स्तवकल्पद्रुमः
श्रीगणेशाय नमः ।
श्रीगङ्गा-प्रणामः
नवद्वीपारामप्रकरकुसुमामोदवलितां
स्फुरद्रत्नश्रेणीचित-तट-सुतीर्थावलियुताम् ।
हरेगौर्रराङ्गस्यातुल-चरण-रेणूक्षित-तनुं
समुद्यत्-प्रेमोर्मीतुमुलहरिसङ्कीर्तन-रसैः ॥ १॥
प्रभुक्रीडापात्रीममृतरसगात्रीमृषितटां
शिवब्रह्मेन्द्रादीडित-महित-माहात्म्यमुखराम् ।
लसत्-किञ्जल्काम्भोजनि-मधुप-गर्भोरुकरुणा
महं वन्दे गङ्गामघ-निकर-भङ्गां जलकणाम् ॥ २॥
सद्यः पातकसंहन्त्री सद्यो दुःखविनाशिनी ।
सुखदा मोक्षदा गङ्गा गङ्गैव परमा गतिः ॥ ३॥
श्रीगङ्गास्नानमन्त्रः
विष्णुपाद-प्रसूताऽसि वैष्णवी विष्णुदेवता ।
पाहि नस्त्वेनसस्तस्मादाजन्ममरणान्तिकात् ॥ १॥
श्रीगङ्गास्तवः
गङ्गे समस्तजगदम्ब चलत्तरङ्गेऽ
नङ्गारिचारुतरमस्तकपुष्पमाले ।
कंसारिचारुचरणद्वयरेणुहर्षि
भक्त्या नमामि दुरितक्षयकारिणि त्वाम् ॥ १॥
मातः समस्तसुखदे प्रवरे नदीनां
व्यासादिविप्रचयगीतगुणे गुणाढ्ये ।
संसारभैरवमहार्णवमध्यनौके
वन्दे तवाङ्घ्रियुगलं दुरितापहारि ॥ २॥
यस्यास्तवाम्बु कणिकामपि जन्हुकन्ये !
सौदासनामनृपतिर्द्विजकोटिहन्ता ।
संप्राप्य मुक्तिमगमत् त्रिदशैरलभ्यां
तां त्वां नमामि शिरसा वरदे ! प्रसीद ॥ ३॥
नारायणाच्युतजनार्दनकृष्णराम
गङ्गादिनाम वदतो मम देवि ! मातः ! ।
संसारपातकनिवारिणि देहपात
स्त्वद्वारिणीह भवतु त्वदनुग्रहेण ॥ ४॥
किंवा तपोभिरखिलेश्वरि ! किं जपैर्वा
दानैश्च किं तुरगमेधमुखैमखैर्वा ।
त्वन्नीरशीकरमवाप्य सुरैरलभ्यां
मुक्तिं व्रजन्ति मनुजा अपि पापिनोऽपि ॥ ५॥
स्वाहा त्वमेव परमेश्वरि ! या स्वधा त्वं
गीर्वाणवृन्दपितृलोकसुतृप्तिहेतुः ।
सत्त्वं रजस्तम इति त्रिगुणस्वरूपा
सृष्टिस्थितिप्रलयकारिणि नौमि तां त्वाम् ॥ ६॥
धत्ते ललाटफलके तव सैकतं यः
पुण्ड्रं च देवि तव तीरमृदा सदैव ।
त्वत्राम सर्वरसधाम वदेच्च भक्त्या
तत्पादरेणुरखिलोऽस्तु ममैव मूधिर्न ॥ ७॥
इति स्तवकल्पद्रुमः श्रीगङ्गा-प्रणामः सम्पूर्णः ।
Encoded and proofread by Anil Kumar Pandey anil.kumar17pandey at gmail.com