% Text title            : shrImadbhAgavatam - 07 - saptamaskandhaH
% File name             : bhagpur-07.itx
% Category              : purana, shrimadbhagavatam, vyAsa, krishna
% Location              : doc\_purana
% Proofread by          : PSA Easwaran
% Latest update         : July 4, 2021
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. shrImadbhAgavataM - saptamaskandhaH ..}##
\itxtitle{.. shrImadbhAgavataM \- saptamaskandhaH ..}##\endtitles ##
\chapter{.. OM namo bhagavate vAsudevAya ..}
\section{.. saptamaskandhaH ..}
\section{.. prathamo.adhyAyaH \- 1 ..}
rAjovAcha
samaH priyaH suhR^idbrahman bhUtAnAM bhagavAn svayam |
indrasyArthe kathaM daityAnavadhIdviShamo yathA || 1||
na hyasyArthaH suragaNaiH sAkShAnniHshreyasAtmanaH |
naivAsurebhyo vidveSho nodvegashchAguNasya hi || 2||
iti naH sumahAbhAga nArAyaNaguNAn prati |
saMshayaH sumahAn jAtastadbhavAMshChettumarhati || 3||
shrIshuka uvAcha
sAdhu pR^iShTaM mahArAja hareshcharitamadbhutam |
yadbhAgavatamAhAtmyaM bhagavadbhaktivardhanam || 4||
gIyate paramaM puNyamR^iShibhirnAradAdibhiH |
natvA kR^iShNAya munaye kathayiShye hareH kathAm || 5||
nirguNo.api hyajo.avyakto bhagavAn prakR^iteH paraH |
svamAyAguNamAvishya bAdhyabAdhakatAM gataH || 6||
sattvaM rajastama iti prakR^iternAtmano guNAH |
na teShAM yugapadrAjan hrAsa ullAsa eva vA || 7||
jayakAle tu sattvasya devarShIn rajaso.asurAn |
tamaso yakSharakShAMsi tatkAlAnuguNo.abhajat || 8||
jyotirAdirivAbhAti sa~NghAtAnna vivichyate |
vidantyAtmAnamAtmasthaM mathitvA kavayo.antataH || 9||
yadA sisR^ikShuH pura AtmanaH paro
rajaH sR^ijatyeSha pR^ithak svamAyayA |
sattvaM vichitrAsu riraMsurIshvaraH
shayiShyamANastama Irayatyasau || 10||
kAlaM charantaM sR^ijatIsha AshrayaM
pradhAnapumbhyAM naradeva satyakR^it |
ya eSha rAjannapi kAla IshitA
sattvaM surAnIkamivaidhayatyataH |
tatpratyanIkAnasurAn surapriyo
rajastamaskAn pramiNotyurushravAH || 11||
atraivodAhR^itaH pUrvamitihAsaH surarShiNA |
prItyA mahAkratau rAjan pR^ichChate.ajAtashatrave || 12||
dR^iShTvA mahAdbhutaM rAjA rAjasUye mahAkratau |
vAsudeve bhagavati sAyujyaM chedibhUbhujaH || 13||
tatrAsInaM suraR^iShiM rAjA pANDusutaH kratau |
paprachCha vismitamanA munInAM shR^iNvatAmidam || 14||
yudhiShThira uvAcha
aho atyadbhutaM hyetaddurlabhaikAntinAmapi |
vAsudeve pare tattve prAptishchaidyasya vidviShaH || 15||
etadveditumichChAmaH sarva eva vayaM mune |
bhagavannindayA veno dvijaistamasi pAtitaH || 16||
damaghoShasutaH pApa Arabhya kalabhAShaNAt |
sampratyamarShI govinde dantavaktrashcha durmatiH || 17||
shapatorasakR^idviShNuM yadbrahma paramavyayam |
shvitro na jAto jihvAyAM nAndhaM vivishatustamaH || 18||
kathaM tasmin bhagavati duravagrAhadhAmani |
pashyatAM sarvalokAnAM layamIyatura~njasA || 19||
etadbhrAmyati me buddhirdIpArchiriva vAyunA |
brUhyetadadbhutatamaM bhagavAMstatra kAraNam || 20||
shrIshuka uvAcha
rAj~nastadvacha AkarNya nArado bhagavAnR^iShiH |
tuShTaH prAha tamAbhAShya shR^iNvatyAstatsadaH kathAH || 21||
nArada uvAcha
nindanastavasatkAranyakkArArthaM kalevaram |
pradhAnaparayo rAjannavivekena kalpitam || 22||
hiMsA tadabhimAnena daNDapAruShyayoryathA |
vaiShamyamiha bhUtAnAM mamAhamiti pArthiva || 23||
yannibaddho.abhimAno.ayaM tadvadhAtprANinAM vadhaH |
tathA na yasya kaivalyAdabhimAno.akhilAtmanaH |
parasya damakarturhi hiMsA kenAsya kalpyate || 24||
tasmAdvairAnubandhena nirvaireNa bhayena vA |
snehAtkAmena vA yu~njyAtkatha~nchinnekShate pR^ithak || 25||
yathA vairAnubandhena martyastanmayatAmiyAt |
na tathA bhaktiyogena iti me nishchitA matiH || 26||
kITaH peshaskR^itA ruddhaH kuDyAyAM tamanusmaran |
saMrambhabhayayogena vindate tatsarUpatAm || 27||
evaM kR^iShNe bhagavati mAyAmanuja Ishvare |
vaireNa pUtapApmAnastamApuranuchintayA || 28||
kAmAddveShAdbhayAtsnehAdyathA bhaktyeshvare manaH |
Aveshya tadaghaM hitvA bahavastadgatiM gatAH || 29||
gopyaH kAmAdbhayAtkaMso dveShAchchaidyAdayo nR^ipAH |
sambandhAdvR^iShNayaH snehAdyUyaM bhaktyA vayaM vibho || 30||
katamo.api na venaH syAtpa~nchAnAM puruShaM prati |
tasmAtkenApyupAyena manaH kR^iShNe niveshayet || 31||
mAtR^iShvaseyo vashchaidyo dantavaktrashcha pANDava |
pArShadapravarau viShNorviprashApAtpadAchchyutau || 32||
yudhiShThira uvAcha
kIdR^ishaH kasya vA shApo haridAsAbhimarshanaH |
ashraddheya ivAbhAti harerekAntinAM bhavaH || 33||
dehendriyAsuhInAnAM vaikuNThapuravAsinAm |
dehasambandhasambaddhametadAkhyAtumarhasi || 34||
nArada uvAcha
ekadA brahmaNaH putrA viShNorlokaM yadR^ichChayA |
sanandanAdayo jagmushcharanto bhuvanatrayam || 35||
pa~nchaShaDDhAyanArbhAbhAH pUrveShAmapi pUrvajAH |
digvAsasaH shishUn matvA dvAHsthau tAn pratyaShedhatAm || 36||
ashapan kupitA evaM yuvAM vAsaM na chArhathaH |
rajastamobhyAM rahite pAdamUle madhudviShaH |
pApiShThAmAsurIM yoniM bAlishau yAtamAshvataH || 37||
evaM shaptau svabhavanAtpatantau taiH kR^ipAlubhiH |
proktau punarjanmabhirvAM tribhirlokAya kalpatAm || 38||
jaj~nAte tau diteH putrau daityadAnavavanditau |
hiraNyakashipurjyeShTho hiraNyAkSho.anujastataH || 39||
hato hiraNyakashipurhariNA siMharUpiNA |
hiraNyAkSho dharoddhAre bibhratA saukaraM vapuH || 40||
hiraNyakashipuH putraM prahlAdaM keshavapriyam |
jighAMsurakaronnAnA yAtanA mR^ityuhetave || 41||
sarvabhUtAtmabhUtaM taM prashAntaM samadarshanam |
bhagavattejasA spR^iShTaM nAshaknoddhantumudyamaiH || 42||
tatastau rAkShasau jAtau keshinyAM vishravaHsutau |
rAvaNaH kumbhakarNashcha sarvalokopatApanau || 43||
tatrApi rAghavo bhUtvA nyahanachChApamuktaye |
rAmavIryaM shroShyasi tvaM mArkaNDeyamukhAtprabho || 44||
tAveva kShatriyau jAtau mAtR^iShvasrAtmajau tava |
adhunA shApanirmuktau kR^iShNachakrahatAMhasau || 45||
vairAnubandhatIvreNa dhyAnenAchyutasAtmatAm |
nItau punarhareH pArshvaM jagmaturviShNupArShadau || 46||
yudhiShThira uvAcha
vidveSho dayite putre kathamAsInmahAtmani |
brUhi me bhagavan yena prahlAdasyAchyutAtmatA || 47||
iti shrImadbhAgavate mahApurANe pAramahaMsyAM saMhitAyAM
saptamaskandhe prahlAdacharitopakrame prathamo.adhyAyaH (1)
\iti
\section{.. OM namo bhagavate vAsudevAya ..}
\section{.. dvitIyo.adhyAyaH \- 2 ..}
nArada uvAcha
bhrAtaryevaM vinihate hariNA kroDamUrtinA |
hiraNyakashipU rAjan paryatapyadruShA shuchA || 1||
Aha chedaM ruShA ghUrNaH sandaShTadashanachChadaH |
kopojjvaladbhyAM chakShurbhyAM nirIkShan dhUmramambaram || 2||
karAladaMShTrogradR^iShTyA duShprekShyabhrukuTImukhaH |
shUlamudyamya sadasi dAnavAnidamabravIt || 3||
bho bho dAnavadaiteyA dvimUrdhaMstryakSha shambara |
shatabAho hayagrIva namuche pAka ilvala || 4||
viprachitte mama vachaH puloman shakunAdayaH |
shR^iNutAnantaraM sarve kriyatAmAshu mA chiram || 5||
sapatnairghAtitaH kShudrairbhrAtA me dayitaH suhR^it |
pArShNigrAheNa hariNA samenApyupadhAvanaiH || 6||
tasya tyaktasvabhAvasya ghR^iNermAyAvanaukasaH |
bhajantaM bhajamAnasya bAlasyevAsthirAtmanaH || 7||
machChUlabhinnagrIvasya bhUriNA rudhireNa vai |
rudhirapriyaM tarpayiShye bhrAtaraM me gatavyathaH || 8||
tasmin kUTe.ahite naShTe kR^ittamUle vanaspatau |
viTapA iva shuShyanti viShNuprANA divaukasaH || 9||
tAvadyAta bhuvaM yUyaM viprakShatrasamedhitAm |
sUdayadhvaM tapoyaj~nasvAdhyAyavratadAninaH || 10||
viShNurdvijakriyAmUlo yaj~no dharmamayaH pumAn |
devarShipitR^ibhUtAnAM dharmasya cha parAyaNam || 11||
yatra yatra dvijA gAvo vedA varNAshramAH kriyAH |
taM taM janapadaM yAta sandIpayata vR^ishchata || 12||
iti te bhartR^inirdeshamAdAya shirasA.a.adR^itAH |
tathA prajAnAM kadanaM vidadhuH kadanapriyAH || 13||
puragrAmavrajodyAnakShetrArAmAshramAkarAn |
kheTakharvaTaghoShAMshcha dadahuH pattanAni cha || 14||
kechitkhanitrairbibhiduH setuprAkAragopurAn |
AjIvyAMshchichChidurvR^ikShAn kechitparashupANayaH |
prAdahan sharaNAnyeke prajAnAM jvalitolmukaiH || 15||
evaM viprakR^ite loke daityendrAnucharairmuhuH |
divaM devAH parityajya bhuvi cheruralakShitAH || 16||
hiraNyakashipurbhrAtuH samparetasya duHkhitaH |
kR^itvA kaTodakAdIni bhrAtR^iputrAnasAntvayat || 17||
shakuniM shambaraM dhR^iShTaM bhUtasantApanaM vR^ikam |
kAlanAbhaM mahAnAbhaM harishmashrumathotkacham || 18||
tanmAtaraM ruShAbhAnuM ditiM cha jananIM girA |
shlakShNayA deshakAlaj~na idamAha janeshvara || 19||
hiraNyakashipuruvAcha
ambAmba he vadhUH putrA vIraM mArhatha shochitum |
riporabhimukhe shlAghyaH shUrANAM vadha IpsitaH || 20||
bhUtAnAmiha saMvAsaH prapAyAmiva suvrate |
daivenaikatra nItAnAmunnItAnAM svakarmabhiH || 21||
nitya AtmAvyayaH shuddhaH sarvagaH sarvavitparaH |
dhatte.asAvAtmano li~NgaM mAyayA visR^ijan guNAn || 22||
yathAmbhasA prachalatA taravo.api chalA iva |
chakShuShA bhrAmyamANena dR^ishyate chalatIva bhUH || 23||
evaM guNairbhrAmyamANe manasyavikalaH pumAn |
yAti tatsAmyatAM bhadre hyali~Ngo li~NgavAniva || 24||
eSha AtmaviparyAso hyali~Nge li~NgabhAvanA |
eSha priyApriyairyogo viyogaH karmasaMsR^itiH || 25||
sambhavashcha vinAshashcha shokashcha vividhaH smR^itaH |
avivekashcha chintA cha vivekAsmR^itireva cha || 26||
atrApyudAharantImamitihAsaM purAtanam |
yamasya pretabandhUnAM saMvAdaM taM nibodhata || 27||
ushInareShvabhUdrAjA suyaj~na iti vishrutaH |
sapatnairnihato yuddhe j~nAtayastamupAsata || 28||
vishIrNaratnakavachaM vibhraShTAbharaNasrajam |
sharanirbhinnahR^idayaM shayAnamasR^igAvilam || 29||
prakIrNakeshaM dhvastAkShaM rabhasA daShTadachChadam |
rajaHkuNThamukhAmbhojaM ChinnAyudhabhujaM mR^idhe || 30||
ushInarendraM vidhinA tathA kR^itaM
patiM mahiShyaH prasamIkShya duHkhitAH |
hatAH sma nAtheti karairuro bhR^ishaM
ghnantyo muhustatpadayorupApatan || 31||
rudatya uchchairdayitA~Nghripa~NkajaM
si~nchantya asraiH kuchaku~NkumAruNaiH |
visrastakeshAbharaNAH shuchaM nR^iNAM
sR^ijantya AkrandanayA vilepire || 32||
aho vidhAtrAkaruNena naH prabho
bhavAn praNIto dR^igagocharAM dashAm |
ushInarANAmasi vR^ittidaH purA
kR^ito.adhunA yena shuchAM vivardhanaH || 33||
tvayA kR^itaj~nena vayaM mahIpate
kathaM vinA syAma suhR^ittamena te |
tatrAnuyAnaM tava vIra pAdayoH
shushrUShatInAM disha yatra yAsyasi || 34||
evaM vilapatInAM vai parigR^ihya mR^itaM patim |
anichChatInAM nirhAramarko.astaM sannyavartata || 35||
tatra ha pretabandhUnAmAshrutya paridevitam |
Aha tAn bAlako bhUtvA yamaH svayamupAgataH || 36||
yama uvAcha
aho amIShAM vayasAdhikAnAM
vipashyatAM lokavidhiM vimohaH |
yatrAgatastatra gataM manuShyaM
svayaM sadharmA api shochantyapArtham || 37||
aho vayaM dhanyatamA yadatra
tyaktAH pitR^ibhyAM na vichintayAmaH |
abhakShyamANA abalA vR^ikAdibhiH
sa rakShitA rakShati yo hi garbhe || 38||
ya ichChayeshaH sR^ijatIdamavyayo
ya eva rakShatyavalumpate cha yaH |
tasyAbalAH krIDanamAhurIshitu\-
shcharAcharaM nigrahasa~Ngrahe prabhuH || 39||
pathi chyutaM tiShThati diShTarakShitaM
gR^ihe sthitaM tadvihataM vinashyati |
jIvatyanAtho.api tadIkShito vane
gR^ihe.abhigupto.asya hato na jIvati || 40||
bhUtAni taistairnijayonikarmabhi\-
rbhavanti kAle na bhavanti sarvashaH |
na tatra hAtmA prakR^itAvapi sthita\-
stasyA guNairanyatamo nibadhyate || 41||
idaM sharIraM puruShasya mohajaM
yathA pR^ithagbhautikamIyate gR^iham |
yathaudakaiH pArthivataijasairjanaH
kAlena jAto vikR^ito vinashyati || 42||
yathAnalo dAruShu bhinna Iyate
yathAnilo dehagataH pR^ithak sthitaH |
yathA nabhaH sarvagataM na sajjate
tathA pumAn sarvaguNAshrayaH paraH || 43||
suyaj~no nanvayaM shete mUDhA yamanushochatha |
yaH shrotA yo.anuvakteha sa na dR^ishyeta karhichit || 44||
na shrotA nAnuvaktAyaM mukhyo.apyatra mahAnasuH |
yastvihendriyavAnAtmA sa chAnyaH prANadehayoH || 45||
bhUtendriyamanoli~NgAn dehAnuchchAvachAn vibhuH |
bhajatyutsR^ijati hyanyastachchApi svena tejasA || 46||
yAvalli~NgAnvito hyAtmA tAvatkarma nibandhanam |
tato viparyayaH klesho mAyAyogo.anuvartate || 47||
vitathAbhinivesho.ayaM yadguNeShvarthadR^igvachaH |
yathA manorathaH svapnaH sarvamaindriyakaM mR^iShA || 48||
atha nityamanityaM vA neha shochanti tadvidaH |
nAnyathA shakyate kartuM svabhAvaH shochatAmiti || 49||
lubdhako vipine kashchitpakShiNAM nirmito.antakaH |
vitatya jAlaM vidadhe tatra tatra pralobhayan || 50||
kuli~NgamithunaM tatra vicharatsamadR^ishyata |
tayoH kuli~NgI sahasA lubdhakena pralobhitA || 51||
sAsajjata sichastantryAM mahiShI kAlayantritA |
kuli~NgastAM tathA.a.apannAM nirIkShya bhR^ishaduHkhitaH |
snehAdakalpaH kR^ipaNaH kR^ipaNAM paryadevayat || 52||
aho akaruNo devaH striyAkaruNayA vibhuH |
kR^ipaNaM mAnushochantyA dInayA kiM kariShyati || 53||
kAmaM nayatu mAM devaH kimardhenAtmano hi me |
dInena jIvatA duHkhamanena vidhurAyuShA || 54||
kathaM tvajAtapakShAMstAn mAtR^ihInAn bibharmyaham |
mandabhAgyAH pratIkShante nIDe me mAtaraM prajAH || 55||
evaM kuli~NgaM vilapantamArA\-
tpriyAviyogAturamashrukaNTham |
sa eva taM shAkunikaH shareNa
vivyAdha kAlaprahito vilInaH || 56||
evaM yUyamapashyantya AtmApAyamabuddhayaH |
nainaM prApsyatha shochantyaH patiM varShashatairapi || 57||
hiraNyakashipuruvAcha
bAla evaM pravadati sarve vismitachetasaH |
j~nAtayo menire sarvamanityamayathotthitam || 58||
yama etadupAkhyAya tatraivAntaradhIyata |
j~nAtayo.api suyaj~nasya chakruryatsAmparAyikam || 59||
tataH shochata mA yUyaM paraM chAtmAnameva cha |
ka AtmA kaH paro vAtra svIyaH pArakya eva vA |
svaparAbhiniveshena vinAj~nAnena dehinAm || 60||
shrInArada uvAcha
iti daityapatervAkyaM ditirAkarNya sasnuShA |
putrashokaM kShaNAttyaktvA tattve chittamadhArayat || 61||
iti shrImadbhAgavate mahApurANe pAramahaMsyAM saMhitAyAM
saptamaskandhe ditishokApanayanaM nAma dvitIyo.adhyAyaH || 2||
\iti
\section{.. OM namo bhagavate vAsudevAya ..}
\section{.. tR^itIyo.adhyAyaH \- 3 ..}
nArada uvAcha
hiraNyakashipU rAjannajeyamajarAmaram |
AtmAnamapratidvandvamekarAjaM vyadhitsata || 1||
sa tepe mandaradroNyAM tapaH paramadAruNam |
UrdhvabAhurnabhodR^iShTiH pAdA~NguShThAshritAvaniH || 2||
jaTAdIdhitibhI reje saMvartArka ivAMshubhiH |
tasmiMstapastapyamAne devAH sthAnAni bhejire || 3||
tasya mUrdhnaH samudbhUtaH sadhUmo.agnistapomayaH |
tIryagUrdhvamadho lokAnatapadviShvagIritaH || 4||
chukShubhurnadyudanvantaH sadvIpAdrishchachAla bhUH |
nipetuH sagrahAstArA jajvalushcha disho dasha || 5||
tena taptA divaM tyaktvA brahmalokaM yayuH surAH |
dhAtre vij~nApayAmAsurdevadeva jagatpate || 6||
daityendratapasA taptA divi sthAtuM na shaknumaH |
tasya chopashamaM bhUman vidhehi yadi manyase |
lokA na yAvanna~NkShyanti balihArAstavAbhibhUH || 7||
tasyAyaM kila sa~Nkalpashcharato dushcharaM tapaH |
shrUyatAM kiM na viditastavAthApi niveditaH || 8||
sR^iShTvA charAcharamidaM tapoyogasamAdhinA |
adhyAste sarvadhiShNyebhyaH parameShThI nijAsanam || 9||
tadahaM vardhamAnena tapoyogasamAdhinA |
kAlAtmanoshcha nityatvAtsAdhayiShye tathA.a.atmanaH || 10||
anyathedaM vidhAsye.ahamayathApUrvamojasA |
kimanyaiH kAlanirdhUtaiH kalpAnte vaiShNavAdibhiH || 11||
iti shushruma nirbandhaM tapaH paramamAsthitaH |
vidhatsvAnantaraM yuktaM svayaM tribhuvaneshvara || 12||
tavAsanaM dvijagavAM pArameShThyaM jagatpate |
bhavAya shreyase bhUtyai kShemAya vijayAya cha || 13||
iti vij~nApito devairbhagavAnAtmabhUrnR^ipa |
parIto bhR^igudakShAdyairyayau daityeshvarAshramam || 14||
na dadarsha pratichChannaM valmIkatR^iNakIchakaiH |
pipIlikAbhirAchIrNamedastva~NmAMsashoNitam || 15||
tapantaM tapasA lokAn yathAbhrApihitaM ravim |
vilakShya vismitaH prAha prahasan haMsavAhanaH || 16||
brahmovAcha
uttiShThottiShTha bhadraM te tapaHsiddho.asi kAshyapa |
varado.ahamanuprApto vriyatAmIpsito varaH || 17||
adrAkShamahametatte hR^itsAraM mahadadbhutam |
daMshabhakShitadehasya prANA hyasthiShu sherate || 18||
naitatpUrvarShayashchakrurna kariShyanti chApare |
niramburdhArayetprANAn ko vai divyasamAH shatam || 19||
vyavasAyena te.anena duShkareNa manasvinAm |
taponiShThena bhavatA jito.ahaM ditinandana || 20||
tatasta AshiShaH sarvA dadAmyasurapu~Ngava |
martyasya te amartyasya darshanaM nAphalaM mama || 21||
nArada uvAcha
ityuktvA.a.adibhavo devo bhakShitA~NgaM pipIlikaiH |
kamaNDalujalenaukShaddivyenAmogharAdhasA || 22||
sa tatkIchakavalmIkAtsahaojobalAnvitaH |
sarvAvayavasampanno vajrasaMhanano yuvA |
utthitastaptahemAbho vibhAvasurivaidhasaH || 23||
sa nirIkShyAmbare devaM haMsavAhamavasthitam |
nanAma shirasA bhUmau taddarshanamahotsavaH || 24||
utthAya prA~njaliH prahva IkShamANo dR^ishA vibhum |
harShAshrupulakodbhedo girA gadgadayAgR^iNAt || 25||
hiraNyakashipuruvAcha
kalpAnte kAlasR^iShTena yo.andhena tamasA.a.avR^itam |
abhivyanagjagadidaM svaya~njyotiH svarochiShA || 26||
AtmanA trivR^itA chedaM sR^ijatyavati lumpati |
rajaHsattvatamodhAmne parAya mahate namaH || 27||
nama AdyAya bIjAya j~nAnavij~nAnamUrtaye |
prANendriyamanobuddhivikArairvyaktimIyuShe || 28||
tvamIshiShe jagatastasthuShashcha
prANena mukhyena patiH prajAnAm |
chittasya chittermana aindriyANAM
patirmahAn bhUtaguNAshayeshaH || 29||
tvaM saptatantUn vitanoShi tanvA
trayyA chAturhotrakavidyayA cha |
tvameka AtmA.a.atmavatAmanAdi\-
ranantapAraH kavirantarAtmA || 30||
tvameva kAlo.animiSho janAnA\-
mAyurlavAdyAvayavaiH kShiNoShi |
kUTastha AtmA parameShThyajo mahAM\-
stvaM jIvalokasya cha jIva AtmA || 31||
tvattaH paraM nAparamapyaneja\-
dejachcha ki~nchidvyatiriktamasti |
vidyAH kalAste tanavashcha sarvA
hiraNyagarbho.asi bR^ihattripR^iShThaH || 32||
vyaktaM vibho sthUlamidaM sharIraM
yenendriyaprANamanoguNAMstvam |
bhu~NkShe sthito dhAmani pArameShThye
avyakta AtmA puruShaH purANaH || 33||
anantAvyaktarUpeNa yenedamakhilaM tatam |
chidachichChaktiyuktAya tasmai bhagavate namaH || 34||
yadi dAsyasyabhimatAn varAn me varadottama |
bhUtebhyastvadvisR^iShTebhyo mR^ityurmA bhUnmama prabho || 35||
nAntarbahirdivA naktamanyasmAdapi chAyudhaiH |
na bhUmau nAmbare mR^ityurna narairna mR^igairapi || 36||
vyasubhirvAsumadbhirvA surAsuramahoragaiH |
apratidvandvatAM yuddhe aikapatyaM cha dehinAm || 37||
sarveShAM lokapAlAnAM mahimAnaM yathA.a.atmanaH |
tapoyogaprabhAvANAM yanna riShyati karhichit || 38||
iti shrImadbhAgavate mahApurANe pAramahaMsyAM saMhitAyAM
saptamaskandhe hiraNyakashipuvarayAchanaM nAma tR^itIyo.adhyAyaH || 3||					
\iti
\section{.. OM namo bhagavate vAsudevAya ..}
\section{.. chaturtho.adhyAyaH \- 4 ..}
nArada uvAcha
evaM vR^itaH shatadhR^itirhiraNyakashiporatha |
prAdAttattapasA prIto varAMstasya sudurlabhAn || 1||
brahmovAcha
tAteme durlabhAH puMsAM yAn vR^iNIShe varAn mama |
tathApi vitarAmya~Nga varAn yadapi durlabhAn || 2||
tato jagAma bhagavAnamoghAnugraho vibhuH |
pUjito.asuravaryeNa stUyamAnaH prajeshvaraiH || 3||
evaM labdhavaro daityo bibhraddhemamayaM vapuH |
bhagavatyakaroddveShaM bhrAturvadhamanusmaran || 4||
sa vijitya dishaH sarvA lokAMshcha trIn mahAsuraH |
devAsuramanuShyendrAn gandharvagaruDoragAn || 5||
siddhachAraNavidyAdhrAnR^iShIn pitR^ipatIn manUn |
yakSharakShaHpishAcheshAn pretabhUtapatInatha || 6||
sarvasattvapatIn jitvA vashamAnIya vishvajit |
jahAra lokapAlAnAM sthAnAni saha tejasA || 7||
devodyAnashriyA juShTamadhyAste sma triviShTapam |
mahendrabhavanaM sAkShAnnirmitaM vishvakarmaNA |
trailokyalakShmyAyatanamadhyuvAsAkhilarddhimat || 8||
yatra vidrumasopAnA mahAmArakatA bhuvaH |
yatra sphATikakuDyAni vaidUryastambhapa~NktayaH || 9||
yatra chitravitAnAni padmarAgAsanAni cha |
payaHphenanibhAH shayyA muktAdAmaparichChadAH || 10||
kUjadbhirnUpurairdevyaH shabdayantya itastataH |
ratnasthalIShu pashyanti sudatIH sundaraM mukham || 11||
tasmin mahendrabhavane mahAbalo
mahAmanA nirjitaloka ekarAT |
reme.abhivandyA~NghriyugaH surAdibhiH
pratApitairUrjitachaNDashAsanaH || 12||
tama~Nga mattaM madhunorugandhinA
vivR^ittatAmrAkShamasheShadhiShNyapAH |
upAsatopAyanapANibhirvinA
tribhistapoyogabalaujasAM padam || 13||
jagurmahendrAsanamojasA sthitaM
vishvAvasustumbururasmadAdayaH |
gandharvasiddhA R^iShayo.astuvan muhu\-
rvidyAdharAshchApsarasashcha pANDava || 14||
sa eva varNAshramibhiH kratubhirbhUridakShiNaiH |
ijyamAno havirbhAgAnagrahItsvena tejasA || 15||
akR^iShTapachyA tasyAsItsaptadvIpavatI mahI |
tathA kAmadughA dyaustu nAnAshcharyapadaM nabhaH || 16||
ratnAkarAshcha ratnaughAMstatpatnyashchohurUrmibhiH |
kShArasIdhughR^itakShaudradadhikShIrAmR^itodakAH || 17||
shailA droNIbhirAkrIDaM sarvartuShu guNAn drumAH |
dadhAra lokapAlAnAmeka eva pR^ithagguNAn || 18||
sa itthaM nirjitakakubekarAD viShayAn priyAn |
yathopajoShaM bhu~njAno nAtR^ipyadajitendriyaH || 19||
evamaishvaryamattasya dR^iptasyochChAstravartinaH |
kAlo mahAn vyatIyAya brahmashApamupeyuShaH || 20||
tasyogradaNDasaMvignAH sarve lokAH sapAlakAH |
anyatrAlabdhasharaNAH sharaNaM yayurachyutam || 21||
tasyai namo.astu kAShThAyai yatrAtmA harirIshvaraH |
yadgatvA na nivartante shAntAH sannyAsino.amalAH || 22||
iti te saMyatAtmAnaH samAhitadhiyo.amalAH |
upatasthurhR^iShIkeshaM vinidrA vAyubhojanAH || 23||
teShAmAvirabhUdvANI arUpA meghaniHsvanA |
sannAdayantI kakubhaH sAdhUnAmabhaya~NkarI || 24||
mA bhaiShTa vibudhashreShThAH sarveShAM bhadramastu vaH |
maddarshanaM hi bhUtAnAM sarvashreyopapattaye || 25||
j~nAtametasya daurAtmyaM daiteyApasadasya cha |
tasya shAntiM kariShyAmi kAlaM tAvatpratIkShata || 26||
yadA deveShu vedeShu goShu vipreShu sAdhuShu |
dharme mayi cha vidveShaH sa vA Ashu vinashyati || 27||
nirvairAya prashAntAya svasutAya mahAtmane |
prahlAdAya yadA druhyeddhaniShye.api varorjitam || 28||
nArada uvAcha
ityuktA lokaguruNA taM praNamya divaukasaH |
nyavartanta gatodvegA menire chAsuraM hatam || 29||
tasya daityapateH putrAshchatvAraH paramAdbhutAH |
prahlAdo.abhUnmahAMsteShAM guNairmahadupAsakaH || 30||
brahmaNyaH shIlasampannaH satyasandho jitendriyaH |
AtmavatsarvabhUtAnAmekaH priyasuhR^ittamaH || 31||
dAsavatsannatAryA~NghriH pitR^ivaddInavatsalaH |
bhrAtR^ivatsadR^ishe snigdho guruShvIshvarabhAvanaH |
vidyArtharUpajanmADhyo mAnastambhavivarjitaH || 32||
nodvignachitto vyasaneShu niHspR^ihaH
shruteShu dR^iShTeShu guNeShvavastudR^ik |
dAntendriyaprANasharIradhIH sadA
prashAntakAmo rahitAsuro.asuraH || 33||
yasmin mahadguNA rAjan gR^ihyante kavibhirmuhuH |
na te.adhunApidhIyante yathA bhagavatIshvare || 34||
yaM sAdhugAthAsadasi ripavo.api surA nR^ipa |
pratimAnaM prakurvanti kimutAnye bhavAdR^ishAH || 35||
guNairalamasa~NkhyeyairmAhAtmyaM tasya sUchyate |
vAsudeve bhagavati yasya naisargikI ratiH || 36||
nyastakrIDanako bAlo jaDavattanmanastayA |
kR^iShNagrahagR^ihItAtmA na veda jagadIdR^isham || 37||
AsInaH paryaTannashnan shayAnaH prapiban bruvan |
nAnusandhatta etAni govindaparirambhitaH || 38||
kvachidrudati vaikuNThachintAshabalachetanaH |
kvachiddhasati tachchintAhlAda udgAyati kvachit || 39||
nadati kvachidutkaNTho vilajjo nR^ityati kvachit |
kvachittadbhAvanAyuktastanmayo.anuchakAra ha || 40||
kvachidutpulakastUShNImAste saMsparshanirvR^itaH |
aspandapraNayAnandasalilAmIlitekShaNaH || 41||
sa uttamashlokapadAravindayo\-
rniShevayAki~nchanasa~NgalabdhayA |
tanvan parAM nirvR^itimAtmano muhu\-
rduHsa~NgadInAnyamanaHshamaM vyadhAt || 42||
tasmin mahAbhAgavate mahAbhAge mahAtmani |
hiraNyakashipU rAjannakarodaghamAtmaje || 43||
yudhiShThira uvAcha
devarSha etadichChAmo vedituM tava suvrata |
yadAtmajAya shuddhAya pitAdAtsAdhave hyagham || 44||
putrAn vipratikUlAn svAn pitaraH putravatsalAH |
upAlabhante shikShArthaM naivAghamaparo yathA || 45||
kimutAnuvashAn sAdhUMstAdR^ishAn gurudevatAn |
etatkautUhalaM brahmannasmAkaM vidhama prabho |
pituH putrAya yaddveSho maraNAya prayojitaH || 46||
iti shrImadbhAgavate mahApurANe pAramahaMsyAM saMhitAyAM
saptamaskandhe prahlAdacharite chaturtho.adhyAyaH || 4||
\iti
\section{.. OM namo bhagavate vAsudevAya ..}
\section{.. pa~nchamo.adhyAyaH \- 5 ..}
nArada uvAcha
paurohityAya bhagavAn vR^itaH kAvyaH kilAsuraiH |
ShaNDAmarkau sutau tasya daityarAjagR^ihAntike || 1||
tau rAj~nA prApitaM bAlaM prahlAdaM nayakovidam |
pAThayAmAsatuH pAThyAnanyAMshchAsurabAlakAn || 2||
yattatra guruNA proktaM shushruve.anupapATha cha |
na sAdhu manasA mene svaparAsadgrahAshrayam || 3||
ekadAsurarAT putrama~NkamAropya pANDava |
paprachCha kathyatAM vatsa manyate sAdhu yadbhavAn || 4||
prahlAda uvAcha
tatsAdhu manye.asuravarya dehinAM
sadA samudvignadhiyAmasadgrahAt |
hitvA.a.atmapAtaM gR^ihamandhakUpaM
vanaM gato yaddharimAshrayeta || 5||
nArada uvAcha
shrutvA putragiro daityaH parapakShasamAhitAH |
jahAsa buddhirbAlAnAM bhidyate parabuddhibhiH || 6||
samyagvidhAryatAM bAlo gurugehe dvijAtibhiH |
viShNupakShaiH pratichChannairna bhidyetAsya dhIryathA || 7||
gR^ihamAnItamAhUya prahlAdaM daityayAjakAH |
prashasya shlakShNayA vAchA samapR^ichChanta sAmabhiH || 8||
vatsa prahlAda bhadraM te satyaM kathaya mA mR^iShA |
bAlAnati kutastubhyameSha buddhiviparyayaH || 9||
buddhibhedaH parakR^ita utAho te svato.abhavat |
bhaNyatAM shrotukAmAnAM gurUNAM kulanandana || 10||
prahlAda uvAcha
svaH parashchetyasadgrAhaH puMsAM yanmAyayA kR^itaH |
vimohitadhiyAM dR^iShTastasmai bhagavate namaH || 11||
sa yadAnuvrataH puMsAM pashubuddhirvibhidyate |
anya eSha tathAnyo.ahamiti bhedagatAsatI || 12||
sa eSha AtmA svaparetyabuddhibhi\-
rduratyayAnukramaNo nirUpyate |
muhyanti yadvartmani vedavAdino
brahmAdayo hyeSha bhinatti me matim || 13||
yathA bhrAmyatyayo brahman svayamAkarShasannidhau |
tathA me bhidyate chetashchakrapANeryadR^ichChayA || 14||
nArada uvAcha
etAvadbrAhmaNAyoktvA virarAma mahAmatiH |
taM nirbhartsyAtha kupitaH sudIno rAjasevakaH || 15||
AnIyatAmare vetramasmAkamayashaskaraH |
kulA~NgArasya durbuddheshchaturtho.asyodito damaH || 16||
daiteyachandanavane jAto.ayaM kaNTakadrumaH |
yanmUlonmUlaparashorviShNornAlAyito.arbhakaH || 17||
iti taM vividhopAyairbhIShayaMstarjanAdibhiH |
prahlAdaM grAhayAmAsa trivargasyopapAdanam || 18||
tata enaM gururj~nAtvA j~nAtaj~neyachatuShTayam |
daityendraM darshayAmAsa mAtR^imR^iShTamala~NkR^itam || 19||
pAdayoH patitaM bAlaM pratinandyAshiShAsuraH |
pariShvajya chiraM dorbhyAM paramAmApa nirvR^itim || 20||
AropyA~NkamavaghrAya mUrdhanyashrukalAmbubhiH |
Asi~nchan vikasadvaktramidamAha yudhiShThira || 21||
hiraNyakashipuruvAcha
prahlAdAnUchyatAM tAta svadhItaM ki~nchiduttamam |
kAlenaitAvatA.a.ayuShman yadashikShadgurorbhavAn || 22||
prahlAda uvAcha
shravaNaM kIrtanaM viShNoH smaraNaM pAdasevanam |
archanaM vandanaM dAsyaM sakhyamAtmanivedanam || 23||
iti puMsArpitA viShNau bhaktishchennavalakShaNA |
kriyeta bhagavatyaddhA tanmanye.adhItamuttamam || 24||
nishamyaitatsutavacho hiraNyakashipustadA |
guruputramuvAchedaM ruShA prasphuritAdharaH || 25||
brahmabandho kimetatte vipakShaM shrayatAsatA |
asAraM grAhito bAlo mAmanAdR^itya durmate || 26||
santi hyasAdhavo loke durmaitrAshChadmaveShiNaH |
teShAmudetyaghaM kAle rogaH pAtakinAmiva || 27||
guruputra uvAcha
na matpraNItaM na parapraNItaM
suto vadatyeSha tavendrashatro |
naisargikIyaM matirasya rAjan
niyachCha manyuM kadadAH sma mA naH || 28||
nArada uvAcha
guruNaivaM pratiprokto bhUya AhAsuraH sutam |
na chedgurumukhIyaM te kuto.abhadrAsatI matiH || 29||
prahlAda uvAcha
matirna kR^iShNe parataH svato vA
mitho.abhipadyeta gR^ihavratAnAm |
adAntagobhirvishatAM tamisraM
punaH punashcharvitacharvaNAnAm || 30||
na te viduH svArthagatiM hi viShNuM
durAshayA ye bahirarthamAninaH |
andhA yathAndhairupanIyamAnA
vAchIshatantyAmurudAmni baddhAH || 31||
naiShAM matistAvadurukramA~NghriM
spR^ishatyanarthApagamo yadarthaH |
mahIyasAM pAdarajo.abhiShekaM
niShki~nchanAnAM na vR^iNIta yAvat || 32||
ityuktvoparataM putraM hiraNyakashipU ruShA |
andhIkR^itAtmA svotsa~NgAnnirasyata mahItale || 33||
AhAmarSharuShA.a.aviShTaH kaShAyIbhUtalochanaH |
vadhyatAmAshvayaM vadhyo niHsArayata nairR^itAH || 34||
ayaM me bhrAtR^ihA so.ayaM hitvA svAn suhR^ido.adhamaH |
pitR^ivyahanturyaH pAdau viShNordAsavadarchati || 35||
viShNorvA sAdhvasau kiM nu kariShyatyasama~njasaH |
sauhR^idaM dustyajaM pitrorahAdyaH pa~nchahAyanaH || 36||
paro.apyapatyaM hitakR^idyathauShadhaM
svadehajo.apyAmayavatsuto.ahitaH |
ChindyAttada~NgaM yadutAtmano.ahitaM
sheShaM sukhaM jIvati yadvivarjanAt || 37||
sarvairupAyairhantavyaH sambhojashayanAsanaiH |
suhR^illi~NgadharaH shatrurmunerduShTamivendriyam || 38||
nairR^itAste samAdiShTA bhartrA vai shUlapANayaH |
tigmadaMShTrakarAlAsyAstAmrashmashrushiroruhAH || 39||
nadanto bhairavAnnAdAn Chindhi bhindhIti vAdinaH |
AsInaM chAhanan shUlaiH prahlAdaM sarvamarmasu || 40||
pare brahmaNyanirdeshye bhagavatyakhilAtmani |
yuktAtmanyaphalA AsannapuNyasyeva satkriyAH || 41||
prayAse.apahate tasmin daityendraH parisha~NkitaH |
chakAra tadvadhopAyAn nirbandhena yudhiShThira || 42||
diggajairdandashUkaishcha abhichArAvapAtanaiH |
mAyAbhiH sannirodhaishcha garadAnairabhojanaiH || 43||
himavAyvagnisalilaiH parvatAkramaNairapi |
na shashAka yadA hantumapApamasuraH sutam |
chintAM dIrghatamAM prAptastatkartuM nAbhyapadyata || 44||
eSha me bahvasAdhUkto vadhopAyAshcha nirmitAH |
taistairdrohairasaddharmairmuktaH svenaiva tejasA || 45||
vartamAno.avidUre vai bAlo.apyajaDadhIrayam |
na vismarati me.anAryaM shunaHshepa iva prabhuH || 46||
aprameyAnubhAvo.ayamakutashchidbhayo.amaraH |
nUnametadvirodhena mR^ityurme bhavitA na vA || 47||
iti tachchintayA ki~nchinmlAnashriyamadhomukham |
shaNDAmarkAvaushanasau vivikta iti hochatuH || 48||
jitaM tvayaikena jagattrayaM bhruvo\-
rvijR^imbhaNatrastasamastadhiShNyapam |
na tasya chintyaM tava nAtha chakShmahe
na vai shishUnAM guNadoShayoH padam || 49||
imaM tu pAshairvaruNasya baddhvA
nidhehi bhIto na palAyate yathA |
buddhishcha puMso vayasA.a.aryasevayA
yAvadgururbhArgava AgamiShyati || 50||
tatheti guruputroktamanuj~nAyedamabravIt |
dharmA hyasyopadeShTavyA rAj~nAM yo gR^ihamedhinAm || 51||
dharmamarthaM cha kAmaM cha nitarAM chAnupUrvashaH |
prahlAdAyochatU rAjan prashritAvanatAya cha || 52||
yathA trivargaM gurubhirAtmane upashikShitam |
na sAdhu mene tachChikShAM dvandvArAmopavarNitAm || 53||
yadA.a.achAryaH parAvR^itto gR^ihamedhIyakarmasu |
vayasyairbAlakaistatra sopahUtaH kR^itakShaNaiH || 54||
atha tAn shlakShNayA vAchA pratyAhUya mahAbudhaH |
uvAcha vidvAMstanniShThAM kR^ipayA prahasanniva || 55||
te tu tadgauravAtsarve tyaktakrIDAparichChadAH |
bAlA na dUShitadhiyo dvandvArAmeritehitaiH || 56||
paryupAsata rAjendra tannyastahR^idayekShaNAH |
tAnAha karuNo maitro mahAbhAgavato.asuraH || 57||
iti shrImadbhAgavate mahApurANe pAramahaMsyAM saMhitAyAM
saptamaskandhe prahlAdacharite pa~nchamo.adhyAyaH || 5||
\iti
\section{.. OM namo bhagavate vAsudevAya ..}
\section{.. ShaShTho.adhyAyaH \- 6 ..}
prahlAda uvAcha
kaumAra AcharetprAj~no dharmAn bhAgavatAniha |
durlabhaM mAnuShaM janma tadapyadhruvamarthadam || 1||
yathA hi puruShasyeha viShNoH pAdopasarpaNam |
yadeSha sarvabhUtAnAM priya AtmeshvaraH suhR^it || 2||
sukhamaindriyakaM daityA dehayogena dehinAm |
sarvatra labhyate daivAdyathA duHkhamayatnataH || 3||
tatprayAso na kartavyo yata AyurvyayaH param |
na tathA vindate kShemaM mukundacharaNAmbujam || 4||
tato yateta kushalaH kShemAya bhayamAshritaH |
sharIraM pauruShaM yAvanna vipadyeta puShkalam || 5||
puMso varShashataM hyAyustadardhaM chAjitAtmanaH |
niShphalaM yadasau rAtryAM shete.andhaM prApitastamaH || 6||
mugdhasya bAlye kaumAre krIDato yAti viMshatiH |
jarayA grastadehasya yAtyakalpasya viMshatiH || 7||
durApUreNa kAmena mohena cha balIyasA |
sheShaM gR^iheShu saktasya pramattasyApayAti hi || 8||
ko gR^iheShu pumAn saktamAtmAnamajitendriyaH |
snehapAshairdR^iDhairbaddhamutsaheta vimochitum || 9||
ko nvarthatR^iShNAM visR^ijetprANebhyo.api ya IpsitaH |
yaM krINAtyasubhiH preShThaistaskaraH sevako vaNik || 10||
kathaM priyAyA anukampitAyAH
sa~NgaM rahasyaM ruchirAMshcha mantrAn |
suhR^itsu tatsnehasitaH shishUnAM
kalAkSharANAmanuraktachittaH || 11||
putrAn smaraMstA duhitR^IrhR^idayyA
bhrAtR^In svasR^IrvA pitarau cha dInau |
gR^ihAn manoj~noruparichChadAMshcha
vR^ittIshcha kulyAH pashubhR^ityavargAn || 12||
tyajeta koshaskR^idivehamAnaH
karmANi lobhAdavitR^iptakAmaH |
aupasthyajaihvyaM bahu manyamAnaH
kathaM virajyeta durantamohaH || 13||
kuTumbapoShAya viyannijAyu\-
rna budhyate.arthaM vihataM pramattaH |
sarvatra tApatrayaduHkhitAtmA
nirvidyate na svakuTumbarAmaH || 14||
vitteShu nityAbhiniviShTachetA
vidvAMshcha doShaM paravittahartuH |
pretyeha chAthApyajitendriyasta\-
dashAntakAmo harate kuTumbI || 15||
vidvAnapItthaM danujAH kuTumbaM
puShNan svalokAya na kalpate vai |
yaH svIyapArakyavibhinnabhAva\-
stamaH prapadyeta yathA vimUDhaH || 16||
yato na kashchitkva cha kutrachidvA
dInaH svamAtmAnamalaM samarthaH |
vimochituM kAmadR^ishAM vihAra\-
krIDAmR^igo yannigaDo visargaH || 17||
tato vidUrAtparihR^itya daityA
daityeShu sa~NgaM viShayAtmakeShu |
upeta nArAyaNamAdidevaM
sa muktasa~NgairiShito.apavargaH || 18||
na hyachyutaM prINayato bahvAyAso.asurAtmajAH |
AtmatvAtsarvabhUtAnAM siddhatvAdiha sarvataH || 19||
parAvareShu bhUteShu brahmAntasthAvarAdiShu |
bhautikeShu vikAreShu bhUteShvatha mahatsu cha || 20||
guNeShu guNasAmye cha guNavyatikare tathA |
eka eva paro hyAtmA bhagavAnIshvaro.avyayaH || 21||
pratyagAtmasvarUpeNa dR^ishyarUpeNa cha svayam |
vyApyavyApakanirdeshyo hyanirdeshyo.avikalpitaH || 22||
kevalAnubhavAnandasvarUpaH parameshvaraH |
mAyayAntarhitaishvarya Iyate guNasargayA || 23||
tasmAtsarveShu bhUteShu dayAM kuruta sauhR^idam |
AsuraM bhAvamunmuchya yayA tuShyatyadhokShajaH || 24||
tuShTe cha tatra kimalabhyamananta Adye
kiM tairguNavyatikarAdiha ye svasiddhAH |
dharmAdayaH kimaguNena cha kA~NkShitena
sAra~njuShAM charaNayorupagAyatAM naH || 25||
dharmArthakAma iti yo.abhihitastrivarga
IkShA trayI nayadamau vividhA cha vArtA |
manye tadetadakhilaM nigamasya satyaM
svAtmArpaNaM svasuhR^idaH paramasya puMsaH || 26||
j~nAnaM tadetadamalaM duravApamAha
nArAyaNo narasakhaH kila nAradAya |
ekAntinAM bhagavatastadaki~nchanAnAM
pAdAravindarajasA.a.aplutadehinAM syAt || 27||
shrutametanmayA pUrvaM j~nAnaM vij~nAnasaMyutam |
dharmaM bhAgavataM shuddhaM nAradAddevadarshanAt || 28||
daityaputrA UchuH
prahlAda tvaM vayaM chApi nartenyaM vidmahe gurum |
etAbhyAM guruputrAbhyAM bAlAnAmapi hIshvarau || 29||
bAlasyAntaHpurasthasya mahatsa~Ngo duranvayaH |
Chindhi naH saMshayaM saumya syAchchedvishrambhakAraNam || 30||
iti shrImadbhAgavate mahApurANe pAramahaMsyAM
saMhitAyAM saptamaskandhe prahlAdacharite ShaShTho.adhyAyaH || 6||
\iti
\section{.. OM namo bhagavate vAsudevAya ..}
\section{.. saptamo.adhyAyaH \- 7 ..}
nArada uvAcha
evaM daityasutaiH pR^iShTo mahAbhAgavato.asuraH |
uvAcha smayamAnastAn smaran madanubhAShitam || 1||
prahlAda uvAcha
pitari prasthite.asmAkaM tapase mandarAchalam |
yuddhodyamaM paraM chakrurvibudhA dAnavAn prati || 2||
pipIlikairahiriva diShTyA lokopatApanaH |
pApena pApo.abhakShIti vAdino vAsavAdayaH || 3||
teShAmatibalodyogaM nishamyAsurayUthapAH |
vadhyamAnAH surairbhItA dudruvuH sarvato disham || 4||
kalatraputramitrAptAn gR^ihAn pashuparichChadAn |
nAvekShyamANAstvaritAH sarve prANaparIpsavaH || 5||
vyalumpan rAjashibiramamarA jayakA~NkShiNaH |
indrastu rAjamahiShIM mAtaraM mama chAgrahIt || 6||
nIyamAnAM bhayodvignAM rudatIM kurarImiva |
yadR^ichChayA.a.agatastatra devarShirdadR^ishe pathi || 7||
prAha mainAM surapate netumarhasyanAgasam |
mu~ncha mu~ncha mahAbhAga satIM paraparigraham || 8||
indra uvAcha
Aste.asyA jaThare vIryamaviShahyaM suradviShaH |
AsyatAM yAvatprasavaM mokShye.arthapadavIM gataH || 9||
nArada uvAcha
ayaM niShkilbiShaH sAkShAnmahAbhAgavato mahAn |
tvayA na prApsyate saMsthAmanantAnucharo balI || 10||
ityuktastAM vihAyendro devarShermAnayan vachaH |
anantapriyabhaktyainAM parikramya divaM yayau || 11||
tato no mAtaramR^iShiH samAnIya nijAshramam |
AshvAsyehoShyatAM vatse yAvatte bharturAgamaH || 12||
tathetyavAtsIddevarSheranti sApyakutobhayA |
yAvaddaityapatirghorAttapaso na nyavartata || 13||
R^iShiM paryacharattatra bhaktyA paramayA satI |
antarvartnI svagarbhasya kShemAyechChAprasUtaye || 14||
R^iShiH kAruNikastasyAH prAdAdubhayamIshvaraH |
dharmasya tattvaM j~nAnaM cha mAmapyuddishya nirmalam || 15||
tattu kAlasya dIrghatvAtstrItvAnmAtustirodadhe |
R^iShiNAnugR^ihItaM mAM nAdhunApyajahAtsmR^itiH || 16||
bhavatAmapi bhUyAnme yadi shraddadhate vachaH |
vaishAradI dhIH shraddhAtaH strIbAlAnAM cha me yathA || 17||
janmAdyAH ShaDime bhAvA dR^iShTA dehasya nAtmanaH |
phalAnAmiva vR^ikShasya kAleneshvaramUrtinA || 18||
AtmA nityo.avyayaH shuddha ekaH kShetraj~na AshrayaH |
avikriyaH svadR^ig heturvyApako.asa~NgyanAvR^itaH || 19||
etairdvAdashabhirvidvAnAtmano lakShaNaiH paraiH |
ahaM mametyasadbhAvaM dehAdau mohajaM tyajet || 20||
svarNaM yathA grAvasu hemakAraH
kShetreShu yogaistadabhij~na ApnuyAt |
kShetreShu deheShu tathAtmayogai\-
radhyAtmavidbrahmagatiM labheta || 21||
aShTau prakR^itayaH proktAstraya eva hi tadguNAH |
vikArAH ShoDashAchAryaiH pumAnekaH samanvayAt || 22||
dehastu sarvasa~NghAto jagattasthuriti dvidhA |
atraiva mR^igyaH puruSho neti netItyatattyajan || 23||
anvayavyatirekeNa vivekenoshatAtmanA |
sargasthAnasamAmnAyairvimR^ishadbhirasatvaraiH || 24||
buddherjAgaraNaM svapnaH suShuptiriti vR^ittayaH |
tA yenaivAnubhUyante so.adhyakShaH puruShaH paraH || 25||
ebhistrivarNaiH paryastairbuddhibhedaiH kriyodbhavaiH |
svarUpamAtmano budhyedgandhairvAyumivAnvayAt || 26||
etaddvAro hi saMsAro guNakarmanibandhanaH |
aj~nAnamUlo.apArtho.api puMsaH svapna iveShyate || 27||
tasmAdbhavadbhiH kartavyaM karmaNAM triguNAtmanAm |
bIjanirharaNaM yogaH pravAhoparamo dhiyaH || 28||
tatropAyasahasrANAmayaM bhagavatoditaH |
yadIshvare bhagavati yathA yaira~njasA ratiH || 29||
gurushushrUShayA bhaktyA sarvalabdhArpaNena cha |
sa~Ngena sAdhubhaktAnAmIshvarArAdhanena cha || 30||
shraddhayA tatkathAyAM cha kIrtanairguNakarmaNAm |
tatpAdAmburuhadhyAnAttalli~NgekShArhaNAdibhiH || 31||
hariH sarveShu bhUteShu bhagavAnAsta IshvaraH |
iti bhUtAni manasA kAmaistaiH sAdhu mAnayet || 32||
evaM nirjitaShaDvargaiH kriyate bhaktirIshvare |
vAsudeve bhagavati yayA saMlabhate ratim || 33||
nishamya karmANi guNAnatulyAn
vIryANi lIlAtanubhiH kR^itAni |
yadAtiharShotpulakAshrugadgadaM
protkaNTha udgAyati rauti nR^ityati || 34||
yadA grahagrasta iva kvachiddhasa\-
tyAkrandate dhyAyati vandate janam |
muhuH shvasan vakti hare jagatpate
nArAyaNetyAtmamatirgatatrapaH || 35||
tadA pumAn muktasamastabandhana\-
stadbhAvabhAvAnukR^itAshayAkR^itiH |
nirdagdhabIjAnushayo mahIyasA
bhaktiprayogeNa sametyadhokShajam || 36||
adhokShajAlambhamihAshubhAtmanaH
sharIriNaH saMsR^itichakrashAtanam |
tadbrahmanirvANasukhaM vidurbudhA\-
stato bhajadhvaM hR^idaye hR^idIshvaram || 37||
ko.atiprayAso.asurabAlakA hare\-
rupAsane sve hR^idi ChidravatsataH |
svasyAtmanaH sakhyurasheShadehinAM
sAmAnyataH kiM viShayopapAdanaiH || 38||
rAyaH kalatraM pashavaH sutAdayo
gR^ihA mahI ku~njarakoshabhUtayaH |
sarve.arthakAmAH kShaNabha~NgurAyuShaH
kurvanti martyasya kiyatpriyaM chalAH || 39||
evaM hi lokAH kratubhiH kR^itA amI
kShayiShNavaH sAtishayA na nirmalAH |
tasmAdadR^iShTashrutadUShaNaM paraM
bhaktyaikayeshaM bhajatAtmalabdhaye || 40||
yadadhyarthyeha karmANi vidvanmAnyasakR^innaraH |
karotyato viparyAsamamoghaM vindate phalam || 41||
sukhAya duHkhamokShAya sa~Nkalpa iha karmiNaH |
sadA.a.apnotIhayA duHkhamanIhAyAH sukhAvR^itaH || 42||
kAmAn kAmayate kAmyairyadarthamiha pUruShaH |
sa vai dehastu pArakyo bha~Nguro yAtyupaiti cha || 43||
kimu vyavahitApatyadArAgAradhanAdayaH |
rAjyaM koshagajAmAtyabhR^ityAptA mamatAspadAH || 44||
kimetairAtmanastuchChaiH saha dehena nashvaraiH |
anarthairarthasa~NkAshairnityAnandamahodadheH || 45||
nirUpyatAmiha svArthaH kiyAn dehabhR^ito.asurAH |
niShekAdiShvavasthAsu klishyamAnasya karmabhiH || 46||
karmANyArabhate dehI dehenAtmAnuvartinA |
karmabhistanute dehamubhayaM tvavivekataH || 47||
tasmAdarthAshcha kAmAshcha dharmAshcha yadapAshrayAH |
bhajatAnIhayA.a.atmAnamanIhaM harimIshvaram || 48||
sarveShAmapi bhUtAnAM harirAtmeshvaraH priyaH |
bhUtairmahadbhiH svakR^itaiH kR^itAnAM jIvasa.nj~nitaH || 49||
devo.asuro manuShyo vA yakSho gandharva eva cha |
bhajan mukundacharaNaM svastimAn syAdyathA vayam || 50||
nAlaM dvijatvaM devatvamR^iShitvaM vAsurAtmajAH |
prINanAya mukundasya na vR^ittaM na bahuj~natA || 51||
na dAnaM na tapo nejyA na shauchaM na vratAni cha |
prIyate.amalayA bhaktyA hariranyadviDambanam || 52||
tato harau bhagavati bhaktiM kuruta dAnavAH |
Atmaupamyena sarvatra sarvabhUtAtmanIshvare || 53||
daiteyA yakSharakShAMsi striyaH shUdrA vrajaukasaH |
khagA mR^igAH pApajIvAH santi hyachyutatAM gatAH || 54||
etAvAneva loke.asmin puMsaH svArthaH paraH smR^itaH |
ekAntabhaktirgovinde yatsarvatra tadIkShaNam || 55||
iti shrImadbhAgavate mahApurANe pAramahaMsyAM saMhitAyAM saptamaskandhe
prahlAdAnucharite daityaputrAnushAsanaM nAma saptamo.adhyAyaH || 7||
\iti
\section{.. OM namo bhagavate vAsudevAya ..}
\section{.. aShTamo.adhyAyaH \- 8 ..}
nArada uvAcha
atha daityasutAH sarve shrutvA tadanuvarNitam |
jagR^ihurniravadyatvAnnaiva gurvanushikShitam || 1||
athAchAryasutasteShAM buddhimekAntasaMsthitAm |
AlakShya bhItastvarito rAj~na AvedayadyathA || 2||
shrutvA tadapriyaM daityo duHsahaM tanayAnayam |
kopAveshachaladgAtraH putraM hantuM mano dadhe || 3||
kShiptvA paruShayA vAchA prahlAdamatadarhaNam |
AhekShamANaH pApena tirashchInena chakShuShA || 4||
prashrayAvanataM dAntaM baddhA~njalimavasthitam |
sarpaH padAhata iva shvasan prakR^itidAruNaH || 5||
he durvinIta mandAtman kulabhedakarAdhama |
stabdhaM machChAsanoddhUtaM neShye tvAdya yamakShayam || 6||
kruddhasya yasya kampante trayo lokAH saheshvarAH |
tasya me.abhItavanmUDha shAsanaM kiM balo.atyagAH || 7||
prahlAda uvAcha
na kevalaM me bhavatashcha rAjan
sa vai balaM balinAM chApareShAm |
pare.avare.amI sthiraja~NgamA ye
brahmAdayo yena vashaM praNItAH || 8||
sa IshvaraH kAla urukramo.asA\-
vojaHsahaHsattvabalendriyAtmA |
sa eva vishvaM paramaH svashaktibhiH
sR^ijatyavatyatti guNatrayeshaH || 9||
jahyAsuraM bhAvamimaM tvamAtmanaH
samaM mano dhatsva na santi vidviShaH |
R^ite.ajitAdAtmana utpathasthitA\-
ttaddhi hyanantasya mahatsamarhaNam || 10||
dasyUn purA ShaN na vijitya lumpato
manyanta eke svajitA disho dasha |
jitAtmano j~nasya samasya dehinAM
sAdhoH svamohaprabhavAH kutaH pare || 11||
hiraNyakashipuruvAcha
vyaktaM tvaM martukAmo.asi yo.atimAtraM vikatthase |
mumUrShUNAM hi mandAtman nanu syurviplavA giraH || 12||
yastvayA mandabhAgyokto madanyo jagadIshvaraH |
kvAsau yadi sa sarvatra kasmAtstambhe na dR^ishyate || 13||
so.ahaM vikatthamAnasya shiraH kAyAddharAmi te |
gopAyeta haristvAdya yaste sharaNamIpsitam || 14||
evaM duruktairmuhurardayan ruShA
sutaM mahAbhAgavataM mahAsuraH |
khaDgaM pragR^ihyotpatito varAsanA\-
tstambhaM tatADAtibalaH svamuShTinA || 15||
tadaiva tasminninado.atibhIShaNo
babhUva yenANDakaTAhamasphuTat |
yaM vai svadhiShNyopagataM tvajAdayaH
shrutvA svadhAmAtyayama~Nga menire || 16||
sa vikraman putravadhepsurojasA
nishamya nirhrAdamapUrvamadbhutam |
antaHsabhAyAM na dadarsha tatpadaM
vitatrasuryena surAriyUthapAH || 17||
satyaM vidhAtuM nijabhR^ityabhAShitaM
vyAptiM cha bhUteShvakhileShu chAtmanaH |
adR^ishyatAtyadbhutarUpamudvahan
stambhe sabhAyAM na mR^igaM na mAnuSham || 18||
sa sattvamenaM parito.api pashyan
stambhasya madhyAdanu nirjihAnam |
nAyaM mR^igo nApi naro vichitra\-
maho kimetannR^imR^igendrarUpam || 19||
mImAMsamAnasya samutthito.agrato
nR^isiMharUpastadalaM bhayAnakam |
prataptachAmIkarachaNDalochanaM
sphuratsaTAkesarajR^imbhitAnanam || 20||
karAladaMShTraM karavAlacha~nchala\-
kShurAntajihvaM bhrukuTImukholbaNam |
stabdhordhvakarNaM girikandarAdbhuta\-
vyAttAsyanAsaM hanubhedabhIShaNam || 21||
divispR^ishatkAyamadIrghapIvara\-
grIvoruvakShaHsthalamalpamadhyamam |
chandrAMshugauraishChuritaM tanUruhai\-
rviShvagbhujAnIkashataM nakhAyudham || 22||
durAsadaM sarvanijetarAyudha\-
pravekavidrAvitadaityadAnavam |
prAyeNa me.ayaM hariNorumAyinA
vadhaH smR^ito.anena samudyatena kim || 23||
evaM bruvaMstvabhyapatadgadAyudho
nadan nR^isiMhaM prati daityaku~njaraH |
alakShito.agnau patitaH pata~Ngamo
yathA nR^isiMhaujasi so.asurastadA || 24||
na tadvichitraM khalu sattvadhAmani
svatejasA yo nu purApibattamaH |
tato.abhipadyAbhyahananmahAsuro
ruShA nR^isiMhaM gadayoruvegayA || 25||
taM vikramantaM sagadaM gadAdharo
mahoragaM tArkShyasuto yathAgrahIt |
sa tasya hastotkalitastadAsuro
vikrIDato yadvadahirgarutmataH || 26||
asAdhvamanyanta hR^itaukaso.amarA
ghanachChadA bhArata sarvadhiShNyapAH |
taM manyamAno nijavIryasha~NkitaM
yaddhastamukto nR^ihariM mahAsuraH |
punastamAsajjata khaDgacharmaNI
pragR^ihya vegena jitashramo mR^idhe || 27||
taM shyenavegaM shatachandravartmabhi\-
shcharantamachChidramuparyadho hariH |
kR^itvATTahAsaM kharamutsvanolbaNaM
nimIlitAkShaM jagR^ihe mahAjavaH || 28||
viShvaksphurantaM grahaNAturaM hari\-
rvyAlo yathA.a.akhuM kulishAkShatatvacham |
dvAryUra ApAtya dadAra lIlayA
nakhairyathAhiM garuDo mahAviSham || 29||
saMrambhaduShprekShyakarAlalochano
vyAttAnanAntaM vilihan svajihvayA |
asR^iglavAktAruNakesarAnano
yathAntramAlI dvipahatyayA hariH || 30||
nakhA~NkurotpATitahR^itsaroruhaM
visR^ijya tasyAnucharAnudAyudhAn |
ahan samantAnnakhashastrapArShNibhi\-
rdordaNDayUtho.anupathAn sahasrashaH || 31||
saTAvadhUtA jaladAH parApatan
grahAshcha taddR^iShTivimuShTarochiShaH |
ambhodhayaH shvAsahatA vichukShubhu\-
rnirhrAdabhItA digibhA vichukrushuH || 32||
dyaustatsaTotkShiptavimAnasa~NkulA
protsarpata kShmA cha padAbhipIDitA |
shailAH samutpeturamuShya raMhasA
tattejasA khaM kakubho na rejire || 33||
tataH sabhAyAmupaviShTamuttame
nR^ipAsane sambhR^itatejasaM vibhum |
alakShitadvairathamatyamarShaNaM
prachaNDavaktraM na babhAja kashchana || 34||
nishAmya lokatrayamastakajvaraM
tamAdidaityaM hariNA hataM mR^idhe |
praharShavegotkalitAnanA muhuH
prasUnavarShairvavR^iShuH surastriyaH || 35||
tadA vimAnAvalibhirnabhastalaM
didR^ikShatAM sa~NkulamAsa nAkinAm |
surAnakA dundubhayo.atha jaghnire
gandharvamukhyA nanR^iturjaguH striyaH || 36||
tatropavrajya vibudhA brahmendragirishAdayaH |
R^iShayaH pitaraH siddhA vidyAdharamahoragAH || 37||
manavaH prajAnAM patayo gandharvApsarachAraNAH |
yakShAH kimpuruShAstAta vetAlAH siddhakinnarAH || 38||
te viShNupArShadAH sarve sunandakumudAdayaH |
mUrdhni baddhA~njalipuTA AsInaM tIvratejasam |
IDire narashArdulaM nAtidUracharAH pR^ithak || 39||
brahmovAcha
nato.asmyanantAya durantashaktaye
vichitravIryAya pavitrakarmaNe |
vishvasya sargasthitisaMyamAn guNaiH
svalIlayA sandadhate.avyayAtmane || 40||
shrIrudra uvAcha
kopakAlo yugAntaste hato.ayamasuro.alpakaH |
tatsutaM pAhyupasR^itaM bhaktaM te bhaktavatsala || 41||
indra uvAcha
pratyAnItAH parama bhavatA trAyatA naH svabhAgA
daityAkrAntaM hR^idayakamalaM tvadgR^ihaM pratyabodhi |
kAlagrastaM kiyadidamaho nAtha shushrUShatAM te
muktisteShAM na hi bahumatA nArasiMhAparaiH kim || 42||
R^iShaya UchuH
tvaM nastapaH paramamAttha yadAtmatejo
yenedamAdipuruShAtmagataM sasarja |
tadvipraluptamamunAdya sharaNyapAla
rakShAgR^ihItavapuShA punaranvamaMsthAH || 43||
pitara UchuH
shrAddhAni no.adhibubhuje prasabhaM tanUjai\-
rdattAni tIrthasamaye.apyapibattilAmbu |
tasyodarAnnakhavidIrNavapAdya ArchCha\-
ttasmai namo nR^iharaye.akhiladharmagoptre || 44||
siddhA UchuH
yo no gatiM yogasiddhAmasAdhu\-
rahArShIdyogatapobalena |
nAnAdarpaM taM nakhairnirdadAra
tasmai tubhyaM praNatAH smo nR^isiMha || 45||
vidyAdharA UchuH
vidyAM pR^ithagdhAraNayAnurAddhAM
nyaShedhadaj~no balavIryadR^iptaH |
sa yena sa~Nkhye pashuvaddhatastaM
mAyAnR^isiMhaM praNatAH sma nityam || 46||
nAgA UchuH
yena pApena ratnAni strIratnAni hR^itAni naH |
tadvakShaHpATanenAsAM dattAnanda namo.astu te || 47||
manava UchuH
manavo vayaM tava nideshakAriNo
ditijena deva paribhUtasetavaH |
bhavatA khalaH sa upasaMhR^itaH prabho
karavAma te kimanushAdhi ki~NkarAn || 48||
prajApataya UchuH
prajeshA vayaM te pareshAbhisR^iShTA
na yena prajA vai sR^ijAmo niShiddhAH |
sa eSha tvayA bhinnavakShA nu shete
jaganma~NgalaM sattvamUrte.avatAraH || 49||
gandharvA UchuH
vayaM vibho te naTanATyagAyakA
yenAtmasAdvIryabalaujasA kR^itAH |
sa eSha nIto bhavatA dashAmimAM
kimutpathasthaH kushalAya kalpate || 50||
chAraNA UchuH
hare tavA~Nghripa~NkajaM bhavApavargamAshritAH |
yadeSha sAdhuhR^ichChayastvayAsuraH samApitaH || 51||
yakShA UchuH
vayamanucharamukhyAH karmabhiste manoj~nai\-
sta iha ditisutena prApitA vAhakatvam |
sa tu janaparitApaM tatkR^itaM jAnatA te
narahara upanItaH pa~nchatAM pa~nchaviMsha || 52||
kimpuruShA UchuH
vayaM kimpuruShAstvaM tu mahApuruSha IshvaraH |
ayaM kupuruSho naShTo dhikkR^itaH sAdhubhiryadA || 53||
vaitAlikA UchuH
sabhAsu satreShu tavAmalaM yasho
gItvA saparyAM mahatIM labhAmahe |
yastAM vyanaiShIdbhR^ishameSha durjano
diShTyA hataste bhagavan yathA.a.amayaH || 54||
kinnarA UchuH
vayamIsha kinnaragaNAstavAnugA
ditijena viShTimamunAnukAritAH |
bhavatA hare sa vR^ijino.avasAdito
narasiMha nAtha vibhavAya no bhava || 55||
viShNupArShadA UchuH
adyaitaddharinararUpamadbhutaM te
dR^iShTaM naH sharaNada sarvalokasharma |
so.ayaM te vidhikara Isha viprashapta\-
stasyedaM nidhanamanugrahAya vidmaH || 56||
iti shrImadbhAgavate mahApurANe pAramahaMsyAM saMhitAyAM saptamaskandhe
prahlAdAnucharite daityarAjavadhe narasiMhastavo nAmAShTamo.adhyAyaH || 8||
\iti
\section{.. OM namo bhagavate vAsudevAya ..}
\section{.. navamo.adhyAyaH \- 9 ..}
nArada uvAcha
evaM surAdayaH sarve brahmarudrapuraHsarAH |
nopaitumashakan manyusaMrambhaM sudurAsadam || 1||
sAkShAchChrIH preShitA devairdR^iShTvA tanmahadadbhutam |
adR^iShTAshrutapUrvatvAtsA nopeyAya sha~NkitA || 2||
prahlAdaM preShayAmAsa brahmAvasthitamantike |
tAta prashamayopehi svapitre kupitaM prabhum || 3||
tatheti shanakai rAjan mahAbhAgavato.arbhakaH |
upetya bhuvi kAyena nanAma vidhR^itA~njaliH || 4||
svapAdamUle patitaM tamarbhakaM
vilokya devaH kR^ipayA pariplutaH |
utthApya tachChIrShNyadadhAtkarAmbujaM
kAlAhivitrastadhiyAM kR^itAbhayam || 5||
sa tatkarasparshadhutAkhilAshubhaH
sapadyabhivyaktaparAtmadarshanaH |
tatpAdapadmaM hR^idi nirvR^ito dadhau
hR^iShyattanuH klinnahR^idashrulochanaH || 6||
astauShIddharimekAgramanasA susamAhitaH |
premagadgadayA vAchA tannyastahR^idayekShaNaH || 7||
prahlAda uvAcha
brahmAdayaH suragaNA munayo.atha siddhAH
sattvaikatAnamatayo vachasAM pravAhaiH |
nArAdhituM puruguNairadhunApi pipruH
kiM toShTumarhati sa me harirugrajAteH || 8||
manye dhanAbhijanarUpatapaHshrutaujaH
tejaHprabhAvabalapauruShabuddhiyogAH |
nArAdhanAya hi bhavanti parasya puMso
bhaktyA tutoSha bhagavAn gajayUthapAya || 9||
viprAddviShaDguNayutAdaravindanAbha\-
pAdAravindavimukhAchChvapachaM variShTham |
manye tadarpitamanovachanehitArtha\-
prANaM punAti sa kulaM na tu bhUrimAnaH || 10||
naivAtmanaH prabhurayaM nijalAbhapUrNo
mAnaM janAdaviduShaH karuNo vR^iNIte |
yadyajjano bhagavate vidadhIta mAnaM
tachchAtmane pratimukhasya yathA mukhashrIH || 11||
tasmAdahaM vigataviklava Ishvarasya
sarvAtmanA mahi gR^iNAmi yathA manISham |
nIcho.ajayA guNavisargamanupraviShTaH
pUyeta yena hi pumAnanuvarNitena || 12||
sarve hyamI vidhikarAstava sattvadhAmno
brahmAdayo vayamivesha na chodvijantaH |
kShemAya bhUtaya utAtmasukhAya chAsya
vikrIDitaM bhagavato ruchirAvatAraiH || 13||
tadyachCha manyumasurashcha hatastvayAdya
modeta sAdhurapi vR^ishchikasarpahatyA |
lokAshcha nirvR^itimitAH pratiyanti sarve
rUpaM nR^isiMha vibhayAya janAH smaranti || 14||
nAhaM bibhemyajita te.atibhayAnakAsya\-
jihvArkanetrabhrukuTIrabhasogradaMShTrAt |
AntrasrajaHkShatajakesarasha~NkukarNA\-
nnirhrAdabhItadigibhAdaribhinnakhAgrAt || 15||
trasto.asmyahaM kR^ipaNavatsala duHsahogra\-
saMsArachakrakadanAdgrasatAM praNItaH |
baddhaH svakarmabhirushattama te.a~NghrimUlaM
prItopavargasharaNaM hvayase kadA nu || 16||
yasmAtpriyApriyaviyogasayogajanma\-
shokAgninA sakalayoniShu dahyamAnaH |
duHkhauShadhaM tadapi duHkhamataddhiyAhaM
bhUman bhramAmi vada me tava dAsyayogam || 17||
so.ahaM priyasya suhR^idaH paradevatAyA
lIlAkathAstava nR^isiMha viri~nchagItAH |
a~njastitarmyanugR^iNan guNavipramukto
durgANi te padayugAlayahaMsasa~NgaH || 18||
bAlasya neha sharaNaM pitarau nR^isiMha
nArtasya chAgadamudanvati majjato nauH |
taptasya tatpratividhirya ihA~njaseShTa\-
stAvadvibho tanubhR^itAM tvadupekShitAnAm || 19||
yasmin yato yarhi yena cha yasya yasmA\-
dyasmai yathA yaduta yastvaparaH paro vA |
bhAvaH karoti vikaroti pR^ithaksvabhAvaH
sa~nchoditastadakhilaM bhavataH svarUpam || 20||
mAyA manaH sR^ijati karmamayaM balIyaH
kAlena choditaguNAnumatena puMsaH |
ChandomayaM yadajayArpitaShoDashAraM
saMsArachakramaja ko.atitarettvadanyaH || 21||
sa tvaM hi nityavijitAtmaguNaH svadhAmnA
kAlo vashIkR^itavisR^ijyavisargashaktiH |
chakre visR^iShTamajayeshvara ShoDashAre
niShpIDyamAnamupakarSha vibho prapannam || 22||
dR^iShTA mayA divi vibho.akhiladhiShNyapAnA\-
mAyuH shriyo vibhava ichChati yAn jano.ayam |
ye.asmatpituH kupitahAsavijR^imbhitabhrU\-
visphUrjitena lulitAH sa tu te nirastaH || 23||
tasmAdamUstanubhR^itAmahamAshiSho j~na
AyuH shriyaM vibhavamaindriyamAviri~nchyAt |
nechChAmi te vilulitAnuruvikrameNa
kAlAtmanopanaya mAM nijabhR^ityapArshvam || 24||
kutrAshiShaH shrutisukhA mR^igatR^iShNirUpAH
kvedaM kalevaramasheSharujAM virohaH |
nirvidyate na tu jano yadapIti vidvAn
kAmAnalaM madhulavaiH shamayan durApaiH || 25||
kvAhaM rajaHprabhava Isha tamo.adhike.asmin
jAtaH suretarakule kva tavAnukampA |
na brahmaNo na tu bhavasya na vai ramAyA
yanme.arpitaH shirasi padmakaraH prasAdaH || 26||
naiShA parAvaramatirbhavato nanu syA\-
jjantoryathA.a.atmasuhR^ido jagatastathApi |
saMsevayA surataroriva te prasAdaH
sevAnurUpamudayo na parAvaratvam || 27||
evaM janaM nipatitaM prabhavAhikUpe
kAmAbhikAmamanu yaH prapatan prasa~NgAt |
kR^itvA.a.atmasAtsurarShiNA bhagavan gR^ihItaH
so.ahaM kathaM nu visR^ije tava bhR^ityasevAm || 28||
matprANarakShaNamananta piturvadhashcha
manye svabhR^ityaR^iShivAkyamR^itaM vidhAtum |
khaDgaM pragR^ihya yadavochadasadvidhitsu\-
stvAmIshvaro madaparo.avatu kaM harAmi || 29||
ekastvameva jagadetamamuShya yattva\-
mAdyantayoH pR^ithagavasyasi madhyatashcha |
sR^iShTvA guNavyatikaraM nijamAyayedaM
nAneva tairavasitastadanupraviShTaH || 30||
tvaM vA idaM sadasadIsha bhavAMstato.anyo
mAyA yadAtmaparabuddhiriyaM hyapArthA |
yadyasya janma nidhanaM sthitirIkShaNaM cha
tadvai tadeva vasukAlavadaShTitarvoH || 31||
nyasyedamAtmani jagadvilayAmbumadhye
sheShe.a.atmanA nijasukhAnubhavo nirIhaH |
yogena mIlitadR^igAtmanipItanidra\-
sturye sthito na tu tamo na guNAMshcha yu~NkShe || 32||
tasyaiva te vapuridaM nijakAlashaktyA
sa~nchoditaprakR^itidharmaNa AtmagUDham |
ambhasyanantashayanAdviramatsamAdhe\-
rnAbherabhUtsvakaNikAvaTavanmahAbjam || 33||
tatsambhavaH kavirato.anyadapashyamAna\-
stvAM bIjamAtmani tataM svabahirvichintya |
nAvindadabdashatamapsu nimajjamAno
jAte.a~Nkure kathamu hopalabheta bIjam || 34||
sa tvAtmayonirativismita Ashrito.abjaM
kAlena tIvratapasA parishuddhabhAvaH |
tvAmAtmanIsha bhuvi gandhamivAtisUkShmaM
bhUtendriyAshayamaye vitataM dadarsha || 35||
evaM sahasravadanA~NghrishiraHkaroru\-
nAsAsyakarNanayanAbharaNAyudhADhyaM
mAyAmayaM sadupalakShitasanniveshaM
dR^iShTvA mahApuruShamApa mudaM viri~nchaH || 36||
tasmai bhavAn hayashirastanuvaM hi bibhrad\-
vedadruhAvatibalau madhukaiTabhAkhyau |
hatvA.a.anayachChrutigaNAMstu rajastamashcha
sattvaM tava priyatamAM tanumAmananti || 37||
itthaM nR^itiryagR^iShidevajhaShAvatArai\-
rlokAn vibhAvayasi haMsi jagatpratIpAn |
dharmaM mahApuruSha pAsi yugAnuvR^ittaM
ChannaH kalau yadabhavastriyugo.atha sa tvam || 38||
naitanmanastava kathAsu vikuNThanAtha
samprIyate duritaduShTamasAdhu tIvram |
kAmAturaM harShashokabhayaiShaNArtaM
tasmin kathaM tava gatiM vimR^ishAmi dInaH || 39||
jihvaikato.achyuta vikarShati mAvitR^iptA
shishno.anyatastvagudaraM shravaNaM kutashchit |
ghrANo.anyatashchapaladR^ik kva cha karmashakti\-
rbahvyaH sapatnya iva gehapatiM lunanti || 40||
evaM svakarmapatitaM bhavavaitaraNyA\-
manyonyajanmamaraNAshanabhItabhItam |
pashyan janaM svaparavigrahavairamaitraM
hanteti pArachara pIpR^ihi mUDhamadya || 41||
ko nvatra te.akhilaguro bhagavan prayAsa
uttAraNe.asya bhavasambhavalopahetoH |
mUDheShu vai mahadanugraha Artabandho
kiM tena te priyajanAnanusevatAM naH || 42||
naivodvije para duratyayavaitaraNyA\-
stvadvIryagAyanamahAmR^itamagnachittaH |
shoche tato vimukhachetasa indriyArtha\-
mAyAsukhAya bharamudvahato vimUDhAn || 43||
prAyeNa deva munayaH svavimuktikAmAH
maunaM charanti vijane na parArthaniShThAH |
naitAnvihAya kR^ipaNAnvimumukSha eko
nAnyaM tvadasya sharaNaM bhramato.anupashye || 44||
yanmaithunAdigR^ihamedhisukhaM hi tuchChaM
kaNDUyanena karayoriva duHkhaduHkham |
tR^ipyanti neha kR^ipaNA bahuduHkhabhAjaH
kaNDUtivanmanasijaM viShaheta dhIraH || 45||
maunavratashrutatapo.adhyayanasvadharma\-
vyAkhyArahojapasamAdhaya ApavargyAH |
prAyaH paraM puruSha te tvajitendriyANAM
vArtA bhavantyuta na vAtra tu dAmbhikAnAm || 46||
rUpe ime sadasatI tava vedasR^iShTe
bIjA~NkurAviva na chAnyadarUpakasya |
yuktAH samakShamubhayatra vichinvate tvAM
yogena vahnimiva dAruShu nAnyataH syAt || 47||
tvaM vAyuragniravanirviyadambumAtrAH
prANendriyANi hR^idayaM chidanugrahashcha |
sarvaM tvameva saguNo viguNashcha bhUman
nAnyattvadastyapi manovachasA niruktam || 48||
naite guNA na guNino mahadAdayo ye
sarve manaH prabhR^itayaH sahadevamartyAH |
Adyantavanta urugAya vidanti hi tvA\-
mevaM vimR^ishya sudhiyo viramanti shabdAt || 49||
tatterhattama namaH stutikarmapUjAH
karma smR^itishcharaNayoH shravaNaM kathAyAm |
saMsevayA tvayi vineti ShaDa~NgayA kiM
bhaktiM janaH paramahaMsagatau labheta || 50||
nArada uvAcha
etAvadvarNitaguNo bhaktyA bhaktena nirguNaH |
prahlAdaM praNataM prIto yatamanyurabhAShata || 51||
shrIbhagavAnuvAcha
prahlAda bhadra bhadraM te prIto.ahaM te.asurottama |
varaM vR^iNIShvAbhimataM kAmapUro.asmyahaM nR^iNAm || 52||
mAmaprINata AyuShman darshanaM durlabhaM hi me |
dR^iShTvA mAM na punarjanturAtmAnaM taptumarhati || 53||
prINanti hyatha mAM dhIrAH sarvabhAvena sAdhavaH |
shreyaskAmA mahAbhAga sarvAsAmAshiShAM patim || 54||
evaM pralobhyamAno.api varairlokapralobhanaiH |
ekAntitvAdbhagavati naichChattAnasurottamaH || 55||
iti shrImadbhAgavate mahApurANe pAramahaMsyAM saMhitAyAM
saptamaskandhe prahlAdacharite bhagavatstavo nAma navamo.adhyAyaH || 9||
\iti
\section{.. OM namo bhagavate vAsudevAya ..}
\section{.. dashamo.adhyAyaH \- 10 ..}
nArada uvAcha
bhaktiyogasya tatsarvamantarAyatayArbhakaH |
manyamAno hR^iShIkeshaM smayamAna uvAcha ha || 1||
prahlAda uvAcha
mA mAM pralobhayotpattyA.a.asakta~NkAmeShu tairvaraiH |
tatsa~NgabhIto nirviNNo mumukShustvAmupAshritaH || 2||
bhR^ityalakShaNajij~nAsurbhaktaM kAmeShvachodayat |
bhavAn saMsArabIjeShu hR^idayagranthiShu prabho || 3||
nAnyathA te.akhilaguro ghaTeta karuNAtmanaH |
yasta AshiSha AshAste na sa bhR^ityaH sa vai vaNik || 4||
AshAsAno na vai bhR^ityaH svAminyAshiSha AtmanaH |
na svAmI bhR^ityataH svAmyamichChan yo rAti chAshiShaH || 5||
ahaM tvakAmastvadbhaktastvaM cha svAmyanapAshrayaH |
nAnyathehAvayorartho rAjasevakayoriva || 6||
yadi rAsIsha me kAmAn varAMstvaM varadarShabha |
kAmAnAM hR^idyasaMrohaM bhavatastu vR^iNe varam || 7||
indriyANi manaH prANa AtmA dharmo dhR^itirmatiH |
hrIH shrIstejaH smR^itiH satyaM yasya nashyanti janmanA || 8||
vimu~nchati yadA kAmAn mAnavo manasi sthitAn |
tarhyeva puNDarIkAkSha bhagavattvAya kalpate || 9||
oM namo bhagavate tubhyaM puruShAya mahAtmane |
haraye.adbhutasiMhAya brahmaNe paramAtmane || 10||
nR^isiMha uvAcha
naikAntino me mayi jAtvihAshiSha
AshAsate.amutra cha ye bhavadvidhAH |
athApi manvantarametadatra
daityeshvarANAmanubhu~NkShva bhogAn || 11||
kathA madIyA juShamANaH priyAstva\-
mAveshya mAmAtmani santamekam |
sarveShu bhUteShvadhiyaj~namIshaM
yajasva yogena cha karma hinvan || 12||
bhogena puNyaM kushalena pApaM
kalevaraM kAlajavena hitvA |
kIrtiM vishuddhAM suralokagItAM
vitAya mAmeShyasi muktabandhaH || 13||
ya etatkIrtayenmahyaM tvayA gItamidaM naraH |
tvAM cha mAM cha smaran kAle karmabandhAtpramuchyate || 14||
prahlAda uvAcha
varaM varaya etatte varadeshAnmaheshvara |
yadanindatpitA me tvAmavidvAMsteja aishvaram || 15||
viddhAmarShAshayaH sAkShAtsarvalokaguruM prabhum |
bhrAtR^iheti mR^iShAdR^iShTistvadbhakte mayi chAghavAn || 16||
tasmAtpitA me pUyeta durantAddustarAdaghAt |
pUtaste.apA~NgasandR^iShTastadA kR^ipaNavatsala || 17||
shrIbhagavAnuvAcha
triHsaptabhiH pitA pUtaH pitR^ibhiH saha te.anagha |
yatsAdho.asya gR^ihe jAto bhavAn vai kulapAvanaH || 18||
yatra yatra cha madbhaktAH prashAntAH samadarshinaH |
sAdhavaH samudAchArAste pUyantyapi kIkaTAH || 19||
sarvAtmanA na hiMsanti bhUtagrAmeShu ki~nchana |
uchchAvacheShu daityendra madbhAvena gataspR^ihAH || 20||
bhavanti puruShA loke madbhaktAstvAmanuvratAH |
bhavAn me khalu bhaktAnAM sarveShAM pratirUpadhR^ik || 21||
kuru tvaM pretakR^ityAni pituH pUtasya sarvashaH |
mada~NgasparshanenA~Nga lokAn yAsyati suprajAH || 22||
pitryaM cha sthAnamAtiShTha yathoktaM brahmavAdibhiH |
mayyAveshya manastAta kuru karmANi matparaH || 23||
nArada uvAcha
prahlAdo.api tathA chakre pituryatsAmparAyikam |
yathA.a.aha bhagavAn rAjannabhiShikto dvijottamaiH || 24||
prasAdasumukhaM dR^iShTvA brahmA narahariM harim |
stutvA vAgbhiH pavitrAbhiH prAha devAdibhirvR^itaH || 25||
brahmovAcha
devadevAkhilAdhyakSha bhUtabhAvana pUrvaja |
diShTyA te nihataH pApo lokasantApano.asuraH || 26||
yo.asau labdhavaro matto na vadhyo mama sR^iShTibhiH |
tapoyogabalonnaddhaH samastanigamAnahan || 27||
diShTyAsya tanayaH sAdhurmahAbhAgavato.arbhakaH |
tvayA vimochito mR^ityordiShTyA tvAM samito.adhunA || 28||
etadvapuste bhagavan dhyAyataH prayatAtmanaH |
sarvato goptR^i santrAsAnmR^ityorapi jighAMsataH || 29||
nR^isiMha uvAcha
maivaM varo.asurANAM te pradeyaH padmasambhava |
varaH krUranisargANAmahInAmamR^itaM yathA || 30||
nArada uvAcha
ityuktvA bhagavAn rAjaMstatraivAntardadhe hariH |
adR^ishyaH sarvabhUtAnAM pUjitaH parameShThinA || 31||
tataH sampUjya shirasA vavande parameShThinam |
bhavaM prajApatIn devAn prahlAdo bhagavatkalAH || 32||
tataH kAvyAdibhiH sArdhaM munibhiH kamalAsanaH |
daityAnAM dAnavAnAM cha prahlAdamakarotpatim || 33||
pratinandya tato devAH prayujya paramAshiShaH |
svadhAmAni yayU rAjan brahmAdyAH pratipUjitAH || 34||
evaM tau pArShadau viShNoH putratvaM prApitau diteH |
hR^idi sthitena hariNA vairabhAvena tau hatau || 35||
punashcha viprashApena rAkShasau tau babhUvatuH |
kumbhakarNadashagrIvau hatau tau rAmavikramaiH || 36||
shayAnau yudhi nirbhinnahR^idayau rAmasAyakaiH |
tachchittau jahaturdehaM yathA prAktanajanmani || 37||
tAvihAtha punarjAtau shishupAlakarUShajau |
harau vairAnubandhena pashyataste samIyatuH || 38||
enaH pUrvakR^itaM yattadrAjAnaH kR^iShNavairiNaH |
jahustvante tadAtmAnaH kITaH peshaskR^ito yathA || 39||
yathA yathA bhagavato bhaktyA paramayAbhidA |
nR^ipAshchaidyAdayaH sAtmyaM harestachchintayA yayuH || 40||
AkhyAtaM sarvametatte yanmAM tvaM paripR^iShTavAn |
damaghoShasutAdInAM hareH sAtmyamapi dviShAm || 41||
eShA brahmaNyadevasya kR^iShNasya cha mahAtmanaH |
avatArakathA puNyA vadho yatrAdidaityayoH || 42||
prahlAdasyAnucharitaM mahAbhAgavatasya cha |
bhaktirj~nAnaM viraktishcha yAthAtmyaM chAsya vai hareH || 43||
sargasthityapyayeshasya guNakarmAnuvarNanam |
parAvareShAM sthAnAnAM kAlena vyatyayo mahAn || 44||
dharmo bhAgavatAnAM cha bhagavAn yena gamyate |
AkhyAne.asmin samAmnAtamAdhyAtmikamasheShataH || 45||
ya etatpuNyamAkhyAnaM viShNorvIryopabR^iMhitam |
kIrtayechChraddhayA shrutvA karmapAshairvimuchyate || 46||
etadya AdipuruShasya mR^igendralIlAM
daityendrayUthapavadhaM prayataH paTheta |
daityAtmajasya cha satAM pravarasya puNyaM
shrutvAnubhAvamakutobhayameti lokam || 47||
yUyaM nR^iloke bata bhUribhAgA
lokaM punAnA munayo.abhiyanti |
yeShAM gR^ihAnAvasatIti sAkShA\-
dgUDhaM paraM brahma manuShyali~Ngam || 48||
sa vA ayaM brahma mahadvimR^igya\-
kaivalyanirvANasukhAnubhUtiH |
priyaH suhR^idvaH khalu mAtuleya
AtmArhaNIyo vidhikR^idgurushcha || 49||
na yasya sAkShAdbhavapadmajAdibhI
rUpaM dhiyA vastutayopavarNitam |
maunena bhaktyopashamena pUjitaH
prasIdatAmeSha sa sAtvatAM patiH || 50||
sa eSha bhagavAn rAjan vyatanodvihataM yashaH |
purA rudrasya devasya mayenAnantamAyinA || 51||
rAjovAcha
kasmin karmaNi devasya mayo.ahan jagadIshituH |
yathA chopachitA kIrtiH kR^iShNenAnena kathyatAm || 52||
nArada uvAcha
nirjitA asurA devairyudhyanenopabR^iMhitaiH |
mAyinAM paramAchAryaM mayaM sharaNamAyayuH || 53||
sa nirmAya purastisro haimIraupyAyasIrvibhuH |
durlakShyApAyasaMyogA durvitarkyaparichChadAH || 54||
tAbhiste.asurasenAnyo lokAMstrIn seshvarAnnR^ipa |
smaranto nAshayA~nchakruH pUrvavairamalakShitAH || 55||
tataste seshvarA lokA upAsAdyeshvaraM vibho |
trAhi nastAvakAn deva vinaShTAMstripurAlayaiH || 56||
athAnugR^ihya bhagavAnmA bhaiShTeti surAn vibhuH |
sharaM dhanuShi sandhAya pureShvastraM vyamu~nchata || 57||
tato.agnivarNA iShava utpetuH sUryamaNDalAt |
yathA mayUkhasandohA nAdR^ishyanta puro yataH || 58||
taiH spR^iShTA vyasavaH sarve nipetuH sma puraukasaH |
tAnAnIya mahAyogI mayaH kUparase.akShipat || 59||
siddhAmR^itarasaspR^iShTA vajrasArA mahaujasaH |
uttasthurmeghadalanA vaidyutA iva vahnayaH || 60||
vilokya bhagnasa~NkalpaM vimanaskaM vR^iShadhvajam |
tadAyaM bhagavAn viShNustatropAyamakalpayat || 61||
vatsa AsIttadA brahmA svayaM viShNurayaM hi gauH |
pravishya tripuraM kAle rasakUpAmR^itaM papau || 62||
te.asurA hyapi pashyanto na nyaShedhan vimohitAH |
tadvij~nAya mahAyogI rasapAlAnidaM jagau || 63||
svayaM vishokaH shokArtAn smaran daivagatiM cha tAm |
devo.asuro naro.anyo vA neshvaro.astIha kashchana || 64||
Atmano.anyasya vA diShTaM daivenApohituM dvayoH |
athAsau shaktibhiH svAbhiH shambhoH prAdhanikaM vyadhAt || 65||
dharmaj~nAnaviraktyR^iddhitapovidyAkriyAdibhiH |
rathaM sUtaM dhvajaM vAhAn dhanurvarmasharAdi yat || 66||
sannaddho rathamAsthAya sharaM dhanurupAdade |
sharaM dhanuShi sandhAya muhUrte.abhijitIshvaraH || 67||
dadAha tena durbhedyA haro.atha tripuro nR^ipa |
divi dundubhayo nedurvimAnashatasa~NkulAH || 68||
devarShipitR^isiddheshA jayeti kusumotkaraiH |
avAkiran jagurhR^iShTA nanR^itushchApsarogaNAH || 69||
evaM dagdhvA purastisro bhagavAn purahA nR^ipa |
brahmAdibhiH stUyamAnaH svadhAma pratyapadyata || 70||
evaM vidhAnyasya hareH svamAyayA
viDambamAnasya nR^ilokamAtmanaH |
vIryANi gItAnyR^iShibhirjagadguro\-
rlokAn punAnAnyaparaM vadAmi kim || 71||
iti shrImadbhAgavate mahApurANe pAramahaMsyAM saMhitAyAM
saptamaskandhe yudhiShThiranAradasaMvAde tripuravijayo nAma
dashamo.adhyAyaH || 10||
\iti
\section{.. OM namo bhagavate vAsudevAya ..}
\section{.. ekAdasho.adhyAyaH \- 11 ..}
shrIshuka uvAcha
shrutvehitaM sAdhusabhAsabhAjitaM
mahattamAgraNya urukramAtmanaH |
yudhiShThiro daityapatermudA yutaH
paprachCha bhUyastanayaM svayambhuvaH || 1||
yudhiShThira uvAcha
bhagavan shrotumichChAmi nR^iNAM dharmaM sanAtanam |
varNAshramAchArayutaM yatpumAn vindate param || 2||
bhavAn prajApateH sAkShAdAtmajaH parameShThinaH |
sutAnAM sammato brahmaMstapoyogasamAdhibhiH || 3||
nArAyaNaparA viprA dharma guhyaM paraM viduH |
karuNAH sAdhavaH shAntAstvadvidhA na tathApare || 4||
nArada uvAcha
natvA bhagavate.ajAya lokAnAM dharmahetave |
vakShye sanAtanaM dharmaM nArAyaNamukhAchChrutam || 5||
yo.avatIryAtmanoM.ashena dAkShAyaNyAM tu dharmataH |
lokAnAM svastaye.adhyAste tapo badarikAshrame || 6||
dharmamUlaM hi bhagavAn sarvavedamayo hariH |
smR^itaM cha tadvidAM rAjan yena chAtmA prasIdati || 7||
satyaM dayA tapaH shauchaM titikShekShA shamo damaH |
ahiMsA brahmacharyaM cha tyAgaH svAdhyAya Arjavam || 8||
santoShaH samadR^iksevA grAmyehoparamaH shanaiH |
nR^iNAM viparyayehekShA maunamAtmavimarshanam || 9||
annAdyAdeH saMvibhAgo bhUtebhyashcha yathArhataH |
teShvAtmadevatAbuddhiH sutarAM nR^iShu pANDava || 10||
shravaNaM kIrtanaM chAsya smaraNaM mahatAM gateH |
sevejyAvanatirdAsyaM sakhyamAtmasamarpaNam || 11||
nR^iNAmayaM paro dharmaH sarveShAM samudAhR^itaH |
triMshallakShaNavAn rAjan sarvAtmA yena tuShyati || 12||
saMskArA yadavichChinnAH sa dvijo.ajo jagAda yam |
ijyAdhyayanadAnAni vihitAni dvijanmanAm |
janmakarmAvadAtAnAM kriyAshchAshramachoditAH || 13||
viprasyAdhyayanAdIni ShaDanyasyApratigrahaH |
rAj~no vR^ittiH prajAgopturaviprAdvA karAdibhiH || 14||
vaishyastu vArtAvR^ittishcha nityaM brahmakulAnugaH |
shUdrasya dvijashushrUShA vR^ittishcha svAmino bhavet || 15||
vArtA vichitrA shAlInayAyAvarashilo~nChanam |
vipravR^ittishchaturdheyaM shreyasI chottarottarA || 16||
jaghanyo nottamAM vR^ittimanApadi bhajennaraH |
R^ite rAjanyamApatsu sarveShAmapi sarvashaH || 17||
R^itAmR^itAbhyAM jIveta mR^itena pramR^itena vA |
satyAnR^itAbhyAM jIveta na shvavR^ittyA katha~nchana || 18||
R^itamu~nChashilaM proktamamR^itaM yadayAchitam |
mR^itaM tu nityayAch~nA syAtpramR^itaM karShaNaM smR^itam || 19||
satyAnR^itaM cha vANijyaM shvavR^ittirnIchasevanam |
varjayettAM sadA vipro rAjanyashcha jugupsitAm |
sarvavedamayo vipraH sarvadevamayo nR^ipaH || 20||
shamo damastapaH shauchaM santoShaH kShAntirArjavam |
j~nAnaM dayAchyutAtmatvaM satyaM cha brahmalakShaNam || 21||
shauryaM vIryaM dhR^itistejastyAga AtmajayaH kShamA |
brahmaNyatA prasAdashcha rakShA cha kShatralakShaNam || 22||
devagurvachyute bhaktistrivargaparipoShaNam |
Astikyamudyamo nityaM naipuNyaM vaishyalakShaNam || 23||
shUdrasya sannatiH shauchaM sevA svAminyamAyayA |
amantrayaj~no hyasteyaM satyaM goviprarakShaNam || 24||
strINAM cha patidevAnAM tachChushrUShAnukUlatA |
tadbandhuShvanuvR^ittishcha nityaM tadvratadhAraNam || 25||
sammArjanopalepAbhyAM gR^ihamaNDalavartanaiH |
svayaM cha maNDitA nityaM parimR^iShTaparichChadA || 26||
kAmairuchchAvachaiH sAdhvI prashrayeNa damena cha |
vAkyaiH satyaiH priyaiH premNA kAle kAle bhajetpatim || 27||
santuShTAlolupA dakShA dharmaj~nA priyasatyavAk |
apramattA shuchiH snigdhA patiM tvapatitaM bhajet || 28||
yA patiM haribhAvena bhajechChrIriva tatparA |
haryAtmanA harerloke patyA shrIriva modate || 29||
vR^ittiH sa~NkarajAtInAM tattatkulakR^itA bhavet |
achaurANAmapApAnAmantyajAntevasAyinAm || 30||
prAyaH svabhAvavihito nR^iNAM dharmo yuge yuge |
vedadR^igbhiH smR^ito rAjan pretya cheha cha sharmakR^it || 31||
vR^ittyA svabhAvakR^itayA vartamAnaH svakarmakR^it |
hitvA svabhAvajaM karma shanairnirguNatAmiyAt || 32||
upyamAnaM muhuH kShetraM svayaM nirvIryatAmiyAt |
na kalpate punaH sUtyai uptaM bIjaM cha nashyati || 33||
evaM kAmAshayaM chittaM kAmAnAmatisevayA |
virajyeta yathA rAjannAgnivatkAmabindubhiH || 34||
yasya yallakShaNaM proktaM puMso varNAbhivya~njakam |
yadanyatrApi dR^ishyeta tattenaiva vinirdishet || 35||
iti shrImadbhAgavate mahApurANe pAramahaMsyAM saMhitAyAM  saptamaskandhe
yudhiShThiranAradasaMvAde sadAchAranirNayo nAmaikAdasho.adhyAyaH || 11||
\iti
\section{.. OM namo bhagavate vAsudevAya ..}
\section{.. dvAdasho.adhyAyaH \- 12 ..}
nArada uvAcha
brahmachArI gurukule vasan dAnto gurorhitam |
Acharan dAsavannIcho gurau sudR^iDhasauhR^idaH || 1||
sAyaM prAtarupAsIta gurvagnyarkasurottamAn |
ubhe sandhye cha yatavAgjapan brahma samAhitaH || 2||
ChandAMsyadhIyIta gurorAhUtashchetsuyantritaH |
upakrame.avasAne cha charaNau shirasA namet || 3||
mekhalAjinavAsAMsi jaTAdaNDakamaNDalUn |
bibhR^iyAdupavItaM cha darbhapANiryathoditam || 4||
sAyaM prAtashcharedbhaikShaM gurave tannivedayet |
bhu~njIta yadyanuj~nAto no chedupavasetkvachit || 5||
sushIlo mitabhugdakShaH shraddadhAno jitendriyaH |
yAvadarthaM vyavaharetstrIShu strInirjiteShu cha || 6||
varjayetpramadAgAthAmagR^ihastho bR^ihadvrataH |
indriyANi pramAthIni harantyapi yatermanaH || 7||
keshaprasAdhanonmardasnapanAbhya~njanAdikam |
gurustrIbhiryuvatibhiH kArayennAtmano yuvA || 8||
nanvagniH pramadA nAma ghR^itakumbhasamaH pumAn |
sutAmapi raho jahyAdanyadA yAvadarthakR^it || 9||
kalpayitvA.a.atmanA yAvadAbhAsamidamIshvaraH |
dvaitaM tAvanna viramettato hyasya viparyayaH || 10||
etatsarvaM gR^ihasthasya samAmnAtaM yaterapi |
guruvR^ittirvikalpena gR^ihasthasyartugAminaH || 11||
a~njanAbhya~njanonmardastryavalekhAmiShaM madhu |
sraggandhalepAla~NkArAMstyajeyurye dhR^itavratAH || 12||
uShitvaivaM gurukule dvijo.adhItyAvabudhya cha |
trayIM sA~NgopaniShadaM yAvadarthaM yathAbalam || 13||
dattvA varamanuj~nAto guroH kAmaM yadIshvaraH |
gR^ihaM vanaM vA pravishetpravrajettatra vA vaset || 14||
agnau gurAvAtmani cha sarvabhUteShvadhokShajam |
bhUtaiH svadhAmabhiH pashyedapraviShTaM praviShTavat || 15||
evaM vidho brahmachArI vAnaprastho yatirgR^ihI |
charan viditavij~nAnaH paraM brahmAdhigachChati || 16||
vAnaprasthasya vakShyAmi niyamAn munisammatAn |
yAnAtiShThan munirgachChedR^iShilokamihA~njasA || 17||
na kR^iShTapachyamashnIyAdakR^iShTaM chApyakAlataH |
agnipakvamathAmaM vA arkapakvamutAharet || 18||
vanyaishcharupuroDAshAn nirvapetkAlachoditAn |
labdhe nave nave.annAdye purANaM tu parityajet || 19||
agnyarthameva sharaNamuTajaM vAdrikandarAm |
shrayeta himavAyvagnivarShArkAtapaShAT svayam || 20||
kesharomanakhashmashrumalAni jaTilo dadhat |
kamaNDalvajine daNDavalkalAgniparichChadAn || 21||
charedvane dvAdashAbdAnaShTau vA chaturo muniH |
dvAvekaM vA yathA buddhirna vipadyeta kR^ichChrataH || 22||
yadAkalpaH svakriyAyAM vyAdhibhirjarayAthavA |
AnvIkShikyAM vA vidyAyAM kuryAdanashanAdikam || 23||
AtmanyagnIn samAropya sannyasyAhammamAtmatAm |
kAraNeShu nyasetsamyak sa~NghAtaM tu yathArhataH || 24||
khe khAni vAyau nishvAsAMstejasyUShmANamAtmavAn |
apsvasR^ikshleShmapUyAni kShitau sheShaM yathodbhavam || 25||
vAchamagnau savaktavyAmindre shilpaM karAvapi |
padAni gatyA vayasi ratyopasthaM prajApatau || 26||
mR^ityau pAyuM visargaM cha yathAsthAnaM vinirdishet |
dikShu shrotraM sanAdena sparshamadhyAtmani tvacham || 27||
rUpANi chakShuShA rAjan jyotiShyabhiniveshayet |
apsu prachetasA jihvAM ghreyairghrANaM kShitau nyaset || 28||
mano manorathaishchandre buddhiM bodhyaiH kavau pare |
karmANyadhyAtmanA rudre yadahammamatAkriyA |
sattvena chittaM kShetraj~ne guNairvaikArikaM pare || 29||
apsu kShitimapo jyotiShyado vAyau nabhasyamum |
kUTasthe tachcha mahati tadavyakte.akShare cha tat || 30||
ityakSharatayA.a.atmAnaM chinmAtramavasheShitam |
j~nAtvAdvayo.atha virameddagdhayonirivAnalaH || 31||
iti shrImadbhAgavate mahApurANe pAramahaMsyAM saMhitAyAM saptamaskandhe
yudhiShThirasaMvAde sadAchAranirNayo nAma dvAdasho.adhyAyaH || 12||
\iti
\section{.. OM namo bhagavate vAsudevAya ..}
\section{.. trayodasho.adhyAyaH \- 13 ..}
nArada uvAcha
kalpastvevaM parivrajya dehamAtrAvasheShitaH |
grAmaikarAtravidhinA nirapekShashcharenmahIm || 1||
bibhR^iyAdyadyasau vAsaH kaupInAchChAdanaM param |
tyaktaM na daNDali~NgAderanyatki~nchidanApadi || 2||
eka eva charedbhikShurAtmArAmo.anapAshrayaH |
sarvabhUtasuhR^ichChAnto nArAyaNaparAyaNaH || 3||
pashyedAtmanyado vishvaM pare sadasato.avyaye |
AtmAnaM cha paraM brahma sarvatra sadasanmaye || 4||
suptiprabodhayoH sandhAvAtmano gatimAtmadR^ik |
pashyan bandhaM cha mokShaM cha mAyAmAtraM na vastutaH || 5||
nAbhinandeddhruvaM mR^ityumadhruvaM vAsya jIvitam |
kAlaM paraM pratIkSheta bhUtAnAM prabhavApyayam || 6||
nAsachChAstreShu sajjeta nopajIveta jIvikAm |
vAdavAdAMstyajettarkAn pakShaM kaM cha na saMshrayet || 7||
na shiShyAnanubadhnIta granthAn naivAbhyasedbahUn |
na vyAkhyAmupayu~njIta nArambhAnArabhetkvachit || 8||
na yaterAshramaH prAyo dharmaheturmahAtmanaH |
shAntasya samachittasya bibhR^iyAduta vA tyajet || 9||
avyaktali~Ngo vyaktArtho manIShyunmattabAlavat |
kavirmUkavadAtmAnaM sa dR^iShTyA darshayennR^iNAm || 10||
atrApyudAharantImamitihAsaM purAtanam |
prahlAdasya cha saMvAdaM munerAjagarasya cha || 11||
taM shayAnaM dharopasthe kAveryAM sahyasAnuni |
rajasvalaistanUdeshairnigUDhAmalatejasam || 12||
dadarsha lokAn vicharan lokatattvavivitsayA |
vR^ito.amAtyaiH katipayaiH prahlAdo bhagavatpriyaH || 13||
karmaNA.a.akR^itibhirvAchA li~NgairvarNAshramAdibhiH |
na vidanti janA yaM vai so.asAviti na veti cha || 14||
taM natvAbhyarchya vidhivatpAdayoH shirasA spR^ishan |
vivitsuridamaprAkShInmahAbhAgavato.asuraH || 15||
bibharShi kAyaM pIvAnaM sodyamo bhogavAn yathA |
vittaM chaivodyamavatAM bhogo vittavatAmiha |
bhoginAM khalu deho.ayaM pIvA bhavati nAnyathA || 16||
na te shayAnasya nirudyamasya
brahman nu hArtho yata eva bhogaH |
abhogino.ayaM tava vipra dehaH
pIvA yatastadvada naH kShamaM chet || 17||
kaviH kalpo nipuNadR^ik chitrapriyakathaH samaH |
lokasya kurvataH karma sheShe tadvIkShitApi vA || 18||
nArada uvAcha
sa itthaM daityapatinA paripR^iShTo mahAmuniH |
smayamAnastamabhyAha tadvAgamR^itayantritaH || 19||
brAhmaNa uvAcha
vededamasurashreShTha bhavAn nanvAryasammataH |
IhoparamayornR^INAM padAnyadhyAtmachakShuShA || 20||
yasya nArAyaNo devo bhagavAn hR^idgataH sadA |
bhaktyA kevalayAj~nAnaM dhunoti dhvAntamarkavat || 21||
athApi brUmahe prashnAMstava rAjan yathAshrutam |
sambhAvanIyo hi bhavAnAtmanaH shuddhimichChatAm || 22||
tR^iShNayA bhavavAhinyA yogyaiH kAmairapUrayA |
karmANi kAryamANo.ahaM nAnAyoniShu yojitaH || 23||
yadR^ichChayA lokamimaM prApitaH karmabhirbhraman |
svargApavargayordvAraM tirashchAM punarasya cha || 24||
atrApi dampatInAM cha sukhAyAnyApanuttaye |
karmANi kurvatAM dR^iShTvA nivR^itto.asmi viparyayam || 25||
sukhamasyAtmano rUpaM sarvehoparatistanuH |
manaHsaMsparshajAn dR^iShTvA bhogAn svapsyAmi saMvishan || 26||
ityetadAtmanaH svArthaM santaM vismR^itya vai pumAn |
vichitrAmasati dvaite ghorAmApnoti saMsR^itim || 27||
jalaM tadudbhavaishChannaM hitvAj~no jalakAmyayA |
mR^igatR^iShNAmupAdhAvedyathAnyatrArthadR^ik svataH || 28||
dehAdibhirdaivatantrairAtmanaH sukhamIhataH |
duHkhAtyayaM chAnIshasya kriyA moghAH kR^itAH kR^itAH || 29||
AdhyAtmikAdibhirduHkhairavimuktasya karhichit |
martyasya kR^ichChropanatairarthaiH kAmaiH kriyeta kim || 30||
pashyAmi dhaninAM kleshaM lubdhAnAmajitAtmanAm |
bhayAdalabdhanidrANAM sarvato.abhivisha~NkinAm || 31||
rAjatashchaurataH shatroH svajanAtpashupakShitaH |
arthibhyaH kAlataH svasmAnnityaM prANArthavadbhayam || 32||
shokamohabhayakrodharAgaklaibyashramAdayaH |
yanmUlAH syurnR^iNAM jahyAtspR^ihAM prANArthayorbudhaH || 33||
madhukAramahAsarpau loke.asmin no gurUttamau |
vairAgyaM paritoShaM cha prAptA yachChikShayA vayam || 34||
virAgaH sarvakAmebhyaH shikShito me madhuvratAt |
kR^ichChrAptaM madhuvadvittaM hatvApyanyo haretpatim || 35||
anIhaH parituShTAtmA yadR^ichChopanatAdaham |
no chechChaye bahvahAni mahAhiriva sattvavAn || 36||
kvachidalpaM kvachidbhUri bhu~nje.annaM svAdvasvAdu vA |
kvachidbhUri guNopetaM guNahInamuta kvachit || 37||
shraddhayopahR^itaM kvApi kadAchinmAnavarjitam |
bhu~nje bhuktvAtha kasmiMshchiddivA naktaM yadR^ichChayA || 38||
kShaumaM dukUlamajinaM chIraM valkalameva vA |
vase.anyadapi samprAptaM diShTabhuk tuShTadhIraham || 39||
kvachichChaye dharopasthe tR^iNaparNAshmabhasmasu |
kvachitprAsAdaparya~Nke kashipau vA parechChayA || 40||
kvachitsnAto.anuliptA~NgaH suvAsAH sragvyala~NkR^itaH |
rathebhAshvaishchare kvApi digvAsA grahavadvibho || 41||
nAhaM ninde na cha staumi svabhAvaviShamaM janam |
eteShAM shreya AshAse utaikAtmyaM mahAtmani || 42||
vikalpaM juhuyAchchittau tAM manasyarthavibhrame |
mano vaikArike hutvA tanmAyAyAM juhotyanu || 43||
AtmAnubhUtau tAM mAyAM juhuyAtsatyadR^i~NmuniH |
tato nirIho virametsvAnubhUtyA.a.atmani sthitaH || 44||
svAtmavR^ittaM mayetthaM te suguptamapi varNitam |
vyapetaM lokashAstrAbhyAM bhavAn hi bhagavatparaH || 45||
nArada uvAcha
dharmaM pAramahaMsyaM vai muneH shrutvAsureshvaraH |
pUjayitvA tataH prIta Amantrya prayayau gR^iham || 46||
iti shrImadbhAgavate mahApurANe pAramahaMsyAM saMhitAyAM saptamaskandhe
yudhiShThiranAradasaMvAde yatidharmaM nAma trayodashAdhyAyaH || 13||
\iti
\section{.. OM namo bhagavate vAsudevAya ..}
\section{.. chaturdasho.adhyAyaH \- 14 ..}
yudhiShThira uvAcha
gR^ihastha etAM padavIM vidhinA yena chA~njasA |
yAti devaR^iShe brUhi mAdR^isho gR^ihamUDhadhIH || 1||
nArada uvAcha
gR^iheShvavasthito rAjan kriyAH kurvan gR^ihochitAH |
vAsudevArpaNaM sAkShAdupAsIta mahAmunIn || 2||
shR^iNvan bhagavato.abhIkShNamavatArakathAmR^itam |
shraddadhAno yathAkAlamupashAntajanAvR^itaH || 3||
satsa~NgAchChanakaiH sa~NgamAtmajAyAtmajAdiShu |
vimuchyenmuchyamAneShu svayaM svapnavadutthitaH || 4||
yAvadarthamupAsIno dehe gehe cha paNDitaH |
virakto raktavattatra nR^iloke naratAM nyaset || 5||
j~nAtayaH pitarau putrA bhrAtaraH suhR^ido.apare |
yadvadanti yadichChanti chAnumodeta nirmamaH || 6||
divyaM bhaumaM chAntarIkShaM vittamachyutanirmitam |
tatsarvamupayu~njAna etatkuryAtsvato budhaH || 7||
yAvadbhriyeta jaTharaM tAvatsvatvaM hi dehinAm |
adhikaM yo.abhimanyeta sa steno daNDamarhati || 8||
mR^igoShTrakharamarkAkhusarIsR^ipkhagamakShikAH |
AtmanaH putravatpashyettaireShAmantaraM kiyat || 9||
trivargaM nAtikR^ichChreNa bhajeta gR^ihamedhyapi |
yathAdeshaM yathAkAlaM yAvaddaivopapAditam || 10||
AshvAghAnte.avasAyibhyaH kAmAn saMvibhajedyathA |
apyekAmAtmano dArAM nR^iNAM svatvagraho yataH || 11||
jahyAdyadarthe svaprANAn hanyAdvA pitaraM gurum |
tasyAM svatvaM striyAM jahyAdyastena hyajito jitaH || 12||
kR^imiviDbhasmaniShThAntaM kvedaM tuchChaM kalevaram |
kva tadIyaratirbhAryA kvAyamAtmA nabhashChadiH || 13||
siddhairyaj~nAvashiShTArthaiH kalpayedvR^ittimAtmanaH |
sheShe svatvaM tyajan prAj~naH padavIM mahatAmiyAt || 14||
devAn R^iShIn nR^ibhUtAni pitR^InAtmAnamanvaham |
svavR^ittyAgatavittena yajeta puruShaM pR^ithak || 15||
yarhyAtmano.adhikArAdyAH sarvAH syuryaj~nasampadaH |
vaitAnikena vidhinA agnihotrAdinA yajet || 16||
na hyagnimukhatoyaM vai bhagavAn sarvayaj~nabhuk |
ijyeta haviShA rAjan yathA vipramukhe hutaiH || 17||
tasmAdbrAhmaNadeveShu martyAdiShu yathArhataH |
taistaiH kAmairyajasvainaM kShetraj~naM brAhmaNAnanu || 18||
kuryAdAparapakShIyaM mAsi prauShThapade dvijaH |
shrAddhaM pitroryathAvittaM tadbandhUnAM cha vittavAn || 19||
ayane viShuve kuryAdvyatIpAte dinakShaye |
chandrAdityoparAge cha dvAdashIshravaNeShu cha || 20||
tR^itIyAyAM shuklapakShe navamyAmatha kArtike |
chatasR^iShvapyaShTakAsu hemante shishire tathA || 21||
mAghe cha sitasaptamyAM maghArAkAsamAgame |
rAkayA chAnumatyA vA mAsarkShANi yutAnyapi || 22||
dvAdashyAmanurAdhA syAchChravaNastisra uttarAH |
tisR^iShvekAdashI vA.a.asu janmarkShashroNayogayuk || 23||
ta ete shreyasaH kAlA nR^iNAM shreyovivardhanAH |
kuryAtsarvAtmanaiteShu shreyo.amoghaM tadAyuShaH || 24||
eShu snAnaM japo homo vrataM devadvijArchanam |
pitR^idevanR^ibhUtebhyo yaddattaM tad.hdhyanashvaram || 25||
saMskArakAlo jAyAyA apatyasyAtmanastathA |
pretasaMsthA mR^itAhashcha karmaNyabhyudaye nR^ipa || 26||
atha deshAn pravakShyAmi dharmAdishreya Avahan |
sa vai puNyatamo deshaH satpAtraM yatra labhyate || 27||
bimbaM bhagavato yatra sarvametachcharAcharam |
yatra ha brAhmaNakulaM tapovidyAdayAnvitam || 28||
yatra yatra harerarchA sa deshaH shreyasAM padam |
yatra ga~NgAdayo nadyaH purANeShu cha vishrutAH || 29||
sarAMsi puShkarAdIni kShetrANyarhAshritAnyuta |
kurukShetraM gayashiraH prayAgaH pulahAshramaH || 30||
naimiShaM phAlgunaM setuH prabhAso.atha kushasthalI |
vArANasI madhupurI pampA bindusarastathA || 31||
nArAyaNAshramo nandA sItArAmAshramAdayaH |
sarve kulAchalA rAjan mahendramalayAdayaH || 32||
ete puNyatamA deshA harerarchAshritAshcha ye |
etAn deshAn niSheveta shreyaskAmo hyabhIkShNashaH |
dharmo hyatrehitaH puMsAM sahasrAdhiphalodayaH || 33||
pAtraM tvatra niruktaM vai kavibhiH pAtravittamaiH |
harirevaika urvIsha yanmayaM vai charAcharam || 34||
devarShyarhatsu vai satsu tatra brahmAtmajAdiShu |
rAjan yadagrapUjAyAM mataH pAtratayAchyutaH || 35||
jIvarAshibhirAkIrNa ANDakoshA~Nghripo mahAn |
tanmUlatvAdachyutejyA sarvajIvAtmatarpaNam || 36||
purANyanena sR^iShTAni nR^itiryagR^iShidevatAH |
shete jIvena rUpeNa pureShu puruSho hyasau || 37||
teShveShu bhagavAn rAjaMstAratamyena vartate |
tasmAtpAtraM hi puruSho yAvAnAtmA yatheyate || 38||
dR^iShTvA teShAM mitho nR^iNAmavaj~nAnAtmatAM nR^ipa |
tretAdiShu harerarchA kriyAyai kavibhiH kR^itA || 39||
tato.archAyAM hariM kechitsaMshraddhAya saparyayA |
upAsata upAstApi nArthadA puruShadviShAm || 40||
puruSheShvapi rAjendra supAtraM brAhmaNaM viduH |
tapasA vidyayA tuShTyA dhatte vedaM harestanum || 41||
nanvasya brAhmaNA rAjan kR^iShNasya jagadAtmanaH |
punantaH pAdarajasA trilokIM daivataM mahat || 42||
iti shrImadbhAgavate mahApurANe pAramahaMsyAM saMhitAyAM
saptamaskandhe sadAchAranirNayo nAma chaturdasho.adhyAyaH || 14||
\iti
\section{.. OM namo bhagavate vAsudevAya ..}
\section{.. pa~nchadasho.adhyAyaH \- 15 ..}
nArada uvAcha
karmaniShThA dvijAH kechittaponiShThA nR^ipApare |
svAdhyAye.anye pravachane ye kechijj~nAnayogayoH || 1||
j~nAnaniShThAya deyAni kavyAnyAnantyamichChatA |
daive cha tadabhAve syAditarebhyo yathArhataH || 2||
dvau daive pitR^ikArye trInekaikamubhayatra vA |
bhojayetsusamR^iddho.api shrAddhe kuryAnna vistaram || 3||
deshakAlochitashraddhA dravyapAtrArhaNAni cha |
samyagbhavanti naitAni vistarAtsvajanArpaNAt || 4||
deshe kAle cha samprApte munyannaM haridaivatam |
shraddhayA vidhivatpAtre nyastaM kAmadhugakShayam || 5||
devarShipitR^ibhUtebhya Atmane svajanAya cha |
annaM saMvibhajan pashyetsarvaM tatpuruShAtmakam || 6||
na dadyAdAmiShaM shrAddhe na chAdyAddharmatattvavit |
munyannaiH syAtparA prItiryathA na pashuhiMsayA || 7||
naitAdR^ishaH paro dharmo nR^iNAM saddharmamichChatAm |
nyAso daNDasya bhUteShu manovAkkAyajasya yaH || 8||
eke karmamayAn yaj~nAn j~nAnino yaj~navittamAH |
AtmasaMyamane.anIhA juhvati j~nAnadIpite || 9||
dravyayaj~nairyakShyamANaM dR^iShTvA bhUtAni bibhyati |
eSha mAkaruNo hanyAdatajj~no hyasutR^ip dhruvam || 10||
tasmAddaivopapannena munyannenApi dharmavit |
santuShTo.aharahaH kuryAnnityanaimittikIH kriyAH || 11||
vidharmaH paradharmashcha AbhAsa upamA ChalaH |
adharmashAkhAH pa~nchemA dharmaj~no.adharmavattyajet || 12||
dharmabAdho vidharmaH syAtparadharmo.anyachoditaH |
upadharmastu pAkhaNDo dambho vA shabdabhichChalaH || 13||
yastvichChayA kR^itaH pumbhirAbhAso hyAshramAtpR^ithak |
svabhAvavihito dharmaH kasya neShTaH prashAntaye || 14||
dharmArthamapi neheta yAtrArthaM vAdhano dhanam |
anIhAnIhamAnasya mahAheriva vR^ittidA || 15||
santuShTasya nirIhasya svAtmArAmasya yatsukham |
kutastatkAmalobhena dhAvato.arthehayA dishaH || 16||
sadA santuShTamanasaH sarvAH sukhamayA dishaH |
sharkarAkaNTakAdibhyo yathopAnatpadaH shivam || 17||
santuShTaH kena vA rAjanna vartetApi vAriNA |
aupasthyajaihvyakArpaNyAdgR^ihapAlAyate janaH || 18||
asantuShTasya viprasya tejo vidyA tapo yashaH |
sravantIndriyalaulyena j~nAnaM chaivAvakIryate || 19||
kAmasyAntaM cha kShuttR^iDbhyAM krodhasyaitatphalodayAt |
jano yAti na lobhasya jitvA bhuktvA disho bhuvaH || 20||
paNDitA bahavo rAjan bahuj~nAH saMshayachChidaH |
sadasaspatayo.apyeke asantoShAtpatantyadhaH || 21||
asa~NkalpAjjayetkAmaM krodhaM kAmavivarjanAt |
arthAnarthekShayA lobhaM bhayaM tattvAvamarshanAt || 22||
AnvIkShikyA shokamohau dambhaM mahadupAsayA |
yogAntarAyAn maunena hiMsAM kAyAdyanIhayA || 23||
kR^ipayA bhUtajaM duHkhaM daivaM jahyAtsamAdhinA |
AtmajaM yogavIryeNa nidrAM sattvaniShevayA || 24||
rajastamashcha sattvena sattvaM chopashamena cha |
etatsarvaM gurau bhaktyA puruSho hya~njasA jayet || 25||
yasya sAkShAdbhagavati j~nAnadIpaprade gurau |
martyAsaddhIH shrutaM tasya sarvaM ku~njarashauchavat || 26||
eSha vai bhagavAn sAkShAtpradhAnapuruSheshvaraH |
yogeshvarairvimR^igyA~Nghrirloko yaM manyate naram || 27||
ShaDvargasaMyamaikAntAH sarvA niyamachodanAH |
tadantA yadi no yogAnAvaheyuH shramAvahAH || 28||
yathA vArtAdayo hyarthA yogasyArthaM na bibhrati |
anarthAya bhaveyuste pUrtamiShTaM tathAsataH || 29||
yashchittavijaye yattaH syAnniHsa~Ngo.aparigrahaH |
eko viviktasharaNo bhikShurbhikShAmitAshanaH || 30||
deshe shuchau same rAjan saMsthApyAsanamAtmanaH |
sthiraM samaM sukhaM tasminnAsItarjva~Nga omiti || 31||
prANApAnau sannirudhyAtpUrakumbhakarechakaiH |
yAvanmanastyajetkAmAn svanAsAgranirIkShaNaH || 32||
yato yato niHsarati manaH kAmahataM bhramat |
tatastata upAhR^itya hR^idi rundhyAchChanairbudhaH || 33||
evamabhyasyatashchittaM kAlenAlpIyasA yateH |
anishaM tasya nirvANaM yAtyanindhanavahnivat || 34||
kAmAdibhiranAviddhaM prashAntAkhilavR^itti yat |
chittaM brahmasukhaspR^iShTaM naivottiShTheta karhichit || 35||
yaH pravrajya gR^ihAtpUrvaM trivargAvapanAtpunaH |
yadi seveta tAn bhikShuH sa vai vAntAshyapatrapaH || 36||
yaiH svadehaH smR^ito nAtmA martyo viTkR^imibhasmasAt |
ta enamAtmasAtkR^itvA shlAghayanti hyasattamAH || 37||
gR^ihasthasya kriyAtyAgo vratatyAgo vaTorapi |
tapasvino grAmasevA bhikShorindriyalolatA || 38||
AshramApasadA hyete khalvAshramaviDambakAH |
devamAyAvimUDhAMstAnupekShetAnukampayA || 39||
AtmAnaM chedvijAnIyAtparaM j~nAnadhutAshayaH |
kimichChan kasya vA hetordehaM puShNAti lampaTaH || 40||
AhuH sharIraM rathamindriyANi
hayAnabhIShUn mana indriyesham |
vartmAni mAtrA dhiShaNAM cha sUtaM
sattvaM bR^ihadbandhuramIshasR^iShTam || 41||
akShaM dashaprANamadharmadharmau
chakre.abhimAnaM rathinaM cha jIvam |
dhanurhi tasya praNavaM paThanti
sharaM tu jIvaM parameva lakShyam || 42||
rAgo dveShashcha lobhashcha shokamohau bhayaM madaH |
mAno.avamAno.asUyA cha mAyA hiMsA cha matsaraH || 43||
rajaH pramAdaH kShunnidrA shatravastvevamAdayaH |
rajastamaHprakR^itayaH sattvaprakR^itayaH kvachit || 44||
yAvannR^ikAyarathamAtmavashopakalpaM
dhatte gariShThacharaNArchanayA nishAtam,
j~nAnAsimachyutabalo dadhadastashatruH
svArAjyatuShTa upashAnta idaM vijahyAt | 45||
nochetpramattamasadindriyavAjisUtA
nItvotpathaM viShayadasyuShu nikShipanti,
te dasyavaH sahayasUtamamuM tamo.andhe
saMsArakUpa urumR^ityubhaye kShipanti || 46||
pravR^ittaM cha nivR^ittaM cha dvividhaM karma vaidikam |
Avartate pravR^ittena nivR^ittenAshnute.amR^itam || 47||
hiMsraM dravyamayaM kAmyamagnihotrAdyashAntidam |
darshashcha pUrNamAsashcha chAturmAsyaM pashuH sutaH || 48||
etadiShTaM pravR^ittAkhyaM hutaM prahutameva cha |
pUrtaM surAlayArAmakUpAjIvyAdilakShaNam || 49||
dravyasUkShmavipAkashcha dhUmo rAtrirapakShayaH |
ayanaM dakShiNaM somo darsha oShadhivIrudhaH || 50||
annaM reta iti kShmesha pitR^iyAnaM punarbhavaH |
ekaikashyenAnupUrvaM bhUtvA bhUtveha jAyate | 51||
niShekAdishmashAnAntaiH saMskAraiH saMskR^ito dvijaH |
indriyeShu kriyAyaj~nAn j~nAnadIpeShu juhvati || 52||
indriyANi manasyUrmau vAchi vaikArikaM manaH |
vAchaM varNasamAmnAye tamo~NkAre svare nyaset |
o~NkAraM bindau nAde taM taM tu prANe mahatyamum || 53||
agniH sUryo divA prAhNaH shuklo rAkottaraM svarAT |
vishvashcha taijasaH prAj~nasturya AtmA samanvayAt || 54||
devayAnamidaM prAhurbhUtvA bhUtvAnupUrvashaH |
AtmayAjyupashAntAtmA hyAtmastho na nivartate || 55||
ya ete pitR^idevAnAmayane vedanirmite |
shAstreNa chakShuShA veda janastho.api na muhyati || 56||
AdAvante janAnAM sadbahirantaH parAvaram |
j~nAnaM j~neyaM vacho vAchyaM tamo jyotistvayaM svayam || 57||
AbAdhito.api hyAbhAso yathA vastutayA smR^itaH |
durghaTatvAdaindriyakaM tadvadarthavikalpitam || 58||
kShityAdInAmihArthAnAM ChAyA na katamApi hi |
na sa~NghAto vikAro.api na pR^itha~N nAnvito mR^iShA || 59||
dhAtavo.avayavitvAchcha tanmAtrAvayavairvinA |
na syurhyasatyavayavinyasannavayavo.antataH || 60||
syAtsAdR^ishyabhramastAvadvikalpe sati vastunaH |
jAgratsvApau yathA svapne tathA vidhiniShedhatA || 61||
bhAvAdvaitaM kriyAdvaitaM dravyAdvaitaM tathA.a.atmanaH |
vartayan svAnubhUtyeha trIn svapnAn dhunute muniH || 62||
kAryakAraNavastvaikyamarshanaM paTatantuvat |
avastutvAdvikalpasya bhAvAdvaitaM taduchyate || 63||
yadbrahmaNi pare sAkShAtsarvakarmasamarpaNam |
manovAktanubhiH pArtha kriyAdvaitaM taduchyate || 64||
AtmajAyAsutAdInAmanyeShAM sarvadehinAm |
yatsvArthakAmayoraikyaM dravyAdvaitaM taduchyate || 65||
yadyasya vAniShiddhaM syAdyena yatra yato nR^ipa |
sa teneheta kAryANi naro nAnyairanApadi || 66||
etairanyaishcha vedoktairvartamAnaH svakarmabhiH |
gR^ihe.apyasya gatiM yAyAdrAjaMstadbhaktibhA~N naraH || 67||
yathA hi yUyaM nR^ipadeva dustyajA\-
dApadgaNAduttaratAtmanaH prabhoH |
yatpAdapa~NkeruhasevayA bhavA\-
nahAraShInnirjitadiggajaH kratUn || 68||
ahaM purAbhavaM kashchidgandharva upabarhaNaH |
nAmnAtIte mahAkalpe gandharvANAM susammataH || 69||
rUpapeshalamAdhuryasaugandhyapriyadarshanaH |
strINAM priyatamo nityaM mattaH svapurulampaTaH | 70||
ekadA devasatre tu gandharvApsarasAM gaNAH |
upahUtA vishvasR^igbhirharigAthopagAyane || 71||
ahaM cha gAyaMstadvidvAn strIbhiH parivR^ito gataH |
j~nAtvA vishvasR^ijastanme helanaM shepurojasA |
yAhi tvaM shUdratAmAshu naShTashrIH kR^itahelanaH || 72||
tAvaddAsyAmahaM jaj~ne tatrApi brahmavAdinAm |
shushrUShayAnuSha~NgeNa prApto.ahaM brahmaputratAm || 73||
dharmaste gR^ihamedhIyo varNitaH pApanAshanaH |
gR^ihastho yena padavIma~njasA nyAsinAmiyAt || 74||
yUyaM nR^iloke bata bhUribhAgA
lokaM punAnA munayo.abhiyanti |
yeShAM gR^ihAnAvasatIti sAkShA\-
dgUDhaM paraM brahma manuShyali~Ngam || 75||
sa vA ayaM brahma mahadvimR^igyaM
kaivalyanirvANasukhAnubhUtiH |
priyaH suhR^idvaH khalu mAtuleya
AtmArhaNIyo vidhikR^idgurushcha || 76||
na yasya sAkShAdbhavapadmajAdibhI
rUpaM dhiyA vastutayopavarNitam |
maunena bhaktyopashamena pUjitaH
prasIdatAmeSha sa sAtvatAM patiH || 77||
shrIshuka uvAcha
iti devarShiNA proktaM nishamya bharatarShabhaH |
pUjayAmAsa suprItaH kR^iShNaM cha premavihvalaH || 78||
kR^iShNapArthAvupAmantrya pUjitaH prayayau muniH |
shrutvA kR^iShNaM paraM brahma pArthaH paramavismitaH || 79||
iti dAkShAyiNInAM te pR^ithagvaMshA prakIrtitAH |
devAsuramanuShyAdyA lokA yatra charAcharAH || 80||
iti shrImadbhAgavate mahApurANe vaiyAsakyAmaShTAdashasAhasryAM
pAramahaMsyAM saMhitAyAM saptamaskandhe yudhiShThiranArada\-
saMvAde sadAchAranirNayo nAma pa~nchadasho.adhyAyaH || 15||
\section{ .. iti saptamaskandhaH samAptaH ..}
\section{.. OM tatsat ..}
\iti
##
Proofread by PSA Easwaran

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}