श्रीत्रिपुराप्रातर्भजनम्
प्रातःस्मरामि भजतामभयङ्करं तं
पादारविन्दमतिसुन्दरमम्बिकायाः ।
दुस्स्वप्नदोषहरणं करणं सुखानां
सुस्वप्नबोधमखिलौघनिबर्हणञ्च ॥ १॥
प्रातःस्मरामि सकलार्थवरप्रदानं
पादारविन्दमतिकोमलमम्बिकायाः ।
इन्द्रादिदिक्पतिविरिञ्चमुकुन्दमौलि-
रत्नांशुसूर्यकिरणानुविकासितं तत् ॥ २॥
प्रातःस्मरामि सुरधेनुपयोधराय-
मानं चतुष्टयकराम्बुजमम्बिकायाः ।
पुण्ड्रेक्षुचापमदनास्त्रभुजङ्गपाश-
रत्नाङ्कुशौकनक(शोज्ज्वलित) कङ्कणभूषणाढ्यम् ॥ ३॥
प्रातःस्मरामि पृथिवीजलवह्निवायु-
व्योमादिरूपमखिलं च पदारविन्दम् ।
यद्रेणुमाप्य कमलासनमाधवेशाः
कुर्वन्ति विश्वहरणस्थितिसर्गकेलिम् ॥ ४॥
प्रातःस्मरामि मुखपङ्कजमन्दहासं
मन्दस्मिताधरतिरस्कृतचन्द्रबिम्बम् ।
याद्दश्यकेन फणिताखिलवेदशास्त्र-
त (??) कचक्ररथमङ्गजयोधनस्य (?) ॥ ५॥
यः श्लोकपञ्चकमिदं पठति प्रभाते
धर्मादिदं परहितं कथितं हरेण ।
तस्मै ददाति पदवीमणिमादिरूपां
जप्ता (तृप्ता) तपोभिरचलां त्रिपुरा भवानी ॥ ६॥
इति श्रीत्रिपुराप्रातर्भजनं सम्पूर्णम् ।
Proofread by Rajesh Thyagarajan