% Text title : Devi Bhagavatamahatmya Importance of Devi Bhagavatam from Skandapuranam % File name : devIbhAgavatam00.itx % Category : purana, devI, devii, devibhagavatam % Location : doc\_purana % Transliterated by : Vishwas Bhide, satsangdhara.net % Proofread by : Vishwas Bhide, satsangdhara.net % Description/comments : skandapurANe mAnasakhaNDe % Latest update : March 30, 2024 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. 0. Shrimaddevibhagavatamahatmyam ..}## \itxtitle{.. 0\. shrImaddevIbhAgavatamAhAtmyam ..}##\endtitles ## \section{0\.1 devIbhAgavatamAhAtmyam | prathamo.adhyAyaH | devIbhAgavatashravaNamAhAmyavarNanam |} sR^iShTau yA sargarUpA jagadavanavidhau pAlanI yA cha raudrI saMhAre chApi yasyA jagadidamakhilaM krIDanaM yA parAkhyA | pashyantI madhyamAtho tadanu bhagavatI vaikharI varNarUpA sAsmadvAchaM prasannA vidhiharigirishA\- rAdhitAla~Nkarotu || 1|| nArAyaNaM namaskR^itya naraM chaiva narottamam | devIM sarasvatIM vyAsaM tato jayamudIrayet || 2|| R^iShaya UchuH | sUta jIva samA bahvIryastvaM shrAvayasIha naH | kathA manoharAH puNyA vyAsashiShya mahAmate || 3|| sarvapApaharaM puNyaM viShNoshcharitamadbhutam | avatArakathopetamasmAbhirbhaktitaH shrutam || 4|| shivasya charitaM divyaM bhasmarudrAkShayostathA | setihAsa~ncha mAhAtmyaM shrutaM tava mukhAmbujAt || 5|| adhunA shrotumichChAmaH pAvanAt pAvanaM param | bhuktimuktipradaM nR^INAmanAyAsena sarvashaH || 6|| tat tvaM brUhi mahAbhAga yena sidhyanti mAnavAH | kalAvapi paraM tvatto na vidmaH saMshayachChidam || 7|| sUta uvAcha | sAdhu pR^iShTaM mahAbhAgA lokAnAM hitakAmyayA | sarvashAstrasya yat sAraM tadvo vakShyAmyasheShataH || 8|| tAvad garjanti tIrthAni purANAni vratAni cha | yAvanna shrUyate samyaga devIbhAgavataM naraiH || 9|| tAvat pApATavI nR^INAM kleshadAdabhrakaNTakA | yAvanna parashuH prApto devIbhAgavatAbhidhaH || 10|| tAvat kleshAvahaM nR^INAmupasargamahAtamaH | yAvannaivodayaM prApto devIbhAgavatoShNaguH || 11|| R^iShaya UchuH | sUta sUta mahAbhAga vada no vadatAM vara | kIdR^ishaM tatpurANaM hi vidhistachChravaNe cha kaH || 12|| katibhirvAsarairetachChrotavyaM ki~ncha pUjanam | kairmAnavaiH shrutaM pUrvaM kAnkAnkAmAnavApnuyuH || 13|| sUta uvAcha | viShNoraMsho munirjAtaH satyavatyAM parAsharAt | vibhajya vedAMshchaturaH shiShyAnadhyApayatpurA || 14|| vrAtyAnAM dvijabandhUnAM vedeShvanadhikAriNAm | strINAM durmedhasAM nR^iNAM dharmaj~nAnaM kathaM bhavet || 15|| vichAryaitat tu manasA bhagavAn bAdarAyaNaH | purANasaMhitAM dadhyau teShAM dharmavidhitsayA || 16|| aShTAdasha purANAni sa kR^itvA bhagavAn muniH | mAmevAdhyApayAmAsa bhAratAkhyAnameva cha || 17|| devIbhAgavataM tatra purANaM bhogamokShadam | svayaM tu shrAvayAmAsa janamejayabhUpatim || 18|| pUrvamasya pitA rAjA parIkShit takShakAhinA | sandaShTastasya saMshudhyai rAj~nA bhAgavataM shrutam || 19|| navabhirdivasaiH shrImadvedavyAsamukhAmbujAt | trailokyamAtaraM devIM pUjayitvA vidhAnataH || 20|| navAhayaj~ne sashR^irNe parIkShidapi bhUpatiH | divyarUpadharo devyAH sAlokyaM tatkShaNAdagAt || 21|| piturdivyAM gatiM rAjA vilokya janamejayaH | vyAsaM muniM samabhyarchya parAM mudamavApa ha || 22|| aShTAdashapurANAnAM madhye sarvottamaM param | devIbhAgavataM nAma dharmakAmArthamokShadam || 23|| ye shR^iNvanti sadA bhaktyA devyA bhAgavatIM kathAm | teShAM siddhirna dUrasthA tasmAt sevyA sadA nR^ibhiH || 24|| dinamardhaM tadardhaM vA muhUrtaM kShaNameva vA | ye shR^iNvanti narA bhaktyA na teShAM durgatiH kvachit || 25|| sarvayaj~neShu tIrtheShu sarvadAneShu yat phalam | sakR^it purANashravaNAt tat phalaM labhate naraH || 26|| kR^itAdau bahavo dharmAH kalau dharmastu kevalam | purANashravaNAdanyo vidyate nAparo nR^iNAm || 27|| dharmAchAravihInAnAM kalAvalpAyuShAM nR^iNAm | vyAso hitAya vidadhe purANAkhyaM sudhArasam || 28|| sudhAM pibanneka eva naraH syAdajarAmaraH | devyAH kathAmR^itaM kuryAt kulamevAjarAmaram || 29|| mAsAnAM niyamo nAtra dinAnAM niyamo.api na | sadA sevyaM sadA sevyaM devIbhAgavataM naraiH || 30|| Ashvine madhumAse vA tapomAse shuchau tathA | chaturShu navarAtreShu visheShAt phaladAyakam || 31|| ato navAhayaj~no.ayaM sarvasmAt puNyakarmaNaH | phalAdhikapradAnena proktaH puNyaprado nR^iNAm || 32|| ye durhR^idaH pAparatA vimUDhA mitradruho vedavinindakAshcha | hiMsAratA nAstikamArgasaktA navAhayaj~nena punanti te kalau || 33|| parasvadArAharaNe.atilubdhA ye vai narAH kalmaShabhArabhAjaH | godevatAbrAhmaNabhaktihInA navAhayaj~nena bhavanti shuddhAH || 34|| tapobhirugrairvratatIrthasevanai\- rdAnairanekairniyamairmakhaishcha | hutairjapairyachcha phalaM na labhyate navAhayaj~nena tadApyate nR^iNAm || 35|| tathA na ga~NgA na gayA na kAshI na naimiShaM no mathurA na puShkaram | punAti sadyo badarIvanaM no yathA hi devImakha eSha viprAH || 36|| ato bhAgavataM devyAH purANaM parataH param | dharmArthakAmamokShANAmuttamaM sAdhanaM matam || 37|| Ashvinasya site pakShe kanyArAshigate ravau | mahAShTamyAM samabhyarchya haimasiMhAsanasthitam || 38|| devIprItipradaM bhaktyA shrIbhAgavatapustakam | dadyAd viprAya yogyAya sa devyAH padavIM labhet || 39|| devIbhAgavatasyApi shlokaM shlokArdhameva vA | bhaktyA yashcha paThennityaM sa devyAH prItibhAgbhavet || 40|| upasargabhayaM ghoraM mahAmArIsamudbhavam | utpAtAnakhilAMshchApi hanti shravaNamAtrataH || 41|| bAlagrahakR^itaM yachcha bhUtapretakR^itaM bhayam | devIbhAgavatasyAsya shravaNAd yAti dUrataH || 42 yastu bhAgavataM devyAH paThed bhaktyA shrR^iNoti vA | dharmamarthaM cha kAmaM cha mokShaM cha labhate naraH || 43|| shravaNAdvasudevo.asya prasenAnveShaNe gatam | chirAyitaM priyaM putraM kR^iShNaM labdhvA mumoda ha || 44|| ya etAM shR^iNuyAd bhaktyA shrImadbhAgavatIM kathAm | bhuktiM bhuktiM sa labhate bhaktyA yashcha paThedimAm || 45|| aputro labhate putraM daridro dhanavAn bhavet | rogI rogAt pramuchyeta shrutvA bhAgavatAmR^itam || 46|| vandhyA vA kAkavandhyA vA mR^itavatsA cha yA~NganA | devIbhAgavataM shrutvA labhet putraM chirAyuSham || 47|| pUjitaM yadgR^ihe nityaM shrIbhAgavatapustakam | tadgR^ihaM tIrthabhUtaM hi vasatAM pApanAshakam || 48|| aShTamyAM vA chaturdashyAM navamyAM bhaktisaMyutaH | yaH paThechChaNuyAd vApi sa siddhiM labhate parAm || 49|| paThan dvijo vedavidagraNIrbhaved bAhuprajAto dharaNIpatiH syAt | vaishyaH paThan vittasamR^iddhimeti shUdro.api shR^iNvansvakulottamaH syAt || 50|| iti shrIskandapurANe mAnasakhaNDe shrImaddevIbhAgavatamAhAtmye devIbhAgavatashravaNamAhAmyavarNanaM nAma prathamo.adhyAyaH || 0\.1|| \section{0\.2 devIbhAgavatamAhAtmyam | dvitIyo.adhyAyaH | vasudevasya devIbhAgavatanavAha\-shravaNAtputraprAptivarNanam |} R^iShaya UchuH | vasudevo mahAbhAgaH kathaM putramavAptavAn | prasenaH kutra kR^iShNena bhramatAnveShitaH katham || 1|| vidhinA kena kasmAchcha devIbhAgavataM shrutam | vasudevena sumate vada sUta kathAmimAm || 2|| sUta uvAcha | satrAjid bhojavaMshIyo dvAravatyAM sukhaM vasan | sUryasyArAdhane yukto bhaktashcha paramaH sakhA || 3|| atha kAlena kiyatA prasannaH savitAbhavat | svalokaM darshayAmAsa tadbhaktyA praNayena cha || 4|| tasmai prItashcha bhagavAn syamantakamaNiM dadau | sa taM bibhranmaNi kaNThe dvArakAmAjagAma ha || 5|| dR^iShTvA taM tejasA bhrAntA matvAdityaM puraukasaH | kR^iShNamUchuH samabhyetya sudharmAyAmavasthitam || 6|| eSha AyAti savitA didR^ikShustvAM jagatpate | shrutvA kR^iShNastu tadvAchaM prahasyovAcha saMsadi || 7|| savitA naiSha bho bAlAH satrAjinmaNinA jvalan | syamantakena chAyAti bhAsvaddattena bhAsvatA || 8|| atha viprAn samAhUya svastivAchanapUrvakam | prAveshayatsamabhyarchya satrAjitsvagR^ihe maNim || 9|| na tatra mArI durbhikShaM nopasargabhayaM kvachit | yatrAste sa maNirnityamaShTabhArasuvarNadaH || 10|| atha satrAjito bhrAtA praseno nAma karhichit | kaNThe baddhvA maNiM sadyo hayamAruhya saindhavam || 11|| mR^igayArthaM vanaM yAtastamadrAkShItragAdhipaH | prasenaM sahayaM hatvA siMho jagrAha taM maNim || 12|| jAmbavAnR^ikSharAjo.atha dR^iShTvA maNidharaM harim | hatvA cha taM biladvAri maNiM jagrAha vIryavAn || 13|| sa taM maNiM svaputrAya krIDanArthamadAt prabhuH | atha chikrIDabAlo.api maNisammApya bhAsvaram || 14|| prasene.anAgate chAtha satrAjit paryatapyata | na jAne kena nihataH praseno maNimichChatA || 15|| atha lokamukhodgIrNA kiMvadantI pure.abhavat | kR^iShNena nihato nUnaM praseno maNilipsunA || 16|| sa taM shushrAva kR^iShNo.api duryasho liptamAtmani | mAstu tattasya padavIM puraukobhissahAgamat || 17|| gatvA sa vipine.apashyat prasenaM hariNA hatam | yayau mR^igendramanviShyannasR^igbindva~NkitAdhvanA || 18|| atha kR^iShNo hataM siMhaM biladvAri vilokya cha | uvAcha bhagavAn vAchaM kR^ipayA puravAsinaH || 19|| tiShThadhvaM yUyamatraiva yAvadAgamanaM mama | pravishAmi bilaM tvetanmaNihArakalabdhaye || 20|| tathetyuktvA tu te tastustatraiva dvArakaukasaH | jagAmAntarbilaM kR^iShNo yatra jAmbavato gR^iham || 21|| R^ikSharAjasutaM dR^iShTvA kR^iShNo maNidharaM tadA | hartumaichChanmaNiM tAvad dhAtrI chukrosha bhItavat || 22|| shrutvA dhAtrIravaM sadyaH samAgatyarkSharAT tadA | yuyudhe svAminA sAkamavishramamaharnisham || 23|| evaM trinavarAtraM tu mahadyuddhamabhUttayoH | kR^iShNAgamaM pratIkShantastasmR^irdvAri puraukasaH || 24|| dvAdashAhaM tato bhItyA pratijagmurnijAlayam | tatra te kathayAmAsurvR^ittAntaM sarvamAditaH || 25|| satrAjitaM shapantaste sarve shokAkulA bhR^isham | vasudevo mahAbhAgaH shrutvA putrasya tAM kathAm || 26|| mumoha saparIvArastadA paramayA shuchA | chintayAmAsa bahudhA kathaM shreyo bhavenmama || 27|| athAjagAma bhagavAn devarShirbrahmalokataH | utthAya taM praNamyAsau vasudevo.abhyapUjayat || 28|| nArado.anAmayaM pR^iShTvA vasudevaM mahAmatim | paprachCha cha yadushreShThaM kiM chintayasi tad vada || 29|| vasudeva uvAcha | putro me.atipriyaH kR^iShNaH prasenAnveShaNAya tu | pauraiH sAkaM vanaM gatvA nihataM taM tadaikShata || 30|| prasenaghAtakaM dR^iShTvA biladvAre mR^itaM harim | dvAri paurAnadhiShThApya bilAntargatavAn svayam || 31|| bahavo divasA yAtA nAyAtyadyApi me sutaH | ataH shochAmi tad brUhi yena lapsye sutaM mune || 32|| nArada uvAcha | putraprAptyai yadushreShTha devImArAdhayAmbikAm | tasyA ArAdhanenaiva sadyaH shreyo hyavApsyasi || 33|| vasudeva uvAcha | bhagavan kA hi sA devI kimprabhAvA maheshvarI | kathamArAdhanaM tasyA devarShe kR^ipayA vada || 34|| nArada uvAcha | vasudeva mahAbhAga shR^iNu sa~NkShepato mama | devyA mAhAtmyamatulaM ko vaktuM vistarAt kShamaH || 35|| yA sA bhagavatI nityA sajjidAnandarUpiNI | parAtparatarA devI yayA vyApsamidaM jagat || 36|| yadArAdhanato brahmA sR^ijatIdaM charAcharam | yAM cha stutvA vinirmukto madhukaiTabhajAd bhayAt || 37|| viShNuryatkR^ipayA vishvaM bibharti bhagavAnidam | rudraH saMharate yasyAH kR^ipApA~NganirIkShaNAt || 38|| saMsArabandhaheturyA saiva muktipradAyinI | sA vidyA paramA devI saiva sarveshvareshvarI || 39|| navarAtravidhAnena sampUjya jagadambikAm | navAhobhiH purANaM cha devyA bhAgavataM shR^iNu || 40|| yasya shravaNamAtreNa sadyaH putramavApsyasi | bhuktirmuktirna dUrasthA patatAM shR^iNvatAM nR^iNAm || 41|| ityukto nAradenAsau vasudevaH praNamya tam | uvAcha parayA prItyA nAradaM munisattamam || 42|| vasudeva uvAcha | bhagavaMstava vAkyena saMsmR^itaM vR^ittamAtmanaH | shrUyatAM tachcha vakShyAmi devImAhAktyasambhavam || 43|| purA nabhogirA kaMso devakyaShTamagarbhataH | j~nAtvAtmamR^ityuM pApo mAM sabhAryaM nyaruNadbhiyA || 44|| kArAgAre.ahamavasaM devakyA saha bhAryayA | jAtaM jAtaM samavadhItputraM kaMso.api pApakR^it || 45|| ShaT putrA nihatAstena tadA shokAkulA bhR^isham | atapyad devakI devI naktandivamaninditA || 46|| tadAhaM gargamAhUya muniM natvAbhipUjya cha | nivedya devakIduHkhamavochaM putrakAmyayA || 47|| bhagavan karuNAsindho yAdavAnAM gururbhavAn | AyuShmatputrasamprAptisAdhanaM vada me mune || 48|| tato gargaH prasannAtmA mAmuvAcha dayAnidhiH | garga uvAcha | vasudeva mahAbhAga shR^iNu tat sAdhanaM param || 49|| yA sA bhagavatI durgA bhaktadurgatihAriNI | tAmArAdhaya kalyANIM sadyaH shreyo hyavApsyasi || 50|| yadArAdhanataH sarve sarvAn kAmAnavApnuyuH | na ki~nchiddurlabhaM loke durgArchanavatAM nR^iNAm || 51|| ityukto.ahaM mudA yuktaH sabhAryo munipu~Ngavam | praNamya parayA bhaktyA prAvochaM vihitA~njaliH || 52|| vasudeva uvAcha | yadyasti bhagavan prItirmayi te karuNAnidhe | tadA guro madarthe tvaM samArAdhaya chaNDikAm || 53|| niruddhaH kaMsagehe.ahaM na ki~nchit kartumutsahe | atastvameva duHkhAbdhermAmuddhara mahAmate || 54|| ityuktastu mayA prItaH provAcha munipu~NgavaH | vasudeva tava prItyA kariShyAmi hitaM tava || 55|| atha gargamuniH prItyA mayA samprArthito.agamat | ArirAdhayiShurdurgA vindhyAdriM brAhmaNaiH saha || 56|| tatra gatvA jagaddhAtrIM bhaktAbhIShTapradAyinIm | ArAdhayAmAsa munirjapapAThaparAyaNaH || 57|| tataH samApte niyame vAguvAchAsharIriNI | prasantAhaM mune kAryasiddhistava bhaviShyati || 58|| bhUbhAraharaNArthAya mayA sammerito hariH | vasudevasya devakyAM svAMshenAvatariShyati || 59|| kaMsabhItyA tamAdAya bAlamAnakadundubhiH | prApayiShyati sadyastu gokule nandaveshmani || 60|| yashodAtanayAM nItvA svagR^ihe kaMsabhUbhuje | dAsyatyatha cha tAM hantuM kaMsa AkShekyati kShitau || 61|| sA taddhastAd vinirgatya sadyo divyavapurdharA | madaMshabhUtA vindhyAdrau kariShyati jagaddhitam || 62|| iti tadvachanaM shrutvA praNamya jagadambikAm | gargo muniH prasannAtmA mathurAmAgamat purIm || 63|| varadAnaM mahAdevyA gargAchAryamukhAdaham | shrutvA sabhAryaH samprItaH parAM mudamathAgamam || 64|| tadArabhya paraM jAne devImAhAtmyamuttamam | adhunApi hi devarShe shrutaM tava mukhAmbujAt || 65|| ato bhAgavataM devyAstvameva shrAvaya prabho | madbhAgyAdeva devarShe sashrAnto.asi dayAnidhe || 66|| vasudevavachaH shrutvA nAradaH prItamAnasaH | sudine shubhanakShatre kathArambhamathAkarot || 67|| kathAvighnavighAtArthaM dvijA jepurnavAkSharam | mArkaNDeyapurANoktaM peThurdevyAH stavaM tathA || 68|| prathamaskandhamArabhya shrInAradamukhodgatam | shushrAva vasudevashcha bhaktyA bhAgavatAmR^itam || 69|| navame.ahni kathApUrtau pustakaM vAchakaM tathA | prasannaH pUjayAmAsa vasudevo mahAmanAH || 70|| atha tatra bilasyAntaH kR^iShNajAmbavatormR^idhe | kR^iShNamuShTiviniShpAtashlathA~Ngo jAmbavAnabhUt || 71|| athAgatasmR^itiH so.api bhagavantaM praNamya cha | uvAcha parayA bhaktyA svAparAdhaM kShamApayan || 72|| j~nAto.asi radhuvaryastvaM yadroShAt saritAmpatiH | kShobhaM jagAma la~NkA cha rAvaNaH sAnugo hataH || 73|| sa evAsi bhavAnkR^iShNa maddaurAmyaM kShamasva bhoH | brUhi yat karaNIyaM me bhR^ityo.ahaM tava sarvathA || 74|| shrutvA jAmbavato vAchamabravIjjagadIshvaraH | maNihetoriha prAptA vayamR^ikShapate bilam || 75|| R^ikSharAjastataH prItyA kanyAM jAmbavatIM nijAm | dadau kR^iShNAya sampUjya syamantakamaNiM tathA || 76|| sa tAM patnIM samAdAya maNiM kaNThe tathAdadhat | abhimantryarkSharAja~ncha pratasthe dvArakAM prati || 77|| kathAsamAptidivase vasudeva udAradhIH | brAhmaNAn bhojayAmAsa dakShiNAbhiratoShayat || 78|| AshIrvAchaM prayu~njAnA dvijA yatsamaye hariH | AjagAma kShaNe tasmin patnyA saha maNiM dadhat || 79|| bhAryayA sahitaM kR^iShNaM vasudevapurogamAH | dR^iShTvA harShAshrupUrNAkShAH samavApuH parAM mudam || 80|| devarShirnAradashchAtha kR^iShNAgamanaharShitaH | Amantrya vasudevaM cha kR^iShNaM brahmasabhAM yayau || 81|| haricharitamidaM yatkIrtitaM duryashoghnaM patati vimalabhaktyA shuddhachittaH shR^iNoti | sa bhavati sukhapUrNaH sarvadA siddhakAmo jagati cha vapuSho.ante muktimArgaM labhechcha || 82|| iti shrIskandapurANe mAnasakhaNDe shrImaddevIbhAgavatamAhAtmye vasudevasya devIbhAgavatanavAha\-shravaNAtputraprAptivarNanaM nAma dvitIyo.adhyAyaH || 0\.2|| \section{0\.3 devIbhAgavatamAhAtmyam | tR^itIyo.adhyAyaH | devIbhAgavata\-navAhashravaNAd ilAyAH puMstvaprAptivarNanam |} sUta uvAcha | athetihAsamanyachcha shR^iNudhvaM munisattamAH | devIbhAgavatasyAsya mAhAtmyaM yatra gIyate || 1|| ekadA kumbhayonistu lopAmudrApatirmuniH | gatvA kumAramabhyarchya paprachCha vividhAH kathAH || 2|| sa tasmai bhagavAn skandaH kathayAmAsa bhUrishaH | dAnatIrthavratAdInAM mAhAtmyopachitAH kathAH || 3|| vArANasyAshcha mAhAtmyaM maNikarNIbhavaM tathA | ga~NgAyAshchApi tIrthAnAM varNitaM bahuvistaram || 4|| shrutvAtha sa muniH prItaH kumAraM bhUrivarchasam | punaH paprachCha lokAnAM hitArthaM kumbhasambhavaH || 5|| agastya uvAcha | bhagavaMstArakArAte devIbhAgavatasya tu | mAhAtmyaM shravaNe tasya vidhiM chApi vada prabho || 6|| devIbhAgavataM nAma purANaM paramottamam | trailokyajananI sAkShAd gIyate yatra shAshvatI || 7|| skanda uvAcha | shrIbhAgavatamAhAmya ko vaktuM vistarAt kShamaH | shR^iNu sa~NkShepato brahman kathayiShyAmi sAmpratam || 8|| yA nityA sachchidAnandarUpiNI jagadambikA | sAkShAt samAshritA yatra bhuktimuktipradAyinI || 9|| atastadvA~NgamayI mUrtirdevIbhAgavate mune | paThanAchChravaNAdyasya na ki~nchidiha durlabham || 10|| AsIdvivasvataH putraH shrAddhadeva iti shrutaH | so.anapatyo.akarodiShTiM vasiShThAnumato nR^ipaH || 11|| hotAraM prArthayAmAsa shraddhAtha dayitA manoH | kanyA bhavatu me brahmaMstathopAyo vidhIyatAm || 12|| manasA chintayan hotA kanyAmevAjuhoddhaviH | tatastadvyabhichAreNa kanyelA nAma chAbhavat || 13|| atha rAjA sutAM dR^iShTvA provAcha vimanA gurum | kathaM sa~NkalpavaiShamyamiha jAtaM prabho tava || 14|| tachChrutvA sa munirdadhyau j~nAtvA hoturvyatikramam | IshvaraM sharaNaM yAta ilAyAH puMstvakAmyayA || 15|| munestapaHprabhAvAchcha pareshAnugrahAttathA | pashyatAM sarvalokAnAmilA puruShatAmagAt || 16|| guruNA kR^itasaMskAraH sudyumno.atha manoH sutaH | nidhirbabhUva vidyAnAM saritAmiva sAgaraH || 17|| atha kAlena sudyumnastAruNyaM samavApya cha | mR^igayArthaM vanaM yAto hayamAruhya saindhavam || 18|| vanAd vanAntaraM gachChan bahu babhrAma sAnugaH | daivAdadhastAddhemAdreH sa kumAro vanaM yayau || 19|| kasmiMshchit samaye yatra bhAryayAparNayA saha | aramaddevadevastu sha~Nkaro bhagavAn mudA || 20|| tadA tu munayastatra shivadarshanalAlasAH | Ajagmuratha tAn dR^iShTvA girijA vrIDitAbhavat || 21|| ramamANau tu tau dR^iShTvA girishau saMshitavratAH | nivR^ittA munayo jagmurvaikuNThanilayaM tadA || 22|| priyAyAH priyamanvichCha~nChivo.araNyaM shashApa ha | adyArabhya vishedyo.atra pumAn yoShid bhavediti || 23|| tata Arabhya taM deshaM puruShA varjayanti hi | tatra praviShTaH sudyumno babhUva pramadottamA || 24|| strIbhUtAnanugAnashvaM vaDavAM vIkShya vismitaH | atha sA sundarI yoShA vichachAra vane vane || 25|| ekadA sA jagAmAtha budhasyAshramasannidhau | dR^iShTvA tAM chArusarvA~NgIM pInonnatapayodharAm || 26|| bimboShThIM kundadashanAM sumukhImutpalekShaNAm | ana~NgasharaviddhA~Ngashchakame bhagavAn budhaH || 27|| sApi taM chakame subhrUH kumAraM somanandanam | tatastasyAshrame.avAtsIdramamANA budhena sA || 28|| atha kAlena kiyatA purUravasamAtmajam | sa tasyAM janayAmAsa mitrAvaruNasambhava || 29|| atha varSheShu yAteShu kadAchit sA budhAshrame | smR^itvA svaM pUrvavR^ittAntaM duHkhitA nirjagAma ha || 30|| gurorathAshramaM gatvA vasiShThasya praNamya tam | nivedya vR^ittaM sharaNaM yayau puMstvamabhIpsatI || 31|| vasiShTho j~nAtavR^ittAnto gatvA kailAsaparvatam | sampUjya shambhuM tuShTAva bhaktyA paramayA yutaH || 32|| vasiShTha uvAcha | namo namaH shivAyAstu sha~NkarAya kapardine | girijArdhA~NgadehAya namaste chandramaulaye || 33|| mR^iDAya sukhadAtre te namaH kailAsavAsine | nIlakaNThAya bhaktAnAM bhuktimuktipradAyine || 34|| shivAya shivarUpAya prapannabhayahAriNe | namo vR^iShabhavAhAya sharaNyAya parAtmane || 35|| brahmaviShNvIsharUpAya sargasthitilayeShu cha | namo devAdhidevAya varadAya purAraye || 36|| yaj~narUpAya yajatAM phaladAtre namo namaH | ga~NgAdharAya sUryendushikhinetrAya te namaH || 37|| evaM stutaH sa bhagavAn prAdurAsIjjagatpatiH | vR^iShArUDho.ambikopetaH koTisUryasamaprabhaH || 38 rajatAchalasa~NkAshastrinetrashchandrashekharaH | praNataM parituShTAtmA provAcha munisattamam || 39|| shrIbhagavAnuvAcha | varaM varaya viprarShe yatte manasi vartate | ityuktastaM praNamyelApuMstvamabhyarthayanmuniH || 40|| atha prasanno bhagavAnuvAcha munisattamam | mAsaM pumAn sa bhavitA mAsaM nArI bhaviShyati || 41|| iti prApya varaM shambhormaharShirjagadambikAm | varadAnonmukhI devIM praNanAma maheshvarIm || 42|| koTichandrakalAkAntiM susmitAM paripUjya cha | tuShTAva bhaktyA satatamilAyAH puMstvakAmyayA || 43|| jaya devi mahAdevi bhaktAnugrahakAriNi | jaya sarvasurArAdhye jayAnantaguNAlaye || 44|| namo namaste deveshi sharaNAgatavatsale | jaya durge duHkhahantri duShTadaityaniShUdini || 45|| bhaktigamye mahAmAye namaste jagadambike | saMsArasAgarottArapotIbhUtapadAmbuje || 46|| brahmAdayo.api vibudhAstvatpAdAmbujasevayA | vishvasargasthitilayaprabhutvaM samavApnuyuH || 47|| prasannA bhava deveshi chaturvargapradAyini | kastvAM stotuM kShamo devi kevalaM praNato.asthaham || 48|| evaM stutA bhagavatI durgA nArAyaNI parA | bhaktyA vasiShThamuninA prasannA tatkShaNAdabhUt || 49|| tadovAcha mahAdevI praNatArtiharI munim | sudyumnabhavanaM gatvA kuru bhaktyA madarchanam || 50|| sudyunaM shrAvaya prItyA purANa matpriya~Nkaram | devIbhAgavataM nAma navAhobhirdvijottama || 51|| shravaNAdeva satataM puMstvamasya bhaviShyati | ityuktyA cha tirodhAnaM gachChataH sma shiveshvarau || 52|| vasiShThastAM dishaM natvA samAgatyAshramaM nijam | samAhUya cha sudyumnaM devyArAdhanamAdishat || 53|| Ashvinasya site pakShe sampUjya jagadambikAm | navarAtravidhAnena shrAvayAmAsa bhUpatim || 54|| shrutvA bhaktyApi sudyumnaH shrImadbhAgavatAmR^itam | praNamyAbhyarchya cha guruM lebhe puMstvaM nirantaram || 55|| rAjyAsane.abhiShiktastu vasiShThena maharShiNA | bhuvaM shashAsa dharmeNa prajAshchaivAnura~njayan || 56|| Ije cha vividhairyaj~naiH sampUrNavaradakShiNaiH | putreShu rAjyaM sandishya prApa devyAH salokatAm || 57|| iti kathitamasheShaM setihAsaM cha viprA yadi paThati subhaktyA mAnavo vA shR^iNoti | sa iha sakalakAmAn prApya devyAH prasAdAt paramamR^itamathAnte yAti devyAH salokam || 58|| iti shrIskandayurANe mAnasakhaNDe shrImaddevIbhAgavatamAhAtmye devIbhAgavata\-navAhashravaNAd ilAyAH puMstvaprAptivarNanaM nAma tR^itIyo.adhyAyaH || 0\.3|| \section{0\.4 devIbhAgavatamAhAtmyam | chaturtho.adhyAyaH | raivatanAmakamanuputrotpattivarNanam |} sUta uvAcha | iti shrutvA kathAM divyAM vichitrAM kumbhasambhavaH | shushrUShuH punarAhedaM vishAkhaM vinayAnvitaH || 1|| agastya uvAcha | devasenApate deva vichitreyaM shrutA kathA | punaranyajja mAhAtmyaM vada bhAgavatasya me || 2|| skanda uvAcha | mitrAvaruNasambhUta mune shR^iNu kathAmimAm | yatraikadeshamahimA prokto bhAgavatasya tu || 3|| varNyate dharmavistAro gAyatrImadhikR^itya cha | gAyatryA mahimA yatra tad bhAgavatamiShyate || 4|| bhagavatyA idaM yasmAttasmAt bhAgavataM viduH | brahmaviShNushivArAdhyA parA bhagavatI hi sA || 5|| R^itavAgiti vikhyAto munirAsInmahAmatiH | tasyaputro.abhavatkAle gaNDAnte pauShNabhAntime || 6|| sa tasya jAtakarmAdikriyAshchakre yathAvidhi | chUDopanayanAdIMshcha saMskArAnapi so.akarot || 7|| yata Arabhya jAto.asau putrastasya mahAtmanaH | tata evAtha sa muniH shokarogAkulo.abhavat || 8|| roShalobhaparItAtmA tathA mAtApi tasya cha | bahurogArditA nityaM shuchA duHkhIkR^itA bhR^isham || 9|| R^itavAk sa munishchintAmavApa bhR^ishaduHkhitaH | kimetat kAraNaM jAtaM putro me.atyantadurmatiH || 10|| kasyachinmuniputrasya balAt patnIM jahAra cha | mene shikShAM piturnAsau na cha mAturvimUDhadhIH || 11|| tato viShaNNachittastu R^itavAgabravIdidam | aputratA varaM nR^iNAM na kadAchit kuputratA || 12|| pitR^In kuputraH svaryAtAnniraye pAtayatyapi | yAvajjIvet sadA pitroH kevalaM duHkhadAyakaH || 13|| pitrorduHkhAya dhigjanma kuputrasya cha pApinaH | suhR^idAM nopakArAya nApakArAya vairiNAm || 14|| dhanyAste mAnavA loke suputro yadgR^ihe sthitaH | paropakArashIlashcha piturmAtuH sukhAvahaH || 15|| kuputreNa kulaM naShTaM kuputreNa hataM yashaH | kuputreNeha chAmutra duHkhaM nirayayAtanAH || 16|| kuputreNAnvayo naShTo janma naShTaM kubhAryayA | kubhojanena divasaH kumitreNa sukhaM kutaH || 17|| skanda uvAcha | evaM duShTasya putrasya duShTairAcharaNairmuni | tapyamAno.anishaM kAle gatvA gargamapR^ichChata || 18|| R^itavAguvAcha | bhagavaMstvAmahaM praShTumichChAmi vada tat prabho | jyotishshAsvasya chAchArya putradauHshIlyakAraNam || 19|| gurushushrUShayA vedA adhItA vidhivanmayA | brahmachArivrataM tIrtvA vivAho vidhivat kR^itaH || 20|| bhAryayA saha gArhasthyadharmashchAnuShThito.anisham | pa~nchayaj~navidhAnaM cha mayAkAri yathAvidhi || 21|| narakAd bibhyatA vipra na tu kAmasukhechChayA | garbhAdhAnaM cha vidhivat putraprAptyai mayA kR^itam || 22|| putro.ayaM mama doSheNa mAturdoSheNa vA mune | jAto duHkhAvahaH pitrorduHshIlo bandhushokadaH || 23|| etannishamya vachanaM gargAchAryo munestadA | vichArya sarvaM taddhetuM jyotirvidvAchamabravIt || 24|| garga uvAcha | mune naivAparAdhaste na mAturna kulasya cha | revatyantaM tu gaNDAntaM putradauHshIlyakAraNam || 25|| duShTe kAle yato janma putrasya tava bho mune | tenaiva tava duHkhAya nAnyo heturmanAgapi || 26|| tadduHkhashAntaye brahma~njagatAM mAtaraM shivAm | samArAdhaya yatnena durgAM durgatinAshinIm || 27|| gargasya vachanaM shrutvA R^itavAk krodhamUrchChitaH | revatIM tu shashApAsau vyomnaH patatu revatI || 28|| datte shApe tu tenAtha pUShNo bha~nja papAta khAt | kumudAdrau bhAsamAnaM sarvalokasya pashyataH || 29|| khyAto raivatakashchAbhUttatpAtAt kumudAchalaH | atIva ramaNIyashcha tataH prabhR^iti so.apyabhUt || 30|| dattvA shApaM cha revatyai gargoktavidhinA muniH | samArAdhyAmbikAM devIM sukhasaubhAgyabhAgabhUt || 31|| skanda uvAcha | revatyR^ikShasya yat tejastasmAjjAtA tu kanyakA | rUpeNApratimA loke dvitIyA shrIrivAbhavat || 32|| atha tAM pramuchaH kanyAM revatIkAntisambhavAm | dR^iShTvA nAma chakArAsyA revatIti mudA muniH || 33|| ninye.atha svAshrame chainAM poShayAmAsa dharmataH | brahmarShiH pramucho nAma kumudAdrau sutAmiva || 34|| atha kAlena cha prauDhAM dR^iShTvA tAM rUpashAlinIm | sa munishchintayAmAsa ko.asyA yogyo varo bhavet || 35|| bahudhAnveShayastasyA nAsasAdochitaM patim | tato.agnishAlAM saMvishya munistuShTAva pAvakam || 36|| kanyAvaraM tadAshaMsatprItastamapi havyavAT | dharmiShTho balavAn vIraH priyavAgaparAjitaH || 37|| durdamo bhavitA bhartA mune.asyAH pR^ithivIpatiH | iti shrutvA vacho vahneH prasanno.abhUnmunistadA || 38|| daivAdAkheTakavyAjAt tatkShaNAdAgato nR^ipaH | durdamo nAma medhAvI tasyAshramapadaM muneH || 39|| putro vikramashIlasya balavAn vIryavattaraH | kAlindIjaThare jAtaH priyavratakulodbhavaH || 40|| munerAshramamAvishya tamadR^iShTvA mahAmunim | Amantrya tAM priye cheti revatIM pR^iShTavAn nR^ipaH || 41|| rAjovAcha | maharShirbhagavAnasmAdAshramAt kva gataH priye | tatpAdau draShTumichChAmi vada kalyANi tattvataH || 42|| kanyovAcha | agnishAlAmupagato mahArAja mahAmuniH | nishchakrAmAshramAt tUrNaM rAjApyAkarNya tadvachaH || 43|| athAgnishAlAdvArasthaM rAjAnaM durdamaM muniH | rAjalakShaNasaMyuktamapashyat prashrayAnatam || 44|| praNanAma cha taM rAjA muniH shiShyamuvAcha ha | gautamAnIyatAmarghyamarghyayogyo.asti bhUpatiH || 45|| AgatashchirakAlena jAmAteti visheShataH | ityuktyArghyaM dadau tasmai so.api jagrAha chintayan || 46|| munirAsanamAsInaM gR^ihItArghyaM cha bhUpatim | AshIrbhirabhinandyAtha kushalaM chApyapR^ichChata || 47|| api .anAmayaM rAjan bale koshe suhR^itsu cha | bhR^itye.amAtye pure deshe tathAtmani janAdhipa || 48|| bhAryAsti te kushalinI yataH sAtraiva tiShThati | ato na pR^ichChAmyasyAste chAnyAsAM kushalaM vada || 49|| rAjovAcha | bhagavaMstvatprasAdena sarvatrAnAmayaM mama | etat kutUhalaM brahman madbhAryA kAtra vidyate || 50|| R^iShiruvAcha | revatI nAma te bhAryA rUpeNApratimA bhuvi | vidyate.atra kathaM patnIM tAM na vetsi mahIpate || 51|| rAjovAcha | subhadrAdyAstu yA bhAryA mama santi gR^ihe vibho | jAnAmi tAstu bhagavan naiva jAnAmi revatIm || 52|| R^iShiruvAcha | priyeti sAmprataM rAjaMstvayoktA yA mahAmate | sA vismR^itA kShaNAdeva yA te shlAdhyatamA priyA || 53|| rAjovAcha | tvayoktaM yanmR^iShA tano tathaivAmantritA mayA | mune duShTo na me bhAvaH kopaM mA kartumarhasi || 54|| R^iShiruvAcha | rAjannuktaM tvayA satyaM na bhAvo dUShitastava | vahninA preritenetthaM bhavatA vyAhR^itaM vachaH || 55|| adya pR^iShTo mayA vahniH ko.asyA bhartA bhaviShyati | tenoktaM durdamo rAjA bhavitAsyAH patirdhuvam || 56|| tadAdatsva mayA dattAmimAM kanyAM mahIpate | priyetyAmantritA pUrvaM mA vichAraM kuruShva bhoH || 57|| shrutvaitatso.abhavattUShNIM chintayan munibhAShitam | vaivAhikaM vidhiM tasya muniH kartuM samudyataH || 58|| athodyataM vivAhAya dR^iShTvA kanyAbravInmunim | revatyR^ikShe vivAho me tAta kartuM tvamarhasi || 59|| R^iShiruvAcha | vatse vivAhayogyAni santyanyarkShANi bhUrishaH | revatyAM kathamudvAhaH pauShNabhaM na divi sthitam || 60|| kanyovAcha | revatyR^ikShaM vinA kAlo mamodvAhochito na hi | ataH samprArthayAmyetadvivAhaM pauShNabhe kuru || 61|| R^iShiruvAcha | R^itavA~NmuninA pUrvaM revatIbhaM nipAtitam | bhAntare chenna te prItirvivAhaH syAt kathaM tava || 62|| kanyovAcha | tapaH kiM taptavAneka R^itavAgeva kevalam | bhavatA kiM tapo nedR^ik taptaM vAlkAyamAnasaiH || 63|| jagatsraShTuM samarthastvaM vedmyahaM te tapobalam | revatyR^ikShaM divi sthApya mamodvAhaM pitaH kuru || 64|| R^iShiruvAcha | evaM bhavatu bhadraM te yathaiva tvaM bravIShi mAm | tvatkR^ite somamArge.ahaM sthApayAmyadya pauShNabham || 65|| skanda uvAcha | evamuktvA munistUrNaM pauShNabhaM svatapobalAt | yathApUrvaM tathA chakre somamArge ghaTodbhava || 66|| revatInAmni nakShatre vivAhavidhinA muniH | revatIM pradadau rAj~ne durdamAya mahAtmane || 67|| kR^itvA vivAhaM kanyAyA munI rAjAnamabravIt | kiM .abhilaShitaM vIra vada tatpUrayAmyaham || 68|| rAjovAcha | manoH svAyambhuvasyAhaM vaMshe jAto.asmi he mune | manvantarAdhipaM putraM tvatprasAdAchcha kAmaye || 69|| muniruvAcha | yadyeShA kAmanA te.asti devyA ArAdhanaM kuru | bhaviShyatyeva te putro manurmanvantarAdhipaH || 70|| devIbhAgavataM nAma purANaM yattu pa~nchamam | pa~nchakR^itvastu tachChrutvA lapsyase.abhimataM sutam || 71|| revatyAM raivato nAma pa~nchamo bhavitA manuH | vedavichChAstratattvaj~no dharmavAnaparAjitaH || 72|| ityukto muninA rAjA praNamya mudito munim | bhAryayA saha medhAvI jagAma nagaraM nijam || 73|| pitR^ipaitAmahaM rAjyaM chakAra sa mahAmatiH | pAlayAmAsa dharmAtmA prajAH putrAnivaurasAn || 74|| ekadA lomasho nAma mahAtmA munirAgataH | praNipatya tamabhyarchya prA~njalishchAbravInnR^ipaH || 75|| rAjovAcha | bhagavaMstvatprasAdena shrotumichChAmi bho mune | devIbhAgavataM nAma purANaM putralipsayA || 76|| shrutvA vAchaM prajAbhartuH prItaH provAcha lomashaH | dhanyo.asi rAjaMste bhaktirjAtA trailokyamAtari || 77|| surAsuranarArAdhyA yA parA jagadambikA | tasyAM chedbhaktirutpannA kAryasiddhirbhaviShyati || 78|| atastvAM shrAvayiShyAmi shrImadbhAgavataM nR^ipa | yasya shravaNamAtreNa na ki~nchidapi durlabham || 79|| ityuktyA sudine brahman kathArambhamathAkarot | pa~nchakR^itvaH sa shushrAva vidhivadbhAryayA saha || 80|| samAptidivase rAjA purANa~ncha muniM tathA | pUjayAmAsa dharmAtmA mudA paramayA yutaH || 81|| hutvA navArNamantreNa bhojayitvA kumArikAH | vADavAMshcha sapatnIkAndakShiNAbhiratoShayat || 82|| atha kAlena kiyatA bhagavatyAH prasAdataH | garbhaM dadhAra sA rAj~nI lokakalyANakArakam || 83 puNye.atha samaye prApte grahaiH susthAnasa~NgataiH | sarvama~Ngalasampanne revatI suShuve sutam || 84 shrutvA putrasya jananaM snAtvA rAjA mudAnvitaH | sa suvarNAmbhasA chakre jAtakarmAdikAH kriyAH || 85 yathAvidhi cha dAnAni dattvA viprAnatoShayat | kR^itopanayanaM rAjA sA~NgAnvedAnapAThayat || 86|| sarvavidyAnidhirjAto dharmiShTho.astravidAM varaH | dharmasya vaktA kartA cha raivato nAma vIryavAn || 87|| niyuktavAnatha brahmA raivataM mAnave pade | manvantarAdhipaH shrImAn gAM shashAsa sa dharmataH || 88|| itthaM devyAH prabhAvo.ayaM sa~NkShepeNopavarNitaH | purANasya cha mAhAtmyaM ko vaktuM vistarAtkShamaH || 89|| sUta uvAcha | kumbhayonistu mAhAtmyaM vidhiM bhAgavatasya cha | shrutvA kumAraM chAbhyarchya svAshramaM punarAyayau || 90|| idaM mayA bhAgavatasya viprA mAhAmyamuktaM bhavatAM samakSham | shR^iNoti bhaktyA paThatIha bhogAn bhuktyAkhilAnmuktimupaiti chAnte || 91|| iti shrIskandapurANe mAnasakhaNDe shrImaddevIbhAgavatamAhAtmye raivatanAmakamanuputrotpattivarNanaM nAma chaturtho.adhyAyaH || 0\.4|| \section{0\.5 devIbhAgavatamAhAtmyam | pa~nchamo.adhyAyaH | devIbhAgavata\-shravaNavidhivarNanam |} R^iShaya UchuH | sUta sUta mahAbhAga shrutaM mAhAtmyamuttamam | adhunA shrotumichChAmaH purANashravaNe vidhim || 1|| sUta uvAcha | shrUyatAM munayaH sarve purANashravaNe vidhim | narANAM shR^iNvatAM yena siddhiH syAtsArvakAmikI || 2|| Adau daivaj~namAhUya muhUrtaM kalpayetsudhIH | Arabhya shuchimAsa tu mAsaShaTkaM shubhAvaham || 3|| hastAshvimUlapuShyarkShe brahmamaitrenduvaiShNave | sattithau shubhavAre cha purANashravaNaM shubham || 4|| gurubhAdvedavedAbjasharA~NgAbdhiguNaiH kramAt | dharmAptirindirAprAptiH kathAsiddhiH paraM sukham || 5 pIDAtha bhUpatibhayaM j~nAnaprAptiH kramAtphalam | purANashravaNe chakraM shodhayechChivabhAShitam || 6 athavA prItaye devyA navarAtrachatuShTaye | shR^iNuyAdanyamAse.api tithivArarkShashodhite || 7 sambhAraM tAdR^ishaM kAryaM vivAhAdau cha yAdR^isham | navAhayaj~ne chApyasminvidheyaM yatnato budhaiH || 8 sahAyA bahavaH kAryA dambhalobhavivarjitAH | chaturAshcha vadAnyAshcha devIbhaktiparA narAH || 9 preShyA yatnena vArteyaM deshe deshe jane jane | AgantavyamihAvashyaM kathA devyA bhaviShyati || 10 saurAshcha gANapatyAshcha shaivAH shAktAshcha vaiShNavAH | sarveShAmapi sevyeyaM yato devAH sashaktayaH || 11 shrImaddevIbhAgavatapIyUSharasalolupaiH | AgantavyaM visheSheNa kathArthaM prematatparaiH || 12 brAhmaNAdyAshcha ye varNAH striyashchAshramiNastathA | sakAmAshchApi niShkAmAH pAtavyaM taiH kathAmR^itam || 13 nAvakAshaH kadAchitsyAnnavAhashravaNe.api taiH | AgantavyaM yathAkAlaM yaj~ne puNyA kShaNasthitiH || 14|| vinayenaiva kartavyamevamAkAraNaM nR^iNAm | AgatAnA~ncha kartavyaM vAsasthAnaM yathochitam || 15|| kathAsthAnaM prakartavyaM bhUmau mArjanapUrvakam | lepanaM gomayenAtha vishAlAyAM manoramam || 16|| kAryastu maNDapo ramyo rambhAstambhopashobhitaH | vitAnamupariShThAttu patAkAdhvajarAjitaH || 17|| vaktushchaivAsanaM divyaM sukhAstaraNasaMyutam | rachitavyaM prayatnena prA~NmukhaM vApyuda~Nmukham || 18|| yathochitAni kurvIta shrotR^INAmAsanAni cha | nR^iNAM chaivAtha nArINAM kathAshravaNahetave || 19|| vAgmI dAntashcha shAstraj~no devyArAdhanatatparaH | dayAlurnispR^iho dakSho dhIro vaktottamo mataH || 20|| brahmaNyo devatAbhaktaH kathArasaparAyaNaH | udAro.alolupo namraH shrotA hiMsAdivarjitaH || 21|| pAkhaNDanirato lubdhaH straiNo dharmadhvajastathA | niShThuraH krodhano vaktA devIyaj~ne na shasyate || 22|| saMshayachChedanAyaikaH paNDitashcha tathAguNaH | shrotR^ibodhakR^idavyagraH kAryo vaktuH sahAyakR^it || 23|| muhUrtadivasAdarvAgvaktR^ishrotrAdibhirjanaiH | kartavyaM kShaurakarmAdi tato niyamakalpanam || 24|| aruNodayavelAyAM snAyAchChauchaM vidhAya cha | sasthAtarpaNakArya~ncha nityaM sa~NkShepatashcharet || 25|| kathAshravaNayogyatvasiddhaye gAshcha dApayet | samastavighnahartAramAdau gaNapatiM yajet || 26|| kalashAMshchApi saMsthApya pUjayettatra digbhavAn | vaTukaM kShetrapAla~ncha yoginIrmAtR^ikAstathA || 27|| tulasI~nchApi sampUjya grahAnviShNa~ncha sha~Nkaram | navAkShareNa manunA pUjayejjagadambikAm || 28|| sarvopachAraiH sampUjya shrIbhAgavatapustakam | shrIdevyA vA~NmayI mUrtiM yathAvachChobhanAkSharam || 29|| kathAvighnopashAntyarthaM vR^iNuyAtpa~ncha vADavAn | jApyo navArNamantrastaiH pAThyaH saptashatIstavaH || 30|| pradakShiNanamaskArAnkR^itvAnte stutimAcharet | kAtyAyani mahAmAye bhavAni bhuvaneshvari || 31|| saMsArasAgare magnaM mAmuddhara kR^ipAmaye | brahmaviShNushivArAdhye prasIda jagadambike || 32|| mano.abhilaShitaM devi varaM dehi namo.astu te | iti samprArthya shR^iNuyAtkathAM niyatamAnasaH || 33|| vaktAra~nchApi sampUjya vyAsabudhyA yatAtmavAn | mAlyAla~NkAravastrAdyaiH sambhUShya prArthayechcha tam || 34|| sarvashAstretihAsaj~na vyAsarUpa namo.astu te | kathAchandrodayenAntastamaHstomaM nirAkuru || 35|| tadagre tu navAhAntaM kartavyA niyamAstadA | viprAdInupaveshyAdau sampUjyopavishetsvayam || 36|| shrotavyaM sAvadhAnena chaturvargaphalAptaye | gR^ihaputrakalatrAptadhanachintAmapAsya cha || 37|| sUryodayaM samArabhya ki~nchitsUrye.avasheShite | muhUrtamAtraM vishramya madhyAhne vAchayetsudhIH || 38|| malamUtrajayAyaiShAM laghu bhojanamiShyate | haviShyAnnaM varaM bhojyaM sakR^ideva kathArthinA || 39|| athavA syAtphalAhArI payobhugvA dhR^itAshanaH | yathA syAnna kathAvighnastathA kAryaM vichakShaNaiH || 40|| kathAshravaNaniShThAnAM vakShyAmi niyamaM dvijAH | brahmaviShNumaheshAnAM madhye ye bhedadarshinaH || 41|| devIbhaktivihInA ye pAkhaNDA hiMsakAH khalAH | vipraduho nAstikA ye na te yogyAH kathAshrave || 42|| brahmasvaharaNe lubdhAH paradAradhaneShu cha | devasvaharaNe teShAM nAdhikAraH kathAshrave || 43|| brahmachArI cha bhUshAyI satyavaktA jitendriyaH | kathAsamAptau bhu~njIta patrAvalyAM yatAtmavAn || 44|| vR^intAka~ncha kalinda~ncha taila~ncha dvidalaM madhu | dagdhamannaM paryuShitaM bhAvaduShTaM tyajed vratI || 45|| AmiSha~ncha masUrAnnamudakyAdR^iShTameva cha | rasonaM mUlakaM hi~NguM palANDuM gR^i~njanaM tathA || 46|| kUShmANDaM nalikAshAkaM na bhu~njIta kathAvratI | kAmaM krodhaM madaM lobhaM dambha mAna~ncha varjayet || 47|| vipradhrukpatitavrAtyashvapAkayavanAntyajaiH | udakyayA vedabAhyairna vadedyaH kathAvratI || 48|| vedagoguruviprANAM strIrAj~nAM mahatAM tathA | devAnAM devabhaktAnAM na nindAM shR^iNuyAdapi || 49|| vinayaM chArjavaM shauchaM dayAM cha mitabhAShaNam | udAraM mAnasa~nchaiva kuryAdyastu kathAvatI || 50|| shvitrI kuShThI kShayI rugNo bhAgyahInashcha pApakR^it | daridrashchAnapatyashcha bhaktyemAM shR^iNayAtkathAm || 51|| vandhyA vA kAkavandhyA vA durbhagA vA mR^itArbhakA | patadgarbhA~NganA yA cha tAbhiH shrAvyA tathA kathA || 52|| dharmArthakAmamokShAMshcha yo vAchChati vinA shramam | bhagavatyA bhAgavataM shrotavyaM tena yatnataH || 53|| kathAdinAni chaitAni navayaj~naiH samAni hi | teShu dattaM hutaM japtamanantaphaladaM bhavet || 54|| evaM vrataM navAhaM tu kR^itvodyApanamAcharet | mahAShTamIvrataM yadvattathA kAryaM phalepsubhiH || 55|| niShkAmAH shravaNenaiva pUtA muktiM vrajanti hi | bhogamokShapradA nR^INAM yato bhagavatI parA || 56|| pustakasya cha vaktushcha pUjA kAryA tu nityashaH | vaktrA dattaM prasAdaM tu gahNIyAdbhaktipUrvakam || 57|| kumArIH pUjayennityaM bhojayetpArthayechcha yaH | suvAsinIshcha viprAMshcha tasya siddhirna saMshayaH || 58|| gAyatryA nAma sAhasraM samAptAvatha vA paThet | viShNornAmasahasra~ncha sarvadoShopashAntaye || 59|| yasya smR^ityA cha nAmoktyA tapoyaj~nakriyAdiShu | nyUnaM sampUrNatAM yAti tasmAdviShNu~ncha kIrtayet || 60|| devyAH saptashatImantraiH samAptau homamAcharet | devImAhAtmyamUlena navArNamanunAthavA || 61|| gAyatryA tvathavA homaH pAyasena sasarpiShA | yato bhAgavataM tvetad gAyatrImayamIritam || 62|| vAchakaM toShayetsamyagvastrabhUShAdhanAdibhiH | prasanne vAchake sarvAH prasanAstasya devatAH || 63|| brAhmaNAnbhojayedbhaktyA dakShiNAbhishcha toShayet | pR^ithivyAM devarUpAste tuShTeShveShvIpsitaM phalam || 64|| suvAsinIH kumArIshcha devIbhaktyA cha bhojayet | tAbhyo.api dakShiNAM dattvA prArthayetsiddhimAtmanaH || 65|| dadyAddAnAni chAnyAni suvarNaM gAH payasvinIH | hayAnibhAnmedinI~ncha tasya syAdakShayaM phalam || 66|| devIbhAgavataM chaitallikhitaM shobhanAkSharam | hemasiMhAsane sthApya paTTavastreNa veShTitam || 67|| aShTamyAM vA navamyA~ncha vAchakAyArchitAya cha | dadyAtsa bhogAnbhuktveha durlabhaM mokShamApnuyAt || 68|| daridro durbalo bAlastaruNo jaraTho.api vA | purANavettA vandyaH syAtpUjyo mAnyashcha sarvadA || 69|| santi lokasya bahavo guravo guNajanmataH | sarveShAmapi teShA~ncha purANaj~naH paro guruH || 70|| paurANiko brAhmaNastu vyAsAsanasamAshritaH | AsamApte prasa~Nge tu namaskuryAnna kasyachit || 71|| paurANikIM kathAM divyAM ye.api shR^iNvantyabhaktitaH | teShAM puNyaphalaM nAsti duHkhadAridryabhAginAm || 72|| asampUjya purANaM tu tAmbUlakusumAdibhiH | ye shR^iNvanti kathAM devyAste daridrA bhavantihi || 73|| kIrtyamAnAM kathAM tyaktyA ye vrajantyanyato narAH | bhogAntare praNashyanti teShAM dArAshcha sampadaH || 74|| ye cha tu~NgAsanArUDhAH kathAM shR^iNvanti dAmbhikAH | te vAyasA bhavantyatra bhuktvA nirayayAtanAm || 75|| ye chADhyAsanasaMsthAshcha ye vIrAsanasaMsthitAH | shR^iNvanti cha kathAM divyAM te syurarjunashAkhinaH || 76|| kathAyAM kIrtyamAnAyAM ye vadanti duruttaram | rAsabhAste bhavantIha kR^ikalAsAstataH param || 77|| nindanti ye purANaj~nAn kathAM vA pApahAriNIm | te tu janmashataM duShTAH shunakAH syurna saMshayaH || 78|| ye shR^iNvanti kathAM vaktuH samAnAsanasaMsthitAH | gurutalpasamaM pApaM labhante narakAlayAH || 79|| ye chApraNamya shR^iNvanti te bhavanti viShadrumAH | shayAnA ye.api shR^iNvanti bhavantyajagarAhayaH || 80|| ye kadAchana paurANIM na shR^iNvanti kathAM narAH | te ghoraM narakaM bhuktyA bhavanti vanasUkarAH || 81|| ye kathAM nAnumodante vighnaM kurvanti ye shaThAH | koTyabdaM nirayaM bhuktvA bhavanti grAmasUkarAH || 82|| AsanaM bhAjanaM dravyaM phalaM vasvANi kambalam | purANaj~nAya yachChanti te vrajanti hareH padam || 83|| purANapustakasyApi ye paTTavasanaM navam | prayachChanti shubhaM sUtraM te narAH sukhabhAginaH || 84|| purANAnAM tu sarveShAM shravaNAdyatphalaM labhet | tasmAchChataguNaM puNyaM devIbhAgavatAllabhet || 85|| yathA saritsu pravarA ga~NgA deveShu sha~NkaraH | kAvye rAmAyaNaM yadvajjyotiShmatsu yathA raviH || 86|| AhlAdakAnAM chandrashcha dhanAnA~ncha yathA yashaH | kShamAvatAM yathA bhUmirgAmbhIrye sAgaro yathA || 87|| mantrANAM chaiva sAvitrI pApanAshe harismR^itiH | aShTAdashapurANAnAM devIbhAgavataM tathA || 88|| yena kenApyupAyena navakR^itva shR^iNoti chet | na shakyaM tatkalaM vaktuM jIvanmuktaH sa eva hi || 89|| rAjashatrubhaye prApte mahAmArIbhaye tathA | durbhikShe rAShTrabha~Nge cha tachChAntyai shR^iNayAdidam || 90|| bhUtapretavinAshAya rAjyalAbhAya shatrutaH | putralAbhAya shR^iNuyAddevIbhAgavataM dvijAH || 91|| shrImadbhAgavataM yastu paThedvA shR^iNuyAdapi | shlokArdhaM shlokapAdaM vA sa yAti paramAM gatim || 92|| bhagavatyA svayaM devyA shlokArdhena prakAshitam | shiShyaprashiShyadvAreNa tadeva vipulIkR^itam || 93|| na gAyatryA paro dharmo na gAyatryAH paraM tapaH | na gAyatryA samo devo na gAyatryAH paro manuH || 94|| gAtAraM trAyate yasmAd gAyatrI tena sochyate | sAtra bhAgavate devI sarahasyA pratiShThitA || 95|| ato bhAgavatasyAsya devyAH prItikarasya cha | mahAntyapi purANAni kalAM nArhanti ShoDashIm || 96|| shrImadbhAgavataM purANamamalaM yadbrAhmaNAnAM dhanaM dharmo dharmasutena yatra gadito nArAyaNenAmalaH | gAyatryAshcha rahasyamatra cha maNidvIpashcha saMvarNitaH shrIdevyA himabhUbhR^ite bhagavatI gItA cha gItA svayam || 97|| tasmAnnAsya purANasya loke.anyatsadR^ishaM param | ataH sadaiva saMsevyaM devIbhAgavataM dvijAH || 98|| yasyAH prabhAvamakhilaM na hi veda dhAtA no vA harirna girisho na hi chApyanantaH | aMshAMshakA api cha te kimutAnyadevA\- stasyai namo.astu satataM jagadambikAyai || 99|| yatpAdapa~NkajarajaH samavApya vishvaM brahmA sR^ijatyanudina~ncha bibharti viShNuH | rudrashcha saMharati netarathA samarthA\- stasyai namo.astu satataM jagadambikAyai || 100|| sudhAkUpArAntastridashataruvATIvilasite maNidvIpe chintAmaNimayagR^ihe chitraruchire | virAjantImambAM parashivahR^idi smeravadanAM naro dhyAtvA bhogaM bhajati khalu mokSha~ncha labhate || 101|| brahmeshAchyutashakrAdyairmaharShibhirupAsitA | jagatAM shreyase sAstu maNidvIpAdhidevatA || 102|| iti shrIskandapurANe mAnasakhaNDe shrImaddevIbhAgavatamAhAtmye devIbhAgavata\-shravaNavidhivarNanaM nAma pa~nchamo.adhyAyaH || 0\.5|| || samAptamidaM shrImaddevIbhAgavatamAhAtmyam || ## Encoded and proofread by Vishwas Bhide \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}