श्रीस्थलदेवीआरतिक्यम्
यत्कर्म-धर्म-निलयं प्रवदन्ति तज्ज्ञाः
यज्ञादि पुण्यमखिलं सकलं त्वयैव ।
त्वं चेतना यत इति प्रविचार्य चित्ते
नित्यं त्वदीय चरणौ शरणं प्रपद्ये ॥ १॥
पाथोऽधिनाथ तनया पतिरेष शेष
पर्यङ्क् लालित वपुः पुरुषः पुराणः ।
त्वन्मोह-पाश-विवशो जगदम्बसोऽपि
व्याघूर्णमाननयनः शयनं चकार ॥ २॥
तत कौतुकं जननि यस्य जनार्दनस्य
कर्णप्रसूतमलजौ मधु-कैटभाख्यौ ।
तस्यापि यौ न भवतः सुलभौ निहन्तुं
त्वन्मायया कविलतौ विलयं गतौ तौ ॥ ३॥
यन्माहिषं वपुरपूर्वबलोपपन्नं
यन्नाक नायक पराक्रम जित्वरं च ।
यत्लोकशोकजननब्रतबद्ध-हार्दं
तल्लीलयैव दलितं गिरिजे भवत्या ॥ ४॥
यो धूम्रलोचन इति प्रथितः पृथिव्यां
भस्मी बभूव स रणे तव हुङ्कृतेन ।
सर्वासुरक्षयकरे गिरिराजकन्ये मन्ये
स्वमन्यु दहने कृत एष होमः ॥ ५॥
केषामपि त्रिदशनायक पूर्वकाणां
हन्तुं न जातु सुलभाविति चण्डमुण्डौ ।
तौ दुर्मदौ सपदि चाम्बर तुल्यमूर्ते
मतिस्तवासिकुलिशात् पतितौ विशीर्णौ ॥ ६॥
दौत्येन ते शिव इति प्रथितप्रभावो
देवोऽपि दानवपतेः सदनं जगाम ।
भूयोऽपि तस्य चरितं प्रथयाञ्चकार
सा त्वं प्रसीद शिवदूति विजृम्भितेन ॥ ७॥
चित्रं तदेतदमरैरपि ये न जेयाः
शस्त्राभिघात-पतिताद्रुधिरादपर्णे ।
भूमौ बभूवुरमिताः प्रतिरक्तबीजा
स्तेऽपित्वयैव गगने गलिताः समस्ताः ॥ ८॥
आश्चर्यमेतदतुलं यद्भूत् सुरारी
त्रैलोक्यवैभवविलुण्ठनहष्टपाणी ।
शस्त्रैर्निहत्य भुवि शुम्भ-निशुम्भसंज्ञौ
नीतौ त्वया जननि तावपि नाकलोकम् ॥ ९॥
त्वत्तेजसि प्रलयकाल हुताशनेऽस्मिं-
स्तस्मिन् प्रयान्ति विलयं भुवनानि सद्यः ।
तस्मिन्निपत्य शलभा इव दानवेन्द्रा
भस्मी भवन्ति हि भवानि किमत्र चित्रम् ॥ १०॥
तत्किं गृणामि भवतीं भव तीव्रताप
निर्वापण-प्रणयनीं प्रणमञ्जनेषु ।
तत्किं गृणामि भवन्ती भव तीव्र ताप
संवर्द्धन-प्रणयनीं विपदि स्थितेषु ॥ ११॥
वामे करे तदितरे च तथोपरिष्ठान्
पात्रं सुधारसयुतं वरमातुलुङ्गम् ।
खेटं गदां च दधतीं भवतीं भवानि
ध्यायन्ति येऽरुणनिभां कृतिनस्त एव ॥ १२॥
यद्वारुणात् परमिदं यदि मानवास्ते
बीजं स्मरेदनुदिनं दहनाधिरूढम् ।
मायाङ्कितं तिलकितं तरुणेन्दु बिन्दु-
र्नादैरमन्दमिह राज्यमसौ भुनक्ति ॥ १३॥
आवाहनं यजनवर्णनमग्निहोत्रं
कर्मार्पणं तव विसर्जनमत्र देवि ।
मोहान्मया कृतमिदं सकलापराधं
मातः क्षमस्व वरदे बहिरन्तरस्थे ॥ १४॥
अन्तः स्थिताप्यखिल जन्तुषु जन्तुरूपा
विद्योतसे बहिरिवाखिल विश्वरूपा ।
का भूरिशब्दरचना वचनाधिका सा
दीनं जनं जननि मामव निष्प्रपञ्चम् ॥ १५॥
एतत्पठेदनुदिनं दनुजान्तकारि
चण्डीचरितमतुलं भुवि यस्त्रिकालम् ।
श्रीमान् सुखी स विजयी सुभगः कृती स्यात्
त्यागी चिरन्तनवपुः कवि चक्रवर्ती ॥ १६॥
इति ।
Sarthal or Shristhala devi or aShTAdashabhUjA devI is worshipped in
Kishtavad (kishtwar, kaShTavArakaH deshaH) in Haryana
Encoded and proofread by Vani V