% Text title            : vaikRitikarahasyam
% File name             : vaikRitikarahasyam.itx
% Category              : devii
% Location              : doc\_devii
% Proofread by          : PSA Easwaran psaeaswaran at gmail.com
% Description-comments  : Brihatstotraratnakara 2, Narayana Ram Acharya, Nirnayasagar, stotrasankhyA 225-425
% Source                : mArkaNDeyapurANa
% Latest update         : March 22, 2017
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. vaikRitikaM rahasyam ..}##
\itxtitle{.. vaikR^itikaM rahasyam ..}##\endtitles ##

shrIgaNeshAya namaH ||
R^iShiruvAcha |
triguNA tAmasI devI sAttvikI yA tvayoditA |
sA sharvA chaNDikA durgA bhadrA bhagavatIryate || 1||
yoganidrA hareruktA mahAkAlI tamoguNA |
madhukaiTabhanAshArthaM yAM tuShTAvAmbujAsanaH || 2||
dashavaktrA dashabhujA dashapAdA~njanaprabhA |
vishAlayA rAjamAnA triMshallochanamAlayA || 3||
sphuraddashanadaMShTrA sA bhImarUpApi bhUmipa |
rUpasaubhAgyakAntInAM sA pratiShThAM mahAshriyAm || 4||
khaDgabANagadAshUlasha~NkhachakrabhushuDibhR^it |
parighaM kArmukaM shIrShaM nishchotadrudhiraM dadhau || 5||
eShA sA vaiShNavI mAyA mahAkAlI duratyayA |
ArAdhitA vashIkuryAtpUjAkartushcharAcharam || 6||
sarvadevasharIrebhyo yA.a.avirbhUtA.amitaprabhA |
triguNA sA mahAlakShmIH sAkShAnmahiShamardinI || 7||
shvetAnanA nIlabhujA sushvetastanamaNDalA |
raktamadhyA raktapAdA raktaja~NghorurunmadA || 8||
suchitrajaghanA chitramAlyAmbaravibhUShaNA |
chitrAnulepanA kAntirUpasaubhAgyashAlinI || 9||
aShTAdashabhujA pUjyA sA sahasrabhujA satI |
AyudhAnyatra vakShyante dakShiNAdhaHkarakramAt || 10||
akShamAlA cha kamalaM bANo.asiH kulishaM gadA |
chakraM trishUlaM parashuH sha~Nkho ghaNTA cha pAshakaH || 11||
shaktirdaNDashcharma chApaM pAnapAtraM kamaNDaluH |
ala~NkR^itabhujAmebhirAyudhaiH kamalAsanAm || 12||
sarvadevamayImIshAM mahAlakShmImimAM nR^ipa |
pUjayetsarvalokAnAM sa devAnAM prabhurbhavet || 13||
gaurIdehAtsamudbhUtA yA sattvaikaguNAshrayA |
sAkShAtsarasvatI proktA shumbhAsuranibarhiNI || 14||
dadhau chAShTabhujA bANAnmusalaM shUlachakrabhR^it |
sha~NkhaM ghaNTAM lA~NgalaM cha kArmukaM vasudhAdhipa || 15||
eShA sampUjitA bhaktyA sarvaj~natvaM prayachChati |
nishumbhamathinI devI shumbhAsuranibarhiNI || 16||
ityuktAni svarUpANi mUrtInAM tava pArthiva |
upAsanaM jaganmAtuH pR^ithagAsAM nishAmaya || 17||
mahAlakShmIryadA pUjyA mahAkAlI sarasvatI |
dakShiNottarayoH pUjye pR^iShThato mithunatrayam || 18||
vira~nchiH svarayA madhye rudro gauryA cha dakShiNe |
vAme lakShmyA hR^iShIkeshaH purato devatAtrayam || 19||
aShTAdashabhujA madhye vAme chAsyA dashAnanA |
dakShiNe.aShTabhujA lakShmIrmahatIti samarchayet || 20||
aShTAdashabhujA chaiShA yadA pUjyA narAdhipa |
dashAnanA chAShTabhujA dakShiNottarayostadA || 21||
kAlamR^ityU cha sampUjyau sarvAriShTaprashAntaye |
yadA chAShTabhujA pUjyA shumbhAsuranibarhiNI || 22||
navAsyAH shaktayaH pUjyAstadA rudravinAyakau |
namo devyA iti stotrairmahAlakShmIM samarchayet || 23||
avatAratrayArchAyAM stotramantrAstadAshrayAH |
aShTAdashabhujA chaiShA pUjyA mahiShamardinI || 24||
mahAlakShmIrmahAkAlI saiva proktA sarasvatI |
IshvarI puNyapApAnAM sarvalokamaheshvarI || 25||
mahiShAntakarI yena pUjitA sa jagatprabhuH |
pUjayejjagatAM dhAtrIM chaNDikAM bhaktavatsalAm || 26||
arghAdibhirala~NkArairgandhapuShpaistathottamaiH |
dhUpairdIpaishcha naivedyairnAnAbhakShyasamanvitaiH || 27||
rudhirAktena balinA mAMsena surayA nR^ipa |
praNAmAchamanIyena chandanena sugandhinA || 28||
sakarpUraishcha tAmbUlairbhaktibhAvasamanvitaiH |
vAmabhAge.agrato devyAshChinnashIrShaM mahAsuram || 29||
pUjayenmahiShaM yena prAptaM sAyujyamIshayA |
dakShiNe purataH siMhaM samagraM dharmamIshvaram || 30||
vAhanaM pUjayeddevyA dhR^itaM yena charAcharam |
tataH kR^itA~njalirbhUtvA stuvIta charitairimaiH || 31||
ekena vA madhyamena naikenetarayoriha |
charitArdhaM tu na japejjapa~nChidramavApnuyAt || 32||
stotramantraiH stuvItemAM yadi vA jagadambikAm |
pradakShiNAnamaskArAnkR^itvA mUrghni kR^itA~njaliH || 33||
kShamApayejjagaddhAtrIM muhurmuhuratadritaH |
pratishlokaM cha juhuyAtpAyasaM tilasarpiShA || 34||
juhuyAtstotramantrairvA chaNDikAyai shubhaM haviH |
namonamaHpadairdevIM pUjayetsusamAhitaH || 35||
prayataH prA~njaliH prahvaH prANAnAropya chAtmani |
suchiraM bhAvayeddevIM chaNDikAM tanmayo bhavet || 36||
evaM yaH pUjayedbhaktyA pratyahaM parameshvarIm |
bhuktvA bhogAn yathAkAmaM devIsAyujyamApnuyAt || 37||
yo na pUjayate nityaM chaNDikAM bhaktavatsalAm |
bhasmIkR^ityAsya puNyAni nirdahetparameshvarI || 38||
tasmAtpUjaya bhUpAla sarvalokamaheshvarIm |
yathoktena vidhAnena chaNDikAM sukhamApsyasi || 39||

iti shrImArkaNDeyapurANe sUryasAvarNike manvantare devImAhAtmye
vaikR^itikaM rahasyaM sampUrNam || adhyAya 15
##
See also prAdhAnikarahasyam and mUrtirahasyam

Proofread by PSA Easwaran psaeaswaran at gmail.com

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}