% Text title            : shrImadbhAgavatam - 01 - prathamaskandhaH
% File name             : bhagpur-01.itx
% Category              : purana, shrimadbhagavatam, vyAsa, krishna
% Location              : doc\_purana
% Proofread by          : PSA Easwaran
% Latest update         : July 4, 2021
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. shrImadbhAgavataM - prathamaskandhaH ..}##
\itxtitle{.. shrImadbhAgavataM \- prathamaskandhaH ..}##\endtitles ##
\chapter{.. OM namo bhagavate vAsudevAya ..}
\section{.. prathamaskandhaH ..}
saMsArasAgare magnaM dInaM mAM karuNAnidhe |
karmagrAhagR^ihItA~NgaM mAmuddhara bhavArNavAt ||
shrImadbhAgavatAkhyo.ayaM pratyakShaH kR^iShNa eva hi |
svIkR^ito.asi mayA nAtha muktyarthaM bhavasAgare ||
manoratho madIyo.ayaM saphalaH sarvathA tvayA |
nirvighnenaiva kartavyaH dAso.ahaM tava keshava ||
shukarUpaprabodhaj~na sarvashAstravishArada |
etatkathAprakAshena madaj~nAnaM vinAshaya ||
bhave bhave yathA bhaktiH pAdayostava jAyate |
tathA kuruShva devesha nAthastvaM no yataH prabho ||
nAmasa~NkIrtanaM yasya sarvapApapraNAshanam |
praNAmo duHkhashamanaH taM namAmi hariM param ||
kR^iShNAya vAsudevAya haraye paramAtmane |
praNatakleshanAshAya govindAya namo namaH ||
sarvatra govindanAmasa~NkIrtanaM govinda govinda ||
guM gurubhyo namaH | gaM gaNapataye namaH | saM sarasvatyai namaH |
daM dakShiNAmUrtaye namaH | vaM vedavyAsAya namaH |
OM namo bhagavate vAsudevAya | harishrIgaNapataye namaH ||
\iti
\section{.. OM namo bhagavate vAsudevAya ..}
\section{.. prathamo.adhyAyaH ..}
janmAdyasya yato.anvayAditaratashchArtheShvabhij~naH svarAT
tene brahmahR^idA ya Adikavaye muhyanti yatsUrayaH |
tejovArimR^idAM yathA vinimayo yatra trisargo.amR^iShA
dhAmnA svena sadA nirastakuhakaM satyaM paraM dhImahi || 1||
dharmaH projjhitakaitavo.atra paramo nirmatsarANAM satAM
vedyaM vAstavamatra vastu shivadaM tApatrayonmUlanam |
shrImadbhAgavate mahAmunikR^ite kiM vA parairIshvaraH
sadyo hR^idyavarudhyate.atra kR^itibhiH shushrUShubhistatkShaNAt || 2||
nigamakalpatarorgalitaM phalaM
shukamukhAdamR^itadravasaMyutam |
pibata bhAgavataM rasamAlayaM
muhuraho rasikA bhuvi bhAvukAH || 3||
naimiShe.animiShakShetre R^iShayaH shaunakAdayaH |
satraM svargAya lokAya sahasrasamamAsata || 4||
ta ekadA tu munayaH prAtarhutahutAgnayaH |
satkR^itaM sUtamAsInaM paprachChuridamAdarAt || 5||
R^iShaya UchuH
tvayA khalu purANAni setihAsAni chAnagha |
AkhyAtAnyapyadhItAni dharmashAstrANi yAnyuta || 6||
yAni vedavidAM shreShTho bhagavAn bAdarAyaNaH |
anye cha munayaH sUta parAvaravido viduH || 7||
vettha tvaM saumya tatsarvaM tattvatastadanugrahAt |
brUyuH snigdhasya shiShyasya guravo guhyamapyuta || 8||
tatra tatrA~njasA.a.ayuShman bhavatA yadvinishchitam |
puMsAmekAntataH shreyastannaH shaMsitumarhasi || 9||
prAyeNAlpAyuShaH sabhya kalAvasmin yuge janAH |
mandAH sumandamatayo mandabhAgyA hyupadrutAH || 10||
bhUrINi bhUrikarmANi shrotavyAni vibhAgashaH |
ataH sAdho.atra yatsAraM samuddhR^itya manIShayA |
brUhi naH shraddadhAnAnAM yenAtmA samprasIdati || 11||
sUta jAnAsi bhadraM te bhagavAn sAtvatAM patiH |
devakyAM vasudevasya jAto yasya chikIrShayA || 12||
tannaH shushrUShamANAnAmarhasya~NgAnuvarNitum |
yasyAvatAro bhUtAnAM kShemAya cha bhavAya cha || 13||
ApannaH saMsR^itiM ghorAM yannAma vivasho gR^iNan |
tataH sadyo vimuchyeta yadbibheti svayaM bhayam || 14||
yatpAdasaMshrayAH sUta munayaH prashamAyanAH |
sadyaH punantyupaspR^iShTAH svardhunyApo.anusevayA || 15||
ko vA bhagavatastasya puNyashlokeDyakarmaNaH |
shuddhikAmo na shR^iNuyAdyashaH kalimalApaham || 16||
tasya karmANyudArANi parigItAni sUribhiH |
brUhi naH shraddadhAnAnAM lIlayA dadhataH kalAH || 17||
athAkhyAhi harerdhImannavatArakathAH shubhAH |
lIlA vidadhataH svairamIshvarasyAtmamAyayA || 18||
vayaM tu na vitR^ipyAma uttamashlokavikrame |
yachChR^iNvatAM rasaj~nAnAM svAdu svAdu pade pade || 19||
kR^itavAn kila vIryANi saha rAmeNa keshavaH |
atimartyAni bhagavAn gUDhaH kapaTamAnuShaH || 20||
kalimAgatamAj~nAya kShetre.asmin vaiShNave vayam |
AsInA dIrghasatreNa kathAyAM sakShaNA hareH || 21||
tvaM naH sandarshito dhAtrA dustaraM nistitIrShatAm |
kaliM sattvaharaM puMsAM karNadhAra ivArNavam || 22||
brUhi yogeshvare kR^iShNe brahmaNye dharmavarmaNi |
svAM kAShThAmadhunopete dharmaH kaM sharaNaM gataH || 23||
iti shrImadbhAgavate mahApurANe pAramahaMsyAM saMhitAyAM
prathamaskandhe naimiShIyopAkhyAne prathamo.adhyAyaH || 1||
\iti
\section{.. OM namo bhagavate vAsudevAya ..}
\section{.. dvitIyo.adhyAyaH ..}
vyAsa uvAcha
iti samprashnasaMhR^iShTo viprANAM raumaharShaNiH |
pratipUjya vachasteShAM pravaktumupachakrame || 1||
sUta uvAcha
yaM pravrajantamanupetamapetakR^ityaM
dvaipAyano virahakAtara AjuhAva |
putreti tanmayatayA taravo.abhinedu\-
staM sarvabhUtahR^idayaM munimAnato.asmi || 2||
yaH svAnubhAvamakhilashrutisArameka\-
madhyAtmadIpamatititIrShatAM tamo.andham |
saMsAriNAM karuNayA.a.aha purANaguhyaM
taM vyAsasUnumupayAmi guruM munInAm || 3||
nArAyaNaM namaskR^itya naraM chaiva narottamam |
devIM sarasvatIM vyAsaM tato jayamudIrayet || 4||
munayaH sAdhu pR^iShTo.ahaM bhavadbhirlokama~Ngalam |
yatkR^itaH kR^iShNasamprashno yenAtmA suprasIdati || 5||
sa vai puMsAM paro dharmo yato bhaktiradhokShaje |
ahaitukyapratihatA yayA.a.atmA samprasIdati || 6||
vAsudeve bhagavati bhaktiyogaH prayojitaH |
janayatyAshu vairAgyaM j~nAnaM cha yadahaitukam || 7||
dharmaH svanuShThitaH puMsAM viShvaksenakathAsu yaH |
notpAdayedyadi ratiM shrama eva hi kevalam || 8||
dharmasya hyApavargyasya nArtho.arthAyopakalpate |
nArthasya dharmaikAntasya kAmo lAbhAya hi smR^itaH || 9||
kAmasya nendriyaprItirlAbho jIveta yAvatA |
jIvasya tattvajij~nAsA nArtho yashcheha karmabhiH || 10||
vadanti tattattvavidastattvaM yajj~nAnamadvayam |
brahmeti paramAtmeti bhagavAniti shabdyate || 11||
tachChraddadhAnA munayo j~nAnavairAgyayuktayA |
pashyantyAtmani chAtmAnaM bhaktyA shrutagR^ihItayA || 12||
ataH pumbhirdvijashreShThA varNAshramavibhAgashaH |
svanuShThitasya dharmasya saMsiddhirharitoShaNam || 13||
tasmAdekena manasA bhagavAn sAtvatAM patiH |
shrotavyaH kIrtitavyashcha dhyeyaH pUjyashcha nityadA || 14||
yadanudhyAsinA yuktAH karmagranthinibandhanam |
Chindanti kovidAstasya ko na kuryAtkathAratim || 15||
shushrUShoH shraddadhAnasya vAsudevakathAruchiH |
syAnmahatsevayA viprAH puNyatIrthaniShevaNAt || 16||
shR^iNvatAM svakathAM kR^iShNaH puNyashravaNakIrtanaH |
hR^idyantaHstho hyabhadrANi vidhunoti suhR^itsatAm || 17||
naShTaprAyeShvabhadreShu nityaM bhAgavatasevayA |
bhagavatyuttamashloke bhaktirbhavati naiShThikI || 18||
tadA rajastamobhAvAH kAmalobhAdayashcha ye |
cheta etairanAviddhaM sthitaM sattve prasIdati || 19||
evaM prasannamanaso bhagavadbhaktiyogataH |
bhagavattattvavij~nAnaM muktasa~Ngasya jAyate || 20||
bhidyate hR^idayagranthishChidyante sarvasaMshayAH |
kShIyante chAsya karmANi dR^iShTa evAtmanIshvare || 21||
ato vai kavayo nityaM bhaktiM paramayA mudA |
vAsudeve bhagavati kurvantyAtmaprasAdanIm || 22||
sattvaM rajastama iti prakR^iterguNAstaiH
yuktaH paramapUruSha eka ihAsya dhatte |
sthityAdaye hariviri~nchihareti sa.nj~nAH
shreyAMsi tatra khalu sattvatanornR^iNAM syuH || 23||
pArthivAddAruNo dhUmastasmAdagnistrayImayaH |
tamasastu rajastasmAtsattvaM yadbrahmadarshanam || 24||
bhejire munayo.athAgre bhagavantamadhokShajam |
sattvaM vishuddhaM kShemAya kalpante ye.anu tAniha || 25||
mumukShavo ghorarUpAn hitvA bhUtapatInatha |
nArAyaNakalAH shAntA bhajanti hyanasUyavaH || 26||
rajastamaHprakR^itayaH samashIlA bhajanti vai |
pitR^ibhUtaprajeshAdIn shriyaishvaryaprajepsavaH || 27||
vAsudevaparA vedA vAsudevaparA makhAH |
vAsudevaparA yogA vAsudevaparAH kriyAH || 28||
vAsudevaparaM j~nAnaM vAsudevaparaM tapaH |
vAsudevaparo dharmo vAsudevaparA gatiH || 29||
sa evedaM sasarjAgre bhagavAnAtmamAyayA |
sadasadrUpayA chAsau guNamayyA.aguNe vibhuH || 30||
tayA vilasiteShveShu guNeShu guNavAniva |
antaHpraviShTa AbhAti vij~nAnena vijR^imbhitaH || 31||
yathA hyavahito vahnirdAruShvekaH svayoniShu |
nAneva bhAti vishvAtmA bhUteShu cha tathA pumAn || 32||
asau guNamayairbhAvairbhUtasUkShmendriyAtmabhiH |
svanirmiteShu nirviShTo bhu~Nkte bhUteShu tadguNAn || 33||
bhAvayatyeSha sattvena lokAn vai lokabhAvanaH |
lIlAvatArAnurato devatirya~NnarAdiShu || 34||
iti shrImadbhAgavate mahApurANe pAramahaMsyAM saMhitAyAM
prathamaskandhe naimiShIyopAkhyAne dvitIyo.adhyAyaH || 2||
\iti
\section{.. OM namo bhagavate vAsudevAya ..}
\section{.. tR^itIyo.adhyAyaH ..}
sUta uvAcha
jagR^ihe pauruShaM rUpaM bhagavAn mahadAdibhiH |
sambhUtaM ShoDashakalamAdau lokasisR^ikShayA || 1||
yasyAmbhasi shayAnasya yoganidrAM vitanvataH |
nAbhihradAmbujAdAsIdbrahmA vishvasR^ijAM patiH || 2||
yasyAvayavasaMsthAnaiH kalpito lokavistaraH |
tadvai bhagavato rUpaM vishuddhaM sattvamUrjitam || 3||
pashyantyado rUpamadabhrachakShuShA
sahasrapAdorubhujAnanAdbhutam |
sahasramUrdhashravaNAkShinAsikaM
sahasramaulyambarakuNDalollasat || 4||
etannAnAvatArANAM nidhAnaM bIjamavyayam |
yasyAMshAMshena sR^ijyante devatirya~NnarAdayaH || 5||
sa eva prathamaM devaH kaumAraM sargamAshritaH |
chachAra dushcharaM brahmA brahmacharyamakhaNDitam || 6||
dvitIyaM tu bhavAyAsya rasAtalagatAM mahIm |
uddhariShyannupAdatta yaj~neshaH saukaraM vapuH || 7||
tR^itIyaM R^iShisargaM cha devarShitvamupetya saH |
tantraM sAtvatamAchaShTa naiShkarmyaM karmaNAM yataH || 8||
turye dharmakalAsarge naranArAyaNAvR^iShI |
bhUtvA.a.atmopashamopetamakaroddushcharaM tapaH || 9||
pa~nchamaH kapilo nAma siddheshaH kAlaviplutam |
provAchAsuraye sA~NkhyaM tattvagrAmavinirNayam || 10||
ShaShThamatrerapatyatvaM vR^itaH prApto.anasUyayA |
AnvIkShikImalarkAya prahlAdAdibhya UchivAn || 11||
tataH saptama AkUtyAM rucheryaj~no.abhyajAyata |
sa yAmAdyaiH suragaNairapAtsvAyambhuvAntaram || 12||
aShTame merudevyAM tu nAbherjAta urukramaH |
darshayan vartma dhIrANAM sarvAshramanamaskR^itam || 13||
R^iShibhiryAchito bheje navamaM pArthivaM vapuH |
dugdhemAmoShadhIrviprAstenAyaM sa ushattamaH || 14||
rUpaM sa jagR^ihe mAtsyaM chAkShuShodadhisamplave |
nAvyAropya mahImayyAmapAdvaivasvataM manum || 15||
surAsurANAmudadhiM mathnatAM mandarAchalam |
dadhre kamaTharUpeNa pR^iShTha ekAdashe vibhuH || 16||
dhAnvantaraM dvAdashamaM trayodashamameva cha |
apAyayatsurAnanyAn mohinyA mohayan striyA || 17||
chaturdashaM nArasiMhaM bibhraddaityendramUrjitam |
dadAra karajairvakShasyerakAM kaTakR^idyathA || 18||
pa~nchadashaM vAmanakaM kR^itvAgAdadhvaraM baleH |
padatrayaM yAchamAnaH pratyAditsustriviShTapam || 19||
avatAre ShoDashame pashyan brahmadruho nR^ipAn |
triHsaptakR^itvaH kupito niHkShatrAmakaronmahIm || 20||
tataH saptadashe jAtaH satyavatyAM parAsharAt |
chakre vedataroH shAkhA dR^iShTvA puMso.alpamedhasaH || 21||
naradevatvamApannaH surakAryachikIrShayA |
samudranigrahAdIni chakre vIryANyataH param || 22||
ekonaviMshe viMshatime vR^iShNiShu prApya janmanI |
rAmakR^iShNAviti bhuvo bhagavAnaharadbharam || 23||
tataH kalau sampravR^itte sammohAya suradviShAm |
buddho nAmnAjanasutaH kIkaTeShu bhaviShyati || 24||
athAsau yugasandhyAyAM dasyuprAyeShu rAjasu |
janitA viShNuyashaso nAmnA kalkirjagatpatiH || 25||
avatArA hyasa~NkhyeyA hareH sattvanidherdvijAH |
yathAvidAsinaH kulyAH sarasaH syuH sahasrashaH || 26||
R^iShayo manavo devA manuputrA mahaujasaH |
kalAH sarve harereva saprajApatayastathA || 27||
ete chAMshakalAH puMsaH kR^iShNastu bhagavAn svayam |
indrArivyAkulaM lokaM mR^iDayanti yuge yuge || 28||
janma guhyaM bhagavato ya etatprayato naraH |
sAyaM prAtargR^iNan bhaktyA duHkhagrAmAdvimuchyate || 29||
etadrUpaM bhagavato hyarUpasya chidAtmanaH |
mAyAguNairvirachitaM mahadAdibhirAtmani || 30||
yathA nabhasi meghaugho reNurvA pArthivo.anile |
evaM draShTari dR^ishyatvamAropitamabuddhibhiH || 31||
ataH paraM yadavyaktamavyUDhaguNavyUhitam |
adR^iShTAshrutavastutvAtsa jIvo yatpunarbhavaH || 32||
yatreme sadasadrUpe pratiShiddhe svasaMvidA |
avidyayA.a.atmani kR^ite iti tadbrahmadarshanam || 33||
yadyeShoparatA devI mAyA vaishAradI matiH |
sampanna eveti vidurmahimni sve mahIyate || 34||
evaM janmAni karmANi hyakarturajanasya cha |
varNayanti sma kavayo vedaguhyAni hR^itpateH || 35||
sa vA idaM vishvamamoghalIlaH
sR^ijatyavatyatti na sajjate.asmin |
bhUteShu chAntarhita AtmatantraH
ShADvargikaM jighrati ShaDguNeshaH || 36||
na chAsya kashchinnipuNena dhAtu\-
ravaiti jantuH kumanISha UtIH |
nAmAni rUpANi manovachobhiH
santanvato naTacharyAmivAj~naH || 37||
sa veda dhAtuH padavIM parasya
durantavIryasya rathA~NgapANeH |
yo.amAyayA santatayAnuvR^ittyA
bhajeta tatpAdasarojagandham || 38||
atheha dhanyA bhagavanta itthaM
yadvAsudeve.akhilalokanAthe |
kurvanti sarvAtmakamAtmabhAvaM
na yatra bhUyaH parivarta ugraH || 39||
idaM bhAgavataM nAma purANaM brahmasammitam |
uttamashlokacharitaM chakAra bhagavAn R^iShiH || 40||
niHshreyasAya lokasya dhanyaM svastyayanaM mahat |
tadidaM grAhayAmAsa sutamAtmavatAM varam || 41||
sarvavedetihAsAnAM sAraM sAraM samuddhR^itam |
sa tu saMshrAvayAmAsa mahArAjaM parIkShitam || 42||
prAyopaviShTaM ga~NgAyAM parItaM paramarShibhiH |
kR^iShNe svadhAmopagate dharmaj~nAnAdibhiH saha || 43||
kalau naShTadR^ishAmeSha purANArko.adhunoditaH |
tatra kIrtayato viprA viprarSherbhUritejasaH || 44||
ahaM chAdhyagamaM tatra niviShTastadanugrahAt |
so.ahaM vaH shrAvayiShyAmi yathAdhItaM yathAmati || 45||
iti shrImadbhAgavate mahApurANe pAramahaMsyAM saMhitAyAM
prathamaskandhe naimiShIyopAkhyAne tR^itIyo.adhyAyaH || 3||
\iti
\section{.. OM namo bhagavate vAsudevAya ..}
\section{.. chaturtho.adhyAyaH ..}
vyAsa uvAcha
iti bruvANaM saMstUya munInAM dIrghasatriNAm |
vR^iddhaH kulapatiH sUtaM bahvR^ichaH shaunako.abravIt || 1||
shaunaka uvAcha
sUta sUta mahAbhAga vada no vadatAM vara |
kathAM bhAgavatIM puNyAM yadAha bhagavA~nChukaH || 2||
kasmin yuge pravR^itteyaM sthAne vA kena hetunA |
kutaH sa~nchoditaH kR^iShNaH kR^itavAn saMhitAM muniH || 3||
tasya putro mahAyogI samadR^i~NnirvikalpakaH |
ekAntamatirunnidro gUDho mUDha iveyate || 4||
dR^iShTvAnuyAntamR^iShimAtmajamapyanagnaM
devyo hriyA paridadhurna sutasya chitram |
tadvIkShya pR^ichChati munau jagadustavAsti
strIpumbhidA na tu sutasya viviktadR^iShTeH || 5||
kathamAlakShitaH pauraiH samprAptaH kurujA~NgalAn |
unmattamUkajaDavadvicharan gajasAhvaye || 6||
kathaM vA pANDaveyasya rAjarShermuninA saha |
saMvAdaH samabhUttAta yatraiShA sAtvatI shrutiH || 7||
sa godohanamAtraM hi gR^iheShu gR^ihamedhinAm |
avekShate mahAbhAgastIrthIkurvaMstadAshramam || 8||
abhimanyusutaM sUta prAhurbhAgavatottamam |
tasya janma mahAshcharyaM karmANi cha gR^iNIhi naH || 9||
sa samrAT kasya vA hetoH pANDUnAM mAnavardhanaH |
prAyopaviShTo ga~NgAyAmanAdR^ityAdhirAT shriyam || 10||
namanti yatpAdaniketamAtmanaH
shivAya hAnIya dhanAni shatravaH |
kathaM sa vIraH shriyama~Nga dustyajAM
yuvaiShatotsraShTumaho sahAsubhiH || 11||
shivAya lokasya bhavAya bhUtaye
ya uttamashlokaparAyaNA janAH |
jIvanti nAtmArthamasau parAshrayaM
mumocha nirvidya kutaH kalevaram || 12||
tatsarvaM naH samAchakShva pR^iShTo yadiha ki~nchana |
manye tvAM viShaye vAchAM snAtamanyatra ChAndasAt || 13||
sUta uvAcha
dvApare samanuprApte tR^itIye yugaparyaye |
jAtaH parAsharAdyogI vAsavyAM kalayA hareH || 14||
sa kadAchitsarasvatyA upaspR^ishya jalaM shuchiH |
viviktadesha AsIna udite ravimaNDale || 15||
parAvaraj~naH sa R^iShiH kAlenAvyaktaraMhasA |
yugadharmavyatikaraM prAptaM bhuvi yuge yuge || 16||
bhautikAnAM cha bhAvAnAM shaktihrAsaM cha tatkR^itam |
ashraddadhAnAn niHsattvAn durmedhAn hrasitAyuShaH || 17||
durbhagAMshcha janAn vIkShya munirdivyena chakShuShA |
sarvavarNAshramANAM yaddadhyau hitamamoghadR^ik || 18||
chAturhotraM karma shuddhaM prajAnAM vIkShya vaidikam |
vyadadhAdyaj~nasantatyai vedamekaM chaturvidham || 19||
R^igyajuHsAmAtharvAkhyA vedAshchatvAra uddhR^itAH |
itihAsapurANaM cha pa~nchamo veda uchyate || 20||
tatrargvedadharaH pailaH sAmago jaiminiH kaviH |
vaishampAyana evaiko niShNAto yajuShAmuta || 21||
atharvA~NgirasAmAsItsumanturdAruNo muniH |
itihAsapurANAnAM pitA me romaharShaNaH || 22||
ta eta R^iShayo vedaM svaM svaM vyasyannanekadhA |
shiShyaiH prashiShyaistachChiShyairvedAste shAkhino.abhavan || 23||
ta eva vedA durmedhairdhAryante puruShairyathA |
evaM chakAra bhagavAn vyAsaH kR^ipaNavatsalaH || 24||
strIshUdradvijabandhUnAM trayI na shrutigocharA |
karmashreyasi mUDhAnAM shreya evaM bhavediha |
iti bhAratamAkhyAnaM kR^ipayA muninA kR^itam || 25||
evaM pravR^ittasya sadA bhUtAnAM shreyasi dvijAH |
sarvAtmakenApi yadA nAtuShyaddhR^idayaM tataH || 26||
nAtiprasIdaddhR^idayaH sarasvatyAstaTe shuchau |
vitarkayan viviktastha idaM chovAcha dharmavit || 27||
dhR^itavratena hi mayA ChandAMsi guravo.agnayaH |
mAnitA nirvyalIkena gR^ihItaM chAnushAsanam || 28||
bhAratavyapadeshena hyAmnAyArthashcha darshitaH |
dR^ishyate yatra dharmAdi strIshUdrAdibhirapyuta || 29||
tathApi bata me daihyo hyAtmA chaivAtmanA vibhuH |
asampanna ivAbhAti brahmavarchasyasattamaH || 30||
kiM vA bhAgavatA dharmA na prAyeNa nirUpitAH |
priyAH paramahaMsAnAM ta eva hyachyutapriyAH || 31||
tasyaivaM khilamAtmAnaM manyamAnasya khidyataH |
kR^iShNasya nArado.abhyAgAdAshramaM prAgudAhR^itam || 32||
tamabhij~nAya sahasA pratyutthAyAgataM muniH |
pUjayAmAsa vidhivannAradaM surapUjitam || 33||
iti shrImadbhAgavate mahApurANe pAramahaMsyAM saMhitAyAM
prathamaskandhe naimiShIyopAkhyAne chaturtho.adhyAyaH || 4||
\iti
\section{.. OM namo bhagavate vAsudevAya ..}
\section{.. pa~nchamo.adhyAyaH ..}
sUta uvAcha
atha taM sukhamAsIna upAsInaM bR^ihachChravAH |
devarShiH prAha viprarShiM vINApANiH smayanniva || 1||
nArada uvAcha
pArAsharya mahAbhAga bhavataH kachchidAtmanA |
parituShyati shArIra AtmA mAnasa eva vA || 2||
jij~nAsitaM susampannamapi te mahadadbhutam |
kR^itavAn bhArataM yastvaM sarvArthaparibR^iMhitam || 3||
jij~nAsitamadhItaM cha yattadbrahma sanAtanam |
athApi shochasyAtmAnamakR^itArtha iva prabho || 4||
vyAsa uvAcha
astyeva me sarvamidaM tvayoktaM
tathApi nAtmA parituShyate me |
tanmUlamavyaktamagAdhabodhaM
pR^ichChAmahe tvAtmabhavAtmabhUtam || 5||
sa vai bhavAn veda samastaguhya\-
mupAsito yatpuruShaH purANaH |
parAvaresho manasaiva vishvaM
sR^ijatyavatyatti guNairasa~NgaH || 6||
tvaM paryaTannarka iva trilokI\-
mantashcharo vAyurivAtmasAkShI |
parAvare brahmaNi dharmato vrataiH
snAtasya me nyUnamalaM vichakShva || 7||
shrInArada uvAcha
bhavatAnuditaprAyaM yasho bhagavato.amalam |
yenaivAsau na tuShyeta manye taddarshanaM khilam || 8||
yathA dharmAdayashchArthA munivaryAnukIrtitAH |
na tathA vAsudevasya mahimA hyanuvarNitaH || 9||
na yadvachashchitrapadaM hareryasho
jagatpavitraM pragR^iNIta karhichit |
tadvAyasaM tIrthamushanti mAnasA
na yatra haMsA niramantyushikkShayAH || 10||
tadvAgvisargo janatAghaviplavo
yasmin pratishlokamabaddhavatyapi |
nAmAnyanantasya yasho.a~NkitAni ya\-
chChR^iNvanti gAyanti gR^iNanti sAdhavaH || 11||
naiShkarmyamapyachyutabhAvavarjitaM
na shobhate j~nAnamalaM nira~njanam |
kutaH punaH shashvadabhadramIshvare
na chArpitaM karma yadapyakAraNam || 12||
atho mahAbhAga bhavAnamoghadR^ik\-
shuchishravAHsatyarato dhR^itavrataH |
urukramasyAkhilabandhamuktaye
samAdhinAnusmara tadvicheShTitam || 13||
tato.anyathA ki~nchana yadvivakShataH
pR^ithagdR^ishastatkR^itarUpanAmabhiH |
na kutrachitkvApi cha duHsthitA mati\-
rlabheta vAtAhatanaurivAspadam || 14||
jugupsitaM dharmakR^ite.anushAsataH
svabhAvaraktasya mahAn vyatikramaH |
yadvAkyato dharma itItaraH sthito
na manyate tasya nivAraNaM janaH || 15||
vichakShaNo.asyArhati vedituM vibho\-
ranantapArasya nivR^ittitaH sukham |
pravartamAnasya guNairanAtmana\-
stato bhavAn darshaya cheShTitaM vibhoH || 16||
tyaktvA svadharmaM charaNAmbujaM hare\-
rbhajannapakvo.atha patettato yadi |
yatra kva vAbhadramabhUdamuShya kiM
ko vArtha Apto.abhajatAM svadharmataH || 17||
tasyaiva hetoH prayateta kovido
na labhyate yadbhramatAmuparyadhaH |
tallabhyate duHkhavadanyataH sukhaM
kAlena sarvatra gabhIraraMhasA || 18||
na vai jano jAtu katha~nchanAvraje\-
nmukundasevyanyavada~Nga saMsR^itim |
smaran mukundA~NghryupagUhanaM puna\-
rvihAtumichChenna rasagraho yataH || 19||
idaM hi vishvaM bhagavAnivetaro
yato jagatsthAnanirodhasambhavAH |
taddhi svayaM veda bhavAMstathApi vai
prAdeshamAtraM bhavataH pradarshitam || 20||
tvamAtmanA.a.atmAnamavehyamoghadR^ik\-
parasyapuMsaH paramAtmanaH kalAm |
ajaM prajAtaM jagataH shivAya tan\-
mahAnubhAvAbhyudayo.adhigaNyatAm || 21||
idaM hi puMsastapasaH shrutasya vA
sviShTasya sUktasya cha buddhidattayoH |
avichyuto.arthaH kavibhirnirUpito
yaduttamashlokaguNAnuvarNanam || 22||
ahaM purAtItabhave.abhavaM mune
dAsyAstu kasyAshchana vedavAdinAm |
nirUpito bAlaka eva yoginAM
shushrUShaNe prAvR^iShi nirvivikShatAm || 23||
te mayyapetAkhilachApale.arbhake
dAnte.adhR^itakrIDanake.anuvartini |
chakruH kR^ipAM yadyapi tulyadarshanAH
shushrUShamANe munayo.alpabhAShiNi || 24||
uchChiShTalepAnanumodito dvijaiH
sakR^itsma bhu~nje tadapAstakilbiShaH |
evaM pravR^ittasya vishuddhachetasa\-
staddharma evAtmaruchiH prajAyate || 25||
tatrAnvahaM kR^iShNakathAH pragAyatA\-
manugraheNAshR^iNavaM manoharAH |
tAH shraddhayA me.anupadaM vishR^iNvataH
priyashravasya~Nga mamAbhavadruchiH || 26||
tasmiMstadA labdharuchermahAmune
priyashravasyAskhalitA matirmama |
yayAhametatsadasatsvamAyayA
pashye mayi brahmaNi kalpitaM pare || 27||
itthaM sharatprAvR^iShikAvR^itU hare\-
rvishR^iNvato me.anusavaM yasho.amalam |
sa~NkIrtyamAnaM munibhirmahAtmabhi\-
rbhaktiH pravR^ittA.a.atmarajastamo.apahA || 28||
tasyaivaM me.anuraktasya prashritasya hatainasaH |
shraddadhAnasya bAlasya dAntasyAnucharasya cha || 29||
j~nAnaM guhyatamaM yattatsAkShAdbhagavatoditam |
anvavochan gamiShyantaH kR^ipayA dInavatsalAH || 30||
yenaivAhaM bhagavato vAsudevasya vedhasaH |
mAyAnubhAvamavidaM yena gachChanti tatpadam || 31||
etatsaMsUchitaM brahmaMstApatrayachikitsitam |
yadIshvare bhagavati karma brahmaNi bhAvitam || 32||
Amayo yashcha bhUtAnAM jAyate yena suvrata |
tadeva hyAmayaM dravyaM na punAti chikitsitam || 33||
evaM nR^iNAM kriyAyogAH sarve saMsR^itihetavaH |
ta evAtmavinAshAya kalpante kalpitAH pare || 34||
yadatra kriyate karma bhagavatparitoShaNam |
j~nAnaM yattadadhInaM hi bhaktiyogasamanvitam || 35||
kurvANA yatra karmANi bhagavachChikShayAsakR^it |
gR^iNanti guNanAmAni kR^iShNasyAnusmaranti cha || 36||
namo bhagavate tubhyaM vAsudevAya dhImahi |
pradyumnAyAniruddhAya namaH sa~NkarShaNAya cha || 37||
iti mUrtyabhidhAnena mantramUrtimamUrtikam |
yajate yaj~napuruShaM sa samyagdarshanaH pumAn || 38||
imaM svanigamaM brahmannavetya madanuShThitam |
adAnme j~nAnamaishvaryaM svasmin bhAvaM cha keshavaH || 39||
tvamapyadabhrashrutavishrutaM vibhoH
samApyate yena vidAM bubhutsitam |
AkhyAhi/prakhyAhi duHkhairmuhurarditAtmanAM
sa~NkleshanirvANamushanti nAnyathA || 40||
iti shrImadbhAgavate mahApurANe pAramahaMsyAM saMhitAyAM
prathamaskandhe vyAsanAradasaMvAde pa~nchamo.adhyAyaH || 5||
\iti
\section{.. OM namo bhagavate vAsudevAya ..}
\section{.. ShaShTho.adhyAyaH ..}
sUta uvAcha
evaM nishamya bhagavAn devarSherjanma karma cha |
bhUyaH paprachCha taM brahman vyAsaH satyavatIsutaH || 1||
vyAsa uvAcha
bhikShubhirvipravasite vij~nAnAdeShTR^ibhistava |
vartamAno vayasyAdye tataH kimakarodbhavAn || 2||
svAyambhuva kayA vR^ittyA vartitaM te paraM vayaH |
kathaM chedamudasrAkShIH kAle prApte kalevaram || 3||
prAkkalpaviShayAmetAM smR^itiM te surasattama |
na hyeSha vyavadhAtkAla eSha sarvanirAkR^itiH || 4||
nArada uvAcha
bhikShubhirvipravasite vij~nAnAdeShTR^ibhirmama |
vartamAno vayasyAdye tata etadakAraSham || 5||
ekAtmajA me jananI yoShinmUDhA cha ki~NkarI |
mayyAtmaje.ananyagatau chakre snehAnubandhanam || 6||
sAsvatantrA na kalpA.a.asIdyogakShemaM mamechChatI |
Ishasya hi vashe loko yoShA dArumayI yathA || 7||
ahaM cha tadbrahmakule UShivAMstadapekShayA |
digdeshakAlAvyutpanno bAlakaH pa~nchahAyanaH || 8||
ekadA nirgatAM gehAdduhantIM nishi gAM pathi |
sarpo.adashatpadA spR^iShTaH kR^ipaNAM kAlachoditaH || 9||
tadA tadahamIshasya bhaktAnAM shamabhIpsataH |
anugrahaM manyamAnaH prAtiShThaM dishamuttarAm || 10||
sphItA~njanapadAMstatra puragrAmavrajAkarAn |
kheTakharvaTavATIshcha vanAnyupavanAni cha || 11||
chitradhAtuvichitrAdrInibhabhagnabhujadrumAn |
jalAshayA~nChivajalAnnalinIH surasevitAH || 12||
chitrasvanaiH patrarathairvibhramadbhramarashriyaH |
nalaveNusharastambakushakIchakagahvaram || 13||
eka evAtiyAto.ahamadrAkShaM vipinaM mahat |
ghoraM pratibhayAkAraM vyAlolUkashivAjiram || 14||
parishrAntendriyAtmAhaM tR^iTparIto bubhukShitaH |
snAtvA pItvA hrade nadyA upaspR^iShTo gatashramaH || 15||
tasminnirmanuje.araNye pippalopastha AsthitaH |
AtmanA.a.atmAnamAtmasthaM yathAshrutamachintayam || 16||
dhyAyatashcharaNAmbhojaM bhAvanirjitachetasA |
autkaNThyAshrukalAkShasya hR^idyAsInme shanairhariH || 17||
premAtibharanirbhinnapulakA~Ngo.atinirvR^itaH |
Anandasamplave lIno nApashyamubhayaM mune || 18||
rUpaM bhagavato yattanmanaHkAntaM shuchApaham |
apashyan sahasottasthe vaiklavyAddurmanA iva || 19||
didR^ikShustadahaM bhUyaH praNidhAya mano hR^idi |
vIkShamANo.api nApashyamavitR^ipta ivAturaH || 20||
evaM yatantaM vijane mAmAhAgocharo girAm |
gambhIrashlakShNayA vAchA shuchaH prashamayanniva || 21||
hantAsmi~njanmani bhavAn na mAM draShTumihArhati |
avipakvakaShAyANAM durdarsho.ahaM kuyoginAm || 22||
sakR^idyaddarshitaM rUpametatkAmAya te.anagha |
matkAmaH shanakaiH sAdhu sarvAn mu~nchati hR^ichChayAn || 23||
satsevayAdIrghayA te jAtA mayi dR^iDhA matiH |
hitvAvadyamimaM lokaM gantA majjanatAmasi || 24||
matirmayi nibaddheyaM na vipadyeta karhichit |
prajAsarganirodhe.api smR^itishcha madanugrahAt || 25||
etAvaduktvopararAma tanmaha\-
dbhUtaM nabholi~Ngamali~NgamIshvaram |
ahaM cha tasmai mahatAM mahIyase
shIrShNAvanAmaM vidadhe.anukampitaH || 26||
nAmAnyanantasya hatatrapaH paThan
guhyAni bhadrANi kR^itAni cha smaran |
gAM paryaTaMstuShTamanA gataspR^ihaH
kAlaM pratIkShan vimado vimatsaraH || 27||
evaM kR^iShNamaterbrahmannasaktasyAmalAtmanaH |
kAlaH prAdurabhUtkAle taDitsaudAmanI yathA || 28||
prayujyamAne mayi tAM shuddhAM bhAgavatIM tanum |
ArabdhakarmanirvANo nyapatatpA~nchabhautikaH || 29||
kalpAnta idamAdAya shayAne.ambhasyudanvataH |
shishayiShoranuprANaM vivishe.antarahaM vibhoH || 30||
sahasrayugaparyanta utthAyedaM sisR^ikShataH |
marIchimishrA R^iShayaH prANebhyo.ahaM cha jaj~nire || 31||
antarbahishcha lokAMstrIn paryemyaskanditavrataH |
anugrahAnmahAviShNoravighAtagatiH kvachit || 32||
devadattAmimAM vINAM svarabrahmavibhUShitAm |
mUrchChayitvA harikathAM gAyamAnashcharAmyaham || 33||
pragAyataH svavIryANi tIrthapAdaH priyashravAH |
AhUta iva me shIghraM darshanaM yAti chetasi || 34||
etad.hdhyAturachittAnAM mAtrAsparshechChayA muhuH |
bhavasindhuplavo dR^iShTo haricharyAnuvarNanam || 35||
yamAdibhiryogapathaiH kAmalobhahato muhuH |
mukundasevayA yadvattathA.a.atmAddhA na shAmyati || 36||
sarvaM tadidamAkhyAtaM yatpR^iShTo.ahaM tvayAnagha |
janmakarmarahasyaM me bhavatashchAtmatoShaNam || 37||
sUta uvAcha
evaM sambhAShya bhagavAnnArado vAsavIsutam |
Amantrya vINAM raNayan yayau yAdR^ichChiko muniH || 38||
aho devarShirdhanyo.ayaM yatkIrtiM shAr~NgadhanvanaH |
gAyan mAdyannidaM tantryA ramayatyAturaM jagat || 39||
iti shrImadbhAgavate mahApurANe pAramahaMsyAM saMhitAyAM
prathamaskandhe vyAsanAradasaMvAde ShaShTho.adhyAyaH || 6||
\iti
\section{.. OM namo bhagavate vAsudevAya ..}
\section{.. saptamo.adhyAyaH ..}
shaunaka uvAcha
nirgate nArade sUta bhagavAn bAdarAyaNaH |
shrutavAMstadabhipretaM tataH kimakarodvibhuH || 1||
sUta uvAcha
brahmanadyAM sarasvatyAmAshramaH pashchime taTe |
shamyAprAsa iti prokta R^iShINAM satravardhanaH || 2||
tasmin sva Ashrame vyAso badarIShaNDamaNDite |
AsIno.apa upaspR^ishya praNidadhyau manaH svayam || 3||
bhaktiyogena manasi samyak praNihite.amale |
apashyatpuruShaM pUrvaM mAyAM cha tadupAshrayAm || 4||
yayA sammohito jIva AtmAnaM triguNAtmakam |
paro.api manute.anarthaM tatkR^itaM chAbhipadyate || 5||
anarthopashamaM sAkShAdbhaktiyogamadhokShaje |
lokasyAjAnato vidvAMshchakre sAtvatasaMhitAm || 6||
yasyAM vai shrUyamANAyAM kR^iShNe paramapUruShe |
bhaktirutpadyate puMsaH shokamohabhayApahA || 7||
sa saMhitAM bhAgavatIM kR^itvAnukramya chAtmajam |
shukamadhyApayAmAsa nivR^ittinirataM muniH || 8||
shaunaka uvAcha
sa vai nivR^ittinirataH sarvatropekShako muniH |
kasya vA bR^ihatImetAmAtmArAmaH samabhyasat || 9||
sUta uvAcha
AtmArAmAshcha munayo nirgranthA apyurukrame |
kurvantyahaitukIM bhaktimitthambhUtaguNo hariH || 10||
harerguNAkShiptamatirbhagavAn bAdarAyaNiH |
adhyagAnmahadAkhyAnaM nityaM viShNujanapriyaH || 11||
parIkShito.atha rAjarSherjanmakarmavilApanam |
saMsthAM cha pANDuputrANAM vakShye kR^iShNakathodayam || 12||
yadA mR^idhe kauravasR^i~njayAnAM
vIreShvatho vIragatiM gateShu |
vR^ikodarAviddhagadAbhimarsha\-
bhagnorudaNDe dhR^itarAShTraputre || 13||
bhartuH priyaM drauNiriti sma pashyan
kR^iShNAsutAnAM svapatAM shirAMsi |
upAharadvipriyameva tasya
jugupsitaM karma vigarhayanti || 14||
mAtA shishUnAM nidhanaM sutAnAM
nishamya ghoraM paritapyamAnA |
tadArudadbAShpakalAkulAkShI
tAM sAntvayannAha kirITamAlI || 15||
tadA shuchaste pramR^ijAmi bhadre
yadbrahmabandhoH shira AtatAyinaH |
gANDIvamuktairvishikhairupAhare
tvA.a.akramya yatsnAsyasi dagdhaputrA || 16||
iti priyAM valguvichitrajalpaiH
sa sAntvayitvAchyutamitrasUtaH |
anvAdravaddaMshita ugradhanvA
kapidhvajo guruputraM rathena || 17||
tamApatantaM sa vilakShya dUrAt
kumArahodvignamanA rathena |
parAdravatprANaparIpsururvyAM
yAvadgamaM rudrabhayAdyathArkaH || 18||
yadAsharaNamAtmAnamaikShata shrAntavAjinam |
astraM brahmashiro mene AtmatrANaM dvijAtmajaH || 19||
athopaspR^ishya salilaM sandadhe tatsamAhitaH |
ajAnannupasaMhAraM prANakR^ichChra upasthite || 20||
tataH prAduShkR^itaM tejaH prachaNDaM sarvato disham |
prANApadamabhiprekShya viShNuM jiShNuruvAcha ha || 21||
arjuna uvAcha
kR^iShNa kR^iShNa mahAbhAga bhaktAnAmabhaya~Nkara |
tvameko dahyamAnAnAmapavargo.asi saMsR^iteH || 22||
tvamAdyaH puruShaH sAkShAdIshvaraH prakR^iteH paraH |
mAyAM vyudasya chichChaktyA kaivalye sthita Atmani || 23||
sa eva jIvalokasya mAyAmohitachetasaH |
vidhatse svena vIryeNa shreyo dharmAdilakShaNam || 24||
tathAyaM chAvatAraste bhuvo bhArajihIrShayA |
svAnAM chAnanyabhAvAnAmanudhyAnAya chAsakR^it || 25||
kimidaM svitkuto veti devadeva na vedmyaham |
sarvatomukhamAyAti tejaH paramadAruNam || 26||
shrIbhagavAnuvAcha
vetthedaM droNaputrasya brAhmamastraM pradarshitam |
naivAsau veda saMhAraM prANabAdha upasthite || 27||
na hyasyAnyatamaM ki~nchidastraM pratyavakarshanam |
jahyastrateja unnaddhamastraj~no hyastratejasA || 28||
sUta uvAcha
shrutvA bhagavatA proktaM phAlgunaH paravIrahA |
spR^iShTvApastaM parikramya brAhmaM brAhmAya sandadhe || 29||
saMhatyAnyonyamubhayostejasI sharasaMvR^ite |
AvR^itya rodasI khaM cha vavR^idhAte.arkavahnivat || 30||
dR^iShTvAstratejastu tayostrIMllokAn pradahan mahat |
dahyamAnAH prajAH sarvAH sAMvartakamamaMsata || 31||
prajopadravamAlakShya lokavyatikaraM cha tam |
mataM cha vAsudevasya sa~njahArArjuno dvayam || 32||
tata AsAdya tarasA dAruNaM gautamIsutam |
babandhAmarShatAmrAkShaH pashuM rashanayA yathA || 33||
shibirAya ninIShantaM dAmnA baddhvA ripuM balAt |
prAhArjunaM prakupito bhagavAnambujekShaNaH || 34||
mainaM pArthArhasi trAtuM brahmabandhumimaM jahi |
yo.asAvanAgasaH suptAnavadhInnishi bAlakAn || 35||
mattaM pramattamunmattaM suptaM bAlaM striyaM jaDam |
prapannaM virathaM bhItaM na ripuM hanti dharmavit || 36||
svaprANAn yaH paraprANaiH prapuShNAtyaghR^iNaH khalaH |
tadvadhastasya hi shreyo yaddoShAdyAtyadhaH pumAn || 37||
pratishrutaM cha bhavatA pA~nchAlyai shR^iNvato mama |
AhariShye shirastasya yaste mAnini putrahA || 38||
tadasau vadhyatAM pApa AtatAyyAtmabandhuhA |
bhartushcha vipriyaM vIra kR^itavAn kulapAMsanaH || 39||
evaM parIkShatA dharmaM pArthaH kR^iShNena choditaH |
naichChaddhantuM gurusutaM yadyapyAtmahanaM mahAn || 40||
athopetya svashibiraM govindapriyasArathiH |
nyavedayattaM priyAyai shochantyA AtmajAn hatAn || 41||
tathA.a.ahR^itaM pashuvatpAshabaddhamavA~NmukhaM karmajugupsitena |
nirIkShya kR^iShNApakR^itaM guroH sutaM vAmasvabhAvA kR^ipayA nanAma cha || 42||
uvAcha chAsahantyasya bandhanAnayanaM satI |
muchyatAM muchyatAmeSha brAhmaNo nitarAM guruH || 43||
sarahasyo dhanurvedaH savisargopasaMyamaH |
astragrAmashcha bhavatA shikShito yadanugrahAt || 44||
sa eSha bhagavAn droNaH prajArUpeNa vartate |
tasyAtmano.ardhaM patnyAste nAnvagAdvIrasUH kR^ipI || 45||
taddharmaj~na mahAbhAga bhavadbhirgauravaM kulam |
vR^ijinaM nArhati prAptuM pUjyaM vandyamabhIkShNashaH || 46||
mA rodIdasya jananI gautamI patidevatA |
yathAhaM mR^itavatsA.a.artA rodimyashrumukhI muhuH || 47||
yaiH kopitaM brahmakulaM rAjanyairajitAtmabhiH |
tatkulaM pradahatyAshu sAnubandhaM shuchArpitam || 48||
sUta uvAcha
dharmyaM nyAyyaM sakaruNaM nirvyalIkaM samaM mahat |
rAjA dharmasuto rAj~nyAH pratyanandadvacho dvijAH || 49||
nakulaH sahadevashcha yuyudhAno dhana~njayaH |
bhagavAn devakIputro ye chAnye yAshcha yoShitaH || 50||
tatrAhAmarShito bhImastasya shreyAn vadhaH smR^itaH |
na bharturnAtmanashchArthe yo.ahan suptAn shishUn vR^ithA || 51||
nishamya bhImagaditaM draupadyAshcha chaturbhujaH |
Alokya vadanaM sakhyuridamAha hasanniva || 52||
shrIkR^iShNa uvAcha
brahmabandhurna hantavya AtatAyI vadhArhaNaH |
mayaivobhayamAmnAtaM paripAhyanushAsanam || 53||
kuru pratishrutaM satyaM yattatsAntvayatA priyAm |
priyaM cha bhImasenasya pA~nchAlyA mahyameva cha || 54||
sUta uvAcha
arjunaH sahasA.a.aj~nAya harerhArdamathAsinA |
maNiM jahAra mUrdhanyaM dvijasya sahamUrdhajam || 55||
vimuchya rashanAbaddhaM bAlahatyAhataprabham |
tejasA maNinA hInaM shibirAnnirayApayat || 56||
vapanaM draviNAdAnaM sthAnAnniryApaNaM tathA |
eSha hi brahmabandhUnAM vadho nAnyo.asti daihikaH || 57||
putrashokAturAH sarve pANDavAH saha kR^iShNayA |
svAnAM mR^itAnAM yatkR^ityaM chakrurnirharaNAdikam || 58||
iti shrImadbhAgavate mahApurANe pAramahaMsyAM saMhitAyAM
prathamaskandhe drauNinigraho nAma saptamo.adhyAyaH || 7||
\iti
\section{.. OM namo bhagavate vAsudevAya ..}
\section{.. aShTamo.adhyayaH ..}
sUta uvAcha
atha te samparetAnAM svAnAmudakamichChatAm |
dAtuM sakR^iShNA ga~NgAyAM puraskR^itya yayuH striyaH || 1||
te ninIyodakaM sarve vilapya cha bhR^ishaM punaH |
AplutA haripAdAbjarajaHpUtasarijjale || 2||
tatrAsInaM kurupatiM dhR^itarAShTraM sahAnujam |
gAndhArIM putrashokArtAM pR^ithAM kR^iShNAM cha mAdhavaH || 3||
sAntvayAmAsa munibhirhatabandhU~nshuchArpitAn |
bhUteShu kAlasya gatiM darshayannapratikriyAm || 4||
sAdhayitvAjAtashatroH svaM rAjyaM kitavairhR^itam |
ghAtayitvAsato rAj~naH kachasparshakShatAyuShaH || 5||
yAjayitvAshvamedhaistaM tribhiruttamakalpakaiH |
tadyashaH pAvanaM dikShu shatamanyorivAtanot || 6||
Amantrya pANDuputrAMshcha shaineyoddhavasaMyutaH |
dvaipAyanAdibhirvipraiH pUjitaiH pratipUjitaH || 7||
gantuM kR^itamatirbrahman dvArakAM rathamAsthitaH |
upalebhe.abhidhAvantImuttarAM bhayavihvalAm || 8||
uttarovAcha
pAhi pAhi mahAyogin devadeva jagatpate |
nAnyaM tvadabhayaM pashye yatra mR^ityuH parasparam || 9||
abhidravati mAmIsha sharastaptAyaso vibho |
kAmaM dahatu mAM nAtha mA me garbho nipAtyatAm || 10||
sUta uvAcha
upadhArya vachastasyA bhagavAn bhaktavatsalaH |
apANDavamidaM kartuM drauNerastramabudhyata || 11||
tarhyevAtha munishreShTha pANDavAH pa~ncha sAyakAn |
Atmano.abhimukhAn dIptAnAlakShyAstrANyupAdaduH || 12||
vyasanaM vIkShya tatteShAmananyaviShayAtmanAm |
sudarshanena svAstreNa svAnAM rakShAM vyadhAdvibhuH || 13||
antaHsthaH sarvabhUtAnAmAtmA yogeshvaro hariH |
svamAyayAvR^iNodgarbhaM vairATyAH kurutantave || 14||
yadyapyastraM brahmashirastvamoghaM chApratikriyam |
vaiShNavaM teja AsAdya samashAmyadbhR^igUdvaha || 15||
mA maMsthA hyetadAshcharyaM sarvAshcharyamaye.achyute |
ya idaM mAyayA devyA sR^ijatyavati hantyajaH || 16||
brahmatejovinirmuktairAtmajaiH saha kR^iShNayA |
prayANAbhimukhaM kR^iShNamidamAha pR^ithA satI || 17||
kuntyuvAcha
namasye puruShaM tvAdyamIshvaraM prakR^iteH param |
alakShyaM sarvabhUtAnAmantarbahiravasthitam || 18||
mAyAjavanikAchChannamaj~nAdhokShajamavyayam |
na lakShyase mUDhadR^ishA naTo nATyadharo yathA || 19||
tathA paramahaMsAnAM munInAmamalAtmanAm |
bhaktiyogavidhAnArthaM kathaM pashyema hi striyaH || 20||
kR^iShNAya vAsudevAya devakInandanAya cha |
nandagopakumArAya govindAya namo namaH || 21||
namaH pa~NkajanAbhAya namaH pa~NkajamAline |
namaH pa~NkajanetrAya namaste pa~NkajA~Nghraye || 22||
yathA hR^iShIkesha khalena devakI
kaMsena ruddhAtichiraM shuchArpitA |
vimochitAhaM cha sahAtmajA vibho
tvayaiva nAthena muhurvipadgaNAt || 23||
viShAnmahAgneH puruShAdadarshanA\-
dasatsabhAyA vanavAsakR^ichChrataH |
mR^idhe mR^idhe.anekamahArathAstrato
drauNyastratashchAsma hare.abhirakShitAH || 24||
vipadaH santu naH shashvattatra tatra jagadguro |
bhavato darshanaM yatsyAdapunarbhavadarshanam || 25||
janmaishvaryashrutashrIbhiredhamAnamadaH pumAn |
naivArhatyabhidhAtuM vai tvAmaki~nchanagocharam || 26||
namo.aki~nchanavittAya nivR^ittaguNavR^ittaye |
AtmArAmAya shAntAya kaivalyapataye namaH || 27||
manye tvAM kAlamIshAnamanAdinidhanaM vibhum |
samaM charantaM sarvatra bhUtAnAM yanmithaH kaliH || 28||
na veda kashchidbhagavaMshchikIrShitaM
tavehamAnasya nR^iNAM viDambanam |
na yasya kashchiddayito.asti karhichi\-
ddveShyashcha yasminviShamA matirnR^iNAm || 29||
janma karma cha vishvAtmannajasyAkarturAtmanaH |
tirya~NnR^irShiShu yAdaHsu tadatyantaviDambanam || 30||
gopyAdade tvayi kR^itAgasi dAma tAva\-
dyA te dashAshrukalilA~njanasambhramAkSham |
vaktraM ninIya bhayabhAvanayA sthitasya
sA mAM vimohayati bhIrapi yadbibheti || 31||
kechidAhurajaM jAtaM puNyashlokasya kIrtaye |
yadoH priyasyAnvavAye malayasyeva chandanam || 32||
apare vasudevasya devakyAM yAchito.abhyagAt |
ajastvamasya kShemAya vadhAya cha suradviShAm || 33||
bhArAvatAraNAyAnye bhuvo nAva ivodadhau |
sIdantyA bhUribhAreNa jAto hyAtmabhuvArthitaH || 34||
bhave.asmin klishyamAnAnAmavidyAkAmakarmabhiH |
shravaNasmaraNArhANi kariShyanniti kechana || 35||
shR^iNvanti gAyanti gR^iNantyabhIkShNashaH
smaranti nandanti tavehitaM janAH |
ta eva pashyantyachireNa tAvakaM
bhavapravAhoparamaM padAmbujam || 36||
apyadya nastvaM svakR^itehita prabho
jihAsasi svitsuhR^ido.anujIvinaH |
yeShAM na chAnyadbhavataH padAmbujA\-
tparAyaNaM rAjasu yojitAMhasAm || 37||
ke vayaM nAmarUpAbhyAM yadubhiH saha pANDavAH |
bhavato.adarshanaM yarhi hR^iShIkANAmiveshituH || 38||
neyaM shobhiShyate tatra yathedAnIM gadAdhara |
tvatpadaira~NkitA bhAti svalakShaNavilakShitaiH || 39||
ime janapadAH svR^iddhAH supakvauShadhivIrudhaH |
vanAdrinadyudanvanto hyedhante tava vIkShitaiH || 40||
atha vishvesha vishvAtman vishvamUrte svakeShu me |
snehapAshamimaM Chindhi dR^iDhaM pANDuShu vR^iShNiShu || 41||
tvayi me.ananyaviShayA matirmadhupate.asakR^it |
ratimudvahatAdaddhA ga~Ngevaughamudanvati || 42||
shrIkR^iShNa kR^iShNasakha vR^iShNyR^iShabhAvanidhrug\-
rAjanyavaMshadahanAnapavargavIrya |
govinda godvijasurArtiharAvatAra
yogeshvarAkhilaguro bhagavan namaste || 43||
sUta uvAcha
pR^ithayetthaM kalapadaiH pariNUtAkhilodayaH |
mandaM jahAsa vaikuNTho mohayanniva mAyayA || 44||
tAM bADhamityupAmantrya pravishya gajasAhvayam |
striyashcha svapuraM yAsyan premNA rAj~nA nivAritaH || 45||
vyAsAdyairIshvarehAj~naiH kR^iShNenAdbhutakarmaNA |
prabodhito.apItihAsairnAbudhyata shuchArpitaH || 46||
Aha rAjA dharmasutashchintayan suhR^idAM vadham |
prAkR^itenAtmanA viprAH snehamohavashaM gataH || 47||
aho me pashyatAj~nAnaM hR^idi rUDhaM durAtmanaH |
pArakyasyaiva dehasya bahvyo me.akShauhiNIrhatAH || 48||
bAladvijasuhR^inmitrapitR^ibhrAtR^igurudruhaH |
na me syAnnirayAnmokSho hyapi varShAyutAyutaiH || 49||
naino rAj~naH prajAbharturdharmayuddhe vadho dviShAm |
iti me na tu bodhAya kalpate shAsanaM vachaH || 50||
strINAM maddhatabandhUnAM droho yo.asAvihotthitaH |
karmabhirgR^ihamedhIyairnAhaM kalpo vyapohitum || 51||
yathA pa~Nkena pa~NkAmbhaH surayA vA surAkR^itam |
bhUtahatyAM tathaivaikAM na yaj~nairmArShTumarhati || 52||
iti shrImadbhAgavate mahApurANe pAramahaMsyAM saMhitAyAM
prathamaskandhe kuntIstutiryudhiShThirAnutApo nAmAShTamo.adhyAyaH || 8||
\iti
\section{.. OM namo bhagavate vAsudevAya ..}
\section{.. navamo.adhyAyaH ..}
sUta uvAcha
iti bhItaH prajAdrohAtsarvadharmavivitsayA |
tato vinashanaM prAgAdyatra devavrato.apatat || 1||
tadA te bhrAtaraH sarve sadashvaiH svarNabhUShitaiH |
anvagachChan rathairviprA vyAsadhaumyAdayastathA || 2||
bhagavAnapi viprarShe rathena sadhana~njayaH |
sa tairvyarochata nR^ipaH kubera iva guhyakaiH || 3||
dR^iShTvA nipatitaM bhUmau divashchyutamivAmaram |
praNemuH pANDavA bhIShmaM sAnugAH saha chakriNA || 4||
tatra brahmarShayaH sarve devarShayashcha sattama |
rAjarShayashcha tatrAsan draShTuM bharatapu~Ngavam || 5||
parvato nArado dhaumyo bhagavAn bAdarAyaNaH |
bR^ihadashvo bharadvAjaH sashiShyo reNukAsutaH || 6||
vasiShTha indrapramadastrito gR^itsamado.asitaH |
kakShIvAn gautamo.atrishcha kaushiko.atha sudarshanaH || 7||
anye cha munayo brahman brahmarAtAdayo.amalAH |
shiShyairupetA AjagmuH kashyapA~NgirasAdayaH || 8||
tAn sametAn mahAbhAgAnupalabhya vasUttamaH |
pUjayAmAsa dharmaj~no deshakAlavibhAgavit || 9||
kR^iShNaM cha tatprabhAvaj~na AsInaM jagadIshvaram |
hR^idisthaM pUjayAmAsa mAyayopAttavigraham || 10||
pANDuputrAnupAsInAn prashrayapremasa~NgatAn |
abhyAchaShTAnurAgAsrairandhIbhUtena chakShuShA || 11||
aho kaShTamaho.anyAyyaM yadyUyaM dharmanandanAH |
jIvituM nArhatha kliShTaM vipradharmAchyutAshrayAH || 12||
saMsthite.atirathe pANDau pR^ithA bAlaprajA vadhUH |
yuShmatkR^ite bahUn kleshAn prAptA tokavatI muhuH || 13||
sarvaM kAlakR^itaM manye bhavatAM cha yadapriyam |
sapAlo yadvashe loko vAyoriva ghanAvaliH || 14||
yatra dharmasuto rAjA gadApANirvR^ikodaraH |
kR^iShNo.astrI gANDivaM chApaM suhR^itkR^iShNastato vipat || 15||
na hyasya karhichidrAjan pumAn veda vidhitsitam |
yadvijij~nAsayA yuktA muhyanti kavayo.api hi || 16||
tasmAdidaM daivatantraM vyavasya bharatarShabha |
tasyAnuvihito.anAthA nAtha pAhi prajAH prabho || 17||
eSha vai bhagavAn sAkShAdAdyo nArAyaNaH pumAn |
mohayan mAyayA lokaM gUDhashcharati vR^iShNiShu || 18||
asyAnubhAvaM bhagavAn veda guhyatamaM shivaH |
devarShirnAradaH sAkShAdbhagavAn kapilo nR^ipa || 19||
yaM manyase mAtuleyaM priyaM mitraM suhR^ittamam |
akaroH sachivaM dUtaM sauhR^idAdatha sArathim || 20||
sarvAtmanaH samadR^isho hyadvayasyAnaha~NkR^iteH |
tatkR^itaM mativaiShamyaM niravadyasya na kvachit || 21||
tathApyekAntabhakteShu pashya bhUpAnukampitam |
yanme.asUMstyajataH sAkShAtkR^iShNo darshanamAgataH || 22||
bhaktyA.a.aveshya mano yasmin vAchA yannAma kIrtayan |
tyajan kalevaraM yogI muchyate kAmakarmabhiH || 23||
sa devadevo bhagavAn pratIkShatAM
kalevaraM yAvadidaM hinomyaham |
prasannahAsAruNalochanollasa\-
nmukhAmbujo dhyAnapathashchaturbhujaH || 24||
sUta uvAcha
yudhiShThirastadAkarNya shayAnaM sharapa~njare |
apR^ichChadvividhAn dharmAn R^iShINAM chAnushR^iNvatAm || 25||
puruShasvabhAvavihitAn yathAvarNaM yathAshramam |
vairAgyarAgopAdhibhyAmAmnAtobhayalakShaNAn || 26||
dAnadharmAn rAjadharmAn mokShadharmAn vibhAgashaH |
strIdharmAn bhagavaddharmAn samAsavyAsayogataH || 27||
dharmArthakAmamokShAMshcha sahopAyAn yathA mune |
nAnAkhyAnetihAseShu varNayAmAsa tattvavit || 28||
dharmaM pravadatastasya sa kAlaH pratyupasthitaH |
yo yoginashChandamR^ityorvA~nChitastUttarAyaNaH || 29||
tadopasaMhR^itya giraH sahasraNI\-
rvimuktasa~NgaM mana AdipUruShe |
kR^iShNe lasatpItapaTe chaturbhuje
puraH sthite.amIlitadR^igvyadhArayat || 30||
vishuddhayA dhAraNayA hatAshubha\-
stadIkShayaivAshu gatAyudhavyathaH/shramaH |
nivR^ittasarvendriyavR^ittivibhrama\-
stuShTAva janyaM visR^ija~njanArdanam || 31||
shrIbhIShma uvAcha
iti matirupakalpitA vitR^iShNA
bhagavati sAtvatapu~Ngave vibhUmni |
svasukhamupagate kvachidvihartuM
prakR^itimupeyuShi yadbhavapravAhaH || 32||
tribhuvanakamanaM tamAlavarNaM
ravikaragauravarAmbaraM dadhAne |
vapuralakakulAvR^itAnanAbjaM
vijayasakhe ratirastu me.anavadyA || 33||
yudhi turagarajovidhUmraviShvak
kachalulitashramavAryala~NkR^itAsye |
mama nishitasharairvibhidyamAna\-
tvachi vilasatkavache.astu kR^iShNa AtmA || 34||
sapadi sakhivacho nishamya madhye
nijaparayorbalayo rathaM niveshya |
sthitavati parasainikAyurakShNA
hR^itavati pArthasakhe ratirmamAstu || 35||
vyavahitapR^itanAmukhaM nirIkShya
svajanavadhAdvimukhasya doShabud.hdhyA |
kumatimaharadAtmavidyayA ya\-
shcharaNaratiH paramasya tasya me.astu || 36||
svanigamamapahAya matpratij~nAM
R^itamadhikartumavapluto rathasthaH |
dhR^itarathacharaNo.abhyayAchchaladgu\-
rhaririva hantumibhaM gatottarIyaH || 37||
shitavishikhahato vishIrNadaMshaH
kShatajaparipluta AtatAyino me |
prasabhamabhisasAra madvadhArthaM
sa bhavatu me bhagavAn gatirmukundaH || 38||
vijayarathakuTumba Attatotre
dhR^itahayarashmini tachChriyekShaNIye |
bhagavati ratirastu me mumUrSho\-
ryamiha nirIkShya hatA gatAH sarUpam || 39||
lalitagativilAsavalguhAsa\-
praNayanirIkShaNakalpitorumAnAH |
kR^itamanukR^itavatya unmadAndhAH
prakR^itimagan kila yasya gopavadhvaH || 40||
munigaNanR^ipavaryasa~Nkule.antaH\-
sadasi yudhiShThirarAjasUya eShAm |
arhaNamupapeda IkShaNIyo
mama dR^ishigochara eSha AvirAtmA || 41||
tamimamahamajaM sharIrabhAjAM
hR^idi hR^idi dhiShThitamAtmakalpitAnAm |
pratidR^ishamiva naikadhArkamekaM
samadhigato.asmi vidhUtabhedamohaH || 42||
sUta uvAcha
kR^iShNa evaM bhagavati manovAgdR^iShTivR^ittibhiH |
AtmanyAtmAnamAveshya so.antaHshvAsa upAramat || 43||
sampadyamAnamAj~nAya bhIShmaM brahmaNi niShkale |
sarve babhUvuste tUShNIM vayAMsIva dinAtyaye || 44||
tatra dundubhayo nedurdevamAnavavAditAH |
shashaMsuH sAdhavo rAj~nAM khAtpetuH puShpavR^iShTayaH || 45||
tasya nirharaNAdIni samparetasya bhArgava |
yudhiShThiraH kArayitvA muhUrtaM duHkhito.abhavat || 46||
tuShTuvurmunayo hR^iShTAH kR^iShNaM tadguhyanAmabhiH |
tataste kR^iShNahR^idayAH svAshramAn prayayuH punaH || 47||
tato yudhiShThiro gatvA sahakR^iShNo gajAhvayam |
pitaraM sAntvayAmAsa gAndhArIM cha tapasvinIm || 48||
pitrA chAnumato rAjA vAsudevAnumoditaH |
chakAra rAjyaM dharmeNa pitR^ipaitAmahaM vibhuH || 49||
iti shrImadbhAgavate mahApurANe pAramahaMsyAM saMhitAyAM
prathamaskandhe yudhiShThirarAjyapralambho nAma navamo.adhyAyaH || 9||
\iti
\section{.. OM namo bhagavate vAsudevAya ..}
\section{.. dashamo.adhyAyaH ..}
shaunaka uvAcha
hatvA svarikthaspR^idha AtatAyino
yudhiShThiro dharmabhR^itAM variShThaH |
sahAnujaiH pratyavaruddhabhojanaH
kathaM pravR^ittaH kimakAraShIttataH || 1||
sUta uvAcha
vaMshaM kurorvaMshadavAgninirhR^itaM
saMrohayitvA bhavabhAvano hariH |
niveshayitvA nijarAjya Ishvaro
yudhiShThiraM prItamanA babhUva ha || 2||
nishamya bhIShmoktamathAchyutoktaM
pravR^ittavij~nAnavidhUtavibhramaH |
shashAsa gAmindra ivAjitAshrayaH
paridhyupAntAmanujAnuvartitaH || 3||
kAmaM vavarSha parjanyaH sarvakAmadughA mahI |
siShichuH sma vrajAn gAvaH payasodhasvatIrmudA || 4||
nadyaH samudrA girayaH savanaspativIrudhaH |
phalantyoShadhayaH sarvAH kAmamanvR^itu tasya vai || 5||
nAdhayo vyAdhayaH kleshA daivabhUtAtmahetavaH |
ajAtashatrAvabhavan jantUnAM rAj~ni karhichit || 6||
uShitvA hAstinapure mAsAn katipayAn hariH |
suhR^idAM cha vishokAya svasushcha priyakAmyayA || 7||
Amantrya chAbhyanuj~nAtaH pariShvajyAbhivAdya tam |
Aruroha rathaM kaishchitpariShvakto.abhivAditaH || 8||
subhadrA draupadI kuntI virATatanayA tathA |
gAndhArI dhR^itarAShTrashcha yuyutsurgautamo yamau || 9||
vR^ikodarashcha dhaumyashcha striyo matsyasutAdayaH |
na sehire vimuhyanto virahaM shAr~NgadhanvanaH || 10||
satsa~NgAnmuktaduHsa~Ngo hAtuM notsahate budhaH |
kIrtyamAnaM yasho yasya sakR^idAkarNya rochanam || 11||
tasmin nyastadhiyaH pArthAH saheran virahaM katham |
darshanasparshasaMlApashayanAsanabhojanaiH || 12||
sarve te.animiShairakShaistamanudrutachetasaH |
vIkShantaH snehasambaddhA vichelustatra tatra ha || 13||
nyarundhannudgaladbAShpamautkaNThyAddevakIsute |
niryAtyagArAnno.abhadramiti syAdbAndhavastriyaH || 14||
mR^ida~Ngasha~Nkhabheryashcha vINApaNavagomukhAH |
dhundhuryAnakaghaNTAdyA nedurdundubhayastathA || 15||
prAsAdashikharArUDhAH kurunAryo didR^ikShayA |
vavR^iShuH kusumaiH kR^iShNaM premavrIDAsmitekShaNAH || 16||
sitAtapatraM jagrAha muktAdAmavibhUShitam |
ratnadaNDaM guDAkeshaH priyaH priyatamasya ha || 17||
uddhavaH sAtyakishchaiva vyajane paramAdbhute |
vikIryamANaH kusumai reje madhupatiH pathi || 18||
ashrUyantAshiShaH satyAstatra tatra dvijeritAH |
nAnurUpAnurUpAshcha nirguNasya guNAtmanaH || 19||
anyonyamAsItsa~njalpa uttamashlokachetasAm |
kauravendrapurastrINAM sarvashrutimanoharaH || 20||
sa vai kilAyaM puruShaH purAtano
ya eka AsIdavisheSha Atmani |
agre guNebhyo jagadAtmanIshvare
nimIlitAtman nishi suptashaktiShu || 21||
sa eva bhUyo nijavIryachoditAM
svajIvamAyAM prakR^itiM sisR^ikShatIm |
anAmarUpAtmani rUpanAmanI
vidhitsamAno.anusasAra shAstrakR^it || 22||
sa vA ayaM yatpadamatra sUrayo
jitendriyA nirjitamAtarishvanaH |
pashyanti bhaktyutkalitAmalAtmanA
nanveSha sattvaM parimArShTumarhati || 23||
sa vA ayaM sakhyanugItasatkatho
vedeShu guhyeShu cha guhyavAdibhiH |
ya eka Isho jagadAtmalIlayA
sR^ijatyavatyatti na tatra sajjate || 24||
yadA hyadharmeNa tamodhiyo nR^ipA
jIvanti tatraiSha hi sattvataH kila |
dhatte bhagaM satyamR^itaM dayAM yasho
bhavAya rUpANi dadhadyuge yuge || 25||
aho alaM shlAghyatamaM yadoH kula\-
maho alaM puNyatamaM madhorvanam |
yadeSha puMsAmR^iShabhaH shriyaH patiH
svajanmanA cha~NkramaNena chA~nchati || 26||
aho bata svaryashasastiraskarI
kushasthalI puNyayashaskarI bhuvaH |
pashyanti nityaM yadanugraheShitaM
smitAvalokaM svapatiM sma yatprajAH || 27||
nUnaM vratasnAnahutAdineshvaraH
samarchito hyasya gR^ihItapANibhiH |
pibanti yAH sakhyadharAmR^itaM muhu\-
rvrajastriyaHsammumuhuryadAshayAH || 28||
yA vIryashulkena hR^itAH svayaMvare
pramathya chaidyapramukhAn hi shuShmiNaH |
pradyumnasAmbAmbasutAdayo.aparA
yAshchAhR^itA bhaumavadhe sahasrashaH || 29||
etAH paraM strItvamapAstapeshalaM
nirastashauchaM bata sAdhu kurvate |
yAsAM gR^ihAtpuShkaralochanaH pati\-
rna jAtvapaityAhR^itibhirhR^idi spR^ishan || 30||
evaMvidhA gadantInAM sa giraH purayoShitAm |
nirIkShaNenAbhinandan sasmitena yayau hariH || 31||
ajAtashatruH pR^itanAM gopIthAya madhudviShaH |
parebhyaH sha~NkitaH snehAtprAyu~Nkta chatura~NgiNIm || 32||
atha dUrAgatAn shauriH kauravAn virahAturAn |
sannivartya dR^iDhaM snigdhAn prAyAtsvanagarIM priyaiH || 33||
kurujA~NgalapA~nchAlAn shUrasenAn sayAmunAn |
brahmAvartaM kurukShetraM matsyAn sArasvatAnatha || 34||
marudhanvamatikramya sauvIrAbhIrayoH parAn |
AnartAn bhArgavopAgAchChrAntavAho manAg vibhuH || 35||
tatra tatra ha tatratyairhariH pratyudyatArhaNaH |
sAyaM bheje dishaM pashchAdgaviShTho gAM gatastadA || 36||
iti shrImadbhAgavate mahApurANe pAramahaMsyAM saMhitAyAM
prathamaskandhe shrIkR^iShNadvArakAgamanaM nAma dashamo.adhyAyaH || 10||
\iti
\section{.. OM namo bhagavate vAsudevAya ..}
\section{.. ekAdasho.adhyAyaH ..}
sUta uvAcha
AnartAn sa upavrajya svR^iddhA~njanapadAn svakAn |
dadhmau daravaraM teShAM viShAdaM shamayanniva || 1||
sa uchchakAshe dhavalodaro daro\-
.apyurukramasyAdharashoNashoNimA |
dAdhmAyamAnaH karaka~njasampuTe
yathAbjakhaNDe kalahaMsa utsvanaH || 2||
tamupashrutya ninadaM jagadbhayabhayAvaham |
pratyudyayuH prajAH sarvA bhartR^idarshanalAlasAH || 3||
tatropanItabalayo raverdIpamivAdR^itAH |
AtmArAmaM pUrNakAmaM nijalAbhena nityadA || 4||
prItyutphullamukhAH prochurharShagadgadayA girA |
pitaraM sarvasuhR^idamavitAramivArbhakAH || 5||
natAH sma te nAtha sadA~Nghripa~NkajaM
viri~nchavairi~nchyasurendravanditam |
parAyaNaM kShemamihechChatAM paraM
na yatra kAlaH prabhavetparaH prabhuH || 6||
bhavAya nastvaM bhava vishvabhAvana
tvameva mAtAtha suhR^itpatiH pitA |
tvaM sadgururnaH paramaM cha daivataM
yasyAnuvR^ittyA kR^itino babhUvima || 7||
aho sanAthA bhavatA sma yadvayaM
traiviShTapAnAmapi dUradarshanam |
premasmitasnigdhanirIkShaNAnanaM
pashyema rUpaM tava sarvasaubhagam || 8||
yarhyambujAkShApasasAra bho bhavAn
kurUn madhUn vAtha suhR^iddidR^ikShayA |
tatrAbdakoTipratimaH kShaNo bhave\-
draviM vinAkShNoriva nastavAchyuta || 9||
(kathaM vayaM nAtha chiroShite tvayi
prasannadR^iShTyAkhilatApashoShaNam |
jIvema te sundarahAsashobhita\-
mapashyamAnA vadanaM manoharam ||)
iti chodIritA vAchaH prajAnAM bhaktavatsalaH |
shR^iNvAno.anugrahaM dR^iShTyA vitanvan prAvishatpurIm || 10||
madhubhojadashArhArhakukurAndhakavR^iShNibhiH |
AtmatulyabalairguptAM nAgairbhogavatImiva || 11||
sarvartusarvavibhavapuNyavR^ikShalatAshramaiH |
udyAnopavanArAmairvR^itapadmAkarashriyam || 12||
gopuradvAramArgeShu kR^itakautukatoraNAm |
chitradhvajapatAkAgrairantaH pratihatAtapAm || 13||
sammArjitamahAmArgarathyApaNakachatvarAm |
siktAM gandhajalairuptAM phalapuShpAkShatA~NkuraiH || 14||
dvAri dvAri gR^ihANAM cha dadhyakShataphalekShubhiH |
ala~NkR^itAM pUrNakumbhairbalibhirdhUpadIpakaiH || 15||
nishamya preShThamAyAntaM vasudevo mahAmanAH |
akrUrashchograsenashcha rAmashchAdbhutavikramaH || 16||
pradyumnashchArudeShNashcha sAmbo jAmbavatIsutaH |
praharShavegochChvasitashayanAsanabhojanAH || 17||
vAraNendraM puraskR^itya brAhmaNaiH sasuma~NgalaiH |
sha~NkhatUryaninAdena brahmaghoSheNa chAdR^itAH |
pratyujjagmU rathairhR^iShTAH praNayAgatasAdhvasAH || 18||
vAramukhyAshcha shatasho yAnaistaddarshanotsukAH |
lasatkuNDalanirbhAtakapolavadanashriyaH || 19||
naTanartakagandharvAH sUtamAgadhavandinaH |
gAyanti chottamashlokacharitAnyadbhutAni cha || 20||
bhagavAMstatra bandhUnAM paurANAmanuvartinAm |
yathAvidhyupasa~Ngamya sarveShAM mAnamAdadhe || 21||
prahvAbhivAdanAshleShakarasparshasmitekShaNaiH |
AshvAsya chAshvapAkebhyo varaishchAbhimatairvibhuH || 22||
svayaM cha gurubhirvipraiH sadAraiH sthavirairapi |
AshIrbhiryujyamAno.anyairvandibhishchAvishatpuram || 23||
rAjamArgaM gate kR^iShNe dvArakAyAH kulastriyaH |
harmyANyAruruhurviprAH tadIkShaNamahotsavAH || 24||
nityaM nirIkShamANAnAM yadapi dvArakaukasAm |
na vitR^ipyanti hi dR^ishaH shriyo dhAmA~Ngamachyutam || 25||
shriyo nivAso yasyoraH pAnapAtraM mukhaM dR^ishAm |
bAhavo lokapAlAnAM sAra~NgANAM padAmbujam || 26||
sitAtapatravyajanairupaskR^itaH
prasUnavarShairabhivarShitaH pathi |
pisha~NgavAsA vanamAlayA babhau
ghano yathArkoDupachApavaidyutaiH || 27||
praviShTastu gR^ihaM pitroH pariShvaktaH svamAtR^ibhiH |
vavande shirasA sapta devakIpramukhA mudA || 28||
tAH putrama~NkamAropya snehasnutapayodharAH |
harShavihvalitAtmAnaH siShichurnetrajairjalaiH || 29||
athAvishatsvabhavanaM sarvakAmamanuttamam |
prAsAdA yatra patnInAM sahasrANi cha ShoDasha || 30||
patnyaH patiM proShya gR^ihAnupAgataM
vilokya sa~njAtamanomahotsavAH |
uttasthurArAtsahasAsanAshayA\-
tsAkaM vratairvrIDitalochanAnanAH || 31||
tamAtmajairdR^iShTibhirantarAtmanA
durantabhAvAH parirebhire patim |
niruddhamapyAsravadambunetrayo\-
rvilajjatInAM bhR^iguvarya vaiklavAt || 32||
yadyapyasau pArshvagato rahogata\-
stathApi tasyA~NghriyugaM navaM navam |
pade pade kA virameta tatpadA\-
chchalApi yachChrIrna jahAti karhichit || 33||
evaM nR^ipANAM kShitibhArajanmanA\-
makShauhiNIbhiH parivR^ittatejasAm |
vidhAya vairaM shvasano yathAnalaM
mitho vadhenoparato nirAyudhaH || 34||
sa eSha naraloke.asminnavatIrNaH svamAyayA |
reme strIratnakUTastho bhagavAn prAkR^ito yathA || 35||
uddAmabhAvapishunAmalavalguhAsa\-
vrIDAvalokanihato madano.api yAsAm |
sammuhya tApamajahAtpramadottamAstA
yasyendriyaM vimathituM kuhakairna shekuH || 36||
tamayaM manyate loko hyasa~Ngamapi sa~Nginam |
Atmaupamyena manujaM vyApR^iNvAnaM yato.abudhaH || 37||
etadIshanamIshasya prakR^itistho.api tadguNaiH |
na yujyate sadA.a.atmasthairyathA buddhistadAshrayA || 38||
taM menire.abalA mUDhAH straiNaM chAnuvrataM rahaH |
apramANavido bharturIshvaraM matayo yathA || 39||
iti shrImadbhAgavate mahApurANe pAramahaMsyAM saMhitAyAM
prathamaskandhe naimiShIyopAkhyAne shrIkR^iShNadvArakApravesho
nAmaikAdasho.adhyAyaH || 11||
\iti
\section{.. OM namo bhagavate vAsudevAya ..}
\section{.. dvAdasho.adhyAyaH ..}
shaunaka uvAcha
ashvatthAmnopasR^iShTena brahmashIrShNorutejasA |
uttarAyA hato garbha IshenAjIvitaH punaH || 1||
tasya janma mahAbuddheH karmANi cha mahAtmanaH |
nidhanaM cha yathaivAsItsa pretya gatavAn yathA || 2||
tadidaM shrotumichChAmo gadituM yadi manyase |
brUhi naH shraddadhAnAnAM yasya j~nAnamadAchChukaH || 3||
sUta uvAcha
apIpaladdharmarAjaH pitR^ivadra~njayan prajAH |
niHspR^ihaH sarvakAmebhyaH kR^iShNapAdAbjasevayA || 4||
sampadaH kratavo lokA mahiShI bhrAtaro mahI |
jambUdvIpAdhipatyaM cha yashashcha tridivaM gatam || 5||
kiM te kAmAH suraspArhA mukundamanaso dvijAH |
adhijahrurmudaM rAj~naH kShudhitasya yathetare || 6||
mAturgarbhagato vIrassa tadA bhR^igunandana |
dadarsha puruShaM ka~nchiddahyamAno.astratejasA || 7||
a~NguShThamAtramamalaM sphuratpuraTamaulinam |
apIchyadarshanaM shyAmaM taDidvAsasamachyutam || 8||
shrImaddIrghachaturbAhuM taptakA~nchanakuNDalam |
kShatajAkShaM gadApANimAtmanaH sarvato disham |
paribhramantamulkAbhAM bhrAmayantaM gadAM muhuH || 9||
astratejaH svagadayA nIhAramiva gopatiH |
vidhamantaM sannikarShe paryaikShata ka ityasau || 10||
vidhUya tadameyAtmA bhagavAn dharmagubvibhuH |
miShato dashamAsyasya tatraivAntardadhe hariH || 11||
tataH sarvaguNodarke sAnukUlagrahodaye |
jaj~ne vaMshadharaH pANDorbhUyaH pANDurivaujasA || 12||
tasya prItamanA rAjA viprairdhaumyakR^ipAdibhiH |
jAtakaM kArayAmAsa vAchayitvA cha ma~Ngalam || 13||
hiraNyaM gAM mahIM grAmAn hastyashvAn nR^ipatirvarAn |
prAdAtsvannaM cha viprebhyaH prajAtIrthe sa tIrthavit || 14||
tamUchurbrAhmaNAstuShTA rAjAnaM prashrayAnvitam |
eSha hyasmin prajAtantau purUNAM pauravarShabha || 15||
daivenApratighAtena shukle saMsthAmupeyuShi |
rAto vo.anugrahArthAya viShNunA prabhaviShNunA || 16||
tasmAnnAmnA viShNurAta iti loke bR^ihachChravAH |
bhaviShyati na sandeho mahAbhAgavato mahAn || 17||
yudhiShThira uvAcha
apyeSha vaMshyAn rAjarShIn puNyashlokAn mahAtmanaH |
anuvartitA svidyashasA sAdhuvAdena sattamAH || 18||
brAhmaNA UchuH
pArtha prajAvitA sAkShAdikShvAkuriva mAnavaH |
brahmaNyaH satyasandhashcha rAmo dAsharathiryathA || 19||
eSha dAtA sharaNyashcha yathA hyaushInaraH shibiH |
yasho vitanitA svAnAM dauShyantiriva yajvanAm || 20||
dhanvinAmagraNIreSha tulyashchArjunayordvayoH |
hutAsha iva durdharShaH samudra iva dustaraH || 21||
mR^igendra iva vikrAnto niShevyo himavAniva |
titikShurvasudhevAsau sahiShNuH pitarAviva || 22||
pitAmahasamaH sAmye prasAde girishopamaH |
AshrayaH sarvabhUtAnAM yathA devo ramAshrayaH || 23||
sarvasadguNamAhAtmye eSha kR^iShNamanuvrataH |
rantideva ivodAro yayAtiriva dhArmikaH || 24||
dhR^ityA balisamaH kR^iShNe prahlAda iva sadgrahaH |
AhartaiSho.ashvamedhAnAM vR^iddhAnAM paryupAsakaH || 25||
rAjarShINAM janayitA shAstA chotpathagAminAm |
nigrahItA kalereSha bhuvo dharmasya kAraNAt || 26||
takShakAdAtmano mR^ityuM dvijaputropasarjitAt |
prapatsyata upashrutya muktasa~NgaH padaM hareH || 27||
jij~nAsitAtmayAthAtmyo munervyAsasutAdasau |
hitvedaM nR^ipa ga~NgAyAM yAsyatyaddhAkutobhayam || 28||
iti rAj~na upAdishya viprA jAtakakovidAH |
labdhApachitayaH sarve pratijagmuH svakAn gR^ihAn || 29||
sa eSha loke vikhyAtaH parIkShiditi yatprabhuH |
garbhe dR^iShTamanudhyAyan parIkSheta nareShviha || 30||
sa rAjaputro vavR^idhe Ashu shukla ivoDupaH |
ApUryamANaH pitR^ibhiH kAShThAbhiriva so.anvaham || 31||
yakShyamANo.ashvamedhena j~nAtidrohajihAsayA |
rAjAlabdhadhano dadhyAvanyatra karadaNDayoH || 32||
tadabhipretamAlakShya bhrAtaro.achyutachoditAH
dhanaM prahINamAjahrurudIchyAM dishi bhUrishaH || 33||
tena sambhR^itasambhAro dharmaputro yudhiShThiraH |
vAjimedhaistribhirbhIto yaj~naiH samayajaddharim || 34||
AhUto bhagavAn rAj~nA yAjayitvA dvijairnR^ipam |
uvAsa katichinmAsAn suhR^idAM priyakAmyayA || 35||
tato rAj~nAbhyanuj~nAtaH kR^iShNayA sahabandhubhiH |
yayau dvAravatIM brahman sArjuno yadubhirvR^itaH || 36||
iti shrImadbhAgavate mahApurANe pAramahaMsyAM saMhitAyAM
prathamaskandhe parIkShijjanmAdyutkarSho nAma dvAdasho.adhyAyaH || 12||
\iti
\section{.. OM namo bhagavate vAsudevAya ..}
\section{.. trayodasho.adhyAyaH ..}
sUta uvAcha
vidurastIrthayAtrAyAM maitreyAdAtmano gatim |
j~nAtvAgAddhAstinapuraM tayAvAptavivitsitaH || 1||
yAvataH kR^itavAn prashnAn kShattA kauShAravAgrataH |
jAtaikabhaktirgovinde tebhyashchopararAma ha || 2||
taM bandhumAgataM dR^iShTvA dharmaputraH sahAnujaH |
dhR^itarAShTro yuyutsushcha sUtaH shAradvataH pR^ithA || 3||
gAndhArI draupadI brahman subhadrA chottarA kR^ipI |
anyAshcha jAmayaH pANDorj~nAtayaH sasutAH striyaH || 4||
pratyujjagmuH praharSheNa prANaM tanva ivAgatam |
abhisa~Ngamya vidhivatpariShva~NgAbhivAdanaiH || 5||
mumuchuH premabAShpaughaM virahautkaNThyakAtarAH |
rAjA tamarhayA~nchakre kR^itAsanaparigraham || 6||
taM bhuktavantaM vishrAntamAsInaM sukhamAsane |
prashrayAvanato rAjA prAha teShAM cha shR^iNvatAm || 7||
yudhiShThira uvAcha
api smaratha no yuShmatpakShachChAyAsamedhitAn |
vipadgaNAdviShAgnyAdermochitA yatsamAtR^ikAH || 8||
kayA vR^ittyA vartitaM vashcharadbhiH kShitimaNDalam |
tIrthAni kShetramukhyAni sevitAnIha bhUtale || 9||
bhavadvidhA bhAgavatAstIrthabhUtAH svayaM vibho |
tIrthIkurvanti tIrthAni svAntaHsthena gadAbhR^itA || 10||
api naH suhR^idastAta bAndhavAH kR^iShNadevatAH |
dR^iShTAH shrutA vA yadavaH svapuryAM sukhamAsate || 11||
ityukto dharmarAjena sarvaM tatsamavarNayat |
yathAnubhUtaM kramasho vinA yadukulakShayam || 12||
nanvapriyaM durviShahaM nR^iNAM svayamupasthitam |
nAvedayatsakaruNo duHkhitAn draShTumakShamaH || 13||
ka~nchitkAlamathAvAtsItsatkR^ito devavatsukham |
bhrAturjyeShThasya shreyaskR^itsarveShAM prItimAvahan || 14||
abibhradaryamA daNDaM yathAvadaghakAriShu |
yAvaddadhAra shUdratvaM shApAdvarShashataM yamaH || 15||
yudhiShThiro labdharAjyo dR^iShTvA pautraM kulandharam |
bhrAtR^ibhirlokapAlAbhairmumude parayA shriyA || 16||
evaM gR^iheShu saktAnAM pramattAnAM tadIhayA |
atyakrAmadavij~nAtaH kAlaH paramadustaraH || 17||
vidurastadabhipretya dhR^itarAShTramabhAShata |
rAjan nirgamyatAM shIghraM pashyedaM bhayamAgatam || 18||
pratikriyA na yasyeha kutashchitkarhichitprabho |
sa eva bhagavAn kAlaH sarveShAM naH samAgataH || 19||
yena chaivAbhipanno.ayaM prANaiH priyatamairapi |
janaH sadyo viyujyeta kimutAnyairdhanAdibhiH || 20||
pitR^ibhrAtR^isuhR^itputrA hatAste vigataM vayaH |
AtmA cha jarayA grastaH paragehamupAsase || 21||
(andhaH puraiva badhiro mandapraj~nashcha sAmpratam |
vishIrNadanto mandAgniH sarAgaH kaphamudvahan ||)
aho mahIyasI jantorjIvitAshA yathA bhavAn |
bhImApavarjitaM piNDamAdatte gR^ihapAlavat || 22||
agnirnisR^iShTo dattashcha garo dArAshcha dUShitAH |
hR^itaM kShetraM dhanaM yeShAM taddattairasubhiH kiyat || 23||
tasyApi tava deho.ayaM kR^ipaNasya jijIviShoH |
paraityanichChato jIrNo jarayA vAsasI iva || 24||
gatasvArthamimaM dehaM virakto muktabandhanaH |
avij~nAtagatirjahyAtsa vai dhIra udAhR^itaH || 25||
yaH svakAtparato veha jAtanirveda AtmavAn |
hR^idi kR^itvA hariM gehAtpravrajetsa narottamaH || 26||
athodIchIM dishaM yAtu svairaj~nAtagatirbhavAn |
ito.arvAk prAyashaH kAlaH puMsAM guNavikarShaNaH || 27||
evaM rAjA vidureNAnujena
praj~nAchakShurbodhita AjamIDhaH |
ChittvA sveShu snehapAshAn draDhimno
nishchakrAma bhrAtR^isandarshitAdhvA || 28||
patiM prayAntaM subalasya putrI
pativratA chAnujagAma sAdhvI |
himAlayaM nyastadaNDapraharShaM
manasvinAmiva satsamprahAraH || 29||
ajAtashatruH kR^itamaitro hutAgni\-
rviprAnnatvA tilagobhUmirukmaiH |
gR^ihaM praviShTo guruvandanAya
na chApashyatpitarau saubalIM cha || 30||
tatra sa~njayamAsInaM paprachChodvignamAnasaH |
gAvalgaNe kva nastAto vR^iddho hInashcha netrayoH || 31||
ambA cha hataputrA.a.artA pitR^ivyaH kva gataH suhR^it |
api mayyakR^itapraj~ne hatabandhuH sa bhAryayA |
AshaMsamAnaH shamalaM ga~NgAyAM duHkhitopatat || 32||
pitaryuparate pANDau sarvAn naH suhR^idaH shishUn |
arakShatAM vyasanataH pitR^ivyau kva gatAvitaH || 33||
sUta uvAcha
kR^ipayA snehavaiklavyAtsUto virahakarshitaH |
AtmeshvaramachakShANo na pratyAhAtipIDitaH || 34||
vimR^ijyAshrUNi pANibhyAM viShTabhyAtmAnamAtmanA |
ajAtashatruM pratyUche prabhoH pAdAvanusmaran || 35||
sa~njaya uvAcha
nAhaM veda vyavasitaM pitrorvaH kulanandana |
gAndhAryA vA mahAbAho muShito.asmi mahAtmabhiH || 36||
athAjagAma bhagavAn nAradaH saha tumburuH |
pratyutthAyAbhivAdyAha sAnujo.abhyarchayanniva || 37||
yudhiShThira uvAcha
nAhaM veda gatiM pitrorbhagavan kva gatAvitaH |
ambA vA hataputrA.a.artA kva gatA cha tapasvinI || 38||
karNadhAra ivApAre bhagavAn pAradarshakaH |
athAbabhAShe bhagavAnnArado munisattamaH || 39||
mA ka~nchana shucho rAjan yadIshvaravashaM jagat |
lokAH sapAlA yasyeme vahanti balimIshituH |
sa saMyunakti bhUtAni sa eva viyunakti cha || 40||
yathA gAvo nasi protAstantyAM baddhAshcha dAmabhiH |
vAktantyAM nAmabhirbaddhA vahanti balimIshituH || 41||
yathA krIDopaskarANAM saMyogavigamAviha |
ichChayA krIDituH syAtAM tathaiveshechChayA nR^iNAm || 42||
yanmanyase dhruvaM lokamadhruvaM vA na chobhayam |
sarvathA na hi shochyAste snehAdanyatra mohajAt || 43||
tasmAjjahya~Nga vaiklavyamaj~nAnakR^itamAtmanaH |
kathaM tvanAthAH kR^ipaNA varteraMste cha mAM vinA || 44||
kAlakarmaguNAdhIno deho.ayaM pA~nchabhautikaH |
kathamanyAMstu gopAyetsarpagrasto yathA param || 45||
ahastAni sahastAnAmapadAni chatuShpadAm |
phalgUni tatra mahatAM jIvo jIvasya jIvanam || 46||
tadidaM bhagavAn rAjanneka AtmA.a.atmanAM svadR^ik |
antaro.anantaro bhAti pashya taM mAyayorudhA || 47||
so.ayamadya mahArAja bhagavAn bhUtabhAvanaH |
kAlarUpo.avatIrNo.asyAmabhAvAya suradviShAm || 48||
niShpAditaM devakR^ityamavasheShaM pratIkShate |
tAvadyUyamavekShadhvaM bhavedyAvadiheshvaraH || 49||
dhR^itarAShTraH saha bhrAtrA gAndhAryA cha svabhAryayA |
dakShiNena himavata R^iShINAmAshramaM gataH || 50||
srotobhiH saptabhiryA vai svardhunI saptadhA vyadhAt |
saptAnAM prItaye nAnA saptasrotaH prachakShate || 51||
snAtvAnusavanaM tasmin hutvA chAgnIn yathAvidhi |
abbhakSha upashAntAtmA sa Aste vigataiShaNaH || 52||
jitAsano jitashvAsaH pratyAhR^itaShaDindriyaH |
haribhAvanayA dhvastarajaHsattvatamomalaH || 53||
vij~nAnAtmani saMyojya kShetraj~ne pravilApya tam |
brahmaNyAtmAnamAdhAre ghaTAmbaramivAmbare || 54||
dhvastamAyAguNodarko niruddhakaraNAshayaH |
nivartitAkhilAhAra Aste sthANurivAchalaH |
tasyAntarAyo maivAbhUH sannnyastAkhilakarmaNaH || 55||
sa vA adyatanAdrAjan parataH pa~nchame.ahani |
kalevaraM hAsyati svaM tachcha bhasmIbhaviShyati || 56||
dahyamAne.agnibhirdehe patyuH patnI sahoTaje |
bahiH sthitA patiM sAdhvI tamagnimanuvekShyati || 57||
vidurastu tadAshcharyaM nishAmya kurunandana |
harShashokayutastasmAdgantA tIrthaniShevakaH || 58||
ityuktvAthAruhatsvargaM nAradaH sahatumburuH |
yudhiShThiro vachastasya hR^idi kR^itvAjahAchChuchaH || 59||
iti shrImadbhAgavate mahApurANe pAramahaMsyAM saMhitAyAM
prathamaskandhe naimiShIyopAkhyAne trayodasho.adhyAyaH || 13||
\iti
\section{.. OM namo bhagavate vAsudevAya ..}
\section{.. chaturdasho.adhyAyaH ..}
sUta uvAcha
samprasthite dvArakAyAM jiShNau bandhudidR^ikShayA |
j~nAtuM cha puNyashlokasya kR^iShNasya cha vicheShTitam || 1||
vyatItAH katichinmAsAstadA nAyAttato.arjunaH |
dadarsha ghorarUpANi nimittAni kurUdvahaH || 2||
kAlasya cha gatiM raudrAM viparyastartudharmiNaH |
pApIyasIM nR^iNAM vArtAM krodhalobhAnR^itAtmanAm || 3||
jihmaprAyaM vyavahR^itaM shAThyamishraM cha sauhR^idam |
pitR^imAtR^isuhR^idbhrAtR^idampatInAM cha kalkanam || 4||
nimittAnyatyariShTAni kAle tvanugate nR^iNAm |
lobhAdyadharmaprakR^itiM dR^iShTvovAchAnujaM nR^ipaH || 5||
yudhiShThira uvAcha
sampreShito dvArakAyAM jiShNurbandhudidR^ikShayA |
j~nAtuM cha puNyashlokasya kR^iShNasya cha vicheShTitam || 6||
gatAH saptAdhunA mAsA bhImasena tavAnujaH |
nAyAti kasya vA hetornAhaM vededama~njasA || 7||
api devarShiNA.a.adiShTaH sa kAlo.ayamupasthitaH |
yadAtmano.a~NgamAkrIDaM bhagavAnutsisR^ikShati || 8||
yasmAnnaH sampado rAjyaM dArAH prANAH kulaM prajAH |
Asan sapatnavijayo lokAshcha yadanugrahAt || 9||
pashyotpAtAn naravyAghra divyAn bhaumAn sadaihikAn |
dAruNAn shaMsato.adUrAdbhayaM no buddhimohanam || 10||
UrvakShibAhavo mahyaM sphurantya~Nga punaH punaH |
vepathushchApi hR^idaye ArAddAsyanti vipriyam || 11||
shivaiShodyantamAdityamabhirautyanalAnanA |
mAma~Nga sArameyo.ayamabhirebhatyabhIruvat || 12||
shastAH kurvanti mAM savyaM dakShiNaM pashavo.apare |
vAhAMshcha puruShavyAghra lakShaye rudato mama || 13||
mR^ityudUtaH kapoto.ayamulUkaH kampayan manaH |
pratyulUkashcha kuhvAnairanidrau shUnyamichChataH || 14||
dhUmrA dishaH paridhayaH kampate bhUH sahAdribhiH |
nirghAtashcha mahAMstAta sAkaM cha stanayitnubhiH || 15||
vAyurvAti kharasparsho rajasA visR^ijaMstamaH |
asR^igvarShanti jaladA bIbhatsamiva sarvataH || 16||
sUryaM hataprabhaM pashya grahamardaM mitho divi |
sasa~NkulairbhUtagaNairjvalite iva rodasI || 17||
nadyo nadAshcha kShubhitAH sarAMsi cha manAMsi cha |
na jvalatyagnirAjyena kAlo.ayaM kiM vidhAsyati || 18||
na pibanti stanaM vatsA na duhyanti cha mAtaraH |
rudantyashrumukhA gAvo na hR^iShyantyR^iShabhA vraje || 19||
daivatAni rudantIva svidyanti hyuchchalanti cha |
ime janapadA grAmAH purodyAnAkarAshramAH |
bhraShTashriyo nirAnandAH kimaghaM darshayanti naH || 20||
manya etairmahotpAtairnUnaM bhagavataH padaiH |
ananyapuruShashrIbhirhInA bhUrhatasaubhagA || 21||
iti chintayatastasya dR^iShTAriShTena chetasA |
rAj~naH pratyAgamadbrahman yadupuryAH kapidhvajaH || 22||
taM pAdayornipatitamayathApUrvamAturam |
adhovadanamabbindUn sR^ijantaM nayanAbjayoH || 23||
vilokyodvignahR^idayo vichChAyamanujaM nR^ipaH |
pR^ichChati sma suhR^inmadhye saMsmaran nAraderitam || 24||
yudhiShThira uvAcha
kachchidAnartapuryAM naH svajanAH sukhamAsate |
madhubhojadashArhArhasAtvatAndhakavR^iShNayaH || 25||
shUro mAtAmahaH kachchitsvastyAste vAtha mAriShaH |
mAtulaH sAnujaH kachchitkushalyAnakadundubhiH || 26||
sapta svasArastatpatnyo mAtulAnyaH sahAtmajAH |
Asate sasnuShAH kShemaM devakIpramukhAH svayam || 27||
kachchidrAjA.a.ahuko jIvatyasatputro.asya chAnujaH |
hR^idIkaH sasuto.akrUro jayantagadasAraNAH || 28||
Asate kushalaM kachchidye cha shatrujidAdayaH |
kachchidAste sukhaM rAmo bhagavAn sAtvatAM prabhuH || 29||
pradyumnaH sarvavR^iShNInAM sukhamAste mahArathaH |
gambhIrarayo.aniruddho vardhate bhagavAnuta || 30||
suSheNashchArudeShNashcha sAmbo jAmbavatIsutaH |
anye cha kArShNipravarAH saputrA R^iShabhAdayaH || 31||
tathaivAnucharAH shaureH shrutadevoddhavAdayaH |
sunandanandashIrShaNyA ye chAnye sAtvatarShabhAH || 32||
api svastyAsate sarve rAmakR^iShNabhujAshrayAH |
api smaranti kushalamasmAkaM baddhasauhR^idAH || 33||
bhagavAnapi govindo brahmaNyo bhaktavatsalaH |
kachchitpure sudharmAyAM sukhamAste suhR^idvR^itaH || 34||
ma~NgalAya cha lokAnAM kShemAya cha bhavAya cha |
Aste yadukulAmbhodhAvAdyo.anantasakhaH pumAn || 35||
yadbAhudaNDaguptAyAM svapuryAM yadavo.architAH |
krIDanti paramAnandaM mahApauruShikA iva || 36||
yatpAdashushrUShaNamukhyakarmaNA
satyAdayo dvyaShTasahasrayoShitaH |
nirjitya sa~Nkhye tridashAMstadAshiSho
haranti vajrAyudhavallabhochitAH || 37||
yadbAhudaNDAbhyudayAnujIvino
yadupravIrA hyakutobhayA muhuH |
adhikramantya~NghribhirAhR^itAM balA\-
tsabhAM sudharmAM surasattamochitAm || 38||
kachchitte.anAmayaM tAta bhraShTatejA vibhAsi me |
alabdhamAno.avaj~nAtaH kiM vA tAta chiroShitaH || 39||
kachchinnAbhihato.abhAvaiH shabdAdibhirama~NgalaiH |
na dattamuktamarthibhya AshayA yatpratishrutam || 40||
kachchittvaM brAhmaNaM bAlaM gAM vR^iddhaM rogiNaM striyam |
sharaNopasR^itaM sattvaM nAtyAkShIH sharaNapradaH || 41||
kachchittvaM nAgamo.agamyAM gamyAM vA.asatkR^itAM striyam |
parAjito vAtha bhavAn nottamairnAsamaiH pathi || 42||
api svitparyabhu~NkthAstvaM sambhojyAn vR^iddhabAlakAn |
jugupsitaM karma ki~nchitkR^itavAn na yadakShamam || 43||
kachchitpreShThatamenAtha hR^idayenAtmabandhunA |
shUnyo.asmi rahito nityaM manyase te.anyathA na ruk || 44||
iti shrImadbhAgavate mahApurANe pAramahaMsyAM saMhitAyAM
prathamaskandhe yudhiShThiravitarko nAma chaturdasho.adhyAyaH || 14||
\iti
\section{.. OM namo bhagavate vAsudevAya ..}
\section{.. pa~nchadasho.adhyAyaH ..}
sUta uvAcha
evaM kR^iShNasakhaH kR^iShNo bhrAtrA rAj~nA vikalpitaH |
nAnAsha~NkAspadaM rUpaM kR^iShNavishleShakarshitaH || 1||
shokena shuShyadvadanahR^itsarojo hataprabhaH |
vibhuM tamevAnudhyAyannAshaknotpratibhAShitum || 2||
kR^ichChreNa saMstabhya shuchaH pANinA.a.amR^ijya netrayoH |
parokSheNa samunnaddhapraNayautkaNThyakAtaraH || 3||
sakhyaM maitrIM sauhR^idaM cha sArathyAdiShu saMsmaran |
nR^ipamagrajamityAha bAShpagadgadayA girA || 4||
arjuna uvAcha
va~nchito.ahaM mahArAja hariNA bandhurUpiNA |
yena me.apahR^itaM tejo devavismApanaM mahat || 5||
yasya kShaNaviyogena loko hyapriyadarshanaH |
ukthena rahito hyeSha mR^itakaH prochyate yathA || 6||
yatsaMshrayAddrupadagehamupAgatAnAM
rAj~nAM svayaMvaramukhe smaradurmadAnAm |
tejo hR^itaM khalu mayAbhihatashcha matsyaH
sajjIkR^itena dhanuShAdhigatA cha kR^iShNA || 7||
yatsannidhAvahamu khANDavamagnaye.adA\-
mindraM cha sAmaragaNaM tarasA vijitya |
labdhA sabhA mayakR^itAdbhutashilpamAyA
digbhyo.aharan nR^ipatayo balimadhvare te || 8||
yattejasA nR^ipashiro.a~Nghrimahan makhArtha\-
mAryo.anujastava gajAyutasattvavIryaH |
tenAhR^itAH pramathanAthamakhAya bhUpA
yanmochitAstadanayan balimadhvare te || 9||
patnyAstavAdhimakhakLLiptamahAbhiSheka\-
shlAghiShThachArukabaraM kitavaiH sabhAyAm |
spR^iShTaM vikIrya padayoH patitAshrumukhyA
yastatstriyo.akR^itahateshavimuktakeshAH || 10||
yo no jugopa vanametya durantakR^ichChrA\-
ddurvAsaso.arirachitAdayutAgrabhug yaH |
shAkAnnashiShTamupayujya yatastrilokIM
tR^iptAmamaMsta salile vinimagnasa~NghaH || 11||
yattejasAtha bhagavAn yudhi shUlapANi\-
rvismApitaH sagirijo.astramadAnnijaM me |
anye.api chAhamamunaiva kalevareNa
prApto mahendrabhavane mahadAsanArdham || 12||
tatraiva me viharato bhujadaNDayugmaM
gANDIvalakShaNamarAtivadhAya devAH |
sendrAH shritA yadanubhAvitamAjamIDha
tenAhamadya muShitaH puruSheNa bhUmnA || 13||
yadbAndhavaH kurubalAbdhimanantapAra\-
meko rathena tatare.ahamatIryasattvam |
pratyAhR^itaM bahudhanaM cha mayA pareShAM
tejAspadaM maNimayaM cha hR^itaM shirobhyaH || 14||
yo bhIShmakarNagurushalyachamUShvadabhra\-
rAjanyavaryarathamaNDalamaNDitAsu |
agrecharo mama vibho rathayUthapAnA\-
mAyurmanAMsi cha dR^ishA saha oja ArchChat || 15||
yaddoHShu mA praNihitaM gurubhIShmakarNa\-
naptR^itrigartashalasaindhavabAhlikAdyaiH |
astrANyamoghamahimAni nirUpitAni
nopaspR^ishurnR^iharidAsamivAsurANi || 16||
sautye vR^itaH kumatinA.a.atmada Ishvaro me
yatpAdapadmamabhavAya bhajanti bhavyAH |
mAM shrAntavAhamarayo rathino bhuviShThaM
na prAharan yadanubhAvanirastachittAH || 17||
narmANyudAraruchirasmitashobhitAni
he pArtha he.arjuna sakhe kurunandaneti |
sa~njalpitAni naradeva hR^idispR^ishAni
smarturluThanti hR^idayaM mama mAdhavasya || 18||
shayyAsanATanavikatthanabhojanAdi\-
ShvaikyAdvayasya R^itavAniti vipralabdhaH |
sakhyuH sakheva pitR^ivattanayasya sarvaM
sehe mahAn mahitayA kumateraghaM me || 19||
so.ahaM nR^ipendra rahitaH puruShottamena
sakhyA priyeNa suhR^idA hR^idayena shUnyaH |
adhvanyurukramaparigrahama~Nga rakShan
gopairasadbhirabaleva vinirjito.asmi || 20||
tadvai dhanusta iShavaH sa ratho hayAste
so.ahaM rathI nR^ipatayo yata Anamanti |
sarvaM kShaNena tadabhUdasadIshariktaM
bhasman hutaM kuhakarAddhamivoptamUShyAm || 21||
rAjaMstvayAnupR^iShTAnAM suhR^idAM naH suhR^itpure |
viprashApavimUDhAnAM nighnatAM muShTibhirmithaH || 22||
vAruNIM madirAM pItvA madonmathitachetasAm |
ajAnatAmivAnyonyaM chatuHpa~nchAvasheShitAH || 23||
prAyeNaitadbhagavata Ishvarasya vicheShTitam |
mitho nighnanti bhUtAni bhAvayanti cha yanmithaH || 24||
jalaukasAM jale yadvanmahAnto.adantyaNIyasaH |
durbalAn balino rAjan mahAnto balino mithaH || 25||
evaM baliShThairyadubhirmahadbhiritarAn vibhuH |
yadUn yadubhiranyonyaM bhUbhArAn sa~njahAra ha || 26||
deshakAlArthayuktAni hR^ittApopashamAni cha |
haranti smaratashchittaM govindAbhihitAni me || 27||
sUta uvAcha
evaM chintayato jiShNoH kR^iShNapAdasaroruham |
sauhArdenAtigADhena shAntA.a.asIdvimalA matiH || 28||
vAsudevA~NghryanudhyAnaparibR^iMhitaraMhasA |
bhaktyA nirmathitAsheShakaShAyadhiShaNo.arjunaH || 29||
gItaM bhagavatA j~nAnaM yattatsa~NgrAmamUrdhani |
kAlakarmatamoruddhaM punaradhyagamatprabhuH || 30||
vishoko brahmasampattyA sa~nchChinnadvaitasaMshayaH |
lInaprakR^itinairguNyAdali~NgatvAdasambhavaH || 31||
nishamya bhagavanmArgaM saMsthAM yadukulasya cha |
svaHpathAya matiM chakre nibhR^itAtmA yudhiShThiraH || 32||
pR^ithApyanushrutya dhana~njayoditaM
nAshaM yadUnAM bhagavadgatiM cha tAm |
ekAntabhaktyA bhagavatyadhokShaje
niveshitAtmopararAma saMsR^iteH || 33||
yayAharadbhuvo bhAraM tAM tanuM vijahAvajaH |
kaNTakaM kaNTakeneva dvayaM chApIshituH samam || 34||
yathA matsyAdirUpANi dhatte jahyAdyathA naTaH |
bhUbhAraH kShapito yena jahau tachcha kalevaram || 35||
yadA mukundo bhagavAnimAM mahIM
jahau svatanvA shravaNIyasatkathaH |
tadA harevApratibuddhachetasA\-
madharmahetuH kaliranvavartata || 36||
yudhiShThirastatparisarpaNaM budhaH
pure cha rAShTre cha gR^ihe tathA.a.atmani |
vibhAvya lobhAnR^itajihmahiMsanA\-
dyadharmachakraM gamanAya paryadhAt || 37||
svarAT pautraM vinayinamAtmanaH susamaM guNaiH |
toyanIvyAH patiM bhUmerabhyaShi~nchadgajAhvaye || 38||
mathurAyAM tathA vajraM shUrasenapatiM tataH |
prAjApatyAM nirUpyeShTimagnInapibadIshvaraH || 39||
visR^ijya tatra tatsarvaM dukUlavalayAdikam |
nirmamo niraha~NkAraH sa~nchChinnAsheShabandhanaH || 40||
vAchaM juhAva manasi tatprANa itare cha tam |
mR^ityAvapAnaM sotsargaM taM pa~nchatve hyajohavIt || 41||
tritve hutvA cha pa~nchatvaM tachchaikatve.ajuhonmuniH |
sarvamAtmanyajuhavIdbrahmaNyAtmAnamavyaye || 42||
chIravAsA nirAhAro baddhavA~NmuktamUrdhajaH |
darshayannAtmano rUpaM jaDonmattapishAchavat || 43||
anavekShamANo niragAdashR^iNvan badhiro yathA |
udIchIM praviveshAshAM gatapUrvAM mahAtmabhiH |
hR^idi brahma paraM dhyAyan nAvarteta yato gataH || 44||
sarve tamanunirjagmurbhrAtaraH kR^itanishchayAH |
kalinAdharmamitreNa dR^iShTvA spR^iShTAH prajA bhuvi || 45||
te sAdhukR^itasarvArthA j~nAtvA.a.atyantikamAtmanaH |
manasA dhArayAmAsurvaikuNThacharaNAmbujam || 46||
tad.hdhyAnodriktayA bhaktyA vishuddhadhiShaNAH pare |
tasmin nArAyaNapade ekAntamatayo gatim || 47||
avApurduravApAM te asadbhirviShayAtmabhiH |
vidhUtakalmaShA sthAnaM virajenAtmanaiva hi || 48||
viduro.api parityajya prabhAse dehamAtmanaH |
kR^iShNAveshena tachchittaH pitR^ibhiH svakShayaM yayau || 49||
draupadI cha tadAj~nAya patInAmanapekShatAm |
vAsudeve bhagavati hyekAntamatirApa tam || 50||
yaH shraddhayaitadbhagavatpriyANAM
pANDoH sutAnAmiti samprayANam |
shR^iNotyalaM svastyayanaM pavitraM
labdhvA harau bhaktimupaiti siddhim || 51||
iti shrImadbhAgavate mahApurANe pAramahaMsyAM saMhitAyAM
prathamaskandhe pANDavasvargArohaNaM nAma pa~nchadasho.adhyAyaH || 15||
\iti
\section{.. OM namo bhagavate vAsudevAya ..}
\section{.. ShoDasho.adhyAyaH ..}
sUta uvAcha
tataH parIkShiddvijavaryashikShayA
mahIM mahAbhAgavataH shashAsa ha |
yathA hi sUtyAmabhijAtakovidAH
samAdishan vipra mahadguNastathA || 1||
sa uttarasya tanayAmupayema irAvatIm |
janamejayAdIMshchaturastasyAmutpAdayatsutAn || 2||
AjahArAshvamedhAMstrIn ga~NgAyAM bhUridakShiNAn |
shAradvataM guruM kR^itvA devA yatrAkShigocharAH || 3||
nijagrAhaujasA vIraH kaliM digvijaye kvachit |
nR^ipali~NgadharaM shUdraM ghnantaM gomithunaM padA || 4||
shaunaka uvAcha
kasya hetornijagrAha kaliM digvijaye nR^ipaH |
nR^idevachihnadhR^ik shUdraH ko.asau gAM yaH padAhanat |
tatkathyatAM mahAbhAga yadi kR^iShNakathAshrayam || 5||
athavAsya padAmbhojamakarandalihAM satAm |
kimanyairasadAlApairAyuSho yadasadvyayaH || 6||
kShudrAyuShAM nR^iNAma~Nga martyAnAmR^itamichChatAm |
ihopahUto bhagavAn mR^ityuH shAmitrakarmaNi || 7||
na kashchinmriyate tAvadyAvadAsta ihAntakaH |
etadarthaM hi bhagavAnAhUtaH paramarShibhiH |
aho nR^iloke pIyeta harilIlAmR^itaM vachaH || 8||
mandasya mandapraj~nasya vayo mandAyuShashcha vai |
nidrayA hriyate naktaM divA cha vyarthakarmabhiH || 9||
sUta uvAcha
yadA parIkShitkurujA~Ngale.ashR^iNot
kaliM praviShTaM nijachakravartite |
nishamya vArtAmanatipriyAM tataH
sharAsanaM saMyugashauNDirAdade || 10||
svala~NkR^itaM shyAmatura~NgayojitaM
rathaM mR^igendradhvajamAshritaH purAt |
vR^ito rathAshvadvipapattiyuktayA
svasenayA digvijayAya nirgataH || 11||
bhadrAshvaM ketumAlaM cha bhArataM chottarAn kurUn |
kimpuruShAdIni varShANi vijitya jagR^ihe balim || 12||
(nagarAMshcha vanAMshchaiva nadIshcha vimalodakAH |
puruShAn devakalpAMshcha nArIshcha priyadarshanAH ||
adR^iShTapUrvAn subhagAn sa dadarsha dhana~njayaH |
sadanAni cha shubhrANi nArIshchApsarasAM nibhAH ||)
tatra tatropashR^iNvAnaH svapUrveShAM mahAtmanAm |
pragIyamANaM cha yashaH kR^iShNamAhAtmyasUchakam || 13||
AtmAnaM cha paritrAtamashvatthAmno.astratejasaH |
snehaM cha vR^iShNipArthAnAM teShAM bhaktiM cha keshave || 14||
tebhyaH paramasantuShTaH prItyujjR^imbhitalochanaH |
mahAdhanAni vAsAMsi dadau hArAn mahAmanAH || 15||
sArathyapAraShadasevanasakhyadautya\-
vIrAsanAnugamanastavanapraNAmAn |
snigdheShu pANDuShu jagatpraNatiM cha viShNoH
bhaktiM karoti nR^ipatishcharaNAravinde || 16||
tasyaivaM vartamAnasya pUrveShAM vR^ittimanvaham |
nAtidUre kilAshcharyaM yadAsIttannibodha me || 17||
dharmaH padaikena charan vichChAyAmupalabhya gAm |
pR^ichChati smAshruvadanAM vivatsAmiva mAtaram || 18||
dharma uvAcha
kachchidbhadre.anAmayamAtmanaste
vichChAyAsi mlAyateShanmukhena |
AlakShaye bhavatImantarAdhiM
dUre bandhuM shochasi ka~nchanAmba || 19||
pAdairnyUnaM shochasi maikapAda\-
mAtmAnaM vA vR^iShalairbhokShyamANam |
Aho surAdIn hR^itayaj~nabhAgAn
prajA uta svinmaghavatyavarShati || 20||
arakShyamANAH striya urvi bAlAn
shochasyatho puruShAdairivArtAn |
vAchaM devIM brahmakule kukarma\-
NyabrahmaNye rAjakule kulAgryAn || 21||
kiM kShatrabandhUn kalinopasR^iShTAn
rAShTrANi vA tairavaropitAni |
itastato vAshanapAnavAsaH
snAnavyavAyonmukhajIvalokam || 22||
yadvAmba te bhUribharAvatAra\-
kR^itAvatArasya harerdharitri |
antarhitasya smaratI visR^iShTA
karmANi nirvANavilambitAni || 23||
idaM mamAchakShva tavAdhimUlaM
vasundhare yena vikarshitAsi |
kAlena vA te balinAM balIyasA
surArchitaM kiM hR^itamamba saubhagam || 24||
dharaNyuvAcha
bhavAn hi veda tatsarvaM yanmAM dharmAnupR^ichChasi |
chaturbhirvartase yena pAdairlokasukhAvahaiH || 25||
satyaM shauchaM dayA kShAntistyAgaH santoSha Arjavam |
shamo damastapaH sAmyaM titikShoparatiH shrutam || 26||
j~nAnaM viraktiraishvaryaM shauryaM tejo balaM smR^itiH |
svAtantryaM kaushalaM kAntirdhairyaM mArdavameva cha || 27||
prAgalbhyaM prashrayaH shIlaM saha ojo balaM bhagaH |
gAmbhIryaM sthairyamAstikyaM kIrtirmAno.anaha~NkR^itiH || 28||
ete chAnye cha bhagavan nityA yatra mahAguNAH |
prArthyA mahattvamichChadbhirna viyanti sma karhichit || 29||
tenAhaM guNapAtreNa shrInivAsena sAmpratam |
shochAmi rahitaM lokaM pApmanA kalinekShitam || 30||
AtmAnaM chAnushochAmi bhavantaM chAmarottamam |
devAnR^iShIn pitR^In sAdhUn sarvAn varNAMstathAshramAn || 31||
brahmAdayo bahutithaM yadapA~NgamokSha\-
kAmAstapaH samacharan bhagavatprapannAH |
sA shrIH svavAsamaravindavanaM vihAya
yatpAdasaubhagamalaM bhajate.anuraktA || 32||
tasyAhamabjakulishA~NkushaketuketaiH
shrImatpadairbhagavataH samala~NkR^itA~NgI |
trInatyarocha upalabhya tato vibhUtiM
lokAn sa mAM vyasR^ijadutsmayatIM tadante || 33||
yo vai mamAtibharamAsuravaMsharAj~nA\-
makShauhiNIshatamapAnudadAtmatantraH |
tvAM duHsthamUnapadamAtmani pauruSheNa
sampAdayan yaduShu ramyamabibhrada~Ngam || 34||
kA vA saheta virahaM puruShottamasya
premAvalokaruchirasmitavalgujalpaiH |
sthairyaM samAnamaharanmadhumAninInAM
romotsavo mama yada~NghriviTa~NkitAyAH || 35||
tayorevaM kathayatoH pR^ithivIdharmayostadA |
parIkShinnAma rAjarShiH prAptaH prAchIM sarasvatIm || 36||
iti shrImadbhAgavate mahApurANe pAramahaMsyAM saMhitAyAM
prathamaskandhe pR^ithvIdharmasaMvAdo nAma ShoDasho.adhyAyaH || 16||
\iti
\section{.. OM namo bhagavate vAsudevAya ..}
\section{.. saptadasho.adhyAyaH ..}
sUta uvAcha
tatra gomithunaM rAjA hanyamAnamanAthavat
daNDahastaM cha vR^iShalaM dadR^ishe nR^ipalA~nChanam || 1||
vR^iShaM mR^iNAladhavalaM mehantamiva bibhyatam |
vepamAnaM padaikena sIdantaM shUdratADitam || 2||
gAM cha dharmadughAM dInAM bhR^ishaM shUdrapadAhatAm |
vivatsAM sAshruvadanAM kShAmAM yavasamichChatIm || 3||
paprachCha rathamArUDhaH kArtasvaraparichChadam |
meghagambhIrayA vAchA samAropitakArmukaH || 4||
kastvaM machCharaNe loke balAddhaMsyabalAn balI |
naradevo.asi veSheNa naTavatkarmaNAdvijaH || 5||
kastvaM kR^iShNe gate dUraM sahagANDIvadhanvanA |
shochyo.asyashochyAn rahasi praharan vadhamarhasi || 6||
tvaM vA mR^iNAladhavalaH pAdairnyUnaH padA charan |
vR^iSharUpeNa kiM kashchiddevo naH parikhedayan || 7||
na jAtu kauravendrANAM dordaNDaparirambhite |
bhUtale.anupatantyasmin vinA te prANinAM shuchaH || 8||
mA saurabheyAnushucho vyetu te vR^iShalAdbhayam |
mA rodIramba bhadraM te khalAnAM mayi shAstari || 9||
yasya rAShTre prajAH sarvAstrasyante sAdhvyasAdhubhiH |
tasya mattasya nashyanti kIrtirAyurbhago gatiH || 10||
eSha rAj~nAM paro dharmo hyArtAnAmArtinigrahaH |
ata enaM vadhiShyAmi bhUtadruhamasattamam || 11||
ko.avR^ishchattava pAdAMstrIn saurabheya chatuShpada |
mA bhUvaMstvAdR^ishA rAShTre rAj~nAM kR^iShNAnuvartinAm || 12||
AkhyAhi vR^iSha bhadraM vaH sAdhUnAmakR^itAgasAm |
AtmavairUpyakartAraM pArthAnAM kIrtidUShaNam || 13||
janenAgasyaghaM yu~njan sarvato.asya cha madbhayam |
sAdhUnAM bhadrameva syAdasAdhudamane kR^ite || 14||
anAgaHsviha bhUteShu ya AgaskR^innira~NkushaH |
AhartAsmi bhujaM sAkShAdamartyasyApi sA~Ngadam || 15||
rAj~no hi paramo dharmaH svadharmasthAnupAlanam |
shAsato.anyAn yathAshAstramanApadyutpathAniha || 16||
dharma uvAcha
etadvaH pANDaveyAnAM yuktamArtAbhayaM vachaH |
yeShAM guNagaNaiH kR^iShNo dautyAdau bhagavAn kR^itaH || 17||
na vayaM kleshabIjAni yataH syuH puruSharShabha |
puruShaM taM vijAnImo vAkyabhedavimohitAH || 18||
kechidvikalpavasanA AhurAtmAnamAtmanaH |
daivamanye pare karma svabhAvamapare prabhum || 19||
apratarkyAdanirdeshyAditi keShvapi nishchayaH |
atrAnurUpaM rAjarShe vimR^isha svamanIShayA || 20||
sUta uvAcha
evaM dharme pravadati sa samrAD\-dvijasattama |
samAhitena manasA vikhedaH paryachaShTa tam || 21||
rAjovAcha
dharmaM bravIShi dharmaj~na dharmo.asi vR^iSharUpadhR^ik |
yadadharmakR^itaH sthAnaM sUchakasyApi tadbhavet || 22||
athavA devamAyAyA nUnaM gatiragocharA |
chetaso vachasashchApi bhUtAnAmiti nishchayaH || 23||
tapaH shauchaM dayA satyamiti pAdAH kR^ite kR^itAH |
adharmAMshaistrayo bhagnAH smayasa~Ngamadaistava || 24||
idAnIM dharma pAdaste satyaM nirvartayedyataH |
taM jighR^ikShatyadharmo.ayamanR^itenaidhitaH kaliH || 25||
iyaM cha bhUmirbhagavatA nyAsitorubharA satI |
shrImadbhistatpadanyAsaiH sarvataH kR^itakautukA || 26||
shochatyashrukalA sAdhvI durbhagevojjhitAdhunA |
abrahmaNyA nR^ipavyAjAH shUdrA bhokShyanti mAmiti || 27||
iti dharmaM mahIM chaiva sAntvayitvA mahArathaH |
nishAtamAdade khaDgaM kalaye.adharmahetave || 28||
taM jighAMsumabhipretya vihAya nR^ipalA~nChanam |
tatpAdamUlaM shirasA samagAdbhayavihvalaH || 29||
patitaM pAdayorvIraH kR^ipayA dInavatsalaH |
sharaNyo nAvadhIchChlokya Aha chedaM hasanniva || 30||
rAjovAcha
na te guDAkeshayashodharANAM
baddhA~njalervai bhayamasti ki~nchit |
na vartitavyaM bhavatA katha~nchana
kShetre madIye tvamadharmabandhuH || 31||
tvAM vartamAnaM naradevadehe\-
ShvanupravR^itto.ayamadharmapUgaH |
lobho.anR^itaM chauryamanAryamaMho
jyeShThA cha mAyA kalahashcha dambhaH || 32||
na vartitavyaM tadadharmabandho
dharmeNa satyena cha vartitavye |
brahmAvarte yatra yajanti yaj~nai\-
ryaj~neshvaraM yaj~navitAnavij~nAH || 33||
yasmin harirbhagavAnijyamAna
ijyAmUrtiryajatAM shaM tanoti |
kAmAnamoghAn sthiraja~NgamAnA\-
mantarbahirvAyurivaiSha AtmA || 34||
sUta uvAcha
parIkShitaivamAdiShTaH sa kalirjAtavepathuH |
tamudyatAsimAhedaM daNDapANimivodyatam || 35||
kaliruvAcha
yatra kvachana vatsyAmi sArvabhauma tavAj~nayA |
lakShaye tatra tatrApi tvAmAtteShusharAsanam || 36||
tanme dharmabhR^itAM shreShTha sthAnaM nirdeShTumarhasi |
yatraiva niyato vatsya AtiShThaMste.anushAsanam || 37||
sUta uvAcha
abhyarthitastadA tasmai sthAnAni kalaye dadau |
dyUtaM pAnaM striyaH sUnA yatrAdharmashchaturvidhaH || 38||
punashcha yAchamAnAya jAtarUpamadAtprabhuH |
tato.anR^itaM madaM kAmaM rajo vairaM cha pa~nchamam || 39||
amUni pa~ncha sthAnAni hyadharmaprabhavaH kaliH |
auttareyeNa dattAni nyavasattannideshakR^it || 40||
athaitAni na seveta bubhUShuH puruShaH kvachit |
visheShato dharmashIlo rAjA lokapatirguruH || 41||
vR^iShasya naShTAMstrIn pAdAn tapaH shauchaM dayAmiti |
pratisandadha AshvAsya mahIM cha samavardhayat || 42||
sa eSha etarhyadhyAsta AsanaM pArthivochitam |
pitAmahenopanyastaM rAj~nAraNyaM vivikShatA || 43||
Aste.adhunA sa rAjarShiH kauravendrashriyollasan |
gajAhvaye mahAbhAgashchakravartI bR^ihachChravAH || 44||
itthambhUtAnubhAvo.ayamabhimanyusuto nR^ipaH |
yasya pAlayataH kShoNIM yUyaM satrAya dIkShitAH || 45||
iti shrImadbhAgavate mahApurANe pAramahaMsyAM saMhitAyAM
prathamaskandhe kalinigraho nAma saptadasho.adhyAyaH || 17||
\iti
\section{.. OM namo bhagavate vAsudevAya ..}
\section{.. aShTAdasho.adhyAyaH ..}
sUta uvAcha
yo vai drauNyastravipluShTo na mAturudare mR^itaH |
anugrahAdbhagavataH kR^iShNasyAdbhutakarmaNaH || 1||
brahmakopotthitAdyastu takShakAtprANaviplavAt |
na sammumohorubhayAdbhagavatyarpitAshayaH || 2||
utsR^ijya sarvataH sa~NgaM vij~nAtAjitasaMsthitiH |
vaiyAsakerjahau shiShyo ga~NgAyAM svaM kalevaram || 3||
nottamashlokavArtAnAM juShatAM tatkathAmR^itam |
syAtsambhramo.antakAle.api smaratAM tatpadAmbujam || 4||
tAvatkalirna prabhavetpraviShTo.apIha sarvataH |
yAvadIsho mahAnurvyAmAbhimanyava ekarAT || 5||
yasminnahani yarhyeva bhagavAnutsasarja gAm |
tadaivehAnuvR^itto.asAvadharmaprabhavaH kaliH || 6||
nAnudveShTi kaliM samrAT sAra~Nga iva sArabhuk |
kushalAnyAshu sid.hdhyanti netarANi kR^itAni yat || 7||
kiM nu bAleShu shUreNa kalinA dhIrabhIruNA |
apramattaH pramatteShu yo vR^iko nR^iShu vartate || 8||
upavarNitametadvaH puNyaM pArIkShitaM mayA |
vAsudevakathopetamAkhyAnaM yadapR^ichChata || 9||
yA yAH kathA bhagavataH kathanIyorukarmaNaH |
guNakarmAshrayAH pumbhiH saMsevyAstA bubhUShubhiH || 10||
R^iShaya UchuH
sUta jIva samAH saumya shAshvatIrvishadaM yashaH |
yastvaM shaMsasi kR^iShNasya martyAnAmamR^itaM hi naH || 11||
karmaNyasminnanAshvAse dhUmadhUmrAtmanAM bhavAn |
ApAyayati govindapAdapadmAsavaM madhu || 12||
tulayAma lavenApi na svargaM nApunarbhavam |
bhagavatsa~Ngisa~Ngasya martyAnAM kimutAshiShaH || 13||
ko nAma tR^ipyedrasavitkathAyAM
mahattamaikAntaparAyaNasya |
nAntaM guNAnAmaguNasya jagmu\-
ryogeshvarA ye bhavapAdmamukhyAH || 14||
tanno bhavAn vai bhagavatpradhAno
mahattamaikAntaparAyaNasya |
harerudAraM charitaM vishuddhaM
shushrUShatAM no vitanotu vidvan || 15||
sa vai mahAbhAgavataH parIkShi\-
dyenApavargAkhyamadabhrabuddhiH |
j~nAnena vaiyAsakishabditena
bheje khagendradhvajapAdamUlam || 16||
tannaH paraM puNyamasaMvR^itArtha\-
mAkhyAnamatyadbhutayoganiShTham |
AkhyAhyanantAcharitopapannaM
pArIkShitaM bhAgavatAbhirAmam || 17||
sUta uvAcha
aho vayaM janmabhR^ito.adya hAsma
vR^iddhAnuvR^ittyApi vilomajAtAH |
dauShkulyamAdhiM vidhunoti shIghraM
mahattamAnAmabhidhAnayogaH || 18||
kutaH punargR^iNato nAma tasya
mahattamaikAntaparAyaNasya |
yo.anantashaktirbhagavAnananto
mahadguNatvAdyamanantamAhuH || 19||
etAvatAlaM nanu sUchitena
guNairasAmyAnatishAyanasya |
hitvetarAn prArthayato vibhUti\-
ryasyA~NghrireNuM juShate.anabhIpsoH || 20||
athApi yatpAdanakhAvasR^iShTaM
jagadviri~nchopahR^itArhaNAmbhaH |
seshaM punAtyanyatamo mukundA\-
tko nAma loke bhagavatpadArthaH || 21||
yatrAnuraktAH sahasaiva dhIrA
vyapohya dehAdiShu sa~NgamUDham |
vrajanti tatpAramahaMsyamantyaM
yasminnahiMsopashamaH svadharmaH || 22||
ahaM hi pR^iShTo.aryamaNo bhavadbhi\-
rAchakSha AtmAvagamo.atra yAvAn |
nabhaH patantyAtmasamaM patattriNa\-
stathA samaM viShNugatiM vipashchitaH || 23||
ekadA dhanurudyamya vicharan mR^igayAM vane |
mR^igAnanugataH shrAntaH kShudhitastR^iShito bhR^isham || 24||
jalAshayamachakShANaH pravivesha tamAshramam |
dadarsha munimAsInaM shAntaM mIlitalochanam || 25||
pratiruddhendriyaprANamanobuddhimupAratam |
sthAnatrayAtparaM prAptaM brahmabhUtamavikriyam || 26||
viprakIrNajaTAchChannaM rauraveNAjinena cha |
vishuShyattAlurudakaM tathAbhUtamayAchata || 27||
alabdhatR^iNabhUmyAdirasamprAptArghyasUnR^itaH |
avaj~nAtamivAtmAnaM manyamAnashchukopa ha || 28||
abhUtapUrvaH sahasA kShuttR^iTbhyAmarditAtmanaH |
brAhmaNaM pratyabhUdbrahman matsaro manyureva cha || 29||
sa tu brahmaR^iSheraMse gatAsumuragaM ruShA |
vinirgachChan dhanuShkoTyA nidhAya puramAgamat || 30||
eSha kiM nibhR^itAsheShakaraNo mIlitekShaNaH |
mR^iShAsamAdhirAhosvitkiM nu syAtkShatrabandhubhiH || 31||
tasya putro.atitejasvI viharan bAlako.arbhakaiH |
rAj~nAghaM prApitaM tAtaM shrutvA tatredamabravIt || 32||
aho adharmaH pAlAnAM pIvnAM balibhujAmiva |
svAminyaghaM yaddAsAnAM dvArapAnAM shunAmiva || 33||
brAhmaNaiH kShatrabandhurhi gR^ihapAlo nirUpitaH |
sa kathaM tadgR^ihe dvAHsthaH sabhANDaM bhoktumarhati || 34||
kR^iShNe gate bhagavati shAstaryutpathagAminAm |
tadbhinnasetUnadyAhaM shAsmi pashyata me balam || 35||
ityuktvA roShatAmrAkSho vayasyAn R^iShibAlakaH |
kaushikyApa upaspR^ishya vAgvajraM visasarja ha || 36||
iti la~NghitamaryAdaM takShakaH saptame.ahani |
da~NkShyati sma kulA~NgAraM chodito me tatadruham || 37||
tato.abhyetyAshramaM bAlo gale sarpakalevaram |
pitaraM vIkShya duHkhArto muktakaNTho ruroda ha || 38||
sa vA A~Ngiraso brahman shrutvA sutavilApanam |
unmIlya shanakairnetre dR^iShTvA svAMse mR^itoragam || 39||
visR^ijya taM cha paprachCha vatsa kasmAddhi rodiShi |
kena vA te pratikR^itamityuktaH sa nyavedayat || 40||
nishamya shaptamatadarhaM narendraM
sa brAhmaNo nAtmajamabhyanandat |
aho batAMho mahadadya te kR^ita\-
malpIyasi droha ururdamo dhR^itaH || 41||
na vai nR^ibhirnaradevaM parAkhyaM
sammAtumarhasyavipakvabuddhe |
yattejasA durviShaheNa guptA
vindanti bhadrANyakutobhayAH prajAH || 42||
alakShyamANe naradevanAmni
rathA~NgapANAvayama~Nga lokaH |
tadA hi chauraprachuro vina~NkShya\-
tyarakShyamANo.avivarUthavatkShaNAt || 43||
tadadya naH pApamupaityananvayaM
yannaShTanAthasya vasorvilumpakAt |
parasparaM ghnanti shapanti vR^i~njate
pashUn striyo.arthAn purudasyavo janAH || 44||
tadA.a.aryadharmashcha vilIyate nR^iNAM
varNAshramAchArayutastrayImayaH |
tato.arthakAmAbhiniveshitAtmanAM
shunAM kapInAmiva varNasa~NkaraH || 45||
dharmapAlo narapatiH sa tu samrATbR^ihachChravAH |
sAkShAnmahAbhAgavato rAjarShirhayamedhayAT |
kShuttR^iT shramayuto dIno naivAsmachChApamarhati || 46||
apApeShu svabhR^ityeShu bAlenApakvabuddhinA |
pApaM kR^itaM tadbhagavAn sarvAtmA kShantumarhati || 47||
tiraskR^itA vipralabdhAH shaptAH kShiptA hatA api |
nAsya tatpratikurvanti tadbhaktAH prabhavo.api hi || 48||
iti putrakR^itAghena so.anutapto mahAmuniH |
svayaM viprakR^ito rAj~nA naivAghaM tadachintayat || 49||
prAyashaH sAdhavo loke parairdvandveShu yojitAH |
na vyathanti na hR^iShyanti yata AtmAguNAshrayaH || 50||
iti shrImadbhAgavate mahApurANe pAramahaMsyAM saMhitAyAM
prathamaskandhe viprashApopalambhanaM nAmAShTAdasho.adhyAyaH || 18||
\iti
\section{.. OM namo bhagavate vAsudevAya ..}
\section{.. ekonaviMsho.adhyAyaH ..}
sUta uvAcha
mahIpatistvatha tatkarma garhyaM
vichintayannAtmakR^itaM sudurmanAH |
aho mayA nIchamanAryavatkR^itaM
nirAgasi brahmaNi gUDhatejasi || 1||
dhruvaM tato me kR^itadevahelanA\-
dduratyayaM vyasanaM nAtidIrghAt |
tadastu kAmaM tvaghaniShkR^itAya me
yathA na kuryAM punarevamaddhA || 2||
adyaiva rAjyaM balamR^iddhakoshaM
prakopitabrahmakulAnalo me |
dahatvabhadrasya punarna me.abhU\-
tpApIyasI dhIrdvijadevagobhyaH || 3||
sa chintayannitthamathAshR^iNodyathA
muneH sutokto nirR^itistakShakAkhyaH |
sa sAdhu mene na chireNa takShakA\-
nalaM prasaktasya viraktikAraNam || 4||
atho vihAyemamamuM cha lokaM
vimarshitau heyatayA purastAt |
kR^iShNA~NghrisevAmadhimanyamAna
upAvishatprAyamamartyanadyAm || 5||
yA vai lasachChrItulasIvimishra\-
kR^iShNA~NghrireNvabhyadhikAmbunetrI |
punAti lokAnubhayatra seshAn
kastAM na seveta mariShyamANaH || 6||
iti vyavachChidya sa pANDaveyaH
prAyopaveshaM prati viShNupadyAm |
dadhyau mukundA~NghrimananyabhAvo
munivrato muktasamastasa~NgaH || 7||
tatropajagmurbhuvanaM punAnA
mahAnubhAvA munayaH sashiShyAH |
prAyeNa tIrthAbhigamApadeshaiH
svayaM hi tIrthAni punanti santaH || 8||
atrirvasiShThashchyavanaH sharadvA\-
nariShTanemirbhR^igura~NgirAshcha |
parAsharo gAdhisuto.atha rAma
utathya indrapramadedhmavAhau || 9||
medhAtithirdevala ArShTiSheNo
bhAradvAjo gautamaH pippalAdaH |
maitreya aurvaH kavaShaH kumbhayoni\-
rdvaipAyano bhagavAnnAradashcha || 10||
anye cha devarShibrahmarShivaryA
rAjarShivaryA aruNAdayashcha |
nAnArSheyapravarAn sametA\-
nabhyarchya rAjA shirasA vavande || 11||
sukhopaviShTeShvatha teShu bhUyaH
kR^itapraNAmaH svachikIrShitaM yat |
vij~nApayAmAsa viviktachetA
upasthito.agre.abhigR^ihItapANiH || 12||
rAjovAcha
aho vayaM dhanyatamA nR^ipANAM
mahattamAnugrahaNIyashIlAH |
rAj~nAM kulaM brAhmaNapAdashauchA\-
ddUrAdvisR^iShTaM bata garhyakarma || 13||
tasyaiva me.aghasya parAvaresho
vyAsaktachittasya gR^iheShvabhIkShNam |
nirvedamUlo dvijashAparUpo
yatra prasakto bhayamAshu dhatte || 14||
taM mopayAtaM pratiyantu viprA
ga~NgA cha devI dhR^itachittamIshe |
dvijopasR^iShTaH kuhakastakShako vA
dashatvalaM gAyata viShNugAthAH || 15||
punashcha bhUyAdbhagavatyanante
ratiH prasa~Ngashcha tadAshrayeShu |
mahatsu yAM yAmupayAmi sR^iShTiM
maitryastu sarvatra namo dvijebhyaH || 16||
iti sma rAjAdhyavasAyayuktaH
prAchInamUleShu kusheShu dhIraH |
uda~Nmukho dakShiNakUla Aste
samudrapatnyAH svasutanyastabhAraH || 17||
evaM cha tasmin naradevadeve
prAyopaviShTe divi devasa~NghAH |
prashasya bhUmau vyakiran prasUnai\-
rmudA muhurdundubhayashcha neduH || 18||
maharShayo vai samupAgatA ye
prashasya sAdhvityanumodamAnAH |
UchuH prajAnugrahashIlasArA
yaduttamashlokaguNAbhirUpam || 19||
na vA idaM rAjarShivarya chitraM
bhavatsu kR^iShNaM samanuvrateShu |
ye.adhyAsanaM rAjakirITajuShTaM
sadyo jahurbhagavatpArshvakAmAH || 20||
sarve vayaM tAvadihAsmahe.adya
kalevaraM yAvadasau vihAya |
lokaM paraM virajaskaM vishokaM
yAsyatyayaM bhAgavatapradhAnaH || 21||
Ashrutya tadR^iShigaNavachaH parIkShi\-
tsamaM madhuchyudguru chAvyalIkam |
AbhAShatainAnabhinandya yuktAn
shushrUShamANashcharitAni viShNoH || 22||
samAgatAH sarvata eva sarve
vedA yathA mUrtidharAstripR^iShThe |
nehAtha nAmutra cha kashchanArtha
R^ite parAnugrahamAtmashIlam || 23||
tatashcha vaH pR^ichChyamimaM vipR^ichChe
vishrabhya viprA iti kR^ityatAyAm |
sarvAtmanA mriyamANaishcha kR^ityaM
shuddhaM cha tatrAmR^ishatAbhiyuktAH || 24||
tatrAbhavadbhagavAn vyAsaputro
yadR^ichChayA gAmaTamAno.anapekShaH |
alakShyali~Ngo nijalAbhatuShTo
vR^itashcha bAlairavadhUtaveShaH || 25||
taM dvyaShTavarShaM sukumArapAda\-
karorubAhvaMsakapolagAtram |
chArvAyatAkShonnasatulyakarNa\-
subhrvAnanaM kambusujAtakaNTham || 26||
nigUDhajatruM pR^ithutu~NgavakShasa\-
mAvartanAbhiM valivalgUdaraM cha |
digambaraM vaktravikIrNakeshaM
pralambabAhuM svamarottamAbham || 27||
shyAmaM sadApIchyavayo.a~NgalakShmyA
strINAM manoj~naM ruchirasmitena |
pratyutthitAste munayaH svAsanebhya\-
stallakShaNaj~nA api gUDhavarchasam || 28||
sa viShNurAto.atithaya AgatAya
tasmai saparyAM shirasA.a.ajahAra |
tato nivR^ittA hyabudhAH striyo.arbhakA
mahAsane sopavivesha pUjitaH || 29||
sa saMvR^itastatra mahAn mahIyasAM
brahmarShirAjarShidevarShisa~NghaiH |
vyarochatAlaM bhagavAn yathendu\-
rgraharkShatArAnikaraiH parItaH || 30||
prashAntamAsInamakuNThamedhasaM
muniM nR^ipo bhAgavato.abhyupetya |
praNamya mUrdhnAvahitaH kR^itA~njali\-
rnatvA girA sUnR^itayAnvapR^ichChat || 31||
parIkShiduvAcha
aho adya vayaM brahman satsevyAH kShatrabandhavaH |
kR^ipayAtithirUpeNa bhavadbhistIrthakAH kR^itAH || 32||
yeShAM saMsmaraNAtpuMsAM sadyaH shudhyanti vai gR^ihAH |
kiM punardarshanasparshapAdashauchAsanAdibhiH || 33||
sAnnidhyAtte mahAyogin pAtakAni mahAntyapi |
sadyo nashyanti vai puMsAM viShNoriva suretarAH || 34||
api me bhagavAn prItaH kR^iShNaH pANDusutapriyaH |
paitR^iShvaseyaprItyarthaM tadgotrasyAttabAndhavaH || 35||
anyathA te.avyaktagaterdarshanaM naH kathaM nR^iNAm |
nitarAM mriyamANAnAM saMsiddhasya vanIyasaH || 36||
ataH pR^ichChAmi saMsiddhiM yoginAM paramaM gurum |
puruShasyeha yatkAryaM mriyamANasya sarvathA || 37||
yachChrotavyamatho japyaM yatkartavyaM nR^ibhiH prabho |
smartavyaM bhajanIyaM vA brUhi yadvA viparyayam || 38||
nUnaM bhagavato brahman gR^iheShu gR^ihamedhinAm |
na lakShyate hyavasthAnamapi godohanaM kvachit || 39||
sUta uvAcha
evamAbhAShitaH pR^iShTaH sa rAj~nA shlakShNayA girA |
pratyabhAShata dharmaj~no bhagavAn bAdarAyaNiH || 40||
iti shrImadbhAgavate mahApurANe vaiyAsakyAmaShTAdashasAhasryAM
pAramahaMsyAM saMhitAyAM prathamaskandhe shukAgamanaM nAmaikonaviMsho.adhyAyaH || 19||
\section{.. iti prathamaskandhaH samAptaH ..}
|| OM tatsadbrahmArpaNamastu ||

##
Proofread by PSA Easwaran

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}