% Text title            : shrImadbhAgavatam - 12 - dvAdashaskandhaH
% File name             : bhagpur-12.itx
% Category              : purana, shrimadbhagavatam, vyAsa, krishna
% Location              : doc\_purana
% Proofread by          : PSA Easwaran
% Latest update         : July 4, 2021
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. shrImadbhAgavataM - dvAdashaskandhaH ..}##
\itxtitle{.. shrImadbhAgavataM \- dvAdashaskandhaH ..}##\endtitles ##
\chapter{.. OM namo bhagavate vAsudevAya ..}
\section{.. dvAdashaskandhaH ..}
\section{.. prathamo.adhyAyaH \- 1 ..}
rAjovAcha
svadhAmAnugate kR^iShNe yaduvaMshavibhUShaNe |
kasya vaMsho.abhavatpR^ithvyAmetadAchakShva me mune || 1||
shrIshuka uvAcha
yo.antyaH pura~njayo nAma bhAvyo bArhadratho nR^ipa |
tasyAmAtyastu shunako hatvA svAminamAtmajam || 2||
pradyotasa.nj~naM rAjAnaM kartA yatpAlakaH sutaH |
vishAkhayUpastatputro bhavitA rAjakastataH || 3||
nandivardhanastatputraH pa~ncha pradyotanA ime |
aShTAtriMshottarashataM bhokShyanti pR^ithivIM nR^ipAH || 4||
shishunAgastato bhAvyaH kAkavarNastu tatsutaH |
kShemadharmA tasya sutaH kShetraj~naH kShemadharmajaH || 5||
vidhisAraH sutastasyAjAtashatrurbhaviShyati |
darbhakastatsuto bhAvI darbhakasyAjayaH smR^itaH || 6||
nandivardhana Ajeyo mahAnandiH sutastataH |
shishunAgA dashaivaite ShaShTyuttarashatatrayam || 7||
samA bhokShyanti pR^ithivIM kurushreShTha kalau nR^ipAH |
mahAnandisuto rAjan shUdrIgarbhodbhavo balI || 8||
mahApadmapatiH kashchinnandaH kShatravinAshakR^it |
tato nR^ipA bhaviShyanti shUdraprAyAstvadhArmikAH || 9||
sa ekachChatrAM pR^ithivImanulla~NghitashAsanaH |
shAsiShyati mahApadmo dvitIya iva bhArgavaH || 10||
tasya chAShTau bhaviShyanti sumAlyapramukhAH sutAH |
ya imAM bhokShyanti mahIM rAjAnaH sma shataM samAH || 11||
navanandAn dvijaH kashchitprapannAnuddhariShyati |
teShAmabhAve jagatIM mauryA bhokShyanti vai kalau || 12||
sa eva chandraguptaM vai dvijo rAjye.abhiShekShyati |
tatsuto vArisArastu tatashchAshokavardhanaH || 13||
suyashA bhavitA tasya sa~NgataH suyashaH sutaH |
shAlishUkastatastasya somasharmA bhaviShyati || 14||
shatadhanvA tatastasya bhavitA tadbR^ihadrathaH |
mauryA hyete dasha nR^ipAH saptatriMshachChatottaram |
samA bhokShyanti pR^ithivIM kalau kurukulodvaha || 15||
hatvA bR^ihadrathaM mauryaM tasya senApatiH kalau |
puShyamitrastu shu~NgAhvaH svayaM rAjyaM kariShyati
agnimitrastatastasmAtsujyeShTho.atha bhaviShyati || 16||
vasumitro bhadrakashcha pulindo bhavitA tataH |
tato ghoShaH sutastasmAdvajramitro bhaviShyati || 17||
tato bhAgavatastasmAddevabhUtiriti shrutaH |
shu~NgA dashaite bhokShyanti bhUmiM varShashatAdhikam || 18||
tataH kaNvAniyaM bhUmiryAsyatyalpaguNAn nR^ipa |
shu~NgaM hatvA devabhUtiM kaNvo.amAtyastu kAminam || 19||
svayaM kariShyate rAjyaM vasudevo mahAmatiH |
tasya putrastu bhUmitrastasya nArAyaNaH sutaH |
nArAyaNasya bhavitA susharmA nAma vishrutaH || 20||
kANvAyanA ime bhUmiM chatvAriMshachcha pa~ncha cha |
shatAni trINi bhokShyanti varShANAM cha kalau yuge || 21||
hatvA kANvaM susharmANaM tadbhR^ityo vR^iShalo balI |
gAM bhokShyatyandhrajAtIyaH ka~nchitkAlamasattamaH || 22||
kR^iShNanAmAtha tadbhrAtA bhavitA pR^ithivIpatiH |
shrIshAntakarNastatputraH paurNamAsastu tatsutaH || 23||
lambodarastu tatputrastasmAchchibilako nR^ipaH |
meghasvAtishchibilakAdaTamAnastu tasya cha || 24||
aniShTakarmA hAleyastalakastasya chAtmajaH |
purIShabhIrustatputrastato rAjA sunandanaH || 25||
chakoro bahavo yatra shivasvAtirarindamaH |
tasyApi gomatIputraH purImAn bhavitA tataH || 26||
medashirAH shivaskando yaj~nashrIstatsutastataH |
vijayastatsuto bhAvyashchandravij~naH sa lomadhiH || 27||
ete triMshannR^ipatayashchatvAryabdashatAni cha |
ShaTpa~nchAshachcha pR^ithivIM bhokShyanti kurunandana || 28||
saptAbhIrA AvabhR^ityA dashagardabhino nR^ipAH |
ka~NkAH ShoDasha bhUpAlA bhaviShyantyatilolupAH || 29||
tato.aShTau yavanA bhAvyAshchaturdasha turuShkakAH |
bhUyo dasha guruNDAshcha maulA ekAdashaiva tu || 30||
ete bhokShyanti pR^ithivIM dashavarShashatAni cha |
navAdhikAM cha navatiM maulA ekAdasha kShitim || 31||
bhokShyantyabdashatAnya~Nga trINi taiH saMsthite tataH |
kilakilAyAM nR^ipatayo bhUtanando.atha va~NgiriH || 32||
shishunandishcha tadbhrAtA yashonandiH pravIrakaH |
ityete vai varShashataM bhaviShyantyadhikAni ShaT || 33||
teShAM trayodasha sutA bhavitArashcha bAhlikAH |
puShpamitro.atha rAjanyo durmitro.asya tathaiva cha || 34||
ekakAlA ime bhUpAH saptAndhrAH sapta kosalAH |
vidUrapatayo bhAvyA niShadhAstata eva hi || 35||
mAgadhAnAM tu bhavitA vishvasphUrjiH pura~njayaH |
kariShyatyaparo varNAn pulindayadumadrakAn || 36||
prajAshchAbrahmabhUyiShThAH sthApayiShyati durmatiH |
vIryavAn kShatramutsAdya padmavatyAM sa vai puri |
anuga~NgamAprayAgaM guptAM bhokShyati medinIm || 37||
saurAShTrAvantyAbhIrAshcha shUrA arbudamAlavAH |
vrAtyA dvijA bhaviShyanti shUdraprAyA janAdhipAH || 38||
sindhostaTaM chandrabhAgAM kauntIM kAshmIramaNDalam |
bhokShyanti shUdrA vrAtyAdyA mlechChAshchAbrahmavarchasaH || 39||
tulyakAlA ime rAjan mlechChaprAyAshcha bhUbhR^itaH |
ete.adharmAnR^itaparAH phalgudAstIvramanyavaH || 40||
strIbAlagodvijaghnAshcha paradAradhanAdR^itAH |
uditAstamitaprAyA alpasattvAlpakAyuShaH || 41||
asaMskR^itAH kriyAhInA rajasA tamasA.a.avR^itAH |
prajAste bhakShayiShyanti mlechChA rAjanyarUpiNaH || 42||
tannAthAste janapadAstachChIlAchAravAdinaH |
anyonyato rAjabhishcha kShayaM yAsyanti pIDitAH || 43||
iti shrImadbhAgavate mahApurANe pAramahaMsyAM
saMhitAyAM dvAdashaskandhe prathamo.adhyAyaH || 1||
\iti
\section{.. OM namo bhagavate vAsudevAya ..}
\section{.. dvitIyo.adhyAyaH \- 2 ..}
shrIshuka uvAcha
tatashchAnudinaM dharmaH satyaM shauchaM kShamA dayA |
kAlena balinA rAjanna~NkShyatyAyurbalaM smR^itiH || 1||
vittameva kalau nR^INAM janmAchAraguNodayaH |
dharmanyAyavyavasthAyAM kAraNaM balameva hi || 2||
dAmpatye.abhiruchirheturmAyaiva vyAvahArike |
strItve puMstve cha hi ratirvipratve sUtrameva hi || 3||
li~NgamevAshramakhyAtAvanyonyApattikAraNam |
avR^ittyA nyAyadaurbalyaM pANDitye chApalaM vachaH || 4||
anADhyataivAsAdhutve sAdhutve dambha eva tu |
svIkAra eva chodvAhe snAnameva prasAdhanam || 5||
dUre vAryayanaM tIrthaM lAvaNyaM keshadhAraNam |
udarambharatA svArthaH satyatve dhArShTyameva hi || 6||
dAkShyaM kuTumbabharaNaM yasho.arthe dharmasevanam |
evaM prajAbhirduShTAbhirAkIrNe kShitimaNDale || 7||
brahmaviTkShatrashUdrANAM yo balI bhavitA nR^ipaH |
prajA hi lubdhai rAjanyairnirghR^iNairdasyudharmabhiH || 8||
AchChinnadAradraviNA yAsyanti girikAnanam |
shAkamUlAmiShakShaudraphalapuShpAShTibhojanAH || 9||
anAvR^iShTyA vina~NkShyanti durbhikShakarapIDitAH |
shItavAtAtapaprAvR^iD himairanyonyataH prajAH || 10||
kShuttR^iDbhyAM vyAdhibhishchaiva santapsyante cha chintayA |
triMshadviMshati varShANi paramAyuH kalau nR^iNAm || 11||
kShIyamANeShu deheShu dehinAM kalidoShataH |
varNAshramavatAM dharme naShTe vedapathe nR^iNAm || 12||
pAkhaNDaprachure dharme dasyuprAyeShu rAjasu |
chauryAnR^itavR^ithAhiMsA nAnAvR^ittiShu vai nR^iShu || 13||
shUdraprAyeShu varNeShu chChAgaprAyAsu dhenuShu |
gR^ihaprAyeShvAshrameShu yaunaprAyeShu bandhuShu || 14||
aNuprAyAsvoShadhIShu shamIprAyeShu sthAsnuShu |
vidyutprAyeShu megheShu shUnyaprAyeShu sadmasu || 15||
itthaM kalau gataprAye janeShu kharadharmiShu |
dharmatrANAya sattvena bhagavAnavatariShyati || 16||
charAcharagurorviShNorIshvarasyAkhilAtmanaH |
dharmatrANAya sAdhUnAM janmakarmApanuttaye || 17||
shambhalagrAmamukhyasya brAhmaNasya mahAtmanaH |
bhavane viShNuyashasaH kalkiH prAdurbhaviShyati || 18||
ashvamAshugamAruhya devadattaM jagatpatiH |
asinAsAdhudamanamaShTaishvaryaguNAnvitaH || 19||
vicharannAshunA kShoNyAM hayenApratimadyutiH |
nR^ipali~NgachChado dasyUn koTisho nihaniShyati || 20||
atha teShAM bhaviShyanti manAMsi vishadAni vai |
vAsudevA~NgarAgAti puNyagandhAnilaspR^ishAm |
paurajAnapadAnAM vai hateShvakhiladasyuShu || 21||
teShAM prajAvisargashcha sthaviShThaH sambhaviShyati |
vAsudeve bhagavati sattvamUrtau hR^idi sthite || 22||
yadAvatIrNo bhagavAn kalkirdharmapatirhariH |
kR^itaM bhaviShyati tadA prajA sUtishcha sAttvikI || 23||
yadA chandrashcha sUryashcha tathA tiShyabR^ihaspatI |
ekarAshau sameShyanti bhaviShyati tadA kR^itam || 24||
ye.atItA vartamAnA ye bhaviShyanti cha pArthivAH |
te ta uddeshataH proktA vaMshIyAH somasUryayoH || 25||
Arabhya bhavato janma yAvannandAbhiShechanam |
etadvarShasahasraM tu shataM pa~nchadashottaram || 26||
saptarShINAM tu yau pUrvau dR^ishyete uditau divi |
tayostu madhye nakShatraM dR^ishyate yatsamaM nishi || 27||
tenaita R^iShayo yuktAstiShThantyabdashataM nR^iNAm |
te tvadIye dvijAH kAle adhunA chAshritA maghAH || 28||
viShNorbhagavato bhAnuH kR^iShNAkhyo.asau divaM gataH |
tadAvishatkalirlokaM pApe yadramate janaH || 29||
yAvatsa pAdapadmAbhyAM spR^ishannAste ramApatiH |
tAvatkalirvai pR^ithivIM parAkrAntuM na chAshakat || 30||
yadA devarShayaH sapta maghAsu vicharanti hi |
tadA pravR^ittastu kalirdvAdashAbdashatAtmakaH || 31||
yadA maghAbhyo yAsyanti pUrvAShADhAM maharShayaH |
tadA nandAtprabhR^ityeSha kalirvR^iddhiM gamiShyati || 32||
yasmin kR^iShNo divaM yAtastasminneva tadAhani |
pratipannaM kaliyugamiti prAhuH purAvidaH || 33||
divyAbdAnAM sahasrAnte chaturthe tu punaH kR^itam |
bhaviShyati yadA nR^INAM mana AtmaprakAshakam || 34||
ityeSha mAnavo vaMsho yathA sa~NkhyAyate bhuvi |
tathA viTshUdraviprANAM tAstA j~neyA yuge yuge || 35||
eteShAM nAmali~NgAnAM puruShANAM mahAtmanAm |
kathAmAtrAvashiShTAnAM kIrtireva sthitA bhuvi || 36||
devApiH shantanorbhrAtA marushchekShvAkuvaMshajaH |
kalApagrAma AsAte mahAyogabalAnvitau || 37||
tAvihaitya kalerante vAsudevAnushikShitau |
varNAshramayutaM dharmaM pUrvavatprathayiShyataH || 38||
kR^itaM tretA dvAparaM cha kalishcheti chaturyugam |
anena kramayogena bhuvi prANiShu vartate || 39||
rAjannete mayA proktA naradevAstathApare |
bhUmau mamatvaM kR^itvAnte hitvemAM nidhanaM gatAH || 40||
kR^imiviDbhasmasa.nj~nAnte rAjanAmno.api yasya cha |
bhUtadhruk tatkR^ite svArthaM kiM veda nirayo yataH || 41||
kathaM seyamakhaNDA bhUH pUrvairme puruShairdhR^itA |
matputrasya cha pautrasya matpUrvA vaMshajasya vA || 42||
tejobannamayaM kAyaM gR^ihItvA.a.atmatayAbudhAH |
mahIM mamatayA chobhau hitvAnte.adarshanaM gatAH || 43||
ye ye bhUpatayo rAjan bhu~njanti bhuvamojasA |
kAlena te kR^itAH sarve kathAmAtrAH kathAsu cha || 44||
iti shrImadbhAgavate mahApurANe pAramahaMsyAM
saMhitAyAM dvAdashaskandhe dvitIyo.adhyAyaH || 2||
\iti
\section{.. OM namo bhagavate vAsudevAya ..}
\section{.. tR^itIyo.adhyAyaH \- 3 ..}
shrIshuka uvAcha
dR^iShTvA.a.atmani jaye vyagrAn nR^ipAn hasati bhUriyam |
aho mA vijigIShanti mR^ityoH krIDanakA nR^ipAH || 1||
kAma eSha narendrANAM moghaH syAdviduShAmapi |
yena phenopame piNDe ye.ativishrambhitA nR^ipAH || 2||
pUrvaM nirjitya ShaDvargaM jeShyAmo rAjamantriNaH |
tataH sachivapaurAptakarIndrAnasya kaNTakAn || 3||
evaM krameNa jeShyAmaH pR^ithvIM sAgaramekhalAm |
ityAshAbaddhahR^idayA na pashyantyantike.antakam || 4||
samudrAvaraNAM jitvA mAM vishantyabdhimojasA |
kiyadAtmajayasyaitanmuktirAtmajaye phalam || 5||
yAM visR^ijyaiva manavastatsutAshcha kurUdvaha |
gatA yathAgataM yuddhe tAM mAM jeShyantyabuddhayaH || 6||
matkR^ite pitR^iputrANAM bhrAtR^INAM chApi vigrahaH |
jAyate hyasatAM rAjye mamatAbaddhachetasAm || 7||
mamaiveyaM mahI kR^itsnA na te mUDheti vAdinaH |
spardhamAnA mitho ghnanti mriyante matkR^ite nR^ipAH || 8||
pR^ithuH purUravA gAdhirnahuSho bharato.arjunaH |
mAndhAtA sagaro rAmaH khaTvA~Ngo dhundhuhA raghuH || 9||
tR^iNabinduryayAtishcha sharyAtiH shantanurgayaH |
bhagIrathaH kuvalayAshvaH kakutstho naiShadho nR^igaH || 10||
hiraNyakashipurvR^itro rAvaNo lokarAvaNaH |
namuchiH shambaro bhaumo hiraNyAkSho.atha tArakaH || 11||
anye cha bahavo daityA rAjAno ye maheshvarAH |
sarve sarvavidaH shUrAH sarve sarvajito.ajitAH || 12||
mamatAM mayyavartanta kR^itvochchairmartyadharmiNaH |
kathAvasheShAH kAlena hyakR^itArthAH kR^itA vibho || 13||
kathA imAste kathitA mahIyasAM
vitAya lokeShu yashaH pareyuShAm |
vij~nAnavairAgyavivakShayA vibho
vacho vibhUtIrna tu pAramArthyam || 14||
yastUttamashlokaguNAnuvAdaH
sa~NgIyate.abhIkShNamama~NgalaghnaH |
tameva nityaM shR^iNuyAdabhIkShNaM
kR^iShNe.amalAM bhaktimabhIpsamAnaH || 15||
rAjovAcha
kenopAyena bhagavan kalerdoShAn kalau janAH |
vidhamiShyantyupachitAMstanme brUhi yathA mune || 16||
yugAni yugadharmAMshcha mAnaM pralayakalpayoH |
kAlasyeshvararUpasya gatiM viShNormahAtmanaH || 17||
shrIshuka uvAcha
kR^ite pravartate dharmashchatuShpAttajjanairdhR^itaH |
satyaM dayA tapo dAnamiti pAdA vibhornR^ipa || 18||
santuShTAH karuNA maitrAH shAntA dAntAstitikShavaH |
AtmArAmAH samadR^ishaH prAyashaH shramaNA janAH || 19||
tretAyAM dharmapAdAnAM turyAMsho hIyate shanaiH |
adharmapAdairanR^itahiMsAsantoShavigrahaiH || 20||
tadA kriyA tapo niShThA nAtihiMsrA na lampaTAH |
traivargikAstrayIvR^iddhA varNA brahmottarA nR^ipa || 21||
tapaHsatyadayAdAneShvardhaM hrasati dvApare |
hiMsAtuShTyanR^itadveShairdharmasyAdharmalakShaNaiH || 22||
yashasvino mahAshAlAH svAdhyAyAdhyayane ratAH |
ADhyAH kuTumbino hR^iShTA varNAH kShatradvijottarAH || 23||
kalau tu dharmahetunAM turyAMsho.adharmahetubhiH |
edhamAnaiH kShIyamANo hyante so.api vina~NkShyati || 24||
tasmin lubdhA durAchArA nirdayAH shuShkavairiNaH |
durbhagA bhUritarShAshcha shUdradAshottarAH prajAH || 25||
sattvaM rajastama iti dR^ishyante puruShe guNAH |
kAlasa~nchoditAste vai parivartanta Atmani || 26||
prabhavanti yadA sattve manobuddhIndriyANi cha |
tadA kR^itayugaM vidyAjj~nAne tapasi yadruchiH || 27||
yadA dharmArthakAmeShu bhaktirbhavati dehinAm |
tadA tretA rajo vR^ittiriti jAnIhi buddhiman || 28||
yadA lobhastvasantoSho mAno dambho.atha matsaraH |
karmaNAM chApi kAmyAnAM dvAparaM tadrajastamaH || 29||
yadA mAyAnR^itaM tandrA nidrA hiMsA viShAdanam |
shoko moho bhayaM dainyaM sa kalistAmasaH smR^itaH || 30||
yasmAtkShudradR^isho martyAH kShudrabhAgyA mahAshanAH |
kAmino vittahInAshcha svairiNyashcha striyo.asatIH || 31||
dasyUtkR^iShTA janapadA vedAH pAkhaNDadUShitAH |
rAjAnashcha prajAbhakShAH shishnodaraparA dvijAH || 32||
avratA vaTavo.ashauchA bhikShavashcha kuTumbinaH |
tapasvino grAmavAsA nyAsino.atyarthalolupAH || 33||
hrasvakAyA mahAhArA bhUryapatyA gatahriyaH |
shashvatkaTukabhAShiNyashchauryamAyorusAhasAH || 34||
paNayiShyanti vai kShudrAH kirATAH kUTakAriNaH |
anApadyapi maMsyante vArtAM sAdhu jugupsitAm || 35||
patiM tyakShyanti nirdravyaM bhR^ityA apyakhilottamam |
bhR^ityaM vipannaM patayaH kaulaM gAshchApayasvinIH || 36||
pitR^ibhrAtR^isuhR^ijj~nAtIn hitvA sauratasauhR^idAH |
nanAndR^ishyAlasaMvAdA dInAH straiNAH kalau narAH || 37||
shUdrAH pratigrahIShyanti tapoveShopajIvinaH |
dharmaM vakShyantyadharmaj~nA adhiruhyottamAsanam || 38||
nityamudvignamanaso durbhikShakarakarshitAH |
niranne bhUtale rAjannanAvR^iShTibhayAturAH || 39||
vAso.annapAnashayanavyavAyasnAnabhUShaNaiH |
hInAH pishAchasandarshA bhaviShyanti kalau prajAH || 40||
kalau kAkiNike.apyarthe vigR^ihya tyaktasauhR^idAH |
tyakShyanti cha priyAn prANAn haniShyanti svakAnapi || 41||
na rakShiShyanti manujAH sthavirau pitarAvapi |
putrAn sarvArthakushalAn kShudrAH shishnodarambharAH || 42||
kalau na rAjan jagatAM paraM guruM
trilokanAthAnatapAdapa~Nkajam |
prAyeNa martyA bhagavantamachyutaM
yakShyanti pAkhaNDavibhinnachetasaH || 43||
yannAmadheyaM mriyamANa AturaH
patan skhalan vA vivasho gR^iNan pumAn |
vimuktakarmArgala uttamAM gatiM
prApnoti yakShyanti na taM kalau janAH || 44||
puMsAM kalikR^itAn doShAn dravyadeshAtmasambhavAn |
sarvAn harati chittastho bhagavAn puruShottamaH || 45||
shrutaH sa~NkIrtito dhyAtaH pUjitashchAdR^ito.api vA |
nR^iNAM dhunoti bhagavAn hR^itstho janmAyutAshubham || 46||
yathA hemni sthito vahnirdurvarNaM hanti dhAtujam |
evamAtmagato viShNuryoginAmashubhAshayam || 47||
vidyAtapaHprANanirodhamaitrI
tIrthAbhiShekavratadAnajapyaiH |
nAtyantashuddhiM labhate.antarAtmA
yathA hR^idisthe bhagavatyanante || 48||
tasmAtsarvAtmanA rAjan hR^idisthaM kuru keshavam |
mriyamANo hyavahitastato yAsi parAM gatim || 49||
mriyamANairabhidhyeyo bhagavAn parameshvaraH |
AtmabhAvaM nayatya~Nga sarvAtmA sarvasaMshrayaH || 50||
kalerdoShanidhe rAjannasti hyeko mahAn guNaH |
kIrtanAdeva kR^iShNasya muktasa~NgaH paraM vrajet || 51||
kR^ite yad.hdhyAyato viShNuM tretAyAM yajato makhaiH |
dvApare paricharyAyAM kalau taddharikIrtanAt || 52||
iti shrImadbhAgavate mahApurANe pAramahaMsyAM
saMhitAyAM dvAdashaskandhe tR^itIyo.adhyAyaH || 3||
\iti
\section{.. OM namo bhagavate vAsudevAya ..}
\section{.. chaturtho.adhyAyaH \- 4 ..}
shrIshuka uvAcha
kAlaste paramANvAdirdviparArdhAvadhirnR^ipa |
kathito yugamAnaM cha shR^iNu kalpalayAvapi || 1||
chaturyugasahasraM cha brahmaNo dinamuchyate |
sa kalpo yatra manavashchaturdasha vishAmpate || 2||
tadante pralayastAvAn brAhmI rAtrirudAhR^itA |
trayo lokA ime tatra kalpante pralayAya hi || 3||
eSha naimittikaH proktaH pralayo yatra vishvasR^ik |
shete.anantAsano vishvamAtmasAtkR^itya chAtmabhUH || 4||
dviparArdhe tvatikrAnte brahmaNaH parameShThinaH |
tadA prakR^itayaH sapta kalpante pralayAya vai || 5||
eSha prAkR^itiko rAjan pralayo yatra lIyate |
ANDakoshastu sa~NghAto vighAta upasAdite || 6||
parjanyaH shatavarShANi bhUmau rAjan na varShati |
tadA niranne hyanyonyaM bhakShamANAH kShudhArditAH || 7||
kShayaM yAsyanti shanakaiH kAlenopadrutAH prajAH |
sAmudraM daihikaM bhaumaM rasaM sAMvartako raviH || 8||
rashmibhiH pibate ghoraiH sarvaM naiva vimu~nchati |
tataH sAMvartako vahniH sa~NkarShaNamukhotthitaH || 9||
dahatyanilavegotthaH shUnyAn bhUvivarAnatha |
uparyadhaH samantAchcha shikhAbhirvahnisUryayoH || 10||
dahyamAnaM vibhAtyaNDaM dagdhagomayapiNDavat |
tataH prachaNDapavano varShANAmadhikaM shatam || 11||
paraH sAMvartako vAti dhUmraM khaM rajasA.a.avR^itam |
tato meghakulAnya~Nga chitravarNAnyanekashaH || 12||
shataM varShANi varShanti nadanti rabhasasvanaiH |
tata ekodakaM vishvaM brahmANDavivarAntaram || 13||
tadA bhUmergandhaguNaM grasantyApa udaplave |
grastagandhA tu pR^ithivI pralayatvAya kalpate || 14||
apAM rasamatho tejastA lIyante.atha nIrasAH |
grasate tejaso rUpaM vAyustadrahitaM tadA || 15||
lIyate chAnile tejo vAyoH khaM grasate guNam |
sa vai vishati khaM rAjaMstatashcha nabhaso guNam || 16||
shabdaM grasati bhUtAdirnabhastamanulIyate |
taijasashchendriyANya~Nga devAn vaikAriko guNaiH || 17||
mahAn grasatyaha~NkAraM guNAH sattvAdayashcha tam |
grasate.avyAkR^itaM rAjan guNAn kAlena choditam || 18||
na tasya kAlAvayavaiH pariNAmAdayo guNAH |
anAdyanantamavyaktaM nityaM kAraNamavyayam || 19||
na yatra vAcho na mano na sattvaM
tamo rajo vA mahadAdayo.amI |
na prANabuddhIndriyadevatA vA
na sanniveshaH khalu lokakalpaH || 20||
na svapnajAgranna cha tatsuShuptaM
na khaM jalaM bhUranilo.agnirarkaH |
saMsuptavachChUnyavadapratarkyaM
tanmUlabhUtaM padamAmananti || 21||
layaH prAkR^itiko hyeSha puruShAvyaktayoryadA |
shaktayaH sampralIyante vivashAH kAlavidrutAH || 22||
buddhIndriyArtharUpeNa j~nAnaM bhAti tadAshrayam |
dR^ishyatvAvyatirekAbhyAmAdyantavadavastu yat || 23||
dIpashchakShushcha rUpaM cha jyotiSho na pR^ithagbhavet |
evaM dhIH khAni mAtrAshcha na syuranyatamAdR^itAt || 24||
buddherjAgaraNaM svapnaH suShuptiriti chochyate |
mAyAmAtramidaM rAjan nAnAtvaM pratyagAtmani || 25||
yathA jaladharA vyomni bhavanti na bhavanti cha |
brahmaNIdaM tathA vishvamavayavyudayApyayAt || 26||
satyaM hyavayavaH proktaH sarvAvayavinAmiha |
vinArthena pratIyeran paTasyevA~Nga tantavaH || 27||
yatsAmAnyavisheShAbhyAmupalabhyeta sabhramaH |
anyonyApAshrayAtsarvamAdyantavadavastu yat || 28||
vikAraH khyAyamAno.api pratyagAtmAnamantarA |
na nirUpyo.astyaNurapi syAchchechchitsama Atmavat || 29||
na hi satyasya nAnAtvamavidvAn yadi manyate |
nAnAtvaM ChidrayoryadvajjyotiShorvAtayoriva || 30||
yathA hiraNyaM bahudhA samIyate
nR^ibhiH kriyAbhirvyavahAravartmasu |
evaM vachobhirbhagavAnadhokShajo
vyAkhyAyate laukikavaidikairjanaiH || 31||
yathA ghano.arkaprabhavo.arkadarshito
hyarkAMshabhUtasya cha chakShuShastamaH |
evaM tvahaM brahma guNastadIkShito
brahmAMshakasyAtmana AtmabandhanaH || 32||
ghano yadArkaprabhavo vidIryate
chakShuH svarUpaM ravimIkShate tadA |
yadA hyaha~NkAra upAdhirAtmano
jij~nAsayA nashyati tarhyanusmaret || 33||
yadaivametena vivekahetinA
mAyAmayAha~NkaraNAtmabandhanam |
ChittvAchyutAtmAnubhavo.avatiShThate
tamAhurAtyantikama~Nga samplavam || 34||
nityadA sarvabhUtAnAM brahmAdInAM parantapa |
utpattipralayAveke sUkShmaj~nAH samprachakShate || 35||
kAlasroto javenAshu hriyamANasya nityadA |
pariNAminAmavasthAstA janmapralayahetavaH || 36||
anAdyantavatAnena kAleneshvaramUrtinA |
avasthA naiva dR^ishyante viyati jyotiShAmiva || 37||
nityo naimittikashchaiva tathA prAkR^itiko layaH |
Atyantikashcha kathitaH kAlasya gatirIdR^ishI || 38||
etAH kurushreShTha jagadvidhAtuH
nArAyaNasyAkhilasattvadhAmnaH |
lIlAkathAste kathitAH samAsataH
kArtsnyena nAjo.apyabhidhAtumIshaH || 39||
saMsArasindhumatidustaramuttitIrSho\-
rnAnyaH plavo bhagavataH puruShottamasya |
lIlAkathArasaniShevaNamantareNa
puMso bhavedvividhaduHkhadavArditasya || 40||
purANasaMhitAmetAmR^iShirnArAyaNo.avyayaH |
nAradAya purA prAha kR^iShNadvaipAyanAya saH || 41||
sa vai mahyaM mahArAja bhagavAn bAdarAyaNaH |
imAM bhAgavatIM prItaH saMhitAM vedasammitAm || 42||
etAM vakShyatyasau sUtaH R^iShibhyo naimiShAlaye |
dIrghasatre kurushreShTha sampR^iShTaH shaunakAdibhiH || 43||
iti shrImadbhAgavate mahApurANe pAramahaMsyAM
saMhitAyAM dvAdashaskandhe chaturtho.adhyAyaH || 4||
\iti
\section{.. OM namo bhagavate vAsudevAya ..}
\section{.. pa~nchamo.adhyAyaH \- 5 ..}
shrIshuka uvAcha
atrAnuvarNyate.abhIkShNaM vishvAtmA bhagavAn hariH |
yasya prasAdajo brahmA rudraH krodhasamudbhavaH || 1||
tvaM tu rAjan mariShyeti pashubuddhimimAM jahi |
na jAtaH prAgabhUto.adya dehavattvaM na na~NkShyasi || 2||
na bhaviShyasi bhUtvA tvaM putrapautrAdirUpavAn |
bIjA~NkuravaddehAdervyatirikto yathAnalaH || 3||
svapne yathA shirashChedaM pa~nchatvAdyAtmanaH svayam |
yasmAtpashyati dehasya tata AtmA hyajo.amaraH || 4||
ghaTe bhinne yathA.a.akAsha AkAshaH syAdyathA purA |
evaM dehe mR^ite jIvo brahma sampadyate punaH || 5||
manaH sR^ijati vai dehAn guNAn karmANi chAtmanaH |
tanmanaH sR^ijate mAyA tato jIvasya saMsR^itiH || 6||
snehAdhiShThAnavartyagnisaMyogo yAvadIyate |
tato dIpasya dIpatvamevaM dehakR^ito bhavaH |
rajaHsattvatamovR^ittyA jAyate.atha vinashyati || 7||
na tatrAtmA svaya~njyotiryo vyaktAvyaktayoH paraH |
AkAsha iva chAdhAro dhruvo.anantopamastataH || 8||
evamAtmAnamAtmasthamAtmanaivAmR^isha prabho |
bud.hdhyAnumAnagarbhiNyA vAsudevAnuchintayA || 9||
chodito vipravAkyena na tvAM dhakShyati takShakaH |
mR^ityavo nopadhakShyanti mR^ityUnAM mR^ityumIshvaram || 10||
ahaM brahma paraM dhAma brahmAhaM paramaM padam |
evaM samIkShannAtmAnamAtmanyAdhAya niShkale || 11||
dashantaM takShakaM pAde lelihAnaM viShAnanaiH |
na drakShyasi sharIraM cha vishvaM cha pR^ithagAtmanaH || 12||
etatte kathitaM tAta yadAtmA pR^iShTavAn nR^ipa |
harervishvAtmanashcheShTAM kiM bhUyaH shrotumichChasi || 13||
iti shrImadbhAgavate mahApurANe pAramahaMsyAM saMhitAyAM
dvAdashaskandhe brahmopadesho nAma pa~nchamo.adhyAyaH || 5||
\iti
\section{.. OM namo bhagavate vAsudevAya ..}
\section{.. ShaShTho.adhyAyaH\- 6 ..}
sUta uvAcha
etannishamya muninAbhihitaM parIkShid\-
vyAsAtmajena nikhilAtmadR^ishA samena |
tatpAdamUlamupasR^itya natena mUrdhnA
baddhA~njalistamidamAha sa viShNurAtaH || 1||
rAjovAcha
siddho.asmyanugR^ihIto.asmi bhavatA karuNAtmanA |
shrAvito yachcha me sAkShAdanAdinidhano hariH || 2||
nAtyadbhutamahaM manye mahatAmachyutAtmanAm |
aj~neShu tApatapteShu bhUteShu yadanugrahaH || 3||
purANasaMhitAmetAmashrauShma bhavato vayam |
yasyAM khalUttamashloko bhagavAnanuvarNyate || 4||
bhagavaMstakShakAdibhyo mR^ityubhyo na bibhemyaham |
praviShTo brahmanirvANamabhayaM darshitaM tvayA || 5||
anujAnIhi mAM brahman vAchaM yachChAmyadhokShaje |
muktakAmAshayaM chetaH praveshya visR^ijAmyasUn || 6||
aj~nAnaM cha nirastaM me j~nAnavij~nAnaniShThayA |
bhavatA darshitaM kShemaM paraM bhagavataH padam || 7||
sUta uvAcha
ityuktastamanuj~nApya bhagavAn bAdarAyaNiH |
jagAma bhikShubhiH sAkaM naradevena pUjitaH || 8||
parIkShidapi rAjarShirAtmanyAtmAnamAtmanA |
samAdhAya paraM dadhyAvaspandAsuryathA taruH || 9||
prAkkUle barhiShyAsIno ga~NgAkUla uda~NmukhaH |
brahmabhUto mahAyogI niHsa~NgashChinnasaMshayaH || 10||
takShakaH prahito viprAH kruddhena dvijasUnunA |
hantukAmo nR^ipaM gachChan dadarsha pathi kashyapam || 11||
taM tarpayitvA draviNairnivartya viShahAriNam |
dvijarUpapratichChannaH kAmarUpo.adashannR^ipam || 12||
brahmabhUtasya rAjarSherdeho.ahigaralAgninA |
babhUva bhasmasAtsadyaH pashyatAM sarvadehinAm || 13||
hAhAkAro mahAnAsIdbhuvi khe dikShu sarvataH |
vismitA hyabhavan sarve devAsuranarAdayaH || 14||
devadundubhayo nedurgandharvApsaraso jaguH |
vavR^iShuH puShpavarShANi vibudhAH sAdhuvAdinaH || 15||
janamejayaH svapitaraM shrutvA takShakabhakShitam |
yathA juhAva sa~Nkruddho nAgAn satre saha dvijaiH || 16||
sarpasatre samiddhAgnau dahyamAnAn mahoragAn |
dR^iShTvendraM bhayasaMvignastakShakaH sharaNaM yayau || 17||
apashyaMstakShakaM tatra rAjA pArIkShito dvijAn |
uvAcha takShakaH kasmAnna dahyetoragAdhamaH || 18||
taM gopAyati rAjendra shakraH sharaNamAgatam |
tena saMstambhitaH sarpastasmAnnAgnau patatyasau || 19||
pArIkShita iti shrutvA prAhartvija udAradhIH |
sahendrastakShako viprA nAgnau kimiti pAtyate || 20||
tachChrutvA.a.ajuhuvurviprAH sahendraM takShakaM makhe |
takShakAshu patasveha sahendreNa marutvatA || 21||
iti brahmoditAkShepaiH sthAnAdindraH prachAlitaH |
babhUva sambhrAntamatiH savimAnaH satakShakaH || 22||
taM patantaM vimAnena saha takShakamambarAt |
vilokyA~NgirasaH prAha rAjAnaM taM bR^ihaspatiH || 23||
naiSha tvayA manuShyendra vadhamarhati sarparAT |
anena pItamamR^itamatha vA ajarAmaraH || 24||
jIvitaM maraNaM jantorgatiH svenaiva karmaNA |
rAjaMstato.anyo nAstyasya pradAtA sukhaduHkhayoH || 25||
sarpachaurAgnividyudbhyaH kShuttR^iTvyAdhyAdibhirnR^ipa |
pa~nchatvamR^ichChate janturbhu~Nkta Arabdhakarma tat || 26||
tasmAtsatramidaM rAjan saMsthIyetAbhichArikam |
sarpA anAgaso dagdhA janairdiShTaM hi bhujyate || 27||
sUta uvAcha
ityuktaH sa tathetyAha maharShermAnayan vachaH |
sarpasatrAduparataH pUjayAmAsa vAkpatim || 28||
saiShA viShNormahAmAyAbAdhyayAlakShaNA yayA |
muhyantyasyaivAtmabhUtA bhUteShu guNavR^ittibhiH || 29||
na yatra dambhItyabhayA virAjitA
mAyA.a.atmavAde.asakR^idAtmavAdibhiH |
na yadvivAdo vividhastadAshrayo
manashcha sa~NkalpavikalpavR^itti yat || 30||
na yatra sR^ijyaM sR^ijatobhayoH paraM
shreyashcha jIvastribhiranvitastvaham |
tadetadutsAditabAdhyabAdhakaM
niShidhya chormInvirametsvayaM muniH || 31||
paraM padaM vaiShNavamAmananti tad\-
yanneti netItyatadutsisR^ikShavaH |
visR^ijya daurAtmyamananyasauhR^idA
hR^idopaguhyAvasitaM samAhitaiH || 32||
ta etadadhigachChanti viShNoryatparamaM padam |
ahaM mameti daurjanyaM na yeShAM dehagehajam || 33||
ativAdAMstitikSheta nAvamanyeta ka~nchana |
na chemaM dehamAshritya vairaM kurvIta kenachit || 34||
namo bhagavate tasmai kR^iShNAyAkuNThamedhase |
yatpAdAmburuhadhyAnAtsaMhitAmadhyagAmimAm || 35||
shaunaka uvAcha
pailAdibhirvyAsashiShyairvedAchAryairmahAtmabhiH |
vedAshcha kathitA vyastA etatsaumyAbhidhehi naH || 36||
sUta uvAcha
samAhitAtmano brahman brahmaNaH parameShThinaH |
hR^idyAkAshAdabhUnnAdo vR^ittirodhAdvibhAvyate || 37||
yadupAsanayA brahman yogino malamAtmanaH |
dravyakriyAkArakAkhyaM dhUtvA yAntyapunarbhavam || 38||
tato.abhUttrivR^ido~NkAro yo.avyaktaprabhavaH svarAT |
yattalli~NgaM bhagavato brahmaNaH paramAtmanaH || 39||
shR^iNoti ya imaM sphoTaM suptashrotre cha shUnyadR^ik |
yena vAgvyajyate yasya vyaktirAkAsha AtmanaH || 40||
svadhAmno brAhmaNaH sAkShAdvAchakaH paramAtmanaH |
sa sarvamantropaniShadvedabIjaM sanAtanam || 41||
tasya hyAsaMstrayo varNA akArAdyA bhR^igUdvaha |
dhAryante yaistrayo bhAvA guNanAmArthavR^ittayaH || 42||
tato.akSharasamAmnAyamasR^ijadbhagavAnajaH |
antasthoShmasvarasparshahrasvadIrghAdilakShaNam || 43||
tenAsau chaturo vedAMshchaturbhirvadanairvibhuH |
savyAhR^itikAn so~NkArAMshchAturhotravivakShayA || 44||
putrAnadhyApayattAMstu brahmarShIn brahmakovidAn |
te tu dharmopadeShTAraH svaputrebhyaH samAdishan || 45||
te paramparayA prAptAstattachChiShyairdhR^itavrataiH |
chaturyugeShvatha vyastA dvAparAdau maharShibhiH || 46||
kShINAyuShaH kShINasattvAn durmedhAn vIkShya kAlataH |
vedAn brahmarShayo vyasyan hR^idisthAchyutachoditAH || 47||
asminnapyantare brahman bhagavAn lokabhAvanaH |
brahmeshAdyairlokapAlairyAchito dharmaguptaye || 48||
parAsharAtsatyavatyAmaMshAMshakalayA vibhuH |
avatIrNo mahAbhAga vedaM chakre chaturvidham || 49||
R^igatharvayajuHsAmnAM rAshIruddhR^itya vargashaH |
chatasraH saMhitAshchakre mantrairmaNigaNA iva || 50||
tAsAM sa chaturaH shiShyAnupAhUya mahAmatiH |
ekaikAM saMhitAM brahmannekaikasmai dadau vibhuH || 51||
pailAya saMhitAmAdyAM bahvR^ichAkhyAmuvAcha ha |
vaishampAyanasa.nj~nAya nigadAkhyaM yajurgaNam || 52||
sAmnAM jaiminaye prAha tathA ChandogasaMhitAm |
atharvA~NgirasIM nAma svashiShyAya sumantave || 53||
pailaH svasaMhitAmUche indrapramitaye muniH |
bAShkalAya cha so.apyAha shiShyebhyaH saMhitAM svakAm || 54||
chaturdhA vyasya bodhyAya yAj~navalkyAya bhArgava |
parAsharAyAgnimitra indrapramitirAtmavAn || 55||
adhyApayatsaMhitAM svAM mANDUkeyamR^iShiM kavim |
tasya shiShyo devamitraH saubharyAdibhya UchivAn || 56||
shAkalyastatsutaH svAM tu pa~nchadhA vyasya saMhitAm |
vAtsyamudgalashAlIyagokhalyashishireShvadhAt || 57||
jAtUkarNyashcha tachChiShyaH saniruktAM svasaMhitAm |
balAkapailavaitAlavirajebhyo dadau muniH || 58||
bAShkaliH pratishAkhAbhyo vAlakhilyAkhyasaMhitAm |
chakre vAlAyanirbhajyaH kAsArashchaiva tAM dadhuH || 59||
bahvR^ichAH saMhitA hyetA ebhirbrahmarShibhirdhR^itAH |
shrutvaitachChandasAM vyAsaM sarvapApaiH pramuchyate || 60||
vaishampAyanashiShyA vai charakAdhvaryavo.abhavan |
yachcherurbrahmahatyAMhaH kShapaNaM svagurorvratam || 61||
yAj~navalkyashcha tachChiShya AhAho bhagavan kiyat |
charitenAlpasArANAM chariShye.ahaM sudushcharam || 62||
ityukto gururapyAha kupito yAhyalaM tvayA |
viprAvamantrA shiShyeNa madadhItaM tyajAshviti || 63||
devarAtasutaH so.api CharditvA yajuShAM gaNam |
tato gato.atha munayo dadR^ishustAn yajurgaNAn || 64||
yajUMShi tittirA bhUtvA tallolupatayA.a.adaduH |
taittirIyA iti yajuHshAkhA Asan supeshalAH || 65||
yAj~navalkyastato brahmaMshChandAMsyadhigaveShayan |
guroravidyamAnAni sUpatasthe.arkamIshvaram || 66||
yAj~navalkya uvAcha
oM namo bhagavate AdityAyAkhilajagatA\-
mAtmasvarUpeNa kAlasvarUpeNa chaturvidha\-
bhUtanikAyAnAM brahmAdistambaparyantAnA\-
mantarhR^idayeShu bahirapi chAkAsha ivopAdhinA\-
vyavadhIyamAno bhavAneka eva kShaNalava\-
nimeShAvayavopachitasaMvatsaragaNenApAmAdAna\-
visargAbhyAmimAM lokayAtrAmanuvahati || 67||
yadu ha vAva vibudharShabha savitaradastapa\-
tyanusavanamaharaharAmnAyavidhinopa\-
tiShThamAnAnAmakhiladuritavR^ijina\-
bIjAvabharjana bhagavataH samabhidhImahi
tapanamaNDalam || 68||
ya iha vAva sthiracharanikarANAM
nijaniketanAnAM mana indriyAsu\-
gaNAnanAtmanaH svayamAtmAntaryAmI
prachodayati || 69||
ya evemaM lokamatikarAlavadanA\-
ndhakArasa.nj~nAjagaragrahagilitaM
mR^itakamiva vichetanamavalokyA\-
nukampayA paramakAruNika
IkShayaivotthApyAharaharanusavanaM
shreyasi svadharmAkhyAtmAvasthAne
pravartayati || 70||
avanipatirivAsAdhUnAM bhaya\-
mudIrayannaTati parita AshA\-
pAlaistatra tatra kamalakoshA\-
~njalibhirupahR^itArhaNaH || 71||
atha ha bhagavaMstava charaNanalinayugalaM
tribhuvanagurubhirabhivanditamahamayAta\-
yAmayajuShkAma upasarAmIti || 72||
sUta uvAcha
evaM stutaH sa bhagavAn vAjirUpadharo hariH |
yajUMShyayAtayAmAni munaye.adAtprasAditaH || 73||
yajurbhirakarochChAkhA dashapa~ncha shatairvibhuH |
jagR^ihurvAjasanyastAH kANvamAdhyandinAdayaH || 74||
jaimineH sAmagasyAsItsumantustanayo muniH |
sunvAMstu tatsutastAbhyAmekaikAM prAha saMhitAm || 75||
sukarmA chApi tachChiShyaH sAmavedatarormahAn |
sahasrasaMhitAbhedaM chakre sAmnAM tato dvija || 76||
hiraNyanAbhaH kausalyaH pauShya~njishcha sukarmaNaH |
shiShyau jagR^ihatushchAnya Avantyo brahmavittamaH || 77||
udIchyAH sAmagAH shiShyA Asan pa~nchashatAni vai |
pauShya~njyAvantyayoshchApi tAMshcha prAchyAn prachakShate || 78||
laugAkShirmA~NgaliH kulyaH kushIdaH kukShireva cha |
pauShya~njishiShyA jagR^ihuH saMhitAste shataM shatam || 79||
kR^ito hiraNyanAbhasya chaturviMshati saMhitAH |
shiShya Uche svashiShyebhyaH sheShA Avantya AtmavAn || 80||
iti shrImadbhAgavate mahApurANe pAramahaMsyAM saMhitAyAM
dvAdashaskandhe vedashAkhApraNayanaM nAma ShaShTho.adhyAyaH || 6||
\iti
\section{.. OM namo bhagavate vAsudevAya ..}
\section{.. saptamo.adhyAyaH \- 7 ..}
sUta uvAcha
atharvavitsumantushcha shiShyamadhyApayatsvakAm |
saMhitAM so.api pathyAya vedadarshAya choktavAn || 1||
shauklAyanirbrahmabalirmodoShaH pippalAyaniH |
vedadarshasya shiShyAste pathyashiShyAnatho shR^iNu |
kumudaH shunako brahman jAjalishchApyatharvavit || 2||
babhruH shiShyo.athA~NgirasaH saindhavAyana eva cha |
adhIyetAM saMhite dve sAvarNAdyAstathApare || 3||
nakShatrakalpaH shAntishcha kashyapA~NgirasAdayaH |
ete AtharvaNAchAryAH shR^iNu paurANikAn mune || 4||
trayyAruNiH kashyapashcha sAvarNirakR^itavraNaH |
vaishampAyanahArItau ShaD vai paurANikA ime || 5||
adhIyanta vyAsashiShyAtsaMhitAM matpiturmukhAt |
ekaikAmahameteShAM shiShyaH sarvAH samadhyagAm || 6||
kashyapo.ahaM cha sAvarNI rAmashiShyo.akR^itavraNaH |
adhImahi vyAsashiShyAchchatvAro mUlasaMhitAH || 7||
purANalakShaNaM brahman brahmarShibhirnirUpitam |
shR^iNuShva buddhimAshritya vedashAstrAnusArataH || 8||
sargo.asyAtha visargashcha vR^ittirakShAntarANi cha |
vaMsho vaMshAnucharitaM saMsthA heturapAshrayaH || 9||
dashabhirlakShaNairyuktaM purANaM tadvido viduH |
kechitpa~nchavidhaM brahman mahadalpavyavasthayA || 10||
avyAkR^itaguNakShobhAnmahatastrivR^ito.ahamaH |
bhUtamAtrendriyArthAnAM sambhavaH sarga uchyate || 11||
puruShAnugR^ihItAnAmeteShAM vAsanAmayaH |
visargo.ayaM samAhAro bIjAdbIjaM charAcharam || 12||
vR^ittirbhUtAni bhUtAnAM charANAmacharANi cha |
kR^itA svena nR^iNAM tatra kAmAchchodanayApi vA || 13||
rakShAchyutAvatArehA vishvasyAnu yuge yuge |
tirya~NmartyarShideveShu hanyante yaistrayIdviShaH || 14||
manvantaraM manurdevA manuputrAH sureshvarAH |
R^iShayoM.ashAvatArAshcha hareH ShaDvidhamuchyate || 15||
rAj~nAM brahmaprasUtAnAM vaMshastraikAliko.anvayaH |
vaMshAnucharitaM teShAM vR^ittaM vaMshadharAshcha ye || 16||
naimittikaH prAkR^itiko nitya Atyantiko layaH |
saMstheti kavibhiH proktashchaturdhAsya svabhAvataH || 17||
heturjIvo.asya sargAderavidyAkarmakArakaH |
yaM chAnushayinaM prAhuravyAkR^itamutApare || 18||
vyatirekAnvayo yasya jAgratsvapnasuShuptiShu |
mAyAmayeShu tadbrahma jIvavR^ittiShvapAshrayaH || 19||
padArtheShu yathA dravyaM sanmAtraM rUpanAmasu |
bIjAdipa~nchatAntAsu hyavasthAsu yutAyutam || 20||
virameta yadA chittaM hitvA vR^ittitrayaM svayam |
yogena vA tadA.a.atmAnaM vedehAyA nivartate || 21||
evaM lakShaNalakShyANi purANAni purAvidaH |
munayo.aShTAdasha prAhuH kShullakAni mahAnti cha || 22||
brAhmaM pAdmaM vaiShNavaM cha shaivaM lai~NgaM sagAruDam |
nAradIyaM bhAgavatamAgneyaM skAndasa.nj~nitam || 23||
bhaviShyaM brahmavaivartaM mArkaNDeyaM savAmanam |
vArAhaM mAtsyaM kaurmaM cha brahmANDAkhyamiti triShaT || 24||
brahmannidaM samAkhyAtaM shAkhApraNayanaM muneH |
shiShyashiShyaprashiShyANAM brahmatejovivardhanam || 25||
iti shrImadbhAgavate mahApurANe pAramahaMsyAM
saMhitAyAM dvAdashaskandhe saptamo.adhyAyaH || 7||
\iti
\section{.. OM namo bhagavate vAsudevAya ..}
\section{.. aShTamo.adhyAyaH \- 8 ..}
shaunaka uvAcha
sUta jIva chiraM sAdho vada no vadatAM vara |
tamasyapAre bhramatAM nR^INAM tvaM pAradarshanaH || 1||
AhushchirAyuShamR^iShiM mR^ikaNDatanayaM janAH |
yaH kalpAnte urvarito yena grastamidaM jagat || 2||
sa vA asmatkulotpannaH kalpe.asmin bhArgavarShabhaH |
naivAdhunApi bhUtAnAM samplavaH ko.api jAyate || 3||
eka evArNave bhrAmyan dadarsha puruShaM kila |
vaTapatrapuTe tokaM shayAnaM tvekamadbhutam || 4||
eSha naH saMshayo bhUyAn sUta kautUhalaM yataH |
taM nashChindhi mahAyogin purANeShvapi sammataH || 5||
sUta uvAcha
prashnastvayA maharShe.ayaM kR^ito lokabhramApahaH |
nArAyaNakathA yatra gItA kalimalApahA || 6||
prAptadvijAtisaMskAro mArkaNDeyaH pituH kramAt |
ChandAMsyadhItya dharmeNa tapaHsvAdhyAyasaMyutaH || 7||
bR^ihadvratadharaH shAnto jaTilo valkalAmbaraH |
bibhratkamaNDaluM daNDamupavItaM samekhalam || 8||
kR^iShNAjinaM sAkShasUtraM kushAMshcha niyamarddhaye |
agnyarkaguruviprAtmasvarchayan sandhyayorharim || 9||
sAyaM prAtaH sa gurave bhaikShyamAhR^itya vAgyataH |
bubhuje gurvanuj~nAtaH sakR^inno chedupoShitaH || 10||
evaM tapaHsvAdhyAyaparo varShANAmayutAyutam |
ArAdhayan hR^iShIkeshaM jigye mR^ityuM sudurjayam || 11||
brahmA bhR^igurbhavo dakSho brahmaputrAshcha ye.apare |
nR^idevapitR^ibhUtAni tenAsannativismitAH || 12||
itthaM bR^ihadvratadharastapaHsvAdhyAyasaMyamaiH |
dadhyAvadhokShajaM yogI dhvastakleshAntarAtmanA || 13||
tasyaivaM yu~njatashchittaM mahAyogena yoginaH |
vyatIyAya mahAn kAlo manvantaraShaDAtmakaH || 14||
etatpurandaro j~nAtvA saptame.asmin kilAntare |
tapovisha~Nkito brahmannArebhe tadvighAtanam || 15||
gandharvApsarasaH kAmaM vasantamalayAnilau |
munaye preShayAmAsa rajastokamadau tathA || 16||
te vai tadAshramaM jagmurhimAdreH pArshva uttare |
puShpabhadrAnadI yatra chitrAkhyA cha shilA vibho || 17||
tadAshramapadaM puNyaM puNyadrumalatA~nchitam |
puNyadvijakulAkIrNaM puNyAmalajalAshayam || 18||
mattabhramarasa~NgItaM mattakokilakUjitam |
mattabarhinaTATopaM mattadvijakulAkulam || 19||
vAyuH praviShTAdAya himanirjharashIkarAn |
sumanobhiH pariShvakto vavAvuttambhayan smaram || 20||
udyachchandranishAvaktraH pravAlastabakAlibhiH |
gopadrumalatAjAlaistatrAsItkusumAkaraH || 21||
anvIyamAno gandharvairgItavAditrayUthakaiH |
adR^ishyatAttachApeShuH svaHstrIyUthapatiH smaraH || 22||
hutvAgniM samupAsInaM dadR^ishuH shakraki~NkarAH |
mIlitAkShaM durAdharShaM mUrtimantamivAnalam || 23||
nanR^itustasya purataH striyo.atho gAyakA jaguH |
mR^ida~NgavINApaNavairvAdyaM chakrurmanoramam || 24||
sandadhe.astraM svadhanuShi kAmaH pa~nchamukhaM tadA |
madhurmano rajastoka indrabhR^ityA vyakampayan || 25||
krIDantyAH pu~njikasthalyAH kandukaiH stanagauravAt |
bhR^ishamudvignamadhyAyAH keshavisraMsitasrajaH || 26||
itastato bhramaddR^iShTeshchalantyA anukandukam |
vAyurjahAra tadvAsaH sUkShmaM truTitamekhalam || 27||
visasarja tadA bANaM matvA taM svajitaM smaraH |
sarvaM tatrAbhavanmoghamanIshasya yathodyamaH || 28||
ta itthamapakurvanto munestattejasA mune |
dahyamAnA nivavR^ituH prabodhyAhimivArbhakAH || 29||
itIndrAnucharairbrahman dharShito.api mahAmuniH |
yannAgAdahamo bhAvaM na tachchitraM mahatsu hi || 30||
dR^iShTvA nistejasaM kAmaM sagaNaM bhagavAn svarAT |
shrutvAnubhAvaM brahmarShervismayaM samagAtparam || 31||
tasyaivaM yu~njatashchittaM tapaHsvAdhyAyasaMyamaiH |
anugrahAyAvirAsInnaranArAyaNo hariH || 32||
tau shuklakR^iShNau navaka~njalochanau
chaturbhujau rauravavalkalAmbarau |
pavitrapANI upavItakaM trivR^it
kamaNDaluM daNDamR^ijuM cha vaiNavam || 33||
padmAkShamAlAmuta jantumArjanaM
vedaM cha sAkShAttapa eva rUpiNau |
tapattaDidvarNapisha~NgarochiShA
prAMshU dadhAnau vibudharShabhArchitau || 34||
te vai bhagavato rUpe naranArAyaNAvR^iShI |
dR^iShTvotthAyAdareNochchairnanAmA~Ngena daNDavat || 35||
sa tatsandarshanAnandanirvR^itAtmendriyAshayaH |
hR^iShTaromAshrupUrNAkSho na sehe tAvudIkShitum || 36||
utthAya prA~njaliH prahva autsukyAdAshliShanniva |
namo nama itIshAnau babhAShe gadgadAkSharaH || 37||
tayorAsanamAdAya pAdayoravanijya cha |
arhaNenAnulepena dhUpamAlyairapUjayat || 38||
sukhamAsanamAsInau prasAdAbhimukhau munI |
punarAnamya pAdAbhyAM gariShThAvidamabravIt || 39||
mArkaNDeya uvAcha
kiM varNaye tava vibho yadudIrito.asuH
saMspandate tamanu vA~Nmana indriyANi |
spandanti vai tanubhR^itAmajasharvayoshcha
svasyApyathApi bhajatAmasi bhAvabandhuH || 40||
mUrtI ime bhagavato bhagavaMstrilokyAH
kShemAya tApaviramAya cha mR^ityujityai |
nAnAbibharShyavitumanyatanUryathedaM
sR^iShTvA punargrasasi sarvamivorNanAbhiH || 41||
tasyAvituH sthirachareshitura~NghrimUlaM
yatsthaM na karmaguNakAlarajaH spR^ishanti |
yadvai stuvanti ninamanti yajantyabhIkShNaM
dhyAyanti vedahR^idayA munayastadAptyai || 42||
nAnyaM tavA~NghryupanayAdapavargamUrteH
kShemaM janasya parito bhiya Isha vidmaH |
brahmA bibhetyalamato dviparArdhadhiShNyaH
kAlasya te kimuta tatkR^itabhautikAnAm || 43||
tadvai bhajAmyR^itadhiyastava pAdamUlaM
hitvedamAtmachChadi chAtmaguroH parasya |
dehAdyapArthamasadantyamabhij~namAtraM
vindeta te tarhi sarvamanIShitArtham || 44||
sattvaM rajastama itIsha tavAtmabandho
mAyAmayAH sthitilayodayahetavo.asya |
lIlAdhR^itA yadapi sattvamayI prashAntyai
nAnye nR^iNAM vyasanamohabhiyashcha yAbhyAm || 45||
tasmAttaveha bhagavannatha tAvakAnAM
shuklAM tanuM svadayitAM kushalA bhajanti |
yatsAtvatAH puruSharUpamushanti sattvaM
loko yatobhayamutAtmasukhaM na chAnyat || 46||
tasmai namo bhagavate puruShAya bhUmne
vishvAya vishvagurave paradaivatAyai |
nArAyaNAya R^iShaye cha narottamAya
haMsAya saMyatagire nigameshvarAya || 47||
yaM vai na veda vitathAkShapathairbhramaddhIH
santaM svakeShvasuShu hR^idyapi dR^ikpatheShu |
tanmAyayA.a.avR^itamatiH sa u eva sAkShA\-
dAdyastavAkhilagurorupasAdya vedam || 48||
yaddarshanaM nigama AtmarahaHprakAshaM
muhyanti yatra kavayo.ajaparA yatantaH |
taM sarvavAdaviShayapratirUpashIlaM
vande mahApuruShamAtmanigUDhabodham || 49||
iti shrImadbhAgavate mahApurANe pAramahaMsyAM
saMhitAyAM dvAdashaskandhe aShTamo.adhyAyaH || 8||
\iti
\section{.. OM namo bhagavate vAsudevAya ..}
\section{.. navamo.adhyAyaH \- 9 ..}
sUta uvAcha
saMstuto bhagavAnitthaM mArkaNDeyena dhImatA |
nArAyaNo narasakhaH prIta Aha bhR^igUdvaham || 1||
shrIbhagavAnuvAcha
bho bho brahmarShivaryo.asi siddha AtmasamAdhinA |
mayi bhaktyAnapAyinyA tapaHsvAdhyAyasaMyamaiH || 2||
vayaM te parituShTAH sma tvadbR^ihadvratacharyayA |
varaM pratIchCha bhadraM te varadeshAdabhIpsitam || 3||
R^iShiruvAcha
jitaM te deva devesha prapannArtiharAchyuta |
vareNaitAvatAlaM no yadbhavAn samadR^ishyata || 4||
gR^ihItvAjAdayo yasya shrImatpAdAbjadarshanam |
manasA yogapakvena sa bhavAn me.akShigocharaH || 5||
athApyambujapatrAkSha puNyashlokashikhAmaNe |
drakShye mAyAM yayA lokaH sapAlo veda sadbhidAm || 6||
sUta uvAcha
itIDito.architaH kAmamR^iShiNA bhagavAn mune |
tatheti sa smayan prAgAdbadaryAshramamIshvaraH || 7||
tameva chintayannarthamR^iShiH svAshrama eva saH |
vasannagnyarkasomAmbubhUvAyuviyadAtmasu || 8||
dhyAyan sarvatra cha hariM bhAvadravyairapUjayat |
kvachitpUjAM visasmAra premaprasarasamplutaH || 9||
tasyaikadA bhR^igushreShTha puShpabhadrAtaTe muneH |
upAsInasya sandhyAyAM brahman vAyurabhUnmahAn || 10||
taM chaNDashabdaM samudIrayantaM
balAhakA anvabhavan karAlAH |
akShasthaviShThA mumuchustaDidbhiH
svananta uchchairabhivarShadhArAH || 11||
tato vyadR^ishyanta chatuHsamudrAH
samantataH kShmAtalamAgrasantaH |
samIravegormibhirugranakra\-
mahAbhayAvartagabhIraghoShAH || 12||
antarbahishchAdbhiratidyubhiH kharaiH
shatahradAbhIrupatApitaM jagat |
chaturvidhaM vIkShya sahAtmanA muni\-
rjalAplutAM kShmAM vimanAH samatrasat || 13||
tasyaivamudvIkShata UrmibhIShaNaH
prabha~njanAghUrNitavArmahArNavaH |
ApUryamANo varaShadbhirambudaiH
kShmAmapyadhAddvIpavarShAdribhiH samam || 14||
sakShmAntarikShaM sadivaM sabhAgaNaM
trailokyamAsItsaha digbhirAplutam |
sa eka evorvarito mahAmuni\-
rbabhrAma vikShipya jaTA jaDAndhavat || 15||
kShuttR^iTparIto makaraistimi~Ngilai\-
rupadruto vIchinabhasvatA hataH |
tamasyapAre patito bhraman disho
na veda khaM gAM cha parishrameShitaH || 16||
kvachidgato mahAvarte taralaistADitaH kvachit |
yAdobhirbhakShyate kvApi svayamanyonyaghAtibhiH || 17||
kvachichChokaM kvachinmohaM kvachidduHkhaM sukhaM bhayam |
kvachinmR^ityumavApnoti vyAdhyAdibhirutArditaH || 18||
ayutAyutavarShANAM sahasrANi shatAni cha |
vyatIyurbhramatastasmin viShNumAyAvR^itAtmanaH || 19||
sa kadAchidbhramaMstasmin pR^ithivyAH kakudi dvijaH |
nyagrodhapotaM dadR^ishe phalapallavashobhitam || 20||
prAguttarasyAM shAkhAyAM tasyApi dadR^ishe shishum |
shayAnaM parNapuTake grasantaM prabhayA tamaH || 21||
mahAmarakatashyAmaM shrImadvadanapa~Nkajam |
kambugrIvaM mahoraskaM sunAsaM sundarabhruvam || 22||
shvAsaijadalakAbhAtaM kambushrIkarNadADimam |
vidrumAdharabhAseShachChoNAyitasudhAsmitam || 23||
padmagarbhAruNApA~NgaM hR^idyahAsAvalokanam |
shvAsaijadvalisaMvignanimnanAbhidalodaram || 24||
chArva~NgulibhyAM pANibhyAmunnIya charaNAmbujam |
mukhe nidhAya viprendro dhayantaM vIkShya vismitaH || 25||
taddarshanAdvItaparishramo mudA
protphullahR^itpadmavilochanAmbujaH |
prahR^iShTaromAdbhutabhAvasha~NkitaH
praShTuM purastaM prasasAra bAlakam || 26||
tAvachChishorvai shvasitena bhArgavaH
so.antaHsharIraM mashako yathA.a.avishat |
tatrApyado nyastamachaShTa kR^itsnasho
yathA purAmuhyadatIva vismitaH || 27||
khaM rodasI bhagaNAnadrisAgarAn
dvIpAn savarShAn kakubhaH surAsurAn |
vanAni deshAn saritaH purAkarAn
kheTAn vrajAnAshramavarNavR^ittayaH || 28||
mahAnti bhUtAnyatha bhautikAnyasau
kAlaM cha nAnAyugakalpakalpanam |
yatki~nchidanyadvyavahArakAraNaM
dadarsha vishvaM sadivAvabhAsitam || 29||
himAlayaM puShpavahAM cha tAM nadIM
nijAshramaM yatra R^iShInapashyat |
vishvaM vipashya~nChvasitAchChishorvai
bahirnirasto nyapatallayAbdhau || 30||
tasmin pR^ithivyAH kakudi prarUDhaM
vaTaM cha tatparNapuTe shayAnam |
tokaM cha tatpremasudhAsmitena
nirIkShito.apA~NganirIkShaNena || 31||
atha taM bAlakaM vIkShya netrAbhyAM dhiShThitaM hR^idi |
abhyayAdatisa~NkliShTaH pariShvaktumadhokShajam || 32||
tAvatsa bhagavAn sAkShAdyogAdhIsho guhAshayaH |
antardadhe R^iSheH sadyo yathehAnIshanirmitA || 33||
tamanvatha vaTo brahman salilaM lokasamplavaH |
tirodhAyi kShaNAdasya svAshrame pUrvavatsthitaH || 34||
iti shrImadbhAgavate mahApurANe pAramahaMsyAM saMhitAyAM
dvAdashaskandhe mAyAdarshanaM nAma navamo.adhyAyaH || 9||
\iti
\section{.. OM namo bhagavate vAsudevAya ..}
\section{.. dashamo.adhyAyaH \- 10 ..}
sUta uvAcha
sa evamanubhUyedaM nArAyaNavinirmitam |
vaibhavaM yogamAyAyAstameva sharaNaM yayau || 1||
mArkaNDeya uvAcha
prapanno.asmya~NghrimUlaM te prapannAbhayadaM hare |
yanmAyayApi vibudhA muhyanti j~nAnakAshayA || 2||
sUta uvAcha
tamevaM nibhR^itAtmAnaM vR^iSheNa divi paryaTan |
rudrANyA bhagavAn rudro dadarsha svagaNairvR^itaH || 3||
athomA tamR^iShiM vIkShya girishaM samabhAShata |
pashyemaM bhagavan vipraM nibhR^itAtmendriyAshayam || 4||
nibhR^itodajhaShavrAtaM vAtApAye yathArNavam |
kurvasya tapasaH sAkShAtsaMsiddhiM siddhido bhavAn || 5||
shrIbhagavAnuvAcha
naivechChatyAshiShaH kvApi brahmarShirmokShamapyuta |
bhaktiM parAM bhagavati labdhavAn puruShe.avyaye || 6||
athApi saMvadiShyAmo bhavAnyetena sAdhunA |
ayaM hi paramo lAbho nR^iNAM sAdhusamAgamaH || 7||
sUta uvAcha
ityuktvA tamupeyAya bhagavAn sa satAM gatiH |
IshAnaH sarvavidyAnAmIshvaraH sarvadehinAm || 8||
tayorAgamanaM sAkShAdIshayorjagadAtmanoH |
na veda ruddhadhIvR^ittirAtmAnaM vishvameva cha || 9||
bhagavAMstadabhij~nAya girIsho yogamAyayA |
AvishattadguhAkAshaM vAyushChidramiveshvaraH || 10||
Atmanyapi shivaM prAptaM taDitpi~NgajaTAdharam |
tryakShaM dashabhujaM prAMshumudyantamiva bhAskaram || 11||
vyAghracharmAmbaradharaM shUlakhaTvA~NgacharmabhiH |
akShamAlADamarukakapAlAsidhanuH saha || 12||
bibhrANaM sahasA bhAtaM vichakShya hR^idi vismitaH |
kimidaM kuta eveti samAdhervirato muniH || 13||
netre unmIlya dadR^ishe sagaNaM somayA.a.agatam |
rudraM trilokaikaguruM nanAma shirasA muniH || 14||
tasmai saparyAM vyadadhAtsagaNAya sahomayA |
svAgatAsanapAdyArghyagandhasragdhUpadIpakaiH || 15||
Aha chAtmAnubhAvena pUrNakAmasya te vibho |
karavAma kimIshAna yenedaM nirvR^itaM jagat || 16||
namaH shivAya shAntAya sattvAya pramR^iDAya cha |
rajojuShe.apyaghorAya namastubhyaM tamojuShe || 17||
sUta uvAcha
evaM stutaH sa bhagavAnAdidevaH satAM gatiH |
parituShTaH prasannAtmA prahasaMstamabhAShata || 18||
shrIbhagavAnuvAcha
varaM vR^iNIShva naH kAmaM varadeshA vayaM trayaH |
amoghaM darshanaM yeShAM martyo yadvindate.amR^itam || 19||
brAhmaNAH sAdhavaH shAntA niHsa~NgA bhUtavatsalAH |
ekAntabhaktA asmAsu nirvairAH samadarshinaH || 20||
salokA lokapAlAstAn vandantyarchantyupAsate |
ahaM cha bhagavAn brahmA svayaM cha harirIshvaraH || 21||
na te mayyachyute.aje cha bhidAmaNvapi chakShate |
nAtmanashcha janasyApi tadyuShmAn vayamImahi || 22||
na hyammayAni tIrthAni na devAshchetanojjhitAH |
te punantyurukAlena yUyaM darshanamAtrataH || 23||
brAhmaNebhyo namasyAmo ye.asmadrUpaM trayImayam |
bibhratyAtmasamAdhAnatapaHsvAdhyAyasaMyamaiH || 24||
shravaNAddarshanAdvApi mahApAtakino.api vaH |
shudhyerannantyajAshchApi kimu sambhAShaNAdibhiH || 25||
sUta uvAcha
iti chandralalAmasya dharmaguhyopabR^iMhitam |
vacho.amR^itAyanamR^iShirnAtR^ipyatkarNayoH piban || 26||
sa chiraM mAyayA viShNorbhrAmitaH karshito bhR^isham |
shivavAgamR^itadhvastakleshapu~njastamabravIt || 27||
R^iShiruvAcha
aho IshvaralIleyaM durvibhAvyA sharIriNAm |
yannamantIshitavyAni stuvanti jagadIshvarAH || 28||
dharmaM grAhayituM prAyaH pravaktArashcha dehinAm |
Acharantyanumodante kriyamANaM stuvanti cha || 29||
naitAvatA bhagavataH svamAyAmayavR^ittibhiH |
na duShyetAnubhAvastairmAyinaH kuhakaM yathA || 30||
sR^iShTvedaM manasA vishvamAtmanAnupravishya yaH |
guNaiH kurvadbhirAbhAti karteva svapnadR^igyathA || 31||
tasmai namo bhagavate triguNAya guNAtmane |
kevalAyAdvitIyAya gurave brahmamUrtaye || 32||
kaM vR^iNe nu paraM bhUman varaM tvadvaradarshanAt |
yaddarshanAtpUrNakAmaH satyakAmaH pumAn bhavet || 33||
varamekaM vR^iNe.athApi pUrNAtkAmAbhivarShaNAt |
bhagavatyachyutAM bhaktiM tatpareShu tathA tvayi || 34||
sUta uvAcha
ityarchito.abhiShTutashcha muninA sUktayA girA |
tamAha bhagavA~nCharvaH sharvayA chAbhinanditaH || 35||
kAmo maharShe sarvo.ayaM bhaktimAMstvamadhokShaje |
AkalpAntAdyashaH puNyamajarAmaratA tathA || 36||
j~nAnaM traikAlikaM brahman vij~nAnaM cha viraktimat |
brahmavarchasvino bhUyAtpurANAchAryatAstu te || 37||
sUta uvAcha
evaM varAn sa munaye dattvAgAttryakSha IshvaraH |
devyai tatkarma kathayannanubhUtaM purAmunA || 38||
so.apyavAptamahAyogamahimA bhArgavottamaH |
vicharatyadhunApyaddhA harAvekAntatAM gataH || 39||
anuvarNitametatte mArkaNDeyasya dhImataH |
anubhUtaM bhagavato mAyAvaibhavamadbhutam || 40||
etatkechidavidvAMso mAyAsaMsR^itirAtmanaH |
anAdyAvartitaM nR^INAM kAdAchitkaM prachakShate || 41||
ya evametadbhR^iguvaryavarNitaM
rathA~NgapANeranubhAvabhAvitam |
saMshrAvayetsaMshR^iNuyAdu tAvubhau
tayorna karmAshayasaMsR^itirbhavet || 42||
iti shrImadbhAgavate mahApurANe pAramahaMsyAM
saMhitAyAM dvAdashaskandhe dashamo.adhyAyaH || 10||
\iti
\section{.. OM namo bhagavate vAsudevAya ..}
\section{.. ekAdasho.adhyAyaH \- 11 ..}
shaunaka uvAcha
athemamarthaM pR^ichChAmo bhavantaM bahuvittamam |
samastatantrarAddhAnte bhavAn bhAgavatatattvavit || 1||
tAntrikAH paricharyAyAM kevalasya shriyaH pateH |
a~NgopA~NgAyudhAkalpaM kalpayanti yathA cha yaiH || 2||
tanno varNaya bhadraM te kriyAyogaM bubhutsatAm |
yena kriyAnaipuNena martyo yAyAdamartyatAm || 3||
sUta uvAcha
namaskR^itya gurUn vakShye vibhUtIrvaiShNavIrapi |
yAH proktA vedatantrAbhyAmAchAryaiH padmajAdibhiH || 4||
mAyAdyairnavabhistattvaiH sa vikAramayo virAT |
nirmito dR^ishyate yatra sachitke bhuvanatrayam || 5||
etadvai pauruShaM rUpaM bhUH pAdau dyauH shiro nabhaH |
nAbhiH sUryo.akShiNI nAse vAyuH karNau dishaH prabhoH || 6||
prajApatiH prajananamapAno mR^ityurIshituH |
tadbAhavo lokapAlA manashchandro bhruvau yamaH || 7||
lajjottaro.adharo lobho dantA jyotsnA smayo bhramaH |
romANi bhUruhA bhUmno meghAH puruShamUrdhajAH || 8||
yAvAnayaM vai puruSho yAvatyA saMsthayA mitaH |
tAvAnasAvapi mahApuruSho lokasaMsthayA || 9||
kaustubhavyapadeshena svAtmajyotirbibhartyajaH |
tatprabhA vyApinI sAkShAchChrIvatsamurasA vibhuH || 10||
svamAyAM vanamAlAkhyAM nAnAguNamayIM dadhat |
vAsashChandomayaM pItaM brahmasUtraM trivR^itsvaram || 11||
bibharti sA~NkhyaM yogaM cha devo makarakuNDale |
mauliM padaM pArameShThyaM sarvalokAbhaya~Nkaram || 12||
avyAkR^itamanantAkhyamAsanaM yadadhiShThitaH |
dharmaj~nAnAdibhiryuktaM sattvaM padmamihochyate || 13||
ojaHsahobalayutaM mukhyatattvaM gadAM dadhat |
apAM tattvaM daravaraM tejastattvaM sudarshanam || 14||
nabhonibhaM nabhastattvamasiM charma tamomayam |
kAlarUpaM dhanuH shAr~NgaM tathA karmamayeShudhim || 15||
indriyANi sharAnAhurAkUtIrasya syandanam |
tanmAtrANyasyAbhivyaktiM mudrayArthakriyAtmatAm || 16||
maNDalaM devayajanaM dIkShA saMskAra AtmanaH |
paricharyA bhagavata Atmano duritakShayaH || 17||
bhagavAn bhagashabdArthaM lIlAkamalamudvahan |
dharmaM yashashcha bhagavAMshchAmaravyajane.abhajat || 18||
AtapatraM tu vaikuNThaM dvijA dhAmAkutobhayam |
trivR^idvedaH suparNAkhyo yaj~naM vahati pUruSham || 19||
anapAyinI bhagavatI shrIH sAkShAdAtmano hareH |
viShvaksenastantramUrtirviditaH pArShadAdhipaH |
nandAdayo.aShTau dvAHsthAshcha te.aNimAdyA harerguNAH || 20||
vAsudevaH sa~NkarShaNaH pradyumnaH puruShaH svayam |
aniruddha iti brahman mUrtivyUho.abhidhIyate || 21||
sa vishvastaijasaH prAj~nasturIya iti vR^ittibhiH |
arthendriyAshayaj~nAnairbhagavAn paribhAvyate || 22||
a~NgopA~NgAyudhAkalpairbhagavAMstachchatuShTayam |
bibharti sma chaturmUrtirbhagavAn harirIshvaraH || 23||
dvijaR^iShabha sa eSha brahmayoniH svayandR^ik
svamahimaparipUrNo mAyayA cha svayaitat |
sR^ijati harati pAtItyAkhyayAnAvR^itAkSho
vivR^ita iva niruktastatparairAtmalabhyaH || 24||
shrIkR^iShNa kR^iShNasakha vR^iShNyR^iShabhAvanidhrug\-
rAjanyavaMshadahanAnapavargavIrya |
govinda gopavanitAvrajabhR^ityagIta\-
tIrthashravaH shravaNama~Ngala pAhi bhR^ityAn || 25||
ya idaM kalya utthAya mahApuruShalakShaNam |
tachchittaH prayato japtvA brahma veda guhAshayam || 26||
shaunaka uvAcha
shuko yadAha bhagavAn viShNurAtAya shR^iNvate |
sauro gaNo mAsi mAsi nAnA vasati saptakaH || 27||
teShAM nAmAni karmANi niyuktAnAmadhIshvaraiH |
brUhi naH shraddadhAnAnAM vyUhaM sUryAtmano hareH || 28||
sUta uvAcha
anAdyavidyayA viShNorAtmanaH sarvadehinAm |
nirmito lokatantro.ayaM lokeShu parivartate || 29||
eka eva hi lokAnAM sUrya AtmA.a.adikR^iddhariH |
sarvavedakriyAmUlamR^iShibhirbahudhoditaH || 30||
kAlo deshaH kriyA kartA karaNaM kAryamAgamaH |
dravyaM phalamiti brahmannavadhokto.ajayA hariH || 31||
madhvAdiShu dvAdashasu bhagavAn kAlarUpadhR^ik |
lokatantrAya charati pR^ithagdvAdashabhirgaNaiH || 32||
dhAtA kR^itasthalI hetirvAsukI rathakR^inmune |
pulastyastumbururiti madhumAsaM nayantyamI || 33||
aryamA pulaho.athaujAH prahetiH pu~njikasthalI |
nAradaH kachChanIrashcha nayantyete sma mAdhavam || 34||
mitro.atriH pauruSheyo.atha takShako menakA hahAH |
rathasvana iti hyete shukramAsaM nayantyamI || 35||
vasiShTho varuNo rambhA sahajanyastathA huhUH |
shukrashchitrasvanashchaiva shuchimAsaM nayantyamI || 36||
indro vishvAvasuH shrotA elApatrastathA~NgirAH |
pramlochA rAkShaso varyo nabhomAsaM nayantyamI || 37||
vivasvAnugrasenashcha vyAghra AsAraNo bhR^iguH |
anumlochA sha~NkhapAlo nabhasyAkhyaM nayantyamI || 38||
pUShA dhana~njayo vAtaH suSheNaH suruchistathA |
ghR^itAchI gautamashcheti tapomAsaM nayantyamI || 39||
kraturvarchA bharadvAjaH parjanyaH senajittathA |
vishva airAvatashchaiva tapasyAkhyaM nayantyamI || 40||
athAMshuH kashyapastArkShya R^itasenastathorvashI |
vidyuchChatrurmahAsha~NkhaH sahomAsaM nayantyamI || 41||
bhagaH sphUrjo.ariShTanemirUrNa Ayushcha pa~nchamaH |
karkoTakaH pUrvachittiH puShyamAsaM nayantyamI || 42||
tvaShTA R^ichIkatanayaH kambalashcha tilottamA |
brahmApeto.atha shatajiddhR^itarAShTra iShambharAH || 43||
viShNurashvataro rambhA sUryavarchAshcha satyajit |
vishvAmitro makhApeta UrjamAsaM nayantyamI || 44||
etA bhagavato viShNorAdityasya vibhUtayaH |
smaratAM sandhyayornR^INAM harantyaMho dine dine || 45||
dvAdashasvapi mAseShu devo.asau ShaDbhirasya vai |
charan samantAttanute paratreha cha sanmatim || 46||
sAmargyajurbhistalli~NgairR^iShayaH saMstuvantyamum |
gandharvAstaM pragAyanti nR^ityantyapsaraso.agrataH || 47||
unnahyanti rathaM nAgA grAmaNyo rathayojakAH |
chodayanti rathaM pR^iShThe nairR^itA balashAlinaH || 48||
vAlakhilyAH sahasrANi ShaShTirbrahmarShayo.amalAH |
purato.abhimukhaM yAnti stuvanti stutibhirvibhum || 49||
evaM hyanAdinidhano bhagavAn harirIshvaraH |
kalpe kalpe svamAtmAnaM vyUhya lokAnavatyajaH || 50||
iti shrImadbhAgavate mahApurANe pAramahaMsyAM saMhitAyAM
dvAdashaskandhe AdityavyUhavivaraNaM nAmaikAdasho.adhyAyaH || 11||
\iti
\section{.. OM namo bhagavate vAsudevAya ..}
\section{.. dvAdasho.adhyAyaH \- 12 ..}
sUta uvAcha
namo dharmAya mahate namaH kR^iShNAya vedhase |
brAhmaNebhyo namaskR^itya dharmAn vakShye sanAtanAn || 1||
etadvaH kathitaM viprA viShNoshcharitamadbhutam |
bhavadbhiryadahaM pR^iShTo narANAM puruShochitam || 2||
atra sa~NkIrtitaH sAkShAtsarvapApaharo hariH |
nArAyaNo hR^iShIkesho bhagavAn sAtvatAM patiH || 3||
atra brahma paraM guhyaM jagataH prabhavApyayam |
j~nAnaM cha tadupAkhyAnaM proktaM vij~nAnasaMyutam || 4||
bhaktiyogaH samAkhyAto vairAgyaM cha tadAshrayam |
pArIkShitamupAkhyAnaM nAradAkhyAnameva cha || 5||
prAyopavesho rAjarSherviprashApAtparIkShitaH |
shukasya brahmarShabhasya saMvAdashcha parIkShitaH || 6||
yogadhAraNayotkrAntiH saMvAdo nAradAjayoH |
avatArAnugItaM cha sargaH prAdhAniko.agrataH || 7||
viduroddhavasaMvAdaH kShattR^imaitreyayostataH |
purANasaMhitAprashno mahApuruShasaMsthitiH || 8||
tataH prAkR^itikaH sargaH sapta vaikR^itikAshcha ye |
tato brahmANDasambhUtirvairAjaH puruSho yataH || 9||
kAlasya sthUlasUkShmasya gatiH padmasamudbhavaH |
bhuva uddharaNe.ambhodherhiraNyAkShavadho yathA || 10||
UrdhvatiryagavAksargo rudrasargastathaiva cha |
ardhanArInarasyAtha yataH svAyambhuvo manuH || 11||
shatarUpA cha yA strINAmAdyA prakR^itiruttamA |
santAno dharmapatnInAM kardamasya prajApateH || 12||
avatAro bhagavataH kapilasya mahAtmanaH |
devahUtyAshcha saMvAdaH kapilena cha dhImatA || 13||
navabrahmasamutpattirdakShayaj~navinAshanam |
dhruvasya charitaM pashchAtpR^ithoH prAchInabarhiShaH || 14||
nAradasya cha saMvAdastataH praiyavrataM dvijAH |
nAbhestato.anucharitaM R^iShabhasya bharatasya cha || 15||
dvIpavarShasamudrANAM girinadyupavarNanam |
jyotishchakrasya saMsthAnaM pAtAlanarakasthitiH || 16||
dakShajanma prachetobhyastatputrINAM cha santatiH |
yato devAsuranarAstirya~NnagakhagAdayaH || 17||
tvAShTrasya janmanidhanaM putrayoshcha diterdvijAH |
daityeshvarasya charitaM prahlAdasya mahAtmanaH || 18||
manvantarAnukathanaM gajendrasya vimokShaNam |
manvantarAvatArAshcha viShNorhayashirAdayaH || 19||
kaurmaM dhAnvantaraM mAtsyaM vAmanaM cha jagatpateH |
kShIrodamathanaM tadvadamR^itArthe divaukasAm || 20||
devAsuramahAyuddhaM rAjavaMshAnukIrtanam |
ikShvAkujanma tadvaMshaH sudyumnasya mahAtmanaH || 21||
ilopAkhyAnamatroktaM tAropAkhyAnameva cha |
sUryavaMshAnukathanaM shashAdAdyA nR^igAdayaH || 22||
saukanyaM chAtha sharyAteH kakutsthasya cha dhImataH |
khaTvA~Ngasya cha mAndhAtuH saubhareH sagarasya cha || 23||
rAmasya kosalendrasya charitaM kilbiShApaham |
nimera~NgaparityAgo janakAnAM cha sambhavaH || 24||
rAmasya bhArgavendrasya niHkShatrakaraNaM bhuvaH |
ailasya somavaMshasya yayAternahuShasya cha || 25||
dauShyanterbharatasyApi shantanostatsutasya cha |
yayAterjyeShThaputrasya yadorvaMsho.anukIrtitaH || 26||
yatrAvatIrNo bhagavAn kR^iShNAkhyo jagadIshvaraH |
vasudevagR^ihe janma tato vR^iddhishcha gokule || 27||
tasya karmANyapArANi kIrtitAnyasuradviShaH |
pUtanAsupayaHpAnaM shakaTochchATanaM shishoH || 28||
tR^iNAvartasya niShpeShastathaiva bakavatsayoH |
(aghAsuravadho dhAtrA vatsapAlAvagUhanam |)
dhenukasya saha bhrAtuH pralambasya cha sa~NkShayaH || 29||
gopAnAM cha paritrANaM dAvAgneH parisarpataH || 30||
damanaM kAliyasyAhermahAhernandamokShaNam |
vratacharyA tu kanyAnAM yatra tuShTo.achyuto vrataiH || 31||
prasAdo yaj~napatnIbhyo viprANAM chAnutApanam |
govardhanoddhAraNaM cha shakrasya surabheratha || 32||
yaj~nAbhiShekaM kR^iShNasya strIbhiH krIDA cha rAtriShu |
sha~NkhachUDasya durbuddhervadho.ariShTasya keshinaH || 33||
akrUrAgamanaM pashchAtprasthAnaM rAmakR^iShNayoH |
vrajastrINAM vilApashcha mathurAlokanaM tataH || 34||
gajamuShTikachANUrakaMsAdInAM cha yo vadhaH |
mR^itasyAnayanaM sUnoH punaH sAndIpanerguroH || 35||
mathurAyAM nivasatA yaduchakrasya yatpriyam |
kR^itamuddhavarAmAbhyAM yutena hariNA dvijAH || 36||
jarAsandhasamAnItasainyasya bahusho vadhaH |
ghAtanaM yavanendrasya kushasthalyA niveshanam || 37||
AdAnaM pArijAtasya sudharmAyAH surAlayAt |
rukmiNyA haraNaM yuddhe pramathya dviShato hareH || 38||
harasya jR^imbhaNaM yuddhe bANasya bhujakR^intanam |
prAgjyotiShapatiM hatvA kanyAnAM haraNaM cha yat || 39||
chaidyapauNDrakashAlvAnAM dantavaktrasya durmateH |
shambaro dvividaH pITho muraH pa~nchajanAdayaH || 40||
mAhAtmyaM cha vadhasteShAM vArANasyAshcha dAhanam |
bhArAvataraNaM bhUmernimittIkR^itya pANDavAn || 41||
viprashApApadeshena saMhAraH svakulasya cha |
uddhavasya cha saMvAdo vAsudevasya chAdbhutaH || 42||
yatrAtmavidyA hyakhilA proktA dharmavinirNayaH |
tato martyaparityAga AtmayogAnubhAvataH || 43||
yugalakShaNavR^ittishcha kalau nR^INAmupaplavaH |
chaturvidhashcha pralaya utpattistrividhA tathA || 44||
dehatyAgashcha rAjarSherviShNurAtasya dhImataH |
shAkhApraNayanamR^iShermArkaNDeyasya satkathA |
mahApuruShavinyAsaH sUryasya jagadAtmanaH || 45||
iti choktaM dvijashreShThA yatpR^iShTo.ahamihAsmi vaH |
lIlAvatArakarmANi kIrtitAnIha sarvashaH || 46||
patitaH skhalitashchArtaH kShuttvA vA vivasho bruvan |
haraye nama ityuchchairmuchyate sarvapAtakAt || 47||
sa~NkIrtyamAno bhagavAnanantaH
shrutAnubhAvo vyasanaM hi puMsAm |
pravishya chittaM vidhunotyasheShaM
yathA tamo.arko.abhramivAtivAtaH || 48||
mR^iShA girastA hyasatIrasatkathA
na kathyate yadbhagavAnadhokShajaH |
tadeva satyaM tadu haiva ma~NgalaM
tadeva puNyaM bhagavadguNodayam || 49||
tadeva ramyaM ruchiraM navaM navaM
tadeva shashvanmanaso mahotsavam |
tadeva shokArNavashoShaNaM nR^iNAM
yaduttamashlokayasho.anugIyate || 50||
na tadvachashchitrapadaM hareryasho
jagatpavitraM pragR^iNIta karhichit |
taddhvA~NkShatIrthaM na tu haMsasevitaM
yatrAchyutastatra hi sAdhavo.amalAH || 51||
sa vAgvisargo janatAghasamplavo
yasmin pratishlokamabaddhavatyapi |
nAmAnyanantasya yasho.a~NkitAni ya\-
chChR^iNvanti gAyanti gR^iNanti sAdhavaH || 52||
naiShkarmyamapyachyutabhAvavarjitaM
na shobhate j~nAnamalaM nira~njanam |
kutaH punaH shashvadabhadramIshvare
na hyarpitaM karma yadapyanuttamam || 53||
yashaH shriyAmeva parishramaH paro
varNAshramAchAratapaHshrutAdiShu |
avismR^itiH shrIdharapAdapadmayo\-
rguNAnuvAdashravaNAdibhirhareH || 54||
avismR^itiH kR^iShNapadAravindayoH
kShiNotyabhadrANi shamaM tanoti cha |
sattvasya shuddhiM paramAtmabhaktiM
j~nAnaM cha vij~nAnavirAgayuktam || 55||
yUyaM dvijAgryA bata bhUribhAgA
yachChashvadAtmanyakhilAtmabhUtam |
nArAyaNaM devamadevamIsha\-
majasrabhAvA bhajatA.a.aviveshya || 56||
ahaM cha saMsmArita AtmatattvaM
shrutaM purA me paramarShivaktrAt |
prAyopaveshe nR^ipateH parIkShitaH
sadasyR^iShINAM mahatAM cha shR^iNvatAm || 57||
etadvaH kathitaM viprAH kathanIyorukarmaNaH |
mAhAtmyaM vAsudevasya sarvAshubhavinAshanam || 58||
ya evaM shrAvayennityaM yAmakShaNamananyadhIH |
(shlokamekaM tadardhaM vA pAdaM pAdArdhameva vA |)
shraddhAvAn yo.anushR^iNuyAtpunAtyAtmAnameva saH || 59||
dvAdashyAmekAdashyAM vA shR^iNvannAyuShyavAn bhavet |
paThatyanashnan prayataH tato bhavatyapAtakI || 60||
puShkare mathurayAM cha dvAravatyAM yatAtmavAn |
upoShya saMhitAmetAM paThitvA muchyate bhayAt || 61||
devatA munayaH siddhAH pitaro manavo nR^ipAH |
yachChanti kAmAn gR^iNataH shR^iNvato yasya kIrtanAt || 62||
R^icho yajUMShi sAmAni dvijo.adhItyAnuvindate |
madhukulyA ghR^itakulyAH payaHkulyAshcha tatphalam || 63||
purANasaMhitAmetAmadhItya prayato dvijaH |
proktaM bhagavatA yattu tatpadaM paramaM vrajet || 64||
vipro.adhItyApnuyAtpraj~nAM rAjanyodadhimekhalAm |
vaishyo nidhipatitvaM cha shUdraH shudhyeta pAtakAt || 65||
kalimalasaMhatikAlano.akhilesho
hariritaratra na gIyate hyabhIkShNam |
iha tu punarbhagavAnasheShamUrtiH
paripaThito.anupadaM kathAprasa~NgaiH || 66||
tamahamajamanantamAtmatattvaM
jagadudayasthitisaMyamAtmashaktim |
dyupatibhirajashakrasha~NkarAdyaiH
duravasitastavamachyutaM nato.asmi || 67||
upachitanavashaktibhiH sva Atmani
uparachitasthiraja~NgamAlayAya |
bhagavata upalabdhimAtradhAmne
suraR^iShabhAya namaH sanAtanAya || 68||
svasukhanibhR^itachetAstadvyudastAnyabhAvo\-
.apyajitaruchiralIlAkR^iShTasArastadIyam |
vyatanuta kR^ipayA yastattvadIpaM purANaM
tamakhilavR^ijinaghnaM vyAsasUnuM nato.asmi || 69||
iti shrImadbhAgavate mahApurANe pAramahaMsyAM
saMhitAyAM dvAdashaskandhe dvAdashaskandhArthanirUpaNaM
nAma dvAdasho.adhyAyaH || 12||
\iti
\section{.. OM namo bhagavate vAsudevAya ..}
\section{.. trayodasho.adhyAyaH \- 13 ..}
sUta uvAcha
yaM brahmA varuNendrarudramarutaH stunvanti divyaiH stavaiH
vedaiH sA~NgapadakramopaniShadairgAyanti yaM sAmagAH |
dhyAnAvasthitatadgatena manasA pashyanti yaM yogino
yasyAntaM na viduH surAsuragaNA devAya tasmai namaH || 1||
pR^iShThe bhrAmyadamandamandaragirigrAvAgrakaNDUyanAt
nidrAloH kamaThAkR^iterbhagavataH shvAsAnilAH pAntu vaH |
yatsaMskArakalAnuvartanavashAdvelAnibhenAmbhasAM
yAtAyAtamatandritaM jalanidhernAdyApi vishrAmyati || 2||
purANasa~NkhyAsambhUtimasya vAchyaprayojane |
dAnaM dAnasya mAhAtmyaM pAThAdeshcha nibodhata || 3||
brAhmaM dashasahasrANi pAdmaM pa~nchonaShaShTi cha |
shrIvaiShNavaM trayoviMshachchaturviMshati shaivakam || 4||
dashAShTau shrIbhAgavataM nAradaM pa~nchaviMshatiH |
mArkaNDaM nava vAhnaM cha dashapa~ncha chatuHshatam || 5||
chaturdasha bhaviShyaM syAttathA pa~nchashatAni cha |
dashAShTau brahmavaivartaM lai~NgamekAdashaiva tu || 6||
chaturviMshati vArAhamekAshItisahasrakam |
skAndaM shataM tathA chaikaM vAmanaM dasha kIrtitam || 7||
kaurmaM saptadashAkhyAtaM mAtsyaM tattu chaturdasha |
ekonaviMshatsauparNaM brahmANDaM dvAdashaiva tu || 8||
evaM purANasandohashchaturlakSha udAhR^itaH |
tatrAShTAdashasAhasraM shrIbhAgavatamiShyate || 9||
idaM bhagavatA pUrvaM brahmaNe nAbhipa~Nkaje |
sthitAya bhavabhItAya kAruNyAtsamprakAshitam || 10||
AdimadhyAvasAneShu vairAgyAkhyAnasaMyutam |
harilIlAkathAvrAtA mR^itAnanditasatsuram || 11||
sarvavedAntasAraM yadbrahmAtmaikatvalakShaNam |
vastvadvitIyaM tanniShThaM kaivalyaikaprayojanam || 12||
prauShThapadyAM paurNamAsyAM hemasiMhasamanvitam |
dadAti yo bhAgavataM sa yAti paramAM gatim || 13||
rAjante tAvadanyAni purANAni satAM gaNe |
yAvanna dR^ishyate sAkShAtshrImadbhAgavataM param || 14||
(yAvadbhAgavataM naiva shrUyate.amR^itasAgaraM)
sarvavedAntasAraM hi shrIbhAgavatamiShyate |
tadrasAmR^itatR^iptasya nAnyatra syAdratiH kvachit || 15||
nimnagAnAM yathA ga~NgA devAnAmachyuto yathA |
vaiShNavAnAM yathA shambhuH purANAnAmidaM tathA || 16||
kShetrANAM chaiva sarveShAM yathA kAshI hyanuttamA |
tathA purANavrAtAnAM shrImadbhAgavataM dvijAH || 17||
shrImadbhAgavataM purANamamalaM yadvaiShNavAnAM priyaM
yasmin pAramahaMsyamekamamalaM j~nAnaM paraM gIyate |
tatra j~nAnavirAgabhaktisahitaM naiShkarmyamAviskR^itaM
tachChR^iNvanvipaThanvichAraNaparo bhaktyA vimuchyennaraH || 18||
kasmai yena vibhAsito.ayamatulo j~nAnapradIpaH purA
tadrUpeNa cha nAradAya munaye kR^iShNAya tadrUpiNA |
yogIndrAya tadAtmanAtha bhagavadrAtAya kAruNyataH
tachChuddhaM vimalaM vishokamamR^itaM satyaM paraM dhImahi || 19||
namastasmai bhagavate vAsudevAya sAkShiNe |
ya idaM kR^ipayA kasmai vyAchachakShe mumukShave || 20||
yogIndrAya namastasmai shukAya brahmarUpiNe |
saMsArasarpadaShTaM yo viShNurAtamamUmuchat || 21||
bhave bhave yathA bhaktiH pAdayostava jAyate |
tathA kuruShva devesha nAthastvaM no yataH prabho || 22||
nAmasa~NkIrtanaM yasya sarvapApapraNAshanam |
praNAmo duHkhashamanastaM namAmi hariM param || 23||
iti shrImadbhAgavate mahApurANe vaiyAsakyAmaShTAdashasAhasryAM
pAramahaMsyAM saMhitAyAM dvAdashaskandhe trayodasho.adhyAyaH || 13||
\section{.. iti dvAdashaskandhaH samAptaH ..}
\section{.. sampUrNo.ayaM granthaH ..}
tvadIyaM vastu govinda tubhyameva samarpaye |
tena tvada~Nghrikamale ratiM me yachCha shAshvatIm ||
\section{.. OM namo bhagavate vAsudevAya ..}
\section{.. OM tatsat ..}
\iti
##
Proofread by PSA Easwaran

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}