vAksavitri || 115|| samastavastUnyapi santi mAtastvatsanidhau kiM tu na manmano.asti | tatra pramANaM janireva me.adya tadapyatastvaM kuru sannidhau te || 116|| lokaprasiddhAbdhitatestu mAnamAhurdvilakShAdhikayojanAni | nAdrAkShma nAshrauShma bhavatkR^ipAbdhermAnaM payojAtabhavasya jAye || 117|| na pUjitA tvaM kusumairmanoj~nairna saMstutA hR^idyapadaishcha padyaiH | na saMsmR^itA hR^itkamale.api jAtu tathApi mAtardayase jane.asmin || 118|| naivAhamAnIya sumAni divyAnyArAdhanaM te.akaravaM kadApi | tathApi mAtaH sahajAnukampAyutaiH kaTAkShaiH paripAsi mAM tvam || 119||## var ## paripAhi ye prANarodhapramukhAnprayatnAnkurvanti lokAH svasamIhitAya | te naiva jAnanti paraM praNAmaM tavAmba kalpadrumabaddhasakhyam || 120|| avyAjakAruNyamayi prasIda suvyAhR^itInAM tatimAshu yachCha | navyAni kAvyAni karomi mAtaH kravyAdavairipramukhAmareDye || 121|| tiShye yuge sa~NghagatA hi shaktiritIva samyakparichintya devyAH | nAsAsadR^ikShatvamaho.adhigantuM mAlAtvamApuH khalu champakAni || 122|| champakasumAni mAtarnUnaM nAsAsadR^ikShatAM gantum | satataM mAlAvyAjAtsevante pa~NkajAtabhavajAye || 123|| ava jagadamba sadA mAM savamukhyakarmabhistuShTe | navanavakavitvadAnapravaNe ka~njAtajanmasukR^itamayi || 124|| karuNApUritanayane varuNAdidigIshasevyapadapadme | aruNAdharajitabimbe taruNAbjamukhi pradehi mama saukhyam || 125|| sphura jagadamba sadA me mAnasapadme sarojabhavajAye | varadAnaniratapANe vINApANe.adhare shoNe || 126|| rAkAchandrasadR^ikShaM tava mukhapadmaM hR^idambuje smaratAm | kavitA cheTIbhUyAttatrAmba\, na me.asti sadehaH || 127|| kanyAM kulashailapatermAnyAM muravairimukhyadevatateH | naukAM bhavAmburAshernaumyahamanishaM shashA~NkashishushIrShAm || 128|| kA~nchana kA~nchanagarvanyakkAradhurINadehakAntijharIm | kamanIyakavanadAtrIM kamalAsanasukR^itasantatiM kalaye || 129|| tanujitagA~NgeyaruchiH karadhR^itarudrAkShamAlikAkumbhA | tanutAttAmarasAsanajAyA jADyaughavAraNaM shIghram || 130|| manmUrtinIkAshatanuM sR^ijAshu pravishya tasyAM kuru vAsamatra | vyAkhyAnapIThe jagatAM sukhAya chirAya mAtarvachasAM savitri || 131|| mamAsyamadhyAdapashabdayugvA~N na niHsaredvANi kR^ipApayodhe | \- svapne.api lIlArthakR^iteShu jalpeShvapi prapannAvanabaddhadIkShe || 132|| yAM tuShTuvuH shrutishatairmunisArvabhaumAH pAshApanodachaturAM parameShTipatnIm | tAM tuchChasarvaviShayeShu viraktidAtrIM shrIshAradAM kalitachandrakalAM namAmi || 133|| ye tvatpadAmbujasamarchanalabdhaharShA romA~nchagadgadagiraH sravadakShipadmAH | te pAvayanti dharaNIM svapadA~njasa~NgA\- nnAstyatra ko.api vishayo vachasAM savitri || 134|| chandrashchakorAlimayaM karaiH svaiH karoti tR^iptAM sitapakSha eva | tavAsyachandrastu namachchakorAn karoti mAtaH satataM hi tR^iptAn || 136|| AgachChata matpAdau praNamata bhajateShTanikhilasampattIH | iti namrAMstvayasi kiM prasAritenAmba hastapadmena || 136|| vANI vINAM hastapadme nidhAya svIyaM bhAvaM darshayatyambikAsau | sthitvA kekyAM bhAvamapyanyadIyaM sarvAtmatvadyotanAyeti manye || 137|| pItAmbarAdyAH suranAyakA me padAgranamrA iti bodhanAya | pAdAgralambi pradadhAsi mAtaH pItAmbaraM kiM vada dhAtR^ijAye || 138|| AdarshamabjAvasatiH kadApi nAstIti lokaprachuraH pravAdaH | kimanyathAkartumimaM karoShi pAdAbjamAdarshakR^itaprachAram || 139 ]] | AdarshavatsvachChatareShu chitteShvevA~NghripadmaM mama bhAti samyak | ityarthamAvedayituM natAnAmAdarshavR^ittiM prakaroShi pAdam || 140 || sakR^itpraNantR^Inapi bhaktalokAnanekadhA kiM praNatAnvibhAvya | tadAnuguNyena phalAni dAtumAdarshama~NghreH savidhe dadhAsi || 141|| labdhapratiShThaH paripUrNachandre karomi vAsaM kathamardhachandre | evaM kala~NkaH parichintya nIlaratnApadeshAtkimu bhAti shIrShe || 142|| kamalAsanasya patyurdhyAnAtsatataM pativrate kimidam | kamalAsanatvamAgAH svayamapi vAchAM savitri me brUhi || 143|| satAM hR^idabjeShu vasAmyajasramityarthamAvedayituM janAnAm | padme nivAsaM prakaroShi mAtaH ki padmayonerdayite vadAsmai || 144|| hastenAdAya shIghraM natahR^idayasarojAtamIshe girAM kiM chA~nchalyaM tatra dR^iShTvA bahulamatha nijaM hyAsanatvaM prakalpya | adhyAste sthairyasid.h{}dhyai paramiha bhavatI bhartR^iyuktA hyajasraM mAtuH putreShu pUrNA prabhavati karuNA hetushUnyaiva vANi || 145|| rathasthitAM mAM manujA jagatyA pashyanti ye bhaktiyutAntara~NgAH | manorathAvAptirasheShataH syAtteShAmiti dyotayituM rathasthA || 146|| padmAsanasthitau mama padayoH sphuTatA bhavennaiva | namrajanAnAmiti kiM tiShThasi pAdau vivR^iNvAnA || 147|| upaviShTAyAstandrI kadAchidapi me natAvane prabhavet | iti tiShThasi kimu namrAMstandrAhInAvituM girAM devi || 148|| matpAdAmbujasevakAnatijavAtsaMsAravArAnnidhe\- rAkR^iShyoddharaNaM vidheyamadhunetyutthAya padmAsanAt | yo vA kashchidihetya janmajaladhau magno.ahamasmItyato mAM rakSheti samAhvayediti mudA tiShThasyaho vANi kim || 149|| AkarShati yathAyAMsi hyayaskAntamaNirdrutam | tathaiva tvanmukhAmbhojaM natachittAni shArade || 150 || dhAtuH puNyatatiH kAchidvAchAM dhATIM dadAtu me yAM dR^iShTvA lajjito bhUyAtsurAchAryo.api tAdR^ishIm || 151|| kaTAkShajitanIlAbjA karikumbhanibhastanI | karotu mama kalyANaM kamalAsanakAminI || 152|| ka~njabhavapuNyarAshe kamrasmitajitachakorabandhuchaye | kaMsamadamardanachaNe ka~nchana puruShArthamarthayannaumi || 153|| matijitasuragurugarvAn prakurvatIM shIghrameva padanamrAn | kalaye hR^idi jagadambAM karapadmalasatsudhAkumbhAm || 154|| unnamyonnamya sandhyAdichandrarAjatapAtrakam | yAminIkAminI tArAkusumAni chinoti kim || 155|| tIrAttIraM charantI kamalajadayitA potavaryeNa modA\- tkAruNyAkrAntachetA natanaranikaraM bodhayatyenamartham | saMsArApArasindhuM mama padasarasIjAtavinyastabuddhIn bhaktyAkhyenoDupena drutamiha manujAMstArayAmIti nUnam || 156|| vanajAsanavaramAnini samyakkartuM kimAsanaM patyuH | vanajAni patrapuShpANyAnayase kakShapANipadmaistvam || 157|| grAmINapuShpavR^indaM dR^iShTvA dR^iShTvAnughasramamba kimu | vanajAni puShpavaryANyAnayase kiMvidhAnIti || 158|| avanaratAyAH kimu mama pade pade naiva bhavati vanagamanam | ityekadaiva vanajAnyAnayase kakShamadhyena || 159|| daNDadhR^idbhayanivAraNechChubhirdambhamohamukhadoShavarjitaiH | daNDitedriyachayairniShevite dantitulyagamane.ava shArade || 160 || vAchAmIshaH prabhavati yadAlokamAtrAjjaDAgryo nAkAdhIshaH prabhavati tathA ra~Nkavaryo.api loke | tachchandrAbjapramukhanibiDAha~NkR^iterbhedadakShaM nityaM vaktraM hR^idayakuhare bhAvayAmi tvadIyam || 161|| atichapalaM mama hR^idayaM tava rUpaM chAtisUkShmamiti nigamAH | kathamamba mAmakInaM mana etadvettu tAvakaM rUpam || 162|| ai~NkArastava bIjaM vadane mama vasatu sarvadA vANi | tenAhaM sakalArthAnkShipraM saMsAdhayAmi no vishayaH || 163|| iti shR^i~Ngeri shrIjagadguru shrIsachchidAnandashivAbhinavanR^isiMha\- bhAratIsvAmibhiH virachitaM shrIshAradAstotraM sampUrNam | ## Proofread by PSA Easwaran psaeaswaran at gmail.com \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}