तापीस्तोत्रम्
%६३
छाया विवस्वद्दुहिता हितार्था पुरातनी त्वत्र धुनी कृतार्था ।
ययाऽऽस भूरन्यविभूषितापि तापीसरित्साऽवतु मां स्मृतापि ॥ १॥
तपती पतिमाप्तुमुद्गता वरविन्ध्याद्रिपदान्महोन्नता ।
प्रययौ नवयौवनाञ्चिता जलधिं पश्चिमकं ह्यवञ्चिता ॥ २॥
पुनानापि नानाजनानंहसोऽत्र पदं राति याति प्रशस्तं परत्र ।
यदीये प्रतीरेऽत्र पापी न तापी न कोपीयमस्मानवत्वत्र तापी ॥ ३॥
भुजङ्गप्रयातोपमा यद्गतिर्या मतिं नः पुनाना ददाना गतिं या ।
वरं पश्चिमाब्धि सुखेनोपमेये हतत्वद्य तान् पाप्मनः सन्ति ये मे ॥ ४॥
अवरजा वरजातिसुपूजिता द्युमणिजा मणिजातिविभूषिता ।
सुतपती तपती पतितान्नतावती सा यशसा पयसान्विता ॥ ५॥
या वारयत्याशु यदिन्द्रवज्रलेपोपमं पातकमाप्लवेन ।
प्लवेन यज्ञेन तथा गतिर्न यथा नदी राति सहाप्लवेन ॥ ६॥
जगति तपनशीला याहि तापी सुशीला,
चलति भुवि विशाला मुक्तिपानीयशाला ।
परिहृतजनकाला खेलदुच्चोर्मिमाला,
निखिलसुकृतपाला पातु नः सूर्यबाला ॥ ७॥
अये तापीहापि प्रशमितभये ते सुखमये,
सदा दत्तात्रेयो निवसति सतिप्रार्पितनये ।
न ये त्वां सेवन्ते त इह जनिभाजोऽत्र भजते,
गतिः सद्यो रासीत्यत ऋषिगणस्त्वां हि भजते ॥ ८॥
दत्तात्रेयादृतां तापीं पापिनिर्मुक्तिमष्टभिः ।
पद्यैस्तुष्टाव सुकृती वासुदेवसरस्वती ॥ ९॥
इति श्रीवासुदेवानन्दसरस्वतीविरचितं तापीस्तोत्रं सम्पूर्णम् ।