% Text title : Tripurasundari VedapAdastotram
% File name : tripurasundarIvedapAdastotram.itx
% Category : devii, dashamahAvidyA, stotra, shankarAchArya, devI
% Location : doc\_devii
% Author : Adi Shankaracharya
% Transliterated by : P R Ramamurthy
% Proofread by : P R Ramamurthy
% Source : (Gleanings, CompleteWorks)
% Acknowledge-Permission: lalitaalaalitah http://stotram.lalitaalaalitah.com
% Latest update : July 8, 2017
% Send corrections to : sanskrit at cheerful dot c om
%
% This text is prepared by volunteers and is to be used for personal study
% and research. The file is not to be copied or reposted for promotion of
% any website or individuals or for commercial purpose without permission.
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt
\let\usedvng=\Largedvng % for 1 column
\pagenumbering{itrans}
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. tripurasundarIvedapAdastotram ..}##
\itxtitle{.. tripurasundarIvedapAdastotram ..}##\endtitles ##
vedapAdastavaM vakShye devyAH priyachikIrShayA |
yathAmati matiM devastanno dantiH prachodayAt || 1||
aki~nchitkarakarmabhyaH pratyAhR^itya kR^ipAvashAt |
subrahmaNyaH stutAvasyAM tannaH ShaNmukhaH prachodayAt || 2||
akArAdikShakArAntavarNAvayavashAlinI |
vINApustakahastA.avyAt praNo devI sarasvatI || 3||
yA varNapadavAkyArthagadyapadyasvarUpiNI |
vAchi nartayatu kShipraM medhAM devI sarasvatI || 4||
upAsyamAnA viprendraiH sandhyAsu cha tisR^iShvapi |
sadyaH prasIda me mAtaH sandhyAvidye sarasvatI || 5||
mandA nindAlolupA.ahaM svabhAvAt
etatstotraM pUryate kiM mayeti |
mA te bhItirhe mate tvAdR^ishAnAm
eShA netrI rAdhasA sUnR^itAnAm || 6||
tara~NgabhR^ikuTIkoTibha~NgyA tarjayate jarAm |
sudhAmayAya shubhrAya sindhUnAM pataye namaH || 7||
tasya madhye maNidvIpaH kalpakArAmabhUShitaH |
astu me lalitAvAsaH svastidA abhaya~NkaraH || 8||
kadambama~njarIniryadvAruNIpAraNonmadaiH |
dvirephairvarNanIyAya vanAnAM pataye namaH || 9||
tatra vaprAvalIlIlAgaganolla~Nghigopuram |
mAtaH kautUhalaM dadyAtsuhAryaM nagaraM tava || 10||
makarandajharImajjanmilindakulasa~NkulAm |
mahApadmATavIM vande yashasA samparIvR^itAm || 11||
tatraiva chintAmaNidhoraNo.archibhir\-
vinirmitaM ropitaratnashR^i~Ngam |
bhaje bhavAnI bhavanAvataMsam
AdityavarNaM tamasaH parastAt || 12||
munibhiH svAtmalAbhAya yachchakraM hR^idi sevyate |
tatra pashyAmi budhyA tadakShare parame vyoman || 13||
pa~nchabrahmamayo ma~nchastatra yo bindumadhyagaH |
tava kAmeshi vAso.ayamAyuShmantaM karotu mAm || 14||
nAnAratnaguluchChAlIkAntikimmIlitodaram |
vimR^ishAmi vitAnaM te.atishlakShNamatilomasham || 15||
parya~Nkatalpopari darshanIyaM
sabANachApA~NkushapAshapANim |
asheShabhUShAramaNIyamIDe
trilochanaM nIlakaNThaM prashAntam || 16||
jaTAruNaM chandrakalAlalAmam
udvelalAvaNyakalAbhirAmam |
kAmeshvaraM kAmasharAsanA~NkaM
samastasAkShiM tamasaH parastAt || 17||
tatra kAmeshavAmA~Nke khelantImalikuntalAm |
sachchidAnandalaharIM mahAlakShmImupAsmahe || 18||
chArugorochanApa~NkajambAlitaghanastanIm |
namAmi tvAmahaM lokamAtaraM padmamAlinIm || 19||
shive namannirjaraku~njarAsura\-
pratolikAmaulimarIchivIchibhiH |
idaM tava kShAlanajAtasaubhagaM
charaNaM no loke sudhitAM dadhAtu || 20||
kalpasyAdau kAraNeshAnapi trIn
sraShTuM devi trInguNAnAdadhAnAm |
seve nityaM shreyase bhUyase tvA\-
majAmekAM lohitashuklakR^iShNAm || 21||
keshodbhUtairadbhutAmodapUrai\-
rAshAvR^indaM sAndramApUrayantIm |
tvAmAnamya tvatprasAdAtsvayambhU\-
rasmAnmAyI sR^ijate vishvametat || 22||
ardhonmIladyauvanoddAmadarpAM
divyAkalpairarpayantIM mayUkhAn |
devi dhyAtvA tvAM purA kaiTabhAri\-
rvishvaM bibharti bhuvanasya nAbhiH || 23||
kahlArashrIma~njarIpu~njarItiM
dhikkurvantImamba te pATalimnA |
mUrtiM dhyAtvA shAshvatIM bhUtimAya\-
nnindro rAjA jagato ya Ishe || 24||
devatAntaramantraughajapashrIphalabhUtayA |
jApakastava devyante vidyayA vindate.amR^itam || 25||
puMskokilakalakvANakomalAlApashAlini |
bhadrANi kuru me mAtarduritAni parAsuva || 26||
antevAsinnasti chette mumukShA
vakShye yuktiM muktasarvaiShaNassan |
sadbhyaH sAkShAt sundarIM j~naptirUpAM
shraddhAbhaktij~nAnayogAdavehi || 27||
ShoDhAnyAsAdidevaishcha sevitA chakramadhyagA |
kAmeshamahiShI bhUyaH ShoDashI sharma yachChatu || 28||
shAnto dAnto deshikendraM praNamya
tasyAdeshAttArakaM mantratattvam |
jAnIte chedamba dhanyaH samAnaM
nAtaH paraM veditavyaM hi ki~nchit || 29||
tvameva kAraNaM kAryaM kriyA j~nAnaM tvameva cha |
tvAmamba na vinA ki~nchit tvayi sarvaM pratiShThitam || 30||
parAgamadrIndrasute tavA~Nghri\-
sarojayoramba dadhAmi mUrdhnA |
ala~NkR^itaM veda(/deva)vadhUshirobhi\-
ryato jAto bhuvanAni vishvA || 31||
duShTAn daityAn hantukAmAM maharShIn
shiShTAnanyAn pAtukAmAM karAbjaiH |
aShTAbhistvAM sAyudhairbhAsamAnAM
durgAM devIM sharaNamahaM prapadye || 32||
devi sarvAnavadyA~NgIM tvAmanAdR^itya ye kriyAH |
kurvanti niShphalAsteShAmadugdhA iva dhenavaH || 33||
nAhaM manye daivataM mAnyamanya\-
ttvatpAdAbjAdambike kumbhajAdyAH |
ye dhyAtAro bhaktisaMshuddhachittAH
parAmR^itAt parimuchyanti sarve || 34||
kurvANo.api durArambhAM stava nAmAni shAmbhavi |
prajapanneti mAyAntamatimR^ityuM tarAmyaham || 35||
kalyANi tvaM kundahAsaprakAshai\-
rantardhvAntaM nAshayantI kShaNena |
hantAsmAkaM dhyAyatAM tvatpadAbja\-
muchchatiShTha mahate saubhagAya || 36||
titIrShayA bhavAmbhodherhayagrIvAdayaH purA |
apramattA bhavatpUjAM suvidvAMso vitenire || 37||
madvaMshyA ye durAchArA ye cha sanmArgagAminaH |
bhavatyAH kR^ipayA sarve suvaryantu yajamAnAH || 38||
shrIchakrasthAM shAshvataishvaryadAtrIM
pauNDraM chApaM puShpabANAndadhAnAm |
bandhUkAbhAM bhAvayAmi trinetrAM
tAmagnivarNAM tapasA jvalantIm || 39||
bhavAni tava pAdAbjanirNejanapavitritAH
bhavAmayaprashAntyai tvAmapo yAchAmi bheShajam || 40||
chidAnandasudhAmbhodhestavAnandalavo.asti yaH
kAraNeshaistribhissAkaM tadvishvamupajIvati || 41||
no vA yAgairnaiva pUrtAdikR^ityai\-
rno vA japyairno mahadbhistapobhiH |
no vA yogaiH kleshakR^idbhiH sumedhA
nichAyyemAM shAntimatyantameti || 42||
prAtaH pAhi mahAvidye madhyAhne tu mR^iDapriye |
sAyaM pAhi jagadvandye punarnaH pAhi vishvataH || 43||
bandhUkAbhairbhAnubhirbhAsayantI
vishvaM shashvattu~NgapInastanArdhA |
lAvaNyAbdheH sundari tvaM prasAdA\-
dAyuH prajAM rayimasmAsu dhehi || 44||
karNAkarNaya me tattvaM yA chichChaktiritIryate |
trirvadAmi mumukShUNAM sA kAShThA sA paragatiH || 45||
vAgdevIti tvAM vadantyamba kechi\-
llakShmIrgaurItyevamanye vadanti |
shashvanmAtaH pratyagadvaitarUpAM
shaMsanti kechinnivido janAH || 46||
laliteti sudhApUramAdhurIchoramambike |
tava nAmAsti yattena jihvA me madhumattamA || 47||
ye sampannAH sAdhanaistaishchatturbhiH
shushrUShAbhirdeshikaM prINayanti |
samyagvidvA~nshuddhasattvAntarANAM
teShAmevaitAM brahmavidyAM vadeta || 48||
abhichArAdibhiH kR^ityAM yaH prerayati mayyume |
tava hu~NkArasantrastA pratyakkartAramR^ichChatu || 49||
jagatpavitri mAmikAmapaharAshu durjarAm |
prasIda me dayA dhune prashastimamba naskR^idhi || 50||
kadambAruNamambAyA rUpaM chintaya chitta me |
mu~ncha pApIyasIM niShThAM mA gR^idhaH kasya sviddhanam || 51||
bhaNDabhaNDanalIlAyAM raktachandanapa~NkilaH |
a~Nkushastava taM hanyAdyashcha no dviShate janaH || 52||
re re chitta tvaM vR^ithA shokasindhau
majjasyantarvachmyupAyaM vimuktyai |
devyAH pAdau pUjayaikAkShareNa
tatte padaM sa~NgraheNa bravImyom || 53||
cha~nchadbAlAtapajyotsnAkalAmaNDalashAline |
aikShavAya namo mAtarbAhubhyAM tava dhanvane || 54||
tAmevAdyAM brahmavidyAmupAse
mUrtairvedaiH stUyamAnAM bhavAnIm |
hanta svAtmattvena yAM muktikAmo
matvA dhIro harShashokau jahAti || 55||
sharaNaM karavANyamba charaNaM tava sundari |
shepe tvatpAdukAbhyAM me nAnyaH panthA ayanAya || 56||
ratnachChatraishchAmarairdarpaNAdyai\-
shchakreshAnIM sarvadopachArayantyaH |
yoginyo.anyAH shaktayashchANimAdyA
yUyaM pAta svastibhiH sadA naH || 57||
daridraM mAM vijAnIhi sarvaj~nAsi yataH shive |
dUrIkR^ityAshu duritamatha no vardhayArayim || 58||
maheshvari mahAmantrakUTatrayakalevare |
kAdividyAkSharashreNImushantastvA havAmahe || 59||
mUlAdhArAdUrdhvamantashcharantIM
bhittvA granthInmUrdhni niryatsudhArdrAm |
pashyantastvAM ye cha tR^iptiM labhante
teShAM shAntiH shAshvatI netareShAm || 60||
mahyaM druhyanti ye mAtaH tvaddhyAnAsaktachetase |
tAnamba sAyakairebhirava brahmadviSho jahi || 61||
tvadbhaktAnAmamba shAntaiShaNAnAM
brahmiShThAnAM dR^iShTipAtena pUtaH |
pApIyAnapyAvR^itaH svarvadhUbhiH
shokAtigo modate svargaloke || 62||
santu vidyA jagatyasmin saMsArabhramahetavaH |
bhaje.ahaM tvAM yayA vidvAn vidyayA.amR^itamashnute || 63||
vidvanmukhyairvidrumAbhaM vishAla\-
shroNIshi~njanmekhalAki~NkiNIkam |
chandrottaMsaM chinmayaM vastu ki~nchi\-
dviddhi tvametannihitaM guhAyAm || 64||
na vismarAmi chinmUrtimikShukodaNDashAlinIm |
munayaH sanakapreShThAstAmAhuH paramAM gatim || 65||
chakShuHpre~NkhatpremakAruNyadhArAM
haMsajyotsnApUrahR^iShyachchakorAm |
yAmAshliShyanmodate devadevaH
sA no devI suhavA sharma yachChatu || 66||
mu~ncha va~nchakatAM chitta pAmaraM chApi daivatam |
gR^ihANa padamambAyA etadAlambanaM param || 67||
kA me bhItiH kA kShatiH kiM durApaM
kAmeshA~Nkottu~Ngaparya~NkasaMsthAm |
tattvAtItAmachyutAnandadAtrIM
devImahaM nirR^itiM vandamAnaH || 68||
chintAmaNimayottaMsakAntika~nchukitAnane |
lalite tvAM sakR^innatvA na bibheti kutashchana || 69||
tAruNyottu~Ngitakuche lAvaNyollAsitekShaNe |
tavAj~nayaiva kAmAdyA mAsmAnprApannarAtayaH || 70||
AkarNAkR^iShTakAmAsastrasa~njAtaM tApamamba me |
AchAmatu kaTAkShaste parjanyo vR^iShTimAniva || 71||
kurve garveNApachArAnapArA\-
nadyapyamba tvatpadAbjaM tathApi |
manye dhanye devi vidyAvalambaM
mAteva putraM bibhR^itAsvenam || 72||
yathopAstikShatirnasyAttava chakrasya sundari |
kR^ipayA kuru kalyANi tathA me svastirAyuShi || 73||
chakraM seve tAvakaM sarvasiddhyai
shrImanmAtaH siddhayashchANimAdyAH |
nityA mudrA shaktayashchA~Ngadevyo
yasmindevA adhi vishve niSheduH || 74||
sukumAre sukhAkAre sunetre sUkShmamadhyame |
suprasannA bhava shive sumR^iDIkA sarasvatI || 75||
vidyudvallIkandalIM kalpayantIM
mUrtiM sphUrtyA pa~NkajaM dhArayantIm |
dhyAyan hi tvAM jAyate sArvabhaumo
vishvA AshAH pR^itanAH sa~njayanjayan || 76||
avij~nAya parAM shaktimAtmabhUtAM maheshvarIm |
aho patanti nirayeShu ye ke chAtmahano janAH || 77||
sindUrAbhaissundarairaMshuvR^indaiH
lAkShAlakShmyAM majjayantIM jaganti |
herambAmba tvAM hR^idA lambate ya\-
stasmai vishaH svayamevAnamante || 78||
tava tattvaM vimR^ishatAM pratyagadvaitalakShaNam |
chidAnandaghanAdanyanneha nAnAsti ki~nchana || 79||
kaNThAtkuNDalinIM nItvA sahasrAraM shive tava |
na punarjAyate garbhe sumedhA amR^itokShitaH || 80||
tvatpAdukAnusandhAnaprAptasarvAtmatAdR^ishi |
pUrNAha~NkR^itimatyasminna karma lipyate nare || 81||
tavAnugrahanirbhinnahR^idayagranthiradrije |
svAtmatvena jaganmatvA tato na vijugupsate || 82||
kadA vasudalopete trikoNanavakAnvite |
AvAhayAmi chakre tvAM sUryAbhAM shriyamaishvarIm || 83||
hrImityekaM tAvakaM vAchakArNaM
yajjihvAgre devi jAgarti ki~nchit |
ko vAyaM syAtkAmakAmastrilokyAM
sarve.asmai devAH balimAvahanti || 84||
nAkastrINAM kinnarINAM nR^ipANA\-
pyAkarShi chetasA chintanIyam |
tvatpANisthaM ku~NkumAbhaM shive yaM
dviShmastasminprati mu~nchAmi pAsham || 85||
nUnaM siMhAsaneshvaryAstavAj~nAM shirasA vahan |
bhayena pavamAno.ayaM sarvA disho.anuvidhAvati || 86||
trikAlADhyAM trihR^illekhAM dvihaMsasvarabhUShitAm |
yo japatyamba te vidyAM so.akSharaH paramaH svarAT || 87||
dAridryAbdhau devi magno.api shashva\-
dvAchA yAche nAhamamba tvadanyam |
tasmAdasmadvA~nChitaM pUrayaita\-
duShA sA naktA sudugheva dhenuH || 88||
yo vA yadyatkAmanAkR^iShTachittaH
stutvopAste devi te chakravidyAm |
kalyANAnAmAlayaH kAlayogAt
taM taM lokaM jayate tAMshcha kAmAn || 89||
sAdhakassatataM kuryAdaikyaM shrIchakradehayoH |
tathA devyAtmanoraikyametAvadanushAsanam || 90||
hastAmbhojaprollasachchAmarAbhyAM
shrIvANIbhyAM pArshvayorvIjyamAnAm |
shrIsAmrAj~ni tvAM sadA lokayeyaM
sadA sadbhiH sevyamAnAM nigUDhAm || 91||
iShTAniShTaprAptivichChittihetuH
stotuM vAchAM kLLiptirityeva manye |
tvadrUpaM hi svAnubhUtyaikavedyaM
na chakShuShA gR^ihyate nApi vAchA || 92||
harasvaraishchaturvargapradaM mantraM sabindukam |
devyA japata viprendrA anyA vAcho vimu~nchatha || 93||
yaste rAkAchandrabimbAsanasthAM
pIyUShAbdhiM kalpayantIM mayUkhaiH |
mUrtiM bhaktyA dhyAyate hR^itsaroje
na tasya rogo na jarA na mR^ityuH || 94||
tubhyaM mAtaryo.a~njaliM mUrdhni dhatte
maulishreNyA bhUbhujastaM namanti |
yaH stauti tvAmamba chidvallivAchA
taM dhIrAsaH kavaya unnayanti || 95||
vairi~nchoghairviShNurudrendravR^indaiH
durgAkAlIbhairavIshaktisaM~NghaiH |
yatre(ntre)shi tvaM vartate(se) stUyamAnA
na tatra sUryo bhAti na chandratArakam || 96||
bhUtyai bhavAni tvAM vande surAH shatamakhAdayaH |
tvAmAnamya samR^iddhAH syurAyo dhAmAni divyAni || 97||
puShpavatphullatATa~NkAM prAtarAdityapATalAm |
yastvAmantaH smaratyamba tasya devA asanvashe || 98||
vashye vidrumasa~NkAshAM vidyAyAM vishadaprabhAm |
tvAmamba bhAvayedbhUtyai suvarNAM hemamAlinIm || 99||
vAmA~NgasthAmIshiturdIpyamAnAM
bhUShAvR^indairindurekhAvataMsAm |
yastvAM pashyan satataM naiva tR^iptaH
tasmai cha devi vaShaDastu tubhyam || 100||
navanIpavanIvAsalAlasottamamAnase |
shR^i~NgAradevate mAtaH shriyaM vAsaya me kule || 101||
bhaktyAbhaktyA vApi padyAvasAna\-
shrutyA stutyA chaitayA stauti yastvAm |
tasya kShipraM tvatprasAdena mAtaH
satyAH santu yajamAnasya kAmAH || 102||
bAlishena mayA proktamapi vAtsalyashAlinoH |
AnandamAdidampatyorimA vardhantu vA~NgiraH || 103||
mAdhurIsaurabhAvAsachApasAyakadhAriNIm |
devIM dhyAyan paThedetatsarvakAmArthasiddhaye || 104||
stotrametatprajapatastava tripurasundari |
anudvIkShya bhayAddUraM mR^ityurdhAvati pa~nchamaH || 105||
yaH paThati stutimetAM vidyAvantaM tamamba dhanavantam |
kuru devi yashasvantaM varchasvantaM manuShyeShu || 106||
ye shR^iNvanti stutimimAM tava devyanasUyakAH |
tebhyo dehi shriyaM vidyAmudvarcha uttanUbalam || 107||
tvAmevAhaM staumi nityaM praNaumi
shrIvidyeshAM vachmi sa~nchintayAmi |
adhyAste yA vishvamAtA virAjo
hR^itpuNDarIkaM virajaM vishuddham || 108||
sha~NkareNa rachitaM stavottamaM
yaH paThejjagati bhaktimAnnaraH |
tasya siddhiratulA bhaveddhruvA
sundarI cha satataM prasIdati || 109||
yatraiva yatraiva mano madIyaM
tatraiva tatraiva tava svarUpam |
yatraiva yatraiva shiro madIyaM
tatraiva tatraiva padadvayaM te || 110||
|| iti shrImatparamahaMsaparivrAjakAchAryasya
shrIgovindabhagavatpUjyapAdashiShyasya
shrImachSha~NkarabhagavataH kR^itau tripurasundarIvedapAdastotraM sampUrNam ||
##
Encoded and proofread by P. R. Ramamurthy
\medskip\hrule\obeylines
Please send corrections to sanskrit at cheerful dot c om
Last updated \today
https://sanskritdocuments.org
\end{document}