Shaktistava by Brahma ViShNu and Shiva

 ब्रह्मविष्णुशिवाकृता शक्तिस्तवः 
ब्रह्मविष्णुशिवा ऊचुः
देवि प्रसीद परमेऽखिल-मूल-रूपे
      चिद्रूपिणी परमसूक्ष्षतरा सदासि ।
न श्रूयसे न च दृशापि च लभ्यसे त्वं
      न ध्यायसे च परमाणुहृदा नमस्ते ॥ १॥

निद्राङ्गतस्य पुरुषस्य तनूरुहेषु
      गच्छत्पिपीलि-गति-वोध इतीह यश्चा ।
सैव त्वमात्मनि सुयोग-विविक्त-चित्ते
      सूक्ष्माति-सूक्ष्म-मतिरेव नमोऽस्तु ते वै ॥ २॥

एतादृशं परमसूक्ष्मतरं महेशि
      ज्ञानं न सम्भवति देवमनुष्यकेषु ।
यस्तु प्रशक्यतितरामचलावबोधः
      सैवासि मुक्तिरपरा प्रणनामि तुभ्यम् ॥ ३॥

किं सम्भवेत्परमसूक्ष्मकलात्मिकायाः
      स्तोत्रप्रणाममननानि तवातिसूकष्मे ।
तत्रापि देवि भवतीं प्रतिलब्धुकामाः
      स्यामो वयं कृपय देवि परिप्रसीद ॥ ४॥

त्वं स्वेच्छया सृजसि पासि गुणत्रयार्हा-
      न्शेषे च संहरसि नोऽपि जगत् किमन्यत् ।
स्थूलासि सूक्ष्षपरमासि महात्मिकासि
      त्वं निष्कलानवगमासि निषेधशेषा ॥ ५॥

सानुग्रहात्धृततनूरपि निर्विकारा
      श्रूभङ्गमात्रकलिताण्डचयासि देवि ।
तेन प्रणाममननस्तवनादिकानि
      कार्याणि कुर्म इह देवि वरे प्रसीद ॥ ६॥

निर्हेतुभक्तिसुलभे भवदुर्लभा त्वं
      निर्हेतुभक्तिरपि दुर्घटिता जनेषु ।
तस्माच्छरीर्यपि शरीर-विबन्ध-हीनो
      यस्त्वां स्मरेत्स भवतीं समवैति लोके ॥ ७॥

त्वं ब्रह्मविष्णुशिवदेहकरी च विष्णु-
      राकाश-कालवद-तीन्द्रियकासि मातः ।
बहाण्डकोटिकसमुद्धरलोमकूपा किं
      क्षुद्रचेतसि जनैः परिचिन्तनीया ॥ ८॥

दाक्षायणीमपि सतीं सुरुचिं रवीन्दु-
      साहस्रकोटिरुचिकां परितः स्मरामः ।
श्यामासि चन्द्रधवलासि च हेमगौरी
      रक्तासि चित्तमनुरूपतनुं स्मरामः ॥ ९॥

त्वं वै समस्तसकलात्मसु वर्तमाना
      यद्यन्नियोजयसि देवि तदेव सर्वे । 
कुर्वन्ति चाथ खलु ये मम तेऽहमेत-
      त्सम्यक्करोम्युत किलेति शिवासि माया ॥ १०॥

काली नवीनघनरूपपरार्द्धचन्द्र-
      विभ्राजमानशुभमौलितलामला च ।
दुर्गा लसच्चरणपद्मतला भवानी
      माताम्बिका च सदया सततं प्रसीद ॥ ११॥

॥ इति बृहद्धर्मपुराणे ब्रह्मविष्णुशिवाकृता शक्तिस्तवः सम्पूर्णः ॥

॥ बृहद्धर्मपुराणम् ।  मध्यखण्डः । अध्यायः ४१। १९-२९ ॥


Encoded and proofread by Ruma Dewan